ရွှင်လန်းသော ရိတ်သိမ်းသူများ ဖြစ်ကြလော့!
ရွှင်လန်းသော ရိတ်သိမ်းသူများ ဖြစ်ကြလော့!
“စပါးရိတ်စရာများစွာရှိ၏။ ရိတ်သောသူတို့သည် နည်းကြ၏။ ထို့ကြောင့် လုပ်ဆောင်သောသူတို့ကို စပါးရိတ်ခြင်းငှာ စေလွှတ်တော်မူမည်အကြောင်း၊ စပါးရှင်ကိုဆုတောင်းကြလော့။” —မဿဲ ၉:၃၇၊ ၃၈။
၁။ ဘုရားသခင့်အလိုတော်ဆောင်ရွက်ရာတွင် အဘယ်အရာက ကျွန်ုပ်တို့ကိုစွဲစွဲမြဲမြဲရှိစေသနည်း။
ယေဟောဝါ၏ကျေးကျွန်တစ်ဦးအဖြစ် ကျွန်ုပ်တို့နှစ်ခြင်းယူသောနေ့ကို ပြန်စဉ်းစားသောအခါ လွန်ခဲ့သောနှစ်အနည်းငယ်ကဖြစ်စေ၊ နှစ်များစွာကဖြစ်စေ ၎င်းနေ့ရက်သည် ယမန်နေ့ကကဲ့သို့ ဖြစ်ပေမည်။ ဆက်ကပ်အပ်နှံထားသော ကျွန်ုပ်တို့ဘဝတွင် ယေဟောဝါအားချီးမွမ်းခြင်းသည် အဓိကဖြစ်လာသည်။ ကျွန်ုပ်တို့သည် ဘုရားသခင့်နိုင်ငံတော်သတင်းကို အခြားသူများအား ကြားနာစေ၍ လက်ခံစေရန် ကူညီပေးဖို့ ကာလအချိန်ကိုဝယ်ယူကြစဉ် ယေဟောဝါအား ရွှင်လန်းစွာအမှုဆောင်ခြင်းသည် ကျွန်ုပ်တို့အဓိကအလေးထားရာဖြစ်၏။ (ဧဖက် ၅:၁၅၊ ၁၆) ယနေ့ထက်တိုင် ကျွန်ုပ်တို့သည် ‘သခင်ဘုရား၏အမှုတော်၌ လုပ်ကိုင်စရာများစွာရှိလျက်’ အလုပ်များနေကြလျှင် အချိန်ကုန်လွယ်သည်ကို တွေ့ရှိရသည်။ (၁ ကောရိန္သု ၁၅:၅၈) အခက်အခဲများကို ရင်ဆိုင်ကြုံတွေ့ ကြရသော်လည်း ယေဟောဝါ၏အလိုတော်ဆောင်ရွက်ရာတွင် ကျွန်ုပ်တို့၏ရွှင်လန်းခြင်းက လှုံ့ဆော်ပေးသည်။—နေဟမိ ၈:၁၀။
၂။ ပုံဆောင်ရိတ်သိမ်းခြင်းလုပ်ငန်းတွင် အဘယ်အရာက ကျွန်ုပ်တို့ကိုရွှင်လန်းမှုပေးသနည်း။
၂ ခရစ်ယာန်များအနေနှင့် ကျွန်ုပ်တို့သည် ပုံဆောင်ရိတ်သိမ်းခြင်းလုပ်ငန်း၌ ပါဝင်နေကြသည်။ ယေရှုခရစ်သည် ထာဝရအသက်ရဖို့ လူတို့အားစုသိမ်းခြင်းကို စပါးရိတ်သိမ်းခြင်းနှင့် ပုံခိုင်းထားသည်။ (ယောဟန် ၄:၃၅-၃၈) ဤရိတ်သိမ်းခြင်းလုပ်ငန်းတွင် ကျွန်ုပ်တို့ပါဝင်နေကြရာ အစောပိုင်းခရစ်ယာန် ရိတ်သိမ်းသူများ၏ ရွှင်လန်းမှုကို ဆန်းစစ်ကြည့်ခြင်းသည် အားရှိစရာဖြစ်ပါလိမ့်မည်။ မျက်မှောက်ခေတ်ရိတ်သိမ်းခြင်းလုပ်ငန်း၌ ကျွန်ုပ်တို့အား ရွှင်လန်းစေသည့် အကြောင်းရင်းသုံးခုကို ပြန်သုံးသပ်ကြမည်။ ၎င်းတို့မှာ (၁) မျှော်လင့်ချက်ပေးသည့် ကျွန်ုပ်တို့၏သတင်းတရား၊ (၂) အောင်မြင်သော ကျွန်ုပ်တို့၏ရှာဖွေမှုနှင့် (၃) ရိတ်သိမ်းသူများအနေနှင့် ငြိမ်သက်ခြင်းရှိစေသည့် ကျွန်ုပ်တို့၏သဘောထားတို့ဖြစ်သည်။
ရိတ်သိမ်းသူများအဖြစ်စေလွှတ်ခံရ
၃။ ယေရှု၏အစောပိုင်းနောက်လိုက်များသည် အဘယ်နည်းဖြင့် ပျော်ရွှင်မှုရရှိခဲ့ကြသနည်း။
၃ စီ.အီး. ၃၃ ခုနှစ်၊ နေ့တစ်နေ့တွင် အစောပိုင်းရိတ်သိမ်းသူများ—အထူးသဖြင့် ယေရှု၏တည်ကြည်မှုရှိသော တမန်တော် ၁၁ ပါး—သည် ရှင်ပြန်ထမြောက်တော်မူသော ခရစ်တော်ကိုတွေ့ဆုံရန် ဂါလိလဲပြည်ရှိ တောင်တစ်ခုပေါ်သို့တက်ခဲ့သောအခါ သူတို့၏အသက်တာ အတော်ပင်ပြောင်းလဲသွားခဲ့သည်တကား! (မဿဲ ၂၈:၁၆) ထိုအခါသမယတွင် “ညီအစ်ကိုငါးရာမက” ရှိခဲ့ကြပေမည်။ (၁ ကောရိန္သု ၁၅:၆) ယေရှုပေးခဲ့သည့်တာဝန်ကို သူတို့နားထဲကြားယောင်နေကြဆဲဖြစ်သည်။ သူတို့ကို ကိုယ်တော်ဤသို့မိန့်ဆိုခဲ့၏– “သင်တို့သွား၍ လူမျိုးတကာတို့ကို ငါ့တပည့်ဖြစ်စေလျက်၊ ခမည်းတော်၊ သားတော်၊ သန့်ရှင်းသောဝိညာဉ်တော်၏နာမ၌ [နှစ်ခြင်း] ကိုပေးကြလော့။ ငါသည် သင်တို့အားပေးသမျှသောပညတ်တော်တို့ကို စောင့်ရှောက်စေခြင်းငှာ ဆုံးမ . . . ပေးကြလော့။” (မဿဲ ၂၈:၁၉၊ ၂၀) ပြင်းထန်သောနှိပ်စက်ညှဉ်းပန်းမှုများကြား တစ်နေရာပြီးတစ်နေရာတွင် ခရစ်တော်တပည့်နောက်လိုက်များ၏ အသင်းတော်များ တည်ထောင်လာသည်ကို တွေ့မြင်ကြရသောကြောင့် သူတို့သည် ရိတ်သိမ်းခြင်းလုပ်ငန်းတွင် ပျော်ရွှင်မှုများစွာရရှိခဲ့ကြသည်။ အချိန်တန်သော် ‘ကောင်းကင်အောက်၌ရှိသမျှသော ဝေနေယျသတ္တဝါတို့အား သတင်းကောင်းကို ဟောပြောခဲ့ပြီ’ ဖြစ်၏။—ကောလောသဲ ၁:၂၂၊ ၂၃; တမန်တော် ၁:၈; ၁၆:၅။
၄။ ခရစ်တော်၏တပည့်တော်များသည် အဘယ်အခြေအနေများအောက် စေလွှတ်ခံခဲ့ရကြသနည်း။
၄ ဂါလိလဲပြည်၌ ယေရှု၏အစောပိုင်းအမှုဆောင်ချိန်တွင် ကိုယ်တော်သည် တမန်တော် ၁၂ ပါးကိုခေါ်တော်မူပြီးလျှင် အထူးသဖြင့် “ကောင်းကင်နိုင်ငံတော်တည်လုနီးပြီ” ဟုကြေညာရန် သူတို့ကိုစေလွှတ်ခဲ့သည်။ (မဿဲ ၁၀:၁-၇) ကိုယ်တော်တိုင်ပင် “တရားဇရပ်များ၌ဆုံးမ . . . ပေးလျက်၊ [ဘုရားသခင့်] နိုင်ငံတော်နှင့်ယှဉ်သော ဝမ်းမြောက်ဖွယ်သတင်းတရားတော်ကိုဟောလျက်၊ အနာရောဂါအမျိုးမျိုးကိုငြိမ်းစေလျက် [ဂါလိလဲနယ်] မြို့ရွာရှိသမျှကို . . . လှည့်လည်တော်မူ၏။” ယေရှုသည် လူအစုအဝေးတို့ကို သနားခြင်းစိတ်ရှိတော်မူ၏။ “အကြောင်းမူကား ထိုသူတို့သည်ထိန်းသူမရှိသောသိုးကဲ့သို့ ပင်ပန်း၍အားလျော့လျက်ရှိနေကြ၏။” (မဿဲ ၉:၃၅၊ ၃၆၊ သမ္မာ) ကိုယ်တော်သည် အလွန်စိတ်ထိခိုက်သွားရာ တပည့်တော်များအား ဤသို့မိန့်ဆိုခဲ့သည်– “စပါးရိတ်စရာများစွာရှိ၏။ ရိတ်သောသူတို့သည်နည်းကြ၏။ ထို့ကြောင့် လုပ်ဆောင်သောသူတို့ကို စပါးရိတ်ခြင်းငှာ စေလွှတ်တော်မူမည်အကြောင်း၊ စပါးရှင် [ယေဟောဝါဘုရားသခင်] ကိုဆုတောင်းကြလော့။” (မဿဲ ၉:၃၇၊ ၃၈) မြေကြီးပေါ် ကိုယ်တော်အမှုဆောင်ချိန် ခြောက်လသာကျန်တော့သည့်အခါ ယုဒနယ်တွင် ရိတ်သိမ်းသူများလိုအပ်ခြင်းဆိုင်ရာ ယေရှု၏ထင်မြင်ချက် မပြောင်းလဲသေးပါ။ (လုကာ ၁၀:၂) နှစ်ကြိမ်စလုံးတွင် မိမိ၏နောက်လိုက်များကို ရိတ်သိမ်းသူများအဖြစ် ကိုယ်တော်စေလွှတ်ခဲ့သည်။—မဿဲ ၁၀:၅; လုကာ ၁၀:၃။
မျှော်လင့်ချက်ပေးသည့် ကျွန်ုပ်တို့၏သတင်းတရား
၅။ အဘယ်သတင်းမျိုးကို ကျွန်ုပ်တို့ကြေညာကြသနည်း။
၅ ယေဟောဝါ၏ မျက်မှောက်ခေတ်ကျေးကျွန်များအနေနှင့် ကျွန်ုပ်တို့သည် ရိတ်သိမ်းသူများအတွက် ဖိတ်ခေါ်ချက်ကို ပျော်ရွှင်စွာတုံ့ပြန်ကြသည်။ ကျွန်ုပ်တို့ကို အကြီးအကျယ်ပျော်ရွှင်မှုပေးသည့် အကြောင်းရင်းတစ်ခုမှာ စိတ်ဓာတ်ကျပြီး စိတ်ညှိုးငယ်သူတို့ထံ မျှော်လင့်ချက်သတင်းတရား ယူဆောင်သွားရခြင်းဖြစ်သည်။ ကျွန်ုပ်တို့သည် ယေရှု၏ပထမရာစု တပည့်တော်များကဲ့သို့ “ထိန်းသူမရှိသောသိုးကဲ့သို့ ပင်ပန်း၍အားလျော့လျက်ရှိနေကြ” သူတို့အား သတင်းကောင်းဖြစ်သော မျှော်လင့်ခြင်းတရားစစ်ကို ကြေညာရခြင်းသည် တကယ်ထူးမြတ်သောအခွင့်အရေးပါတကား!
၆။ ပထမရာစုတွင် အဘယ်လုပ်ဆောင်မှု၌ တမန်တော်များပါဝင်ခဲ့ကြသနည်း။
၆ ပထမရာစုခေတ်အလယ်ပိုင်းတိုင်လေသော် တမန်တော်ပေါလုသည် သတင်းကောင်းဟောပြောခြင်းဖြင့် အလုပ်များလျက်ရှိခဲ့သည်။ သူ၏ရိတ်သိမ်းခြင်းလုပ်ငန်းမှာလည်း အမှန်ပင်အကျိုးဖြစ်ထွန်းခဲ့၏၊ အကြောင်းမှာ စီ.အီး. ၅၅ ခုနှစ်ခန့်တွင် ကောရိန္သုမြို့ရှိခရစ်ယာန်များထံ စာရေးရာတွင် သူဤသို့ဆိုခဲ့သောကြောင့်ဖြစ်၏– “ညီအစ်ကိုတို့၊ ငါသည် သင်တို့အားဟောပြောဖူးသည်နှင့်အညီ၊ သင်တို့သည်ခံယူ၍ မှီဝဲဆည်းကပ်သောဧဝံဂေလိတရားကို သင်တို့အား တစ်ဖန်ငါကြားလိုက်၏။” (၁ ကောရိန္သု ၁၅:၁) တမန်တော်များနှင့် အခြားသောကနဦးခရစ်ယာန်များသည် လုံ့လဝီရိယရှိသော ရိတ်သိမ်းသူများ ဖြစ်ခဲ့ကြသည်။ စီ.အီး. ၇၀ ၌ယေရုရှလင်မြို့ပျက်စီးခြင်းနှင့် အဆုံးတိုင်ခဲ့သော အရေးပါအဖြစ်အပျက်များ၌ တမန်တော်မည်မျှ ကပ်ကျော်ကျန်ရစ်ကြောင်း သမ္မာကျမ်းစာကမဖော်ပြသော်လည်း တမန်တော်ယောဟန်သည် နောင် ၂၅ နှစ်ခန့်အထိ ဟောပြောဆဲဖြစ်ကြောင်းကိုမူ ကျွန်ုပ်တို့သိကြသည်။—ဗျာဒိတ် ၁:၉။
၇၊ ၈။ ယေဟောဝါ၏ကျေးကျွန်များသည် အဘယ်သတင်းတရားကို တစ်ခါနှင့်မျှမတူအောင် သာ၍အရေးတကြီးကြေညာလျက်ရှိခဲ့ပြီနည်း။
၇ ထို့နောက် အယူဖောက်ပြန်သော “[တရားမဲ့] လူ၊” ခရစ်ယာန်ဘောင်ဓမ္မဆရာများစိုးမိုးသည့် ရာစုနှစ်များ ရောက်လာသည်။ (၂ သက်သာလောနိတ် ၂:၃) သို့သော် ၁၉ ရာစုအဆုံးပိုင်းလောက်တွင် ရှေးခရစ်ယာန်ဘာသာအတိုင်း အသက်ရှင်နေထိုင်ဖို့ ကြိုးစားအားထုတ်ကြသူများသည် မျှော်လင့်ခြင်းသတင်းတရားဖြစ်သော ဘုရားသခင့်နိုင်ငံတော်အကြောင်းကို စတင်ကြေညာခဲ့ကြလေသည်။ အမှန်မှာ ဤဂျာနယ်ကို ဦးဆုံးထုတ်ဝေကတည်းက (၁၈၇၉၊ ဇူလိုင်) ယင်း၏ခေါင်းစဉ်တွင် “ခရစ်တော်ရောက်ရှိခြင်းသံတော်ဆင့်၊” “ခရစ်တော်နိုင်ငံတော်၏သံတော်ဆင့်၊” သို့မဟုတ် “ယေဟောဝါ၏နိုင်ငံတော်ကိုကြေညာခြင်း” ဟူသောစကားများပါရှိခဲ့သည်။
၈ ၁၉၁၄ ခုနှစ်တွင် ယေရှုခရစ်၏လက်တော်တွင်ရှိ ဘုရားသခင့်ကောင်းကင်နိုင်ငံတော် တည်ထောင်ခဲ့ပြီး ယခု ကျွန်ုပ်တို့သည် မျှော်လင့်ခြင်းသတင်းတရားကို တစ်ခါနှင့်မျှမတူအောင် သာ၍အရေးတကြီးကြေညာလျက်ရှိကြသည်။ အဘယ်ကြောင့်နည်း။ အကြောင်းမှာ လက်ရှိစနစ်ဆိုး၏အဆုံးနီးကပ်ခြင်းသည် ဘုရားသခင့်နိုင်ငံတော်အုပ်ချုပ်မှု၏ ကောင်းချီးများအနက် တစ်ခုပါဝင်သောကြောင့်တည်း။ (ဒံယေလ ၂:၄၄၊ ၄၅) ယင်းထက်ကောင်းသောသတင်းတရား ရှိနိုင်ဦးမည်လော။ ထို့ပြင် ‘ကြီးစွာသောဆင်းရဲခြင်း’ မကျရောက်မီ ဘုရားသခင့်နိုင်ငံတော်ကြေညာခြင်း၌ ပါဝင်ခွင့်ရသည်ထက် သာ၍ပျော်ရွှင်စရာ ရှိနိုင်ဦးမည်လော။—မဿဲ ၂၄:၂၁; မာကု ၁၃:၁၀။
အောင်မြင်သောရှာဖွေမှု
၉။ ယေရှုသည် မိမိ၏တပည့်တော်များကို အဘယ်ညွှန်ကြားချက်ပေးခဲ့သနည်း၊ ဘုရားသခင့်နိုင်ငံတော်သတင်းကို လူတို့မည်သို့တုံ့ပြန်ခဲ့ကြသနည်း။
၉ ရိတ်သိမ်းသူများအဖြစ် ကျွန်ုပ်တို့ကိုပျော်ရွှင်စေသော အခြားအကြောင်းရင်းတစ်ခုမှာ တပည့်များဖြစ်လာပြီး ရိတ်သိမ်းခြင်းလုပ်ငန်း၌ ကျွန်ုပ်တို့နှင့်အတူပါဝင်လာကြသူများကို ရှာဖွေရာ၌အောင်မြင်မှုရရှိခြင်းဖြစ်၏။ စီ.အီး. ၃၁-၃၂ ခုနှစ်တွင် မိမိ၏တပည့်တော်များကို ယေရှုဤသို့ညွှန်ကြားခဲ့သည်– “မည်သည့်မြို့ မည်သည့်ရွာသို့ဝင်လျှင်၊ ထိုမြို့ရွာ၌ အဘယ်မည်သောသူသည် ထိုက်တန်သနည်းဟု မေးမြန်း [“ရှာဖွေ၊” ကဘ] . . . လော့။” (မဿဲ ၁၀:၁၁) လူအားလုံး ထိုက်တန်သူများမဟုတ်ကြောင်း ဘုရားသခင့်နိုင်ငံတော်သတင်းတရားကို သူတို့တုံ့ပြန်ပုံက တင်ပြသည်။ သို့သော် ယေရှု၏တပည့်တော်များသည် လူရှိရာနေရာတိုင်းတွင် သတင်းကောင်းကို လုံ့လဝီရိယဖြင့် ကြေညာခဲ့ကြသည်။
၁၀။ ပေါလုသည် ထိုက်တန်သူများရှာဖွေခြင်းကို မည်သို့ဆောင်ရွက်ခဲ့သနည်း။
၁၀ ယေရှုသေဆုံး၍ ရှင်ပြန်ထမြောက်ပြီးနောက် ထိုက်တန်သူများကို အားတက်သရော ဆက်၍ရှာဖွေခဲ့ကြသည်။ ပေါလုသည် တရားဇရပ်၌ ဂျူးများနှင့်လည်းကောင်း၊ အေသင်မြို့ ဈေး၌တွေ့ကြုံသောသူတို့နှင့်လည်းကောင်း ဆွေးနွေးနှီးနှောခဲ့သည်။ ၎င်းဂရိမြို့ရှိ အာရေတောင်ပေါ်တွင် သူသက်သေခံသောအခါ “လူအချို့တို့သည် ပေါလု၌မှီဝဲဆည်းကပ်၍ ယုံကြည်ခြင်းသို့ရောက်ကြ၏။ ထိုသူတို့အဝင် ဒယောနုသိအမည်ရှိသော အာရေတောင်မင်းတစ်ယောက်၊ ဒမာရိအမည်ရှိသော မိန်းမတစ်ယောက်မှစ၍ အခြားသောသူရှိကြ၏။” ပေါလု သွားလေရာရာတွင် “လူစုဝေးရာ၌လည်းကောင်း၊ အိမ်များ၌လည်းကောင်း” ဟောပြောရာ၌ စံထားလောက်သူဖြစ်ခဲ့သည်။—တမန်တော် ၁၇:၁၇၊ ၃၄; ၂၀:၂၀။
၁၁။ လွန်ခဲ့သောနှစ်များစွာက အဘယ်အမှုဆောင်နည်းများကို အသုံးပြုခဲ့ကြသနည်း။
၁၁ ၁၉ ရာစုအကုန်ပိုင်း ဆယ်စုနှစ်များအတွင်း ကောင်းကင်အတန်းအစားခရစ်ယာန်များသည် ထိုက်တန်သူများရှာဖွေရာ၌ ရဲစွမ်းသတ္တိရှိရှိပါဝင်ခဲ့ကြသည်။ ၁၈၈၁၊ ဇူလိုင်/သြဂုတ်လထုတ် ဇိအုန်ကင်းမျှော်စင်မှ ‘ဟောပြောရန်ရွေးချယ်ခံရခြင်း’ ခေါင်းစဉ်ရှိဆောင်းပါးတစ်ခုက ဤသို့ဆိုခဲ့သည်– “သတင်းကောင်းဟောပြောခြင်း . . . သည် ကြားနာလိုစိတ်ရှိပြီး ကြားနိုင်စွမ်းရှိသော ‘စိတ်နှိမ့်ချသောသူတို့’ ထံရောက်လျက်ရှိသည်၊ သူတို့အထဲမှ ခရစ်တော်၏ကိုယ်ခန္ဓာ၊ တွဲဖက်အမွေခံများ ထွက်ပေါ်လာဖို့ဖြစ်သည်။” ဘုရားသခင်၏ ရိတ်သိမ်းသူများသည် ချာ့ခ်ျဝတ်ပြုစည်းဝေးများမှ ထွက်လာသူတို့ကိုတွေ့ဆုံလေ့ရှိပြီး သူတို့သည် ထိုက်တန်သူများ နှစ်လိုဖွယ်တုံ့ပြန်လာကြစေဖို့ ရည်ရွယ်ထားသော ကျမ်းစာသတင်းတရားများပါသည့် ဝေစာများကို ကမ်းပေးခဲ့ကြသည်။ ဤသက်သေခံနည်း ထိရောက်မှုရှိကြောင်း ပြန်လည်သုံးသပ်ပြီးနောက် ၁၉၀၃၊ မေ ၁၅ ရက်ထုတ်ကင်းမျှော်စင်က ထိုဝေစာများကို “တနင်္ဂနွေနေ့နံနက်ပိုင်းတွင် တစ်အိမ်မှတစ်အိမ်” ဝေငှရန် ရိတ်သိမ်းသူများကို တိုက်တွန်းခဲ့သည်။
၁၂။ ဟောပြောခြင်းလုပ်ငန်း၏ထိရောက်မှုကို ကျွန်ုပ်တို့မည်သို့တိုးတက်စေခဲ့ပြီနည်း။ ဥပမာပေးပါ။
၁၂ မကြာသေးမီနှစ်များအတွင်း သူတို့၏နေအိမ်များမှာထက် အခြားနေရာများ၌ လူတို့နှင့်တွေ့ဆုံခြင်းအားဖြင့် ကျွန်ုပ်တို့၏အမှုဆောင်ခြင်းလုပ်ငန်းကို တိုးချဲ့ခဲ့ကြပြီ။ စီးပွားရေးအခြေအနေများနှင့် အပန်းဖြေလှုပ်ရှားမှုများကြောင့် ကျွန်ုပ်တို့အမှုဆောင်နေကျအချိန်တွင် အိမ်တွင်လူမရှိသောနိုင်ငံများ၌ ယင်းသည် အလွန်ထိရောက်မှုရှိခဲ့ပြီ။ ဧည့်သည်များသည် ကမ်းခြေ၌အပန်းဖြေပြီးနောက် ဘတ်စကားဖြင့် ထွက်ခွာသွားလေ့ရှိကြောင်းကို အင်္ဂလန်မှသက်သေခံတစ်ဦးနှင့် သူ၏အဖော်တို့ တွေ့ရှိခဲ့ရာ သူတို့သည် သတ္တိမွေးကာ ဘတ်စကားများပေါ်တက်၍ ခရီးသည်များကို ကင်းမျှော်စင်နှင့်နိုးလော့!စာစောင်များ ကမ်းလှမ်းခဲ့ကြသည်။ တစ်လအတွင်း စောင်ရေ ၂၂၉ စောင်ကို သူတို့ဝေငှနိုင်ခဲ့ကြ၏။ သူတို့ဤသို့သတင်းပေးပို့ခဲ့ကြသည်– “ယေဟောဝါသည် ကျွန်မတို့နှင့်အစဉ်ရှိကြောင်း သိထားသောကြောင့် ပင်လယ်ကမ်းခြေ၌ဖြစ်စေ၊ စီးပွားရေးရပ်ကွက်တွင်ဖြစ်စေ၊ သက်သေခံခြင်း၊ သို့မဟုတ် ကျွန်မတို့ရင်ဆိုင်နိုင်စရာအကြောင်းရှိသော အခြားမည်သည့်စိန်ခေါ်မှုကိုမဆို ကျွန်မတို့မကြောက်ရွံ့ကြပါ။” သူတို့သည် မဂ္ဂဇင်းလမ်းကြောင်းတစ်ခုရခဲ့၍ ကျမ်းစာသင်အံမှုတစ်ခုစတင်ခဲ့ကြပြီး သူတို့နှစ်ဦးစလုံး အရန်ရှေ့ဆောင်လုပ်ငန်းတွင် ပါဝင်ခဲ့ကြသည်။
၁၃။ ယခု အချို့နေရာများတွင် ကျွန်ုပ်တို့၏အမှုဆောင်ခြင်း၌ အဘယ်ပြုပြင်ပြောင်းလဲမှု လိုအပ်လာသနည်း။
၁၃ ထိုက်တန်သူများကို ဆက်၍ရှာဖွေကြစဉ် အချို့နေရာများ၌ ကျွန်ုပ်တို့၏အမှုဆောင်ခြင်းကို အသေအချာပြန်လည်သုံးသပ်ဖို့လိုအပ်ပေမည်။ သက်သေခံအများသည် တနင်္ဂနွေနေ့နံနက်ပိုင်းတွင် တစ်အိမ်မှတစ်အိမ်ဟောပြောခြင်း၌ ပါဝင်လေ့ရှိကြသော်လည်း အချို့နယ်မြေများတွင်မူ အိမ်ရှင်များ အနားယူကောင်းယူနေကြမည်ဖြစ်ရာ လူတို့အိမ်သို့ စောစောလည်ပတ်ခြင်းက ထိရောက်မှုနည်းကြောင်း တွေ့ရကြသည်။ သူတို့၏ဇယားကို ပြုပြင်ပြောင်းလဲပြီး ယခု သက်သေခံများစွာတို့သည် ခရစ်ယာန်အစည်းအဝေးများပြီးနောက်ဖြစ်ကောင်းဖြစ်မည့် ညနေစောင်းပိုင်းအချိန်တွင် ရှာဖွေမှုပြုလုပ်ကြသည်။ ဤသို့ရှာဖွေမှုသည် အမှန်ပင်အကျိုးဖြစ်ထွန်းခဲ့ပြီ။ လွန်ခဲ့သောနှစ်က ကမ္ဘာတစ်ဝန်း ဘုရားသခင့်နိုင်ငံတော်ကြေညာသူများ အရေအတွက်သည် ၂.၃ ရာခိုင်နှုန်း တိုးတက်ခဲ့သည်။ ယင်းက စပါးရှင်ကိုဂုဏ်တင်၍ ကျွန်ုပ်တို့၏နှလုံးကို ရွှင်ပြုံးစေသည်။
ရိတ်သိမ်းခြင်းလုပ်ငန်း၌ ငြိမ်သက်ခြင်းကို ထိန်းသိမ်းပါ
၁၄။ ကျွန်ုပ်တို့၏သတင်းတရားကို အဘယ်သဘောထားဖြင့် တင်ဆက်ကြသနည်း၊ အဘယ်ကြောင့်နည်း။
၁၄ ကျွန်ုပ်တို့ပျော်ရွှင်ရသည့် အခြားအကြောင်းရင်းတစ်ခုမှာ ရိတ်သိမ်းခြင်းလုပ်ငန်း၌ ကျွန်ုပ်တို့တင်ပြသော ငြိမ်သက်ခြင်းရှိစေသည့် သဘောထားနှင့် ဆက်နွှယ်သည်။ ယေရှုကဤသို့ဆိုခဲ့သည်– “အိမ်သို့ဝင်သောအခါ ငြိမ်သက်ခြင်းရှိပါစေသောဟု နှုတ်ဆက်ခြင်းကိုပြုကြလော့။ ထိုအိမ်သည်ထိုက်တန်လျှင် သင်တို့မြွက်သောငြိမ်သက်ခြင်းရောက်လိမ့်မည်။” (မဿဲ ၁၀:၁၂၊ ၁၃၊ သမ္မာ) ဟေဗြဲနှုတ်ခွန်းဆက်စကားနှင့်တကွ ယင်းနှင့်ကိုက်ညီသော ကျမ်းစာခေတ်သုံး ဂရိဝေါဟာရတို့သည် ‘ကျန်းမာချမ်းသာပါစေ’ ဟုအဓိပ္ပာယ်ရှိ၏။ သတင်းကောင်းကိုဟောပြောသောအခါ ဤသဘောထားက လူတို့ထံ ကျွန်ုပ်တို့ကို ပို့ဆောင်ပေးသည်။ ကျွန်ုပ်တို့၏မျှော်လင့်ချက်မှာ ဘုရားသခင့်နိုင်ငံတော်သတင်းကို သူတို့နှစ်လိုဖွယ် တုံ့ပြန်ကြမည်ဟူ၍ဖြစ်သည်။ ထိုသို့တုံ့ပြန်ကြသူတို့သည် မိမိတို့၏အပြစ်များကို နောင်တယူကာ ပြန်လှည့်လာပြီး ဘုရားသခင့်အလိုတော်ကို ထမ်းဆောင်ကြသည့်အခါ ကိုယ်တော်နှင့်ပြန်လည်သင့်မြတ်နိုင်ခွင့်ရှိသည်။ တစ်ဖန် ဘုရားသခင်နှင့်ငြိမ်သက်မှုရှိခြင်းက ထာဝရအသက်သို့ပို့ဆောင်ပေးသည်။—ယောဟန် ၁၇:၃; တမန်တော် ၃:၁၉-၂၀; ၁၃:၃၈၊ ၄၈; ၂ ကောရိန္သု ၅:၁၈-၂၀။
၁၅။ ကျွန်ုပ်တို့၏ဟောပြောခြင်းလုပ်ငန်း၌ မလိုလားဖွယ်တုံ့ပြန်မှုရရှိသောအခါ ငြိမ်သက်သည့်သဘောထားကို မည်သို့ထိန်းသိမ်းထားနိုင်သနည်း။
၁၅ မနှစ်သက်ဖွယ်တုံ့ပြန်ခံရသောအခါ ကျွန်ုပ်တို့၏ငြိမ်သက်ခြင်းကို မည်သို့ထိန်းသိမ်းနိုင်မည်နည်း။ ယေရှုကဤသို့ညွှန်ကြားခဲ့၏– ‘ထို [အိမ်] သည် မထိုက်တန်လျှင် သင်တို့မြွက်သောငြိမ်သက်ခြင်းသည် သင်တို့ထံသို့ပြန်လာလိမ့်မည်။’ (မဿဲ ၁၀:၁၃) တပည့်တော် ၇၀ စေလွှတ်ခြင်းနှင့်ပတ်သက်သော လုကာ၏မှတ်တမ်း၌ ယေရှု၏ဤဖော်ပြချက်ပါဝင်သည်– “ထိုအိမ်၌ ငြိမ်သက်ခြင်း၏သားရှိလျှင် သင်တို့မြွက်သောငြိမ်သက်ခြင်းသည် တည်လိမ့်မည်။ သို့မဟုတ် သင်တို့ထံသို့ပြန်လာလိမ့်မည်။” (လုကာ ၁၀:၆-၇၊ သမ္မာ) လူတို့ကို ကျွန်ုပ်တို့ သတင်းကောင်းဟောသောအခါ ဖော်ရွေပျူငှာစွာနှင့် ငြိမ်သက်စွာပြုခြင်းသည် သင့်လျော်ပေသည်။ အိမ်ရှင်က စိတ်ဝင်စားမှုမပြ၊ ညည်းညူမည်၊ သို့မဟုတ် ကြမ်းတမ်းစွာ တုံ့ပြန်မည်ဆိုလျှင် ငြိမ်သက်ခြင်းသတင်းတရားသည် ‘ကျွန်ုပ်တို့ထံပြန်လာ’ ဖို့သာဖြစ်သည်။ သို့ရာတွင် ဤအရာတစ်စုံတစ်ခုကမျှ ယေဟောဝါ၏သန့်ရှင်းသော ဝိညာဉ်တော်အသီးတစ်လုံးဖြစ်သည့် ငြိမ်သက်ခြင်းကို ကျွန်ုပ်တို့ထံမှလုယူမသွားချေ။—ဂလာတိ ၅:၂၂၊ ၂၃။
ရိတ်သိမ်းသူများအတွက် ပန်းတိုင်ကောင်းတစ်ခု
၁၆၊ ၁၇။ (က) ပြန်လည်ပတ်မှုများပြုလုပ်ရာတွင် ကျွန်ုပ်တို့၏ပန်းတိုင်ကား အဘယ်နည်း။ (ခ) ကျမ်းစာမေးခွန်းများရှိသူတို့ကို ကျွန်ုပ်တို့မည်သို့ကူညီပေးနိုင်သနည်း။
၁၆ ထာဝရအသက်ရစေရန် လူတို့ကိုစုသိမ်းခြင်း၌ ပါဝင်ခွင့်ရခြင်းကို ရိတ်သိမ်းသူများအနေနှင့် ကျွန်ုပ်တို့အလွန်နှစ်သက်ကြသည်။ ကျွန်ုပ်တို့ဟောလိုက်သည့် လူတစ်ဦးက နှစ်လိုဖွယ်တုံ့ပြန်၍ ပိုမိုသိရှိလိုပြီး “ငြိမ်သက်ခြင်း၏သား” ဖြစ်ကြောင်း ထင်ရှားပြသောအခါ ကျွန်ုပ်တို့ပျော်လိုက်သည်ဖြစ်ခြင်း! သူ့မှာ ကျမ်းစာမေးခွန်းများစွာ ရှိကောင်းရှိမည်ဖြစ်ရာ တစ်ခါတည်းနှင့် အားလုံးကို ကျွန်ုပ်တို့ဖြေဆိုပေးဖို့ မဖြစ်နိုင်ချေ။ ဦးဆုံးလည်ပတ်ချိန်၌ ကြာရှည်စွာနေခြင်းသည် သင့်တော်မည်မဟုတ်သောကြောင့် အဘယ်သို့ပြုနိုင်သနည်း။ လွန်ခဲ့သောအနှစ် ၆၀ ခန့်က အကြံပေးသကဲ့သို့ ပန်းတိုင်ထားနိုင်သည်။
၁၇ “ယေဟောဝါသက်သေအားလုံး စံပြကျမ်းစာသင်အံမှုများကျင်းပရန် အသင့်ရှိသင့်သည်။” အဆိုပါကောက်ချက်ကို ၁၉၃၇ မှ ၁၉၄၁ အထိထုတ်ဝေခဲ့သော စံပြသင်အံမှုညွှန်ကြားချက်စာအုပ်ငယ်အတွဲ၏ တတိယအတွဲ၌ ဖော်ပြထားသည်။ ဤသို့ဆက်ဖော်ပြသည်– “ဘုရားသခင့် [နိုင်ငံတော်] ကြေညာသူအားလုံးသည် ဘုရားသခင့်နိုင်ငံတော်သတင်းကို စိတ်ဝင်စားမှုတင်ပြကြသော စိတ်နှလုံးကောင်းသူများအား အတတ်နိုင်ဆုံးကူညီပေးရန် ဇွဲလုံ့လရှိသင့်သည်။ ထိုသို့သောသူတို့ထံ ပြန်လည်ပတ် [ပြန်လည်ပတ်မှုများပြု] ပြီး . . . မေးခွန်းအမျိုးမျိုးကိုဖြေဆိုကာ ထို့နောက် စောနိုင်သ၍စောစော . . . စံပြသင်အံမှုတစ်ခုစသင့်သည်။” မှန်ပါသည်၊ ကျွန်ုပ်တို့ပြန်လည်ပတ်ရသည့်ပန်းတိုင်မှာ အိမ်တွင်းကျမ်းစာသင်အံမှုစတင်ရန်ဖြစ်ပြီး ယင်းကိုမှန်မှန်ကျင်းပဖို့ဖြစ်၏။ * စိတ်ဝင်စားသူကို ခင်မင်ရင်းနှီးမှုနှင့် မေတ္တာပြလိုသောကြောင့် သင်အံမှုကိုထိရောက်စွာကျင်းပရန် ကောင်းစွာပြင်ဆင်ဖို့ ကျွန်ုပ်တို့လှုံ့ဆော်ခံရကြသည်။
၁၈။ ယေရှုခရစ်၏တပည့်များဖြစ်လာဖို့ လူသစ်များကို ကျွန်ုပ်တို့မည်သို့ကူညီပေးနိုင်သနည်း။
၁၈ ထာဝရအသက်ကိုရစေသော အသိပညာစာအုပ်နှင့် ကျွန်ုပ်တို့ထံမှ ဘုရားသခင် အဘယ်အရာတောင်းဆိုတော်မူသနည်းစသည့် ဘရိုရှာများအကူအညီဖြင့် ထိရောက်သောအိမ်တွင်းကျမ်းစာသင်အံမှုများကို ကျွန်ုပ်တို့ကျင်းပနိုင်ကြသည်ဖြစ်ရာ စိတ်ဝင်စားသူလူသစ်များအား တပည့်များဖြစ်လာစေဖို့ကူညီပေးရာ၌ ပါဝင်နိုင်ကြသည်။ ကြီးမြတ်သောဆရာယေရှုခရစ်ကို ကျွန်ုပ်တို့ကြိုးစားတုပကြစဉ် အဆိုပါကျမ်းစာသင်သားများသည် ကျွန်ုပ်တို့၏ငြိမ်သက်၊ ပျော်ရွှင်သောအမူအကျင့်၊ ကျွန်ုပ်တို့၏စိတ်ရင်းမှန်မှု၊ ယေဟောဝါ၏စံနှုန်းများနှင့် လမ်းညွှန်မှုများကို ကျွန်ုပ်တို့လေးစားမှုတင်ပြခြင်းမှ များစွာသင်ယူနိုင်ကြပေမည်။ လူသစ်များ၏မေးခွန်းများကို ဖြေဆိုပေးခြင်းဖြင့် သူတို့ကို ကျွန်ုပ်တို့ကူညီသောအခါ သူတို့အားမေးမြန်းသူတို့ကို မည်သို့ဖြေဆိုပေးနိုင်ကြောင်းကိုပါ အတတ်နိုင်ဆုံးသွန်သင်ပေးကြပါစို့။ (၂ တိမောသေ ၂:၁၊ ၂; ၁ ပေတရု ၂:၂၁) လွန်ခဲ့သောလုပ်ငန်းတော်နှစ်အတွင်း ကမ္ဘာတစ်ဝန်းတွင် အိမ်တွင်းကျမ်းစာသင်အံမှု ပျမ်းမျှ ၄,၇၆၆,၆၃၁ ခုကျင်းပခဲ့ကြသည့်အတွက် ပုံဆောင်ရိတ်သိမ်းသူများအနေနှင့် အမှန်ပင်ဝမ်းမြောက်နိုင်ကြသည်။ အိမ်တွင်းကျမ်းစာသင်အံမှုလုပ်ငန်း၌ ပါဝင်ခဲ့ကြသော ရိတ်သိမ်းသူများတွင် ကျွန်ုပ်တို့ကိုယ်တိုင် ပါဝင်ခဲ့မည်ဆိုလျှင် အထူးအားရရွှင်လန်းကြသည်။
ရိတ်သိမ်းခြင်း၌ ဆက်၍ရွှင်လန်းနေ
၁၉။ ယေရှုအမှုတော်ဆောင်ချိန်နှင့် ၎င်းနောက်မကြာမီကာလအတွင်း ရိတ်သိမ်းခြင်း၌ ရွှင်လန်းစရာ ခိုင်လုံသည့်အကြောင်းများ အဘယ်ကြောင့်ရှိသနည်း။
၁၉ ယေရှုအမှုဆောင်နေချိန်နှင့် ၎င်းနောက် မကြာမီအချိန်အတွင်း ရိတ်သိမ်းခြင်း၌ ရွှင်လန်းစရာ အကြောင်းကောင်းများစွာရှိခဲ့သည်။ ထိုအချိန်က လူအများသည် သတင်းကောင်းကို လိုလိုလားလားတုံ့ပြန်ခဲ့ကြသည်။ စီ.အီး. ၃၃ ပင်တေကုတ္တေပွဲနေ့၌ လူ ၃,၀၀၀ ခန့်သည် ပေတရု၏ညွှန်ကြားချက်ကို လက်ခံခဲ့ကြပြီး ယေဟောဝါ၏သန့်ရှင်းသောဝိညာဉ်တော်ကိုရရှိကြရာ ဘုရားသခင်၏ ဝိညာဉ်ရေးရာဣသရေလလူမျိုးတွင် ပါဝင်လာကြသဖြင့် အကြီးအကျယ်ရွှင်လန်းဝမ်းမြောက်ခဲ့ကြသည်။ သူတို့၏အရေအတွက်သည် အမှန်ပင်ဆက်၍တိုးများလာခဲ့ရာ ‘ယေဟောဝါသည် ကယ်တင်ခြင်းသို့ရောက်သူတို့ကို နေ့စဉ်မပြတ် ထပ်သွင်းတော်မူ’ သောကြောင့် ရွှင်လန်းမှုပြည့်လျှံခဲ့သည်။—တမန်တော် ၂:၃၇-၄၁၊ ၄၆၊ ၄၇; ဂလာတိ ၆:၁၆; ၁ ပေတရု ၂:၉။
၂၀။ ကျွန်ုပ်တို့၏ရိတ်သိမ်းခြင်းလုပ်ငန်း၌ အဘယ်အရာက အကြီးအကျယ်ရွှင်လန်းစေသနည်း။
၂၀ ထိုအချိန်တွင် ဟေရှာယ၏ ဤပရောဖက်ပြုချက်သည် မှန်ကန်ကြောင်း ထင်ရှားနေ၏– “ကိုယ်တော် [ယေဟောဝါ] သည် လူမျိုးတော်ကိုများပြားစေ၍ ဝမ်းမြောက်ဖွယ်အကြောင်းကိုလည်း တိုးပွားစေတော်မူသဖြင့်၊ ရိတ်သိမ်းချိန်၌ ပျော်ရွှင်သကဲ့သို့လည်းကောင်း၊ လက်ရဥစ္စာကိုဝေငှသည့်အခါ ရွှင်လန်းသကဲ့သို့လည်းကောင်း၊ ရှေ့တော်တွင် ဝမ်းမြောက်ကြပါ၏။” (ဟေရှာယ ၉:၃၊ သမ) ကောင်းကင်အတန်းအစားဖြစ်သည့် ‘များပြားသောလူမျိုးတော်’ သည် ယခုပြည့်လုနီးပြီဖြစ်ကြောင်း ကျွန်ုပ်တို့သိရှိကြပြီဖြစ်သော်လည်း အခြားရိတ်သိမ်းသူများအရေအတွက်မှာ တစ်နှစ်ပြီးတစ်နှစ် တိုးများလာသည်ကို တွေ့ရှိရသဖြင့် များစွာရွှင်လန်းကြရသည်။—ဆာလံ ၄:၇; ဇာခရိ ၈:၂၃; ယောဟန် ၁၀:၁၆။
၂၁။ နောက်ဆောင်းပါးတွင် အဘယ်အကြောင်းဆွေးနွေးကြမည်နည်း။
၂၁ ရိတ်သိမ်းခြင်းလုပ်ငန်း၌ ဆက်၍ရွှင်လန်းနေဖို့ ခိုင်လုံသောအကြောင်းရင်းများစွာ ကျွန်ုပ်တို့၌အမှန်ရှိ၏။ ကျွန်ုပ်တို့၏မျှော်လင့်ခြင်းသတင်းတရား၊ ထိုက်တန်သူများကိုရှာဖွေခြင်းနှင့် ကျွန်ုပ်တို့၏ငြိမ်သက်သောသဘောထားအစရှိသော ဤအကြောင်းရင်းအားလုံးတို့က ရိတ်သိမ်းသူများအဖြစ် ကျွန်ုပ်တို့ကိုပျော်ရွှင်စေသည်။ သို့တိုင် ၎င်းတို့သည် လူအများထံမှ ဆိုးဝါးသည့်တုံ့ပြန်မှုကိုလည်းဖြစ်ပေါ်စေသည်။ တမန်တော်ယောဟန်က ထိုသို့ကြုံတွေ့ခဲ့ရသည်။ သူသည် “ဘုရားသခင့်အကြောင်းကိုပြောခြင်း၊ ယေရှုအကြောင်းသက်သေခံခြင်းကြောင့်” ပတ်မုကျွန်းပေါ်တွင် အကျဉ်းကျခဲ့သည်။ (ဗျာဒိတ် ၁:၉၊ ကဘ) သို့ဖြစ်၍ နှိပ်စက်ညှဉ်းပန်းမှုနှင့် အတိုက်အခံပြုမှုတို့ကို ရင်ဆိုင်ကြရသောအခါ ကျွန်ုပ်တို့၏ရွှင်လန်းမှုကို မည်သို့ထိန်းသိမ်းပေးနိုင်သနည်း။ ယခုကျွန်ုပ်တို့ဟောလိုက်သူများ၏ တင်းမာသောသဘောထားကို ကြံ့ကြံ့ခံဖို့ အဘယ်အရာက ကျွန်ုပ်တို့ကိုထောက်ကူပေးမည်နည်း။ ဤမေးခွန်းများကို ကျမ်းစာအကူအညီဖြင့် နောက်ဆောင်းပါးက ဖြေဆိုပေးပါမည်။
[အောက်ခြေမှတ်ချက်များ]
^ အပိုဒ်၊ 17 စိတ်ဝင်စားသူများကို စုရုံးစေနိုင်မည့်နေရာများတွင် သင်အံမှုများကို ဦးဆုံးစီစဉ်ခဲ့ကြသည်။ သို့သော် မကြာမီ ပုဂ္ဂိုလ်တစ်ဦးချင်းစီနှင့်လည်းကောင်း၊ မိသားစုများနှင့်လည်းကောင်း သင်အံမှုများ ကျင်းပခဲ့ကြသည်။—ယေဟောဝါသက်သေများထုတ်ဝေခဲ့သော ယေဟောဝါသက်သေများ—ဘုရားသခင့်နိုင်ငံတော်ကြွေးကြော်သူများ၊ [လိပ်] စာမျက်နှာ ၅၇၄ ကိုရှု။
သင်မည်သို့ဖြေဆိုမည်နည်း
• ပုံဆောင်ရိတ်သိမ်းခြင်းလုပ်ငန်းကား အဘယ်နည်း။
• အဘယ်သတင်းတရားမျိုးကို ကျွန်ုပ်တို့ကြေညာနေကြသနည်း။
• တပည့်များရှာဖွေခြင်းတွင် ကျွန်ုပ်တို့အဘယ်ကြောင့်အောင်မြင်သနည်း။
• ရိတ်သိမ်းခြင်းလုပ်ငန်း၌ ငြိမ်သက်ခြင်းကို ကျွန်ုပ်တို့မည်သို့ထိန်းသိမ်းကြသနည်း။
• ကျွန်ုပ်တို့သည် ရိတ်သိမ်းခြင်း၌ အဘယ်ကြောင့် ဆက်၍ဝမ်းမြောက်နေကြသနည်း။
[လေ့လာရန်မေးခွန်းများ]
[စာမျက်နှာ ၁၂၊ ၁၃ ပါ ရုပ်ပုံ]
ပထမရာစုနှင့် ၂၀ ရာစုတွင် ဟောပြောခြင်း
[စာမျက်နှာ ၁၃ ပါ ရုပ်ပုံ]
ယခုခေတ် ရိတ်သိမ်းသူများသည် ပေါလုကဲ့သို့ အရပ်ရပ်ရှိလူတို့ထံရောက်ဖို့ ကြိုးပမ်းကြ
[စာမျက်နှာ ၁၃ ပါ ရုပ်ပုံ]
သတင်းကောင်းကို ဖော်ရွေသောအမူအရာဖြင့် ကြေညာပါ