သင်​မှတ်မိ​သလော

မကြာသေးမီ​က​ထုတ်ဝေ​ခဲ့​သော ကင်းမျှော်စင် စာစောင်​များ​ကို ဖတ်ရှု​ရ​၍ တန်ဖိုး​ထား​လေးမြတ်​ခဲ့​ပါသလော။ သို့​ဖြစ်​လျှင် အောက်ပါ​မေးခွန်းများကို သင်​ဖြေဆို​နိုင်၊ မဖြေ​ဆိုနိုင် စမ်း​ကြည့်​ပါ–

• ယောဘ​အခန်းကြီး ၃၈ တွင်​ဖော်ပြ​ထားသော မေးခွန်းများကို ယနေ့​ပင်​လျှင် အဘယ်ကြောင့်​ဆင်ခြင်​သုံးသပ်​သင့်​သနည်း။

ဘုရားသခင်​အာရုံစိုက်​စေ​ခဲ့​သော အံ့ဖွယ်​အမှုတော်များ​စွာ​ကို မျက်မှောက်ခေတ်​သိပ္ပံ​ပညာရှင်​များ​ပင် အပြည့်အဝ​နားမလည်​နိုင်​ကြ​ချေ။ ယင်း​တို့​မှာ ဆွဲငင်အား​သည် ကမ္ဘာ​မြေကြီးကို ၎င်း​၏​ပတ်​လမ်းအတိုင်း​ဆက်​တည်ရှိ​နေခြင်း၊ အလင်း​သည် အတိအကျ​အဘယ်အရာ​ဖြစ်​ခြင်း၊ မကုန်ခန်း​နိုင်သော ဆီးနှင်း​ပွင့်​အမျိုးမျိုး​ရှိ​ခြင်း၊ မိုး​စက်​မိုး​ပေါက်​များ မည်သို့​မည်​ပုံ​ဖြစ်ပေါ်​လာ​ခြင်း၊ မိုးကြိုး​မုန်တိုင်း​များ​တွင် စွမ်းအင်​ပတ်သက်​နေခြင်း​တို့​ဖြစ်သည်။—၄/၁၅၊ စာမျက်နှာ ၄-၁၁။

• အပျက်​သဘောထားများကို ကိုင်တွယ်​ဖြေရှင်းရန် အဘယ်​ကျမ်းစာ​ပုံ​နမူနာ​များ​က ကျွန်ုပ်​တို့ကို ကူညီပေး​နိုင်​သနည်း။

အာသပ်၊ ဗာရုတ်​နှင့် နောမိ​တို့သည် စိတ်ဓာတ်ကျ​ချိန် သို့​မဟုတ် အခြား​အပျက်သဘောထား​များ​ခံစားရ​ချိန်​ရှိခဲ့​ကြ​ပြီး ဤသို့​သော​အခြေအနေ​များ​ကို သူတို့​အောင်မြင်စွာ ကိုင်တွယ်​ဖြေရှင်း​ခဲ့​ခြင်း ကျမ်း​မှတ်တမ်းက ကျွန်ုပ်​တို့ကို ကူညီပေး​နိုင်​သည်။—၄/၁၅၊ စာမျက်နှာ ၂၂-၄။

• ခရစ်ယာန်​မုဆိုးမများ​ကို ကူညီ​ရန် လက်တွေ့ကျ​နည်း​အချို့​ကား အဘယ်နည်း။

မိတ်ဆွေများ​သည် ကြင်နာ​ဖြူစင်​သန့်ရှင်း​စွာ ကူညီပေး​နိုင်​ကြသည်။ အမှန်တကယ်​လိုအပ်​လျှင် မိသားစုတွင်​ပါဝင်သူ​များ သို့​မဟုတ် အခြား​သူများ​သည် ငွေကြေး သို့​မဟုတ် ပစ္စည်းဥစ္စာ​များ ပေးကမ်း​နိုင်​ကြ​ပေမည်။ ခရစ်ယာန်​ချင်း​များ​က​လည်း မေတ္တာ​ရှိ​ရှိ​ခင်မင်မှု​ပြ​ခြင်း​ဖြင့်​လည်းကောင်း၊ ဝိညာဉ်​ရေး​အရ ကူညီ​ထောက်မမှု​နှင့် နှစ်သိမ့်မှု​ပေးခြင်း​ဖြင့်​လည်းကောင်း ကူညီပေး​နိုင်​ပါ​သည်။—၅/၁၊ စာမျက်နှာ ၅-၇။

• ၁ ကောရိန္သု ၇:၃၉ ပါ​အကြံပြုချက်​အရ “သခင်​ဘုရား​၌​သာ” လက်ထပ်​ရန် အဘယ်ကြောင့်​အရေးကြီး​သနည်း။

မယုံကြည်​သူကို​လက်ထပ်​ခြင်း​သည် ဘေးရောက်​စေ​လေ့​ရှိကြောင်း တွေ့ရှိ​ခဲ့​ကြ​ရပြီ။ ထို့​ပြင် ဘုရားသခင်​ရေးရာ ဤ​အကြံပြုချက်ကို လိုက်လျှောက်ခြင်း​သည် ယေဟောဝါ​ဘုရားသခင်​အပေါ် တည်ကြည်​သည့်​ကိစ္စ​ဖြစ်သည်။ သမ္မာကျမ်းစာ​ကို ကျွန်ုပ်​တို့​ကျင့်သုံး​သောအခါ ကျွန်ုပ်​တို့၏​နှလုံး​သည် ကျွန်ုပ်​တို့ကို အပြစ်မတင်​ချေ။ (၁ ယောဟန် ၃:၂၁၊ ၂၂)—၅/၁၅၊ စာမျက်နှာ ၂၀-၁။

• ယေဟောဝါ​သည် ကျွန်ုပ်​တို့၏​အပြစ်​များ​ကို ခွင့်လွှတ်​နိုင်​သူ​ဖြစ်​ရာ ခရစ်ယာန်​များသည် အသင်းတော်​ရှိ​အသက်ကြီးသူ​များ​ထံ ကြီး​လေး​သော​အပြစ်​များ​ကို အဘယ်ကြောင့်​ဝန်ခံ​ရ​ကြ​သနည်း။

မှန်​၏၊ ခရစ်ယာန်​တစ်ဦး​သည် ကြီး​လေး​သော​အပြစ်ကို ယေဟောဝါ​ခွင့်လွှတ်​ပါ​ရန် အသနားခံ​ဖို့​လို​သည်။ (၂ ဓမ္မ​ရာဇဝင် ၁၂:၁၃) သို့သော် ပရောဖက်​နာသန်​သည် ဒါဝိဒ်​ကို ကူညီပေး​ခဲ့​သကဲ့သို့ အသင်းတော်​ရှိ​ရင့်ကျက်သော အသက်ကြီးသူ​များသည် နောင်တ​ရသော​အပြစ်ပြု​သူများကို ကူညီပေး​နိုင်၏။ အကြီးအကဲ​များ​ထံ​သွားခြင်း​သည် ယာကုပ် ၅:၁၄၊ ၁၅ ပါ​ညွှန်ကြားချက်​နှင့်​အညီ​ဖြစ်သည်။—၆/၁၊ စာမျက်နှာ ၃၁။

• ဆင်းရဲ​ချို့တဲ့​နေသော မိဘမဲ့​များနှင့် မုဆိုးမများ​ကို ကျွန်ုပ်​တို့​ကြည့်ရှု​သင့်​ကြောင်း အဘယ်​အထောက်အထား​ရှိ​သနည်း။

ရှေး​ဟေဗြဲ​လူမျိုးများ​နှင့် အစောပိုင်း​ခရစ်ယာန်​များ​၏ စစ်မှန်သော​ဝတ်ပြုမှု​၏​အမှတ်အသား​သည် ဤ​ကဲ့သို့​ကြည့်ရှု​ပြုစု​ခြင်း​ပါဝင်​ကြောင်း သမိုင်းဝင်​မှတ်တမ်းက ဖော်ပြ​သည်။ (ထွက်မြောက်ရာ ၂၂:၂၂၊ ၂၃; ဂလာတိ ၂:၉၊ ၁၀; ယာကုပ် ၁:၂၇) ဆင်းရဲ​ချို့တဲ့သော​မုဆိုးမများ​ကို ကြည့်ရှု​ပြုစု​ရန် ခရစ်ယာန်​များ​အား ရှင်းလင်း​သော​ညွှန်ကြားချက်​များ သမ္မာကျမ်းစာ​တွင် တမန်​တော်​ပေါလု​ဖော်ပြ​ခဲ့​၏။ (၁ တိမောသေ ၅:၃-၁၆)—၆/၁၅၊ စာမျက်နှာ ၉-၁၁။

• ပျော်ရွှင်​ပြီး အဓိပ္ပာယ်​ရှိသော​အသက်တာ​အတွက် သော့ချက်​ကား​အဘယ်နည်း။

ကျွန်ုပ်​တို့၏​ကောင်းကင်​ခမည်းတော် ယေဟောဝါ​နှင့် လျောက်ပတ်​သော​ဆက်ဆံ​ရေး​ကို ပြုစု​ပျိုးထောင်​၍ ထိန်းသိမ်း​ထား​ရမည်။ ထိုသို့​ပြုလုပ်​ရာ​၌ ကျမ်းစာ​လေ့လာမှု​သည် အရေးပါသော​အထောက်အကူ​တစ်ခု​ဖြစ်သည်။—၇/၁၊ စာမျက်နှာ ၄-၅။

• သေ​ပြီး​နောက် အသက်ဆက်ရှင်​သော မသေနိုင်​သည့်​ဝိညာဉ် [စပီးရစ်] လူတိုင်း​၌​ရှိသလော။

လူ​အချို့​သည် ဝိညာဉ် [စိုးလ်] မဟုတ်သော ဝိညာဉ် [စပီးရစ်] သည်​မသေနိုင်​ဟု ယုံကြည်​ကြသော်လည်း သမ္မာကျမ်းစာ​က အဆိုပါ​ယုံကြည်ချက်ကို အားမပေး​ချေ။ လူတစ်ဦး​သေလွန်​သောအခါ မြေမှုန့်​သို့​ပြန်သွား​၍ သက်မဲ့​အဖြစ်သို့ ပြန်ရောက်​သွား​သည်​ဟု ကျမ်းစာ​က​ဖော်ပြ​၏။ သို့သော် ရှင်ပြန်ထမြောက်ခြင်း​အားဖြင့် အနာဂတ်​အသက်​ရရှိရန် ဘုရားသခင်​အပေါ်​တည်မှီ​သောကြောင့် ဘုရားသခင်​သာ​လျှင် အသက်​ပြန်ပေး​နိုင်စွမ်း​ရှိသည်။ (ဒေ. ၁၂:၇)—၇/၁၅၊ စာမျက်နှာ ၃-၆။

• ဒုရ​လွင်ပြင်​၌ ဟေဗြဲ​လူ​သုံးဦး စမ်းသပ်ခံ​ခဲ့​ရချိန်တွင် ဒံယေလ​သည် အဘယ်​မှာ​ရှိ​သနည်း။

သမ္မာကျမ်းစာ​က မဖော်​ပြ​ထား​ချေ။ ဒံယေလ​သည် သူ၏​ရာထူး​အဆင့်​ကြောင့် ထို​နေရာသို့ သွား​စ​ရာ​မလို​အပ်​ခဲ့​ခြင်း​ဖြစ်​ပေမည်၊ သို့​မဟုတ် ရပ်​ဝေး​တစ်​နေရာ​ရာ​တွင် အမှုထမ်း​နေရ​ခြင်း​ဖြစ်​ပေမည်။ သို့သော် သူသည် အလျှော့ပေး​လိုက်လျော​မည်​မဟုတ်ဘဲ ယေဟောဝါ​အပေါ် တည်ကြည်​ခဲ့​ကြောင်း ကျွန်ုပ်​တို့​ယုံကြည်​စိတ်ချ​နိုင်​ပါ​သည်။—၈/၁၊ စာမျက်နှာ ၃၁။