ဗဟို​အာဖရိက​နိုင်ငံ​တွင် ဘုရားသခင့်​နာမတော်​ကို သူတို့​အသုံးပြု​ကြ

ဗဟို​အာဖရိက​နိုင်ငံ​မှ လူအများစု​သည် ဘုရားသခင်​ကို ယုံကြည်​ကြ​၏။ ကိုယ်တော်​သည် အရာခပ်သိမ်း​၏​ဖန်ဆင်း​ရှင်​ဖြစ်သည်​ကို သူတို့​သံသယ​မရှိကြ​ချေ။ (ဗျာဒိတ် ၄:၁၁) သို့သော် အခြား​ဒေသ​များ​မှ လူအများ​နည်းတူ သူတို့သည် ကိုယ်တော်​၏​ကိုယ်ပိုင်​နာမတော် ယေဟောဝါ​ကို​ကား လျစ်လျူရှု​တတ်ကြ​သည်။

ဗဟို​အာဖရိက​နိုင်ငံ​သာမက ကမ္ဘာ့​အခြား​ဒေသ​များ​မှ လူတို့သည် သခင့်​ဆုတောင်းချက်​ပါ “ကိုယ်တော်​၏​နာမတော်​အား ရိုသေ​လေးမြတ်ခြင်း​ရှိပါစေ​သော” ဟု​ဆို​ကြသောအခါ ဘုရားသခင်​၏​နာမတော်​ကို ရည်ညွှန်း​နေကြ​ခြင်း​ဖြစ်သည်။ (မဿဲ ၆:၉) သို့သော် နှစ်​အတော်ကြာကြာ ထို​နာမတော်​ကို သိရှိ​ခဲ့​သူ နည်းပါး​ခဲ့​သည်။ သို့ရာတွင် နှစ်များ​တစ်လျှောက် ယေဟောဝါသက်သေ​များ​၏ ဇွဲရှိ​ရှိ​ဟောပြောခြင်း​လုပ်ငန်း​ကြောင့် ဘုရားသခင့်​နာမတော်​ကို အသုံးပြုခြင်း​နှင့်​စပ်လျဉ်း၍ လူတို့၏​စိတ်ထား ပြောင်းလဲ​လာပြီ။ ယနေ့ ဇူ​လူး (ဂျူ​ဟို​ဗာ)၊ ယို​ရူ​ဘာ (ဂျီ​ဟို​ဖား)၊ ဆို​ဆာ (ယူ​ဟိုးဗား) နှင့်​စွာ​ဟီးလီ (ယေ​ဟိုးဗာ) စ​သော အာဖရိက​ဘာသာ​စကား​များစွာ​တွင် ဘုရားသခင့်​နာမတော်​ကို ကျယ်ကျယ်ပြန့်ပြန့်​သိ​ရှိလာ​ကြ​ပြီး လက်ခံ​လာ​သည်။ သို့​တိုင် အဆိုပါ​ဘာသာ​စကား​ဖြင့် ဘာသာပြန်​ကျမ်း​အများစု​တွင် ဘုရားသခင့်​နာမတော်​အသုံးပြုခြင်း​ကို ရှောင်ရှား​နေကြ​ဆဲ​ပင်။

ဗဟို​အာဖရိက​သမ္မတနိုင်ငံ၊ ဆူ​ဒန်​နိုင်ငံ​နှင့် ကွန်ဂို​ဒီမိုကရက်တစ်​သမ္မတနိုင်ငံ​တို့ ရှိ အရပ်ဒေသ​များ​တွင် ပြောဆို​ကြသော ဇန်​ဒီ​ဘာသာ​စကား​ဖြင့် ရေးသား​ထား​သည့် သမ္မာကျမ်းစာ​မှာ​မူ ဘုရားသခင့်​နာမတော်​ကို အသုံးပြု​ထားသော ဘာသာပြန်​ကျမ်း​တစ်ခု​ဖြစ်သည်။ ကမ္ဘာ​၏​ထို​ဒေသ​ရှိ လူတို့သည် ဘုရားသခင့်​နာမတော်​ကို အသုံးပြု​ကြ​ပြီး ယင်းကို သူတို့၏​တိုင်း​ရင်း​ဘာသာ​စကား​ဖြင့် ယီ​ကို​ဗား​ဟူ၍ စာလုံးပေါင်း​ကြသည်။ ဘုရားသခင့်​နာမတော်​ကို တိုင်း​ရင်း​ဘာသာ​စကား​တစ်ခု​ဖြင့် မည်သို့​ပင်​တင်ပြ​ကြ​ပါစေ ယင်းကို အသုံးပြု​ဖို့​အရေးကြီး​သည်။ အဘယ်ကြောင့်​နည်း။ အကြောင်း​မှာ၊ “ယေဟောဝါ​ရှင်​၏​နာမတော်​ကို [ခေါ်]သော​သူ​ရှိသမျှ​တို့သည် ကယ်တင်​တော်​မူ​ခြင်း​သို့ ရောက်​ကြ​လတ္တံ့။”—ရောမ ၁၀:၁၃၊ က​ဘ။

[စာမျက်နှာ ၃၂ ပါ မြေပုံ/ ရုပ်ပုံ]

(ကား​ချက်​အပြည့်အစုံကို စာစောင်​တွင်​ကြည့်​ပါ)

ဆူ​ဒန်

ဗဟို​အာဖရိက သမ္မတနိုင်ငံ

ကွန်ဂို​ဒီမိုကရက်တစ် သမ္မတနိုင်ငံ

[Credit Line]

The Complete Encyclopedia of Illustration/​J. G. Heck