ကြားနာ၍မေ့လျော့သောသူများ မဖြစ်ကြနှင့်

ဖွင့်ပါ

ကြားနာ၍မေ့လျော့သောသူများ မဖြစ်ကြနှင့်

“ကိုယ်ကိုကိုယ်လှည့်ဖြား၍၊ နှုတ် [မြွက်] တရားကို နာရုံမျှသာပြုသောသူမဟုတ်၊ တရားကိုကျင့်သောသူဖြစ်ကြလော့။” —ယာကုပ် ၁:၂၂။

၁။ ရှေးဣသရေလလူများသည် အဘယ်အံ့ဖွယ်အမှုများကို တွေ့မြင်ခွင့်ရခဲ့ကြသနည်း။

ရှေးအီဂျစ်နိုင်ငံတွင် ယေဟောဝါပြုတော်မူခဲ့သည့် အံ့ဖွယ်ရာများကိုဖော်ပြရန် “မေ့နိုင်ဖွယ်မရှိ” ဟူသည့်စကားလုံးသည် သင့်လျော်ပေမည်။ ကပ်ဘေးဆယ်ခုမှ တစ်ခုစီသည် မငြင်းသာသည့် အံ့ဖွယ်ရာများဖြစ်သည်။ ထိုဘေးဒဏ်များကျပြီးနောက် နှစ်ခြမ်းကွဲနေသော ပင်လယ်နီကိုဖြတ်၍ ဣသရေလလူများ အံ့သြဖွယ်ကောင်းစွာ ကယ်လွှတ်ခံခဲ့ရသည်။ (တရားဟောရာ ၃၄:၁၀-၁၂) သင်သည် ထိုဖြစ်ရပ်များကို မျက်မြင်ကိုယ်တွေ့မြင်ခဲ့ရလျှင် ယင်းတို့ကိုပြုသောအရှင်အား ဘယ်သောအခါမျှ မေ့လျော့မည်မဟုတ်ချေ။ သို့တိုင် ဆာလံဆရာ ဤသို့ဆိုခဲ့သည်– “အဲဂုတ္တုပြည်၌ ကြီးသောအမှုတို့ကိုလည်းကောင်း၊ ဟာမအမျိုးနေရာပြည်၌ အံ့ဖွယ်သောအမှုတို့ကိုလည်းကောင်း၊ ဧဒုံပင်လယ်နားမှာ ကြောက်မက်ဖွယ်သောအမှုတို့ကိုလည်းကောင်းပြု၍ ကယ်တင်တော်မူသောအရှင် ဘုရားသခင်ကို [ဣသရေလလူများ] မေ့လျော့ကြ၏။”—ဆာလံ ၁၀၆:၂၁၊ ၂၂။

၂။ ဘုရားသခင်၏ တန်ခိုးပါသောအမှုတော်များအပေါ် ဣသရေလလူများ၏လေးမြတ်မှုသည် မတာရှည်ခဲ့ကြောင်း အဘယ်အရာကဖော်ပြသနည်း။

^၂ပင်လယ်နီကိုဖြတ်ကူးပြီးနောက် ဣသရေလလူများသည် “ထာဝရဘုရားကိုကြောက်ရွံ့ကြ၏။ ထာဝရဘုရား . . . ကိုယုံကြည်ကြ၏။” (ထွက်မြောက်ရာ ၁၄:၃၁) ဣသရေလအမျိုးသားများသည် ယေဟောဝါအတွက်အောင်ပွဲခံသီချင်းကို မောရှေနှင့်အတူသီဆိုခဲ့ကြပြီး မိရိအံနှင့် အခြားအမျိုးသမီးများက ပတ်သာများတီး၍ ကခုန်ခြင်းဖြင့် တုံ့ပြန်ခဲ့ကြသည်။ (ထွက်မြောက်ရာ ၁၅:၁၊ ၂၀) မှန်ပါသည်၊ ယေဟောဝါ၏လူမျိုးတော်သည် ကိုယ်တော်၏တန်ခိုးကြီးသောအမှုတော်များကို စွဲမှတ်သွားသည်။ သို့သော် ထိုအမှုများကိုပြုတော်မူရှင်အား သူတို့၏တန်ဖိုးထားလေးမြတ်မှုသည် ကြာရှည်မခံခဲ့ပေ။ ထို့နောက် များမကြာမီတွင် သူတို့ထဲမှအများစုသည် မှတ်ဉာဏ်ပျက်ယွင်းသွားသကဲ့သို့ ပြုမူခဲ့ကြသည်။ ယေဟောဝါကိုဆန့်ကျင်၍ မြည်တမ်းညည်းညူသူများ ဖြစ်လာကြသည်။ အချို့တို့သည် ရုပ်ပုံကိုးကွယ်ပြီးလိင်အကျင့်ယိုယွင်းခဲ့ကြသည်။—တောလည်ရာ ၁၄:၂၇; ၂၅:၁-၉။

အဘယ်အရာက ကျွန်ုပ်တို့ကို မေ့လျော့စေနိုင်သနည်း

၃။ ကျွန်ုပ်တို့၏မစုံလင်သော သဘောသဘာဝကြောင့် အဘယ်အရာကို မေ့လျော့နိုင်သနည်း။

^၃ဣသရေလလူများ၏ လေးမြတ်မှုကင်းမဲ့ခြင်းကို နားလည်ရန်အမှန်ခက်ခဲပေသည်။ သို့သော် ကျွန်ုပ်တို့လည်း အလားတူဖြစ်နိုင်သည်။ ထိုကဲ့သို့သော ဘုရားသခင့်အံ့ဖွယ်အမှုများကို ကျွန်ုပ်တို့ကိုယ်တိုင်မတွေ့ဖူးခဲ့ကြသည်မှာ မှန်၏။ သို့ဖြစ်စေကာမူ ဘုရားသခင်နှင့် ကျွန်ုပ်တို့၏ဆက်ဆံရေးတွင် မမေ့နိုင်ဖွယ်အခါသမယများ အမှန်ရှိခဲ့ပေမည်။ ကျမ်းစာမှအမှန်တရားအား ကျွန်ုပ်တို့လက်ခံခဲ့ချိန်ကို အချို့ပြန်သတိရကြပေမည်။ အခြားရွှင်လန်းဖွယ်အချိန်များတွင် ယေဟောဝါထံ ဆုတောင်းပြီးဆက်ကပ်အပ်နှံခဲ့ချိန်နှင့် ခရစ်ယာန်စစ်များအဖြစ် ရေနှစ်ခြင်းခံယူခဲ့ချိန်တို့ပါဝင်ပေမည်။ ကျွန်ုပ်တို့အများစုသည် ဘဝတစ်လျှောက် တစ်ချိန်ချိန်တွင် ယေဟောဝါ၏ထောက်မမှုကို ရရှိခဲ့ကြသည်။ (ဆာလံ ၁၁၈:၁၅) ထို့ထက်ကား ယဇ်သကာအဖြစ် ဘုရားသခင့်သားတော် ယေရှုခရစ်သေခဲ့ခြင်းကြောင့် ကျွန်ုပ်တို့သည် ကယ်တင်ခြင်းမျှော်လင့်ချက်ကို ရရှိထားကြသည်။ (ယောဟန် ၃:၁၆) သို့သော် ကျွန်ုပ်တို့၏မစုံလင်မှုသဘောသဘာဝကြောင့် မှားယွင်းသောဆန္ဒများ၊ ဘဝ၏စိုးရိမ်ပူပန်မှုများရှိသည့်အခါ ကျွန်ုပ်တို့အတွက် ယေဟောဝါပြုလုပ်သည့် ကောင်းမြတ်ရာများကို အလွယ်တကူမေ့လျော့သွားကြပေမည်။

၄၊ ၅။ (က) ကြားနာ၍မေ့လျော့သူများဖြစ်ခြင်း၏ အန္တရာယ်ကို ယာကုပ်မည်သို့သတိပေးသနည်း။ (ခ) ယာကုပ်၏ လူနှင့်ကြေးမုံဥပမာကို ကျွန်ုပ်တို့မည်သို့သက်ဆိုင်စေနိုင်သနည်း။

^၄ခရစ်ယာန်ချင်းများထံရေးသည့် သူ၏စာတွင် ယေရှု၏မိတူဖကွဲညီယာကုပ်က ကြားနာ၍မေ့လျော့သူများဖြစ်ခြင်း၏ အန္တရာယ်ကို သတိပေးခဲ့သည်။ သူဤသို့ရေးခဲ့သည်– “ကိုယ်ကိုလှည့်ဖြား၍ နှုတ် [မြွက်] တရားကို နာရုံမျှသာပြုသောသူမဟုတ်၊ တရားကိုကျင့်သောသူဖြစ်ကြလော့။ တရားကိုမကျင့်ဘဲ နာရုံမျှသာပြုသောသူမည်သည်ကား ကြေးမုံ၌ မိမိပကတိမျက်နှာကိုကြည့်သောသူနှင့်တူ၏။ အကြောင်းမူကား ကိုယ်ကိုကြည့်ပြီးမှ အခြားသို့သွား၍ မိမိသည်အဘယ်သို့သောသူဖြစ်သည်ကို ချက်ချင်းမေ့လျော့တတ်၏။” (ယာကုပ် ၁:၂၂-၂၄၊ သမ္မာ) ထိုစကားများဖြင့် ယာကုပ်အဘယ်အရာကိုဆိုလိုခဲ့သနည်း။

^၅နံနက်ပိုင်း အိပ်ရာထသောအခါ မိမိရုပ်ဆင်းသွင်ပြင်ကို မည်သို့ပြုပြင်ရန်လိုကြောင်းသိဖို့ မှန်ကြည့်လေ့ရှိသည်။ လုပ်ငန်းဆောင်တာအမျိုးမျိုးလုပ်ကိုင်ရ၍ အခြားအရာများကို အာရုံစိုက်နေစဉ် မှန်ထဲတွေ့ခဲ့ရသည့်ပုံကို သတိမရတော့ပေ။ ဝိညာဉ်ရေးသဘောအရလည်း ထပ်တူဖြစ်နိုင်ပါသည်။ ကျမ်းစာကို ကျွန်ုပ်တို့ဖတ်ရှုလေ့လာသောအခါ ကျွန်ုပ်တို့ထံမှယေဟောဝါမျှော်လင့်ထားရာနှင့် ကျွန်ုပ်တို့၏လက်ရှိအနေအထားကို နှိုင်းယှဉ်ကြည့်နိုင်သည်။ ထိုအခါ ကျွန်ုပ်တို့၏အားနည်းချက်များနှင့် ထိပ်တိုက်ရင်ဆိုင်ရလေသည်။ ဤသို့သိရှိလာသည့်အခါ ကျွန်ုပ်တို့၏ပင်ကိုစရိုက်ကို ပြုပြင်ရန် လှုံ့ဆော်ခံရသင့်သည်။ သို့သော် ကျွန်ုပ်တို့၏နေ့စဉ်လုပ်ငန်းဆောင်တာများကို လုပ်ဆောင်စဉ်၊ ပြဿနာများနှင့်ရုန်းကန်နေရကြစဉ် ဝိညာဉ်ရေးရာများကို မတွေးတောမိဘဲနေနိုင်သည်။ (မဿဲ ၅:၃; လုကာ ၂၁:၃၄) ကျွန်ုပ်တို့အကျိုးအတွက် ဘုရားသခင့်မေတ္တာပါလုပ်ဆောင်မှုများကို ကျွန်ုပ်တို့မေ့လျော့ဘိသကဲ့သို့ဖြစ်၏။ ထိုသို့ဖြစ်လာပါက အပြစ်ပြုလိုသောဉာဉ်ဆိုးများကို မခုခံနိုင်တော့ပေ။

၆။ ကျမ်းစာမှ အဘယ်သုံးသပ်ချက်က ယေဟောဝါ၏စကားတော်ကိုမမေ့စေရန် ကူညီပေးနိုင်သနည်း။

^၆ကောရိန္သုမြို့သားများထံရေးသည့် သူ၏မှုတ်သွင်းခံပထမစာစောင်တွင် တမန်တော်ပေါလုသည် တောကန္တာရမှ မေ့တတ်သောဣသရေလလူများကို ရည်ညွှန်းထားသည်။ ပထမရာစုခရစ်ယာန်များသည် ပေါလု၏စကားများမှ အကျိုးရရှိခဲ့ကြသည့်နည်းတူ သူရေးသားထားရာကို ပြန်လည်သုံးသပ်ခြင်းက ယေဟောဝါ၏စကားတော်ကိုမမေ့ရန် ကျွန်ုပ်တို့ကိုကူညီပေးနိုင်သည်။ ထို့ကြောင့် ၁ ကောရိန္သု ၁၀:၁-၁၂ ကိုသုံးသပ်ကြည့်ကြပါစို့။

လောကတပ်မက်ခြင်းများကို ပယ်ရှားခြင်း

၇။ ယေဟောဝါ၏ချစ်ခြင်းမေတ္တာနှင့်ပတ်သက်၍ မငြင်းဆိုနိုင်သော အဘယ်သက်သေအထောက်အထားကို ဣသရေလလူများ ရရှိခဲ့ကြသနည်း။

^၇ဣသရေလလူများအကြောင်း ပေါလုပြောခဲ့သောစကားသည် ခရစ်ယာန်များအတွက် သတိပေးချက်ဖြစ်သည်။ ပေါလုရေးသားခဲ့သည့်စကား တစ်စိတ်တစ်ပိုင်းကား ဤသို့ဖြစ်သည်– “ညီအစ်ကိုတို့၊ ငါတို့ဘိုးဘေးအပေါင်းတို့သည် မိုးတိမ်အောက်မှာရှိ၍ ပင်လယ်အလယ်၌ လျှောက်သွားကြသည်ဟူ၍လည်းကောင်း၊ မိုးတိမ်နှင့်ပင်လယ်ထဲမှာ မောရှေ၌ဗတ္တိဇံကိုခံကြသည်ဟူ၍လည်းကောင်း . . . သင်တို့မသိမမှတ်ဘဲနေစေခြင်းငှာ ငါအလိုမရှိ။” (၁ ကောရိန္သု ၁၀:၁-၄) မောရှေလက်ထက်ရှိ ဣသရေလလူများသည် နေ့အချိန်တွင် သူတို့ရှေ့ကဦးဆောင်သွား၍ ပင်လယ်နီမှလွတ်မြောက်ရန် အထောက်အကူပြုခဲ့သည့် ဘုရားသခင်၏အံ့ဖွယ်မိုးတိမ်တိုင်အပါအဝင် ဘုရားသခင့်ကြီးမားသောတန်ခိုးတော် ထင်ရှားပြမှုများကို တွေ့မြင်ခဲ့ကြရသည်။ (ထွက်မြောက်ရာ ၁၃:၂၁; ၁၄:၂၁၊ ၂၂) မှန်ပါသည်၊ ထိုဣသရေလလူများသည် သူတို့အားယေဟောဝါချစ်ကြောင်း မငြင်းဆိုနိုင်သောသက်သေအထောက်အထား ရရှိခဲ့ကြသည်။

၈။ ဣသရေလလူများ ဝိညာဉ်ရေးရာမေ့လျော့ခြင်း၏ အကျိုးဆက်များကား အဘယ်နည်း။

^၈“သို့သော်လည်း ထိုသူတို့တွင် များစွာသောသူတို့ကို ဘုရားသခင်သည် အားရနှစ်သက်တော်မမူ။ သူတို့သည် တော၌သေကျေပျက်စီးခြင်းသို့ရောက်ကြ၏” ဟုပေါလုဆက်ဆိုသည်။ (၁ ကောရိန္သု ၁၀:၅) တကယ်ဝမ်းနည်းစရာပင်! အီဂျစ်ပြည်မှထွက်လာသော ဣသရေလလူအများစုသည် ကတိထားရာပြည်တော်သို့ဝင်ရန် အရည်အချင်းမပြည့်မီခဲ့ကြချေ။ သူတို့၏ယုံကြည်ခြင်းကင်းမဲ့မှုကြောင့် ဘုရားသခင့်မျက်နှာသာတော်ဆုံးရှုံးခဲ့၍ တောကန္တာရတွင် သေဆုံးခဲ့ရကြသည်။ (ဟေဗြဲ ၃:၁၆-၁၉) ယင်းမှ ကျွန်ုပ်တို့ အဘယ်အရာသင်ယူနိုင်သနည်း။ ပေါလု ဤသို့ဆိုသည်– “ထိုသူတို့သည် မကောင်းသောအရာတို့ကိုတပ်မက်သကဲ့သို့ ငါတို့သည်မတပ်မက်စေခြင်းငှာ၊ ထိုအကြောင်းအရာတို့သည် ငါတို့အဖို့ ပုံသက်သေဖြစ်ကြ၏။”—၁ ကောရိန္သု ၁၀:၆။

၉။ ယေဟောဝါသည် မိမိလူမျိုးတော်အတွက် မည်သို့စီမံပေးခဲ့သနည်း၊ ဣသရေလလူများ မည်သို့တုံ့ပြန်ခဲ့သနည်း။

^၉ဣသရေလလူများသည် တောကန္တာရတွင်ရှိစဉ် ဝိညာဉ်ရေးဘက် ဆက်၍အာရုံစိုက်နေနိုင်စရာ များစွာရှိခဲ့သည်။ သူတို့သည် ယေဟောဝါနှင့်ပဋိညာဉ်ဖွဲ့ခဲ့ကြ၍ ကိုယ်တော်အား ဆက်ကပ်အပ်နှံထားသောလူမျိုးတစ်မျိုး ဖြစ်လာခဲ့သည်။ ထို့ပြင် သူတို့သည် ယဇ်ပုရောဟိတ်အဖွဲ့၊ ဝတ်ပြုရေး၏ဗဟိုအဖြစ် တဲတော်နှင့် ယေဟောဝါအား ယဇ်ပူဇော်ရန်အစီအစဉ်တစ်ခု ပေးအပ်ခံခဲ့ကြရ၏။ သို့ရာတွင် သူတို့သည် ဤဝိညာဉ်ရေးဆုကျေးဇူးများကြောင့် ရွှင်လန်းဝမ်းမြောက်နေမည့်အစား ဘုရားသခင်၏စီမံချက်များနှင့် မရောင့်ရဲသူများ ဖြစ်လာကြသည်။—တောလည်ရာ ၁၁:၄-၆။

၁၀။ ကျွန်ုပ်တို့သည် ဘုရားသခင်ကို အဘယ်ကြောင့် မိမိတို့၏စိတ်ကူးထဲတွင် အစဉ်ထားရှိသင့်သနည်း။

^၁၀တောကန္တာရထဲမှ ဣသရေလလူများနှင့်မတူဘဲ ယေဟောဝါ၏လူမျိုးတော်သည် ဘုရားသခင့်မျက်နှာသာတော်ကို ယနေ့ရရှိကြသည်။ သို့သော် ကျွန်ုပ်တို့တစ်ဦးချင်းစီအနေနှင့် ဘုရားသခင်ကို မိမိတို့၏စိတ်ကူးထဲတွင်ထားရှိရန် အရေးကြီးသည်။ ယင်းသို့ပြုခြင်းက ကျွန်ုပ်တို့၏ဝိညာဉ်ရေးအမြင်အာရုံကို မှေးမှိန်စေနိုင်သည့် ကိုယ်ကျိုးရှာစိတ်ကိုပယ်ရှားရန် ထောက်ကူပေမည်။ ကျွန်ုပ်တို့သည် “ဘုရားမဲ့တရားမဲ့နေခြင်း၊ လော[က] တပ်မက်ခြင်းကိုပယ်ရှားလျက်၊ ယခုဘဝ၌ ဣန္ဒြေစောင့်ခြင်း၊ တရားသဖြင့်ကျင့်ခြင်း၊ ဘုရား [သခင်၏] ဝတ်၌မွေ့လျော်ခြင်းတို့ကိုပြုနေ” ရန်စိတ်ပိုင်းဖြတ်ထားရမည်။ (တိတု ၂:၁၂၊ ၁၃) နို့စို့အရွယ်ကတည်းက ခရစ်ယာန်အသင်းတော်နှင့် ပူးပေါင်းခဲ့ကြသည့် ကျွန်ုပ်တို့အနေနှင့် ပျော်ရွှင်မှုတစ်ခုခုဆုံးရှုံးနေသည်ဟု ဘယ်သောအခါမှ မထင်မှတ်သင့်ချေ။ ထိုသို့သောထင်မြင်ချက်များ ကျွန်ုပ်တို့စိတ်တွင်ပေါ်လာပါက ယေဟောဝါနှင့် ကျွန်ုပ်တို့အတွက် ကိုယ်တော်ပြင်ဆင်ပေးထားသည့် အံ့ဖွယ်ကောင်းချီးမင်္ဂလာများကို ပြန်သတိရသင့်သည်။—ဟေဗြဲ ၁၂:၂၊ ၃။

ယေဟောဝါအား အကြွင်းမဲ့နာခံခြင်း

၁၁၊ ၁၂။ လူတစ်ဦးသည် ရုပ်ပုံများကိုးကွယ်ခြင်းတွင် မပါဝင်ဘဲနှင့် ရုပ်ပုံကိုးကွယ်သည့်အပြစ်ကို မည်သို့ပြုမိနိုင်သနည်း။

^၁၁ပေါလု ဤသို့ရေးသားစဉ် ကျွန်ုပ်တို့အတွက် နောက်ထပ်သတိပေးချက်တစ်ခုကို ပေးသည်– “‘လူတို့သည် စားသောက်လျက် ထိုင်နေကြ၏။ နောက်တစ်ဖန် ကခုန်မြူးထူးခြင်းငှာထကြ၏’ ဟုကျမ်းစာလာသည်အတိုင်း၊ ထိုသူအချို့တို့သည် ရုပ်တုကိုကိုးကွယ်သကဲ့သို့ မကိုးကွယ်ကြနှင့်။” (၁ ကောရိန္သု ၁၀:၇၊ ၈) ဣသရေလလူတို့သည် ရွှေနွားရုပ်လုပ်ပေးရန် အာရုန်အား တိုက်တွန်းသွေးဆောင်နိုင်ခဲ့ချိန်ကို ပေါလု ရည်ညွှန်းနေခြင်းဖြစ်သည်။ (ထွက်မြောက်ရာ ၃၂:၁-၄) ကျွန်ုပ်တို့သည် ရုပ်ပုံကိုးကွယ်ခြင်းသို့ လုံးလုံးလှည့်သွားကြမည် မဟုတ်သော်လည်း ယေဟောဝါအား စိုးလ်အကြွင်းမဲ့ဝတ်ပြုခြင်းမှ သွေဖည်သွားခံရသည်အထိ ကိုယ်ကျိုးရှာစိတ်ကိုလွှမ်းမိုးခွင့်ပြုခြင်းဖြင့် ရုပ်ပုံကိုးကွယ်သူများ ဖြစ်လာနိုင်သည်။—ကောလောသဲ ၃:၅။

^၁၂အခြားတစ်ကြိမ်တွင် ဝိညာဉ်ရေးရာများအစား ရုပ်ပစ္စည်းများကို အဓိကထားသည့် လူအချို့အကြောင်း ပေါလုရေးသားခဲ့သည်။ ထိုသူတို့နှင့်စပ်လျဉ်း၍ သူဤသို့ရေးခဲ့သည်– “ခရစ်တော်၏လက်ဝါးကပ်တိုင်ကို ရန်ဘက်ပြု၍ကျင့်သောသူအများရှိကြ၏။ ထိုသူတို့သည် ပျက်စီးခြင်း၌လမ်းဆုံးတတ်ကြ၏။ သူတို့၏ဘုရားမူကား မိမိတို့ဝမ်းပေတည်း။” (ဖိလိပ္ပိ ၃:၁၈၊ ၁၉) သူတို့၏ရုပ်ပုံကိုးကွယ်မှုမှာ အရာဝတ္ထုတစ်ခုမဟုတ်ချေ။ ရုပ်ပစ္စည်းများကို သူတို့တပ်မက်သော ဆန္ဒဖြစ်သည်။ ဆန္ဒတိုင်း မှားသည်မဟုတ်ပါ။ ယေဟောဝါသည် ကျွန်ုပ်တို့ကို လူ့လိုအပ်ရာများနှင့် ပျော်ရွှင်မှုအမျိုးမျိုးကို ခံစားနိုင်စွမ်းဖြင့် ဖန်ဆင်းထားသည်။ သို့ရာတွင် ဘုရားသခင်နှင့် မိမိတို့၏ဆက်ဆံရေးထက် အပျော်အပါးလိုက်စားခြင်းကိုဦးစားပေးသူတို့သည် ရုပ်ပုံကိုးကွယ်သူများ အမှန်ဖြစ်၏။—၂ တိမောသေ ၃:၁-၅။

၁၃။ ရွှေနွားရုပ်မှတ်တမ်းမှ ကျွန်ုပ်တို့အဘယ်အရာသင်ယူနိုင်သနည်း။

^၁၃အီဂျစ်ပြည်မှထွက်လာပြီးနောက် ဣသရေလလူများသည် ဝတ်ပြုကိုးကွယ်ရန် ရွှေနွားရုပ်ကို ပြုလုပ်ခဲ့ကြသည်။ ရုပ်ပုံမကိုးကွယ်ရဟူသော သတိပေးချက်အပြင် ဤမှတ်တမ်းတွင် နောက်ထပ်အရေးကြီးသော သင်ခန်းစာတစ်ခုပါရှိသေးသည်။ ဣသရေလလူများသည် ယေဟောဝါထံမှ ရှင်းလင်းပြတ်သားသောညွှန်ကြားချက်ကို နားမထောင်ခဲ့ကြချေ။ (ထွက်မြောက်ရာ ၂၀:၄-၆) သို့တိုင် သူတို့သည် ယေဟောဝါအား မိမိတို့ဘုရားသခင်အဖြစ်မှ ပယ်ရှားရန် မရည်ရွယ်ခဲ့ကြပေ။ သွန်းလုပ်သောနွားသငယ်ထံ ယဇ်ပူဇော်ကြပြီး ‘ယေဟောဝါအဖို့ပွဲ’ ခံသည်ဟု သူတို့ဆိုခဲ့ကြသည်။ သူတို့၏နာမခံမှုကို ဘုရားသခင်အရေးမယူဘဲနေမည်ဟု တွေးတော၍ တစ်နည်းအားဖြင့် မိမိတို့ကိုယ်ကိုလှည့်စားခဲ့ကြသည်။ ယင်းသည် ယေဟောဝါကို စော်ကားခြင်းဖြစ်၍ ကိုယ်တော်အမျက်ထွက်စရာဖြစ်စေခဲ့သည်။—ထွက်မြောက်ရာ ၃၂:၅၊ ၇-၁၀; ဆာလံ ၁၀၆:၁၉၊ ၂၀။

၁၄၊ ၁၅။ (က) ဣသရေလလူများသည် ကြားနာ၍မေ့လျော့သူများဖြစ်ရန်အကြောင်း အဘယ်ကြောင့်မရှိသနည်း။ (ခ) ကျွန်ုပ်တို့သည် ကြားနာ၍မေ့လျော့သူများမဖြစ်ရန် စိတ်ပိုင်းဖြတ်ထားလျှင် ယေဟောဝါ၏ပညတ်တော်များနှင့်ပတ်သက်၍ အဘယ်အရာပြုလုပ်ကြမည်နည်း။

^၁၄ယေဟောဝါသက်သေတစ်ဦးသည် မှောက်မှားသောဘာသာဝင်တစ်ဦးဖြစ်သွားရန်မှာ အလွန်ဖြစ်တောင့်ဖြစ်ခဲပေမည်။ သို့သော် အသင်းတော်အတွင်းရှိနေလျက်ကယ် အခြားနည်းများဖြင့် ယေဟောဝါ၏လမ်းညွှန်ချက်ကို အချို့သူတို့ငြင်းပယ်ကြပေမည်။ ဣသရေလလူများသည် ကြားနာ၍မေ့လျော့သူများဖြစ်လာရန် အကြောင်းမရှိပေ။ သူတို့သည် ပညတ်တော်ဆယ်ပါးကို ကြားနာခဲ့ကြရပြီး “ငါနှင့်တူသည်ဟူ၍ ငွေဘုရားကိုမလုပ်ရ၊ ရွှေဘုရားကိုလည်း ကိုယ့်အဖို့မလုပ်ရ” ဟူသည့်ဘုရားသခင့်အမိန့်တော်ကို မောရှေပေးသောအခါ သူတို့ရှိခဲ့ကြသည်။ (ထွက်မြောက်ရာ ၂၀:၁၈၊ ၁၉၊ ၂၂၊ ၂၃၊ သမ္မာ) သို့တိုင် ဣသရေလလူများသည် ရွှေနွားရုပ်ကို ကိုးကွယ်ခဲ့ကြ၏။

^၁၅ကျွန်ုပ်တို့လည်း ကြားနာ၍မေ့လျော့သူများဖြစ်လာကြမည်ဆိုလျှင် ခြေမြစ်သောအကြောင်းပြချက်ရှိမည် မဟုတ်ပေ။ သမ္မာကျမ်းစာတွင် ဘဝကဏ္ဍအသီးသီးနှင့်ပတ်သက်သည့် ဘုရားသခင့်လမ်းညွှန်ချက်ကို ကျွန်ုပ်တို့ရရှိထားကြသည်။ ဥပမာ၊ ယေဟောဝါ၏စကားတော်က ချေးငှား၍ပြန်မဆပ်ခြင်းကို အတိအလင်းပြစ်တင်ရှုတ်ချထား၏။ (ဆာလံ ၃၇:၂၁) သားသမီးများသည် မိဘစကားနားထောင်ရမည်ဟု မိန့်မှာခံရ၍ ဖခင်များသည် သားသမီးများကို ‘ဘုရားသခင့်အလိုတော်နှင့်အညီ’ ပြုစုပျိုးထောင်ပေးရန်ဖြစ်သည်။ (ဧဖက် ၆:၁-၄) တစ်ကိုယ်ရေခရစ်ယာန်များသည် “သခင်ဘုရား၌သာ” ထိမ်းမြားရမည်ဟု ညွှန်ကြားခံရ၍ အိမ်ထောင်သည်ကျေးကျွန်များကို ဘုရားသခင် ဤသို့မိန့်တော်မူခဲ့သည်– “ခပ်သိမ်းသောသူတို့၌ မင်္ဂလာဆောင်ခြင်းအမှုနှင့် သစ္စာသံဝါသပြုခြင်းအမှုသည် အသရေရှိစေလော့။ မတရားသောမေထုန်ကိုပြုသောသူနှင့် သူ့မယားကိုပြစ်မှားသောသူကို ဘုရားသခင်စစ်ကြောစီရင်တော်မူလိမ့်မည်။” (၁ ကောရိန္သု ၇:၃၉; ဟေဗြဲ ၁၃:၄) ကျွန်ုပ်တို့သည် ကြားနာ၍မေ့လျော့သူများမဖြစ်ကြရန် စိတ်ပိုင်းဖြတ်ထားလျှင် ဘုရားသခင်ထံမှ ဤညွှန်ကြားချက်များနှင့် အခြားညွှန်ကြားချက်များကို အလွန်အလေးအနက်သဘောထားကာ လိုက်လျှောက်ကြမည်ဖြစ်သည်။

၁၆။ ရွှေနွားရုပ်ကိုးကွယ်ခြင်း၏ အကျိုးဆက်များကား အဘယ်နည်း။

^၁၆ကိုယ့်နည်းကိုယ့်ဟန်ဖြင့် ယေဟောဝါအား ဝတ်ပြုကိုးကွယ်ရန် ဣသရေလလူတို့၏အားထုတ်မှုကို ကိုယ်တော်လက်မခံခဲ့ပေ။ ယင်းအစား ရွှေနွားရုပ်ကိုကိုးကွယ်ခြင်း ပုန်ကန်မှုတွင် အထင်ကရအခန်းကဏ္ဍမှ ပါဝင်ခဲ့ကြသူဖြစ်ဖွယ်ရှိသည့် လူ ၃,၀၀၀ ဖျက်ဆီးခံခဲ့ရသည်။ ပြစ်မှားသောအခြားသူများသည် ယေဟောဝါ၏ ဒဏ်ခတ်ခြင်းကိုခံခဲ့ကြရ၏။ (ထွက်မြောက်ရာ ၃၂:၂၈၊ ၃၅) သမ္မာကျမ်းစာကိုဖတ်ရှုသော်လည်း လိုက်နာလိုရာကို ကိုယ်တိုင်ရွေးချယ်လိုက်နာကြသူများအတွက် တကယ့်သင်ခန်းစာတစ်ရပ်ပင်!

“မတရားသောမေထုန်ကို ကြဉ်ရှောင်ကြလော့”

၁၇။ ၁ ကောရိန္သု ၁၀:၈ သည်အဘယ်ဖြစ်ရပ်ကို ရည်ညွှန်းနေသနည်း။

^၁၇ဝိညာဉ်ရေးရာကိုမေ့လျော့စေနိုင်သည့် အသွေးအသားဆန္ဒတစ်ခုကို ပေါလုဤသို့ဖော်ပြခဲ့သည်– “ထိုသူအချို့တို့သည် မတရားသောမေထုန်အမှုကိုပြု၍ တစ်နေ့ခြင်းတွင် လူနှစ်သောင်းသုံးထောင်လဲ၍သေသကဲ့သို့မပြုဘဲ၊ မတရားသောမေထုန်ကို ရှောင်ကြကုန်အံ့။” (၁ ကောရိန္သု ၁၀:၈) ဤတွင် ဣသရေလလူမျိုး အနှစ် ၄၀ ကြာတောတွင်းခရီးကြမ်းနှင်ခြင်း၏ အဆုံးပိုင်း၌ မောဘလွင်ပြင်တွင်ဖြစ်ခဲ့သည် အဖြစ်အပျက်တစ်ခုကို ပေါလုရည်ညွှန်းသည်။ ဣသရေလလူများသည် မကြာမီကပင် ယေဟောဝါ၏အကူအညီဖြင့် ယော်ဒန်အရှေ့ဘက်ရှိ နယ်မြေများကိုသိမ်းပိုက်ခဲ့ကြသော်လည်း အများစုသည် မေ့လျော့၍ တန်ဖိုးမထားသူများဖြစ်နေကြောင်း ထင်ရှားခဲ့သည်။ ကတိထားရာပြည်တော်နယ်စပ်၌ လိင်အကျင့်ယိုယွင်းခြင်းနှင့် မသန့်ရှင်းသော ဗာလပေဂုရဝတ်ပြုကိုးကွယ်ခြင်း၌ပါဝင်ရန် သွေးဆောင်ခံခဲ့ကြရသည်။ ၂၄,၀၀၀ ခန့်ဖျက်ဆီးခံခဲ့ရ၍ ထိုသူတို့မှ ၁,၀၀၀ သည် ဦးဆောင်သူများဖြစ်ကြသည်။—တောလည်ရာ ၂၅:၉။

၁၈။ အဘယ်သို့သောအမူအကျင့်က လိင်အကျင့်ယိုယွင်းခြင်းသို့ ဦးတည်သွားနိုင်သနည်း။

^၁၈ယေဟောဝါ၏လူမျိုးတော်သည် မြင့်မားသောကျင့်ဝတ်စံနှုန်းများကျင့်ခြင်းကြောင့် ယနေ့လူသိများကြ၏။ သို့ရာတွင် လိင်အကျင့်ယိုယွင်းမှုနှင့် သွေးဆောင်ခံရသောအခါ ခရစ်ယာန်အချို့သည် ဘုရားသခင်နှင့် ကိုယ်တော့်မူများကို မတွေးတောတော့ချေ။ သူတို့သည် ကြားနာ၍မေ့လျော့သူများ ဖြစ်လာကြ၏။ အစပိုင်း၌ သူတို့ခံရသောသွေးဆောင်မှုတွင် မတရားမေထုန်ပြုခြင်း ပါဝင်မည်မဟုတ်ချေ။ ညစ်ညမ်းသောစာပေများကို စူးစမ်းကြည့်ရှုလိုခြင်း၊ မတော်မလျော် နောက်ပြောင်ခြင်း၊ ပရောပရည်လုပ်ခြင်း သို့မဟုတ် အကျင့်လျော့ရဲသူများနှင့် ရင်းနှီးစွာပေါင်းသင်းလိုခြင်းတို့နှင့် စတင်ပေမည်။ ထိုအရာအားလုံးက ခရစ်ယာန်များကို အပြစ်ပြုစေခဲ့ပြီ။—၁ ကောရိန္သု ၁၅:၃၃; ယာကုပ် ၄:၄။

၁၉။ အဘယ်ကျမ်းစာသွန်သင်ချက်က “မတရားသောမေထုန်ကို ကြဉ်ရှောင်ကြ” ရန်အထောက်အကူပြုသနည်း။

^၁၉အကျင့်ယိုယွင်းခြင်းတွင်ပါဝင်ရန် သွေးဆောင်ခံရလျှင် ယေဟောဝါကိုမမေ့သင့်ပေ။ ထို့ထက်ကား ကိုယ်တော့်ကျမ်းစာပါ သတိပေးချက်များကို လိုက်နာစောင့်ထိန်းကြရမည်။ (ဆာလံ ၁၁၉:၁၊ ၂) ခရစ်ယာန်များအနေနှင့် ကျွန်ုပ်တို့အများစုသည် ကိုယ်ကျင့်တရားသန့်ရှင်းရန် အစွမ်းကုန်ကြိုးစားကြသော်လည်း ဘုရားသခင့်ရှေ့မှောက်တွင် မှန်ကန်ရာကို အဆက်မပြတ်ကြိုးစားပြုလုပ်ရန်လိုသည်။ (၁ ကောရိန္သု ၉:၂၇) ရောမရှိခရစ်ယာန်များထံ ပေါလုဤသို့စာရေးခဲ့သည်– “သင်တို့နားထောင်ခြင်း၏သတင်းသည် လူအပေါင်းတို့တွင်နှံ့ပြားသည်ဖြစ်၍ သင်တို့အတွက် ငါဝမ်းမြောက်ခြင်းရှိ၏။ သို့သော်လည်း သင်တို့သည် ကောင်းသောအမှု၌ကား ပညာရှိစေခြင်းငှာလည်းကောင်း၊ ဆိုးသောအမှု၌ကား အပြစ်ကင်းစေခြင်းငှာလည်းကောင်း ငါအလိုရှိ၏။” (ရောမ ၁၆:၁၉၊ သမ္မာ) ဣသရေလလူ ၂၄,၀၀၀ သည် သူတို့၏အပြစ်ကြောင့် ကွပ်မျက်ခံခဲ့ရသကဲ့သို့ မတရားမေထုန်ပြုသူများနှင့် အခြားအမှားပြုသူများသည်လည်း ယေဟောဝါ၏တရားစီရင်ခြင်းကို မကြာမီခံရကြမည်ဖြစ်သည်။ (ဧဖက် ၅:၃-၆) ထို့ကြောင့် ကြားနာ၍မေ့လျော့သူများဖြစ်မည့်အစား ကျွန်ုပ်တို့သည် ဆက်၍ “မတရားသောမေထုန်ကို ကြဉ်ရှောင်ကြ” ရမည်။—၁ ကောရိန္သု ၆:၁၈။

ယေဟောဝါ၏ပြင်ဆင်ပေးချက်များကို အစဉ်လေးမြတ်ပါ

၂၀။ ဣသရေလလူများသည် ယေဟောဝါအား မည်သို့စမ်းသပ်ခဲ့ကြသနည်း၊ ရလဒ်ကားအဘယ်နည်း။

^၂၀ခရစ်ယာန်အများစုသည် လိင်အကျင့်ယိုယွင်းရန် မည်သည့်အခါမျှအရှုံးမပေးကြချေ။ သို့တိုင် ဘုရားသခင့်မျက်နှာသာတော်ဆုံးရှုံးနိုင်သည့် အမြဲမြည်တမ်းနေတတ်သော လမ်းစဉ်ကိုမလိုက်လျှောက်ဖို့ ကျွန်ုပ်တို့ဂရုစိုက်ရမည်။ ပေါလုက ကျွန်ုပ်တို့ကို ဤသို့သတိပေးသည်– “ထိုသူ [ဣသရေလလူများ] အချို့တို့သည် စုံစမ်းနှောင့်ယှက်ခြင်းကိုပြု၍၊ မြွေဖြင့်ပျက်စီးသကဲ့သို့ ငါတို့သည်မပြု၊ [“ယေဟောဝါ၊” ကဘ] ကို မစုံစမ်းမနှောင့်ယှက်ဘဲနေကြကုန်အံ့။ ထိုသူအချို့တို့သည် မြည်တမ်းခြင်းကိုပြု၍၊ ဖျက်ဆီးသောသူ၏လက်ဖြင့် ပျက်စီးသကဲ့သို့မဟုတ်၊ မြည်တမ်းခြင်းကိုမပြုကြနှင့်။” (၁ ကောရိန္သု ၁၀:၉၊ ၁၀) ဣသရေလလူများသည် အံ့ဖွယ်နည်းဖြင့်ပြင်ဆင်ပေးသော မန္နမုန့်နှင့်ပတ်သက်၍ မောရှေနှင့်အာရုန်ကိုသာမက အမှန်မှာ ဘုရားသခင်ကိုယ်တော်တိုင်ကိုပင် အပြစ်တင်၍မြည်တမ်းခဲ့ကြသည်။ (တောလည်ရာ ၁၆:၄၁; ၂၁:၅) ယေဟောဝါသည် သူတို့၏မြည်တမ်းခြင်းကို မတရားမေထုန်ပြုခြင်းလောက် စိတ်မနာပဲနေခဲ့ပါသလော။ မြည်တမ်းသူများစွာသည် မြွေကိုက်၍အသက်ဆုံးခဲ့ရကြောင်း ကျမ်းစာမှတ်တမ်းက ဖော်ပြထားသည်။ (တောလည်ရာ ၂၁:၆) အစောပိုင်းအချိန်တစ်ချိန်တွင် ပုန်ကန်သောမြည်တမ်းသူ ၁၄,၇၀၀ ကျော်ဖျက်ဆီးခံခဲ့ရသည်။ (တောလည်ရာ ၁၆:၄၉) သို့ဖြစ်၍ ယေဟောဝါ၏ပြင်ဆင်ပေးချက်များကို မခန့်လေးစားပြုမူပြောဆိုခြင်းဖြင့် ကိုယ်တော်၏စိတ်ရှည်ခြင်းကို မစမ်းသပ်ကြစို့နှင့်။

၂၁။ (က) အဘယ်တိုက်တွန်းချက်ကို ရေးသားရန် ပေါလုမှုတ်သွင်းခံခဲ့ရသနည်း။ (ခ) ယာကုပ် ၁:၂၅ အရ ကျွန်ုပ်တို့သည် အဘယ်နည်းဖြင့် အမှန်ပျော်ရွှင်နိုင်မည်နည်း။

^၂၁ခရစ်ယာန်ချင်းထံစာရေးရာတွင် ပေါလုက ဤအားပေးတိုက်တွန်းမှုဖြင့် သတိပေးချက်များကို နိဂုံးချုပ်လိုက်၏– “ထိုအကြောင်းအရာရှိသမျှတို့သည် ပုံသက်သေဖြစ်အံ့သောငှာ ထိုသူတို့၌ရောက်ကြ၏။ ကပ်ကာလအဆုံးတွင်ဖြစ်သော ငါတို့ကို ဆုံးမစရာဖို့ ကျမ်းစာ၌ရေးထားလျက်ရှိသတည်း။ ထို့ကြောင့် အကြင်သူသည် မိမိတည်ကြည်လျက်နေသည်ဟု မိမိထင်မှတ်၏၊ ထိုသူသည် မလဲခြင်းငှာသတိပြုစေ။” (၁ ကောရိန္သု ၁၀:၁၁၊ ၁၂) ဣသရေလလူများနည်းတူ ကျွန်ုပ်တို့သည် ယေဟောဝါထံမှ ကောင်းချီးမြောက်မြားစွာ ရရှိထားကြသည်။ သို့ရာတွင် သူတို့နှင့်မတူဘဲ ဘုရားသခင် ကျွန်ုပ်တို့အတွက်ပြုလုပ်ပေးသည့် ကောင်းမှုများကို ဘယ်တော့မျှမမေ့လျော့၊ လေးမြတ်သောစိတ်လည်း ဘယ်တော့မျှမပျောက်ပါစေနှင့်။ ဘဝစိုးရိမ်ပူပန်မှုများ၏ဖိစီးမှုကို ကျွန်ုပ်တို့ခံရသောအခါ သမ္မာကျမ်းစာတွင်ပါသည့် အံ့ဖွယ်ကတိတော်များကို ပြန်သုံးသပ်ကြည့်ကြစို့။ ယေဟောဝါနှင့်ကျွန်ုပ်တို့၏ တန်ဖိုးရှိဆက်ဆံရေးကို အမှတ်ရပြီး ကျွန်ုပ်တို့အား အပ်နှင်းထားသော ဘုရားသခင့်နိုင်ငံတော် ဟောပြောခြင်းလုပ်ငန်းကို ဆက်၍လုပ်ကိုင်ကြပါစို့။ (မဿဲ ၂၄:၁၄; ၂၈:၁၉၊ ၂၀) ထိုသို့သောလမ်းစဉ်သည် စစ်မှန်သောပျော်ရွှင်မှုကို အမှန်ရရှိစေမည်ဖြစ်ကြောင်း ကျမ်းစာက ဤသို့ကတိပြုသည်– “လွှတ်ခြင်းနှင့်စပ်ဆိုင်၍ စုံလင်သောတရား၌စေ့စေ့ကြည့်ရှု၍ တည်ကြည်သောသူမူကား၊ တရားနာ၍မေ့လျော့သောသူမဟုတ်၊ အကျင့်ကျင့်သောသူဖြစ်သဖြင့် မိမိကျင့်သောအကျင့်၌ မင်္ဂလာရှိ [“ပျော်ရွှင်၊” ကဘ] ၏။”—ယာကုပ် ၁:၂၅။

သင်မည်သို့ဖြေဆိုမည်နည်း

• အဘယ်အရာက ကျွန်ုပ်တို့ကို ကြားနာ၍မေ့လျော့သူများ ဖြစ်စေနိုင်သနည်း။

• ဘုရားသခင်အား အကြွင်းမဲ့နာခံခြင်းသည် အဘယ့်ကြောင့်အလွန်အရေးပါသနည်း။

• မည်သို့ “မတရားသောမေထုန်ကို ကြဉ်ရှောင်” နိုင်သနည်း။

• ယေဟောဝါ၏ပြင်ဆင်ပေးချက်များနှင့်ပတ်သက်၍ ကျွန်ုပ်တို့သဘောထားက မည်သို့ဖြစ်သင့်သနည်း။

[လေ့လာရန်မေးခွန်းများ]

[စာမျက်နှာ ၁၅ ပါ ရုပ်ပုံ]

ဣသရေလလူများသည် မိမိတို့အတွက်ပြုလုပ်ပေးသော ယေဟောဝါ၏တန်ခိုးပါသောအမှုတော်များကို မေ့လျော့ခဲ့ကြ

[စာမျက်နှာ ၁၆ ပါ ရုပ်ပုံ]

ယေဟောဝါ၏လူများသည် မြင့်မားသောကျင့်ဝတ်စံနှုန်းများကို ထိန်းသိမ်းရန် စိတ်ပိုင်းဖြတ်ထားကြ

ကင်းမျှော်စင်—လေ့လာရန် စာစောင်