စာတန် အယူသီးမှု မျှမဟုတ်
စာတန် အယူသီးမှု မျှမဟုတ်
“ဓမ္မသစ်ကျမ်းတစ်လျှောက် ဘုရားသခင်နှင့် ကိုယ်တော်၏ကောင်းမှုများတစ်ဖက် စာတန်ဦးစီးဦးဆောင်ပြုသည့် ဆိုးညစ်မှုများ အကြီးအကျယ်ဆိုင်ပြိုင်တိုက်လှန်ခြင်းကို တွေ့ရှိရသည်။ ယင်းသည် စာရေးသူတစ်ဦး၊ နှစ်ဦး၏စိတ်ကူးစိတ်သန်းမျှမဟုတ်၊ အားလုံးသဘောတူညီသောအချက်ဖြစ်သည်။ . . . ထို့ကြောင့် ဓမ္မသစ်ကျမ်း၏သက်သေခံချက်မှာ ရှင်းနေပါသည်။ စာတန်သည် အမှန်တကယ်ဆိုးသွမ်းသောသူ၊ ဘုရားသခင်နှင့် ဘုရားသခင့်လူမျိုးကို အမြဲပင် ရန်လိုသောသူဖြစ်၏။”—“ကျမ်းစာသစ်အဘိဓာန်။”
သို့ဆိုလျှင် ခရစ်ယာန်ဘာသာဝင်ဟုအမည်ခံသူများ—နှင့် သမ္မာကျမ်းစာကို ယုံကြည်ပါသည်ဟုဆိုကြသူများ—သည် စာတန်အမှန်တကယ်တည်ရှိကြောင်းကို အဘယ်ကြောင့်ငြင်းပယ်ကြသနည်း။ အမှန်စင်စစ်ဆိုရလျှင် သူတို့သည် သမ္မာကျမ်းစာကို ဘုရားသခင့်နှုတ်မြွက်စကားတော်အဖြစ် လက်မခံကြသောကြောင့်တည်း။ (ယေရမိ ၈:၉) ကျမ်းရေးသူတို့သည် ၎င်းတို့၏ဝန်းကျင်ရှိ လူမျိုးတို့၏အတွေးအခေါ်များကို ရောင်ပြန်ဟပ်ခဲ့ကြခြင်းမျှဖြစ်ပြီး ဘုရားသခင့်ထံတော်မှ အမှန်တရားကို အတိအကျမဖော်ပြကြချေဟု သူတို့ပြောကြသည်။ ဥပမာ ကက်သလစ်ဘာသာဗေဒပညာရှင် ဟန်းစ် ကူန်က ဤသို့ရေးသားခဲ့သည်– “စာတန်နှင့် ၎င်း၏နတ်ဆိုးတပ်မဟာများ ဒဏ္ဍာရီဆန်ဆန်အယူအဆများသည် . . . ဗာဗုလုန်ဒဏ္ဍာရီမှ အစောပိုင်းဂျူးဘာသာတရားသို့ တိုးဝင်ပျံ့နှံ့လာခဲ့ပြီး ယင်းမှတစ်ဆင့် ဓမ္မသစ်ကျမ်းထဲ ဝင်ရောက်လာခြင်းဖြစ်သည်။”—ခရစ်ယာန်တစ်ဦးဖြစ်ခြင်း။
သို့သော် သမ္မာကျမ်းစာသည် လူ့နှုတ်ထွက်စကားမျှမဟုတ်ချေ; ဘုရားသခင်မှုတ်သွင်းတော်မူသည့် နှုတ်မြွက်စကားတော် အမှန်စင်စစ်ဖြစ်၏။ ထို့ကြောင့် စာတန်နှင့်ပတ်သက်၍ ၎င်းပြောဆိုသည့်စကားကို ကျွန်ုပ်တို့အလေးအနက်ထားရန် သင့်တော်ပေသည်။—၂ တိမောသေ ၃:၁၄-၁၇; ၂ ပေတရု ၁:၂၀၊ ၂၁။ ယေရှု မည်သို့ယူဆခဲ့သနည်း
စာတန် တကယ်ရှိသည်ဟု ယေရှုယုံကြည်ခဲ့၏။ ယေရှုသည် မိမိကိုယ်နှိုက်ရှိ ဆိုးညစ်သောအရာတစ်ခုဖြင့် စမ်းသပ်ခံခဲ့ရသည်မဟုတ်။ နောက်ပိုင်းတွင် ကိုယ်တော်က “ဤလောကကိုအစိုးရသောမင်း” ဟုခေါ်ဆိုခဲ့သည့် တကယ့်ပုဂ္ဂိုလ်စင်စစ်တစ်ပါး၏ တိုက်ခိုက်ခြင်းကို ခံခဲ့ရသည်။ (ယောဟန် ၁၄:၃၀; မဿဲ ၄:၁-၁၁) စာတန်၏ဆိုးညစ်သောဉာဏ်ဆင်မှုများတွင် အခြား . . . ဝိညာဉ်သတ္တဝါများ ပါဝင်ထောက်ကူကြောင်းကိုလည်း ကိုယ်တော်ယုံကြည်ခဲ့၏။ ကိုယ်တော်သည် “နတ်ဆိုးစွဲသော” လူတို့ကို ကုသပေးခဲ့၏။ (မဿဲ ၁၂:၂၂-၂၈) ဘုရားမဲ့ဝါဒီတို့၏ ဆင်ခြင်တုံတရားအားထားသူ စွယ်စုံကျမ်းကပင် ယင်းအချက်၏အရေးပါမှုကို ဤသို့ရေးသားဖော်ပြသည်– “နတ်ဆိုးများရှိကြောင်းကို ခရစ်ဝင်ကျမ်းမှတ်တမ်းများ၏ယေရှု ယုံကြည်လက်ခံခြင်းသည် ဘာသာဗေဒပညာရှင်များအတွက် ထိမိ၍လဲစရာအမြဲဖြစ်ခဲ့သည်။” စာတန်နှင့် သူ၏နတ်ဆိုးများအကြောင်း ယေရှုပြောဆိုသောအခါ ကိုယ်တော်သည် ဗာဗုလုန်ဒဏ္ဍာရီမှ လက်ခံယူထားသော အယူသီးမှုများကို ထပ်ကျော့ပြောဆိုခဲ့ခြင်း မဟုတ်ချေ။ သူတို့ အမှန်တကယ်တည်ရှိကြောင်း ကိုယ်တော်သိတော်မူ၏။
ယေရှုအချိန်က ဘာသာရေးဆရာများအား ကိုယ်တော်မိန့်တော်မူခဲ့သော စကားများကို သုံးသပ်ကြည့်ခြင်းဖြင့် စာတန်အကြောင်း ကျွန်ုပ်တို့များစွာသိရှိလာကြရသည်– “သင်တို့သည် သင်တို့၏အဘတည်းဟူသော [စာတန်] မှဆင်းသက်ကြ၏။ သင်တို့အဘ၏အလိုသို့လည်း လိုက်တတ်ကြ၏။ [စာတန်] သည် ရှေးဦးစွာမှစ၍ လူအသက်ကိုသတ်သောသူဖြစ်၏။ သူ၌သစ္စာတရားမရှိသောကြောင့် သစ္စာတရား၌မတည်မနေ။ သူသည် မုသာစကားကိုပြောသောအခါ မိမိပကတိအတိုင်းပြော၏။ မုသာစကား၌ကျင်လည်သောသူဖြစ်၏။ မုသာ၏အဘလည်းဖြစ်၏။”—ယောဟန် ၈:၄၄။
ထိုအတိုင်းဆိုလျှင် “ရှုတ်ချဂုဏ်ဖျက်သူ” ဟုအဓိပ္ပာယ်ရှိသော အမည်ရှိသူ . . . သည် ‘မုသာစကား၌ကျင်လည်သောသူနှင့် မုသာ၏အဘဖြစ်’ ၏။ သူသည် ဘုရားသခင်အကြောင်း လိမ်ညာပြောဆိုခဲ့သည့် ဦးဆုံးသတ္တဝါဖြစ်ခဲ့ပြီး ဧဒင်ဥယျာဉ်တွင် ထိုသို့ပြုလုပ်ခဲ့၏။ ကောင်းမကောင်းသိကျွမ်းရာအပင်မှအသီးကို ကျွန်ုပ်တို့၏ကနဦးမိဘများစားကြမည်ဆိုလျှင် “ဧကန်အမှန်သေ” ရမည်ဟု ယေဟောဝါက သူတို့အား မိန့်တော်မူခဲ့သည်။ မြွေ၏ပါးစပ်ကိုအသုံးပြုကာ စာတန်က ထိုစကားများ မမှန်ကန်ဟုပြောဆိုခဲ့သည်။ (ကမ္ဘာဦး ၂:၁၇; ၃:၄) ဆီလျော်စွာပင် သူ့အား “. . . စာတန်အမည်ရှိသော ရှေးမြွေဟောင်း” ဟုခေါ်ဆိုထားသည်။—ဗျာဒိတ် ၁၂:၉။
ကောင်းမကောင်းသိကျွမ်းရာအပင်နှင့်ပတ်သက်၍ စာတန်သည် လိမ်လည်ပြောဆိုခဲ့၏။ အဆိုပါအပင်မှ အသီးစားခြင်းကို တားမြစ်ထားခြင်းသည် မတရား၊ တန်ခိုးကိုအလွဲသုံးစားပြုခြင်းဖြစ်သည်ဟု သူကအငြင်းပွားခဲ့သည်။ အဘယ်အရာကောင်းသည်၊ မကောင်းသည်ကို ကိုယ်တိုင်ဆုံးဖြတ်ခြင်းဖြင့် “ဘုရားသခင်ကဲ့သို့” ဖြစ်နိုင်ကြောင်း အာဒံနှင့် ဧဝအား သူပြောခဲ့သည်။ လွတ်လပ်စွာရွေးချယ်ခွင့်ရှိသူများအဖြစ် သူတို့သည် ကိုယ်ပိုင်ဆုံးဖြတ်ခွင့် အပြည့်အဝရှိသင့်ကြောင်း စာတန်သွယ်ဝိုက်ပြောဆိုလေသည်။ (ကမ္ဘာဦး ၃:၁-၅) ဘုရားသခင့်အုပ်စိုးမှုနည်းလမ်း၏ တော်မှန်ဖြောင့်မတ်မှုကို ဤသို့တိုက်ခိုက်ခြင်းဖြင့် အရေးပါသောဖြေရှင်းစရာကိစ္စများ ပေါ်ထွက်လာ၏။ သို့နှင့် ယေဟောဝါသည် အဆိုပါကိစ္စများကို ဖြေရှင်းရန် အချိန်ပေးခဲ့သည်။ ယင်း၏အဓိပ္ပာယ်ကား စာတန်မှာ တစ်ခဏတာ ဆက်အသက်ရှင်ခွင့်ရှိခြင်းဖြစ်၏။ သူ့အတွက် သတ်မှတ်ထားချိန်မှာ ယခု လျင်မြန်စွာကုန်ဆုံးနေပြီဖြစ်သည်။ (ဗျာဒိတ် ၁၂:၁၂) သို့တိုင် သူသည် မိမိ၏သွန်သင်ချက်များကို ဖြန့်ချိရန် ယေရှုအချိန်က ကျမ်းပြုဆရာများနှင့် ဖာရိရှဲများကဲ့သို့သော သူတို့ကိုအသုံးပြု၍ လိမ်လည်လှည့်ဖြားခြင်းဖြင့် လူတို့ကို ဘုရားသခင်နှင့်စိမ်းကားသွားစေရန် ဆက်ပြုလုပ်ဆဲရှိသည်။—မဿဲ ၂၃:၁၃၊ ၁၅။
စာတန်သည် “ရှေးဦးစွာမှစ၍ လူအသက်ကိုသတ်သောသူ” နှင့် “[အမှန်] တရား၌မတည်” သောသူဖြစ်ကြောင်းကိုလည်း ယေရှုမိန့်တော်မူခဲ့သည်။ ယင်းကြောင့် ယေဟောဝါသည် စာတန်အား “လူအသက်ကိုသတ်သောသူ” တစ်ဦးအဖြစ် ဖန်ဆင်းခဲ့သည်ဟု ဆိုလိုခြင်းမဟုတ်ချေ။ သူသည် ဘုရားသခင်အား ဆန့်ကျင်သူမှန်သမျှကို နှိပ်စက်ကလူပြုသော ကြောက်မက်ဖွယ်ကောင်းသည့် မီးငရဲမင်းအဖြစ် ဖန်ဆင်းခံရသည်မဟုတ်။ သမ္မာကျမ်းစာပါ “ငရဲ” သည် စာတန်၏ဘုံဗိမာန်မဟုတ်ပါ။ ၎င်းသည် လူသားတို့၏ သင်္ချိုင်းမျှသာဖြစ်သည်။—တမန်တော် ၂:၂၅-၂၇; ဗျာဒိတ် ၂၀:၁၃၊ ၁၄။
စာတန်သည် မူလအစက ‘အမှန်တရားတွင်’ ရှိခဲ့သည်။ တစ်ချိန်က သူသည် ဘုရားသခင်၏စုံလင်သော . . . ဝိညာဉ်သားတစ်ပါးအဖြစ် ယေဟောဝါ၏ကောင်းကင်မိသားစုတွင် ပါဝင်ခဲ့သည်။ သို့သော် သူသည် ‘အမှန်တရား၌မတည်မနေ’ ခဲ့ချေ။ သူ့နည်းသူ့ဟန်၊ မုသားနှင့်ဆိုင်သော သူ့မူများကို သာ၍နှစ်သက်ခဲ့သည်။ ‘သူရှေးဦးစွာမှစ’ ခဲ့ချိန်သည် ဘုရားသခင်၏ကောင်းကင်သားတစ်ဦးအဖြစ် ဖန်ဆင်းခံခဲ့ရချိန်တွင်မဟုတ်ဘဲ ယေဟောဝါအား စိတ်လိုကိုယ်လျောက် ပုန်ကန်၍ အာဒံနှင့် ဧဝကို သူလိမ်လည်ပြောဆိုခဲ့ချိန်တွင်ဖြစ်သည်။ စာတန်သည် မောရှေအချိန်က ယေဟောဝါအား ဆန့်ကျင်ပုန်ကန်ခဲ့ကြသောသူတို့နှင့်တူသည်။ သူတို့နှင့်ပတ်သက်၍ ကျွန်ုပ်တို့ဤသို့ဖတ်ရသည်– “သူတို့သည် ယိုယွင်းကြပြီ။ ဘုရားသခင်၏သားမဟုတ်၊ အညစ်အကြေးကပ်ကြ၏။ သဘောကောက်၍ ဖောက်ပြန်သောအမျိုးဖြစ်ကြ၏။” (တရားဟောရာ ၃၂:၅) စာတန်နှင့်ပတ်သက်၍လည်း ထိုနည်းထပ်တူဆိုနိုင်သည်။ သူသည် ပုန်ကန်ပြီးနောက် အာဒံနှင့် ဧဝသာမက လူ့မိသားစုတစ်ရပ်လုံး သေဆုံးရခြင်း၏တရားခံဖြစ်လာသောအခါ “လူအသက်ကိုသတ်သောသူ” ဖြစ်လာခဲ့သည်။—ရောမ ၅:၁၂။
မနာခံသော ကောင်းကင်တမန်များ
စာတန်နှင့်အတူ အခြားကောင်းကင်တမန်များ ပါဝင်ပုန်ကန်ခဲ့ကြသည်။ (လုကာ ၁၁:၁၄၊ ၁၅) ထိုကောင်းကင်တမန်များသည် နောဧအချိန်က “မိမိတို့နေရာအရပ်ကိုစွန့်ပစ်” ၍ “လူသမီးတို့” နှင့် လိင်ဆက်ဆံပျော်ပါးရန် လူ့ကိုယ်ခန္ဓာကိုယူတင်ခဲ့ကြသည်။ (ယုဒ ၆; ကမ္ဘာဦး ၆:၁-၄; ၁ ပေတရု ၃:၁၉၊ ၂၀) “ကောင်းကင်ကြယ်သုံးစုတစ်စု” သို့မဟုတ် . . . ဝိညာဉ်သတ္တဝါအနည်းစုမှာ ဤလမ်းစဉ်ကိုလိုက်ခဲ့ကြပြီ။—ဗျာဒိတ် ၁၂:၄။
အဆင့်မြင့်ပုံဆောင်စကားများပါသည့် ဗျာဒိတ်ကျမ်းက စာတန်ကို “အဆင်းနီသောနဂါးကြီး” အဖြစ်ပုံဖော်ထားသည်။ (ဗျာဒိတ် ၁၂:၃) အဘယ်ကြောင့်နည်း။ သူ့၌ ကြောက်လန့်စရာ အလွန်အရုပ်ဆိုးသောခန္ဓာကိုယ် ရှိသောကြောင့်မဟုတ်ပါ။ အမှန်မှာ . . . ဝိညာဉ်သတ္တဝါများ၌ အဘယ်ခန္ဓာမျိုးရှိကြောင်းကို ကျွန်ုပ်တို့မသိကြချေ၊ သို့သော် ဖြစ်နိုင်ဖွယ်ရာမှာ စာတန်သည် အခြားကောင်းကင်တမန် . . . ဝိညာဉ်သတ္တဝါတို့နှင့် ထူးမခြားနားပင်ဖြစ်ပေမည်။ သို့တစေ “အဆင်းနီသောနဂါးကြီး” က စာတန်၏ ငမ်းငမ်းတက်လုယက်ခြင်း၊ ထိတ်လန့်ဖွယ်ရာဖြစ်ခြင်း၊ တန်ခိုးရှိခြင်းနှင့် အဖျက်သဘောရှိခြင်းတို့ကို ကောင်းစွာပုံဖော်၏။
စာတန်နှင့် နတ်ဆိုးများသည် ယခု အလွန်ပင်ကန့်သတ်ခံရကြ၏။ တစ်ချိန်က လူ့အသွင်ကို သူတို့ယူတင်နိုင်ခဲ့သကဲ့သို့ ယခုမပြုလုပ်နိုင်ကြတော့ချေ။ ၁၉၁၄ ခုနှစ်တွင် ခရစ်တော်၏လက်တော်၌ ဘုရားသခင်၏နိုင်ငံတော် တည်ထောင်ပြီးနောက် များမကြာမီတွင် သူတို့သည် ကမ္ဘာမြေပေါ်သို့ ချပစ်ခံခဲ့ရ၏။—ဗျာဒိတ် ၁၂:၇-၉။
စာတန်သည် အောင်နိုင်ရန်ခက်သည့် ရန်သူကြီးဖြစ်
သို့ဖြစ်သည့်တိုင် စာတန်သည် အောင်နိုင်ရန်ခက်ဆဲပင်။ သူသည် “ဟောက်သောခြင်္သေ့ကဲ့သို့ အဘယ်သူကိုမျိုရမည်နည်းဟူ၍ လှည့်လည်ရှာဖွေလျက်ရှိ၏။” (၁ ပေတရု ၅:၈) သူသည် ကျွန်ုပ်တို့၏မစုံလင်သောသွေးသားခန္ဓာကိုယ်ထဲ ကိန်းအောင်းနေသည့် မသဲကွဲသော မကောင်းဆိုးဝါးမျှမဟုတ်ချေ။ ကျွန်ုပ်တို့၏အပြစ်ပြုလိုသောစိတ်ကို နေ့စဉ် ဆိုင်ပြိုင်တိုက်လှန်နေကြရသည်မှာ မလွဲဧကန်ဖြစ်သည်။ (ရောမ ၇:၁၈-၂၀) သို့သော် အမှန်စင်စစ် ဆိုင်ပြိုင်တိုက်လှန်နေကြရသည်မှာ “လော[က]မှောင်မိုက်၌အစိုးတရပြုလုပ်သော မင်းတို့နှင့်လည်းကောင်း၊ မိုးကောင်းကင်၌နေသော နတ်ဆိုးတို့နှင့်လည်းကောင်း” ဖြစ်သည်။—ဧဖက် ၆:၁၂။
စာတန်၏သြဇာ မည်မျှကျယ်ပြန့်သနည်း။ တမန်တော်ယောဟန်က “လော[က]သားအပေါင်းတို့သည် [စာတန်]၏လက်၌ရှိကြသည်” ဟုဆိုသည်။ (၁ ယောဟန် ၅:၁၉) ကျွန်ုပ်တို့သည် စာတန်ရှိကြောင်းကို စိတ်စွဲလမ်းနေခြင်း သို့မဟုတ် သူ့ကို အယူသီးစွာ ကြောက်ရွံ့ခြင်းကြောင့် ကြက်သေသေသည့်အဖြစ်မျိုး မခံလိုကြချေ။ သို့သော် အမှန်တရားကို ကျွန်ုပ်တို့မမြင်စေရန်နှင့် ဘုရားသခင်အပေါ် တည်ကြည်မှုချိုးဖျက်စေရန် သူ၏ကြိုးပမ်းမှုများကို သတိထားနေဖို့ကောင်းပေသည်။—ယောဘ ၂:၃-၅; ၂ ကောရိန္သု ၄:၃၊ ၄။
စာတန်သည် ဘုရားသခင့်အလိုတော်ကို ဆောင်လိုသူတို့အား ရက်စက်ကြမ်းကြုတ်သောနည်းများဖြင့် အမြဲတစေတိုက်ခိုက်သည်မဟုတ်ချေ။ ရံဖန်ရံခါ သူသည် မိမိကိုယ်ကို “လင်းသောကောင်းကင်တမန်” ပုံဖမ်းပေမည်။ တမန်တော်ပေါလုက ဤသို့ရေးသားရာတွင် ခရစ်ယာန်များကို ထိုဘေးအန္တရာယ်အကြောင်း သတိပေးခဲ့သည်– “မြွေသည် မိမိပရိယာယ်အားဖြင့် ဧဝကိုလှည့်စားသကဲ့သို့၊ သင်တို့သည် စိတ်ဆွေးမြေ့ယိုယွင်း၍၊ ခရစ်တော်ကိုအကြွင်းမဲ့ချစ်သောစိတ်ပျောက်မည်ဟု စိုးရိမ်ခြင်းရှိ၏။”—၂ ကောရိန္သု ၁၁:၃၊ ၁၄။
သို့ဖြစ်၍ ကျွန်ုပ်တို့သည် ‘. . . သတိရှိရန်၊ သတိနှင့်စောင့်နေရန်၊ ယုံကြည်ခြင်း၌တည်ကြည်လျက် ထိုစာတန်ကိုဆီးတားရန်’ လိုသည်။ (၁ ပေတရု ၅:၈၊ ၉၊ သမ္မာ; ၂ ကောရိန္သု ၂:၁၁) မှော်အတတ်နှင့်ဆက်နွှယ်သော အရာတစ်ခုခုနှင့် ပတ်သက်ခြင်းအားဖြင့် စာတန်၏လက်ခုပ်ထဲရောက်သွားခြင်းကို ရှောင်ရှားပါလေ။ (တရားဟောရာ ၁၈:၁၀-၁၂) သမ္မာကျမ်းစာကို ဝီရိယစိုက်ထုတ်လေ့လာသော ကျောင်းသားကောင်းတစ်ဦး ဖြစ်ပါ၊ ယေရှုခရစ်သည် စာတန်၏စုံစမ်းခြင်းခံခဲ့ရသောအခါ ဘုရားသခင်နှုတ်မြွက်စကားတော်ကို ထပ်တလဲလဲ ကိုးကားခဲ့ကြောင်း သတိရပါ။ (မဿဲ ၄:၄၊ ၇၊ ၁၀) ဘုရားသခင့် ဝိညာဉ်တော်ရဖို့အတွက် ဆုတောင်းပါ။ စာတန်အလွန်အားပေးအားမြှောက်ပြုသော ဇာတိပကတိအကျင့်များကို ရှောင်ရှားနိုင်ရန် ယင်း၏အသီးများက ကျွန်ုပ်တို့ကိုကူညီပေးနိုင်သည်။ (ဂလာတိ ၅:၁၆-၂၄) ထို့အပြင် စာတန်နှင့် သူ့နတ်ဆိုးများ၏ဖိစီးမှုကို တစ်နည်းနည်းဖြင့်ခံရသည်ဟု သင်ခံစားမိသောအခါ ယေဟောဝါထံ စိတ်အားထက်သန်စွာဆုတောင်းပါ။—ဖိလိပ္ပိ ၄:၆၊ ၇။
စာတန်ကို ကြောက်ရွံ့တုန်လှုပ်နေစရာမလိုပေ။ စာတန်ပြုလုပ်နိုင်သည့် မည်သည့်အရာမှမဆို အမှန်တကယ်ကာကွယ်ပေးမည်ဟု ယေဟောဝါကတိပြုတော်မူသည်။ (ဆာလံ ၉၁:၁-၄; သု. ၁၈:၁၀; ယာကုပ် ၄:၇၊ ၈) တမန်တော်ပေါလုက “သခင်ဘုရားအားဖြင့်လည်းကောင်း၊ တန်ခိုးတော်အရှိန်အားဖြင့်လည်းကောင်း ခိုင်ခံ့ခြင်းရှိကြလော့” ဟုဆိုသည်။ သို့ဖြစ်လျှင် သင်သည် “[စာတန်]၏ပရိယာယ်တို့ကို ဆီးတားနိုင်မည်။”—ဧဖက် ၆:၁၀၊ ၁၁။
[စာမျက်နှာ ၅ ပါ ရုပ်ပုံ]
စာတန်သည် တကယ့်ပုဂ္ဂိုလ်တစ်ပါးဖြစ်ကြောင်း ယေရှုသိတော်မူ၏
[စာမျက်နှာ ၆ ပါ ရုပ်ပုံ]
“လော[က]သားအပေါင်းတို့သည် [စာတန်] ၏လက်၌ရှိကြသည်”
[Credit Line]
NASA photo
[စာမျက်နှာ ၇ ပါ ရုပ်ပုံ]
ဘုရားသခင့်နှုတ်မြွက်စကားတော်ကို လေ့လာခြင်းနှင့် မှန်မှန်ဆုတောင်းခြင်းဖြင့် စာတန်ကိုဆီးတားပါ