ကြေကွဲဖွယ်ဆုံးရှုံးမှုကြား ရွှင်လန်းပြီးကျေးဇူးတင်
ဘဝအတ္ထုပ္ပတ္တိ
ကြေကွဲဖွယ်ဆုံးရှုံးမှုကြား ရွှင်လန်းပြီးကျေးဇူးတင်
နန်စီ အီး. ပေါ်တာ ပြောပြသည်
အမေရိကန်ပြည်ထောင်စု အရှေ့တောင်ကမ်းရိုးတန်း ဗဟားမားစ်ကျွန်းရဲ့ ပူအိုက်တဲ့ ၁၉၄၇၊ ဇွန် ၅ ရက်နေ့ကဖြစ်တယ်။ လူဝင်မှုကြီးကြပ်ရေးမှူးတစ်ဦး ကျွန်မနဲ့ ကျွန်မခင်ပွန်းဂျော့ဂျ်ဆီကို မထင်မှတ်ဘဲရောက်လာတယ်။ ဒီကျွန်းပေါ်မှာ ကျွန်မတို့ရှိနေတာကို မကြိုက်တော့လို့ “ဒီကနေ ချက်ချင်းထွက်သွား!” ဆိုတဲ့စာတစ်စောင်ကို သူလှမ်းပေးတယ်။
ဗဟားမားစ်ရဲ့မြို့တော် နာဆောမြို့ကိုရောက်လာတဲ့ ယေဟောဝါသက်သေ သာသနာပြုတွေထဲမှာ ဂျော့ဂျ်နဲ့ကျွန်မက ပထမဦးဆုံးပဲ။ နယူးယောက်အထက်ပိုင်းက ဂိလဒ်သာသနာပြုကျောင်းရဲ့ ရှစ်ကြိမ်မြောက်သင်တန်းကျောင်းဆင်းတဲ့အခါ ကျွန်မတို့ ဒီမှာတာဝန်ကျခဲ့တယ်။ သုံးလလောက်နေပြီးတဲ့နောက် ဒီလိုပြင်းထန်တဲ့တုံ့ပြန်မှုဖြစ်အောင် ကျွန်မတို့ဘာလုပ်ခဲ့သလဲ။ နောက်အနှစ် ၅၀ ကျော်အထိ အဲဒီမှာ ကျွန်မဘယ်လိုနေသလဲ။
ခရစ်ယာန်ဓမ္မအမှုအတွက် လေ့ကျင့်ခြင်း
ကျွန်မဘဝမှာ ကျွန်မအဖေ ဟယ်ရီ ကီလ်နာရဲ့သြဇာစူးခဲ့တယ်။ ယေဟောဝါသက်သေတစ်ယောက်ဖြစ်လာဖို့ အဖေဟာ အတော်များများစွန့်လွှတ်ခဲ့တာက ကျွန်မအတွက် ပုံနမူနာကောင်းတစ်ခုပါ။ အဖေ့ရဲ့ကျန်းမာရေးမကောင်းပေမဲ့ ဘုရားသခင့်နိုင်ငံတော်အကျိုးစီးပွားကို ရှေ့ဦးထားပြီး စနေ၊ တနင်္ဂနွေအပတ်တိုင်းလိုလို ဇွဲရှိရှိနဲ့ အမှုဆောင်ထွက်တယ်။ (မဿဲ ၆:၃၃) ကျွန်မတို့မချမ်းသာကြပေမဲ့ အဖေ့ရဲ့ဖိနပ်ဆိုင်ဟာ ကနေဒါနိုင်ငံ၊ အဲလ်ဘာတာပြည်နယ်၊ လက်သ်ဘရစ်ခ်ျမြို့မှာ ၁၉၃၀ ပြည့်လွန်နှစ်တွေက ဝိညာဉ်ရေးလုပ်ဆောင်မှုဗဟိုဖြစ်ခဲ့တယ်။ ကျွန်မဦးဆုံးမှတ်မိတာကတော့ ရှေ့ဆောင်လို့ခေါ်တဲ့ အချိန်ပြည့်အမှုဆောင်ယေဟောဝါသက်သေတွေဟာ ကျွန်မတို့အိမ်ကိုလည်ပတ်ပြီး တွေ့ကြုံမှုတွေပြောပြကြတယ်။
၁၉၄၃ ခုနှစ်မှာ အဲလ်ဘာတာပြည်နယ်၊ ဖော့တ်မက္ခလွိုဒ်မြို့နဲ့ ကလယ်ရစ်ဟုန်မ်မြို့နားမှာ စပြီးကျွန်မရှေ့ဆောင်ခဲ့တယ်။ အဲဒီအချိန်က ကျွန်မတို့ရဲ့ဟောပြောခြင်းလုပ်ငန်းကို ကနေဒါနိုင်ငံမှာ ပိတ်ပင်ထားတယ်၊ ဒုတိယကမ္ဘာစစ်အတွင်း ဆန့်ကျင်သူတွေရဲ့ တလွဲတင်ပြချက်ကြောင့်ဖြစ်တယ်။ ကျွန်မတို့ရပ်ကွက်ကမိုင် ၆၀ ကျယ်ပေမဲ့ လူငယ့်အားမာန်အပြည့်ရှိတဲ့ကျွန်မတို့ဟာ ဒီဒေသကရပ်ကွက်လေးတွေ၊ လယ်ကွင်းလေးတွေဆီသွားဖို့ စက်ဘီးစီးရတာ၊ ဒါမှမဟုတ် လမ်းလျှောက်ရတာ မပင်ပန်းခဲ့ပါဘူး။ အဲဒီတုန်းက ဂိလဒ်ကျောင်းဆင်းတွေနဲ့ ကျွန်မစကားပြောခွင့်ရပြီး သူတို့ရဲ့တွေ့ကြုံမှုတွေက ကျွန်မကို သာသနာပြုဖြစ်ချင်စိတ်ရှိလာစေတယ်။
၁၉၄၅ ခုနှစ်မှာ ကနေဒါနိုင်ငံ၊ စပ်စ်ကက်ချူဝမ်က ဂျော့ဂျ် ပေါ်တာနဲ့ ကျွန်မလက်ထပ်ခဲ့တယ်။ သူ့ရဲ့မိဘတွေက ၁၉၁၆ ခုနှစ်ကတည်းက စိတ်ထက်သန်တဲ့သက်သေခံတွေဖြစ်ခဲ့ပြီး သူလည်းပဲ အချိန်ပြည့်အမှုဆောင်တာကို သူ့ရဲ့လုပ်ငန်းအဖြစ် ရွေးချယ်ခဲ့တယ်။ ကျွန်မတို့ပထမဆုံးတာဝန်ကျတဲ့နေရာကတော့ ကနေဒါ၊ ဗဲန်ကူးဗားမြောက်ဘက်က သာယာလှပတဲ့ လင်းဗဲလီရပ်ကွက်ပါပဲ။ သိပ်မကြာခင် ဂိလဒ်ကျောင်းတက်ဖို့ ကျွန်မတို့ဖိတ်ခေါ်ခံရတယ်။
နှစ်တွေတစ်လျှောက် တခြားဘာသာရေးကျောင်းတွေတက်ခဲ့တဲ့ ကျောင်းဆင်းတွေနဲ့ ကျွန်မစကားပြောခဲ့ဖူးတယ်၊ သူတို့ရဲ့ဘာသာရေးသင်တန်းက ဘုရားသခင်နဲ့ သမ္မာကျမ်းစာအပေါ် သူတို့ရဲ့ယုံကြည်ခြင်း လျော့နည်းစေခဲ့တာကို ကျွန်မသိရှိခဲ့ရတယ်။ ဂိလဒ်မှာ ကျွန်မတို့သင်ကြားခံခဲ့ရတာတွေက ကျွန်မတို့ရဲ့စဉ်းစားနိုင်စွမ်းကို ထက်မြက်စေတဲ့အပြင် ယေဟောဝါဘုရားသခင်နဲ့ ကျမ်းစာကို ပိုပြီးယုံကြည်လာစေတယ်။ ကျွန်မတို့ရဲ့အတန်းဖော်တွေက တရုတ်၊ စင်္ကာပူ၊ အိန္ဒိယ၊ အာဖရိကထဲက နိုင်ငံတွေ၊ တောင်အမေရိကနဲ့ အခြားနိုင်ငံတွေမှာ တာဝန်ကျတယ်။ ကျွန်မတို့တာဝန်ကျမယ့်နေရာက အပူပိုင်းဒေသ ဗဟားမားစ်ကျွန်းဆိုတာ သိလိုက်ရတဲ့အခါ စိတ်လှုပ်ရှားသွားတာကို ကျွန်မအခုထိမှတ်မိသေးတယ်။
ကျွန်မတို့နေနိုင်ခဲ့ပုံ
အတန်းဖော်တွေသွားရမယ့်ခရီးစဉ်တွေနဲ့ ယှဉ်လိုက်ရင် ကျွန်မတို့ရဲ့ဗဟားမားစ်ခရီးစဉ်ဟာ တိုတိုလေးပါ။ မကြာခင် ပူအိုက်တဲ့ရာသီ၊ အပြာရောင်မိုးကောင်းကင်၊ စိမ်းပြာပြာရေ၊ အရောင်ဖျော့ဖျော့အဆောက်အအုံတွေနဲ့ များပြားလှတဲ့စက်ဘီးတွေကြားမှာ ကျွန်မတို့ပျော်မွေ့လာကြတယ်။ ဒါပေမဲ့ ရောက်ရောက်ချင်း ကျွန်မစိတ်ထဲအစွဲမှတ်ဆုံးကတော့ ကျွန်မတို့သင်္ဘောဆိုက်တဲ့အချိန်ကို စောင့်မျှော်နေကြတဲ့ သက်သေခံငါးယောက်အဖွဲ့လေးပါပဲ။ ဒီကယဉ်ကျေးမှုဟာ ကျွန်မတို့နဲ့ တခြားစီပဲဆိုတာကို မကြာခင်မှာသိလာခဲ့ရတယ်။ ဥပမာ၊ ကျွန်မကို လူအများရှေ့မှာအချစ်ဆိုပြီး ကျွန်မခင်ပွန်းကခေါ်လို့မဖြစ်ဘူး၊ ဘာလို့လဲဆိုတော့ ဒီစကားလုံးက မယားမြှောင်တွေကိုပဲခေါ်တာကိုး။
မကြာခင်မှာ ခရစ်ယာန်ဓမ္မဆရာတွေက လူတွေနဲ့ကျွန်မတို့ပြောဆိုပေါင်းသင်းနေတာကို စိုးရိမ်လာပြီး ကျွန်မတို့ဟာ ကွန်မြူနစ်တွေလို့ လိမ်လည်စွပ်စွဲခဲ့တယ်။ ရလဒ်ကတော့ ဒီနိုင်ငံကထွက်
သွားဖို့ အမိန့်ပေးခံရတယ်။ ဒါပေမဲ့ အဲဒီတုန်းက ဒီကျွန်းပေါ်မှာအယောက် ၂၀ လောက်တောင်မရှိတဲ့ သက်သေခံတွေက ကျွန်မတို့ဆက်နေခွင့်ရအောင် ထောင်နဲ့ချီလက်မှတ်ထိုးထားတဲ့ အသနားခံစာတစ်စောင် ချက်ချင်းရလာတယ်။ ဒါနဲ့ပဲ ထုတ်ထားတဲ့အမိန့် ပျက်သွားတယ်။ရပ်ကွက်သစ်တစ်ခုသို့
ဘုရားသခင်ကိုချစ်တဲ့ နှလုံးသားတွေထဲမှာ ကျမ်းစာအမှန်တရားက ချက်ချင်းအညှောက်ပေါက်လာလို့ ဗဟားမားစ်ကို ဂိလဒ်သာသနာပြုတွေ ထပ်ပို့ပေးရတယ်။ အဲဒီနောက် ၁၉၅၀ ပြည့်နှစ်မှာ ဌာနခွဲရုံးတစ်ခုတည်ထောင်ခဲ့တယ်။ နောက်ဆယ်နှစ်ကြာတော့ နယူးယောက်၊ ဘရွတ်ကလင် ဌာနချုပ်က အမှုထမ်းအဖွဲ့ဝင် မီလ်တင် ဟင်ရှယ်လ် ဗဟားမားစ်ကိုလည်ပတ်ပြီး ဗဟားမားစ်ရဲ့နောက်တစ်ကျွန်းကိုသွားပြီး ဟောပြောခြင်းလုပ်ငန်းဖွင့်လိုတဲ့သူတွေ ရှိသလားလို့မေးတယ်။ ဂျော့ဂျ်နဲ့ ကျွန်မက တာဝန်ယူမယ်လို့ဆန္ဒပြုလိုက်တော့ လောင်းကျွန်းပေါ်မှာ ၁၁ နှစ်နေဖို့ စပြီးအကြောင်းဖန်လာခဲ့တယ်။
ဗဟားမားစ်မှာပါဝင်တဲ့ ကျွန်းတွေထဲက ဒီကျွန်းဟာမိုင် ၉၀ ရှည်ပြီး ၄ မိုင်ကျယ်တယ်၊ အဲဒီတုန်းက ဒီကျွန်းပေါ်မှာ မြို့ရယ်လို့မရှိသေးဘူး။ မြို့တော်ဖြစ်တဲ့ ကလဲရင့်စ်တောင်းမှာ အိမ်ခြေ ၅၀ လောက်ပဲရှိတယ်။ နေပုံထိုင်ပုံက အတော်လေးကိုခေတ်နောက်ကျတယ်—လျှပ်စစ်မီးမရှိ၊ ရေပိုက်မရှိ၊ အိမ်ပြင်မှာပဲ ချက်ပြုတ်ပြီး ရေသုံးရတယ်။ ဒါကြောင့် နယ်စွန်နယ်ဖျားကျွန်းသားတွေလိုပဲ ကျွန်မတို့ပါလိုက်ပြီးနေထိုင်ခဲ့ရတယ်။ ဒီကျွန်းသားတွေက ကျန်းမာရေးအကြောင်း စကားဖောင်ဖွဲ့ပြောတာ ကြိုက်ကြတယ်။ နှုတ်ဆက်တဲ့အခါ “ဒီနေ့ ဘယ်လိုနေသလဲ” လို့မမေးမိဖို့ ကျွန်မတို့သတိထားတတ်လာတယ်၊ မဟုတ်ရင် သူ့ရဲ့ဆေးရာဇဝင်ကို အသေးစိတ်ပြောပြလိမ့်မယ်။
ကျွန်မတို့ အများအားဖြင့် မီးဖိုတစ်ဆောင်မှတစ်ဆောင် သက်သေခံရကြတယ်၊ လူတွေကို သူတို့ရဲ့အိမ်မကြီးအပြင်က သက်ငယ်အမိုးနဲ့ ထင်းမီးဖိုဆောင်တွေမှာပဲ တွေ့ဆုံတတ်တဲ့အတွက်ကြောင့်ပါပဲ။ ဒီရပ်ကွက်တွေကလူစုတွေဟာ ဆင်းရဲကြပေမဲ့ သဘောကောင်းတဲ့ လယ်သမားတွေ၊ တံငါသည်တွေဖြစ်ကြတယ်။ အများက ဘာသာတရားကိုင်းရှိုင်းရုံမက အရမ်းအယူသီးကြတယ်။ အဖြစ်အပျက်အဆန်းတွေကို နိမိတ်ကောက်တတ်ကြတယ်။
ခရစ်ယာန်ဓမ္မဆရာတွေက ကျွန်မတို့ထားရစ်ခဲ့တဲ့ ကျမ်းစာ,စာပေတွေကို အိမ်ထဲအတင်းဝင်၊ ဆုတ်ဖြဲပစ်တာကို ဝန်မလေးကြဘူး။ ဒီလိုနဲ့ ကြောက်တတ်တဲ့သူတွေကို ခြောက်လှန့်ပေမဲ့ လူတိုင်းကတော့ ကြောက်ဒူးမတုန်ကြပါဘူး။ ဥပမာ၊ စိတ်ဆတ်တဲ့အသက် ၇၀ အရွယ်အမျိုးသမီးတစ်ယောက်က အနိုင်ကျင့်တာကိုမခံဘူး။ သမ္မာကျမ်းစာကို သူကိုယ်တိုင်သဘောပေါက်နားလည်ချင်တယ်၊ နောက်ဆုံး တခြားသူတွေနဲ့အတူ သူလည်းသက်သေခံဖြစ်လာတယ်။ စိတ်ဝင်စားသူတွေ ပိုများလာတော့ တချို့တနင်္ဂနွေရက်တွေမှာ သူတို့စည်းဝေးတက်နိုင်ဖို့မိုင် ၂၀၀ လောက်ကို ဂျော့ဂျ်ကားမောင်းပေးခဲ့ရတယ်။
တခြားသက်သေခံတွေမရှိသေးတဲ့ အစောပိုင်းလတွေမှာ ဂျော့ဂျ်နဲ့ ကျွန်မတို့ရဲ့ဝိညာဉ်ရေးကို ဆက်ထိန်းထားနိုင်ဖို့ ခရစ်ယာန်စည်းဝေးအားလုံးကို မှန်မှန်ကျင်းပခဲ့ကြတယ်။ ဒီအပြင် တနင်္လာနေ့ညတိုင်း ကင်းမျှော်စင်မဂ္ဂဇင်းက သင်ခန်းစာကိုလေ့လာတာနဲ့ ကျမ်းစာဖတ်တာကို မှန်မှန်လုပ်ခဲ့ကြတယ်။ ကင်းမျှော်စင် နဲ့ နိုးလော့! အားလုံးကိုရတာနဲ့ ချက်ချင်းဖတ်ခဲ့ကြတယ်။
ကျွန်မတို့ လောင်းကျွန်းမှာရှိနေတုန်း ကျွန်မအဖေဆုံးသွားတယ်။ နောက်နွေရာသီ ၁၉၆၃ ခုနှစ်မှာ အမေ့ကိုခေါ်ပြီး ကျွန်မတို့အနားမှာနေဖို့ စီစဉ်ခဲ့တယ်။ အမေဟာ အသက်ကြီးနေပေမဲ့လည်း အတော်လေးနေသားကျလာပြီး အမေသေတဲ့ ၁၉၇၁ ခုနှစ်အထိ လောင်းကျွန်းမှာ သူနေထိုင်သွားခဲ့တယ်။ အခုဆိုရင် လောင်းကျွန်းအသင်းတော်က ဘုရားသခင့်နိုင်ငံတော်ခန်းမအသစ်စက်စက်တစ်လုံးရှိနေပါပြီ။
ကြေကွဲဖွယ်စိန်ခေါ်ချက်တစ်ရပ်
၁၉၈၀ ပြည့်နှစ်မှာ ဂျော့ဂျ်ရဲ့ကျန်းမာရေး စပြီးဖောက်လာတာကို သတိပြုမိကြတယ်။ ဒီလိုနဲ့ ကျွန်မဘဝမှာ စိတ်အထိခိုက်ရဆုံးတွေ့ကြုံမှုတစ်ခုဖြစ်တဲ့ ကျွန်မချစ်မြတ်နိုးရတဲ့ခင်ပွန်း၊ လုပ်ဖော်ဆောင်ဖက်နဲ့ အဖော်ဟာ အဲလ်ဇိုင်းမားရောဂါနဲ့ တဖြည်းဖြည်းမှတ်ဉာဏ်ချို့ယွင်းသွားတာကို တွေ့မြင်ရခဲ့ပါတယ်။ သူ့ရဲ့စိတ်သဘောထားလုံးလုံး ပြောင်းလဲသွားတယ်။ နောက်ဆုံး ဝမ်းနည်းစရာအကောင်းဆုံးအခြေအနေကို သူမသေခင် လေးနှစ်လောက်ခံရပြီး ၁၉၈၇ ခုနှစ်မှာဆုံးသွားရှာတယ်။ သူတတ်နိုင်သရွေ့ ကျွန်မနဲ့အတူအမှုဆောင်ထွက်တယ်၊ စည်းဝေးတွေတက်တယ်၊ ဒါပေမဲ့ သူကြိုးစားသမျှကိုကြည့်ပြီး ကျွန်မအကြိမ်ကြိမ်မျက်ရည်ကျခဲ့ရတယ်။ ခရစ်ယာန်ညီအစ်ကိုတွေရဲ့မေတ္တာက တကယ့်ကိုပဲစိတ်သက်သာမှုရစေပေမဲ့ သူ့ကို ကျွန်မလွမ်းဆွတ်နေတုန်းပါ။
ဂျော့ဂျ်နဲ့ကျွန်မရဲ့အိမ်ထောင်ရေးမှာ တန်ဖိုးအရှိဆုံးအရာတစ်ခုကတော့ ကျွန်မတို့နှစ်ဦး တရင်းတနှီးအပြန်အလှန်စကားစမြည်ပြောဆိုလေ့ရှိကြတယ်။ အခု ဂျော့ဂျ်မရှိတော့တဲ့အတွက် ယေဟောဝါက မိမိရဲ့ကျေးကျွန်တွေကို “မခြားမလပ်ဆုတောင်း” ဖို့၊ ‘စွဲစွဲမြဲမြဲဆုတောင်း’ ဖို့နဲ့ ‘ဆုတောင်းခြင်းအမျိုးမျိုး’ နဲ့ဆုတောင်းဖို့ ဖိတ်ခေါ်ထားတာကို အရင်ကထက် ကျွန်မပိုပြီးကျေးဇူးတင်မိတယ်။ (၁ သက်သာလောနိတ် ၅:၁၇; ရောမ ၁၂:၁၂; ဧဖက် ၆:၁၈) ကျွန်မတို့ရဲ့အကျိုးကို ယေဟောဝါဂရုစိုက်ကြည့်ရှုနေတယ်ဆိုတာကိုသိရတာ အရမ်းကိုစိတ်သက်သာစေပါတယ်။ “ငါတို့ဝန်ကို နေ့စဉ်ထမ်းတော်မူသောအရှင်ဘုရား . . . မင်္ဂလာရှိတော်မူပါစေသော” လို့သီဆိုခဲ့တဲ့ ဆာလံဆရာလိုပဲ ကျွန်မလည်းခံစားရတယ်။ (ဆာလံ ၆၈:၁၉၊ သမ) ယေရှုအကြံပေးသလို တစ်ရက်ချင်းအသက်ရှင်ရင်း ကျွန်မရဲ့ကန့်သတ်ချက်တွေကိုအသိအမှတ်ပြုပြီး၊ နေ့တိုင်းရရှိတဲ့ကောင်းချီးတွေအတွက် ကျေးဇူးတင်တတ်တာဟာ အကောင်းဆုံးအသက်ရှင်နည်းပါ။—မဿဲ ၆:၃၄။
ခရစ်ယာန်ဓမ္မအမှုမှ ရွှင်လန်းဖွယ်ဆုလာဘ်များ
ခရစ်ယာန်ဓမ္မအမှုမှာ အလုပ်များနေခြင်းက အတိတ်ကိုတနုံ့နုံ့တွေးမနေရအောင် ကျွန်မကိုထောက်ကူပေးခဲ့တယ်။ ဒီလိုလုပ်လို့ စိတ်ကျဝေဒနာရစေနိုင်တဲ့ စိတ်ဓာတ်တွေကို ချိုးနှိမ်နိုင်ခဲ့ပါတယ်။ အခြားသူတွေကို ကျမ်းစာအမှန်တရားသင်ပေးရတာကလည်း ရွှင်လန်းမှုအထူးရစေတယ်။ ကျွန်မအသက်တာမှာ စည်းစနစ်နဲ့တည်တည်ငြိမ်ငြိမ်ရှိစေတဲ့ ဝိညာဉ်ရေးလုပ်ရိုးလုပ်စဉ်ရှိတယ်။—ဖိလိပ္ပိ ၃:၁၆။
တစ်ခါက အစောပိုင်း ၄၇ နှစ်လောက်မှာ ဘုရားသခင့်နိုင်ငံတော်သတင်းကို ကျွန်မဟောခဲ့ဖူးတဲ့ အမျိုးသမီးတစ်ယောက်ဆီကနေ ဖုန်းလာတယ်။ သူက ၁၉၄၇ ခုနှစ်မှာ ဗဟားမားစ်ကို ကျွန်မတို့ရောက်တဲ့အချိန် ကျွန်မတို့သင်ပေးတဲ့ ပထမဆုံးကျမ်းစာသင်သားတစ်ယောက်ရဲ့ သမီးဖြစ်တယ်။ သူရဲ့အမေ၊ အဖေနဲ့ အစ်ကို၊ အစ်မတွေအားလုံးရယ် သူတို့ရဲ့သားသမီးတွေ၊ မြေးတွေပါ ယေဟောဝါသက်သေတွေဖြစ်လာခဲ့ကြတယ်။ တကယ်တော့ ဒီအမျိုးသမီးရဲ့မိသားစုထဲကအယောက် ၆၀ ကျော်ဟာ သက်သေခံတွေဖြစ်ကြတယ်။ ဒါပေမဲ့ သူကျတော့ ကျမ်းစာအမှန်တရားကို တစ်ခါမှလက်မခံခဲ့ဘူး။ အခုတော့ သူလည်းပဲ ယေဟောဝါဘုရားသခင့်ကျေးကျွန်တစ်ယောက်ဖြစ်ဖို့ အသင့်ရှိနေပြီတဲ့။ ဂျော့ဂျ်နဲ့
ကျွန်မ ဗဟားမားစ်ကို ရောက်တဲ့အချိန်မှာရှိတဲ့ လက်တစ်ဆုပ်စာသက်သေခံကနေ ၁,၄၀၀ ကျော်အထိ တိုးလာတာကိုတွေ့ရတာဟာ တကယ်ကိုအားရစရာပါပဲ!ကျွန်မမှာ သားသမီးမရှိတဲ့အတွက် ဝမ်းနည်းသလားလို့ တစ်ခါတလေ အမေးခံရတယ်။ သားသမီးရှိတာ ကောင်းချီးတစ်ခုဖြစ်နိုင်တယ်။ ဒါပေမဲ့ ကျွန်မရဲ့ဝိညာဉ်ရေးသားသမီးတွေ၊ မြေးတွေနဲ့ မြစ်တွေ အမြဲတမ်းပြသနေတဲ့မေတ္တာကို မိဘအရင်းအားလုံးတောင် မခံစားကြရပါဘူး။ မှန်ပါတယ်၊ “ကျေးဇူးပြု” သူတွေနဲ့ “ကောင်းသောအကျင့်၌ ကြွယ်ဝပြည့်စုံ” သူတွေဟာ အပျော်ရွှင်ဆုံးလူသားတွေပါ။ (၁ တိမောသေ ၆:၁၈) အဲဒါကြောင့် ကျွန်မကျန်းမာရေး ခွင့်ပြုနေသရွေ့ ခရစ်ယာန်ဓမ္မအမှုမှာ ကျွန်မအလုပ်များနေတာ။
တစ်နေ့ သွားစိုက်ဆရာဝန်ရုံးခန်းမှာ အမျိုးသမီးငယ်တစ်ယောက်က ကျွန်မနားကပ်လာပြီး “ကျွန်မကို ရှင်မသိပေမဲ့ ရှင့်ကို ကျွန်မသိတယ်၊ ရှင့်ကို ကျွန်မချစ်တယ်ဆိုတာ သိစေချင်တယ်” တဲ့။ ပြီးတော့ ကျမ်းစာအမှန်တရားကို သူဘယ်လိုသိရှိလာခဲ့တဲ့အကြောင်းနဲ့ ဗဟားမားစ်ကို ကျွန်မတို့သာသနာပြုတွေရောက်လာတဲ့အတွက် အရမ်းကျေးဇူးတင်တဲ့အကြောင်း အမျှင်မပြတ်ပြောပြခဲ့တယ်။
နောက်တစ်ခါ ကျွန်မခွင့်ယူပြီးပြန်လာတဲ့အခါ အခု ကျွန်မနေတဲ့ နာဆောမြို့ ယေဟောဝါသက်သေဌာနခွဲရုံးက ကျွန်မရဲ့အခန်းဝမှာ နှင်းဆီတစ်ပွင့်ကို တွေ့ခဲ့တယ်။ “သင် ပြန်ရောက်လာတဲ့အတွက် ဝမ်းသာတယ်” ဆိုတဲ့စာတိုလေးတစ်စောင်လည်းပါတယ်။ ကျွန်မနှလုံးထဲမှာ ကျေးဇူးတင်စိတ်ယိုဖိတ်တဲ့အထိပဲ၊ ယေဟောဝါရဲ့နှုတ်မြွက်စကားတော်၊ အဖွဲ့အစည်းနဲ့ ကိုယ်တော့်ဝိညာဉ်တော်ကြောင့် ဖြစ်ပွားလာတဲ့ လူအမျိုးမျိုးကို ကျွန်မတွေ့ရတဲ့အခါ ဘုရားသခင်ကို ပိုပြီးချစ်လာစေတယ်။ ယေဟောဝါရဲ့ထောက်မကူညီမှုကိုရနေကြောင်း ကျွန်မတို့ဝန်းကျင်မှာရှိတဲ့လူတွေကနေ ထင်ရှားပါတယ်။
ကျေးဇူးတင်စိတ်ယိုဖိတ်နေခြင်း
ကျွန်မရဲ့ဘဝဟာ အမြဲတမ်းဖြောင့်ဖြူးခဲ့တာမဟုတ်ပါဘူး၊ အခုလည်း အခက်အခဲရှိပါတယ်။ ဒါပေမဲ့လည်း ကျေးဇူးတင်စရာတွေအများကြီးရှိတယ်—ခရစ်ယာန်ဓမ္မအမှုကနေရတဲ့ ရွှင်လန်းမှုတွေ၊ ခရစ်ယာန်ညီအစ်ကို၊ ညီအစ်မတွေရဲ့ မေတ္တာနဲ့ခင်မင်မှုကိုခံစားရတာ၊ ယေဟောဝါရဲ့အဖွဲ့အစည်းကနေရတဲ့ မေတ္တာပါကြည့်ရှုစောင့်ရှောက်မှု၊ သမ္မာကျမ်းစာထဲက လှပတင့်တယ်တဲ့အမှန်တရားတွေ၊ ချစ်မြတ်နိုးရသူတွေ ရှင်ပြန်ထမြောက်လာတဲ့အခါ သူတို့နဲ့ပြန်တွေ့ရမယ့်မျှော်လင့်ချက်နဲ့ ယေဟောဝါရဲ့သစ္စာရှိကျေးကျွန်တစ်ယောက်နဲ့ ၄၂ နှစ်အိမ်ထောင်ဖက်ခဲ့ရတဲ့ အမှတ်တရအဖြစ်အပျက်တွေကြောင့်ပဲလေ။ ကျွန်မတို့လက်မထပ်ခင်က ကျွန်မခင်ပွန်းသိပ်မြတ်နိုးတဲ့ အချိန်ပြည့်အမှုဆောင်မှာ သူဆက်ပါဝင်နိုင်ဖို့ သူ့ကိုအမြဲတမ်းကူညီပေးနိုင်ပါစေလို့ ကျွန်မဆုတောင်းခဲ့တယ်။ အဲဒီဆုတောင်းချက်ကို ကြင်နာစွာနဲ့ ယေဟောဝါဖြေကြားပေးခဲ့တယ်။ ဒါကြောင့် ယေဟောဝါကို ကျွန်မကျေးဇူးတင်ကြောင်းကို အမြဲတမ်းသစ္စာရှိခြင်းအားဖြင့် ဖော်ပြချင်ပါတယ်။
ဗဟားမားစ်ဟာ အပူပိုင်းဒေသရဲ့သာယာကြည်နူးစရာတွေကို ခံစားဖို့ ဒေါ်လာထောင်နဲ့ချီအကုန်အကျခံရောက်လာတဲ့ ကမ္ဘာ့လှည့်ခရီးသည်တွေအတွက် ရေပန်းစားတဲ့နေရာဖြစ်ပါတယ်။ ယေဟောဝါရဲ့အဖွဲ့အစည်းက ညွှန်ကြားတဲ့ဘယ်နေရာကိုမဆို ကိုယ်တော့်ရဲ့အမှုတော်ကိုထမ်းဆောင်ဖို့ ရွေးချယ်ခဲ့လို့ ဘုရားသခင့်နိုင်ငံတော်သတင်းကောင်းကို ကြွေးကြော်ရင်း ဒီကျွန်းစုတစ်ဖက်စွန်းကနေ တခြားတစ်ဖက်စွန်းအထိ ရောက်သွားခဲ့ရတဲ့အခွင့်အရေးကို ကျွန်မရရှိခဲ့ပြီ။ ဒါထက်မက ဖော်ရွေတတ်တဲ့ဗဟားမားစ်ကျွန်းသားတွေထဲက အမွန်မြတ်ဆုံးသူတွေရဲ့မေတ္တာကို ကျွန်မသိရှိလာရပြီး တန်ဖိုးထားတတ်လာပါပြီ။
ကျွန်မမိဘတွေဆီ အမှန်တရားယူဆောင်ပေးလာခဲ့တဲ့သူတွေကိုရယ် ဘုရားသခင့်နိုင်ငံတော်ကို ရှေ့ဦးရှာလိုစိတ်ပြင်းပြလာရအောင် ကျွန်မရဲ့လူငယ့်စိတ်နှလုံးထဲ အမြစ်စွဲစေခဲ့တဲ့မိဘတွေကိုပါ ကျေးဇူးအများကြီးတင်ပါတယ်။ ယေဟောဝါရဲ့ကျေးကျွန်ဖြစ်တဲ့ လူငယ်တွေဟာ ခရစ်ယာန်ဓမ္မအမှုမှာတိုးချဲ့ပါဝင်ခွင့်တွေရဖို့ “အလွန်ကြီးစွာသောတံခါး” ထဲဝင်ကြမယ်ဆိုရင် ကောင်းချီးများစွာ အလားတူပဲခံစားနိုင်မှာဖြစ်တယ်။ (၁ ကောရိန္သု ၁၆:၉) “ဘုရားတို့၏ဘုရား[သခင်]” ယေဟောဝါကိုဂုဏ်တင်ဖို့ သင့်အသက်တာကိုအသုံးချမယ်ဆိုရင် အသင်လည်းပဲ ကျေးဇူးတင်စိတ်ယိုဖိတ်နေမှာပါ။—တရားဟောရာ ၁၀:၁၇; ဒံယေလ ၂:၄၇။
[စာမျက်နှာ ၂၄ ပါ ရုပ်ပုံ]
၁၉၄၄ ခုနှစ်တွင် ဘီ.စီ. ဗစ်တိုးရီးယားမြို့၌ လမ်းပေါ် သက်သေခံလုပ်ငန်း
[စာမျက်နှာ ၂၄ ပါ ရုပ်ပုံ]
၁၉၄၆ ခုနှစ်တွင် ဂျော့ဂျ်နှင့်ကျွန်မ ဂိလဒ်ကျောင်းတက်ရောက်ခဲ့
[စာမျက်နှာ ၂၅ ပါ ရုပ်ပုံ]
၁၉၅၅ ခုနှစ်တွင် ဗဟားမားစ်၊ နာဆောမြို့ရှိ ခရစ်ယာန်သာသနာပြုအိမ်ရှေ့၌ ဂျော့ဂျ်နှင့်အတူ
[စာမျက်နှာ ၂၆ ပါ ရုပ်ပုံ]
၁၉၆၁ မှ ၇၂ ခုနှစ်အထိ ကျွန်မတို့အမှုဆောင်ခဲ့သော ဒက်မဲန်စ်ကေးရှိ ခရစ်ယာန်သာသနာပြုအိမ်