စွန်ပလွံပင် မှရသော သင်ခန်းစာတစ်ခု
စွန်ပလွံပင် မှရသော သင်ခန်းစာတစ်ခု
“ထူးထူးခြားခြားလှပသည့် ကျက်သရေဆောင် အရိပ်ပုံ။” စွန်ပလွံပင်ကို ကျမ်းစာစွယ်စုံကျမ်းတစ်ခုက ယင်းသို့ဖော်ပြသည်။ ကျမ်းစာခေတ်နှင့် ယနေ့တွင် စွန်ပလွံပင်များသည် အီဂျစ်နိုင်ငံ၏နိုင်းမြစ်ဝှမ်းဒေသကို အလှဆင်ပေးပြီး နဲဂက်ဗ်သဲကန္တာရ၏ အိုအေစစ်ပတ်ဝန်းကျင်၌ လန်းဆန်းမှုပေးသည့်အရိပ်ကို ဖန်တီးပေးသည်။
ထန်းမျိုးဝင်အပင်အများစုကဲ့သို့ စွန်ပလွံပင်သည် ထီးထီးမားမားထိုးထွက်သည်။ တချို့သည် ပေ ၁၀၀ အထိမြင့်ပြီး အနှစ် ၁၅၀ တိုင်အသီးမပြတ်သီးသည်။ မှန်ပါသည်၊ စွန်ပလွံပင်သည် အလွန်ပင် မျက်စိပသာဒဖြစ်စေပြီး အံ့သြစဖွယ်သီးပွင့်ပေး၏။ နှစ်စဉ် စွန်ပလွံအပြွတ်များစွာ သီးသည်။ တစ်ပြွတ်တည်းတွင် စွန်ပလွံသီး ၁,၀၀၀ ကျော်သီးပါလိမ့်မည်။ စွန်ပလွံသီးများနှင့်ပတ်သက်၍ ပညာရှင်တစ်ဦးက ဤသို့ရေးသားခဲ့သည်– “ဆိုင်များရှိ အမှတ်တံဆိပ်အောက် စွန်ပလွံသီးခြောက်ကိုသာ . . . စားဖူးသူတို့သည် ၎င်းကို လတ်လတ်ဆတ်ဆတ်စားရလျှင် မည်မျှအရသာရှိကြောင်း စိတ်ကူးရခက်နိုင်ပါသည်။”
သမ္မာကျမ်းစာက လူအချို့ကို စွန်ပလွံပင်များနှင့် ခိုင်းနှိုင်းထားသည်မှာ လျောက်ပတ်လှပေစွ။ ဘုရားသခင့်အမြင်တွင် သီးပွင့်သောစွန်ပလွံပင်တစ်ပင်ကဲ့သို့ ပသာဒဖြစ်ရန် လူတစ်ဦးသည် ဖြောင့်မှန်စွာကျင့်ကြံရမည်ဖြစ်ပြီး ကောင်းမှုများကို မပြတ်တမ်းပြုနေရပေမည်။ (မဿဲ ၇:၁၇-၂၀) ဤအကြောင်းကြောင့် ရှောလမုန်၏ဝတ်ပြုရာအိမ်တော်နှင့် ယေဇကျေလ၏အဆင်းအာရုံပါ ဝတ်ပြုရာအိမ်တော်တို့ကို အလှဆင်စဉ် ထွင်းထားသောစွန်ပလွံပင်ပုံများ အသုံးပြုခဲ့ခြင်းဖြစ်သည်။ (၃ ဓမ္မရာဇဝင် ၆:၂၉၊ ၃၂၊ ၃၅; ယေဇကျေလ ၄၀:၁၄-၁၆၊ ၂၀၊ ၂၂) ထို့ကြောင့် လူတစ်ဦး၏ကိုးကွယ်မှုသည် ဘုရားသခင်နှစ်သက်လက်ခံနိုင်ဖွယ်ဖြစ်ဖို့အတွက် စွန်ပလွံပင်၏နှစ်လိုဖွယ်လက္ခဏာမျိုးရှိရမည်။ ဘုရားသခင့်စကားတော်က ဤသို့ရှင်းပြ၏– “ဖြောင့်မတ်သောသူသည် စွန်ပလွံပင်ကဲ့သို့ ပွင့်လန်း . . . လိမ့်မည်။”—ဆာလံ ၉၂:၁၂။