အာဗြဟံ၏ ယုံကြည်ခြင်းမျိုးရှိပါလေ!
အာဗြဟံ၏ ယုံကြည်ခြင်းမျိုးရှိပါလေ!
“ယုံကြည်ခြင်းရှိသောသူသည် အာဗြဟံ၏သားဖြစ်သည်။”—ဂလာတိ ၃:၇။
၁။ ခါနာန်တွင် ရင်ဆိုင်ရသော စမ်းသပ်ခြင်းအသစ်တစ်မျိုးကို အာဗြံ မည်သို့ကိုင်တွယ်ဖြေရှင်းခဲ့သနည်း။
အာဗြံသည် ယေဟောဝါ၏အမိန့်တော်ကို နာခံကာ ဥရမြို့၌ စည်းစိမ်နှင့်နေထိုင်ခဲ့သောဘဝကို စွန့်လွှတ်ခဲ့၏။ နောက်ပိုင်းနှစ်များ၌ သူတွေ့ကြုံခဲ့ရသောအဆင်မပြေမှုများသည် အီဂျစ်ပြည်၌ သူရင်ဆိုင်ခဲ့ရသော ယုံကြည်ခြင်းစမ်းသပ်မှု၏ နိဒါန်းမျှသာဖြစ်သည်။ သမ္မာကျမ်းစာမှတ်တမ်းက ဤသို့ဆိုသည်– “ထိုနောက် ခါနာန်ပြည်၌ အစာခေါင်းပါးခြင်းဖြစ်၏။” မိမိ၏အခြေအနေကြောင့် အာဗြံသည် စိတ်နာကြည်းသွားရန် အလွန်လွယ်ကူမည်တကား! ယင်းအစား မိသားစုကိုကျွေးမွေးပြုစုရန် လက်တွေ့ကျကျပြုမူဆောင်ရွက်ခဲ့သည်။ “အလွန်အစာခေါင်းပါးသောကြောင့် အာဗြံသည် အီဂျစ်ပြည်၌တည်းခိုခြင်းငှာ သွားလေ၏။” အာဗြံ၏ကြီးမားလှသော အိမ်ထောင်စုသည် အီဂျစ်ပြည်တွင် မထင်မရှားဖြစ်လိမ့်မည်ကားမဟုတ်။ ယေဟောဝါသည် မိမိ၏ကတိတော်အတိုင်း အာဗြံကို ဘေးအန္တရာယ်မှ ကာကွယ်ပေးလိမ့်မည်လော။—ကမ္ဘာဦး ၁၂:၁၀; ထွက်မြောက်ရာ ၁၆:၂၊ ၃။
၂၊ ၃။ (က) အာဗြံ၏ဇနီးသည် မည်သူမည်ဝါဖြစ်ကြောင်း အမှန်တရားကို အဘယ်ကြောင့်ဖုံးကွယ်ခဲ့သနည်း။ (ခ) ထိုအခြေအနေကိုတုံ့ပြန်ရာ၌ အာဗြံသည် မိမိ၏ဇနီးနှင့် မည်သို့ဆက်ဆံခဲ့သနည်း။
၂ ကမ္ဘာဦး ၁၂:၁၁-၁၃ တွင် ကျွန်ုပ်တို့ ဤသို့ဖတ်ရသည်– “အီဂျစ်ပြည်နှင့်နီးသောအခါ မိမိမယားစာရဲကို ‘သင်သည် အဆင်းလှသောမိန်းမဖြစ်သည်ကို ငါသိ၏။ အီဂျစ်လူတို့သည် သင့်ကိုမြင်သောအခါ ဤမိန်းမသည် “သူ၏မယားဖြစ်၏” ဟုဆိုလျက် ငါ့ကိုသတ်၍ သင့်ကိုအသက်ချမ်းသာပေးလိမ့်မည်။ သို့ဖြစ်၍ သင်သည် ငါ့နှမဖြစ်ကြောင်းကို [“ကျေးဇူးပြု၍၊” ကဘ] ပြောပါလော့။ သို့ပြောလျှင် သင့်အတွက် [“နှင့်၊” ကဘ] ငါကောင်းစားလိမ့်မည်။ သင်၏အကြောင်းကြောင့် ငါ့အသက်ရှင်ရလိမ့်မည်’ ဟုဆို၏။” စာရဲသည် အသက် ၆၅ နှစ်ကျော်ပြီဖြစ်သော်လည်း ထူးထူးခြားခြားလှပဆဲဖြစ်ခဲ့သည်။ ယင်းက အာဗြံအတွက် အသက်အန္တရာယ်ရှိစေ၏။ * (ကမ္ဘာဦး ၁၂:၄၊ ၅; ၁၇:၁၇) သာ၍အရေးကြီးသည်ကား အာဗြံ၏အမျိုးအနွယ်အားဖြင့် လူမျိုးအပေါင်းတို့သည် ကောင်းချီးမင်္ဂလာခံရကြလိမ့်မည်ဟု ယေဟောဝါမိန့်တော်မူခဲ့သောကြောင့် ကိုယ်တော်၏အကျိုးစီးပွားသည် ရင်လေးဖွယ်ရာဖြစ်နေ၏။ (ကမ္ဘာဦး ၁၂:၂၊ ၃၊ ၇) အာဗြံ၌ သားသမီးမထွန်းကားသေးသောကြောင့် သူဆက်အသက်ရှင်ရန် အရေးကြီးသည်။
၃ စာရဲသည် အာဗြံ၏ညီမဖြစ်သည်ဟုပြောဖို့ အစောပိုင်းက သူတို့သဘောတူထားကြသည့် အကြံအစည်ကိုအသုံးပြုရန် သူ၏ဇနီးအား မှာကြားလေသည်။ အာဗြံ၌ ဖခင်ကြီးစိုးခွင့်အာဏာရှိထားသော်လည်း မိမိ၏အခွင့်အရာကို အလွဲသုံးစားမပြုဘဲ ဇနီး၏ပူးပေါင်းဆောင်ရွက်မှုနှင့် ကူညီထောက်ပံ့မှုကိုတောင်းဆိုခဲ့သည်။ (ကမ္ဘာဦး ၁၂:၁၁-၁၃; ၂၀:၁၃) ဤနည်းဖြင့် အာဗြံသည် မေတ္တာပါပါဦးစီးဖို့ရန် ခင်ပွန်းသည်များအား ပုံနမူနာကောင်းတင်ပြပေးပြီး စာရဲသည်လည်း သူ၏လက်အောက်ခံမှုဖြင့် ယနေ့ ဇနီးများအတွက် ပုံသက်သေဖြစ်လေသည်။—ဧဖက် ၅:၂၃-၂၈; ကောလောသဲ ၄:၆။
၄။ ညီအစ်ကိုများ၏ အသက်အန္တရာယ်ရှိသောအခါ ယနေ့ ဘုရားသခင်၏တည်ကြည်သောကျေးကျွန်တို့သည် မည်သို့ပြုမူသင့်သနည်း။
၄ စာရဲသည် အာဗြံ၏ ဖအေတူမအေကွဲညီမ အမှန်ဖြစ်သောကြောင့် သူ၏ညီမဟူ၍ ပြောနိုင်ပါသည်။ (ကမ္ဘာဦး ၂၀:၁၂) ထိုထက်ကား မသိထိုက်သူတို့ကို အတိအလင်းဖော်ပြပြောဆိုရန် သူ၌ တာဝန်မရှိချေ။ (မဿဲ ၇:၆) ဘုရားသခင်အားတည်ကြည်သော မျက်မှောက်ခေတ်ကျေးကျွန်တို့သည် ရိုးသားရမည်ဟူသော သမ္မာကျမ်းစာပညတ်ကို လိုက်နာကြ၏။ (ဟေဗြဲ ၁၃:၁၈) ဥပမာ၊ တရားရုံးတွင် အမှုစစ်ဆေးခံရချိန်၌ ကျမ်းကျိန်ပြီးနောက် သူတို့ဘယ်တော့မျှ မုသားပြောဆိုကြမည်မဟုတ်ချေ။ သို့သော် နှိပ်စက်ညှဉ်းပန်းမှုခံရချိန် သို့မဟုတ် ပြည်တွင်းဘေးကဲ့သို့သောအချိန်မျိုး၌ သူတို့ညီအစ်ကိုများ၏ကာယရေး သို့မဟုတ် ဝိညာဉ်ရေးဘက် အန္တရာယ်ကြုံလာရသောအခါ သူတို့သည် “မြွေကဲ့သို့လိမ္မာလျက်၊ ချိုးငှက်ကဲ့သို့ အဆိပ်ကင်းလျက်ရှိကြ” ရမည်ဟူသည့် ယေရှု၏ဆုံးမစကားကို လိုက်လျှောက်ကြ၏။—မဿဲ ၁၀:၁၆; ကင်းမျှော်စင် ၁၉၉၆ နိုဝင်ဘာ ၁၊ စာမျက်နှာ ၁၈၊ အပိုဒ် ၁၉ ရှု။
၅။ စာရဲသည် အာဗြံတောင်းဆိုသည်အတိုင်းပြုရန် အဘယ်ကြောင့် တလိုတလားရှိခဲ့သနည်း။
၅ အာဗြံ၏တောင်းဆိုချက်ကို စာရဲ မည်သို့တုံ့ပြန်ခဲ့သနည်း။ တမန်တော်ပေတရုက စာရဲကဲ့သို့သောအမျိုးသမီးများအား “ဘုရားသခင်ကိုကိုးစား” သူဟုဖော်ပြသည်။ သို့ဖြစ်၍ စာရဲသည် ဝိညာဉ်ရေးဆိုင်ရာအရေးကိစ္စများကို သဘောပေါက်နားလည်နိုင်ခဲ့သည်။ ထို့ပြင် စာရဲသည် သူ၏ခင်ပွန်းကို ချစ်ခင်လေးစားသောကြောင့် “ခင်ပွန်း၏အုပ်စိုးခြင်းကို ဝန်ခံ” ရန်ရွေးချယ်ပြီး သူ၏အိမ်ထောင်သည်အဖြစ်ကို လျှို့ဝှက်ထားခဲ့သည်။ (၁ ပေတရု ၃:၅၊ ၆) ထိုသို့ပြုခြင်းက သူ့အတွက် အန္တရာယ်အမှန်ရှိစေသည်။ “အာဗြံသည် အဲဂုတ္တုပြည်သို့ရောက်သောအခါ သူ၏မယားသည် အလွန်အဆင်းလှသည်ကို အဲဂုတ္တုလူတို့သည်မြင်ကြ၏။ ဖာရောဘုရင်၏ မှူးတော်မတ်တော်တို့လည်းမြင်၍ ရှေ့တော်၌ချီးမွမ်းပြီးလျှင် နန်းတော်သို့သွင်းရကြ၏။”—ကမ္ဘာဦး ၁၂:၁၄၊ ၁၅။
ယေဟောဝါ၏ကယ်နုတ်ခြင်း
၆၊ ၇။ အဘယ်စိတ်ပူပန်စရာအခြေအနေမျိုးတွင် အာဗြံနှင့် စာရဲတို့ ရောက်ခဲ့ကြရသနည်း၊ စာရဲကို ယေဟောဝါ မည်သို့ကယ်နုတ်တော်မူသနည်း။
၆ ယင်းသည် အာဗြံနှင့် စာရဲတို့အတွက် တကယ်စိတ်ပူပန်စရာဖြစ်ခဲ့မည်တကား! စာရဲသည် သိမ်းပိုက်ခံရစရာရှိသည်။ ထိုထက်ကား စာရဲ၏အိမ်ထောင်သည်အဖြစ်ကို အမှန်မသိသဖြင့် ဖာရောသည် အာဗြံအား လက်ဆောင်များအလျှံပယ်ပေးခဲ့ရာ “သူသည် သိုး၊ နွား၊ မြည်းထီး၊ မြည်းမ၊ ကျွန်ယောက်ျား၊ ကျွန်မိန်းမ၊ ကုလားအုတ်များနှင့်ကြွယ်ဝ” လာလေသည်။ * (ကမ္ဘာဦး ၁၂:၁၆) ဤလက်ဆောင်များကို အာဗြံ တကယ်စက်ဆုပ်ရွံရှာခဲ့မည်တကား! အခြေအနေမှာ အလွန်ဆိုးရွားနေဟန်ရှိသော်လည်း ယေဟောဝါသည် အာဗြံကိုမစွန့်ခဲ့သေးပါ။
၇ “ထာဝရဘုရားသည် အာဗြံ၏မယားစာရဲအတွက်ကြောင့်၊ ဖာရောဘုရင်မှစ၍ နန်းတော်သားတို့ကို ကြီးသောဘေးဒဏ်ဖြင့်ဆုံးမတော်မူ၏။” (ကမ္ဘာဦး ၁၂:၁၇) ဖော်ပြမထားသောနည်းတစ်နည်းဖြင့် ဤ “ဘေးဒဏ်များ” ဖြစ်ခဲ့ရသည့်အကြောင်းရင်းကို ဖာရော သိရှိခဲ့သည်။ ချက်ချင်းပင် သူဤသို့တုံ့ပြန်ခဲ့သည်– “ဖာရောဘုရင်သည်လည်း အာဗြံကိုခေါ်၍ ‘သင်သည် ငါ၌ပြုသောအမှုကား အဘယ်သို့နည်း။ သူသည် သင်၏မယားဖြစ်ကြောင်းကို ငါ့အားအဘယ်ကြောင့်မပြောသနည်း။ ငါသည် သူ့ကိုသိမ်းပိုက်စေခြင်းငှာ “သူသည်ငါ့နှမဖြစ်သည်” ဟု အဘယ်ကြောင့်ဆိုသနည်း။ သင်၏မယားကို ယခုယူ၍သွားလော့’ ဟုအမိန့်ရှိ၏။ ထိုသို့ အာဗြံအမှုကိုစီရင်၍ မိမိလူတို့အားမှာထားသဖြင့် သူတို့သည် အာဗြံ၌ရှိသမျှသောဥစ္စာနှင့်တကွ သမီးမောင်နှံတို့ကိုလွှတ်လိုက်ကြ၏။”—ကမ္ဘာဦး ၁၂:၁၈-၂၀; ဆာလံ ၁၀၅:၁၄၊ ၁၅။
၈။ အဘယ်ကာကွယ်စောင့်ရှောက်မှုမျိုးကို ယနေ့ ခရစ်ယာန်များအား ပေးမည်ဟု ယေဟောဝါကတိပြုတော်မူသနည်း။
၈ ယနေ့ ယေဟောဝါသည် သေခြင်း၊ ရာဇဝတ်မှု၊ အစာငတ်မွတ်ခေါင်းပါးမှု သို့မဟုတ် သဘာဝဘေးဒဏ်တို့မှ ကျွန်ုပ်တို့ကို ကာကွယ်ပေးမည်ဟု အာမ,မခံထားချေ။ သို့သော် ကျွန်ုပ်တို့၏ဝိညာဉ်ရေးကို အန္တရာယ်ရှိစေနိုင်သည့်အရာများမှ ကျွန်ုပ်တို့ကို ယေဟောဝါ အမြဲတစေကာကွယ်ပေးမည်ဟူ၍ကား ကတိထားတော်မူ၏။ (ဆာလံ ၉၁:၁-၄) ကိုယ်တော်သည် အဓိကအနေဖြင့် မိမိ၏နှုတ်မြွက်စကားတော်နှင့် ‘သစ္စာနှင့်သတိပညာရှိကျေးကျွန်’ မှတစ်ဆင့် အချိန်တန်သတိပေးချက်များပေးခြင်းဖြင့် ထိုသို့ပြုတော်မူသည်။ (မဿဲ ၂၄:၄၅) နှိပ်စက်ညှဉ်းပန်းမှုခံရ၍ သေခြင်း၏ခြိမ်းခြောက်မှုနှင့်ပတ်သက်၍ကော အသို့နည်း။ တစ်ဦးချင်းစီအနေနှင့် သေဆုံးသွားရန် ဘုရားသခင်ခွင့်ပြုမည်ဖြစ်သော်လည်း ကိုယ်တော်၏လူမျိုးတစ်ရပ်လုံးအနေဖြင့် အစတုံးပျောက်ဆုံးသွားခြင်းကိုမူ ဘယ်တော့မျှခွင့်ပြုတော်မူမည်မဟုတ်ချေ။ (ဆာလံ ၁၁၆:၁၅) တည်ကြည်သူအချို့ သေခြင်း၌ နစ်မွန်းဆုံးရှုံးရလျှင်ပင် သူတို့ ရှင်ပြန်ထမြောက်လာကြမည်ကို ကျွန်ုပ်တို့ယုံကြည်စိတ်ချနိုင်သည်။—ယောဟန် ၅:၂၈၊ ၂၉။
ငြိမ်သက်မှုဆက်ရှိစေရန် အနစ်နာခံခြင်း
၉။ အာဗြံသည် ခါနာန်ပြည်၌ လှည့်လည်သွားလာနေခဲ့ကြောင်း အဘယ်အရာက ညွှန်ပြသနည်း။
၉ ခါနာန်ပြည်၌ အစာငတ်မွတ်ခေါင်းပါးမှု ပြီးဆုံးသွားကြောင်းထင်ရှားသည်နှင့် “အာဗြံ [ဇနီး] မောင်နှံတို့သည်လည်း လောတနှင့်တကွ မိမိတို့၌ရှိသမျှသောဥစ္စာကိုယူ၍ အဲဂုတ္တုပြည်မှထွက်သွားသဖြင့် ခါနာန်ပြည်တောင်ပိုင်း [ယုဒတောင်တန်းများ၏ တောဘက်ကျသောမိုးနည်းရေရှားရပ်ဝန်း] သို့ရောက်ကြ၏။ ထိုအခါ အာဗြံသည် သိုး၊ နွားစသည်တို့ကိုလည်းကောင်း၊ ရွှေငွေကိုလည်းကောင်း အလွန်ရတတ်၏။” (ကမ္ဘာဦး ၁၃:၁၊ ၂) သို့နှင့် ဒေသခံများက သူ့အား ဩဇာအာဏာရှိ၍ အားကြီးသောအကြီးအကဲတစ်ဦးအဖြစ် ရှုမြင်ကြပေလိမ့်မည်။ (ကမ္ဘာဦး ၂၃:၆) အာဗြံသည် အခြေချရန်၊ ခါနာန်လူတို့၏နိုင်ငံရေးတွင် ဝင်စွက်ပတ်သက်ရန် ဆန္ဒလုံးဝမရှိခဲ့ချေ။ ယင်းအစား “တစ်ဖန် တောင်ပိုင်းမှခရီးသွား၍ ဗေသလနယ်အတွင်း ဗေသလမြို့၊ အာဣမြို့စပ်ကြား၌ အထက်ကတဲကိုဆောက် . . . ခဲ့ဖူးသောအရပ်သို့ ရောက်ပြန် . . . ၏။” ခါတိုင်းကဲ့သို့ပင် အာဗြံသည် မည်သည့်နေရာသို့ပင်ရောက်ပါစေ ယေဟောဝါ၏ ဝတ်ပြုကိုးကွယ်မှုကို ဦးထိပ်ထားခဲ့၏။—ကမ္ဘာဦး ၁၃:၃၊ ၄။
၁၀။ အာဗြံနှင့် လောတတို့၏တိရစ္ဆာန်ထိန်းကျောင်းသူများအကြား အဘယ်ပြဿနာတက်ခဲ့သနည်း၊ ယင်းကို လျင်မြန်စွာဖြေရှင်းလိုက်ရန် အဘယ်ကြောင့်အရေးကြီးသနည်း။
၁၀ “အာဗြံနှင့်အတူလိုက်လာသော လောတသည်လည်း သိုး၊ နွားများနှင့် တဲအများရှိသဖြင့်၊ ထိုလူနှစ်ဦးတို့သည် အတူနေခြင်းငှာ ထိုမြေမဆံ့နိုင်။ ဥစ္စာများလွန်း၍ သူတို့သည် တစ်ရပ်တည်းမနေနိုင်ကြ။ အာဗြံ၏နွားကျောင်းသား၊ လောတ၏နွားကျောင်းသားတို့သည်လည်း ခိုက်ရန်ပြုကြ၏။ ထိုအခါ ခါနာန်အမျိုးသား၊ ဖေရဇိအမျိုးသားတို့သည် ထိုပြည်၌နေကြသတည်း။” (ကမ္ဘာဦး ၁၃:၅-၇) အဆိုပါမြေသည် အာဗြံနှင့် လောတတို့နှစ်ဦးစလုံး၏ သိုးအုပ်များအတွက် လုံလောက်သောရေနှင့် စားကျက်မြေကိုထောက်ပံ့မပေးခဲ့ချေ။ သို့ဖြင့် တိရစ္ဆာန်ထိန်းကျောင်းသူတို့အကြား တင်းမာမှုနှင့် စိတ်နာစရာများ ပေါ်ထွက်ခဲ့သည်။ ယင်းသို့ ကတောက်ကဆတ်ဖြစ်ခြင်းသည် စစ်မှန်သောဘုရားသခင်အား ဝတ်ပြုကိုးကွယ်သူတို့နှင့် မအပ်စပ်ချေ။ ခွန်းကြီးခွန်းငယ် ဆက်ဖြစ်ခဲ့မည်ဆိုလျှင် အမြဲပဋိပက္ခဖြစ်နေပေမည်။ သို့နှင့် ဤအခြေအနေကို အာဗြံ မည်သို့ကိုင်တွယ်မည်နည်း။ သူသည် လောတ၏ဖခင်သေဆုံးသွားပြီးနောက် လောတကို မိမိ၏သားရင်းအဖြစ် မွေးစားခဲ့ပုံရှိသည်။ သူတို့နှစ်ဦးတွင် အာဗြံသည် အကြီးဖြစ်သည့်အတွက် အကောင်းဆုံးကို ယူထိုက်သည်မဟုတ်ပေလော။
၁၁၊ ၁၂။ အာဗြံသည် သဘောထားပြည့်ဝစွာ လောတအား အဘယ်အခွင့်အရေးပေးခဲ့သနည်း၊ လောတ၏ရွေးချယ်မှုက အဘယ်ကြောင့်ပညာမဲ့ရာကျသနည်း။
၁၁ သို့သော် “အာဗြံကလည်း ‘ငါတို့သည် ညီအစ်ကိုချင်းဖြစ်လျက် ငါနှင့်သင်၌လည်းကောင်း၊ ငါ့နွားကျောင်းသားတို့နှင့် သင့်နွားကျောင်းသားတို့၌လည်းကောင်း ခိုက်ရန်မရှိပါစေနှင့်။ မြေတစ်ပြင်လုံးသည် သင့်ရှေ့မှာရှိသည်မဟုတ်လော။ ငါနှင့်ခွာ၍နေပါလော့။ သင်သည် လက်ဝဲဘက်သို့သွားလျှင် ငါသည်လက်ယာဘက်သို့သွားမည်။ သင်သည်လက်ယာဘက်သို့သွားလျှင် ငါသည်လက်ဝဲဘက်သို့သွားမည်’ ဟုဆို၏။” ဗေသလအနီးတွင် “ပါလက်စတိုင်း၏ မြင်ကွင်းကျယ်ရှုခင်းကို တွေ့မြင်နိုင်သောနေရာ” ဟုခေါ်ဆိုသည့် နေရာတစ်နေရာရှိသည်။ ဖြစ်နိုင်ဖွယ်ရာမှာ ထိုနေရာမှ “သောဒုံမြို့နှင့်ဂေါမောရမြို့ကို ထာဝရဘုရားဖျက်ဆီးတော်မမူမီ ဇောရမြို့သို့သွားသောလမ်း ယော်ဒန်မြစ်ပတ်ဝန်းကျင်အရပ်ရပ်၌ရေများ၍ ထာဝရဘုရား၏ဥယျာဉ်တော်ကဲ့သို့လည်းကောင်း၊ အဲဂုတ္တုပြည်ကဲ့သို့လည်းကောင်းဖြစ်သည်ကို လောတမျှော်ကြည့်၍မြင်” ခဲ့ပေမည်။—ကမ္ဘာဦး ၁၃:၈-၁၀။
၁၂ သမ္မာကျမ်းစာက လောတကို “ဖြောင့်မတ်သော” သူဟုဖော်ပြထားသော်လည်း ဤကိစ္စတွင် အကြောင်းတစ်ခုခုကြောင့် သူသည် အာဗြံအား မထောက်ထားခဲ့သည့်အကြောင်းရှိပေမည်၊ အသက်ကြီးသူ၏အကြံဉာဏ်ကိုလည်း သူတောင်းဆိုခဲ့ပုံမရှိချေ။ (၂ ပေတရု ၂:၇) “ယော်ဒန်ချိုင့်တစ်လျှောက်လုံးကိုရွေးချယ်၍ အရှေ့သို့ပြောင်းသွားသဖြင့် အချင်းချင်းတစ်ဦးနှင့်တစ်ဦးကွဲပြားကြ၏။ အာဗြံသည် ခါနာန်ပြည်၌နေလေ၏။ လောတမူကား၊ မြစ်ပတ်ဝန်းကျင်မြို့တို့တွင်နေ၍ သောဒုံမြို့နားမှာ တဲကိုဆောက်လေ၏။” (ကမ္ဘာဦး ၁၃:၁၁၊ ၁၂) သောဒုံမြို့သည် ကြွယ်ဝချမ်းသာ၍ အကျိုးအမြတ်ရစရာအခွင့်အလမ်းများစွာရှိခဲ့သည်။ (ယေဇကျေလ ၁၆:၄၉၊ ၅၀) လောတ၏ရွေးချယ်မှုသည် ကာယရေးဘက်မှ ကြည့်လျှင် ပညာရှိသယောင်ဖြစ်သော်လည်း ဝိညာဉ်ရေးဘက်တွင် ပညာမဲ့ရာကျ၏။ အဘယ်ကြောင့်နည်း။ အကြောင်းမှာ ကမ္ဘာဦး ၁၃:၁၃ အရ “သောဒုံမြို့သားတို့သည် ဆိုးသောသူ ထာဝရဘုရားရှေ့၌ အလွန်အပြစ်များသောသူဖြစ်ကြ” သောကြောင့်တည်း။ ထိုနေရာသို့ ရွှေ့ပြောင်းရန် လောတ၏ဆုံးဖြတ်ချက်ကား နောက်ဆုံးတွင် သူ၏မိသားစုအတွက် ဝမ်းနည်းစရာများစွာဖြစ်စေခဲ့သည်။
၁၃။ ငွေကြေးအရှုပ်အရှင်းရှိကောင်းရှိခဲ့မည့် ခရစ်ယာန်တို့အတွက် အာဗြံ၏ပုံနမူနာကား မည်သို့အကူအညီဖြစ်စေသနည်း။
၁၃ သို့သော် မိမိ၏အမျိုးအနွယ်သည် အဆုံးတွင် တစ်ပြည်လုံးကို ပိုင်ဆိုင်ရလိမ့်မည်ဟူသော ယေဟောဝါ၏ကတိတော်ကို အာဗြံယုံကြည်ကြောင်း တင်ပြခဲ့သည်; နယ်မြေတစ်စိတ်တစ်ပိုင်းကလေးအတွက်နှင့် သူစကားမများလိုခဲ့ချေ။ “ကိုယ်အကျိုးကိုအဘယ်သူမျှမရှာစေနှင့်။ သူ့အကျိုးကိုလူတိုင်းရှာစေ” ဟူသည့် ၁ ကောရိန္သု ၁၀:၂၄ ၌ နောက်ပိုင်းတွင်ပါသောမူနှင့်အညီ သဘောထားကြီးစွာ သူကျင့်သုံးခဲ့သည်။ ယင်းက ယုံကြည်သူချင်းတစ်ဦးနှင့် ငွေကြေးအရှုပ်အရှင်းရှိခဲ့သူတို့အတွက် ကောင်းသောသတိပေးချက်တစ်ခုဖြစ်၏။ အချို့တို့သည် မဿဲ ၁၈:၁၅-၁၇ တွင်တွေ့ရှိရသောဆုံးမစကားကို လိုက်နာမည့်အစား သူတို့၏ညီအစ်ကိုများကို ရုံးတင်ခဲ့ကြသည်။ (၁ ကောရိန္သု ၆:၁၊ ၇) ယေဟောဝါ၏နာမတော်ကို ရှုတ်ချစရာ၊ ခရစ်ယာန်အသင်းတော်၏ငြိမ်သက်မှုကို ပြိုပျက်စရာ ဖြစ်စေမည့်အစား ငွေအရှုံးခံလိုက်ခြင်းမှာ သာ၍ကောင်းကြောင်း အာဗြံ၏ပုံနမူနာကဖော်ပြသည်။—ယာကုပ် ၃:၁၈။
၁၄။ အာဗြံသည် သူ၏သဘောထားကြီးမှုအတွက် မည်သို့ကောင်းချီးခံစားရဖို့ဖြစ်သနည်း။
၁၄ အာဗြံသည် သူ၏သဘောထားကြီးမှုအတွက် ကောင်းချီးခံစားခဲ့ရသည်။ ဘုရားသခင်က ဤသို့ကြေညာခဲ့၏– “သင်၏အမျိုးအနွယ်ကို မြေမှုန့်ကဲ့သို့ငါများပြားစေမည်။ သို့ဖြစ်၍ လူသည် မြေမှုန့်ကိုရေတွက်နိုင်လျှင် သင်၏အမျိုးအနွယ်ကို ရေတွက်နိုင်ကြလိမ့်မည်။” ဤမိန့်တော်မူချက်သည် ကလေးမရှိသောအာဗြံကို တကယ်ပင်အားရှိစေခဲ့မည်တကား! ထို့နောက် ဘုရားသခင်က ဤသို့အမိန့်ပေးခဲ့သည်– “သင်ထ၍ မြေကိုအလျားအားဖြင့်လည်းကောင်း၊ အနံအားဖြင့်လည်းကောင်း လျှောက်သွားလော့။ သင့်အားငါပေးမည်။” (ကမ္ဘာဦး ၁၃:၁၆၊ ၁၇) အာဗြံသည် မြို့တစ်မြို့၌ အဆင်ပြေစွာအခြေချနေထိုင်ခွင့်ရလိမ့်မည်မဟုတ်ချေ။ သူသည် ခါနာန်ပြည်သားတို့နှင့် ဆက်၍သီးခြားနေရမည်ဖြစ်သည်။ ယနေ့ ခရစ်ယာန်တို့လည်း အလားတူ ဤလောကနှင့် သီးခြားနေကြရမည်။ သူတို့သည် အခြားသူတို့ထက် သာသည်ဟု မိမိတို့ကိုယ်ကိုမယူမှတ်ကြသော်လည်း သမ္မာကျမ်းစာနှင့်မညီသော အမူအကျင့်တွင်ပါဝင်ရန် သူတို့ကိုသွေးဆောင်နိုင်မည့်သူ မည်သူမဆိုနှင့် တရင်းတနှီးဆက်ဆံကြမည်မဟုတ်ချေ။—၁ ပေတရု ၄:၃၊ ၄။
၁၅။ (က) အာဗြံ ခရီးသွားလာခြင်းတွင် အဘယ်အရေးပါမှု ရှိကောင်းရှိမည်နည်း။ (ခ) ယနေ့ ခရစ်ယာန်မိသားစုများအတွက် အဘယ်ပုံသက်သေကို အာဗြံချမှတ်ပေးခဲ့သနည်း။
၁၅ သမ္မာကျမ်းစာခေတ်က လူတစ်ဦးသည် နယ်မြေတစ်ခုကိုမပိုင်ဆိုင်မီ သူသည် ယင်းကို စူးစမ်းစစ်ဆေးခွင့်ရှိသည်။ သို့နှင့် ခရီးလှည့်လည်ခြင်းက တစ်နေ့တွင် ဤနယ်မြေကို အာဗြံ၏သားစဉ်မြေးဆက် ပိုင်ဆိုင်ရလိမ့်မည်ဖြစ်ကြောင်း အဆက်မပြတ်သတိပေးချက် ဖြစ်နိုင်ပေသည်။ နာခံမှုရှိစွာ “အာဗြံသည် တဲကိုပြောင်း၍ ဟေဗြုန်မြို့၊ မံရေသပိတ်တောသို့ရောက်မှ နေရာကျ၍ ထာဝရဘုရားအဖို့ ယဇ်ပလ္လင်ကိုတည်လေ၏။” (ကမ္ဘာဦး ၁၃:၁၈) အာဗြံသည် ဝတ်ပြုကိုးကွယ်ရေးကို အလွန်ဦးစားပေးကြောင်း ထပ်မံဖော်ပြခဲ့သည်။ သင့်မိသားစုတွင် မိသားစုလိုက်လေ့လာမှု၊ မိသားစုလိုက်ဆုတောင်းခြင်းနှင့် စည်းဝေးများတက်ရောက်ခြင်းကို အလွန်ဦးစားထားပါသလော။
ရန်သူတိုက်ခိုက်ခြင်း
၁၆။ (က) ကမ္ဘာဦး ၁၄:၁ ၏အဖွင့်စကားများသည် အဘယ်ကြောင့် နိမိတ်ဆိုးသဘောဆောင်သနည်း။ (ခ) အရှေ့တိုင်းပြည့်ရှင်မင်းလေးပါး ချင်းနင်းဝင်ရောက်တိုက်ခိုက်ရသည့် အကြောင်းရင်းကား အဘယ်နည်း။
၁၆ “ထိုရောအခါ ရှိနာမင်းကြီးအံရဖေလ၊ ဧလာသာမင်းကြီးအာရုတ်၊ ဧလံမင်းကြီး ခေဒေါရလောမာ၊ * ဂေါအိမ်မင်းကြီး တိဒလတို့သည် . . . စစ်တိုက်ကြ၏။” မူရင်းဟေဗြဲဘာသာစကားတွင် ဤအဖွင့်စကားစု (“ထိုရောအခါ”) သည် “ကောင်းချီးဖြင့်နိဂုံးချုပ်သော စမ်းသပ်ရာကာလတစ်ခု” ကိုညွှန်ပြနေသော နိမိတ်ဆိုးသဘောဆောင်၏။ (ကမ္ဘာဦး ၁၄:၁၊ ၂၊ ကဘ၊ အောက်ခြေမှတ်ချက်) ထိုစမ်းသပ်ချိန်သည် ဤအရှေ့တိုင်းပြည့်ရှင်မင်းလေးပါးနှင့် သူတို့၏စစ်တပ်များသည် ခါနာန်ပြည်ထဲချင်းနင်းဝင်ရောက်၍ သိမ်းရုံးဖျက်ဆီးစဉ်က စတင်သည်။ ရည်ရွယ်ချက်ကားအဘယ်နည်း။ သောဒုံ၊ ဂေါမောရ၊ အာဓမာ၊ ဇေဘိုင်နှင့် ဗေလာမြို့ငါးမြို့၏ပုန်ကန်မှုကို နှိမ်နင်းရန်ဖြစ်သည်။ သူတို့သည် ခံတပ်မှန်သမျှကို နှိမ်နင်းချေမှုန်းလျက် “သောဒုံအိုင်ဖြစ်သော စိဒ္ဒိမ်ချိုင့်တွင် သင်းဖွဲ့ကြ၏။” လောတနှင့် သူ၏မိသားစုသည် အနီးဝန်းကျင်တွင် နေထိုင်ခဲ့ကြသည်။—ကမ္ဘာဦး ၁၄:၃-၇၊ သမ္မာ။
၁၇။ သုံ့ပန်းအဖြစ် လောတဖမ်းဆီးခေါ်ဆောင်သွားခံရခြင်းက အာဗြံအတွက် အဘယ်ကြောင့် ယုံကြည်ခြင်းစမ်းသပ်ချက်တစ်ရပ် ဖြစ်ခဲ့သနည်း။
၁၇ ခါနာန်ပြည့်ရှင်မင်းများသည် ကျူးကျော်တိုက်ခိုက်သူတို့ကို ပြင်းပြင်းထန်ထန် ခုခံခဲ့ကြသော်လည်း အရှက်တကွဲရှုံးနိမ့်ခဲ့ကြ၏။ “ထိုအခါ . . . အောင်သောမင်းတို့သည် သောဒုံမြို့နှင့်ဂေါမောရမြို့၌ရှိသမျှသောဥစ္စာနှင့် မြို့ရိက္ခာရှိသမျှတို့ကို ယူ၍သွားကြ၏။ သောဒုံမြို့၌နေသော အာဗြံအစ်ကိုသားလောတနှင့် သူ၏ဥစ္စာတို့ကိုလည်းသိမ်းယူ၍သွား၏။” ဤရတက်မအေးဖွယ်ဖြစ်ရပ်များသတင်းသည် မကြာမီ အာဗြံထံ ရောက်လာသည်– “ထိုဘေးမှလွတ်၍ ပြေးသောသူတစ်ယောက်သည် ဟေဗြဲလူအာဗြံနှင့် မိတ်သဟာယဖွဲ့သောသူ ဧရှကောလနှင့် အာနေရ၏အစ်ကို အာမောရိလူမံရေ၏ သပိတ်တောနားမှာနေသော အာဗြံထံသို့ရောက်၍ သတင်းကြားပြောလေ၏။ အာဗြံသည် မိမိအစ်ကိုသားကို ဖမ်းသွားကြောင်းကိုကြား” လေသည်။ (ကမ္ဘာဦး ၁၄:၈-၁၄) ယုံကြည်ခြင်းစမ်းသပ်မှုပါတကား! မိမိ၏တူတော်စပ်သူက နယ်မြေ၏အကောင်းဆုံးဒေသပိုင်းကို ရွေးယူခဲ့ခြင်းကြောင့် သူ့အား အာဗြံစိတ်နာနေမည်လော။ ဤကျူးကျော်ဝင်ရောက်သူတို့သည် သူ၏နေရင်းပြည် ရှိနာမှရောက်လာကြကြောင်းကိုလည်း သတိရပါ။ သူတို့နှင့်စစ်ပြိုင်ခြင်းဖြင့် အိမ်သို့ ပြန်လမ်းမရှိဘဲဖြစ်သွားစေနိုင်သည်။ ထို့အပြင် ခါနာန်တပ်ပေါင်းစုပင် အနိုင်မတိုက်နိုင်ခဲ့သော စစ်တပ်တစ်တပ်ကို အာဗြံ မည်သို့တိုက်ခိုက်နိုင်မည်နည်း။
၁၈၊ ၁၉။ (က) လောတကို အာဗြံ မည်သို့ကယ်တင်နိုင်ခဲ့သနည်း။ (ခ) ဤအောင်မြင်မှုအတွက် မည်သူဂုဏ်တင်ခံခဲ့ရသနည်း။
၁၈ အာဗြံသည် လုံးလုံးလျားလျား ယေဟောဝါ၌ယုံကြည်ကိုးစားခဲ့သည်။ “အာဗြံသည် မိမိအစ်ကိုသားကို ဖမ်းသွားကြောင်းကိုကြားလျှင် မိမိအိမ်၌ဖွား၍သွန်သင်သောလူ သုံးရာတစ်ဆယ့်ရှစ်ယောက်တို့ကိုစီရင်၍ ဒန်မြို့တိုင်အောင်လိုက်လေ၏။ ညအခါ မိမိလူတို့ကိုခွဲ၍တိုက်စေသဖြင့် လုပ်ကြံပြီးလျှင် ဒမာသက်မြို့မြောက်ဘက် ဟောဘမြို့တိုင်အောင်လိုက်ပြန်လေ၏။ ရန်သူတို့သိမ်းသွားသောဥစ္စာရှိသမျှကိုလည်းကောင်း၊ မိမိအစ်ကိုသားလောတနှင့် သူ၏ဥစ္စာကိုလည်းကောင်း၊ မိန်းမများနှင့်လူများကိုလည်းကောင်း တစ်ဖန်ဆောင်ယူခဲ့လေ၏။” (ကမ္ဘာဦး ၁၄:၁၄-၁၆) အာဗြံသည် ယေဟောဝါ၌ ခိုင်မြဲသောယုံကြည်ခြင်းကိုပြသရာတွင် သူ့ထက်ပို၍များပြားလှစွာသောတပ်များကို အောင်နိုင်ခဲ့ကာ လောတနှင့် သူ၏မိသားစုကို ကယ်ဆယ်ခဲ့သည်။ ယခု အာဗြံသည် ယဇ်ပုရောဟိတ်ဖြစ်သော ရှာလင်မင်းကြီးမေလခိဇေဒက်နှင့် တွေ့ဆုံလေသည်။ “အမြင့်ဆုံးသောဘုရားသခင်၏ ယဇ်ပုရောဟိတ်ဖြစ်သော ရှာလင်မင်းကြီးမေလခိဇေဒက်သည်လည်း မုန့်နှင့်စပျစ်ရည်ကိုဆောင်ခဲ့ပြီးလျှင်၊ ‘ကောင်းကင်မြေကြီးရှင် အမြင့်ဆုံးသောဘုရားသခင်သည် အာဗြံအား ကောင်းချီးပေးတော်မူပါစေသော’ ဟု အာဗြံကိုကောင်းချီးပေး၍၊ ‘သင်၏ရန်သူတို့ကို သင်၏လက်၌အပ်နှံတော်မူသော အမြင့်ဆုံးသောဘုရားသခင်လည်း မင်္ဂလာရှိတော်မူစေသတည်း’ ဟု မြွက်ဆို၏။ အာဗြံသည်လည်း ဥစ္စာရှိသမျှတို့ကို ထိုမင်းအားဆယ်ဖို့တစ်ဖို့လှူလေ၏။”—ကမ္ဘာဦး ၁၄:၁၈-၂၀။
၁၉ မှန်ပါသည်၊ အောင်ပွဲဟူသည် ယေဟောဝါနှင့်ဆိုင်၏။ အာဗြံသည် သူ၏ယုံကြည်ခြင်းကြောင့် ယေဟောဝါ၏ကယ်တင်တော်မူခြင်းကို နောက်တစ်ဖန် ခံခဲ့ရသည်။ ယနေ့ ယေဟောဝါ၏လူတို့သည် စစ်မှုတွင် ကိုယ်တိုင်ပါဝင်ဆင်နွှဲကြမည်မဟုတ်သော်လည်း သူတို့သည် စမ်းသပ်မှုနှင့် စိန်ခေါ်ချက်များစွာကို ရင်ဆိုင်ကြရသည်။ ယင်းတို့ကို ကျွန်ုပ်တို့အောင်မြင်စွာ ကိုင်တွယ်ဖြေရှင်းနိုင်ရန် အာဗြံ၏ပုံနမူနာက မည်သို့ကူညီပေးလိမ့်မည်ကို နောက်ဆောင်းပါးက ဖော်ပြပါမည်။
[အောက်ခြေမှတ်ချက်များ]
^ အပိုဒ်၊ 2 (ယေဟောဝါသက်သေများထုတ်ဝေသည့်) ကျမ်းစာစောင်များကိုထိုးထွင်းသိမြင်ခြင်းစာအုပ်အရ “ဖာရောတစ်ပါးသည် အလှပဂေးတစ်ဦးကိုဖမ်းဆီး၍ သူ့လင်ယောက်ျားကိုသတ်ရန် လက်နက်ကိုင်လူတို့အား တာဝန်ပေးခဲ့ကြောင်း ရှေးခေတ်ပါပိုင်းရပ်တစ်စောင်ကဖော်ပြ” ကြောင်းသိရ၏။ သို့ဖြစ်၍ အာဗြံသည် အစိုးရိမ်လွန်နေခြင်းမဟုတ်ချေ။
^ အပိုဒ်၊ 6 နောက်ပိုင်းတွင် အာဗြံ၏မယားငယ်ဖြစ်လာသော ဟာဂရသည် ထိုအချိန်က အာဗြံရခဲ့သော ကျေးကျွန်များထဲမှတစ်ဦး အပါအဝင်ဖြစ်ပေလိမ့်မည်။—ကမ္ဘာဦး ၁၆:၁။
^ အပိုဒ်၊ 16 ဧလံပြည်သည် ရှိနာပြည်အပေါ် ထိုသို့တစ်ခါမျှသြဇာမညောင်းခဲ့၍ ခေဒေါရလောမာ၏ကျူးကျော်တိုက်ခိုက်ခြင်းမှတ်တမ်းသည် လုပ်ကြံပြောဆိုမှုတစ်ရပ်မျှဖြစ်သည်ဟု ဝေဖန်ရေးသမားတို့က တစ်ချိန်တစ်ခါကဆိုခဲ့ကြသည်။ သမ္မာကျမ်းစာမှတ်တမ်းကို ထောက်ခံသော ရှေးဟောင်းသုတေသနအထောက်အထားကို ဆွေးနွေးတင်ပြထားသော ၁၉၉၀၊ ဇူလိုင် ၁ ကင်းမျှော်စင် စာမျက်နှာ ၄-၇ ကိုရှု။
သင်သတိပြုမိသလော
• ခါနာန်ပြည်၌ အစာငတ်မွတ်ခေါင်းပါးခြင်းက အာဗြံအတွက် ယုံကြည်ခြင်းစမ်းသပ်ချက်တစ်ရပ် မည်သို့ဖြစ်ခဲ့သနည်း။
• အာဗြံနှင့် စာရဲနှစ်ဦးစလုံးတို့သည် ယနေ့ ခင်ပွန်းများနှင့် ဇနီးများအတွက် မည်သို့သောပုံသက်သေကောင်း ချမှတ်ပေးခဲ့သနည်း။
• အာဗြံသည် မိမိ၏ကျေးကျွန်နှင့် လောတ၏ကျေးကျွန်များအကြား အငြင်းပွားမှုကို ကိုင်တွယ်ခဲ့ပုံမှ ကျွန်ုပ်တို့ အဘယ်သင်ခန်းစာများရရှိနိုင်သနည်း။
[လေ့လာရန်မေးခွန်းများ]
[စာမျက်နှာ ၂၂ ပါ ရုပ်ပုံ]
အာဗြံသည် မိမိ၏ရပိုင်ခွင့်ကိုမရမကမယူခဲ့ဘဲ မိမိအကျိုးထက် လောတ၏အကျိုးစီးပွားကို ဦးစားပေးခဲ့
[စာမျက်နှာ ၂၄ ပါ ရုပ်ပုံ]
အာဗြံသည် မိမိ၏တူတော်စပ်သူလောတကို ကယ်ဆယ်ရာ၌ ယေဟောဝါအား ယုံကြည်ကိုးစားမှုပြခဲ့