လက်မလျှော့ဘဲ ကောင်းသောအကျင့်ကျင့်ပါလေ
လက်မလျှော့ဘဲ ကောင်းသောအကျင့်ကျင့်ပါလေ
“ငါတို့သည် အားမလျော့၊ စိတ်မပျက်ဘဲ ကောင်းသောအကျင့်ကိုကျင့်ကြကုန်အံ့။ ထိုသို့တည်ကြည်၍ကျင့်လျှင် အချိန်တန်သောကာလ၌ အသီးအနှံကိုရိတ်ရကြလိမ့်မည်။”—ဂလာတိ ၆:၉။
၁၊ ၂။ (က) ဘုရားသခင့်အမှုတော်ဆောင်ရန် ခံနိုင်ရည်ရှိဖို့ အဘယ်ကြောင့်လိုအပ်သနည်း။ (ခ) အာဗြဟံသည် ခံနိုင်ရည်ရှိကြောင်း မည်သို့ဖော်ပြခဲ့သနည်း၊ ထိုသို့ပြုရန် အဘယ်အရာက သူ့ကိုအကူအညီပေးခဲ့သနည်း။
ယေဟောဝါသက်သေများအနေဖြင့် ဘုရားသခင့်အလိုတော်ကို ဆောင်ရွက်ရသောကြောင့် ကျွန်ုပ်တို့ ဝမ်းမြောက်ကြသည်။ တပည့်များအဖြစ် “ထမ်းပိုး” ထမ်းခြင်းမှလည်း ကျွန်ုပ်တို့လန်းဆန်းမှုရရှိကြသည်။ (မဿဲ ၁၁:၂၉) မည်သို့ပင်ဖြစ်စေကာမူ ခရစ်တော်နှင့်အတူ ယေဟောဝါ၏အမှုတော်ဆောင်ခြင်းသည် အမြဲလွယ်ကူမည်မဟုတ်ချေ။ တမန်တော်ပေါလုက ယုံကြည်သူချင်းတို့အား ဤသို့တိုက်တွန်းရာတွင် ယင်းကို အထင်အရှားဖော်ပြခဲ့သည်– “ဘုရားသခင်၏အလိုတော်ကိုဆောင်ပြီးမှ၊ ကတိတော်အတိုင်း အကျိုးကိုရမည်အကြောင်း သည်းခံခြင်းစိတ် [“ခံနိုင်ရည်၊” ကဘ] ရှိရမည်။” (ဟေဗြဲ ၁၀:၃၆) ဘုရားသခင့်အမှုတော်ဆောင်ခြင်းသည် စိန်ခေါ်ချက်ဖြစ်နိုင်သောကြောင့် ခံနိုင်ရည်လိုအပ်ပေသည်။
၂ အာဗြဟံ၏ဘဝအသက်တာသည် ထိုအချက်ကို အမှန်ပင်သက်သေထူ၏။ သူသည် ခက်ခက်ခဲခဲရွေးချယ်ပြုမူရသည့်အခါမျိုးနှင့် ဖိစီးသောအခြေအနေများကို ကြိမ်ဖန်များစွာကြုံတွေ့ခဲ့သည်။ ဥရမြို့တွင် စည်းစိမ်ရှိရှိနေထိုင်ခဲ့သောဘဝကို စွန့်လွှတ်ရန် မိန့်မှာခံရခြင်းသည် အစမျှသာဖြစ်သည်။ မကြာမီ သူသည် ငတ်မွတ်ခေါင်းပါးခြင်း၊ အိမ်နီးချင်းတို့၏ရန်၊ ဇနီးကို ဆုံးရှုံးလုနီးပါးဖြစ်ရခြင်း၊ ဆွေမျိုးအချို့၏ရန်လိုမှုနှင့် စစ်မက်၏အကြမ်းဖက်မှုတို့ကို ရင်ဆိုင်ခဲ့ရ၏။ ထိုထက်ပြင်းထန်သောစမ်းသပ်မှုများ ခံရစရာရှိသေးသည်။ သို့သော် အာဗြဟံသည် ကောင်းရာမွန်ရာလုပ်ဆောင်ခြင်းကို တစ်ခါမျှမစွန့်လွှတ်ခဲ့ချေ။ ယနေ့ ကျွန်ုပ်တို့၌ ဘုရားသခင့်နှုတ်မြွက်စကားတော် အပြည့်အစုံရှိထားသကဲ့သို့ သူ့တွင်မရှိခြင်းကို ကျွန်ုပ်တို့စဉ်းစားကြည့်လျှင် ထိုသို့ပြုခဲ့ခြင်းသည် အမှန်ပင်ထူးခြားပေသည်။ မည်သို့ပင်ဖြစ်စေ “သင်နှင့်မိန်းမကိုလည်းကောင်း၊ သင်၏အမျိုးအနွယ်နှင့် မိန်းမ၏အမျိုးအနွယ်ကိုလည်းကောင်း ငါသည်ရန်ငြိုးဖွဲ့စေမည်” ဟုဘုရားသခင်ကြွေးကြော်ခဲ့သော ဦးဆုံးပရောဖက်ပြုချက်ကို သူမလွဲဧကန်သိပေမည်။ (ကမ္ဘာဦး ၃:၁၅) အာဗြဟံမှတစ်ဆင့် မျိုးနွယ်တော်ဆင်းသက်လာရမည်ဖြစ်ရာ သူသည် စာတန်၏ ရန်ငြိုးကို အဓိကခံရမည်ကား အမှန်တကယ်ပင်ဖြစ်၏။ ဤအချက်ကို သိထားသောကြောင့် အာဗြဟံသည် သူ၏စမ်းသပ်ချက်များကို ရွှင်လန်းအားရစွာ ခံရပ်နိုင်ရန် အမှန်ပင်အကူအညီရခဲ့ပေမည်။
၃။ (က) ယေဟောဝါ၏လူတို့သည် ဆင်းရဲခြင်းများခံရရန် ယနေ့ အဘယ်ကြောင့်မျှော်လင့်သင့်သနည်း။ (ခ) ဂလာတိ ၆:၉ က ကျွန်ုပ်တို့ကို မည်သို့အားပေးသနည်း။
၃ ယနေ့ ယေဟောဝါ၏လူတို့သည် ဆင်းရဲခြင်းများခံရမည်ကို မျှော်လင့်ထားသင့်၏။ (၁ ပေတရု ၁:၆၊ ၇) အမှန်မှာ စာတန်သည် ကောင်းကင်အတန်းအစားမှ အကြွင်းအကျန်တို့နှင့် ‘စစ်တိုက်နေ’ ကြောင်း ဗျာဒိတ် ၁၂:၁၇ က ကျွန်ုပ်တို့ကို သတိပေးသည်။ “အခြားသိုး” သည် ထိုသူတို့နှင့် အနီးကပ်ပေါင်းသင်းနေကြသောကြောင့် သူတို့လည်း စာတန့်အမျက်ဒေါသ၏ပစ်မှတ်များဖြစ်ကြသည်။ (ယောဟန် ၁၀:၁၆) ခရစ်ယာန်များသည် သူတို့၏လူထုရှေ့ဓမ္မအမှုတွင် ရင်ဆိုင်ရမည့် ဆန့်ကျင်မှုအပြင် သူတို့၏ကိုယ်ရေးကိုယ်တာဘဝတွင်လည်း စုံစမ်းနှောင့်ယှက်မှုအမျိုးမျိုးခံရပေမည်။ ပေါလုက ကျွန်ုပ်တို့ကို ဤသို့တိုက်တွန်းသည်– “ငါတို့သည် အားမလျော့၊ စိတ်မပျက်ဘဲ ကောင်းသောအကျင့်ကိုကျင့်ကြကုန်အံ့။ ထိုသို့တည်ကြည်၍ကျင့်လျှင် အချိန်တန်သောကာလ၌ အသီးအနှံကိုရိတ်ရကြလိမ့်မည်။” (ဂလာတိ ၆:၉) စာတန်သည် ကျွန်ုပ်တို့၏ယုံကြည်ခြင်း ပျက်ပြားသွားစေရန် ဆန္ဒပြင်းပြသော်လည်း ကျွန်ုပ်တို့သည် ယုံကြည်ခြင်းခိုင်မြဲစွာဖြင့် သူ့ကိုဆီးတားကြရမည်။ (၁ ပေတရု ၅:၈၊ ၉) ကျွန်ုပ်တို့၏တည်ကြည်ခြင်းလမ်းစဉ်မှ အဘယ်ရလဒ်ရရှိနိုင်မည်နည်း။ ယာကုပ် ၁:၂၊ ၃ က ဤသို့ရှင်းပြသည်– “ငါ့ညီအစ်ကိုတို့၊ သင်တို့၏ယုံကြည်ခြင်းကို စစ်ကြောစုံစမ်းခြင်းအရာသည် သည်းခံခြင်းကို ပွားစေတတ်သည်ဟုသိမှတ်လျက်၊ အထူးထူးအပြားပြား စုံစမ်းနှောင့်ယှက်ခြင်းနှင့် တွေ့ကြုံသောအခါ၊ ဝမ်းမြောက်စရာအကြောင်းသက်သက်ဖြစ်သည်ဟု မှတ်ကြလော့။”
တိုက်ရိုက်တိုက်ခိုက်ခြင်း
၄။ ဘုရားသခင့်လူမျိုး၏ တည်ကြည်မှုကိုချိုးဖျက်ရန် စာတန်သည် တိုက်ရိုက်တိုက်ခိုက်မှုကို မည်သို့အသုံးပြုခဲ့သနည်း။
၄ ယနေ့ခရစ်ယာန်တစ်ဦး ရင်ဆိုင်ရမည့် “အထူးထူးအပြားပြားစုံစမ်းနှောင့်ယှက်ခြင်း” တို့ကို အာဗြဟံ၏ဘဝအသက်တာက အမှန်ပင်ရှင်းလင်းဖော်ပြ၏။ ဥပမာ၊ သူသည် ရှိနာမှ ကျူးကျော်လာသူတို့၏ရန်ကို တုံ့ပြန်တိုက်ခိုက်ခဲ့ရသည်။ (ကမ္ဘာဦး ၁၄:၁၁-၁၆) စာတန်သည် နှိပ်စက်ညှဉ်းပန်းမှုအသွင်ဖြင့် တိုက်ရိုက်တိုက်ခိုက်မှုများကို ဆက်လက်၍အသုံးပြုနေခြင်းမှာ အံ့အားသင့်စရာမဟုတ်ချေ။ ဒုတိယကမ္ဘာစစ်ပြီးကတည်းက ယေဟောဝါသက်သေများ၏ ခရစ်ယာန်ပညာပေးရေးလုပ်ငန်းအပေါ် အစိုးရပိတ်ပင်တားမြစ်မှုများကို နိုင်ငံများစွာ၌ ပြဋ္ဌာန်းခဲ့၏။ အင်ဂိုလာနိုင်ငံတွင် ရန်သူများလက်ထဲ၌ ခရစ်ယာန်များခံရသည့် အကြမ်းဖက်မှုအကြောင်း ၂၀၀၁ ခုနှစ် ယေဟောဝါသက်သေများ၏နှစ်ချုပ်စာအုပ်ကဖော်ပြသည်။ ထိုသို့သောနိုင်ငံများရှိ ကျွန်ုပ်တို့၏ညီအစ်ကိုများသည် ယေဟောဝါအပေါ် မှီခိုအားထားလျက် အရှုံးမပေးကြရန် စွဲစွဲမြဲမြဲခုခံငြင်းဆိုခဲ့ကြပြီတကား! သူတို့သည် အကြမ်းဖက်မှု သို့မဟုတ် ပုန်ကန်မှုဖြင့်မဟုတ်ဘဲ ဟောပြောခြင်းလုပ်ငန်းကို ပညာသတိရှိရှိ စွဲစွဲမြဲမြဲဆောင်ရွက်ခြင်းဖြင့် တုံ့ပြန်ခဲ့ကြသည်။—မဿဲ ၂၄:၁၄။
၅။ ခရစ်ယာန်လူငယ်များသည် ကျောင်းတွင် နှိပ်စက်ညှဉ်းပန်းမှု၏သားကောင်များ မည်သို့ဖြစ်နိုင်သနည်း။
၅ သို့သော် နှိပ်စက်ညှဉ်းပန်းမှုတွင် အကြမ်းဖက်မှု ပါဝင်စရာမလိုပေ။ အာဗြဟံသည် အဆုံးတွင် ဣရှမေလနှင့် ဣဇာက်အမည်ရှိ သားနှစ်ဦးဖြင့် ဆုကျေးဇူးခံစားခဲ့ရသည်။ တစ်ကြိမ်တစ်ခါတွင် ဣရှမေလသည် ဣဇာက်ကို “ဆဲရေး” ခဲ့ကြောင်း ကမ္ဘာဦး ၂၁:၈-၁၂ ကဖော်ပြသည်။ ဂလာတိသို့ရေးသောစာတွင် ပေါလုက ဣရှမေလသည် ဣဇာက်ကို ညှဉ်းဆဲသည်ဟုဖော်ပြထားသောကြောင့် ကလေးဆန်ဆန်ပြုမူခြင်းထက်မက သူပြုမူခဲ့ကြောင်း ထင်ရှား၏! (ဂလာတိ ၄:၂၉) သို့ဖြစ်၍ ကျောင်းနေဖက်များက ကဲ့ရဲ့လှောင်ပြောင်ခြင်း၊ အတိုက်အခံပြုသူတို့က နှုတ်ဖြင့်စော်ကားပြောဆိုခြင်းတို့ကိုလည်း နှိပ်စက်ညှဉ်းပန်းမှုဟု သင့်လျော်စွာခေါ်ဆိုနိုင်သည်။ ရိုင်းယန်းအမည်ရှိ ခရစ်ယာန်လူငယ်တစ်ဦးသည် အတန်းဖော်များလက်ချက်ဖြင့် အလူးအလဲစိတ်ဆင်းရဲခဲ့ရသည့်အဖြစ်ကို သူဤသို့ပြောပြသည်– “ကျောင်းအသွားအပြန် ၁၅ မိနစ်ကြာ ကျောင်းကားစီးရတဲ့အချိန်မှာ နှုတ်နဲ့ ကျွန်တော်စော်ကားခံရတဲ့အတွက် အဲ့ဒီအချိန်ဟာ နာရီနဲ့ချီ ကြာသလိုထင်ရတယ်။ စီးကရက်မီးခြစ်နဲ့ သူတို့အပူပေးထားတဲ့ စက္ကူညှပ်ကလစ်တွေနဲ့ ကျွန်တော်ကိုတို့ခဲ့ကြတယ်။” ဤသို့ကြမ်းကြမ်းတမ်းတမ်းဆက်ဆံရခြင်း၏ အကြောင်းရင်းကားအဘယ်နည်း။ “ကျွန်တော်ရဲ့ သီအိုကရက်တစ် လေ့ကျင့်မှုက ကျွန်တော့်ကို ကျောင်းက တခြားလူငယ်တွေနဲ့ မတူစေခဲ့တဲ့အတွက်ပဲ။” မည်သို့ပင်ဖြစ်စေကာမူ မိဘများ၏အကူအညီဖြင့် ရိုင်းယန်းသည် တည်ကြည်စွာခံရပ်နိုင်ခဲ့၏။ လူငယ်များ၊ သင်တို့ရွယ်တူချင်း၏ လှောင်ပြောင်သရော်မှုက သင်တို့ကို စိတ်ပျက်သွားစေခဲ့သလော။ လက်လျှော့အရှုံးမပေးပါနှင့်! တည်ကြည်စွာခံရပ်ခြင်းဖြင့် ယေရှု၏ ဤစကားများပြည့်စုံခြင်းကို သင်ကြုံတွေ့ရပေလိမ့်မည်– “ငါ့ကြောင့် သင်တို့ကို ကဲ့ရဲ့ညှဉ်းဆဲ၍ မမှန်ဘဲလျက် အပြစ်တကာတင်ကြသောအခါ၊ သင်တို့သည် မင်္ဂလာရှိ [“ပျော်ရွှင်၊” ကဘ] ကြ၏။”—မဿဲ ၅:၁၁။
နေ့စဉ်စိုးရိမ်ပူပန်မှုများ
၆။ ယနေ့ ခရစ်ယာန်ချင်းတို့တွင် အဘယ်အရာများက ဆက်ဆံရေးအဆင်မပြေမှုများ ရှိစေနိုင်သနည်း။
၆ ယနေ့ ကျွန်ုပ်တို့ရင်ဆိုင်ကြရသည့် စမ်းသပ်မှုအများအပြားတွင် နေ့စဉ်ဖြစ်မြဲစိုးရိမ်ပူပန်မှုများ ပါဝင်သည်။ အာဗြဟံကိုယ်တိုင် မိမိနှင့် မိမိတူတော်စပ်သူ လောတ၏ တိရစ္ဆာန်ကျောင်းသူများအကြား ပေါ်ပေါက်လာသောတင်းမာမှုများကို ကိုင်တွယ်ဖြေရှင်းခဲ့ရ၏။ (ကမ္ဘာဦး ၁၃:၅-၇) အလားတူ ယနေ့လည်း ပုဂ္ဂိုလ်ရေးကွာဟချက်များနှင့် မနာလိုမှုအနည်းအကျဉ်းရှိခြင်းတို့ကြောင့် ဆက်ဆံရေး အဆင်မပြေမှုများဖြစ်ပေါ်နိုင်မည်သာမက အသင်းတော်၏ငြိမ်သက်မှုကိုပင် ခြိမ်းခြောက်နိုင်သည်။ “ဂုဏ်ပြိုင်ခြင်း [“မနာလိုခြင်း၊” ကဘ]၊ ရန်တွေ့ခြင်းရှိလျှင် မငြိမ်မဝပ်ရုန်းရင်းခတ်ခြင်း၊ ဆိုးညစ်စွာပြုမူခြင်းအမျိုးမျိုးရှိတတ်၏။” (ယာကုပ် ၃:၁၆) ကျွန်ုပ်တို့သည် မာနထားကြမည့်အစား အာဗြဟံနည်းတူ သင့်တင့်ငြိမ်သက်မှုကို ရှေ့ဦးထားကာ အခြားသူတို့၏အကျိုးစီးပွားကိုရှာပြီး စိတ်ပျက်အရှုံးမပေးရန် မည်မျှအရေးကြီးလှသည်တကား!—၁ ကောရိန္သု ၁၃:၅; ယာကုပ် ၃:၁၇။
၇။ (က) တစ်ဦးတစ်ယောက်သည် ခရစ်ယာန်ချင်းတစ်ဦးကြောင့် စိတ်ထိခိုက်ခဲ့မည်ဆိုလျှင် အဘယ်အရာပြုလုပ်သင့်သနည်း။ (ခ) အခြားသူတို့နှင့် ကောင်းသောဆက်ဆံရေးထိန်းထားရာတွင် အာဗြဟံသည် ပုံနမူနာကောင်း မည်သို့ချမှတ်ပေးခဲ့သနည်း။
၇ ယုံကြည်သူချင်းတစ်ဦးက ကျွန်ုပ်တို့ကို မတော်မတရားဆက်ဆံသည်ဟု ခံစားရသောအခါ အသင့်အတင့်ရှိရန် စိန်ခေါ်ချက်တစ်ရပ်ဖြစ်လာနိုင်သည်။ နယပုံပြင် ၁၂:၁၈ က ဤသို့ဆိုသည်– “သန်လျက်နှင့်ထိုးသကဲ့သို့ စကားပြောတတ်သောလူတချို့ရှိ၏။” သဘောရိုးဖြင့်ပြောဦးတော့ မစဉ်းစားဘဲပြောဆိုသောစကားများသည် အကြီးအကျယ်စိတ်ထိခိုက်နာကြည်းစေနိုင်၏။ ကျွန်ုပ်တို့သည် အသရေဖျက်ခံရသည်၊ သို့မဟုတ် ရက်ရက်စက်စက်အတင်းပြောခံရသည်ဟု ခံစားရလျှင် ထိုနာကြည်းမှုသည် သာ၍ပင်ဆိုးရွားပေလိမ့်မည်။ (ဆာလံ ၆:၆၊ ၇) သို့သော် ခရစ်ယာန်တစ်ဦးသည် စိတ်နာခြင်းကြောင့်အလျှော့ပေးစရာမဟုတ်ချေ! ထိုသို့သောအခြေအနေမျိုးတွင် သင်ရောက်ရှိနေမည်ဆိုလျှင် သင့်အားစိတ်ထိခိုက်သူကို ကိုယ်ကိုယ်တိုင်အစပြု၍ ကြင်နာစွာစကားပြောဆိုခြင်းဖြင့် အခက်အခဲကိုဖြေရှင်းပါ။ (မဿဲ ၅:၂၃၊ ၂၄; ဧဖက် ၄:၂၆) ထိုသူကို ခွင့်လွှတ်လိုစိတ်ရှိပါ။ (ကောလောသဲ ၃:၁၃) ကျွန်ုပ်တို့သည် အငြိုးအတေးမထားခြင်းအားဖြင့် မိမိ၏စိတ်လှုပ်ရှားမှုကိုသာမက ကျွန်ုပ်တို့ညီအစ်ကိုနှင့် ပေါင်းသင်းဆက်ဆံရေးကိုပါ ကုစားစေနိုင်သည်။ အာဗြဟံသည် လောတအပေါ်ရှိနိုင်သည့် မည်သည့်အငြိုးအတေးကိုမျှ သိုမထားခဲ့ချေ။ လောတနှင့် သူ၏မိသားစုကို သူချက်ချင်းထ၍ ခုခံကာကွယ်ပေးခဲ့သည်တကား!—ကမ္ဘာဦး ၁၄:၁၂-၁၆။
ကိုယ့်ဘာသာကိုယ်ဖြစ်ပေါ်စေသည့် စုံစမ်းချက်များ
၈။ (က) ခရစ်ယာန်များသည် ‘ပူပန်ခြင်းဝေဒနာများစွာနှင့် မိမိတို့ကိုယ်ကို မည်သို့ထုတ်ချင်းခပ်အောင်ထိုး’ နိုင်သနည်း။ (ခ) အာဗြဟံသည် စည်းစိမ်ဥစ္စာအပေါ် အဘယ်ကြောင့်မျှတသောအမြင်ရှိနိုင်သနည်း။
၈ စုံစမ်းချက်အချို့မှာ ကိုယ့်ဘာသာကိုယ်ပြုလုပ်၍ ဖြစ်ပေါ်လာကြောင်း ဝန်ခံရမည်။ ဥပမာ၊ ယေရှုက မိမိ၏နောက်လိုက်များကို ဤသို့မိန့်တော်မူခဲ့သည်– “သံချေး၊ ပိုးရွဖျက်ဆီး၍ သူခိုးထွင်းဖောက်ခိုးယူရာ မြေကြီးပေါ်မှာ ဘဏ္ဍာကိုမဆည်းပူးကြနှင့်။” (မဿဲ ၆:၁၉) သို့တိုင် ညီအစ်ကိုအချို့သည် ဘုရားသခင့်နိုင်ငံတော်အကျိုးစီးပွားထက် စည်းစိမ်ချမ်းသာကို ဦးစားထားခြင်းဖြင့် “ပူပန်ခြင်းဝေဒနာများနှင့် ကိုယ်ကိုကိုယ် ထုတ်ချင်းခပ်အောင်ထိုးကြပြီ။” (၁ တိမောသေ ၆:၉၊ ၁၀) အာဗြဟံသည် ဘုရားသခင့်အလိုတော်နှင့်တွေ့ရန် စည်းစိမ်ဥစ္စာကို စွန့်လွှတ်ဖို့ တလိုတလားရှိခဲ့၏။ “သူတစ်ပါးပိုင်သောပြည်၌ ဧည့်သည်နေသကဲ့သို့၊ ကတိတော်နှင့်စပ်ဆိုင်သောပြည်၌ ယုံကြည်ခြင်းအားဖြင့် ဧည့်သည်ဖြစ်၍နေ၏။ ထိုကတိတော်ကိုအမွေခံရသော အဖော်အဖက်တည်းဟူသော ဣဇာက်၊ ယာကုပ်တို့နှင့်အတူ တဲ၌နေလေ၏။ အကြောင်းမူကား၊ ဘုရားသခင်တည်ထောင်ပြုစုတော်မူသော၊ ခိုင်ခံ့မြဲမြံသောမြို့ကို မျှော်လင့်သတည်း။” (ဟေဗြဲ ၁၁:၉၊ ၁၀) အနာဂတ် “မြို့” တစ်မြို့ သို့မဟုတ် ဘုရားသခင့်အစိုးရ တည်ထောင်လိမ့်မည်ဟု အာဗြဟံ၏ယုံကြည်စိတ်ချမှုက သူ့အား စည်းစိမ်ဥစ္စာအပေါ် အားမထားရန်ကူညီပေးခဲ့သည်။ ကျွန်ုပ်တို့လည်း ထပ်တူပြုမူခြင်းက ပညာရှိရာမကျပေလော။
၉၊ ၁၀။ (က) ထင်ပေါ်ကျော်ကြားလိုစိတ်က စမ်းသပ်မှုတစ်ရပ် မည်သို့ဖြစ်နိုင်သနည်း။ (ခ) ယနေ့ ညီအစ်ကိုတစ်ဦးသည် မိမိကိုယ်ကို “အငယ်ဆုံးသောသူ” တစ်ဦးအဖြစ် မည်သို့ပြုမူနိုင်သနည်း။
၉ နောက်ထပ် အသွင်တစ်ရပ်ကို သုံးသပ်ကြည့်ပါ။ သမ္မာကျမ်းစာက ဤကြံ့ခိုင်သောညွှန်ကြားချက်ကို ပေးထားသည်– “အကြင်သူသည် ဘာမျှမဟုတ်ဘဲလျက်၊ ဤမျှလောက်ငါဖြစ်သည်ဟုစိတ်ထင်လျှင်၊ ထိုသူသည် ကိုယ်ကိုလှည့်ဖြားသောသူဖြစ်၏။” (ဂလာတိ ၆:၃) ထိုထက်ကား ကျွန်ုပ်တို့သည် “ရန်တွေ့လိုသောစိတ်၊ အချည်းနှီးကျော်စောကိတ္တိကိုတပ်မက်သောစိတ်ရှိ၍ အဘယ်အမှုကိုမျှမပြုကြ” ရန်တိုက်တွန်းခံရသည်။ (ဖိလိပ္ပိ ၂:၃) အချို့သည် ဤဆုံးမစကားကို လိုက်လျှောက်ရန်ပျက်ကွက်ကြခြင်းဖြင့် ကိုယ့်အပေါ်ကိုယ် စုံစမ်းချက်များကျရောက်စေ၏။ “ကောင်းသောအမှုအရာကို” လုပ်ဆောင်ဖို့အလိုဆန္ဒရှိမည့်အစား ထင်ပေါ်ကျော်ကြားလိုစိတ်၏လှုံ့ဆော်မှုကိုခံခြင်းဖြင့် သူတို့သည် အသင်းတော်၌ အခွင့်အရေးများကို မရရှိသောအခါ စိတ်ပျက်အားလျော့ကာ မကျေမချမ်းဖြစ်လာကြသည်။—၁ တိမောသေ ၃:၁။
၁၀ အာဗြဟံသည် “ကိုယ်ကိုထင်သင့်သည်အတိုင်းထက် လွန်၍မထင်” ခြင်းအားဖြင့် ကောင်းသောပုံနမူနာ ချမှတ်ပေးခဲ့သည်။ (ရောမ ၁၂:၃) မေလခိဇေဒက်နှင့် အာဗြဟံတွေ့ဆုံသောအခါ ဘုရားသခင့်မျက်နှာသာရ သူ၏အခြေအနေကြောင့် မိမိသည် ပိုသာသည့်အလားမပြုမူခဲ့ချေ။ ယင်းအစား မေလခိဇေဒက်အား ဆယ်ဖို့တစ်ဖို့ပေးလှူခြင်းဖြင့် သူ၏ယဇ်ပုရောဟိတ်အရာသည် သာ၍မြင့်မြတ်ကြောင်း အသိအမှတ်ပြုခဲ့သည်။ (ဟေဗြဲ ၇:၄-၇) အလားတူပင် ယနေ့ ခရစ်ယာန်များသည် မိမိတို့ကိုယ်ကို “အငယ်ဆုံးသောသူများ” အဖြစ်ပြုမူရန် တလိုတလားရှိကြပြီး ထင်ပေါ်ကျော်ကြားဖို့မကြိုးစားသင့်ပါ။ (လုကာ ၉:၄၈) အသင်းတော်တွင် ဦးစီးနေသူတို့က သင့်အား အခွင့်အရေးအချို့ မပေးပုံရှိမည်ဆိုလျှင် သင့်ကိုယ်သင် သို့မဟုတ် ကိစ္စရပ်များ သင်ကိုင်တွယ်ပုံကို မည်သို့တိုးတက်စေနိုင်ကြောင်း ပိုင်းဖြတ်ရန် ရိုးရိုးသားသားဖြင့် မိမိကိုယ်ကိုဆန်းစစ်ပါလေ။ သင်မရရှိသောအခွင့်အရေးများကြောင့် စိတ်နာနေမည့်အစား သင်၌ရှိနေသော အခွင့်အရေးဖြစ်သည့် ယေဟောဝါအား အခြားသူတို့သိရှိလာစေရန် ကူညီပေးခွင့်ကို အပြည့်အဝအသုံးချပါ။ မှန်ပါသည်၊ “ကာလအချိန်တန်လျှင်၊ ဘုရားသခင်သည် သင်တို့ကိုချီးမြှောက်တော်မူမည်အကြောင်း၊ တန်ခိုးကြီးသောလက်တော်အောက်၌ ကိုယ်ကိုကိုယ်နှိမ့်ချကြလော့။”—၁ ပေတရု ၅:၆။
မမြင်ရသောအရာများ၌ ယုံကြည်ခြင်း
၁၁၊ ၁၂။ (က) အသင်းတော်ရှိ အချို့သူတို့တွင် အရေးတကြီးသဘောထား အဘယ်ကြောင့် ပျောက်လွင့်သွားသနည်း။ (ခ) အာဗြဟံသည် ဘုရားသခင့်ကတိတော်များအပေါ် ယုံကြည်စိတ်ချစွာ မိမိ၏ဘဝကိုတည်ဆောက်ရာ၌ အဘယ်ပုံနမူနာကောင်း ချမှတ်ပေးခဲ့သနည်း။
၁၁ အခြားစမ်းသပ်မှုတစ်ရပ်မှာ ဤဆိုးညစ်သောစနစ်များ၏ဆုံးခန်း ရောက်ရှိလာရန် နှောင့်နှေးပုံရှိနေခြင်းဖြစ်ပေမည်။ ၂ ပေတရု ၃:၁၂ အရ ခရစ်ယာန်များသည် “ဘုရားသခင်၏နေ့ရောက်လိမ့်မည်ဟု . . . မျှော်လင့်တောင့်တလျက်” ရှိကြရမည်။ သို့သော် များစွာသောသူတို့သည် ဤ “နေ့ရက်” ကို နှစ်ချီ၍၊ အချို့ဆိုလျှင် ဆယ်စုနှစ်ချီ၍ စောင့်မျှော်လာခဲ့ကြပြီ။ ယင်းကြောင့် အချို့သူတို့သည် စိတ်ပျက်အားလျော့လာကြပြီး သူတို့မှာ အရေးတကြီးသဘောထား ပျောက်ဆုံးသွားခဲ့ကြပေမည်။
၁၂ ဤတွင်တစ်ဖန် အာဗြဟံ၏ပုံနမူနာကို သုံးသပ်ကြည့်ပါ။ သူ၏သက်တမ်းတွင် ဘုရားသခင့်ကတိတော်အားလုံး ပြည့်စုံလာရန် အကြောင်းမရှိသော်လည်း ၎င်းကတိတော်များအား ယုံကြည်မှုအပေါ် သူ၏ဘဝကိုတည်ဆောက်ခဲ့သည်။ သားဖြစ်သူဣဇာက် ကြီးပြင်းလာသည်ကို သူတွေ့မြင်ခဲ့၏။ သို့သော် အာဗြဟံ၏သားစဉ်မြေးဆက်သည် “ကောင်းကင်ကြယ်ကဲ့သို့လည်းကောင်း၊ သမုဒ္ဒရာသဲလုံးကဲ့သို့လည်းကောင်း” များ၏ဟု နှိုင်းယှဉ်နိုင်ရန် ရာစုနှစ်များစွာ ကြာမြင့်ရပေလိမ့်မည်။ (ကမ္ဘာဦး ၂၂:၁၇) သို့သော် အာဗြဟံသည် စိတ်နာခြင်း သို့မဟုတ် စိတ်ပျက်ခြင်း မရှိခဲ့ချေ။ သို့ဖြစ်၍ တမန်တော်ပေါလုက အာဗြဟံနှင့် အခြားဘိုးဘေးများအကြောင်း ဤသို့ပြောနိုင်ခဲ့သည်– “ယခုဆိုခဲ့ပြီးသောသူအပေါင်းတို့သည်၊ ကတိတော်နှင့်စပ်ဆိုင်သောအကျိုးကျေးဇူးကိုမခံရဘဲ၊ အဝေးကမြော်မြင်လျက်၊ စိတ်နှလုံးနှင့်ဖက်ယမ်းလျက်၊ မိမိတို့သည် မြေကြီးပေါ်မှာ တစ်ကျွန်းသူတစ်နိုင်ငံသား၊ ဧည့်သည် . . . ဖြစ်သည်ကို ထင်ရှားစွာဝန်ခံလျက်၊ ယုံကြည်ခြင်းစိတ်နှင့် သေလွန်ကြ၏။”—ဟေဗြဲ ၁၁:၁၃။
၁၃။ (က) ယနေ့ ခရစ်ယာန်များသည် “ဧည့်သည်” များနှင့် မည်သို့တူညီကြသနည်း။ (ခ) ယေဟောဝါသည် ဤအစီအစဉ်ကို အဘယ်ကြောင့် ဆုံးခန်းတိုင်စေတော်မူမည်နည်း။
၁၃ အာဗြဟံသည် “အဝေး” တွင်ပြည့်စုံမည့်ကတိတော်များကို အာရုံစိုက် အသက်ရှင်နိုင်ခဲ့လျှင် ဤကတိတော်များပြည့်စုံရန် အလွန်နီးကပ်သော ယခုအချိန်တွင် ကျွန်ုပ်တို့ သာ၍ပင် အာရုံစိုက်အသက်ရှင်သင့်သည်မဟုတ်ပေလော! အာဗြဟံနည်းတူ ကျွန်ုပ်တို့သည် စာတန့်စနစ်တွင် “ဧည့်သည်” များဖြစ်သည်ဟုယူမှတ်ပြီး ကိုယ့်အလိုလိုက်သည့် ဘဝပုံစံအတိုင်း အသက်ရှင်ခြင်းကို ငြင်းပယ်ကြမည်ဖြစ်သည်။ ဤ ‘ခပ်သိမ်းသောအမှုအရာတို့၏အဆုံး’ သည် နီးကပ်နေရုံမျှမဟုတ်ဘဲ ရောက်စေလိုကြမည်ကားမုချ။ (၁ ပေတရု ၄:၇) ကျွန်ုပ်တို့၌ ကျန်းမာရေးပြဿနာများရှိနေပေမည်။ သို့မဟုတ် စီးပွားရေးကျပ်တည်းမှုဖြင့် ဝန်ပိနေပေမည်။ သို့သော် ယေဟောဝါသည် ဝမ်းနည်းဖွယ်အခြေအနေများမှ ကျွန်ုပ်တို့ကိုကယ်တင်ရုံအတွက်သာမဟုတ် ကိုယ်တော်၏နာမတော် သန့်ရှင်းစင်ကြယ်ရေးအတွက် အဆုံးတိုင်စေတော်မူကြောင်း ကျွန်ုပ်တို့ သတိရကြရမည်။ (ယေဇကျေလ ၃၆:၂၃; မဿဲ ၆:၉၊ ၁၀) အဆုံးသည် ကျွန်ုပ်တို့အတွက် အဆင်ပြေသောအချိန်၌မဟုတ်ဘဲ ယေဟောဝါ၏ရည်ရွယ်တော်မူချက်များနှင့် အကိုက်ညီဆုံးသောအချိန်တွင် ရောက်လာရပေလိမ့်မည်။
၁၄။ ဘုရားသခင်၏စိတ်ရှည်မှုသည် ယနေ့ ခရစ်ယာန်များကို အဘယ်သို့အကျိုးပြုသနည်း။
၁၄ “လူအချို့တို့သည်၊ နှေးခြင်းကိုမှတ်သည်အတိုင်း၊ ထာဝရဘုရားသည် ကတိတော်အရာမှာ နှေးတော်မမူ။ ငါတို့တွင် အဘယ်သူမျှမပျက်စီးဘဲ၊ ရှိသမျှတို့သည် နောင်တရစေခြင်းငှာ အလိုတော်ရှိ၍၊ ငါတို့ကိုသည်းခံတော်မူ” ကြောင်းကိုလည်း သတိရပါ။ (၂ ပေတရု ၃:၉) ဘုရားသခင်သည် ခရစ်ယာန်အသင်းတော်သားများဖြစ်ကြသော ‘သင်တို့ကိုသည်းခံတော်မူ’ ကြောင်း သတိပြုပါ။ ကျွန်ုပ်တို့အထဲမှ အချို့သည် “အညစ်အကြေးနှင့်ကင်းစင်၍ အဘယ်အပြစ်မျှမပါဘဲ၊ ရှေ့တော်သို့ငြိမ်ဝပ်စွာရောက်မည်အကြောင်း” ပြုပြင်ပြောင်းလဲမှုများပြုလုပ်ရန် အချိန်ပိုလိုအပ်ကြောင်း ထင်ရှားသည်။ (၂ ပေတရု ၃:၁၄) သို့ဖြစ်၍ ဘုရားသခင်သည် ဤမျှစိတ်ရှည်ခဲ့သည့်အတွက် ကျွန်ုပ်တို့ ကျေးဇူးမတင်သင့်ပေလော။
အခက်အခဲများကြား ရွှင်လန်းနိုင်ခြင်း
၁၅။ ယေရှုသည် စမ်းသပ်မှုများကြုံတွေ့ရာတွင် ရွှင်လန်းမှုကို မည်သို့ဆက်ထိန်းထားနိုင်ခဲ့သနည်း၊ ကိုယ်တော့်ကို အတုယူခြင်းမှ ယနေ့ ခရစ်ယာန်များ မည်သို့အကျိုးခံစားရသနည်း။
၁၅ အာဗြဟံ၏ဘဝအသက်တာသည် ယနေ့ ခရစ်ယာန်များကို သင်ခန်းစာများစွာပေးသည်။ သူသည် ယုံကြည်ခြင်းကိုသာမက စိတ်ရှည်ခြင်း၊ သတိရှိခြင်း၊ ရဲစွမ်းသတ္တိနှင့် ကိုယ်ကျိုးမရှာသောမေတ္တာကို ပြခဲ့သည်။ သူ၏ဘဝတွင် ယေဟောဝါ၏ဝတ်ပြုရေးကို ဦးစားထားခဲ့သည်။ သို့သော် ကျွန်ုပ်တို့သတိရကြရမည်ကား ကျွန်ုပ်တို့ အတုယူစရာ သာလွန်ထူးမြတ်သောပုံနမူနာကို ယေရှုခရစ် ချမှတ်ခဲ့၏။ ကိုယ်တော်သည်လည်း စုံစမ်းမှုနှင့် စမ်းသပ်မှုအမျိုးမျိုးကို ကြုံတွေ့ခဲ့ရသော်လည်း ကိုယ်တော်၏ရွှင်လန်းမှု တစ်ခါမျှမပျောက်ဆုံးခဲ့ချေ။ အဘယ်ကြောင့်နည်း။ အကြောင်းမှာ မိမိရှေ့၌ရှိသောမျှော်လင့်ချက်ကို ကိုယ်တော်အမြဲအာရုံစိုက်သောကြောင့်ဖြစ်၏။ (ဟေဗြဲ ၁၂:၂၊ ၃) သို့နှင့် ပေါလု ဤသို့ဆုတောင်းခဲ့သည်– “ယေရှုခရစ်၏အလိုတော်အတိုင်း အချင်းချင်းစိတ်တညီတညွတ်တည်းရှိကြမည်အကြောင်း သည်းခံခြင်း၊ သက်သာခြင်း၏အရှင်၊ ဘုရားသခင်သည် ကယ်မသနားတော်မူပါစေသော။” (ရောမ ၁၅:၆) ကျွန်ုပ်တို့ရှေ့တွင် အခက်အခဲများကို စာတန်ချထားသော်လည်း တော်မှန်သောစိတ်သဘောထားဖြင့် ကျွန်ုပ်တို့သည် ရွှင်လန်းနိုင်ကြ၏။
၁၆။ ကျွန်ုပ်တို့မခံမရပ်နိုင်အောင် ပြဿနာများနေလျှင် မည်သို့ပြုလုပ်နိုင်သနည်း။
၁၆ မခံမရပ်နိုင်အောင် ပြဿနာများသောအခါ ယေဟောဝါသည် အာဗြဟံကို ချစ်သကဲ့သို့ သင့်ကိုလည်း ချစ်တော်မူကြောင်း သတိရပါလေ။ ကိုယ်တော်သည် သင့်ကို အောင်မြင်စေလို၏။ (ဖိလိပ္ပိ ၁:၆) ယေဟောဝါကို အပြည့်အဝယုံကြည်ကိုးစားပါ၊ “သင်တို့မခံနိုင်သောစုံစမ်းနှောင့်ယှက်ခြင်းကို သင်တို့၌ရောက်စိမ့်သောငှာ အခွင့်ပေးတော်မမူ။ သင်တို့သည် ခံနိုင်မည်အကြောင်း စုံစမ်းနှောင့်ယှက်ခြင်းအရာနှင့်တကွ၊ ထွက်မြောက်သောလမ်းကိုလည်း စီရင်ပြုပြင်တော်မူလိမ့်မည်” ဖြစ်ကြောင်း ယုံကြည်စိတ်ချပါ။ (၁ ကောရိန္သု ၁၀:၁၃) ဘုရားသခင့်နှုတ်မြွက်စကားတော်ကို နေ့စဉ်ဖတ်ရှုသောအကျင့်ရှိစေပါ။ (ဆာလံ ၁:၂) ဆုတောင်းခြင်း၌စွဲမြဲ၍ ခံနိုင်ရည်ရှိဖို့ သင့်အားကူညီပေးရန် ယေဟောဝါထံတောင်းဆိုပါ။ (ဖိလိပ္ပိ ၄:၆) ကိုယ်တော်သည် ‘ဆုတောင်းသောသူတို့အား သန့်ရှင်းသောဝိညာဉ်တော်ကိုပေး’ တော်မူလိမ့်မည်။ (လုကာ ၁၁:၁၃) သင့်ကို ဝိညာဉ်ရေးဘက် ယေဟောဝါထောက်ပံ့ကူညီပေးရန် စီစဉ်ပေးထားသော သမ္မာကျမ်းစာအခြေခံသည့် ကျွန်ုပ်တို့၏စာပေစာတမ်းများမှ အကျိုးအပြည့်အဝခံယူပါ။ ထို့အပြင် ညီအစ်ကိုများအသင်းအပင်း၏ ကူညီထောက်ပံ့မှုကို ရှာယူပါ။ (၁ ပေတရု ၂:၁၇) ခရစ်ယာန်အစည်းအဝေးများကို မှန်မှန်တက်ရောက်ပါ၊ အကြောင်းမှာ ထိုတွင် ခံနိုင်ရည်ရှိရန် သင်လိုအပ်သော အားပေးမှုကို ရရှိပါလိမ့်မည်။ (ဟေဗြဲ ၁၀:၂၄၊ ၂၅) သင့်ခံနိုင်ရည်သည် ဘုရားသခင်၏မျက်မှောက်တော်တွင် မျက်နှာသာရအခြေအနေကိုဖြစ်စေပြီး သင်၏တည်ကြည်မှုက ကိုယ်တော်၏စိတ်တော်ကိုရွှင်ပြုံးစေနိုင်ကြောင်း ယုံကြည်စိတ်ချမှု၌ ဝမ်းမြောက်ပါလေ။—သု. ၂၇:၁၁; ရောမ ၅:၃-၅။
၁၇။ ခရစ်ယာန်များသည် အဘယ်ကြောင့်စိတ်ပျက်အားလျော့ပြီး အရှုံးမပေးကြသနည်း။
၁၇ ဘုရားသခင်၏ “အဆွေ” အဖြစ် အာဗြဟံကို ကိုယ်တော်ချစ်တော်မူခဲ့၏။ (ယာကုပ် ၂:၂၃) သို့တိုင် အာဗြဟံ၏ဘဝအသက်တာသည် ဖိစီးမှုများသော စမ်းသပ်မှုအမျိုးမျိုး၊ ဆင်းရဲခြင်းအမျိုးမျိုးနှင့် ပြည့်နှက်ခဲ့၏။ သို့ဖြစ်၍ ဤဆိုးညစ်သော “နောက်ဆုံးအချိန်” တွင် ခရစ်ယာန်များလည်း ထပ်တူကြုံတွေ့ရမည်ဟု မျှော်လင့်နိုင်သည်။ အမှန်မှာ သမ္မာကျမ်းစာက “ဆိုးညစ်သောသူ၊ လှည့်ဖြားသောသူတို့မူကား . . . ဆိုးညစ်ခြင်း၌ တရွေ့ရွေ့တိုးပွားကြလိမ့်မည်” ဟု ကျွန်ုပ်တို့ကို သတိပေးထားသည်။ (၂ တိမောသေ ၃:၁၊ ၁၃) စိတ်ပျက်အားလျော့ပြီး အရှုံးပေးမည့်အစား ကျွန်ုပ်တို့ရင်ဆိုင်နေကြရသော ဖိစီးမှုများက စာတန့်စနစ်ဆိုး အဆုံးတိုင်လုနီးပြီဖြစ်ကြောင်း သက်သေထူသည်ကို သိမှတ်ပါ။ သို့သော် ယေရှုက “အကြင်သူသည် အဆုံးတိုင်အောင်တည်ကြည်၏၊ ထိုသူသည် ကယ်တင်ခြင်းသို့ရောက်လိမ့်မည်” ဟူ၍ ကျွန်ုပ်တို့ကိုသတိရစေသည်။ (မဿဲ ၂၄:၁၃) သို့ဖြစ်၍ ‘အားမလျော့၊ စိတ်မပျက်ဘဲ ကောင်းသောအကျင့်ကိုကျင့်ကြပါစို့။’ အာဗြဟံကို အတုယူ၍ “ယုံကြည်ခြင်းနှင့် စိတ်ရှည်ခြင်းဖြင့် ကတိတော်တို့ကို အမွေခံရသောသူတို့” တွင် တစ်ဦးပါဝင်ပါလေ။—ဟေဗြဲ ၆:၁၂၊ ကဘ။
သင်သတိပြုမိသလော
• ယနေ့ ယေဟောဝါ၏လူတို့သည် စမ်းသပ်မှုများနှင့် ဆင်းရဲမှုများခံရမည်ဟု အဘယ်ကြောင့်မျှော်လင့်သင့်သနည်း။
• စာတန်သည် တိုက်ရိုက်တိုက်ခိုက်မှုများကို အဘယ်နည်းများဖြင့် အသုံးပြုမည်နည်း။
• ခရစ်ယာန်ချင်း စိတ်သဘောကွဲလွဲရာတွင် မည်သို့ဖြေရှင်းနိုင်သနည်း။
• မာန်မာနနှင့် ဘဝင်မြင့်ခြင်းက အခက်အခဲများ မည်သို့ဖြစ်ပေါ်စေနိုင်သနည်း။
• ဘုရားသခင့်ကတိတော်များ ပြည့်စုံခြင်းကို စောင့်မျှော်ရာတွင် အာဗြဟံသည် အဘယ်နည်းဖြင့် ပုံသက်သေကောင်းချမှတ်ပေးခဲ့သနည်း။
[လေ့လာရန်မေးခွန်းများ]
[စာမျက်နှာ ၂၆ ပါ ရုပ်ပုံ]
ခရစ်ယာန်လူငယ်များစွာသည် ရွယ်တူချင်းတို့၏ လှောင်ပြောင်သရော်မှုကိုခံကြရခြင်းဖြင့် နှိပ်စက်ညှဉ်းပန်းခံနေကြရ
[စာမျက်နှာ ၂၉ ပါ ရုပ်ပုံ]
အာဗြဟံခေတ်တွင် ဘုရားသခင့်ကတိတော်များ ပြည့်စုံခြင်းသည် “အဝေး” တွင်ရှိနေသေးသော်လည်း သူ၏ဘဝအသက်တာကို ၎င်းတို့အပေါ် သူတည်ဆောက်ခဲ့