နောက်ဆုံးအောင်ပွဲသို့ ချီတက်နေခြင်း!
နောက်ဆုံးအောင်ပွဲသို့ ချီတက်နေခြင်း!
“ထိုအခါ ကြည့်လော့! မြင်းဖြူတစ်စီးငါမြင်၏။ မြင်းစီးသူရဲသည် လေးကိုကိုင်ထား၏။ သူ့အားသရဖူကိုပေး၏။ သူသည် အောင်မြင်လျက်လည်းကောင်း၊ အပြီးသတ်အောင်ပွဲခံရန်လည်းကောင်း ထွက်သွားလေသည်။”—ဗျာဒိတ် ၆:၂၊ ကဘ။
၁။ အဆင်းအာရုံ၌ အဘယ်အနာဂတ်ဖြစ်ရပ်များကို ယောဟန်မြင်တွေ့ခဲ့သနည်း။
တမန်တော်ယောဟန်သည် ဘုရားသခင့်ဝိညာဉ်တော်မှုတ်သွင်းခြင်းအားဖြင့် နောင်အနှစ် ၁,၈၀၀ ခန့်ကို ကြိုမြင်နိုင်ခဲ့ပြီး ဘုရင်အဖြစ် ခရစ်တော်နန်းတင်ခံရခြင်းကို ဖော်ပြခဲ့သည်။ အဆင်းအာရုံ၌ မိမိမြင်တွေ့ခဲ့သောအရာ ပြည့်စုံလာမည်ကို ယောဟန်ယုံကြည်ခြင်းရှိဖို့လိုအပ်ခဲ့သည်။ ကြိုဟောထားသော ဤနန်းတက်ခြင်းသည် ၁၉၁၄ ခုနှစ်တွင်ဖြစ်ပျက်ခဲ့ကြောင်း ယနေ့ ထင်ရှားသောအထောက်အထား ကျွန်ုပ်တို့၌ရှိ၏။ ယေရှုခရစ်သည် “အောင်မြင်လျက်လည်းကောင်း၊ အပြီးသတ်အောင်ပွဲခံရန်လည်းကောင်း ထွက်” သွားကြောင်းကို ယုံကြည်ခြင်းမျက်စိနှင့် ကျွန်ုပ်တို့မြင်ရကြသည်။
၂။ ဘုရားသခင့်နိုင်ငံတော်တည်ထောင်ခြင်းကို စာတန်မည်သို့တုံ့ပြန်သနည်း၊ ယင်းက အဘယ်အရာ၏သက်သေသာဓကဖြစ်သနည်း။
၂ ဘုရားသခင့်နိုင်ငံတော်တည်ထောင်ပြီးနောက် စာတန်သည် ကောင်းကင်မှနှင်ချခံခဲ့ရသဖြင့် ဒေါသကြီးစွာ အပြင်းအထန်တိုက်ခိုက်သော်လည်း အောင်မြင်ဖို့ အလားအလာမရှိချေ။ (ဗျာဒိတ် ၁၂:၇-၁၂) သူ၏အမျက်ဒေါသက ကမ္ဘာ့အခြေအနေကို ဆိုးသည်ထက် ပို၍ဆိုးရွားစေခဲ့ပြီ။ လူ့ဘောင်အဖွဲ့အစည်းမှာ အစိတ်စိတ်အမြွှာမြွှာပြိုကွဲမည့်ဟန်ရှိ၏။ ယေဟောဝါသက်သေများအတွက်မူ ယင်းသည် “အပြီးသတ်အောင်ပွဲခံရန်” မိမိတို့ဘုရင် ရှေ့သို့ချီနေသည့် သာဓကဖြစ်၏။
ဖွဲ့စည်းလျက်ရှိသော ကမ္ဘာသစ်အဖွဲ့အစည်း
၃၊ ၄။ (က) ဘုရားသခင့်နိုင်ငံတော်တည်ထောင်ချိန်မှစ၍ ခရစ်ယာန်အသင်းတော်တွင် အဖွဲ့အစည်းဆိုင်ရာ အဘယ်ပြောင်းလဲမှုများရှိခဲ့ပြီနည်း၊ ၎င်းတို့ အဘယ်ကြောင့်လိုအပ်သနည်း။ (ခ) ဤပြောင်းလဲမှုများကြောင့် ဟေရှာယကြိုပြောခဲ့သည့်အတိုင်း အဘယ်အကျိုးရရှိခဲ့ပြီနည်း။
၃ ဘုရားသခင့်နိုင်ငံတော်တည်ထောင်ပြီးခဲ့ပြီဖြစ်၍ ယခု နိုင်ငံတော်တာဝန်ပိုမိုတိုးများလာသော ပြန်လည်တည်ထောင်ထားသည့် ခရစ်ယာန်အသင်းတော်ကို ပထမရာစုခရစ်ယာန်အသင်းတော်ပုံစံနှင့် ပို၍ကိုက်ညီစေရန် ဖွဲ့စည်းဖို့အချိန်တိုင်ပြီဖြစ်သည်။ ထို့ကြောင့် ၁၉၃၈၊ ဇွန် ၁ ရက်နှင့် ၁၅ ရက်ထုတ်ကင်းမျှော်စင်က ခရစ်ယာန်အသင်းတော်သည် မည်သို့လည်ပတ်သင့်ကြောင်းကို ဆန်းစစ်ထားသည်။ ထို့နောက် ၁၉၇၁၊ ဒီဇင်ဘာ ၁၅ ရက်ထုတ်က “တရားဝင်ကော်ပိုရေးရှင်းနှင့်မတူသော အုပ်ချုပ်ရေးအဖွဲ့တစ်ခု” ဟူသောဆောင်းပါး၌ မျက်မှောက်ခေတ်အုပ်ချုပ်ရေးအဖွဲ့ကို ပိုမိုရှင်းလင်းစွာ ခွဲခြားဖော်ပြထားသည်။ ၁၉၇၂ ခုတွင် ဒေသခံအသင်းတော်များကို ကူညီ၍ ညွှန်ကြားပေးရန် အကြီးအကဲအဖွဲ့များကို ခန့်အပ်ပေးခဲ့သည်။
၄ ပြန်လည်၍ လျောက်ပတ်စွာကြီးကြပ်ပေးခြင်းက ခရစ်ယာန်အသင်းတော်ကို အကြီးအကျယ်ခိုင်ခံ့မြဲမြံစေခဲ့သည်။ ထို့အပြင် အကြီးအကဲများကို တရားရေးကိစ္စရပ်များတွင် လေ့ကျင့်ပေးခြင်းအပါအဝင် သူတို့၏ဝတ္တရားများကိုထမ်းဆောင်ဖို့ လေ့ကျင့်ညွှန်ကြားပေးရန် အုပ်ချုပ်ရေးအဖွဲ့၏ အစီအစဉ်များသည်လည်း များစွာအထောက်အကူဖြစ်ခဲ့သည်။ ဘုရားသခင့်မြေကြီးဆိုင်ရာအဖွဲ့အစည်း၏ အစီအစဉ်နှင့်ပတ်သက်သော တရွေ့ရွေ့တိုးတက်မှုများနှင့် ယင်းတို့၏အပြုသဘောဆောင်သော အကျိုးရလဒ်များကို ဟေရှာယ ၆၀:၁၇ ကဤသို့ကြိုဟောသည်– “ကြေးဝါအရာ၌ရွှေကိုလည်းကောင်း၊ သံအရာ၌ငွေကိုလည်းကောင်း၊ သစ်သားအရာ၌ကြေးဝါကိုလည်းကောင်း၊ ကျောက်အရာ၌သံကိုလည်းကောင်း ငါဆောင်ခဲ့မည်။ သင်၏အရာရှိတို့ကို ငြိမ်သက်သောသဘော၊ အခွန်ခံတို့ကို ဖြောင့်မတ်သောသဘောနှင့် ပြည့်စုံစေမည်။” အပြုသဘောဆောင်သော ဤပြောင်းလဲမှုများက ဘုရားသခင့်ကောင်းချီးများကို ပေါ်လွင်စေပြီး ကိုယ်တော်၏နိုင်ငံတော်ကို ဇွဲရှိရှိထောက်ခံကြသူတို့သည် ဘုရားသခင့်မျက်နှာသာရရှိကြောင်း သက်သေထူသည်။
၅။ (က) ယေဟောဝါ၏လူမျိုးတော်အပေါ် ကိုယ်တော်ကောင်းချီးများချပေးခြင်းကို စာတန်မည်သို့တုံ့ပြန်ခဲ့သနည်း။ (ခ) ဖိလိပ္ပိ ၁:၇ ပါစကားနှင့်အညီ ယေဟောဝါ၏လူတို့သည် စာတန့်အမျက်ဒေါသကို မည်သို့တုံ့ပြန်ခဲ့ကြသနည်း။
၅ ဘုရားသခင့်နိုင်ငံတော်တည်ထောင်ပြီးနောက် မိမိ၏လူမျိုးတော်ကို ဘုရားသခင်တင်ပြသည့် မေတ္တာပါသောအာရုံစိုက်မှုနှင့် လမ်းညွှန်မှုတို့ကို စာတန်သတိမပြုမိဘဲမနေခဲ့ပါ။ ဥပမာ၊ ၁၉၃၁ ခုနှစ်တွင် ဤခရစ်ယာန်အုပ်စုငယ်လေးသည် ကျမ်းစာကျောင်းသားများမျှသာမဟုတ်ကြောင်း လူသိရှင်ကြားဖြစ်လာခဲ့သည်။ ဟေရှာယ ၄၃:၁၀ နှင့်အညီ သူတို့သည် ယေဟောဝါသက်သေများဖြစ်ကြ၏! တိုက်ဆိုင်မှုဟုတ်သည်ဖြစ်စေ၊ မဟုတ်သည်ဖြစ်စေ စာတန်သည် ကမ္ဘာတစ်ဝန်း၌ နှိပ်စက်ညှဉ်းပန်းမှုလှိုင်းလုံးကို မကြုံစဖူးကျရောက်စေခဲ့သည်။ ပုံမှန်အားဖြင့် ဘာသာရေးလွတ်လပ်မှုရှိသည့် အမေရိကန်ပြည်ထောင်စု၊ ကနေဒါနှင့် ဂျာမနီ စသည့်နိုင်ငံများ၌ပင် သက်သေခံများသည် ဆက်၍လွတ်လပ်စွာဝတ်ပြုခွင့်ရဖို့ ဥပဒေအရ ကြိမ်ဖန်များစွာ ဆိုင်ပြိုင်တိုက်လှန်ခဲ့ကြရသည်။ ၁၉၈၈ တိုင်သော် ယူ.အက်စ်. တရားရုံးချုပ်က ယေဟောဝါသက်သေများ၏အမှုတွဲ ၇၁ ခုကိုပြန်လည်ဆန်းစစ်ခဲ့ပြီးဖြစ်ကာ သုံးပုံနှစ်ပုံမှာ အနိုင်ရခဲ့ကြောင်း တွေ့ရှိရသည်။ ယနေ့ ကမ္ဘာတစ်ဝန်းတွင် ပထမရာစု၌ကဲ့သို့ “ဧဝံဂေလိတရားဘက်၌သက်သေခံ၍ ထိုတရားကိုတည်စေ” နိုင်ဖို့ ဥပဒေအရ ဆက်၍တိုက်လှန်နေဆဲရှိသည်။—ဖိလိပ္ပိ ၁:၇။
၆။ ယေဟောဝါ၏လူမျိုးတော် ရှေ့သို့တိုးနေခြင်းကို ပိတ်ပင်မှုများ၊ ကန့်သတ်ချက်များက တားဆီးနိုင်သလော၊ ဥပမာဖြင့်ဖော်ပြပါ။
၆ ဒုတိယကမ္ဘာစစ်မတိုင်မီ ၁၉၃၀ ပြည့်လွန်နှစ်များအတွင်း နိုင်ငံသုံးနိုင်ငံကိုသာ ထုတ်ဖော်ပြောရလျှင် ဂျာမနီ၊ စပိန်နှင့် ဂျပန်စသည်တို့တွင် အာဏာရှင်ဆန်သောအုပ်ချုပ်ရေးများက ယေဟောဝါသက်သေများ၏လုပ်ငန်းအပေါ် ပိတ်ပင်မှုများနှင့် ကန့်သတ်ချက်များပြဋ္ဌာန်းခဲ့ကြသည်။ သို့သော် ၂၀၀၀ ပြည့်နှစ်တွင် ဤသုံးနိုင်ငံတည်း၌ပင် တက်ကြွလှုပ်ရှားသည့် ဘုရားသခင့်နိုင်ငံတော်ကြေညာသူ ၅၀၀,၀၀၀ ခန့်ရှိနေပေပြီ။ ယင်းက ၁၉၃၆ ခုနှစ်၌၊ ကမ္ဘာတစ်ဝန်းရှိ သက်သေခံအရေအတွက်၏ ဆယ်ဆနီးပါးတိုးလာခြင်းဖြစ်သည်တကား! ယေဟောဝါ၏လူမျိုးတော်သည် သူတို့၏အောင်ပွဲခံခေါင်းဆောင် ယေရှုခရစ်လက်အောက် ရှေ့သို့ချီနေခြင်းကို ပိတ်ပင်မှုများနှင့် ကန့်သတ်ချက်များက မတားဆီးနိုင်ကြောင်း ရှင်းနေပါသည်။
၇။ ၁၉၅၈ ခုနှစ်တွင် အဘယ်ထင်ရှားသော အဖြစ်အပျက်တစ်ခုဖြစ်ပျက်ခဲ့သနည်း၊ ထိုအချိန်မှစ၍ အဘယ်ထူးခြားသောပြောင်းလဲမှုကြီးတစ်ခု ဖြစ်ခဲ့သနည်း။
၇ ၁၉၅၈ ခုနှစ်၌ ယေဟောဝါသက်သေများသည် အများဆုံးတက်ရောက်သူ ၂၅၃,၉၂၂ ဦးဖြင့် မြင့်မြတ်သောအလိုတော် အပြည်ပြည်ဆိုင်ရာစည်းဝေးကြီးကို နယူးယောက်မြို့တွင် မကျင်းပစဖူး အကြီးဆုံးစည်းဝေးကြီးကို ကျင်းပခဲ့ခြင်းက ဤရှေ့သို့တိုးတက်ခြင်း၏သာဓကပါတကား။ ၁၉၇၀ တိုင်လေသော် ထိုစဉ်က အရှေ့ဂျာမနီဟုသိထားကြသည့်နိုင်ငံမှလွဲ၍ အထက်ဖော်ပြပါသုံးနိုင်ငံတွင် သူတို့၏လုပ်ငန်းလမ်းပွင့်ခဲ့သည်။ သို့ရာတွင် ကြီးမားသော ဆိုဗီယက်ပြည်ထောင်စုနှင့် ဝါဆောစာချုပ်အတွင်းရှိ ယင်း၏မဟာမိတ်နိုင်ငံများတွင် သက်သေခံများသည် ပိတ်ပင်ခံနေရဆဲဖြစ်သည်။ ယခင်က ကွန်မြူနစ်ဝါဒကြီးစိုးသည့် ဤနိုင်ငံများတွင် ယခုအခါ တက်ကြွစွာပါဝင်နေသောသက်သေခံ ခြောက်သိန်းနီးပါးရှိ၏။
၈။ ယေဟောဝါ၏လူမျိုးတော်သည် ကိုယ်တော့်ကောင်းချီးခံစားရခြင်းကြောင့် အဘယ်အကျိုးရလဒ်ရရှိခဲ့ပြီနည်း၊ ၁၉၅၀ ပြည့်နှစ်ထုတ်ကင်းမျှော်စင်က ယင်းအကြောင်း မည်သို့ဆိုခဲ့သနည်း။
၈ ယေဟောဝါသက်သေများသည် “ဘုရားသခင်၏နိုင်ငံတော်နှင့် ဖြောင့်မတ်ခြင်းတရားတော်ကို ရှေးဦးစွာရှာ” လျက်နေကြသောကြောင့် တိုးတက်လာသည့်ကောင်းချီးကို ခံစားရကြပြီ။ (မဿဲ ၆:၃၃) ဟေရှာယ၏ ဤပရောဖက်ပြုချက်သည် စာသားအရပင် ပြည့်စုံခဲ့ပြီ– “သူငယ်တစ်ယောက်သည် လူတစ်ထောင်ဖြစ်ရလိမ့်မည်။ အားနည်းသောသူတစ်ယောက်သည် အားကြီးသောလူမျိုးဖြစ်ရလိမ့်မည်။ ငါထာဝရဘုရားသည် အချိန်ရောက်လျှင် ထိုအမှုကိုနှိုးဆော်မည်။” (ဟေရှာယ ၆၀:၂၂) ထိုမျှနှင့်မပြီးသေးပါ။ လွန်ခဲ့သောဆယ်စုနှစ်တွင်ပင် ဘုရားသခင့်နိုင်ငံတော်အုပ်ချုပ်မှုကို တက်ကြွစွာထောက်ခံသူ အရေအတွက်သည် ၁,၇၅၀,၀၀၀ ကျော်တိုးများလာသည်။ ဤသူတို့သည် ၁၉၅၀ ပြည့်နှစ်ထုတ် ကင်းမျှော်စင်တစ်စောင်၌ ဖော်ပြသည့် ဤလူစုတွင် စိတ်လိုကိုယ်လျောက်ပါဝင်လာခဲ့ကြပြီ– “ဘုရားသခင်သည် ကမ္ဘာသစ်အဖွဲ့အစည်းတစ်ခုကို ယခု အသင့်ပြင်နေပြီ။ . . . ဤဗဟိုအဖွဲ့သည် အာမဂေဒုန်ကို ဖြတ်ကျော်၍ ‘မြေကြီးသစ်’ တွင် ဦးဆုံးနေရာရပြီး . . . သီအိုကရက်နည်းလမ်းအရ ဖွဲ့စည်းခံရကာ အဖွဲ့အစည်း၏ဆောင်ရွက်ပုံကို သိထားပြီးဖြစ်မည်။” ထိုဆောင်းပါးက ဤသို့နိဂုံးချုပ်သည်– “ထို့ကြောင့် ကမ္ဘာသစ်အဖွဲ့အစည်းတစ်ခုအနေနှင့် ကျွန်ုပ်တို့အားလုံး အတူတကွ ရှေ့သို့တိုး၍ မှန်မှန်ချီတက်ကြပါစို့!”
၉။ နှစ်များတစ်လျှောက် ယေဟောဝါသက်သေများတတ်သိခဲ့ရာများသည် မည်သို့အကျိုးဖြစ်ခဲ့ပြီနည်း။
၉ ဤအတောအတွင်း အစဉ်တိုးတက်လျက်ရှိသော ဤကမ္ဘာသစ်အဖွဲ့အစည်းသည် ယနေ့ပင် တန်ဖိုးဖြတ်မရသည့် ပြေပြစ်ကျွမ်းကျင်စွာ လုပ်နည်းကိုင်နည်းများကို တတ်မြောက်ထားရာ အာမဂေဒုန်ပြီးနောက် ပြန်လည်ထူထောင်ခြင်းလုပ်ငန်းတွင် ဆက်အသုံးပြုကြပေမည်။ ဥပမာ၊ သက်သေခံများသည် စည်းဝေးကြီးများစီစဉ်ရန်၊ အရေးပေါ်ကယ်ဆယ်ရေးလုပ်ငန်းကို အမြန်ပြုလုပ်ဆောင်ရွက်ပေးရန်နှင့် အဆောက်အဦများကို အမြန်ဆောက်လုပ်ပြီးရန် သင်ယူ၍ တတ်မြောက်ခဲ့ကြပြီ။ ဤလုပ်ဆောင်မှုကြောင့် လူအများသည် ယေဟောဝါသက်သေများကို ချီးကျူး၍ လေးစားလာကြပေပြီ။
အမြင်မှားများကို မှန်စေခြင်း
၁၀၊ ၁၁။ ယေဟောဝါသက်သေများနှင့်ပတ်သက်သော အမြင်မှားမှုများ မည်သို့အမြင်မှန်စေခဲ့ပြီဖြစ်ကြောင်း ဥပမာနှင့်ရှင်းပြပါ။
၁၀ သို့တိုင် ယေဟောဝါသက်သေတို့သည် လူ့အဖွဲ့အစည်းနှင့် အံမဝင်သူများဟု စွပ်စွဲသူများရှိသည်။ ထိုသို့စွပ်စွဲကြရခြင်းမှာ အဓိကအားဖြင့် သွေးသွင်းခြင်း၊ ကြားနေခြင်း၊ ဆေးလိပ်သောက်ခြင်းနှင့် ကိုယ်ကျင့်တရားစသည့်ကိစ္စရပ်များတွင် သက်သေခံများ၏ ကျမ်းစာအခြေပြုအနေအထားကြောင့်ဖြစ်၏။ သို့ရာတွင် သက်သေခံများ၏ရှုမြင်ပုံများကို သုံးသပ်ထိုက်သည်ဟု ဝန်ခံစပြုသူအရေအတွက် တိုးများလာနေသည်။ ဥပမာ၊ ပိုလန်နိုင်ငံမှ ဆရာဝန်တစ်ဦးက သူနှင့် ဆေးရုံမှသူ၏လုပ်ဖော်ဆောင်ဖက်တို့သည် သွေးသွင်းခြင်းကိစ္စကို နာရီပေါင်းများစွာ ဆွေးနွေးနှီးနှောခဲ့ကြောင်း ယေဟောဝါသက်သေများ၏ စီမံခန့်ခွဲရေးရုံးသို့ ဖုန်းဆက်အကြောင်းကြားခဲ့သည်။ ထိုသို့ဆွေးနွေးဖြစ်ခြင်းမှာ ၎င်းနေ့ရက်ထုတ် ပိုလန်သတင်းစာ ဇီးနစ်ခ် ဇက်ဟောန်နီ၌ပါလာသော ဆောင်းပါးတစ်ပုဒ်ကြောင့်ဖြစ်သည်။ ထိုဆရာဝန်က ဤသို့ဝန်ခံခဲ့သည်– “ဆေးပညာလောကမှာ သွေးကိုအလွန်အကျွံသုံးစွဲနေတဲ့အတွက် ကျွန်မကိုယ်တိုင် စိတ်မကောင်းဘူး။ ဒါကိုပြောင်းလဲကြရမယ်၊ ဒီကိစ္စကို စတင်ဖွင့်ဟဆွေးနွေးတဲ့သူရှိလို့ ကျွန်မဝမ်းသာမိတယ်။ ကျွန်မနောက်ထပ်သိချင်ပါသေးတယ်။”
၁၁ ယမန်နှစ်ကကျင်းပခဲ့သော ညီလာခံတစ်ခုတွင် ကနေဒါ၊ ဥရောပ၊ အစ္စရေးနှင့် အမေရိကန်ပြည်ထောင်စုတို့မှ ဆေးဘက်ဆိုင်ရာအရာရှိများသည် သွေးအသုံးမပြုဘဲ လူနာတို့ကို ဆရာဝန်များကုသပေးနိုင်ဖို့ စီစဉ်ထားသည့်ဆေးပစ္စည်းများအကြောင်း ဆွေးနွေးခဲ့ကြသည်။ ဆွစ်ဇလန်နိုင်ငံ၌ကျင်းပခဲ့သော ဤအစည်းအဝေးတွင် တင်ပြခဲ့သည်မှာ ရေပန်းစားနေသော ထင်မြင်ချက်အတိုင်းမဟုတ်ဘဲ အမှန်မှာ သွေးသွင်းခြင်းကိုလက်ခံသည့် လူနာသေဆုံးနှုန်းသည် သွေးလက်မခံသည့်လူနာသေဆုံးနှုန်းထက် ပိုများကြောင်းဖြစ်သည်။ သက်သေခံလူနာများသည် သွေးဖြင့်ကုသခံသောလူနာများထက် ဆေးရုံမှစောစောဆင်းနိုင်သဖြင့် ဆေးဖိုးဝါးခအကုန်အကျ ပိုသက်သာလေ့ရှိသည်။
၁၂။ ယေဟောဝါသက်သေများ၏ နိုင်ငံရေးကြားနေမှုနှင့်ပတ်သက်၍ အထင်ကရပုဂ္ဂိုလ်များ မည်သို့ချီးမွမ်းပြောဆိုခဲ့ကြောင်း ဥပမာတစ်ခုပေးပါ။
၁၂ နာဇီတိုက်ခိုက်မှုအောက် ခံရပ်ခဲ့ချိန် ဒုတိယကမ္ဘာစစ်မတိုင်မီနှင့် စစ်အတောအတွင်း၌ ယေဟောဝါသက်သေများ၏ ကြားနေမှုနှင့်ပတ်သက်၍လည်း ချီးမွမ်းစကားမြောက်မြားစွာကို ကြားခဲ့ကြရပြီ။ ယေဟောဝါသက်သေများထုတ်လုပ်ပြီး ၁၉၉၆၊ နိုဝင်ဘာ ၆ ရက်နေ့တွင် ဂျာမနီနိုင်ငံ ရာဗန်စ်ဘရုခ်ချွေးတပ်စခန်း၌ သင့်လျော်စွာဖြင့် ဦးဆုံးပြသခဲ့သော ယေဟောဝါသက်သေတို့ နာဇီထိုးနှက်မှုကို အခိုင်အမာရပ်တည်ဗီဒီယိုတိတ်ခွေသည် ချီးမွမ်းစကားများစွာရရှိခဲ့သည်။ ၁၉၉၈၊ ဧပြီ ၁၈ ရက်တွင် ဘာဂန်-ဘီလ်ဇန်မြို့ရှိ နာမည်ကြီးချွေးတပ်စခန်း၌ အလားတူတင်ဆက်ပြသမှုအစပိုင်းတွင် အောက်စက်စင်နီဒေသမှ နိုင်ငံရေးပညာပေးဗဟိုမှ ဒါရိုက်တာ ဒေါက်တာဝတ်လ်ဖ်ဂဲန်စကီလ်က ဤသို့ဝန်ခံခဲ့၏– “သမိုင်းတွင် ရှက်ဖွယ်ရာ အမှန်တရားတစ်ခုမှာ ယေဟောဝါသက်သေများသည် ခရစ်ယာန်ချာ့ခ်ျများထက် အမျိုးသားဆိုရှယ်လစ်ဝါဒကို သာ၍ပြင်းပြသောစိတ်ပိုင်းဖြတ်မှုဖြင့် ငြင်းပယ်ခဲ့ခြင်းဖြစ်၏။ . . . ယေဟောဝါသက်သေများ၏ သွန်သင်ချက်များနှင့် ဘာသာရေးကိုင်းရှိုင်းမှုတို့ကို ကျွန်ုပ်တို့မည်သို့ပင်ယူမှတ်ကြစေကာမူ နာဇီခေတ်အတွင်းက သူတို့၏တည်ကြည်မြဲမြံမှုကို ကြည်ညိုလေးစားထိုက်ပါသည်။”
၁၃၊ ၁၄။ (က) အစောပိုင်းခရစ်ယာန်များနှင့်စပ်လျဉ်း၍ အဘယ်အမြော်အမြင်ရှိ ဝေဖန်ချက်တစ်ခုကို မမျှော်လင့်သောရင်းမြစ်မှရရှိခဲ့သနည်း။ (ခ) ယနေ့ ဘုရားသခင့်လူမျိုးတော်နှင့်စပ်လျဉ်း၍ ပြောဆိုခဲ့သည့်ချီးမွမ်းစကားများ၏ ဥပမာများကို တင်ပြပါ။
၁၃ အငြင်းပွားချက်များနှင့်ပတ်သက်၍ အထင်ကရပုဂ္ဂိုလ်များ သို့မဟုတ် တရားရုံး၏ဆုံးဖြတ်ချက်များသည် ယေဟောဝါသက်သေတို့ကို ထောက်ခံသောအခါ စိတ်စွန်းကွက်မှုများ လျော့နည်းစေပြီး သက်သေခံများအား မျက်နှာသာပိုပေးလာစေသည်။ ယင်းက တစ်ခါမျှနားမထောင်လိုခဲ့သူတို့နှင့် စကားစမြည်ပြောဖို့ လမ်းစပွင့်စေလေ့ရှိသည်။ ထို့ကြောင့် ယေဟောဝါသက်သေများသည် အဆိုပါထောက်ခံချက်များကို ကြားလိုကြပြီး အထူးတန်ဖိုးထားကြသည်။ ယင်းက ယေရုရှလင်မြို့တွင် ပထမရာစု၌ ဖြစ်ပျက်ခဲ့သောကိစ္စတစ်ခုကို ပြန်သတိရစေသည်။ ခရစ်ယာန်များသည် ဇွဲဖြင့်ဟောပြောကြခြင်းကြောင့် ဂျူးဗဟိုတရားရုံး ဆဲန်ဟီဒရင်က သူတို့ကိုကွပ်မျက်လိုသောအခါ ဂါမလျေလအမည်ရှိ “လူအပေါင်းတို့ရိုသေသောသူ၊ . . . [ကျမ်း] ဆရာ” က ဤသို့သတိပေးခဲ့သည်– “ဣသရေလလူတို့၊ ဤသူတို့အား အဘယ်သို့ပြုမည်အရာကို သတိနှင့်ဆင်ခြင်ကြလော့။ . . . ဤသူတို့ကိုရှောင်ရှား၍ အလိုအလျောက်ရှိကြပါစေဟုငါဆို၏။ (ဤအကြံ ဤအမှုသည် လူ၏အကြံ လူ၏အမှုဖြစ်လျှင် ပျက်စီးခြင်းသို့ရောက်လိမ့်မည်။ ဘုရားသခင်၏အကြံအမှုဖြစ်လျှင် သင်တို့သည် မဖျက်ဆီးနိုင်ကြ။) သင်တို့သည် ဘုရားသခင်၏အာဏာတော်ကို ဆန်သောသူမဖြစ်မည်အကြောင်း သတိပြုကြလော့။”—တမန်တော် ၅:၃၃-၃၉။
၁၄ မကြာသေးမီက အထင်ကရပုဂ္ဂိုလ်အချို့သည် ဂါမလျေလကဲ့သို့ ယေဟောဝါသက်သေများအတွက် ဘာသာရေးလွတ်လပ်ခွင့်ပေးရန် ပြောဆိုခဲ့ကြသည်။ ဥပမာ၊ ဘာသာရေးနှင့် ခံယူချက်လွတ်လပ်မှုအတွက် နိုင်ငံတကာအဖွဲ့၏ဥက္ကဋ္ဌဟောင်းက ဤသို့ကျိုးကြောင်းဖော်ပြခဲ့သည်– “ဘာသာတရားတစ်ခု၏ ခံယူချက်များကို လူ့အဖွဲ့အစည်းက လက်မခံနိုင်စရာ သို့မဟုတ် ရိုးရာအစဉ်အလာအတိုင်းမဟုတ်ဟု ရှုမြင်ရုံမျှဖြင့် ၎င်းအား ဘာသာတရားအခွင့်အရေး မပေးဘဲမနေသင့်ပါ။” ထို့ပြင် လစ်ပဇစ်တက္ကသိုလ်မှ သိပ္ပံနည်းကျ ဘာသာတရားလေ့လာရေး ပါမောက္ခတစ်ဦးက အမည်ခံဘာသာရေးဂိုဏ်းဂဏများကို စုံစမ်းစစ်ဆေးရန် ဖွဲ့စည်းထားသော ဂျာမန်အစိုးရကော်မရှင်အဖွဲ့နှင့်ပတ်သက်၍ ဤမေးခွန်းကို ချက်ကျစွာမေးမြန်းခဲ့သည်– “ချာ့ခ်ျကြီးနှစ်ခု [ရိုမန်ကက်သလစ်ချာ့ခ်ျနှင့် လူသာရင်ချာ့ခ်ျ] ကိုမဟုတ်ဘဲ ဘာသာရေးလူနည်းစုကိုသာ အဘယ်ကြောင့် စစ်ကြောရသနည်း။” ဂျာမန်အရာရှိဟောင်းတစ်ဦးရေးသားခဲ့သော ဤစကားများတွင် အဖြေတွေ့နိုင်ပါသည်– “ချာ့ခ်ျမှ တစ်ယူသန်သမားများသည် အစိုးရကော်မရှင်အဖွဲ့၏ နိုင်ငံရေးလမ်းစဉ်ကို နောက်ကွယ်မှညွှန်ကြားပေးခဲ့ကြောင်း ယုံမှားဖွယ်မရှိနိုင်ပါ။”
သက်သာရာရဖို့ မည်သူ့ကိုမျှော်ကိုးမည်နည်း
၁၅၊ ၁၆။ (က) ဂါမေလျေလ၏လုပ်ရပ်သည် အဘယ်ကြောင့် အကန့်အသတ်ဖြင့်သာ ထိရောက်ခဲ့သနည်း။ (ခ) အခြားသြဇာရှိသူသုံးဦးတို့သည် ယေရှုအတွက် မည်သို့အကန့်အသတ်ဖြင့်သာ အကျိုးဆောင်နိုင်ခဲ့ကြသနည်း။
၁၅ ဂါမလျေလပြောသည့်စကားက ဘုရားသခင်ထောက်ခံအားပေးသည့်လုပ်ငန်းဆိုလျှင် အောင်မြင်ရမည်ကို ပေါ်လွင်စေခြင်းသာဖြစ်သည်။ ဆဲန်ဟီဒရင်အား သူပြောဆိုခဲ့သည့်စကားကြောင့် အစောပိုင်းခရစ်ယာန်များ အကျိုးခံစားခဲ့ရသည်မှာ သေချာသည်၊ သို့သော် ယေရှု၏နောက်လိုက်များသည် နှိပ်စက်ညှဉ်းပန်းခံရမည်ဟူသော ကိုယ်တော်၏စကားများ မှန်ကန်ကြောင်းကိုလည်း သူတို့မမေ့လျော့ကြချေ။ ဂါမလျေလ၏လုပ်ရပ်က တပည့်တော်တို့ကိုသတ်ပစ်လိုသည့် ဘာသာရေးခေါင်းဆောင်များ၏အကြံကို ရပ်တန့်စေခဲ့သော်လည်း နှိပ်စက်ညှဉ်းပန်းမှုကို လုံးလုံးမဖယ်ရှားပစ်ခဲ့ပါ၊ အကြောင်းမှာ ကျွန်ုပ်တို့ဤသို့ဖတ်ရှုရသည်– “ထိုစကားကိုနားထောင်ကြသဖြင့် တမန်တော်တို့ကိုခေါ်၍ ရိုက်နှက်ပြီးမှ ယေရှု၏နာမကိုအမှီပြုလျက် မဟောမပြောမည်အကြောင်း မြစ်တား၍လွှတ်ကြ၏။”—တမန်တော် ၅:၄၀။
၁၆ ပုန္တိပိလတ်မင်းသည် ယေရှုကိုစစ်ဆေးသောအခါ ကိုယ်တော်၌အပြစ်ရှာမတွေ့သဖြင့် ယေရှုအားလွှတ်ရန်ကြိုးပမ်းခဲ့သည်။ သို့သော် သူမအောင်မြင်ခဲ့ချေ။ (ယောဟန် ၁၈:၃၈၊ ၃၉; ၁၉:၄၊ ၆၊ ၁၂-၁၆) ယေရှုကိုထောက်ခံသည့် ဆဲန်ဟီဒရင်အဖွဲ့ဝင်နှစ်ဦးဖြစ်သူ နိကောဒင်နှင့် အရိမသဲမြို့သား ယောသပ်တို့ပင် ယေရှုအား တရားရုံးမှအရေးယူခြင်းကို အကန့်အသတ်ဖြင့်သာ တားဆီးနိုင်ခဲ့ကြသည်။ (လုကာ ၂၃:၅၀-၅၂; ယောဟန် ၇:၄၅-၅၂; ၁၉:၃၈-၄၀) မည်သည့်အကြောင်းကြောင့်ဖြစ်စေ ယေဟောဝါ၏လူမျိုးတော်ဘက် လူတို့ရပ်တည်ပေးသောအခါ ရရှိသောသက်သာမှုသည် အကန့်အသတ်ရှိသည်။ ဤလောကသည် ခရစ်တော်ကိုမုန်းတီးခဲ့သည့်နည်းတူ ကိုယ်တော့်နောက်လိုက်အစစ်အမှန်များကိုလည်း ဆက်၍မုန်းတီးပေလိမ့်မည်။ ယေဟောဝါတစ်ပါးတည်းသာ လုံးလုံးလျားလျားသက်သာစေနိုင်မည်။—တမန်တော် ၂:၂၄။
၁၇။ ယေဟောဝါသက်သေများသည် အဘယ်လက်တွေ့ကျသောအမြင် ထားရှိကြသနည်း၊ သို့သော် သတင်းကောင်းဆက်ဟောပြောဖို့ သူတို့၏ဆုံးဖြတ်ချက်ကို အဘယ်ကြောင့်မလျှော့ကြသနည်း။
၁၇ အမှန်တကယ်ဆိုလျှင် နှိပ်စက်ညှဉ်းဆဲခြင်း ဆက်ရှိမည်ကို ယေဟောဝါသက်သေများသိထားကြသည်။ စာတန့်စနစ်အပြီးသတ်ရှုံးနိမ့်သွားမှသာ အတိုက်အခံပြုမှုရပ်တန့်သွားလိမ့်မည်။ သို့တိုင် ဤနှိပ်စက်ညှဉ်းပန်းမှုသည် မနှစ်သက်ဖွယ်ဖြစ်သော်လည်း သက်သေခံများကို ဘုရားသခင့်နိုင်ငံတော်သတင်း မဟောပြောဘဲနေရန် မတားဆီးနိုင်ပါ။ သူတို့သည် ဘုရားသခင့်ကျောထောက်နောက်ခံမှု ရရှိထားကြရာ အဘယ်ကြောင့်တားနိုင်မည်နည်း။ သူတို့အတွက် အကောင်းဆုံးပုံသက်သေအဖြစ် ရဲစွမ်းသတ္တိရှိသော သူတို့၏ခေါင်းဆောင် ယေရှုခရစ်ကိုမျှော်ကိုးကြသည်။—တမန်တော် ၅:၁၇-၂၁၊ ၂၇-၃၂။
၁၈။ ယေဟောဝါလူတို့၏ ရှေ့တွင် အဘယ်အခက်အခဲရှိသေးသနည်း၊ သို့သော် အဘယ်အကျိုးရလဒ်ရရှိမည်ဟု သူတို့စိတ်ချကြသနည်း။
၁၈ စစ်မှန်သောဘာသာတရား စတင်ပေါ်လာခဲ့ချိန်ကတည်းက အပြင်းအထန်အတိုက်အခံပြုခံခဲ့ရသည်။ မကြာမီ ယင်းသည် ကောင်းကင်မှနှင်ချခံရကတည်းက ယုတ်ညံ့သောအခြေအနေ၌ရှိသော ဂေါဂဖြစ်သည့် စာတန်၏ မီးကုန်ယမ်းကုန်တိုက်ခိုက်ခြင်းကို ခံရပါတော့မည်။ သို့သော် စစ်မှန်သောဘာသာတရားသည် ပျောက်ဆုံးသွားမည်မဟုတ်ပါ။ (ယေဇကျေလ ၃၈:၁၄-၁၆) စာတန့်ညွှန်ကြားချက်အောက်ရှိ “လော [က] တစ်နိုင်ငံလုံးတွင်ရှိသော ရှင်ဘုရင်တို့” သည် “သိုးသငယ်ကိုစစ်တိုက်၍ သိုးသငယ်သည် နိုင်တော်မူမည်။ အကြောင်းမူကား၊ သိုးသငယ်သည် သခင်တို့၏သခင်၊ ဘုရင်တို့၏ဘုရင်ဖြစ်တော်မူ၏။” (ဗျာဒိတ် ၁၆:၁၄; ၁၇:၁၄) မှန်ပါသည်၊ ကျွန်ုပ်တို့၏ဘုရင်သည် နောက်ဆုံးအောင်ပွဲခံဖို့ ချီတက်လျက်ရှိပြီး မကြာမီ “အပြီးသတ်အောင်ပွဲခံ” ပါလိမ့်မည်။ မကြာမီတွင် ယေဟောဝါအား ဝတ်ပြုသူများက ‘ဘုရားသခင်သည် ငါတို့ဘက်၌ရှိတော်မူ၏’ ဟုပြောဆိုကြသောအခါ သူတို့ကို မည်သူမျှဆန့်ကျင်၍ ပြောဆိုမည်မဟုတ်တော့ကြောင်းကို သိထားကာ ကိုယ်တော်နှင့်အတူ ရှေ့သို့ချီတက်နိုင်ခြင်းသည် အခွင့်ထူးလှပါသည်တကား!—ရောမ ၈:၃၁; ဖိလိပ္ပိ ၁:၂၇၊ ၂၈။
သင်ရှင်းပြနိုင်သလော
• ဘုရားသခင့်နိုင်ငံတော်တည်ထောင်ပြီးကတည်းက ခရစ်ယာန်အသင်းတော်ခိုင်ခံ့စေဖို့ ယေဟောဝါအဘယ်အရာပြုလုပ်ခဲ့ပြီနည်း။
• စာတန်သည် ခရစ်တော်အား အပြီးအပြတ်မအောင်မြင်စေရန် မည်သို့ကြိုးစားတားဆီးခဲ့ပြီး အဘယ်ရလဒ်များရရှိခဲ့သနည်း။
• သက်သေခံမဟုတ်သူတို့၏ မျက်နှာသာပေးသောလုပ်ရပ်အပေါ် အဘယ်မျှတသည့်အမြင်ရှိသင့်သနည်း။
• မကြာမီ စာတန်အဘယ်အရာ ပြုလုပ်တော့မည်နည်း၊ အဘယ်ရလဒ်ဖြင့်နည်း။
[လေ့လာရန်မေးခွန်းများ]
[စာမျက်နှာ ၁၈ ပါ ရုပ်ပုံ]
စည်းဝေးကြီးများက ယေဟောဝါ၏လူမျိုးတော် ရှေ့သို့တိုးနေကြောင်း ထင်ရှား
[စာမျက်နှာ ၂၀ ပါ ရုပ်ပုံ]
ဒုတိယကမ္ဘာစစ်အတွင်း သက်သေခံကြားနေခြင်းက ယနေ့ထက်တိုင် ယေဟောဝါအားဂုဏ်တင်ချီးမွမ်းမှုဖြစ်စေ