ပေးကမ်းခြင်း၏ရွှင်လန်းမှုကို ခံစားလော့!
ပေးကမ်းခြင်း၏ရွှင်လန်းမှုကို ခံစားလော့!
“ခံယူခြင်းထက်ပေးကမ်းခြင်း၌ ပျော်ရွှင်မှုသာ၍ရှိ၏။”—တမန်တော် ၂၀:၃၅၊ ကဘ။
၁။ ပေးကမ်းခြင်းမှရသော ပျော်ရွှင်မှုကို ယေဟောဝါမည်သို့ဖော်ပြတော်မူသနည်း။
အမှန်တရားကို သိကျွမ်းခြင်း၏ရွှင်လန်းမှုနှင့် ယင်းမှရရှိသော ကောင်းချီးများသည် ဘုရားသခင်ထံတော်မှ တန်ဖိုးရှိသောဆုကျေးဇူးများဖြစ်သည်။ ယေဟောဝါအား သိကျွမ်းလာသူတို့တွင် ဝမ်းမြောက်စရာအကြောင်းများစွာရှိ၏။ သို့သော် လက်ဆောင်တစ်ခုရခြင်းမှ ပျော်ရွှင်မှုရရှိသည်မှန်သော်လည်း ပေးကမ်းခြင်းမှလည်း ပျော်ရွှင်မှုရနိုင်သည်။ ယေဟောဝါသည် “ကောင်းမြတ်စုံလင်သောဆုကျေးဇူးရှိသမျှတို့” ကို ပေးကမ်းသောအရှင်ဖြစ်ပြီး ကိုယ်တော်သည် “ပျော်ရွှင်သောဘုရားသခင်” ဖြစ်တော်မူ၏။ (ယာကုပ် ၁:၁၇; ၁ တိမောသေ ၁:၁၁၊ ကဘ) မေတ္တာပါသောညွှန်ကြားချက်ကို ကလေးများနာခံမှုပြကြသောကြောင့် မိဘများဝမ်းမြောက်သကဲ့သို့ ကိုယ်တော်သည် မိမိ၏ကျန်းခံ့သောသွန်သင်ချက်များကို နားထောင်၍ နာခံမှုပြသူတို့ကြောင့် စိတ်ရွှင်လန်းတော်မူ၏။—သု. ၂၇:၁၁။
၂။ (က) ပေးကမ်းခြင်းအကြောင်း ယေရှု အဘယ်အရာကို မိန့်တော်မူခဲ့သနည်း။ (ခ) သမ္မာကျမ်းစာအမှန်တရားကို အခြားသူတို့အား သွန်သင်ပေးသောအခါ အဘယ်ပျော်ရွှင်မှုကို ကျွန်ုပ်တို့ရရှိကြသနည်း။
၂ အလားတူ ယေရှုမြေကြီးပေါ်ရှိစဉ် မိမိ၏သွန်သင်ချက်ကို အပြုသဘောဖြင့် လက်ခံတုံ့ပြန်သူများကြောင့် ပျော်ရွှင်ခဲ့သည်။ ယေရှု ဤသို့မိန့်ဆိုတော်မူခဲ့ကြောင်း တမန်တော်ပေါလု ကိုးကားဖော်ပြခဲ့သည်– “ခံယူခြင်းထက်ပေးကမ်းခြင်း၌ ပျော်ရွှင်မှုသာ၍ရှိ၏။” (တမန်တော် ၂၀:၃၅၊ ကဘ) သမ္မာကျမ်းစာအမှန်တရားကို အခြားသူတို့အား ကျွန်ုပ်တို့သွန်သင်ပေးသောအခါ ကျွန်ုပ်တို့ရရှိသည့်ပျော်ရွှင်မှုမှာ ကျွန်ုပ်တို့၏ဘာသာရေးခံယူချက်များကို တစ်ဦးတစ်ယောက်က သဘောတူလက်ခံခြင်းကြောင့် ရရှိသည့်ကျေနပ်မှုမျှသာ မဟုတ်ချေ။ ထိုထက်မကသည်ကား ကျွန်ုပ်တို့သည် စစ်မှန်၍တည်မြဲသည့်တန်ဖိုးရှိရာတစ်ခုကို ပေးကမ်းနေကြောင်း သိရှိထားသောရွှင်လန်းမှုဖြစ်သည်။ ကျွန်ုပ်တို့သည် ဝိညာဉ်ရေးအရပေးကမ်းခြင်းဖြင့် ယခုနှင့် ထာဝစဉ် လူတို့အား အကျိုးခံစားစေရန် ကူညီပေးနိုင်ကြသည်။—၁ တိမောသေ ၄:၈။
ပေးကမ်းခြင်းက ရွှင်လန်းမှုရရှိစေ
၃။ (က) ဝိညာဉ်ရေးအရ အခြားသူတို့ကို ကူညီပေးရာ၌ တမန်တော်ပေါလုနှင့် ယောဟန်တို့သည် ပျော်ရွှင်မှုရရှိကြောင်း မည်သို့ဖော်ပြခဲ့ကြသနည်း။ (ခ) သမ္မာကျမ်းစာအမှန်တရားကို ကျွန်ုပ်တို့၏သားသမီးများအား ပေးကမ်းခြင်းက အဘယ်ကြောင့်မေတ္တာပြရာကျသနည်း။
၃ ဝိညာဉ်ရေးရာဆုကျေးဇူးများကို ပေးကမ်းခြင်း၌ ယေဟောဝါနှင့် ယေရှုတို့ပျော်ရွှင်ကြသကဲ့သို့ ခရစ်ယာန်များလည်း အလားတူဖြစ်ကြ၏။ တမန်တော်ပေါလုသည် ဘုရားသခင့်နှုတ်မြွက်စကားတော် အမှန်တရားကို အခြားသူတို့အား သိရှိလာစေရန် ကူညီပေးခဲ့ခြင်းမှ ပျော်ရွှင်မှုရခဲ့သည်။ သက်သာလောနိတ်ရှိ အသင်းတော်ထံ သူဤသို့ရေးသားခဲ့၏– “ငါတို့မျှော်လင့်ခြင်းအကြောင်း၊ ဝမ်းမြောက်ခြင်းအကြောင်း၊ ဝါကြွားခြင်း၏ဦးရစ်သရဖူကား၊ အဘယ်သို့သောအကြောင်းအရာနည်း။ ငါတို့သခင်ယေရှုခရစ်ကြွလာတော်မူသောအခါ၊ ရှေ့တော်၌ သင်တို့သည် ထိုသို့သောအကြောင်းအရာဖြစ်ကြသည်မဟုတ်လော။ သင်တို့သည် ငါတို့၏ဘုန်းအသရေ၊ ငါတို့၏ဝမ်းမြောက်ခြင်းအကြောင်းဖြစ်ကြသတည်း။” (၁ သက်သာလောနိတ် ၂:၁၉၊ ၂၀) အလားတူပင် တမန်တော်ယောဟန်က မိမိ၏ဝိညာဉ်ရေးရာကလေးများကို ရည်ညွှန်း၍ ဤသို့ရေးသားခဲ့သည်– “ငါ၏သားသမီးတို့သည် [အမှန်] တရား၌ကျင်လည်သည်ကို ငါကြား၍ဝမ်းမြောက်ခြင်းထက် သာ၍ဝမ်းမြောက်ခြင်းမရှိ။” (၃ ယောဟန် ၄) ကျွန်ုပ်တို့၏သားသမီးရင်းချာများကို ဝိညာဉ်ရေးရာသားသမီးများဖြစ်လာစေရန် ဖေးမကူညီပေးခြင်းမှ ရရှိသောရွှင်လန်းမှုကိုလည်း စဉ်းစားကြည့်ပါ။ “သခင်ဘုရား၏အလိုတော်နှင့်ညီသော ဆုံးမသွန်သင်ခြင်း” ၌ ကလေးများကိုပြုစုပျိုးထောင်ပေးခြင်းက မိဘမေတ္တာကိုပြခြင်းဖြစ်၏။ (ဧဖက် ၆:၄) ထိုသို့အားဖြင့် မိဘတို့သည် မိမိသားသမီးများ၏ ထာဝရအကျိုးကို စဉ်းစားကြကြောင်း ဖော်ပြသည်။ သူတို့လေးများက တုံ့ပြန်လာကြသောအခါ မိဘများသည် များစွာပျော်ရွှင်ပြီး ကျေနပ်ရောင့်ရဲမှုရှိကြသည်။
၄။ ဝိညာဉ်ရေးရာပေးကမ်းခြင်း၏ ရွှင်လန်းမှုကို အဘယ်တွေ့ကြုံမှုက ဖော်ပြသနည်း။
၄ ဒဲလ်သည် အချိန်ပြည့်ဓမ္မအမှုဆောင်တစ်ဦးဖြစ်ပြီး သားသမီးငါးယောက်၏မိခင်ဖြစ်သည်။ သူက ဤသို့ပြောသည်– “တမန်တော်ယောဟန်ရဲ့စကားကို ကျွန်မကောင်းကောင်းနားလည်နိုင်ပါတယ်၊ ဘာကြောင့်လဲဆိုရင် ကျွန်မရဲ့သားသမီးလေးယောက်ဟာ ‘အမှန်တရားထဲမှာ လျှောက်လှမ်း’ နေကြတဲ့အတွက် ကျွန်မတကယ်ပဲကျေးဇူးတင်မိတယ်။ မိသားစုတွေဟာ စစ်မှန်တဲ့ဝတ်ပြုရေးမှာ တစည်းတလုံးတည်းရှိကြတဲ့အခါ ယေဟောဝါကို ဂုဏ်တင်ချီးမွမ်းစရာဖြစ်တဲ့အတွက် အမှန်တရားကို ကျွန်မကလေးတွေ နှလုံးသွင်းနိုင်ဖို့ ကျွန်မရဲ့ကြိုးပမ်းမှုတွေအပေါ် ကိုယ်တော်ကောင်းချီးသွန်းလောင်းလို့ တကယ်ကျေနပ်မှုရတယ်။ ကျွန်မရဲ့မိသားစုနဲ့အတူ ပရဒိသုမှာ အဆုံးမဲ့အသက်တာနဲ့ နေနိုင်မယ့်အလားအလာကို မျှော်လင့်ထားလို့ အခက်အခဲတွေ၊ အတားအဆီးတွေကြားမှာ ခံနိုင်ရည်ရှိနိုင်ဖို့ ကျွန်မလှုံ့ဆော်ခံရတယ်။” ဝမ်းနည်းစရာကား ဒဲလ်၏သမီးတစ်ဦးသည် ခရစ်ယာန်မဆန်သောလမ်းစဉ်တစ်ရပ်ကြောင့် အသင်းတော်မှနှင်ထုတ်ခံခဲ့ရ၏။ သို့တိုင် ဒဲလ်သည် အပြုသဘောပါသောစိတ်ထားကို ဆက်ကြိုးစား၍ထိန်းနေပါသည်။ “တစ်နေ့ကျရင် ကျွန်မသမီးဟာ စိတ်ရင်းမှန်နဲ့ နှိမ့်ချပြီး ယေဟောဝါထံ ပြန်လှည့်လာလိမ့်မယ်လို့ ကျွန်မမျှော်လင့်နေပါတယ်” ဟုသူကပြောသည်။ “ဒါပေမဲ့ ကျွန်မရဲ့သားသမီးအများစုကတော့ ဘုရားသခင်ကိုတည်ကြည်စွာနဲ့ ဆက်လက်ဝတ်ပြုနေတာကို ကျေးဇူးတင်ပါတယ်။ ကျွန်မခံစားရတဲ့ရွှင်လန်းမှုဟာ ကျွန်မအတွက် တကယ်အားရှိစရာဖြစ်တယ်။”—နေဟမိ ၈:၁၀။
ထာဝရတည်မြဲသော မိတ်ဆွေများဖွဲ့ခြင်း
၅။ တပည့်ဖြစ်စေခြင်းလုပ်ငန်းတွင် ကျွန်ုပ်တို့ကိုယ်ကိုပေးဆက်ကြစဉ် အဘယ်အရာကိုသိထားခြင်းက ကျေနပ်မှုရရှိစေသနည်း။
၅ ခရစ်ယာန်တပည့်များဖြစ်စေပြီး ယေဟောဝါနှင့် ကိုယ်တော်၏တောင်းဆိုချက်များကို သွန်သင်ပေးရန် မိမိ၏နောက်လိုက်များအား ယေရှုညွှန်ကြားခဲ့သည်။ (မဿဲ ၂၈:၁၉၊ ၂၀) ယေဟောဝါနှင့် ယေရှုနှစ်ပါးစလုံးသည် လူတို့အား အမှန်တရားလမ်းကိုသိလာစေရန် ကိုယ်ကျိုးစွန့်ကူညီပေးခဲ့၏။ သို့ဖြင့် တပည့်ဖြစ်စေခြင်းလုပ်ငန်း၌ ကျွန်ုပ်တို့ကိုယ်ကိုပေးဆက်ကြမည်ဆိုလျှင် အစောပိုင်းခရစ်ယာန်များကဲ့သို့ပင် ကျွန်ုပ်တို့သည် ယေဟောဝါနှင့် ယေရှု၏ပုံနမူနာကို အတုယူနေကြကြောင်းသိရှိရ၍ ကျေနပ်ရောင့်ရဲမှုရှိကြသည်။ (၁ ကောရိန္သု ၁၁:၁) ကျွန်ုပ်တို့သည် ဤနည်းဖြင့် ကြီးမြတ်တော်မူသောဘုရားသခင်နှင့် ကိုယ်တော်ချစ်မြတ်နိုးလှသောသားတော်တို့နှင့် ပူးပေါင်းဆောင်ရွက်ကြသောအခါ ကျွန်ုပ်တို့၏ဘဝသည် အမှန်ပင်အဓိပ္ပာယ်ရှိလာသည်။ ဘုရားသခင်၏ “အလုပ်လုပ်သောသူချင်း” အလယ်တွင် ရေတွက်ခံရခြင်းသည် ကြီးမားသောကောင်းချီးတစ်ရပ်ပါတကား! (၁ ကောရိန္သု ၃:၉) ထို့ပြင် ကောင်းကင်တမန်များပင် ဤသတင်းကောင်းဟောပြောခြင်းလုပ်ငန်း၌ တစ်စိတ်တစ်ပိုင်းပါဝင်ကြခြင်းက စိတ်လှုပ်ရှားတက်ကြွစရာ မဟုတ်ပေလော!—ဗျာဒိတ် ၁၄:၆၊ ၇။
၆။ ဝိညာဉ်ရေးရာပေးကမ်းခြင်းတွင် ကျွန်ုပ်တို့ပါဝင်စဉ် မည်သူတို့သည် ကျွန်ုပ်တို့၏မိတ်ဆွေများဖြစ်လာကြသနည်း။
၆ အမှန်မှာ ဤဝိညာဉ်ရေးရာပေးကမ်းခြင်းလုပ်ငန်း၌ ပါဝင်ခြင်းဖြင့် ကျွန်ုပ်တို့သည် ဘုရားသခင်၏လုပ်ဖော်ဆောင်ဖက်ချင်း ဖြစ်လာသည်ထက်မက ကိုယ်တော်၏ ထာဝရမိတ်ဆွေဖြစ်သွားနိုင်သည်။ အာဗြဟံသည် သူ၏ယုံကြည်ခြင်းကြောင့် ယေဟောဝါ၏အဆွေဟု ခေါ်ဝေါ်ခံခဲ့ရ၏။ (ယာကုပ် ၂:၂၃) ဘုရားသခင့်အလိုတော်ကို ကျွန်ုပ်တို့ကြိုးပမ်းထမ်းရွက်ကြစဉ် ကျွန်ုပ်တို့သည်လည်း ဘုရားသခင်၏မိတ်ဆွေများ ဖြစ်လာနိုင်ကြသည်။ ထိုသို့ ကျွန်ုပ်တို့ပြုလုပ်ကြမည်ဆိုလျှင် ကျွန်ုပ်တို့သည် ယေရှု၏မိတ်ဆွေများလည်းဖြစ်လာကြသည်။ တပည့်တော်များကို ကိုယ်တော်ဤသို့မိန့်တော်မူခဲ့သည်– “သင်တို့ကိုအဆွေဟူ၍ငါခေါ်၏။ အကြောင်းမူကား၊ ငါသည် ခမည်းတော်ထံ၌ကြားသမျှသောအရာတို့ကို သင်တို့အားငါပြသ၏။” (ယောဟန် ၁၅:၁၅) လူများစွာသည် ဩဇာရှိသူများ သို့မဟုတ် ထိပ်တန်းအရာရှိကြီးများ၏မိတ်ဆွေများအဖြစ် ရေတွက်ခံရရန် ဝမ်းမြောက်ကြသည်၊ ကျွန်ုပ်တို့မှာမူ စကြဝဠာတစ်ခွင် အကြီးဆုံးမြတ်ဆုံးပုဂ္ဂိုလ်နှစ်ပါး၏ အဆွေများအဖြစ် ရေတွက်ခံရနိုင်သည်တကား!
၇။ (က) အမျိုးသမီးတစ်ဦးသည် မိတ်ဆွေစစ်တစ်ဦး မည်သို့ရရှိခဲ့သနည်း။ (ခ) သင့်၌ အလားတူတွေ့ကြုံမှုရှိသလော။
၇ ထိုမျှမက ဘုရားသခင်အားသိကျွမ်းလာရန် လူတို့ကို ကျွန်ုပ်တို့ကူညီပေးကြသောအခါ သူတို့သည် ကျွန်ုပ်တို့၏မိတ်ဆွေများဖြစ်လာကြပြီး ကျွန်ုပ်တို့အား အထူးပျော်ရွှင်မှုရရှိစေသည်။ အမေရိကန်ပြည်ထောင်စုတွင် နေထိုင်သော ဂျုံးသည် သဲလ်မာအမည်ရှိသူတစ်ဦးနှင့် စတင်၍ကျမ်းစာလေ့လာခဲ့သည်။ သူ၏လေ့လာမှုကို မိသားစုက ဆန့်ကျင်ကြသော်လည်း သဲလ်မာသည် စွဲစွဲမြဲမြဲလေ့လာခဲ့ရာ တစ်နှစ်အကြာတွင် နှစ်ခြင်းခံလိုက်၏။ ဂျုံးက ဤသို့ရေးခဲ့သည်– “ကျွန်မတို့ရဲ့ ပေါင်းသင်းဆက်ဆံမှုဟာ အဲဒီမှာတင်အဆုံးသတ်မသွားပါဘူး; အဲဒီအစား ၃၅ နှစ်ခန့်ကြာတဲ့ ခင်မင်ရင်းနှီးမှုရှိစေခဲ့ပါတယ်။ ခရစ်ယာန်ဓမ္မအမှုနဲ့ စည်းဝေးကြီးတွေကို ကျွန်မတို့ အတူတကွသွားလေ့ရှိတယ်။ နောက်ဆုံး မိုင် ၅၀၀ ကွာဝေးတဲ့ အိမ်အသစ်ကို ကျွန်မပြောင်းရွှေ့ခဲ့ရတယ်။ ဒါပေမဲ့လည်း သဲလ်မာဟာ အခုထိ စိတ်နှလုံးနွေးထွေးစေတဲ့ မေတ္တာစာတွေပို့ပြီး ကျွန်မကိုခင်မင်စွာ သတိရနေတဲ့အကြောင်း၊ သူ့ရဲ့သူငယ်ချင်းနဲ့ ပုံသက်သေဖြစ်တဲ့အတွက်ရယ်၊ သူ့ကို သမ္မာကျမ်းစာထဲက အမှန်တရားကို သွန်သင်ပေးတဲ့အတွက် ကျွန်မကိုကျေးဇူးတင်တဲ့အကြောင်းပြောတယ်။ အဲဒီလောက် ရင်းနှီးချစ်ခင်စရာကောင်းတဲ့ မိတ်ဆွေတစ်ဦးရှိထားခြင်းဟာ ယေဟောဝါကို သူသိကျွမ်းလာအောင် ကြိုးစားကူညီပေးခဲ့တဲ့ ဆုကျေးဇူးကောင်းတစ်ခုပါပဲ။”
၈။ ခရစ်ယာန်ဓမ္မအမှုတွင် အဘယ်အပြုသဘောက ကူညီပေးလိမ့်မည်နည်း။
၈ ကျွန်ုပ်တို့တွေ့ဆုံကြရသူအများစုသည် ယေဟောဝါ၏နှုတ်မြွက်စကားတော်ကို စိတ်ဝင်စားမှုလုံးဝမပြသည့်တိုင် အမှန်တရားကိုသိလိုစိတ်ရှိသူတစ်ဦးအား ကျွန်ုပ်တို့တွေ့ဆုံဖို့အလားအလာရှိခြင်းက ခံနိုင်ရည်ရှိစေ၏။ ယင်းသို့သော စိတ်ဝင်စားမှုမရှိခြင်းက ကျွန်ုပ်တို့၏ယုံကြည်ခြင်းနှင့် ခံနိုင်ရည်ကို စိန်ခေါ်ချက်တစ်ရပ်ဖြစ်စေနိုင်သည်။ သို့တိုင်၊ အပြုသဘောထားခြင်းသည် ကျွန်ုပ်တို့ကို ကူညီပေးလိမ့်မည်။ ဂွာတီမာလာသားဖြစ်သော ဖော်စတိုက ဤသို့ပြောသည်– “တခြားသူတွေကို ကျွန်တော်သက်သေခံတဲ့အခါ ကျွန်တော်စကားပြောနေတဲ့သူဟာ ဝိညာဉ်ရေးရာညီအစ်ကို ဒါမှမဟုတ် ညီအစ်မတစ်ဦးဖြစ်လာရင် ဘယ်လောက်ကောင်းလိုက်မလဲလို့ စဉ်းစားကြည့်တယ်။ ကျွန်တော်တွေ့ဆုံရတဲ့သူ အနည်းဆုံးတော့ တစ်ယောက်ဟာ နောက်ဆုံးဘုရားသခင့်နှုတ်မြွက်စကားတော်အမှန်တရားကို လက်ခံလာနိုင်တယ်လို့ ကျွန်တော်တွေးတယ်။ အဲဒီလိုစဉ်းစားတဲ့အတွက် ကျွန်တော်ဆက်အမှုဆောင်နိုင်ပြီး စစ်မှန်တဲ့ပျော်ရွှင်မှုကိုရတယ်။”
ကောင်းကင်၌ဘဏ္ဍာကို သိုမှီးနေခြင်း
၉။ ကောင်းကင်ဘဏ္ဍာနှင့်ပတ်သက်၍ ယေရှု မည်သို့မိန့်တော်မူခဲ့သနည်း၊ ယင်းမှ ကျွန်ုပ်တို့ အဘယ်အရာသိရှိနိုင်သနည်း။
၉ ကျွန်ုပ်တို့၏သားသမီးများကိုဖြစ်စေ၊ အခြားသူတို့ကိုဖြစ်စေ တပည့်ဖြစ်စေခြင်းသည် အမြဲမလွယ်ကူပါ။ ထိုသို့ပြုလုပ်ရန် အချိန်၊ စိတ်ရှည်မှုနှင့် စွဲမြဲမှုတို့ရှိရပေမည်။ သို့သော် လူအများသည် သူတို့ကို ပျော်ရွှင်မှုပေးလေ့မရှိသော၊ မတည်မြဲသည့်ပစ္စည်းဥစ္စာမြောက်မြားစွာ သိုမှီးကြရန် အလုပ်ကြိုးစားလုပ်ကိုင်လိုကြကြောင်း သတိရပါ။ တရားတော်ကိုနားထောင်သူတို့အား ယေရှုက ဝိညာဉ်ရေးရာများအတွက် လုပ်ဆောင်ခြင်းသည် သာ၍ကောင်းသည်ဟု မိန့်တော်မူခဲ့၏။ ကိုယ်တော်ဤသို့မိန့်မြွက်ခဲ့သည်– “သံချေး၊ ပိုးရွဖျက်ဆီး၍ သူခိုးထွင်းဖောက်ခိုးယူရာ မြေကြီးပေါ်မှာ ဘဏ္ဍာကိုမဆည်းပူးကြနှင့်။ သံချေး၊ ပိုးရွမဖျက်ဆီး၍ သူခိုးမထွင်းမဖောက် မခိုးမယူရာ ကောင်းကင်ဘုံ၌ဘဏ္ဍာကို ဆည်းပူး (“သိုမှီး၊” ကဘ) ကြလော့။” (မဿဲ ၆:၁၉၊ ၂၀) အရေးပါသော တပည့်ဖြစ်စေခြင်းလုပ်ငန်းပါဝင်သည့် ဝိညာဉ်ရေးရာပန်းတိုင်များကို ဆည်းပူးခြင်းဖြင့် ကျွန်ုပ်တို့သည် ဘုရားသခင့်အလိုတော်ကိုဆောင်ရွက်နေကြောင်းနှင့် ကျွန်ုပ်တို့ကို ကိုယ်တော်ကောင်းချီးပေးမည်ဖြစ်ကြောင်း သိရှိထား၍ ကျေနပ်မှုရရှိနိုင်ကြသည်။ တမန်တော်ပေါလုက ဤသို့ရေးသားခဲ့သည်– “သင်တို့၏အလုပ်မှစ၍ နာမတော်ကိုထောက်၍ပြသော သင်တို့၏မေတ္တာကို မေ့လျော့သည်တိုင်အောင် ဘုရားသခင်သည် ဖြောင့်မတ်ခြင်းကင်းတော်မူသည်မဟုတ်။”—ဟေဗြဲ ၆:၁၀၊ ကဘ။
၁၀။ (က) ယေရှု၌ ဝိညာဉ်ရေးရာဘဏ္ဍာများ အဘယ်ကြောင့်ရှိသနည်း။ (ခ) ယေရှုသည် မိမိကိုယ်နှိုက်ကို မည်သို့ပေးတော်မူခဲ့သနည်း၊ အဘယ်ကြီးမားသောအကျိုးကို အခြားသူတို့အား ရရှိစေခဲ့သနည်း။
၁၀ တပည့်ဖြစ်စေခြင်းလုပ်ငန်း၌ လုံ့လဝီရိယရှိရှိ လုပ်ဆောင်ကြမည်ဆိုလျှင် ယေရှု၏မိန့်တော်မူချက်နှင့်အညီ “ကောင်းကင်ဘုံ၌ဘဏ္ဍာ” ကို ကျွန်ုပ်တို့အတွက် သိုမှီးနေကြခြင်းဖြစ်၏။ ယင်းက ပေးကမ်းခြင်း၏ရွှင်လန်းမှုကို ကျွန်ုပ်တို့အား ရရှိစေသည်။ ကိုယ်ကျိုးမရှာဘဲ ကျွန်ုပ်တို့ပေးကြမည်ဆိုလျှင် ကျွန်ုပ်တို့ကိုယ်တိုင် ကြွယ်ဝလာသည်။ ယေရှုကိုယ်တော်တိုင် နှစ်ပေါင်းဘီလီယံနှင့်ချီ၍ ယေဟောဝါအမှုတော်ကို တည်ကြည်စွာထမ်းဆောင်ခဲ့သည်။ ကောင်းကင်၌ ကိုယ်တော်စုဆောင်းခဲ့သော ဘဏ္ဍာကို စဉ်းစားကြည့်ပါလေ! မည်သို့ပင်ဖြစ်စေ ယေရှုသည် မိမိ၏အကျိုးစီးပွားကို မရှာခဲ့ချေ။ တမန်တော်ပေါလုက ဤသို့ရေးသားခဲ့သည်– “[ယေရှု] သည် ငါတို့အဘတည်းဟူသော ဘုရားသခင်၏အလိုတော်နှင့်အညီ ဆိုးညစ်သောဤပစ္စုပ္ပန်ဘဝမှ ငါတို့ကိုကယ်နုတ်ခြင်းငှာ၊ ငါတို့အပြစ်ကြောင့် ကိုယ်ကိုကိုယ်အပ်ပေးတော်မူ၏။” (ဂလာတိ ၁:၄) ယေရှုသည် မိမိ၏ခရစ်ယာန်ဓမ္မအမှု၌ ကိုယ်ကျိုးမရှာဘဲ မိမိကိုယ်ကိုအပ်ပေးသည်သာမက ကိုယ်တော်၏အသက်ကိုပင် ရွေးနုတ်ဖိုးအဖြစ် ပေးတော်မူခဲ့သည်၊ သို့နှင့် အခြားသူတို့အား ကောင်းကင်၌ဘဏ္ဍာကိုသိုမှီးဆည်းပူးခွင့် ရရှိစေခဲ့၏။
၁၁။ ပစ္စည်းဥစ္စာပေးကမ်းခြင်းထက် ဝိညာဉ်ရေးရာလက်ဆောင်များပေးကမ်းခြင်းက အဘယ်ကြောင့်သာ၍ကောင်းသနည်း။
၁၁ လူတို့ကို ဘုရားသခင်အကြောင်း သွန်သင်ပေးခြင်းဖြင့် သူတို့လည်း မပျက်စီးနိုင်သော ဝိညာဉ်ရေးရာဘဏ္ဍာကို မည်သို့သိုမှီးထားနိုင်ကြောင်း သိရှိစေသည်။ ဤထက်သာ၍ကြီးမားသော အဘယ်လက်ဆောင်ကို သင်ပေးနိုင်မည်နည်း။ သင့်မိတ်ဆွေတစ်ဦးအား ဈေးကြီးသောနာရီတစ်လုံး၊ ကားတစ်စီး၊ သို့မဟုတ် အိမ်တစ်လုံးပင်ဖြစ်စေ ပေးလိုက်လျှင် ထိုမိတ်ဆွေသည် ကျေးဇူးတင်၍ ပျော်ရွှင်ပေလိမ့်မည်၊ သင်သည်လည်း ပေးကမ်းခြင်းမှပျော်ရွှင်မှု ခံစားရပေလိမ့်မည်။ သို့သော် အနှစ် ၂၀ အကြာတွင် ထိုလက်ဆောင်၏အခြေအနေမှာ မည်သို့ရှိလိမ့်မည်နည်း။ အနှစ် ၂၀၀၊ အနှစ် ၂,၀၀၀ ကြာလျှင်ကော။ အခြားတစ်ဖက်တွင်မူ သင်သည် လူတစ်ဦးကို ယေဟောဝါအား ဝတ်ပြုကိုးကွယ်သူဖြစ်ဖို့ ကူညီပေးရန် သင့်ကိုယ်သင်ပေးဆက်သည်ဆိုလျှင် သူသည် အဆိုပါလက်ဆောင်မှ ထာဝစဉ်အကျိုးရရှိနိုင်သည်။
အမှန်တရားအလိုရှိသူတို့အား ရှာဖွေခြင်း
၁၂။ ဝိညာဉ်ရေးအရ အခြားသူတို့ကိုကူညီပေးရန် မိမိတို့ကိုယ်ကို လူအများ မည်သို့ပေးဆက်ခဲ့ကြသနည်း။
၁၂ ဝိညာဉ်ရေးရာပေးကမ်းခြင်း၏ ရွှင်လန်းမှုရရှိရန် ယေဟောဝါ၏လူတို့သည် မြေကြီးစွန်းတိုင်အောင် ရောက်ရှိခဲ့ကြပေပြီ။ ထောင်နှင့်ချီသူတို့သည် မိမိအိမ်နှင့် မိသားစုတို့ကိုစွန့်ခွာပြီး ဘာသာစကားအသစ်များနှင့် ယဉ်ကျေးမှုအသစ်များကို သင်ခဲ့ကြရသည့်နိုင်ငံများတွင် ခရစ်ယာန်သာသနာပြုလုပ်ငန်းကို ထမ်းရွက်နေကြသည်။ အခြားသူတို့မှာမူ မိမိတို့၏နိုင်ငံတွင်း၌ပင် ဘုရားသခင့်နိုင်ငံတော်သတင်းကောင်းကြွေးကြော်သူများ ပို၍လိုအပ်သော နေရာဒေသများသို့ ပြောင်းရွှေ့ခဲ့ကြ၏။ ထို့အပြင် မိမိတို့၏ရပ်ကွက်များအတွင်း တိုင်းတစ်ပါးမှရောက်လာသူတို့ကို ဟောပြာခွင့်ရရှိရန် နိုင်ငံခြားဘာသာစကားများကို သင်ယူနေကြသူများရှိသည်။ ဥပမာ၊ အမေရိကန်ပြည်ထောင်စု၊ နယူးဂျာစီမှ မောင်နှံစုံတစ်စုံသည် ယခု ယေဟောဝါသက်သေတို့၏ဌာနချုပ်တွင် အမှုထမ်းလျက်ရှိကြသော ကလေးနှစ်ဦးကို ပြုစုပျိုးထောင်ခဲ့ပြီးနောက် ရှေ့ဆောင်လုပ်ငန်း၌ပါဝင်ပြီး တရုတ်ဘာသာစကားကို သင်ယူနေကြ၏။ သူတို့သည် သုံးနှစ်ကျော်ကာလအတွင်း အနီးအနားရှိကောလိပ်တွင် တက်နေကြသော တရုတ်စကားပြောသူ ၇၄ ဦးနှင့် ကျမ်းစာသင်အံမှုကျင်းပခဲ့သည်။ တပည့်ဖြစ်စေခြင်းလုပ်ငန်းတွင် သာ၍ပျော်ရွှင်မှုရရှိရန် သင့်ခရစ်ယာန်ဓမ္မအမှုကို တစ်နည်းနည်းဖြင့် တိုးချဲ့နိုင်ပါသလော။
၁၃။ သာ၍သီးပွင့်သောခရစ်ယာန်ဓမ္မအမှုကို သင်ရရှိရန် အဘယ်အရာပြုလုပ်နိုင်သနည်း။
၁၃ သင်သည် ကျမ်းစာသင်အံမှုကျင်းပရန် ဆန္ဒရှိမည်ဖြစ်သော်လည်း ထိုသို့မပြုလုပ်နိုင်ဘဲဖြစ်နေပေမည်။ နိုင်ငံအချို့တွင် စိတ်ဝင်စားသူတို့ကို ရှာဖွေတွေ့ရှိရန်ခက်ခဲပေသည်။ သင်တွေ့ရှိသူတို့သည် သမ္မာကျမ်းစာ၌ စိတ်ဝင်စားမှုမရှိသူများ ဖြစ်နိုင်ပေသည်။ ထိုသို့ဖြစ်လျှင် ယေဟောဝါနှင့် ယေရှုခရစ်နှစ်ပါးစလုံးသည် အဆိုပါလုပ်ငန်းတွင် အလွန်စိတ်ဝင်စားကြပြီး သိုးကဲ့သို့သောသူတစ်ဦးထံ သင့်ကိုပို့ဆောင်ပေးနိုင်ရာ ဆုတောင်းချက်တွင် သင်၏ဆန္ဒကို ကြိမ်ဖန်များစွာ ဖော်ပြနိုင်သည်။ သင့်အသင်းတော်မှ အတွေ့အကြုံရှိသူ သို့မဟုတ် ခရစ်ယာန်ဓမ္မအမှုတွင် အသီးများစွာသီးခဲ့သောသူတို့ထံမှ အကြံပေးချက်များကိုတောင်းဆိုပါ။ ခရစ်ယာန်အစည်းအဝေးများတွင်ပေးသော လေ့ကျင့်မှုနှင့် အကြံပြုချက်များကို အခွင့်အရေးယူ အသုံးပြုပါ။ တိုက်နယ်ကြီးကြပ်မှူးများနှင့် သူတို့၏ဇနီးများ၏ အကြံပေးချက်ကိုလက်ခံပြီးအကျိုးရယူပါ။ ထိုထက်ကား ဘယ်သောအခါမျှ လက်မလျှော့ပါနှင့်။ ပညာရှိတစ်ဦး ဤသို့ရေးသားခဲ့သည်– “နံနက်အချိန်၌ မျိုးစေ့ကိုကြဲလော့။ ညဦးအချိန်၌လည်း မကြဲဘဲမနေနှင့်။ အကြောင်းမူကား အဘယ်အရာသည် အကျိုးရှိမည်ကို . . . မသိနိုင်။” (ဒေ. ၁၁:၆) တစ်ချိန်တည်းတွင် နောဧနှင့် ယေရမိတို့ကဲ့သို့သော တည်ကြည်မှုရှိသူတို့ကို သတိရပါ။ သူတို့ဟောပြောသောသတင်းကို လိုလိုလားလားတုံ့ပြန်လက်ခံသူ အလွန်နည်းသော်လည်း သူတို့၏ခရစ်ယာန်ဓမ္မအမှုသည် အောင်မြင်ခဲ့၏။ ထိုထက်ကား ယေဟောဝါ၏စိတ်တော်နှင့်တွေ့ခဲ့သည်။
အတတ်နိုင်ဆုံး လုပ်ဆောင်ခြင်း
၁၄။ ကိုယ်တော်၏လုပ်ငန်းတော်၌ အသက်အရွယ်ကြီးရင့်လာသူတို့ကို ယေဟောဝါမည်သို့ရှုမှတ်တော်မူသနည်း။
၁၄ ခရစ်ယာန်ဓမ္မအမှုတွင် သင်ပါဝင်လုပ်ဆောင်လိုသမျှ သင်အခြေအနေက ခွင့်မပြုဘဲဖြစ်နိုင်သည်။ ဥပမာ၊ အသက်အရွယ်ကြီးရင့်ခြင်းက ယေဟောဝါ၏လုပ်ငန်းတော်၌ သင့်လုပ်ဆောင်နိုင်မှုကို ကန့်သတ်ပေမည်။ သို့တိုင် ပညာရှိတစ်ဦး ဤသို့ရေးသားခဲ့သည်ကို အမှတ်ရပါ– “ဖြူသောဆံပင်သည် ဖြောင့်မတ်ခြင်းတရားလမ်း၌တည်လျှင် ဘုန်းကြီးသောသရဖူဖြစ်၏။” (သု. ၁၆:၃၁) အသက်တာတစ်လျှောက် အမှုတော်ထမ်းခဲ့ခြင်းသည် ယေဟောဝါအတွက် ကျေနပ်အားရစရာဖြစ်ပေသည်။ ထို့ပြင် သမ္မာကျမ်းစာက ဤသို့ဆိုသည်– “သင်တို့အသက်ကြီး၍ ဆံပင်ဖြူသည်တိုင်အောင် ငါ [ယေဟောဝါ] သည် ထိုသို့သောသူဖြစ်၍ သင်တို့ကိုဆောင်ရွက်မည်။ ငါပြုခဲ့ပြီးသည်အတိုင်း ထမ်းဦးမည်။ ဆောင်ရွက်၍ကယ်တင်မည်။” (ဟေရှာယ ၄၆:၄) ကျွန်ုပ်တို့၏မေတ္တာရှင် ကောင်းကင်ခမည်းတော်သည် မိမိအပေါ် တည်ကြည်သူတို့ကို ခွန်အားပေး၍ ကူညီမစမည်ဟု ကတိပြုတော်မူသည်။
၁၅။ သင့်အခြေအနေကို ယေဟောဝါသိနားလည်တော်မူကြောင်း သင်ယုံကြည်ပါသလော။ အဘယ်ကြောင့်နည်း။
၁၅ သင်သည် ဖျားနာမှု၊ မယုံကြည်သူအိမ်ထောင်ဖက်မှ အတိုက်အခံ၊ ကြီးလေးသော မိသားစုတာဝန်များ၊ သို့မဟုတ် အခြားခက်ခဲသောပြဿနာတစ်ခုခုနှင့် လုံးပန်းနေရပေမည်။ ယေဟောဝါသည် ကျွန်ုပ်တို့၏ကန့်သတ်ချက်များနှင့် အခြေအနေများကို သိတော်မူပြီး ကိုယ်တော့်အမှုတော်ထမ်းရန် ကျွန်ုပ်တို့အတတ်နိုင်ဆုံး ကြိုးစားအားထုတ်သည့်အတွက် ကျွန်ုပ်တို့ကို ကိုယ်တော်ချစ်တော်မူသည်။ ကျွန်ုပ်တို့သည် အခြားသူတို့လုပ်ဆောင်သည်ထက် သာ၍နည်းစေကာမူ ထိုသို့အမှန်ပင်ဖြစ်၏။ (ဂလာတိ ၆:၄) ကျွန်ုပ်တို့သည် မစုံလင်ကြောင်း ယေဟောဝါသိတော်မူပြီး ကျွန်ုပ်တို့ထံမှ အမှန်လက်တွေ့ကျရာကိုသာ မျှော်လင့်တော်မူသည်။ (ဆာလံ ၁၄၇:၁၁) ကျွန်ုပ်တို့အတတ်နိုင်ဆုံးလုပ်ဆောင်လျှင် ဘုရားသခင့်မျက်မှောက်တော်တွင် ကျွန်ုပ်တို့သည် တန်ဖိုးရှိရာဖြစ်ပြီး ကျွန်ုပ်တို့၏ယုံကြည်ခြင်းဆောင်ရွက်ချက်များကို ကိုယ်တော် ဘယ်တော့မျှမေ့တော်မူမည်မဟုတ်ကြောင်း ယုံကြည်စိတ်ချနိုင်ကြသည်။—လုကာ ၂၁:၁-၄။
၁၆။ တပည့်တစ်ဦးဖြစ်လာစေခြင်း၌ အသင်းတော်တစ်ခုလုံးသည် အဘယ်နည်းဖြင့် ပါဝင်သနည်း။
၁၆ တပည့်ဖြစ်စေခြင်းလုပ်ငန်းသည် ပူးပေါင်းဆောင်ရွက်ရသော လုပ်ငန်းဖြစ်ကြောင်းကိုလည်း သတိရပါ။ မိုးရေတစ်စက်သည် အပင်တစ်ပင်ကို အာဟာရမပေးနိုင်သကဲ့သို့ တစ်ဦးတစ်ယောက်တည်းမျှဖြင့် တပည့်တစ်ဦး မဖြစ်စေပါ။ သက်သေခံတစ်ဦးသည် စိတ်ဝင်စားသူတစ်ဦးကို ရှာဖွေတွေ့ရှိပြီး သူနှင့်ကျမ်းစာသင်အံမှုကျင်းပမည်မှန်၏။ သို့သော် ထိုလူသစ်သည် ဘုရားသခင့်နိုင်ငံတော်ခန်းမသို့ရောက်လာအခါ သူသည် အမှန်တရားကိုအသိအမှတ်ပြုလာရန် အသင်းတော်တစ်ခုလုံးက သူ့ကိုဝိုင်းဝန်းကူညီပေးကြသည်။ ညီအစ်ကိုအသင်းအပင်း၏ နွေးထွေးမှုက ဘုရားသခင့်သန့်ရှင်းသောဝိညာဉ်တော်၏လွှမ်းမိုးမှုကို ပေါ်လွင်ထင်ရှားစေသည်။ (၁ ကောရိန္သု ၁၄:၂၄၊ ၂၅) ကလေးများနှင့် ဆယ်ကျော်သက်တို့က အားတက်စေသောအဖြေများကို ပေးခြင်းဖြင့် ကျွန်ုပ်တို့၏လူငယ်များသည် လောကမှငယ်ရွယ်သူတို့နှင့် ကွာခြားကြောင်း ထိုလူသစ်အားတွေ့မြင်စေသည်။ အသင်းတော်၌ ဖျားနာသူ၊ မသန်စွမ်းသူနှင့် အသက်ကြီးသူတို့က လူသစ်များကို ခံနိုင်ရည်အကြောင်း သွန်သင်ပေးသည်။ ကျွန်ုပ်တို့၏အသက်အရွယ် သို့မဟုတ် ကန့်သတ်ချက်များ မည်သို့ပင်ရှိပါစေ လူသစ်များသည် ကျမ်းစာအမှန်တရားအပေါ် သူတို့၏မေတ္တာနက်ရှိုင်းလာ၍ နှစ်ခြင်းခံသည့်အထိ တိုးတက်လာကြစဉ် ကျွန်ုပ်တို့အားလုံး အရေးပါသောကဏ္ဍမှ ပါဝင်ကူညီပေးနေကြသည်။ ခရစ်ယာန်ဓမ္မအမှုတွင် ကျွန်ုပ်တို့အသုံးပြုသည့်နာရီတိုင်း၊ ပြန်လည်ပတ်မှုတိုင်း၊ ဘုရားသခင့်နိုင်ငံတော်ခန်းမ၌ စိတ်ဝင်စားသူတစ်ဦးနှင့် ပြောဆိုသည့်စကားတိုင်းတို့သည် သူ့ဘာသာသူ အရေးမပါပုံရှိသော်လည်း ယင်းသည် ယေဟောဝါပြီးမြောက်နေစေတော်မူသည့် ကြီးမားသောလုပ်ငန်းတွင် တစ်စိတ်တစ်ပိုင်းပါဝင်နေသည်။
၁၇၊ ၁၈။ (က) တပည့်ဖြစ်စေခြင်းလုပ်ငန်း၌ ကျွန်ုပ်တို့ပါဝင်ခြင်းအပြင် ပေးကမ်းခြင်းမှ ပျော်ရွှင်မှုကို ကျွန်ုပ်တို့မည်သို့ရရှိနိုင်ကြမည်နည်း။ (ခ) ပေးကမ်းခြင်းမှ ပျော်ရွှင်မှုရရှိခြင်းဖြင့် မည်သူ့ကို ကျွန်ုပ်တို့အတူယူကြသနည်း။
၁၇ ကျွန်ုပ်တို့သည် ဤအရေးပါသော တပည့်ဖြစ်စေခြင်းလုပ်ငန်း၌ ပါဝင်နေသည့်အပြင် ခရစ်ယာန်များအနေနှင့် အခြားနည်းများဖြင့်လည်း ပေးကမ်းခြင်းမှ ပျော်ရွှင်မှုရရှိကြသည်။ စင်ကြယ်သောဝတ်ပြုရေးကို ထောက်ကူပေးဖို့နှင့် လိုအပ်နေသူတို့ကိုကူညီဖို့ အလှူငွေထည့်ဝင်ရန် ရန်ပုံငွေများကို ကျွန်ုပ်တို့သီးသန့်ဖယ်ထားနိုင်ကြ၏။ (လုကာ ၁၆:၉; ၁ ကောရိန္သု ၁၆:၁၊ ၂) အခြားသူတို့ကို ဧည့်ဝတ်ပြုရန် အခွင့်အရေးများရှာယူနိုင်သည်။ (ရောမ ၁၂:၁၃) ကျွန်ုပ်တို့သည် “ယုံကြည်ခြင်း၏အိမ်သူအိမ်သားတို့၌ အထူးသဖြင့်ကျေးဇူးပြုလျက်၊ ခပ်သိမ်းသောသူတို့အား ကျေးဇူးပြုကြ” ရန် ကြိုးပမ်းနိုင်ကြ၏။ (ဂလာတိ ၆:၁၀) ထို့ပြင် ရိုးရိုးလေးဖြစ်သော်လည်း အရေးပါသောနည်းလမ်းများဖြင့် စာရေးခြင်း၊ ဖုန်းဆက်ခြင်း၊ လက်ဆောင်ပေးခြင်း၊ လက်တွေ့ကျအကူအညီပေးခြင်း၊ အားပေးစကားပြောဆိုခြင်းတို့ကို အခြားသူတို့အား ပေးနိုင်ကြပါသည်။
၁၈ ကျွန်ုပ်တို့သည် ပေးကမ်းခြင်းဖြင့် ကောင်းကင်ခမည်းတော်ကို အတုယူကြကြောင်းဖော်ပြ၏။ ထို့ပြင် စစ်မှန်သောခရစ်ယာန်တို့၏ ထင်ရှားသည့်အမှတ်အသားဖြစ်သော ကျွန်ုပ်တို့၏ညီအစ်ကိုချင်းမေတ္တာကိုလည်း ဖော်ပြရာကျသည်။ (ယောဟန် ၁၃:၃၅) ဤအရာများကို အမှတ်ရနေခြင်းအားဖြင့် ပေးကမ်းခြင်းမှပျော်ရွှင်မှုရရှိနိုင်သည်။
သင်ရှင်းပြနိုင်သလော
• ယေဟောဝါနှင့် ယေရှုသည် ဝိညာဉ်ရေးရာပေးကမ်းခြင်းပုံနမူနာကို မည်သို့ချထားသနည်း။
• ကျွန်ုပ်တို့သည် ထာဝရမိတ်ဆွေများမည်သို့ ဖွဲ့ နိုင်ကြသနည်း။
• ကျွန်ုပ်တို့၏ခရစ်ယာန်ဓမ္မအမှုသည် သာ၍အောင်မြင်စေဖို့ အဘယ်ခြေလှမ်းများပြုရန်လိုသနည်း။
• အသင်းတော်၌ရှိသူအားလုံး ပေးကမ်းခြင်းမှ မည်သို့ပျော်ရွှင်မှုရရှိနိုင်ကြသနည်း။
[လေ့လာရန်မေးခွန်းများ]
[စာမျက်နှာ ၁၃ ပါ ရုပ်ပုံ]
လေ့ကျင့်ပေးမှုကို သားသမီးတို့က တုံ့ပြန်ကြသောအခါ မိဘများသည် ပျော်ရွှင်မှုနှင့် စိတ်ကျေနပ်မှု များစွာရရှိကြ
[စာမျက်နှာ ၁၅ ပါ ရုပ်ပုံ]
တပည့်များဖြစ်စေခြင်း၌ ကျွန်ုပ်တို့၏မိတ်ဆွေစစ်များ ဖြစ်စေနိုင်ကြ
[စာမျက်နှာ ၁၆ ပါ ရုပ်ပုံ]
အသက်အရွယ်ကြီးရင့်လာသောအခါ ကျွန်ုပ်တို့ကို ယေဟောဝါထောက်မပေး
[စာမျက်နှာ ၁၇ ပါ ရုပ်ပုံ]
ရိုးရိုးလေးဖြစ်သော်လည်း အရေးပါသောနည်းများဖြင့် ပေးကမ်းခြင်းမှပျော်ရွှင်မှုရရှိကြ