ရွှေ​စင်​ထက် ပို​၍​ကြာရှည်ခံ

ရွှေ​ကို ယင်း​၏​လှပမှု၊ ကြာရှည်ခံ​မှု​တို့​ကြောင့် လူကြိုက်များ​ကြသည်။ ယင်းသည် တောက်ပ​ပြီး အချိန်​ကြာမြင့်စွာ အရောင်​မှေးမှိန်​ခြင်း​မရှိသည့်​အတွက် လူကြိုက်များ​ရခြင်း​ဖြစ်သည်။ ဤသို့​ဖြစ်​ရခြင်း​မှာ ရွှေ​သည် ရေ၊ အောက်ဆီဂျင်၊ ကန့်​နှင့် အရာရာတိုင်း နီးပါး​၏​ဒဏ်​ကို ခံရပ်​နိုင်​၍​ဖြစ်၏။ မြှုပ်​ထားသော​အိုး​များနှင့် အခြား​နေရာများ​တွင် တွေ့ ရှိခဲ့​သော ရှေးဟောင်း​ရွှေထည်​ပစ္စည်း​များစွာတို့သည် နှစ်ပေါင်း​ရာ​ချီ​ပြီး​နောက်​၌​ပင် ယင်း​တို့၏​အရောင်​မှေးမှိန်​သွားခြင်း​မရှိပေ။

သို့သော် စိတ်ဝင်စားဖွယ်​ရာ​မှာ ပို​၍​ကြာရှည်ခံ​ပြီး ‘မီး​ဖြင့်​စစ်ကြော​သော်လည်း ပျက်စီး​တတ်သော​ရွှေ​ထက် . . . သာ၍​အဖိုးထိုက်’ သည့်​အရာတစ်ခု​ကို သမ္မာကျမ်းစာ​ဖော်ပြ​သည်။ (၁ ပေတရု ၁:၇) ရွှေ​ကို မီး​ဖြင့်​လည်းကောင်း၊ အခြား​နည်းများဖြင့်​လည်းကောင်း “စစ်ကြော၊” သို့​မဟုတ် ချေးချွတ်​လျှင် ၉၉.၉ ရာခိုင်နှုန်း​အထိ သန့်စင်​နိုင်​သည်။ သို့​တိုင် ရွှေ​စင်​ပင်​လျှင် ဟိုက်​ဒရို​ကလို​ရ​စ်​အက်စစ်​သုံး​ဆ​နှင့် နို​က်​ထ​ရ​စ်​အက်စစ်​တစ်​ဆ ရော​ထားသော တော်ဝင်​အက်စစ် (တော်ဝင်​ရေ) နှင့်​ထိ​သောအခါ ပျက်စီး​သွား​သည်၊ သို့​မဟုတ် အရည်ပျော်​သွား​သည်။ ထို့​ကြောင့် သမ္မာကျမ်းစာ​က ‘ရွှေ​သည် ပျက်စီး’ တတ်​သည်​ဟု​ဖော်ပြ​ရာ​၌ သိပ္ပံ​နည်း​ကျ​မှန်ကန်​ပါ​သည်။

ယင်း​နှင့်​ဆန့်ကျင်​သည်​မှာ စစ်မှန်သော​ခရစ်ယာန်​ယုံကြည်ခြင်း​သည် ‘စိုးလ်​ကို​အသက်ရှင်​စေ​သည်။’ (ဟေဗြဲ ၁၀:၃၉) လူတို့သည် ယေရှု​ခရစ်​ကို​ကွပ်မျက်​သကဲ့သို့ ယုံကြည်ခြင်း​ခိုင်ခံ့​သူ​တစ်ဦး​ကို ကွပ်မျက်​နိုင်၏။ သို့သော် စစ်မှန်သော​ယုံကြည်ခြင်း​ရှိသူ​များ​ကို ဤသို့​ကတိပြု​သည်– “သေ​သည်​တိုင်အောင် သစ္စာစောင့်​လော့။ သို့​ဖြစ်​လျှင် အသက်​သရဖူ​ကို​ငါ​ပေး​မည်။” (ဗျာဒိတ် ၂:၁၀) တည်ကြည်​စွာ​သေဆုံး​သွား​သူများ​သည် ဘုရားသခင်​၏​မှတ်ဉာဏ်​တွင်​ရှိနေပြီး သူတို့ကို ကိုယ်တော်​ထမြောက်​စေတော်မူ​လိမ့်​မည်။ (ယောဟန် ၅:၂၈၊ ၂၉) ရွှေ​မည်မျှ​ပင်​ရှိပါစေ ယင်းကို မလုပ်ဆောင်​ပေး​နိုင်​ချေ။ ဤ​အကြောင်းကြောင့် ယုံကြည်ခြင်း​သည် ရွှေ​ထက် အမှန်ပင်​သာ၍​အဖိုး​များစွာ​ထိုက်​သည်။ သို့ရာတွင် ဤ​ထူးကဲ​သော​အဖိုးထိုက်သည့် ယုံကြည်ခြင်း​မျိုး​ရှိ​ရန် စစ်ကြော​စမ်းသပ်ခြင်း​ကိုလည်း​ခံရ​မည်​ဖြစ်သည်။ အမှန်​မှာ ပေတရု​ပြော​ခဲ့​သည့် ရွှေ​ထက်​သာ၍​အဖိုးထိုက်​သည်​ကား ‘စစ်ကြော​စုံစမ်း​ခံ​ပြီး​သော ယုံကြည်ခြင်း’ ဖြစ်သည်။ ယေဟောဝါသက်သေ​များသည် စစ်မှန်သော​ဘုရားသခင် ယေဟောဝါ​နှင့် ကိုယ်တော်​၏​သားတော် ယေရှု​ခရစ်​တို့​အပေါ် ခိုင်ခံ့​သော​ယုံကြည်ခြင်း တိုးပွား​စေပြီး ထိန်းသိမ်း​ထား​နိုင်​ရန် သင့်ကို ကျမ်းစာ​သင်ပေး​ကာ ကူညီ​ပေးဖို့ ဝမ်းမြောက်​ကြလိမ့်မည်​ဖြစ်သည်။ ယေရှု​မိန့်တော်မူ​သည့်​အတိုင်း ယင်းသည် “ထာဝရ​အသက်” ဖြစ်၏။—ယောဟန် ၁၇:၃။