ယေဟောဝါ၌ သင့်ယုံကြည်ကိုးစားမှုကို ခိုင်ခံ့စေလော့
ယေဟောဝါ၌ သင့်ယုံကြည်ကိုးစားမှုကို ခိုင်ခံ့စေလော့
လူသတ်ရန်အကြံအစည်တစ်ခုကို ကြံစည်နေကြသည်။ တစ်နိုင်ငံလုံးမှ မှူးမတ်အရာရှိအားလုံး တိုင်ပင်ဆွေးနွေးခဲ့ကြပြီး ဥပဒေသစ်တစ်ခုထုတ်ဖို့ အဆိုတင်သွင်းကြသည်။ သူတို့က နိုင်ငံသဘောတူသည့် ဝတ်ပြုရေးမဟုတ်သော ဝတ်ပြုမှုတွင်ပါဝင်သူ မည်သူမဆိုအား သေဒဏ်ပေးလောက်သောပြစ်မှု ဖြစ်စေလိုကြသည်။
ဤအကြောင်းအရာနှင့် သင်အကျွမ်းတဝင်ရှိပါသလော။ သမိုင်းသည် ဥပဒေကိုင်၍ အမှုဆင်ခဲ့သူတို့၏နမူနာများနှင့် ပြည့်လျက်ရှိသည်။ ပရောဖက်ဒံယေလအချိန်တွင် ပါရှန်းအင်ပါယာ၌ အထက်ပါအမှုတစ်ခု ဖြစ်ပျက်ခဲ့သည်။ ဘုရင်ဒါရိချမှတ်ခဲ့သော ဥပဒေက ဤသို့သတ်မှတ်ပြဋ္ဌာန်းခဲ့သည်– “ကိုယ်တော်မြတ်မှတစ်ပါး အခြားသောလူကိုဖြစ်စေ၊ ဘုရားကိုဖြစ်စေ အရက်သုံးဆယ်အတွင်းတွင် ဆုတောင်းသောသူမည်သည်ကို ခြင်္သေ့လှောင်သောတွင်းထဲသို့ ချပစ်ရမည်။”—ဒံယေလ ၆:၇-၉။
ဒံယေလသည် အသက်ဘေးနှင့်ရင်ဆိုင်ရစဉ် အဘယ်အရာပြုလုပ်မည်နည်း။ သူ၏ဘုရားသခင် ယေဟောဝါအား ဆက်၍ယုံကြည်ကိုးစားမည်လော၊ သို့မဟုတ် အလျှော့ပေးလိုက်လျောကာ ဘုရင်စီရင်ပြဋ္ဌာန်းသည့်အတိုင်း လုပ်ဆောင်မည်လော။ မှတ်တမ်းက ဤသို့ဆိုသည်– “အမိန့်တော်ထုတ်၍ တံဆိပ်ခတ်ကြောင်းကို ဒံယေလသည် ကြားသိသော်လည်း မိမိအိမ်သို့သွား၍ ယေရုရှလင်မြို့သို့မျက်နှာပြုရာ အထက်ခန်းပြတင်းပေါက်ပွင့်လျက်ပင် အထက်ပြုလေ့ရှိသည်အတိုင်း တစ်နေ့သုံးကြိမ် ဒူးထောက်လျက် ဘုရားသခင်ကိုဆုတောင်း၍ ဂုဏ်ကျေးဇူးတော်ကို ချီးမွမ်းလေ၏။” (ဒံယေလ ၆:၁၀) မှတ်တမ်း၏ကျန်အပိုင်းကို အများသိကြသည်။ ဒံယေလသည် သူ၏ယုံကြည်ခြင်းကြောင့် ခြင်္သေ့တွင်းထဲပစ်ချခံရသည်၊ သို့သော် ယေဟောဝါသည် “ခြင်္သေ့နှုတ်ကိုပိတ်ထား” ၍မိမိ၏တည်ကြည်သောကျေးကျွန်ကို ကယ်နုတ်ခဲ့သည်။—ဟေဗြဲ ၁၁:၃၃; ဒံယေလ ၆:၁၆-၂၂။
မိမိကိုယ်ကိုဆန်းစစ်ရမည့်အချိန်
ယေဟောဝါ၏ကျေးကျွန်များသည် ရန်လိုသောလောကတွင် ယနေ့ အသက်ရှင်နေရပြီး ကာယရေးနှင့်ဝိညာဉ်ရေးကောင်းကျိုးဘက် အန္တရာယ်များစွာနှင့်ရင်ဆိုင်နေရသည်။ ဥပမာ၊ အချို့တိုင်းပြည်များတွင် ရက်စက်ကြမ်းကြုတ်သော လူမျိုးရေးမုန်းတီးမှု ရုတ်တရက်ဖြစ်ပေါ်လာရာ သက်သေခံမြောက်မြားစွာ အသတ်ခံခဲ့ရသည်။ အခြားဒေသများတွင် ယေဟောဝါ၏ကျေးကျွန်များသည် အစာခေါင်းပါးမှုများ၊ စီးပွားရေးကျပ်တည်းမှုများ၊ သဘာဝဘေးဒဏ်များ၊ အသည်းအသန်ဖျားနာမှုနှင့် အသက်ကိုခြိမ်းခြောက်သော အခြားအခြေအနေများကို ရင်ဆိုင်ခဲ့ရသည်။ ထို့အပြင် သူတို့၏ဝိညာဉ်ရေးကို အန္တရာယ်ဖြစ်စေမည့် နှိပ်စက်ညှဉ်းပန်းခြင်း၊ အလုပ်မှဖိအားများနှင့် အမှားပြုရန် သွေးဆောင်ခြင်းအမျိုးမျိုးကို တွေ့ကြုံကြရသည်။ မဟာရန်သူကြီးစာတန်သည် ယေဟောဝါ၏ကျေးကျွန်များအား အောင်မြင်နိုင်မည့် မည်သည့်နည်းနှင့်မဆို ဖျက်ဆီးရန်စိတ်ပိုင်းဖြတ်ထားသည်။—၁ ပေတရု ၅:၈။
ယင်းသို့သောအခြေအနေများနှင့်ရင်ဆိုင်ရလျှင် ကျွန်ုပ်တို့အဘယ်အရာပြုလုပ်နိုင်သနည်း။ အသက်အန္တရာယ်နှင့်ကြုံတွေ့ရသောအခါ ကြောက်ရွံ့ခြင်းသည် သဘာဝကျသော်လည်း ကျွန်ုပ်တို့သည် တမန်တော်ပေါလု၏ အားတက်ဖွယ် ဤစကားများကို စွဲမှတ်ထားနိုင်သည်– “‘ငါသည် သင့်ကိုမစွန့်၊ အလျှင်းပစ်၍မထား’ ဟု [ယေဟောဝါ] မိန့်တော်မူ၏။ ထိုကြောင့် ငါတို့က ‘ထာဝရဘုရားသည် မစတော်မူသောအရှင်ဖြစ်၍ လူသည် ငါ့ကိုအဘယ်သို့ပြုနိုင်မည်နည်း၊ မကြောက်မရွံ့ရ’ ဟုရဲရင့်သောစိတ်နှင့် ပြောဆိုရသောအခွင့်ရှိကြ၏။” (ဟေဗြဲ ၁၃:၅၊ ၆၊ သမ္မာ) ယေဟောဝါသည် မျက်မှောက်ခေတ်မိမိ၏ကျေးကျွန်များအပေါ် ထပ်တူသဘောထားရှိကြောင်း ယုံကြည်စိတ်ချနိုင်ပါသည်။ သို့ရာတွင် ယေဟောဝါ၏ကတိတော်များကိုသိရှိထားခြင်းသည် တစ်ကဏ္ဍဖြစ်ပြီး ကျွန်ုပ်တို့အကျိုးအတွက် ကိုယ်တော်လုပ်ဆောင်တော်မူမည်ဟု ယုံကြည်စိတ်ချနေခြင်းသည် နောက်တစ်ကဏ္ဍဖြစ်သည်။ ထို့ကြောင့် ယေဟောဝါ၌ယုံကြည်ကိုးစားမှုကို အဘယ်အရာပေါ်တည်ဆောက်ထားကြောင်းဆန်းစစ်ပြီး ထိုယုံကြည်ကိုးစားမှုကို ခိုင်ခံ့မြဲမြံစေရန် ကျွန်ုပ်တို့အတတ်နိုင်ဆုံးလုပ်ဆောင်ခြင်းသည် အလွန်အရေးကြီးပါသည်။ ထိုသို့ပြုလျှင် “အဘယ်သူမျှကြံ၍မမီနိုင်သော ဘုရားသခင်၏ငြိမ်သက်ခြင်းသည် ယေရှုခရစ်အားဖြင့် [ကျွန်ုပ်] တို့၏စိတ်နှလုံးတို့ကို စောင့်မလိမ့်မည်။” (ဖိလိပ္ပိ ၄:၇) သို့ဖြစ်လျှင် စမ်းသပ်မှုများကြုံရသည့်အခါ ကျွန်ုပ်တို့သည် ပီပီပြင်ပြင်စဉ်းစားပြီး ပညာရှိရှိပြုမူဆောင်ရွက်နိုင်မည်ဖြစ်သည်။
ယေဟောဝါအားယုံကြည်ကိုးစားရန် အကြောင်းရင်း
ကျွန်ုပ်တို့၏ဖန်ဆင်းရှင်ယေဟောဝါအား ယုံကြည်ကိုးစားရန် အကြောင်းရင်းများစွာ အမှန်ပင်ရှိသည်။ ၎င်းတို့မှပထမအချက်မှာ ယေဟောဝါသည် မိမိကျေးကျွန်များကို အမှန်တကယ်ဂရုစိုက်သည့် မေတ္တာရှင်ဘုရားသခင်ဖြစ်ခြင်းတည်း။ ယေဟောဝါသည် မိမိကျေးကျွန်များကို မေတ္တာပါစွာကြည့်ရှုစောင့်ရှောက်ကြောင်းဖော်ပြသည့် နမူနာများစွာ သမ္မာကျမ်းစာတွင် မှတ်တမ်းတင်ထားသည်။ ယေဟောဝါရွေးချယ်ထားသော ဣသရေလလူမျိုးနှင့်ဆက်ဆံပုံကိုဖော်ပြရာတွင် မောရှေဤသို့ရေးသားခဲ့သည်– “လူဆိတ်ညံသောအရပ်၊ သားရဲမြည်၍ လွတ်လပ်သောတောလွင်ပြင်၌ ယာကုပ်ကိုတွေ့တော်မူသောအခါ ဝန်းရံဆီးကာခြင်း၊ သွန်သင်ခြင်းကျေးဇူးကိုပြု၍ မျက်ဆန်တော်ကဲ့သို့စောင့်တော်မူ၏။” (တရားဟောရာ ၃၂:၁၀) မျက်မှောက်ခေတ်တွင် ယေဟောဝါသည် မိမိကျေးကျွန်များကို အုပ်စုလိုက်အနေနှင့်ရော တစ်ဦးစီအနေနှင့်ပါ ကောင်းစွာဆက်၍ဂရုစိုက်လျက်ရှိသည်။ ဥပမာ၊ ဘော့စနီးယား၌ ပြည်တွင်းစစ်အတွင်း သက်သေခံအချို့သည် အလွန့်အလွန် အစာခေါင်းပါးမှုကြုံခဲ့ရစဉ် မိမိတို့ညီအစ်ကိုများအတွက် ကယ်ဆယ်ရေးပစ္စည်းများသယ်ဆောင်ကာ အန္တရာယ်ထူပြောသောနယ်မြေများကို အသက်စွန့်ကြိုးပမ်းဖြတ်သန်းခဲ့ကြသည့် ခရိုအေးရှားနှင့် ဩစတြီးယားမှညီအစ်ကိုများ၏ ရဲရင့်သည့်အားထုတ်မှုဖြင့် အလွန်လိုအပ်နေသော ထောက်ပံ့ပစ္စည်းများရရှိရန် ယေဟောဝါစီစဉ်ပေးတော်မူခဲ့သည်။ *
ယေဟောဝါဘုရားသခင်သည် အတိုင်းအဆမဲ့တန်ခိုးရှင်ဖြစ်သောကြောင့် မည်သည့်အခြေအနေမျိုး၌မဆို မိမိကျေးကျွန်များကို အမှန်ပင်ကာကွယ်ပေးနိုင်သည်။ (ဟေရှာယ ၃၃:၂၂; ဗျာဒိတ် ၄:၈) ယေဟောဝါသည် မိမိကျေးကျွန်အချို့ကို သေသည်အထိတည်ကြည်ရန် ခွင့်ပြုသည့်တိုင် သူတို့၏တည်ကြည်မှုကိုစောင့်ထိန်းနိုင်ရန် မပြတ်ထောက်မကူညီပေးခြင်းဖြင့် သူတို့သည် အဆုံးတိုင်အောင် မဖောက်မပြန်၊ ပျော်ရွှင်ငြိမ်သက်စွာ တည်ကြည်နိုင်ခဲ့ကြသည်။ ထို့ကြောင့် ဆာလံဆရာကဲ့သို့ ကျွန်ုပ်တို့လည်း ဤသို့ယုံကြည်စိတ်ချနိုင်သည်– “ဘုရားသခင်သည် ငါတို့ခိုလှုံရာဖြစ်၍ ခွန်အားကိုပေးတော်မူ၏။ ဘေးရောက်သည်ကာလ အထူးသဖြင့်ကူမတော်မူကြောင်း ထင်ရှားလျက်ရှိ၏။ ထို့ကြောင့် ပထဝီမြေကြီးသည်ရွေ့သွား၍ တောင်များတုန်လှုပ်လျက် သမုဒ္ဒရာသို့ကျသော်လည်း ငါတို့သည် ကြောက်လန့်ခြင်းမရှိ။”—ဆာလံ ၄၆:၁၊ ၂။
ယေဟောဝါသည် သစ္စာစောင့်တော်မူသောဘုရားသခင်ဖြစ်ကြောင်းကိုလည်း သမ္မာကျမ်းစာဖော်ပြသည်။ ဆိုလိုသည်မှာ ကိုယ်တော်သည် အမြဲကတိတည်တော်မူသည်။ သမ္မာကျမ်းစာက ကိုယ်တော်အား “မုသာနှင့်ကင်းစင်တော်မူသော” ဘုရားသခင်ဟူ၍ပင် ဖော်ပြထားသည်။ (တိတု ၁:၁) ယေဟောဝါသည် မိမိကျေးကျွန်များကို စောင်မကယ်တင်ရန် တလိုတလားရှိကြောင်း ကြိမ်ဖန်များစွာမြွက်ဆိုထားခြင်းကြောင့် ကိုယ်တော်သည် ကတိတော်ရှိသည်အတိုင်းလုပ်ဆောင်နိုင်ရုံသာမက ပြည့်စုံစေရန် အသင့်ရှိကြောင်း ကျွန်ုပ်တို့ အကြွင်းမဲ့ယုံကြည်စိတ်ချနိုင်ပေသည်။—ယောဘ ၄၂:၂။
ယုံကြည်ခြင်းခိုင်ခံ့မြဲမြံစေရန် နည်းလမ်းများ
ယေဟောဝါအား ယုံကြည်ကိုးစားရန် အကြောင်းများစွာရှိသော်လည်း ယုံကြည်ခြင်းအမြဲရှိမည်ဟု ယူမှတ်၍မရပေ။ အကြောင်းမှာ လောကသားအများစုသည် ဘုရားသခင်အားယုံကြည်မှုနည်းသဖြင့် ယင်းသဘောထားက ယေဟောဝါအား ကျွန်ုပ်တို့၏ယုံကြည်ကိုးစားစိတ်ကို အလွယ်တကူလျော့နည်းစေနိုင်သောကြောင့်ဖြစ်သည်။ ထို့ကြောင့် ထိုယုံကြည်ကိုးစားမှု ခိုင်ခံ့မြဲမြံနေရန် ကျွန်ုပ်တို့အားသွန်ခွန်စိုက်ကြိုးစားရမည်ဖြစ်သည်။ ယင်းကို ယေဟောဝါကောင်းစွာသိတော်မူပြီး ထိုသို့ပြုနိုင်မည့်နည်းလမ်းများစွာကို ပြင်ဆင်ပေးထားတော်မူသည်။
ဦးစွာ၊ ရေးသားထားသည့်စကားတော် သမ္မာကျမ်းစာကို ကိုယ်တော်ပေးထားသည်၊ ယင်းတွင် မိမိ၏ကျေးကျွန်များအတွက် ကိုယ်တော်လုပ်ဆောင်ခဲ့သည့် တန်ခိုးပါသောလုပ်ရပ်များစွာကို မှတ်တမ်းတင်ထားသည်။ စဉ်းစားကြည့်ပါ၊ လူတစ်ယောက်၏နာမည်ကို သိရုံလောက်နှင့်သာ သူ့အား သင်မည်မျှယုံကြည်စိတ်ချနိုင်မည်နည်း။ သူ့ကိုယုံနိုင်သည့်တိုင် အလွန်နည်းပေမည်။ သူ့ကိုယုံကြည်စိတ်ချနိုင်ဖို့ သူ၏အမူအကျင့်များနှင့် သူ၏ဆောင်ရွက်မှုများကို သိထားရန်လိုမည်မဟုတ်လော။ ကျမ်းစာမှတ်တမ်းများကို ကျွန်ုပ်တို့ဖတ်ရှုဆင်ခြင်ကြစဉ် ယေဟောဝါအားလည်းကောင်း၊ ကိုယ်တော်၏အံ့ဖွယ်အမှုများကိုလည်းကောင်း တိုးသိနားလည်လာရာ ကိုယ်တော်သည် အမှန်တကယ်ယုံကြည်ကိုးစားထိုက်ကြောင်း တိုး၍တိုး၍သဘောပေါက်လာပေသည်။ ဤနည်းဖြင့် ကိုယ်တော့်အပေါ် ကျွန်ုပ်တို့၏ယုံကြည်ကိုးစားမှု ခိုင်ခံ့မြဲမြံလာသည်။ ဘုရားသခင်အား ဤသို့ထက်သန်စွာဆုတောင်းခဲ့သော ဆာလံဆရာသည် အကောင်းဆုံးနမူနာပြခဲ့သည်– “ထာဝရဘုရား၏အမှုတော်တို့ကို အောက်မေ့ပါမည်။ ရှေးကာလ၌ ကိုယ်တော်ပြုဖူးသောအံ့သြဖွယ်တို့ကို အောက်မေ့ပါမည်။ ပြုတော်မူသမျှတို့ကိုဆင်ခြင်၍ စီရင်တော်မူသောအရာတို့ကို မြွက်ဆိုပါမည်။”—ဆာလံ ၇၇:၁၁၊ ၁၂။
သမ္မာကျမ်းစာအပြင် ယေဟောဝါ၏အဖွဲ့အစည်းမှထုတ်ဝေသော ကျမ်းစာ,စာပေများမှတစ်ဆင့် ကျွန်ုပ်တို့သည် ဝိညာဉ်အစာများစွာရရှိကြသည်။ ယင်းစာစောင်များတွင် အခြားအရာများအပြင် မျှော်လင့်ချက်ကင်းမဲ့နေသည့် အခြေအနေများ တွေ့ကြုံရသောအခါ ယေဟောဝါ မည်သို့ကူညီထောက်မပေးနိုင်ခဲ့ကြောင်းဖော်ပြသည့် မျက်မှောက်ခေတ် ဘုရားသခင့်ကျေးကျွန်များ၏ လှုံ့ဆော်မှုပေးသည့်မှတ်တမ်းများလည်း ပါလေ့ရှိသည်။ ဥပမာအနေနှင့်၊ နောက်ပိုင်းတွင် ယေဟောဝါသက်သေများ၏ အုပ်ချုပ်ရေးအဖွဲ့ဝင်တစ်ဦးဖြစ်လာသည့် မာတင် ပေါ့တ်ဇင်္ဂါသည် သူ၏မွေးရပ်မြေနှင့်ဝေးသော ဥရောပဒေသအချို့တွင် ရှေ့ဆောင်အဖြစ်အမှုထမ်းဆောင်စဉ် အပြင်းအထန်ဖျားခဲ့သည်။ သူ့မှာပိုက်ဆံလည်းမရှိ၊ အဘယ်ဆရာဝန်မှလည်း သူ့အားလာမကြည့်ပေးလိုချေ။ သို့သော် ယေဟောဝါသည် သူ့ကိုစွန့်မထားခဲ့ပေ။ နောက်ဆုံးတွင် ဒေသခံဆေးရုံ၏ အတိုင်ပင်ခံဆရာဝန်ကြီးနှင့် သူအဆက်အသွယ်ရခဲ့သည်။ ဤကြင်နာမှုရှိသူသည် သမ္မာကျမ်းစာကို စွဲစွဲမြဲမြဲယုံကြည်သူတစ်ဦးဖြစ်သောကြောင့် အဖိုးအခမယူဘဲ သားတစ်ယောက်ကဲ့သို့ ညီအစ်ကို ပေါ့တ်ဇင်္ဂါကို ကြည့်ရှုပြုစုခဲ့သည်။ ထိုသို့သော ကိုယ်ရေးအတ္ထုပ္ပတ္တိများကိုဖတ်ရှုရခြင်းက ကောင်းကင်ခမည်းတော်၌ ကျွန်ုပ်တို့၏ယုံကြည်ကိုးစားမှုကို အမှန်ပင်ခိုင်ခံ့မြဲမြံစေနိုင်သည်။
ယေဟောဝါအား ကျွန်ုပ်တို့၏ယုံကြည်ကိုးစားမှုခိုင်ခံ့မြဲမြံစေရန် ကိုယ်တော်စီမံပေးသည့် တန်ဖိုးဖြတ်မရသောနောက်အထောက်အမတစ်ခုမှာ ဆုတောင်းခြင်းအခွင့်ထူးဖြစ်သည်။ တမန်တော်ပေါလုက မေတ္တာပါစွာဤသို့ဆိုသည်– “အဘယ်အမှုကိုမျှ စိုးရိမ်ခြင်းမရှိဘဲ အရာရာ၌ ကျေးဇူးတော်ကိုချီးမွမ်းခြင်းနှင့်တကွ ဆုတောင်း . . . သောအားဖြင့်၊ သင်တို့တောင်းပန်လိုသောအရာများတို့ကို ဘုရားသခင်အားကြားလျှောက်ကြလော့။” (ဖိလိပ္ပိ ၄:၆) “အရာရာ” ဟုဆိုရာတွင် ကျွန်ုပ်တို့၏ခံစားချက်များ၊ လိုအပ်ရာများ၊ ကြောက်ရွံ့မှုများနှင့် စိုးရိမ်ပူပန်မှုများပါဝင်နိုင်သည်။ ကျွန်ုပ်တို့သည် နှလုံးအကြွင်းမဲ့ဆုတောင်းလေ ယေဟောဝါ၌ ကျွန်ုပ်တို့၏ယုံကြည်ကိုးစားမှုသည် ပို၍ခိုင်ခံ့မြဲမြံလာလေဖြစ်မည်။
ယေရှုခရစ်ကမ္ဘာပေါ်ရှိစဉ်က အနှောင့်အယှက်မရှိ ဆုတောင်းနိုင်ရန် လူဆိတ်ညံရာသို့ တစ်ခါတစ်ရံ တစ်ယောက်တည်းထွက်သွားလေ့ရှိသည်။ (မဿဲ ၁၄:၂၃; မာကု ၁:၃၅) ယေရှုသည် အရေးကြီးသည့်ဆုံးဖြတ်ချက်များမချမီ မိမိခမည်းတော်ထံ တစ်ညလုံးပင် ဆုတောင်းခဲ့ဖူးသည်။ (လုကာ ၆:၁၂၊ ၁၃) မည်သူမဆိုအပေါ် ကျရောက်ခဲ့ဖူးသမျှတွင် ထိတ်လန့်ဖွယ်အကောင်းဆုံးစမ်းသပ်မှုကို ယေရှုခံရပ်နိုင်သည်အထိ ယေဟောဝါ၌ သူ၏ယုံကြည်ကိုးစားမှု အလွန်ခိုင်ခံ့မြဲမြံခဲ့ခြင်းသည် အံ့အားသင့်စရာမဟုတ်ပေ။ ညှဉ်းဆဲရာသစ်တိုင်ပေါ်၌ ကိုယ်တော်ပြောခဲ့သည့်နောက်ဆုံးစကားမှာ– “အိုအဘ၊ အကျွန်ုပ်၏စိတ်ဝိညာဉ်ကို ကိုယ်တော်လက်၌အကျွန်ုပ်အပ်ပါ၏” ဟူ၍ဖြစ်သည်။ ယေဟောဝါသည် သူ့အား ကြားဝင်ကယ်တင်မပေးခဲ့သော်လည်း ခမည်းတော်အပေါ်ထားသည့် ကိုယ်တော်၏ယုံကြည်ကိုးစားမှုမှာ အဆုံးတိုင်အောင် ယုံကြည်စိတ်ချမှုအပြည့်ရှိကြောင်း ထိုစကားကတင်ပြခဲ့သည်။—လုကာ ၂၃:၄၆။
ယေဟောဝါ၌ ကျွန်ုပ်တို့၏ယုံကြည်ကိုးစားမှုကိုတည်ဆောက်ရန် နောက်ထပ်နည်းတစ်နည်းမှာ ကိုယ်တော်အားစိတ်နှလုံးအကြွင်းမဲ့ ယုံကြည်ကိုးစားသူများနှင့် မှန်မှန်ပေါင်းသင်းခြင်းဖြစ်သည်။ ယေဟောဝါအားပိုမိုသိကျွမ်းရန်နှင့် တစ်ယောက်ကိုတစ်ယောက်အားပေးတိုက်တွန်းရန် မှန်မှန်စည်းဝေးဖို့ မိမိလူမျိုးအား ကိုယ်တော်မိန့်မှာခဲ့သည်။ (တရားဟောရာ ၃၁:၁၂; ဟေဗြဲ ၁၀:၂၄၊ ၂၅) ယင်းသို့ပေါင်းသင်းခြင်းက ယေဟောဝါ၌ သူတို့၏ယုံကြည်ကိုးစားမှုကို ခိုင်ခံ့မြဲမြံစေရာ ယုံကြည်ခြင်းအကြီးအကျယ်စမ်းသပ်မှုများကို ခံရပ်နိုင်စေခဲ့သည်။ ဟောပြောခြင်းလုပ်ငန်း ပိတ်ပင်ခံထားရသော အာဖရိကတိုင်းပြည်တစ်ခုတွင် ယေဟောဝါသက်သေများသည် ရဲတို့၏စောင့်ရှောက်ကာကွယ်မှု၊ ခရီးသွားစာရွက်စာတမ်းများ၊ လက်ထပ်ခွင့်စာချုပ်များ၊ ဆေးရုံတွင် ဆေးကုသခွင့်များနှင့် လုပ်ငန်းကိုင်ငန်းများ မရရှိခဲ့ကြချေ။ ဒေသတစ်ခုတွင် ပြည်တွင်းစစ်ဖြစ်ခဲ့ချိန်က ၎င်းအနီးရှိအသင်းတော်တစ်ခုမှ ကလေးများအပါအဝင် အသင်းသား ၃၉ ယောက်သည် သူတို့၏မြို့တွင်း ဗုံးဒဏ်မှလွတ်မြောက်ရန် သဲကန္တာရထဲရှိ နိမ့်သောတံတားတစ်ခုအောက်တွင် လေးလခန့်ခိုအောင်းခဲ့ကြရသည်။ ထိုသို့သော ကျပ်တည်းခက်ခဲမှုနှင့်ရင်ဆိုင်ရစဉ် နေ့စဉ်ကျမ်းချက်ဆွေးနွေးခြင်းနှင့် အခြားသောအစည်းအဝေးများက သူတို့ကို အကြီးအကျယ်ခွန်အားပေးခဲ့သည်။ ထို့ကြောင့် ထိုတုန်လှုပ်ချောက်ချားဖွယ်အခြေအနေကို သူတို့၏ဝိညာဉ်ရေးအခြေမပျက်ဘဲ ခံရပ်နိုင်ခဲ့သည်။ ထိုတွေ့ကြုံမှုက ယေဟောဝါ၏လူများနှင့်အတူတကွ မှန်မှန်စည်းဝေးခြင်း၏တန်ဖိုးကို ကောင်းစွာဖော်ပြသည်။
နောက်ဆုံးအနေနှင့် ယေဟောဝါ၌ ကျွန်ုပ်တို့၏ယုံကြည်ကိုးစားမှုကို ခိုင်ခံ့မြဲမြံစေရန် အခြားသူများအား သတင်းကောင်းဝေမျှရန် အမြဲအသင့်ရှိပြီး ဘုရားသခင့်နိုင်ငံတော်ဟောပြောခြင်းလုပ်ငန်းတွင် တက်တက်ကြွကြွ ဆက်ပါဝင်နေရမည်ဖြစ်သည်။ ယင်းကို ကုသ၍မရသည်အထိ သွေးကင်ဆာဖြင့် ဖျားနေသော ကနေဒါနိုင်ငံမှ ထက်သန်သည့်ကြေညာသူ ငယ်ရွယ်သူတစ်ဦး၏ စိတ်ထိခိုက်စရာ ဤတွေ့ကြုံမှုက ဖော်ပြခဲ့သည်။ သူသည် အသည်းအသန်ဖျားနေသော်လည်း အချိန်ပြည့်ခရစ်ယာန်ဓမ္မအမှုဆောင်ဖြစ်သည့် မှန်မှန်ရှေ့ဆောင်တစ်ဦးဖြစ်လိုခဲ့သည်။ သူသည် ခဏတာ ရောဂါသက်သာချိန်အတွင်း အရန်ရှေ့ဆောင်အဖြစ် ခရစ်ယာန်ဓမ္မအမှုတွင် တစ်လပါဝင်နိုင်ခဲ့သည်။ ထို့နောက် သူ၏ကျန်းမာရေးအခြေအနေ ပြန်ဆိုးလာကာ လအနည်းငယ်အကြာတွင် ကွယ်လွန်သွားသည်။ သို့တိုင် ယေဟောဝါ၌သူ၏ယုံကြည်ခြင်းသည် တစ်ခဏမျှပင် တိမ်းယိမ်းခြင်းမရှိဘဲ အဆုံးတိုင်အောင် ဝိညာဉ်ရေးခိုင်ခံ့မြဲမြံခဲ့သည်။ သူ့မိခင်က ဤသို့ပြန်ပြောပြသည်– “အဆုံးအထိပဲ သူကိုယ်တိုင်အတွက်ထက် သူများအတွက်စိုးရိမ်တာကများတယ်။ ‘ပရဒိသုမှာအတူနေကြမယ်နော်’ လို့ပြောပြီး ကျမ်းစာကိုလေ့လာကြဖို့ သူများကိုအားပေးခဲ့တယ်။”
ယေဟောဝါအားယုံကြည်ကိုးစားမှုကို ထင်ရှားစေခြင်း
“ဝိညာဉ်နှင့်ကင်းသောကိုယ်သည် အသေဖြစ်သကဲ့သို့၊ အကျင့်နှင့်ကင်းသောယုံကြည်ခြင်းသည် အသေဖြစ်၏။” (ယာကုပ် ၂:၂၆) ဘုရားသခင်အားယုံကြည်ခြင်းနှင့်စပ်လျဉ်း၍ ယာကုပ်ပြောခဲ့သောစကားသည် ကိုယ်တော်အား ယုံကြည်ကိုးစားခြင်းနှင့်လည်း ပတ်သက်နိုင်သည်။ ဘုရားသခင်အား ယုံကြည်ကိုးစားသည်ဟု ကျွန်ုပ်တို့မည်မျှပင်ပြောဆိုစေကာမူ အပြုအမူအားဖြင့်မပြလျှင် ၎င်းသည်အဓိပ္ပာယ်မရှိချေ။ အာဗြဟံသည် ယေဟောဝါအား လုံးလုံးလျားလျားယုံကြည်ကိုးစားခဲ့ပြီး သားဣဇာက်ကိုပူဇော်ရန် အသင့်ရှိသည်တိုင်အောင် ကိုယ်တော့်အမိန့်ကို မတွန့်မဆုတ်နာခံခြင်းဖြင့် သက်သေပြခဲ့သည်။ ထိုကဲ့သို့သော ထူးခြားသည့်ယုံကြည်မှုနှင့် နာခံမှုတို့ကြောင့် အာဗြဟံသည် ယေဟောဝါ၏မိတ်ဆွေအဖြစ် ကျော်ကြားခဲ့သည်။—ဟေဗြဲ ၁၁:၈-၁၀၊ ၁၇-၁၉; ယာကုပ် ၂:၂၃။
ယေဟောဝါအား ယုံကြည်ကိုးစားကြောင်းတင်ပြရန် ပြင်းထန်သည့်စမ်းသပ်မှုတစ်ခုခု ခံရသည်အထိ စောင့်နေစရာမလိုချေ။ တပည့်တော်များအား ယေရှုဤသို့မိန့်ဆိုခဲ့သည်– “အနည်းငယ်သောအမှု၌ သစ္စာရှိသောသူသည် ကြီးသောအမှု၌လည်း သစ္စာရှိလိမ့်မည်။ အနည်းငယ်သောအမှု၌ သစ္စာမရှိသောသူသည် ကြီးသောအမှု၌လည်း သစ္စာမရှိ။” (လုကာ ၁၆:၁၀) အရေးမကြီးဟုထင်ရသည့် ကိစ္စရပ်များတွင်ပင် နာခံမှုတင်ပြခြင်းဖြင့် ကျွန်ုပ်တို့၏နေ့စဉ်လုပ်ငန်းများ၌လည်း ယေဟောဝါအားယုံကြည်ကိုးစားမှုရှိရန် သင်ယူသင့်သည်။ ထိုသို့သောနာခံမှုမျိုးမှရရှိသည့် အကျိုးကျေးဇူးများကို တွေ့မြင်သောအခါ ကောင်းကင်ခမည်းတော်အား ကျွန်ုပ်တို့၏ယုံကြည်ကိုးစားမှုသည် ခိုင်ခံ့မြဲမြံလာရာ သာ၍ခက်ခဲပြီး ကြီးမားသောစမ်းသပ်မှုများကို ရင်ဆိုင်နိုင်စေမည်ဖြစ်သည်။
ဤလောက၏အဆုံး နီးကပ်လာသည်နှင့်အမျှ ယေဟောဝါ၏လူများသည် စမ်းသပ်မှုများနှင့် အန္တရာယ်များ တိုး၍တွေ့ကြုံကြရပေမည်။ (တမန်တော် ၁၄:၂၂; ၂ တိမောသေ ၃:၁၂) ယေဟောဝါ၌ ခိုင်ခံ့မြဲမြံသောယုံကြည်ကိုးစားမှုကို ယခုပင်တည်ဆောက်ထားခြင်းဖြင့် ကြီးစွာသောဆင်းရဲခြင်းတစ်လျှောက် အသက်ရှင်ခြင်းဖြင့်ဖြစ်စေ၊ ရှင်ပြန်ထမြောက်ခြင်းအားဖြင့်ဖြစ်စေ ကိုယ်တော်ကတိထားရာ ကမ္ဘာသစ်ထဲသို့ ကပ်ကျော်ရန် မျှော်လင့်နိုင်ပါသည်။ (၂ ပေတရု ၃:၁၃) ကျွန်ုပ်တို့ဘက်မှ ယုံကြည်ကိုးစားမှုကင်းမဲ့ခြင်းကြောင့် ယေဟောဝါနှင့် ကျွန်ုပ်တို့၏အဖိုးထိုက်လှသောဆက်ဆံရေး ပျက်ပြားသွားခြင်းကို မည်သည့်အခါမျှ ခွင့်မပြုကြစို့နှင့်။ သို့ဖြစ်လျှင် ခြင်္သေ့တွင်းမှကယ်လွှတ်ခံရပြီးသောအခါ ဒံယေလနှင့်ပတ်သက်၍ ပြောဆိုခဲ့သော ဤစကားများကို ကျွန်ုပ်တို့နှင့်ပတ်သက်၍လည်း ပြောဆိုနိုင်ပေမည်– “ဘုရားသခင်ကိုယုံကြည် [“ကိုးစား၊” သမ္မာ] သောကြောင့် သူ၌ ထိခိုက်သောအနာတစ်ခုမျှမရှိ။”—ဒံယေလ ၆:၂၃။
[အောက်ခြေမှတ်ချက်များ]
^ အပိုဒ်၊ 9 အသေးစိတ်အချက်အလက်များအတွက် ၁၉၉၄၊ နိုဝင်ဘာ ၁ ကင်းမျှော်စင်၊ စာမျက်နှာ ၂၃-၇ ရှု။
[စာမျက်နှာ ၉ ပါ ရုပ်ပုံ]
မာတင် ပေါ့တ်ဇင်္ဂါကဲ့သို့ ယေဟောဝါ အပေါ်တည်ကြည်သောကျေးကျွန်များ၏ မှတ်တမ်းများကိုဖတ်ရှုခြင်းက ယုံကြည်ခြင်းကိုခိုင်ခံ့မြဲမြံစေ