သူ “အဆုံးတိုင်အောင်တည်ကြည်” ခဲ့
သူ “အဆုံးတိုင်အောင်တည်ကြည်” ခဲ့
ယေဟောဝါသက်သေများ၏ ဌာနချုပ်အမှုထမ်းအဖွဲ့ဝင်အသစ်များအား တင်ဆက်သည့် ၁၉၉၃ ခုနှစ်ထုတ် ဗီဒီယိုတစ်ခု၌ လိုင်မယ်န် အလက်ဇန္ဒား စွင်ဂယ်လ်က ယေဟောဝါ၏အမှုတော် ထမ်းဆောင်ခြင်းနှင့်ပတ်သက်၍ သူ၏ခံစားချက်ကို ဤသို့ဖော်ပြသည်– “ဘွတ်ဖိနပ်စီးထားရင်း သေပါလေ!” *
အသက်ကိုးဆယ်အရွယ် ညီအစ်ကိုစွင်ဂယ်လ်သည် အခြားသူများကို အားပေးခဲ့သည့်အတိုင်း ကိုယ်တိုင်ပြုလုပ်ခဲ့သည်။ သူသည် “အဆုံးတိုင်အောင်တည်ကြည်” ခဲ့၏။ (မဿဲ ၂၄:၁၃) ယေဟောဝါသက်သေများ၏ အုပ်ချုပ်ရေးအဖွဲ့ဝင်ဖြစ်သော သူသည် ကျန်းမာရေးမကောင်းသော်လည်း မတ် ၇၊ ဗုဒ္ဓဟူးနေ့တွင် ယင်းအဖွဲ့၏အစည်းအဝေးကို တက်ရောက်ခဲ့သည်။ နောက်အပတ်အင်္ဂါနေ့တွင် သူ၏ကျန်းမာရေးအခြေအနေဆိုးလာပြီး မတ် ၁၄ ရက်၊ နံနက် ၄:၂၆ နာရီတွင် သူ၏ဆရာဝန်က သူသေဆုံးသွားပြီဟုပြောခဲ့သည်။
လိုင်မယ်န် စွင်ဂယ်လ်သည် နယူးယောက်၊ ဘရွတ်ကလင်မြို့မှ ယေဟောဝါသက်သေများ၏ ကမ္ဘာ့ဌာနချုပ်တွင် ၁၉၃၀၊ ဧပြီ ၅ ရက်တွင် စတင်အမှုထမ်းခဲ့သည်။ သူသည် ၇၁ နှစ်နီးပါးတိုင် အမှုဆောင်သွားခဲ့သည်။ လိုင်မယ်န်သည် ဦးစွာ စာအုပ်ချုပ်ဌာန၊ ထို့နောက် ပုံနှိပ်ဌာနတွင် တာဝန်ကျပြီး မင်ဖော်စပ်ခြင်းတွင်လည်း ကူညီပေးခဲ့ရသည်။ အမှန်ဆိုရလျှင် ညီအစ်ကိုစွင်ဂယ်လ်သည် မင်ဖော်စပ်ခန်းတွင် ၂၅ နှစ်ခန့်အမှုဆောင်ခဲ့သည်။ ဌာနချုပ်၏ စာပေပြုစုရေးအမှုထမ်းအဖွဲ့ဝင်တစ်ဦးအနေနှင့် အနှစ် ၂၀ ခန့်အမှုဆောင်ခဲ့သည်။ သူ့အသက်တာ၏နောက်ဆုံး ၁၇ နှစ်တွင် ဘဏ္ဍာရေးဌာန၌ အမှုဆောင်ခဲ့၏။
လိုင်မယ်န်သည် ဘုရားသခင့်နိုင်ငံတော်ကို ရဲရင့်စွာကြွေးကြော်သူတစ်ဦးဖြစ်သည်။ ဘရွတ်ကလင်၌ သူ၏အစောပိုင်းနှစ်များတွင် သူနှင့်သူ၏အခန်းဖော် အာရ်သာ ဝေါ့စ်လီတို့သည် သက်သေခံများပိုင် လှေတစ်စင်းဖြင့် ဟတ်ဒ်ဆင်မြစ်သို့ ရွက်လွှင့်လေ့ရှိသည်။ စနေတနင်္ဂနွေနေ့များတွင် ကမ်းစပ်ပေါ်ရှိလူတို့အား အသံချဲ့စက်ဖြင့် ဘုရားသခင့်နိုင်ငံတော်သတင်း ကြေညာခဲ့ကြသည်။
ညီအစ်ကိုစွင်ဂယ်လ်သည် ၁၉၁၀၊ နိုဝင်ဘာ ၆ ရက်တွင် နာဘရာ့စ်ခါပြည်နယ်၊ လင်ကွန်းမြို့တွင် မွေးဖွားခဲ့ပြီးမကြာမီ ယူတာပြည်နယ်၊ စောလ်တ်လိပ်ခ်စီတီမြို့သို့ မိသားစုလိုက် ပြောင်းရွှေ့သွားခဲ့ကြသည်။ ထိုတွင် ၁၉၃၁ ခုနှစ်၌ သူ၏မိဘများသည် ယင်းအချိန်က ကျမ်းစာကျောင်းသားများဟုခေါ်သော ယေဟောဝါသက်သေများဖြစ်လာကြသည်။ စွင်ဂယ်လ်မိသားစုသည် သက်သေခံများ၏ ဘရွတ်ကလင်ဌာနချုပ်မှ ရောက်ရှိလာကြသော ဟောပြောသူများကို နှစ်များတစ်လျှောက် ဧည့်ခံခဲ့ရာ ဤဟောပြောသူများသည် လိုင်မယ်န်အပေါ် အပြုသဘောပါစွာ ဩဇာလွှမ်းမိုးခဲ့၏။ ၁၉၂၃ ခုနှစ်၌ အသက် ၁၂ နှစ်အရွယ်တွင် သူသည် ဘုရားသခင်ထံ ဆက်ကပ်အပ်နှံသည့် အထိမ်းအမှတ်ဖြင့် နှစ်ခြင်းခံခဲ့သည်။
လိုင်မယ်န်သည် တစ်ကိုယ်ရေဘဝဖြင့် ဘရွတ်ကလင်တွင် ၂၆ နှစ်ကျော် အမှုထမ်းပြီးနောက် ၁၉၅၆၊ ဇွန် ၈ ရက်တွင် ခရစ္စတယ်လ် ဇာချာနှင့်လက်ထပ်လိုက်သောအခါ သူ၏ဘဝသည် အတိုင်းထက်အလွန်ပြည့်စုံခဲ့၏။ သူတို့သည် အလွန်ချစ်ခင်ကြပြီး ၁၉၉၈ ခုနှစ်တွင် ခရစ္စတယ်လ် မကွယ်လွန်ခင်အထိ ခရစ်ယာန်ဓမ္မအမှုတွင် အတူတကွပါဝင်ခဲ့ကြသည်။ အစောပိုင်းသုံးနှစ်ခန့်က ခရစ္စတယ်လ်သည် လေဖြတ်သွားခဲ့ရာ အလွန်အမင်းမသန်မစွမ်းဖြစ်ခဲ့ရရှာသည်။ ခရစ္စတယ်လ်အား ပြုစုစောင့်ရှောက်မှုတွင် လိုင်မယ်န်နေ့စဉ်ပါဝင်ခဲ့ခြင်းသည် အားလုံးအဖို့၊ အထူးသဖြင့် အနီးအနားရပ်ကွက်၏ လမ်းပေါ်တွင် လမ်းသွားလမ်းလာသူများကို ခရစ္စတယ်လ်က ကင်းမျှော်စင် နှင့် နိုးလော့! ဝေငှပေးနိုင်ရန် လက်တွန်းလှည်းကို မေတ္တာပါစွာ လိုင်မယ်န်တွန်းပေးခဲ့ခြင်းကို တွေ့ မြင်ရသူများအဖို့ ချစ်ခင်တွယ်တာမှု၏ ပုံနမူနာတစ်ခုဖြစ်ခဲ့သည်။
ညီအစ်ကိုစွင်ဂယ်လ်သည် ရိုးသားပွင့်လင်းကြင်နာတတ်သူဖြစ်ကာ သူ့အား သိရှိလာသူများသည် သူ့ကို ချစ်ခင်ခဲ့ကြ၏။ သူ၏မိဘနှစ်ပါးစလုံးနည်းတူ သူသည် ကောင်းကင်နိုင်ငံတော်တွင် ယေရှုခရစ်နှင့်အတူနေထိုင်ရမည့် ကျမ်းစာအခြေပြုမျှော်လင့်ချက်ရှိပြီး ယခု သူသည် ထိုမျှော်လင့်ချက်ပြည့်ဝသွားပြီဟု ကျွန်ုပ်တို့ယုံကြည်စိတ်ချနိုင်သည်။—၁ သက်သာလောနိတ် ၄:၁၅-၁၈; ဗျာဒိတ် ၁၄:၁၃။
[အောက်ခြေမှတ်ချက်များ]
^ အပိုဒ်၊ 2 လုပ်ငန်းခွင်၌ တက်ကြွစွာလုပ်ဆောင်ရင်း သေဆုံးသွားခြင်းကို ဆိုလိုသည်။
[စာမျက်နှာ ၃၁ ပါ ရုပ်ပုံ]
ညီအစ်ကိုစွင်ဂယ်လ်သည် မင်ဖော်စပ်ခန်းတွင် ၂၅ နှစ်ခန့် အမှုထမ်းဆောင်ခဲ့
[စာမျက်နှာ ၃၁ ပါ ရုပ်ပုံ]
လိုင်မယ်န်နှင့်ခရစ္စတယ်လ်တို့သည် တပူးတွဲတွဲရှိခဲ့ကြ