ဆုံးဖြတ်ချက် ကောင်းများချနိုင်ပုံ
ဆုံးဖြတ်ချက် ကောင်းများချနိုင်ပုံ
လွတ်လပ်စွာဆုံးဖြတ်ပိုင်ခွင့်သည် ဘုရားသခင်ထံမှ ဆုဖြစ်၏။ လွတ်လပ်စွာဆုံးဖြတ်ပိုင်ခွင့်မရှိလျှင် ကျွန်ုပ်တို့သည် မိမိတို့လုပ်ဆောင်မှုများအပေါ် ထိန်းချုပ်နိုင်စွမ်းမရှိဘဲ စက်ရုပ်ပမာမျှသာဖြစ်လိမ့်မည်။ သို့သော် ယင်းကြောင့် အခက်အခဲများကို ကျွန်ုပ်တို့ကြုံတွေ့ကြရသည်။ လွတ်လပ်စွာဆုံးဖြတ်ပိုင်ခွင့်ရရှိထားရာ ကျွန်ုပ်တို့ဘဝတစ်လျှောက်လုံးတွင် ဆုံးဖြတ်ချက်များချရမည်ဖြစ်သည်။
အမှန်ဆိုရလျှင် ဆုံးဖြတ်ချက်များစွာသည် အရေးမကြီးလှပေ။ အဘယ်အသက်မွေးဝမ်းကျောင်းအလုပ်ကို ရွေးချယ်မည်၊ အိမ်ထောင်ပြုမည်၊ မပြုမည် အစရှိသည့် အခြားဆုံးဖြတ်ချက်များသည် ကျွန်ုပ်တို့၏အနာဂတ်တစ်ခုလုံးကို ထိခိုက်နိုင်သည်။ အခြားသူများနှင့်ဆိုင်သော အခြားဆုံးဖြတ်ချက်များလည်းရှိ၏။ မိဘများ၏ဆုံးဖြတ်ချက်အချို့သည် သူတို့ကလေးများအပေါ် အကျိုးသက်ရောက်မှု များစွာရှိစေသည်။ ထို့ပြင် ကျွန်ုပ်တို့၏ဆုံးဖြတ်ချက်များစွာအတွက် ဘုရားသခင်ထံ စာရင်းရှင်းကြရမည်။—ရောမ ၁၄:၁၂။
အကူအညီလိုအပ်
ဆုံးဖြတ်ချက်ချခြင်းနှင့်ပတ်သက်လာလျှင် လူသားတို့၏မှတ်တမ်းမှာ မကောင်းလှပေ။ မှတ်တမ်းတင်ထားသော ကနဦးလူသား၏ဆုံးဖြတ်ချက်သည် ဆိုးကျိုးသက်ရောက်ခဲ့သည်။ ဧဝသည် ဘုရားသခင်အတိအလင်းတားမြစ်ထားသော အသီးကိုစားရန် ဆုံးဖြတ်ခဲ့၏။ တစ်ကိုယ်ကောင်းစိတ်ဖြင့် သူ၏ရွေးချယ်မှုသည် သူ့ခင်ပွန်းနှင့်အတူ ဘုရားသခင်ကိုအာခံစေခဲ့ရာ လူသားမျိုးနွယ်တစ်ရပ်လုံးပါ အကြီးအကျယ်ဘေးတွေ့ခဲ့ရလေသည်။ ကိစ္စရပ်များစွာတွင် လူသားတို့သည် ဖြောင့်မတ်သောမူများထက် ကိုယ့်အကျိုးကိုသာကြည့်၍ ဆုံးဖြတ်ချက်ချတတ်ကြသည်။ (ကမ္ဘာဦး ၃:၆-၁၉; ယေရမိ ၁၇:၉) အရေးကြီးသောဆုံးဖြတ်ချက်များချရန် လိုအပ်လာသည့်အခါ ကျွန်ုပ်တို့၌ကန့်သတ်ချက်များရှိကြောင်း မကြာခဏသတိပြုမိလေ့ရှိကြသည်။
ထို့ကြောင့် အရေးကြီးဆုံးဖြတ်ချက်များချရချိန်တွင် လူသားတို့ထက် သာ၍ကြီးမြတ်သောရင်းမြစ်များမှ အကူအညီကို လူအများ ရှာဖွေတတ်ကြသည်မှာ အံ့ဩစရာမဟုတ်ချေ။ နေဗုခဒ်နေဇာသည် စစ်ဆင်နွှဲနေချိန်၌ ဆုံးဖြတ်ချက်ချရသော အဖြစ်အပျက်တစ်ခုကို ကျမ်းစာက မှတ်တမ်းတင်ထားသည်။ သူသည် ရှင်ဘုရင်တစ်ပါးဖြစ်သော်လည်း “ဗေဒင်တွက်” ရန်လိုအပ်သည်ဟု ထင်မှတ်ကာ နတ်ဝိညာဉ်များကို မေးမြန်းလေသည်။ ထို့ကြောင့် မှတ်တမ်းက ဤသို့ဆိုသည်– “မြားတို့ကိုရောနှော [“လှုပ်ခါ၊” ကဘ] ၏။ တေရပ်ရုပ်တုတို့ကို မေးမြန်း၏။ အသည်းကိုကြည့်ရှု၏။” (ယေဇကျေလ ၂၁:၂၁) အလားတူစွာပင် ယနေ့လည်း လူများစွာတို့သည် ဗေဒင်ဆရာများနှင့် နက္ခတ်ဗေဒပညာရှင်များကို မေးမြန်းကြပြီး အခြားနည်းများဖြင့် နတ်ဝိညာဉ်များ၏အကူအညီကို ခံယူကြသည်။ သို့သော် ယင်းတို့သည် လှည့်ဖြားတတ်ပြီး လမ်းလွဲစေသည်။—ဝတ်ပြုရာ ၁၉:၃၁။
အပြည့်အဝယုံကြည်အားထားနိုင်ပြီး သမိုင်းတစ်လျှောက်တွင် လူသားများကို ပညာရှိစွာဆုံးဖြတ်ချက်များချစေခဲ့သူတစ်ပါးရှိသည်။ ထိုသူကား ယေဟောဝါဘုရားသခင်ပင်ဖြစ်သည်။ ဥပမာ၊ ဘုရားသခင်သည် ရှေးအချိန်က မိမိ၏ဣသရေလလူမျိုး အရေးကြီးအခြေအနေများကို ရင်ဆိုင်ရသောအခါ စာရေးတံချရသည့် မြင့်မြတ်သောမဲဖြစ်နိုင်ဖွယ်ရှိသော ဥရိမ်နှင့်သုမိမ်ကို ထိုလူမျိုးအား ပေးထားသည်။ ဥရိမ်နှင့်သုမိမ်အားဖြင့် ယေဟောဝါသည် မေးခွန်းများကို တိုက်ရိုက်အဖြေပေး၍ ဣသရေလလူမျိုးမှအကြီးအကဲများအား ကိုယ်တော်၏အလိုတော်နှင့်အညီ ဆုံးဖြတ်ချက်များချနိုင်ရန် ကူညီပေးခဲ့၏။—ထွက်မြောက်ရာ ၂၈:၃၀; ဝတ်ပြုရာ ၈:၈; တောလည်ရာ ၂၇:၂၁။
နောက်ဥပမာကို သုံးသပ်ကြည့်ပါ။ ဂိဒေါင်သည် မိဒျန်လူမျိုးကိုတိုက်ခိုက်ရန် ဣသရေလစစ်တပ်ကို ဦးဆောင်ဖို့လိုအပ်လာသောအခါ ဤမြင့်မြတ်လှသောအခွင့်အရေးကို လက်ခံသင့်၊ မသင့် ဆုံးဖြတ်ချက်ချရသည်။ ယေဟောဝါသည် မိမိအား တကယ်ကူညီပေးမည်ကိုအသေအချာသိလို၍ အံ့ဖွယ်နိမိတ်တစ်ခုကို ဂိဒေါင်တောင်းခဲ့သည်။ သိုးမွေးသည် တစ်ညလုံးနှင်းစို၍ မြေတစ်ပြင်လုံး သွေ့ခြောက်တော်မူပါစေဟု သူဆုတောင်းခဲ့၏။ နောက်တစ်ညတွင် သူက မြေတစ်ပြင်လုံးသည် နှင်းစို၍ သိုးမွေးသွေ့ခြောက်ပါစေဟု တောင်းလျှောက်ပြန်သည်။ ယေဟောဝါသည် ဂိဒေါင်တောင်းဆိုခဲ့သည့် နိမိတ်များကို ကြင်နာစွာပြသတော်မူခဲ့သည်။ ရလဒ်ကား ဂိဒေါင်သည် ဘုရားသခင့်အကူအညီဖြင့် ဆုံးဖြတ်ချက်အမှန်ကိုချပြီး ဣသရေလရန်သူများကို လုံးလုံးချေမှုန်းခဲ့လေသည်။—တရားသူကြီး ၆:၃၃-၄၀; ၇:၂၁၊ ၂၂။
ယနေ့ကောအသို့နည်း
ယနေ့လည်း ယေဟောဝါ၏ကျေးကျွန်များ အရေးကြီးဆုံးဖြတ်ချက်များချဖို့လိုအပ်လာသည့်အခါ သူတို့ကို ကိုယ်တော်ကူညီပေးနေဆဲပင်။ မည်သို့အားဖြင့်နည်း။ ဂိဒေါင်နည်းတူ ကျွန်ုပ်တို့သည် ‘သိုးမွေးစမ်းသပ်မှုများ’ ဖြစ်သည့် မည်သို့ပြုမူသင့်ကြောင်း ယေဟောဝါထံမှ နိမိတ်များတောင်းဆိုသင့်သလော။ ဇနီးမောင်နှံတစ်စုံသည် ဘုရားသခင့်နိုင်ငံတော်ဟောပြောသူများ အလွန်လိုအပ်လျက်ရှိသောနေရာတွင် သွားအမှုဆောင်ရန် ပြောင်းရွှေ့သင့်၊ မသင့် သိလိုခဲ့ကြသည်။ ဆုံးဖြတ်ချက်ချနိုင်ရန် အကူအညီအတွက် စမ်းသပ်မှုတစ်ခုကို သူတို့စီစဉ်ခဲ့ကြသည်။ သူတို့၏အိမ်ကို ဈေးနှုန်းသတ်မှတ်ပြီး ရောင်းမည်။ အိမ်ကို သတ်မှတ်ထားသောရက်၊ သတ်မှတ်ထားသောဈေးနှုန်း သို့မဟုတ် ထိုထက်မကသောဈေးဖြင့် ရောင်းရမည်ဆိုလျှင် မိမိတို့ကို ဘုရားသခင်ပြောင်းရွှေ့စေလိုသည်ဟု သူတို့ယူမှတ်ကြမည်ဖြစ်သည်။ သို့သော် အိမ်ကိုမရောင်းရလျှင် မိမိတို့ကို ဘုရားသခင်မပြောင်းရွှေ့လိုဟု သူတို့ယူမှတ်ကြမည်ဖြစ်သည်။
အိမ်မရောင်းရပါ။ ၎င်းကြောင့် ယေဟောဝါသည် သာ၍လိုအပ်လျက်ရှိသောနေရာတွင် ဤဇနီးမောင်နှံကို သွားအမှုဆောင်ရန် အလိုမရှိဟု တင်ပြနေပါသလော။ အမှန်ဆိုသော် ယေဟောဝါသည် မိမိ၏ကျေးကျွန်များအတွက် အဘယ်အရာပြုလုပ်ပေးသည်၊ မပြုလုပ်ပေးသည်ကို ယတိပြတ်ပြောခြင်းသည် ရောင့်တက်ရာရောက်ပေမည်။ ယနေ့ ယေဟောဝါသည် ကျွန်ုပ်တို့အတွက် မိမိ၏အလိုတော်ကို ဘယ်သောအခါမျှ ကြားဖြတ်ဝင်ရောက်ဖော်ပြပေးမည်မဟုတ်ဟု မပြောနိုင်ချေ။ (ဟေရှာယ ၅၉:၁) သို့ရာတွင် ကျွန်ုပ်တို့၏အရေးကြီးသောဆုံးဖြတ်ချက်များကို ဘုရားသခင်ကြားဝင်ဆုံးဖြတ်ပေးရန် ကျွန်ုပ်တို့မျှော်လင့်ပိုင်ခွင့်မရှိချေ။ ဂိဒေါင်ပင်လျှင် သူ့အသက်တာတွင် များသောအားဖြင့် ယေဟောဝါထံမှ အံ့ဖွယ်နိမိတ်များမပါဘဲ ဆုံးဖြတ်ချက်များ ချခဲ့ရ၏!
သို့သော် သမ္မာကျမ်းစာက ဘုရားသခင်၏လမ်းညွှန်မှု ရရှိနိုင်သည်ဟုဆိုသည်။ ကျွန်ုပ်တို့အချိန်ကာလနှင့်ပတ်သက်၍ ဤသို့ကြိုဟောသည်– “သင်သည် လက်ယာဘက်၊ လက်ဝဲဘက်သို့လမ်းလွဲလျှင် ‘ဤမည်သောလမ်းသည်မှန်၏။ ဤလမ်း၌သွားလော့’ ဟုသင့်နောက်၌ ပြောသောစကားသံကို ကိုယ်နားနှင့်ကြားရလိမ့်မည်။” (ဟေရှာယ ၃၀:၂၁) ကျွန်ုပ်တို့သည် အရေးကြီးသောရွေးချယ်မှုများ ပြုရသည့်အခါ ကျွန်ုပ်တို့၏ဆုံးဖြတ်ချက်များမှာ ဘုရားသခင်၏အလိုတော်နှင့်အညီဖြစ်ပြီး ကိုယ်တော်၏မြင့်မြတ်သောဉာဏ်ပညာကို ထင်ဟပ်စေရန် အသေအချာသိနိုင်ဖို့ အကူအညီတောင်းဆိုခြင်းသည် တကယ်ပင်လျောက်ပတ်ပေ၏။ မည်သို့အားဖြင့်နည်း။ ကိုယ်တော်၏နှုတ်မြွက်စကားတော်ကို စူးစမ်းလေ့လာပြီး ယင်းကို ‘ကျွန်ုပ်တို့ခြေရှေ့မှာ မီးခွက်ဖြစ်၍ ကျွန်ုပ်တို့လမ်းခရီးကိုလင်းစေ’ ခြင်းအားဖြင့်ဖြစ်သည်။ (ဆာလံ ၁၁၉:၁၀၅; သု. ၂:၁-၆) ဤသို့လုပ်ဆောင်ရန် ကျွန်ုပ်တို့သည် သမ္မာကျမ်းစာမှ တိကျမှန်ကန်သောအသိပညာကို ဆည်းပူးခြင်းအကျင့် ပျိုးထောင်ပေးဖို့လိုအပ်သည်။ (ကောလောသဲ ၁:၉-၁၁) ထို့ပြင် ဆုံးဖြတ်ချက်ချရမည့်အခါ ထိုကိစ္စနှင့်ဆက်နွှယ်နေသည့် ကျမ်းစာမူအားလုံးကို သေချာစွာရှာဖွေလေ့လာဖို့လိုသည်။ ဤသို့သောရှာဖွေလေ့လာမှုသည် ကျွန်ုပ်တို့အား “သာ၍အရေးကြီးသောအရာများကို သေချာစွာသိနိုင်” စေမည်။—ဖိလိပ္ပိ ၁:၉၊ ၁၀၊ ကဘ။
ယေဟောဝါသည် ကျွန်ုပ်တို့၏ဆုတောင်းသံကို နားညောင်းတော်မူလိမ့်မည်ဟု ယုံကြည်စိတ်ချစွာဖြင့်လည်း ကိုယ်တော်ထံ ကျွန်ုပ်တို့ဆုတောင်းသင့်သည်။ ကျွန်ုပ်တို့ဆုံးဖြတ်ချက်ချရမည့်ကိစ္စနှင့် ဆင်ခြင်သုံးသပ်နေသော ရွေးချယ်မှုများကို မေတ္တာရှင်ဘုရားသခင်အား ပြောပြရခြင်းသည် တကယ်ပင်စိတ်သက်သာမှုရရှိစေပါသည်တကား! ထို့နောက် ကျွန်ုပ်တို့သည် ဆုံးဖြတ်ချက်အမှန်ချနိုင်ရန် လမ်းညွှန်မှုကို ယုံကြည်စိတ်ချစွာ တောင်းဆိုနိုင်သည်။ သန့်ရှင်းသောဝိညာဉ်တော်သည် များသောအားဖြင့် သက်ဆိုင်သည့်ကျမ်းစာမူများကို အမှတ်ရစေမည် သို့မဟုတ် ကျွန်ုပ်တို့အခြေအနေနှင့်ဆက်နွှယ်သည့် ကျမ်းချက်တစ်ချက်ကို ပို၍ရှင်းလင်းစွာသဘောပေါက်နားလည်စေရန် ကူညီပေးမည်။—ယာကုပ် ၁:၅၊ ၆။
ကျွန်ုပ်တို့၏ဆုံးဖြတ်ချက်များကို ဆွေးနွေးတိုင်ပင်နိုင်မည့် အသင်းတော်မှရင့်ကျက်သူများကိုလည်း ယေဟောဝါပေးသနားထားသည်။ (ဧဖက် ၄:၁၁၊ ၁၂) သို့သော် အခြားသူများနှင့် တိုင်ပင်ဆွေးနွေးရာတွင် မိမိတို့ကြားလိုရာကိုပြောသည့်သူနှင့်မတွေ့မချင်း တစ်ယောက်ပြီးတစ်ယောက်ထံ ချဉ်းကပ်သူများ၏လမ်းစဉ်ကို မလိုက်လျှောက်သင့်ချေ။ ကြားလိုရာကိုပြောဆိုသူ၏အကြံပေးချက်ကိုမှ သူတို့လိုက်ကြ၏။ ရောဗောင်၏သတိပေးနမူနာကို ကျွန်ုပ်တို့သတိရသင့်သည်။ သူသည် အရေးကြီးဆုံးဖြတ်ချက်ချဖို့ လိုအပ်လာသောအခါ ဖခင်နှင့်အမှုထမ်းခဲ့ကြသော အသက်ကြီးသူများထံမှ အလွန်ကောင်းသောအကြံပေးချက်ကို ရရှိခဲ့သည်။ သို့သော် သူတို့၏ဆုံးမစကားကို လိုက်လျှောက်မည့်အစား မိမိနှင့်အတူကြီးပြင်းလာကြသူ ရွယ်တူချင်းများနှင့် ဆွေးနွေးတိုင်ပင်ခဲ့၏။ သူတို့၏အကြံပေးချက်ကိုလိုက်ခြင်းဖြင့် သူသည် ပညာမဲ့ဆုံးဖြတ်ချက်ကိုချခဲ့ရာ နောက်ဆုံး သူ၏နိုင်ငံအစိတ်အပိုင်းအတော်များများ ဆုံးရှုံးခဲ့ရသည်။—၃ ဓမ္မရာဇဝင် ၁၂:၁-၁၇။
အကြံပေးချက်ရလိုသည့်အခါ ဘဝတွင် အတွေ့အကြုံရှိသူ၊ ကျမ်းစာအသိပညာကောင်းစွာရှိသူ၊ ဖြောင့်မတ်သောမူများကို အလွန်လေးစားသူများထံမှ အကူအညီယူပါ။ (သု. ၁:၅; ၁၁:၁၄; ၁၃:၂၀) ဖြစ်နိုင်သည့်အခါတိုင်းတွင် သက်ဆိုင်သည့်မူများနှင့် သုတေသနပြုထားသည့် အချက်အလက်အားလုံးကို အချိန်ယူတွေးတောဆင်ခြင်ပါ။ ယေဟောဝါ၏နှုတ်မြွက်စကားတော်အလင်းအတိုင်း အရာများကို သင်တွေ့မြင်လာသောအခါ ဆုံးဖြတ်ချက်အမှန်ကိုချရန် ပိုမိုသိသာထင်ရှားလာလိမ့်မည်။—ဖိလိပ္ပိ ၄:၆၊ ၇။
ကျွန်ုပ်တို့ချသောဆုံးဖြတ်ချက်များ
ဆုံးဖြတ်ချက်အချို့ကို အလွယ်တကူချနိုင်သည်။ သက်သေခံခြင်းကိုရပ်တန့်ရန် မိန့်မှာခံရသောအခါ ယေရှုအကြောင်းဆက်မဟောဘဲမနေနိုင်ကြောင်း တမန်တော်များသိသောကြောင့် လူ၏စကားထက် ဘုရားသခင်၏စကားတော်ကို နားထောင်ရန် မိမိတို့၏ဆုံးဖြတ်ချက်ကို ဆဲန်ဟီဒရင်အား ချက်ချင်းအကြောင်းကြားခဲ့သည်။ (တမန်တော် ၅:၂၈၊ ၂၉) အချို့သောကိစ္စများကိုမူ သမ္မာကျမ်းစာက တိုက်ရိုက်မဖော်ပြထားသောကြောင့် ဆုံးဖြတ်ချက်ချဖို့ရန် အတော်အတန်စဉ်းစားဆင်ခြင်ဖို့လိုအပ်ပေမည်။ သို့တိုင် ကျမ်းစာမူများက အကောင်းဆုံး,ဆုံးဖြတ်ချက်ချနိုင်ရန် အလင်းဖြာပေးတတ်သည်။ ဥပမာ၊ ယနေ့ အပန်းဖြေနည်းအမျိုးမျိုးတို့သည် ယေရှုအချိန်တွင် မရှိခဲ့သော်လည်း ယေဟောဝါနှစ်သက်သည့်အရာ၊ မနှစ်သက်သည့်အရာတို့နှင့်ပတ်သက်၍ ကျမ်းစာတွင် ရှင်းလင်းပြတ်သားစွာဖော်ပြပေးထားသည်။ ထို့ကြောင့် အကြမ်းဖက်မှု၊ အကျင့်ယိုယွင်းမှု သို့မဟုတ် ပုန်ကန်မှုတို့ကို အားပေးအားမြှောက်ပြုသော အပန်းဖြေမှုကိုလိုက်စားကြသည့် မည်သည့်ခရစ်ယာန်မဆို ဆုံးဖြတ်ချက်ချမှားခဲ့ကြသည်။—ဆာလံ ၉၇:၁၀; ယောဟန် ၃:၁၉-၂၁; ဂလာတိ ၅:၁၉-၂၃; ဧဖက် ၅:၃-၅။
တစ်ခါတစ်ရံ ဆုံးဖြတ်ချက်နှစ်ခုစလုံးသည် မှန်ကန်ပေမည်။ အကူအညီသာ၍လိုအပ်လျက်ရှိသောနေရာတွင် အမှုထမ်းဆောင်ခြင်းသည် အခွင့်ထူးဖြစ်ပြီး ကောင်းချီးများစွာရရှိစေနိုင်၏။ သို့ရာတွင် အကြောင်းတစ်ခုခုကြောင့် ထိုသို့မပြုလုပ်ရန် တစ်ဦးတစ်ယောက်ဆုံးဖြတ်ခဲ့လျှင် သူသည် မိမိ၏အသင်းတော်တွင် ကောင်းစွာအမှုဆောင်နိုင်ပါသေးသည်။ တစ်ခါတစ်ရံ ကျွန်ုပ်တို့သည် ယေဟောဝါအား မည်မျှချစ်မြတ်နိုးကြောင်းကိုဖော်ပြရန်၊ သို့မဟုတ် ကျွန်ုပ်တို့၏အသက်တာတွင် အရေးကြီးဆုံးကား အဘယ်အရာဖြစ်ကြောင်းကိုဖော်ပြရန် အခွင့်ကောင်းရရှိသည့် ဆုံးဖြတ်ချက်နှင့်ကြုံရကြပေမည်။ ဤသို့ဖြင့် ယေဟောဝါသည် ကျွန်ုပ်တို့၏စိတ်နှလုံးအခြေအနေကိုဖော်ပြရန် ကျွန်ုပ်တို့၏လွတ်လပ်စွာရွေးချယ်ပိုင်ခွင့်ကို အသုံးပြုစေသည်။
ကျွန်ုပ်တို့၏ဆုံးဖြတ်ချက်များသည် သူတစ်ပါးကို မကြာခဏထိခိုက်လေ့ရှိ၏။ ဥပမာ၊ ပထမရာစုရှိခရစ်ယာန်များသည် ပညတ်တရား၏ချုပ်နှောင်မှုများစွာမှ လွတ်မြောက်လာသောကြောင့် ဝမ်းမြောက်ကြသည်။ ပမာပြရသော် ပညတ်တရားအောက်ရှိ မသန့်ရှင်းသောအစာကို သူတို့စားလိုလျှင် စားနိုင်သည်၊ မစားလိုလျှင် မစားဘဲနေနိုင်ပြီဖြစ်သည်။ သို့သော် ဤလွတ်လပ်ခွင့်ကို အသုံးပြု၊ မပြု ဆုံးဖြတ်ရာတွင် သူတစ်ပါး၏ကိုယ်ကိုကိုယ်သိသောစိတ်ကို ထောက်ထားဖို့ တိုက်တွန်းခံခဲ့ကြရသည်။ ယင်းနှင့်ပတ်သက်၍ ပေါလု၏ “ထိမိ၍လဲစရာအကြောင်းကိုမပြု” ကြနှင့်ဟူသောစကားများသည် ကျွန်ုပ်တို့ချလိုက်သော ဆုံးဖြတ်ချက်များစွာနှင့်သက်ဆိုင်နိုင်သည်။ (၁ ကောရိန္သု ၁၀:၃၃) သူတစ်ပါးကို ထိမိလဲစရာမဖြစ်စေလိုသည့် စိတ်ဆန္ဒသည် ကျွန်ုပ်တို့ဆုံးဖြတ်ချက်ချရမည့် ကိစ္စများစွာတွင် အကူအညီဖြစ်ပေလိမ့်မည်။ ထို့ပြင် အိမ်နီးချင်းကိုချစ်ရမည်ဟူသည်ကား ဒုတိယအကြီးမြတ်ဆုံးပညတ်ဖြစ်၏။—မဿဲ ၂၂:၃၆၊ ၃၉၊ ကဘ။
ကျွန်ုပ်တို့ဆုံးဖြတ်ချက်များ၏အကျိုးရလဒ်
ကိုယ်ကိုကိုယ်သိသောစိတ်ကြည်လင်စွာဖြင့် ကျမ်းစာမူများကိုအခြေခံပြီး ချလိုက်သောဆုံးဖြတ်ချက်များသည် နောက်ဆုံးတွင် အမြဲပင်အကျိုးရလဒ်ကောင်းများ ထွက်ပေါ်စေပါလိမ့်မည်။ လတ်တလောတွင် ကိုယ်ကျိုးစွန့်ဖို့လိုပေမည်။ တမန်တော်များသည် ယေရှုအကြောင်းဆက်ဟောပြောမည်ဟု သူတို့၏ဆုံးဖြတ်ချက်ကို ဆဲန်ဟီဒရင်အား ဖော်ပြသောအခါ သူတို့သည် အကျဉ်းထောင်မှမလွှတ်မီ ရိုက်နှက်ခံခဲ့ရသည်။ (တမန်တော် ၅:၄၀) ရှာဒရက်၊ မေရှက်နှင့် အဗေဒနေဂေါ ဟေဗြဲလူသုံးဦးတို့သည် နေဗုခဒ်နေဇာ၏ရွှေရုပ်ပုံကို ဦးမချဟုဆုံးဖြတ်လိုက်သောအခါ အသက်အန္တရာယ်နှင့်ကြုံခဲ့ကြရသည်။ သူတို့၏ဆုံးဖြတ်ချက်သည် သေနိုင်သည့်ဖြစ်နိုင်ခြေများကိုရင်ဆိုင်ရန် အသင့်ရှိခဲ့ကြသည်။ သို့သော် သူတို့သည် ဘုရားသခင့်မျက်နှာတော်နှင့်တွေ့ပြီး ကောင်းချီးရရှိမည်ကိုလည်း သိခဲ့ကြ၏။—ဒံယေလ ၃:၁၆-၁၉။
ကျွန်ုပ်တို့သည် အသိစိတ်ရှိရှိဆုံးဖြတ်ချက်ချပြီးနောက် အခက်အခဲများကြုံတွေ့ရလျှင် ဆုံးဖြတ်ချက်မှားသွားပြီဟု ယူဆစရာအကြောင်းမရှိပေ။ “အချိန်နှင့်ကြိုတင်မမြင်ရသောဖြစ်ပျက်မှု” ကြောင့်စိတ်ရင်းမှန်ဖြင့်ချသော ဆုံးဖြတ်ချက်များပင်လျှင် ဆိုးကျိုးပေါ်စေနိုင်သည်။ (ဒေ. ၉:၁၁၊ ကဘ) ထို့ပြင် ယေဟောဝါသည် တစ်ခါတစ်ရံ ကျွန်ုပ်တို့ကတိကဝတ်၏အတိမ်အနက်ကို စမ်းသပ်ရန် ဘေးတွေ့ခွင့်ပြုသည်။ ယာကုပ်သည် ကောင်းချီးမရမီ ကောင်းကင်တမန်တစ်ပါးနှင့် တစ်ညလုံးနပန်းလုံးခဲ့ရသည်။ (ကမ္ဘာဦး ၃၂:၂၄-၂၆) ကျွန်ုပ်တို့သည်လည်း မှန်ကန်ရာကိုပြုလုပ်နေလျက်ပင် အခက်အခဲနှင့်နပန်းလုံးနေရပေမည်။ သို့သော် ကျွန်ုပ်တို့၏ဆုံးဖြတ်ချက်များသည် ဘုရားသခင်၏အလိုတော်နှင့်အညီဖြစ်လျှင် ကျွန်ုပ်တို့ခံနိုင်ရည်ရှိရန် ကိုယ်တော်ကူညီပေးပြီး နောက်ဆုံး၌ ကောင်းချီးပေးမည်ကို ယုံကြည်စိတ်ချနိုင်ပါသည်။—၂ ကောရိန္သု ၄:၇။
ထို့ကြောင့် အရေးကြီးဆုံးဖြတ်ချက်တစ်ခုချသောအခါ သင့်ဉာဏ်ပညာအပေါ် မှီခိုအားမထားပါနှင့်။ သက်ဆိုင်သည့် ကျမ်းစာမူများကို ရှာဖွေပါ။ ယင်းအကြောင်းကို ယေဟောဝါအား ပြောပြပါ။ ဖြစ်နိုင်မည်ဆိုလျှင် ရင့်ကျက်သောခရစ်ယာန်ချင်းများနှင့် တိုင်ပင်ဆွေးနွေးပါ။ ထို့နောက် သတ္တိရှိပါ။ သင်၏ဘုရားသခင်ပေး လွတ်လပ်စွာရွေးချယ်ပိုင်ခွင့်ကို အကျိုးသင့်အကြောင်းသင့်နည်းဖြင့် အသုံးချပါ။ ဆုံးဖြတ်ချက်ကောင်းချပြီး သင်၏နှလုံးသည် ယေဟောဝါ၏ရှေ့မှောက်တော်တွင် ဖြောင့်မတ်ကြောင်း ကိုယ်တော့်အားဖော်ပြပါလေ။
[စာမျက်နှာ ၂၈ ပါ ရုပ်ပုံ]
အရေးကြီးဖြတ်ချက်များမချမီ ဘုရားသခင့်နှုတ်မြွတ်စကားတော်ကို စူးစမ်းပါ
[[စာမျက်နှာ ၂၈၊ ၂၉ ပါ ရုပ်ပုံ]
သင်,ချရမည့်ဆုံးဖြတ်ချက်များကို ယေဟောဝါအားပြောပြပါ
[စာမျက်နှာ ၃၀ ပါ ရုပ်ပုံ]
သင်၏အဓိကဆုံးဖြတ်ချက်များကို ရင့်ကျက်သောခရစ်ယာန်များနှင့်ဆွေးနွေးနိုင်