တစ်ချိန်က ကျွန်မတို့သည် မြေခွေးများဖြစ်ခဲ့—ယခုသိုးများဖြစ်နေ!
တစ်ချိန်က ကျွန်မတို့သည် မြေခွေးများဖြစ်ခဲ့—ယခုသိုးများဖြစ်နေ!
စကီနာနှင့် ကျွန်မသည် ငယ်စဉ်က အိမ်နီးချင်းများဖြစ်ကြ၏။ စကီနာသည် လူကောင်ထွား၍ သန်မာသော်လည်း ကျွန်မသည်ညှက်၍ပိန်သည်။ မကြာခဏပင် အော်ကြီးဟစ်ကျယ်ငြင်းခုံလေ့ရှိသော်လည်း တစ်နေ့တွင် ကျွန်မတို့ အကြီးအကျယ်လုံးထွေးသတ်ပုတ်ခဲ့ကြ၏။ ထိုနေ့မှစ၍ နောက်နောင် တစ်ဦးနှင့်တစ်ဦးစကားလည်းမပြော နှုတ်လည်းမဆက်ကြတော့ချေ။ နောက်ဆုံး၌ ကျွန်မတို့နှစ်ဦးစလုံး အိမ်ပြောင်းရွှေ့သွားကြပြီး အဆက်အသွယ်ပြတ်သွားခဲ့ကြသည်။
၁၉၉၄ ခုနှစ်တွင် ယေဟောဝါသက်သေများနှင့် ကျွန်မသမ္မာကျမ်းစာစလေ့လာခဲ့ရာ တဖြည်းဖြည်း ကျွန်မ၏စရိုက်ပြောင်းလဲလာခဲ့သည်။ နောက်လေးနှစ်အကြာတွင် ဘာရွန်ဒီနိုင်ငံ၊ ဘူဂျန်ဘူရာမြို့မှာကျင်းပသော ကျွန်မတို့၏အထူးအစည်းအဝေးနေ့ကို တက်ရောက်စဉ် စကီနာနှင့် အမှတ်မထင်ပြန်ဆုံခဲ့၍ အံ့သြသွားရသည်။ သူစည်းဝေးလာတက်ရောက်သည့်အတွက် ကျွန်မဝမ်းသာသော်လည်း ကျွန်မတို့ အေးတိအေးစက်သာနှုတ်ဆက်ခဲ့ကြသည်။ ထိုနေ့နှောင်းပိုင်းတွင် နှစ်ခြင်းယူရန်ထိုင်နေသူတို့အကြား သူ့ကို တွေ့လိုက်ရသောအခါ ကျွန်မအံ့အားသင့်ခဲ့၏! သူသည်လည်း လုံးဝပြောင်းလဲသွားပေပြီ။ သူသည် ကျွန်မနှင့် မကြာခဏရန်ဖြစ်ခဲ့သည့် ရန်လိုသောပုဂ္ဂိုလ်တစ်ဦး လုံးဝမဟုတ်တော့ချေ။ ဘုရားသခင်ထံ သူ၏ဆက်ကပ်အပ်နှံခြင်းကို ရေတွင်နှစ်ခြင်းခံခြင်းဖြင့် လူအများရှေ့သက်သေထူခဲ့ခြင်းကို တွေ့ မြင်ရခြင်းက တကယ်ဝမ်းသာစရာကောင်းလေစွ!
ရေထဲမှ သူထွက်လာသောအခါ သူ့ထံ မြန်မြန်ဆန်ဆန်သွားလိုက်ပြီး သူ့ကိုဖက်ကာ နားနားကပ်၍ ဤသို့တိုးတိုးပြောလိုက်သည်– “ငါတို့ ဘယ်လောက်တောင် ရန်ဖြစ်ခဲ့ကြသလဲဆိုတာ မှတ်မိသေးလား။” သူက “မှတ်မိတာပေါ့၊ ဒါပေမဲ့ အဲ့ဒါဟာအတိတ်မှာကျန်ခဲ့ပြီ။ အခု ငါလူသစ်ဖြစ်သွားပြီ” ဟုပြောခဲ့သည်။
မဟာသိုးထိန်းရှင်၊ ယေဟောဝါဘုရားသခင်၏သိုးများအဖြစ် ကျွန်မတို့နှစ်ဦးစလုံးကို စည်းလုံးစေ၍ မြေခွေးကဲ့သို့သော ကျွန်မတို့၏စရိုက်လက္ခဏာများကို ပြောင်းလဲစေခဲ့သည့် ကျမ်းစာအမှန်တရားကို တွေ့ ရှိခဲ့ခြင်းအတွက် ကျွန်မတို့ပျော်ရွှင်နေကြပါသည်။ ကျမ်းစာအမှန်တရားသည် ဘဝများကို အမှန်တကယ်ပင်ပြောင်းလဲစေသည်။