“ဖြုန်းတီးသောသား” တစ်ဦးကို သင်မည်သို့ကူညီပေးနိုင်သနည်း
“ဖြုန်းတီးသောသား” တစ်ဦးကို သင်မည်သို့ကူညီပေးနိုင်သနည်း
“အထက်ကပျောက်၏၊ ယခုတွေ့ ပြန်၏။ ထိုကြောင့် . . . ဝမ်းမြောက်စရာအကြောင်းရှိ၏။”—လုကာ ၁၅:၃၂။
၁၊ ၂။ (က) လူငယ်အချို့သည် ခရစ်ယာန်အမှန်တရားကို မည်သို့တန်ပြန်ခဲ့ကြပြီနည်း။ (ခ) ထိုသို့သောအခြေအနေမျိုးတွင် မိဘများနှင့် သားသမီးပါ မည်သို့ ခံစားနိုင်သနည်း။
“အမှန်တရားထဲက ထွက်လိုက်တော့မယ်!” ခရစ်ယာန်လမ်းစဉ်အတိုင်း မိမိတို့၏သားသမီးများကို ကြီးပြင်းလာစေရန် ကြိုးစားသွန်သင်ပေးခဲ့ကြသည့် ဘုရားသခင်ကိုကြောက်ရွံ့သူမိဘများသည် ကလေးတစ်ဦးထံမှ ထိုစကားမျိုးကြားလိုက်ရခြင်းမှာ အမှန်တကယ် စိတ်တုန်လှုပ်ချောက်ချားစရာပါတကား! အခြားလူငယ်များမူ သူတို့၏အကြံအစည်များကို မည်မည်ရရမဖော်ပြဘဲ ‘ရွေ့လျော့’ သွားခဲ့ကြပြီ။ (ဟေဗြဲ ၂:၁) ဤသူတို့တွင် များစွာသည် ယေရှု၏ပုံဥပမာရှိ ဖြုန်းတီးသောသားနှင့်ဆင်တူ၏၊ သူသည် ဖခင်၏အိမ်ကထွက်သွားကာ သူ၏အမွေဥစ္စာကို ဝေးလံသောပြည်၌ သုံးဖြုန်းပစ်လိုက်သည်။—လုကာ ၁၅:၁၁-၁၆။
၂ ယေဟောဝါသက်သေအများစု၌ ဤပြဿနာ မရှိကြသော်လည်း ရှိသူတို့အတွက် သူတို့၏ဝမ်းနည်းမှုကို အဘယ်နှစ်သိမ့်စကားကမျှ အပြည့်အဝ ဖယ်ရှားပေးနိုင်မည်မဟုတ်ချေ။ ထို့ပြင် ထင်ရာစိုင်းသည့်လူငယ်ကိုယ်တိုင် တွေ့ကြုံနိုင်သော ပျော်ရွှင်မှုကင်းမဲ့ခြင်းကို သတိမမူဘဲမနေပါနှင့်။ သူ၏အတွင်းစိတ်နှလုံးထဲတွင်မူ သူ၏ကိုယ်ကိုကိုယ်သိသောစိတ်က သူ့ကို နှိပ်စက်နေပေလိမ့်မည်။ ယေရှု၏ပုံဥပမာ၌ ဖြုန်းတီးသောသားသည် နောက်ဆုံးတွင် ‘သတိပြန်ရ’ လာသောကြောင့် ဖခင်ဖြစ်သူ ပျော်ရွှင်ခဲ့ရလေသည်။ မိဘများနှင့် အသင်းတော်ရှိအခြားသူတို့သည် ဖြုန်းတီးသောသားများကို ‘သတိပြန်ရလာ’ စေရန် မည်သို့ကူညီပေးနိုင်ကြသနည်း။—လုကာ ၁၅:၁၇။
ထွက်သွားရန် အချို့အဘယ်ကြောင့်ဆုံးဖြတ်
၃။ လူငယ်များ ခရစ်ယာန်အသင်းတော်မှ ထွက်သွားရန် ဆုံးဖြတ်ခဲ့ရသည့် အကြောင်းရင်းအချို့ကား အဘယ်နည်း။
၃ ခရစ်ယာန်အသင်းတော်တွင် ယေဟောဝါအား ဝမ်းမြောက်စွာအမှုဆောင်ကြသော ရာနှင့်၊ ထောင်နှင့်ချီသည့် လူငယ်များရှိကြသည်။ သို့ဆိုလျှင် အခြားလူငယ်တို့သည် အဘယ်ကြောင့် ထွက်ခွာသွားကြသနည်း။ ဤလောကမှကမ်းလှမ်းသောအရာ တစ်စုံတစ်ခုကို မိမိတို့ဆုံးရှုံးနေသည်ဟု သူတို့ခံစားရ၍ဖြစ်နိုင်သည်။ (၂ တိမောသေ ၄:၁၀) သို့မဟုတ် ယေဟောဝါ၏ကာကွယ်မှုပေးသောသိုးခြံသည် တင်းကျပ်လွန်း၏ဟု သူတို့ယူမှတ်ကြပေမည်။ ကိုယ်ကိုကိုယ်ကိုသိသောစိတ်မကြည်လင်ခြင်း၊ ဆန့်ကျင်ဘက်လိင်ရှင်ကို အလွန်အမင်းစိတ်ဝင်စားခြင်း၊ သို့မဟုတ် သက်တူရွယ်တူများ၏လက်ခံမှုကို ရလိုစိတ်ရှိခြင်းတို့က လူငယ်တစ်ဦးကို ယေဟောဝါ၏သိုးအုပ်မှ ရွေ့လျော့သွားစေနိုင်သည်။ လူငယ်တစ်ဦးသည် မိဘတစ်ဦးဦး၊ သို့မဟုတ် အခြားခရစ်ယာန်တစ်ဦး၏ အရေခြုံဟန်ဆောင်မှုကို တွေ့မြင်ခြင်းကြောင့် ဘုရားသခင့်အမှုတော်ကို မဆောင်တော့ဘဲနေခြင်း ဖြစ်နိုင်ပေသည်။
၄။ လူငယ်များ လမ်းလွဲသွားရသည့်အကြောင်းရင်းကား အဘယ်အရာ ဖြစ်လေ့ရှိသနည်း။
၄ ကလေးတစ်ဦး ကလန်ကဆန်ပြုမူပြောဆိုခြင်းသည် များသောအားဖြင့် ဝိညာဉ်ရေးအားနည်းမှု၏ လက္ခဏာ၊ သူ့စိတ်နှလုံးအတွင်းသဘော၏ ဖော်ထုတ်ချက်များဖြစ်လေ့ရှိသည်။ (သု. ၁၅:၁၃; မဿဲ ၁၂:၃၄) လူငယ်တစ်ဦးသည် အဘယ်အကြောင်းကြောင့်ပင် လမ်းလွဲသွားပါစေ၊ ပြဿနာ၏အရင်းအမြစ်မှာ “အမှန်တရား၏ တိကျမှန်ကန်သောအသိပညာ” မရှိသောကြောင့် ဖြစ်တတ်သည်။ (၂ တိမောသေ ၃:၇၊ ကဘ) လူငယ်များအနေဖြင့် ယေဟောဝါအား ဝတ်ကျေတမ်းကျေ ဝတ်ပြုကိုးကွယ်ခြင်းထက် ကိုယ်တော်နှင့်နှစ်ကိုယ်ကြား ရင်းနှီးသောဆက်ဆံရေးရှိရန် မွေးမြူသွားခြင်းက ပို၍အရေးကြီး၏။ ထိုသို့ပြုရန် အဘယ်အရာက သူတို့ကိုကူညီပေးမည်နည်း။
ဘုရားသခင်ထံသို့ချဉ်းကပ်လော့
၅။ လူငယ်တစ်ဦးသည် ဘုရားသခင်နှင့်နှစ်ကိုယ်ကြား ဆက်ဆံရေးကိုမွေးမြူရန် အဘယ်အရာလိုအပ်သနည်း။
၅ “ဘုရားသခင်၌ချဉ်းကပ်ကြလော့။ သို့ပြုလျှင်၊ သင်တို့၌ချဉ်းကပ်တော်မူလိမ့်မည်” ဟူ၍ တပည့်တော်ယာကုပ်ရေးသားခဲ့သည်။ (ယာကုပ် ၄:၈) ထိုသို့ပြုရန် ဘုရားသခင့်စကားတော်ကို အရသာတွေ့မှုတိုးပွားလာစေရန် လူငယ်တစ်ဦးအား ကူညီပေးရမည်။ (ဆာလံ ၃၄:၈) အစပိုင်းတွင် သမ္မာကျမ်းစာ၏အခြေခံသွန်သင်ချက်များဖြစ်သော “နို့” ကိုသူသောက်သုံးရန် လိုပေလိမ့်မည်။ သို့သော် ဘုရားသခင့်စကားတော်ကို သူနှစ်သက်လာပြီး နက်နဲသောဝိညာဉ်ရေးရာအချက်အလက်များဖြစ်သည့် “ကြေခဲသောအစာ” ကို အရသာတွေ့လာသောအခါ သူသည် မကြာမီပင် ဝိညာဉ်ရေးဘက်ရင့်ကျက်လာပေမည်။ (ဟေဗြဲ ၅:၁၁-၁၄; ဆာလံ ၁:၂) ဤလောကလမ်းစဉ်၌ လုံးလုံးနစ်မြုပ်သွားခဲ့သော လူငယ်တစ်ဦးက ဝိညာဉ်ရေးစံနှုန်းများကို စတင်တန်ဖိုးထားတတ်လာကြောင်း ဝန်ခံခဲ့သည်။ အဘယ်အရာက သူ့ကို ပြန်လှည့်လာစေခဲ့သနည်း။ သမ္မာကျမ်းစာတစ်အုပ်လုံးကိုဖတ်ရှုရန် အကြံပြုချက်ကိုတုံ့ပြန်၍ သမ္မာကျမ်းစာမှန်မှန်ဖတ်ရှုရန်အစီအစဉ်အတိုင်း သူပြုလုပ်ခဲ့သည်။ မှန်ပါသည်၊ ဘုရားသခင်၏စကားတော်ကို မှန်မှန်ဖတ်ရှုခြင်းသည် ယေဟောဝါနှင့်ရင်းနှီးမှုကို မွေးမြူပေးဖို့အတွက် အရေးပါပေသည်။
၆၊ ၇။ ဘုရားသခင့်စကားတော်ကို ချစ်မြတ်နိုးဖို့ မိဘများသည် မိမိတို့၏သားသမီးများအား မည်သို့ကူညီပေးနိုင်ကြသနည်း။
၆ ဘုရားသခင့်စကားတော်ကို သားသမီးများချစ်မြတ်နိုးတတ်ကြစေရန် မိဘများကူညီပေးဖို့ တကယ်ပင်အရေးပါသည်တကား! မိသားစုသင်အံမှု ပုံမှန်ပြုလုပ်ခဲ့သည့်ကြားမှပင် ဆယ်ကျော်သက်အရွယ် ကလေးမတစ်ဦးသည် ပေါ့ပြက်ပြက်နေထိုင်သူတို့နှင့် အပေါင်းအသင်းလုပ်ခဲ့သည်။ သူ၏ မိသားစုသင်အံမှုနှင့်ပတ်သက်၍ သူက ဤသို့ပြန်ပြောပြသည်– “အဖေက မေးခွန်းတွေမေးတဲ့အခါ အဖေရဲ့မျက်နှာကိုမကြည့်ဘဲ အဖြေတွေကို ကျွန်မဖတ်ရုံဖတ်ပြသွားလိုက်တယ်။” မိသားစုသင်အံမှုတွင် အကြောင်းအရာတစ်ခုကို ပြီးစီးသွားရန်လေ့လာသွားရုံပြုမည့်အစား ပညာရှိသောမိဘများသည် သွန်သင်ခြင်းအတတ်ပညာကို အသုံးပြုကြ၏။ (၂ တိမောသေ ၄:၂) သင်အံမှုကို လူငယ်တစ်ဦးနှစ်ခြိုက်ဖို့အတွက် သူကိုယ်တိုင် ပါဝင်ပတ်သက်ရပေမည်။ ထို့ကြောင့် သဘောထားမေးခွန်းများမေးမြန်း၍ သူ့အား ထုတ်ဖော်ပြောဆိုစေပါ။ ဆင်ခြင်သုံးသပ်နေသည့်အကြောင်းကို လက်တွေ့ကျင့်သုံးရန် လူငယ်ကိုအားပေးပါလေ။ *
၇ ထိုထက်ကား ကျမ်းစာဆွေးနွေးခန်းကို အသက်ဝင်စေပါ။ သင့်လျော်သောအခါ ငယ်ရွယ်သူတို့ကို ကျမ်းစာဖြစ်ရပ်များနှင့် ဇာတ်ကြောင်းများကို သရုပ်ဆောင်စေပါ။ ဆွေးနွေးနေသောအကြောင်းအရာများ ဖြစ်ပျက်ခဲ့သည့် နယ်မြေ၏ မြေမျက်နှာအသွင်အပြင်လက္ခဏာများကို သူတို့စိတ်ထဲမြင်ယောင်စေပါ။ မြေပုံများနှင့် ပုံစံကားချပ်များအသုံးပြုခြင်းက အကူအညီဖြစ်ပေမည်။ မှန်ပါသည်၊ စိတ်ကူးဉာဏ်အနည်းငယ်ကွန့်မြူးလိုက်ခြင်းဖြင့် မိသားစုသင်အံမှုကို အသက်ဝင်စေကာ အသွင်အမျိုးမျိုးဖြင့်ပြုလုပ်နိုင်သည်။ မိဘများလည်း ယေဟောဝါနှင့် မိမိတို့၏နှစ်ကိုယ်ကြားဆက်ဆံရေးကို ဆန်းစစ်ကြည့်သင့်သည်။ သူတို့ကိုယ်တိုင် ယေဟောဝါထံ ပိုမိုနီးကပ်လာသည်နှင့်အမျှ သူတို့၏ကလေးများကိုလည်း ထိုသို့ဖြစ်လာစေရန် ကူညီပေးနိုင်သည်။—တရားဟောရာ ၆:၅-၇။
၈။ ဆုတောင်းခြင်းက ဘုရားသခင်နှင့်ရင်းနှီးမှုရှိစေရန် မည်သို့ကူညီပေးနိုင်သနည်း။
၈ ဆုတောင်းခြင်းကလည်း လူတစ်ဦးကို ဘုရားသခင်နှင့် ရင်းနှီးစေသည်။ မြီးကောင်ပေါက်အရွယ်ဝင်ခါစ ကလေးမတစ်ဦးသည် ခရစ်ယာန်လမ်းစဉ်နှင့် သူ၏မယုံကြည်သူ သူငယ်ချင်းအပေါင်းအသင်းများကြား ဝေခွဲမရဖြစ်နေခဲ့သည်။ (ယာကုပ် ၄:၄) ယင်းနှင့်ပတ်သက်၍ သူအဘယ်အရာပြုလုပ်ခဲ့သနည်း။ “ကျွန်မဘယ်လိုခံစားနေရတယ်ဆိုတဲ့အကြောင်းကို ယေဟောဝါဆီ ပထမဆုံးအကြိမ် ကောင်းကောင်းဆုတောင်းခဲ့တယ်” ဟုသူဝန်ခံခဲ့သည်။ နောက်ဆုံးတွင် အသင်းတော်အတွင်း သူရင်ဖွင့်နိုင်သူ မိတ်ဆွေတစ်ဦး တွေ့ရှိခဲ့သောအခါ သူ၏ဆုတောင်းချက် ဖြေကြားခံခဲ့ရ၏ဟု သူကောက်ချက်ချခဲ့သည်။ မိမိကို ယေဟောဝါညွှန်ကြားနေသည်ဟု သူခံစားရကာ ဘုရားသခင်နှင့်နှစ်ကိုယ်ကြားဆက်ဆံရေးရှိရန် စတင်ကြိုးစားခဲ့လေသည်။ မိဘများသည် မိမိတို့ကိုယ်တိုင်၏ဆုတောင်းချက်များ၏ အရည်အသွေးကို တိုးမြှင့်ပေးခြင်းအားဖြင့် သားသမီးများကိုကူညီပေးနိုင်ကြသည်။ မိသားစုလိုက်ဆုတောင်းသောအခါ မိဘများသည် မိမိတို့၏စိတ်နှလုံးကို သွန်ချဖော်ပြခြင်းအားဖြင့် မိဘများနှင့် ယေဟောဝါစပ်ကြား မေတ္တာဖွဲ့နှောင်ထားကြောင်းကို သားသမီးများအား ခံစားမိစေနိုင်သည်။
စိတ်ရှည်ပါ၊ တစ်ကြိမ်တည်းတွင် ခိုင်မာပါ
၉၊ ၁၀။ ယေဟောဝါသည် ထင်ရာစိုင်းဣသရေလလူမျိုးကို သည်းခံခြင်းနှင့်ပတ်သက်၍ အဘယ်ပုံနမူနာချမှတ်တော်မူခဲ့သနည်း။
၉ လူငယ်တစ်ဦး သွေဖည်ခါစတွင် ထီးတည်းနေရန် ကြိုးစားမည်၊ မိဘများက သူနှင့်သမ္မာကျမ်းစာအကြောင်းဆွေးနွေးရန် ကြိုးစားသည့်အခါ ကလန်ကဆန်ပြုလုပ်ပေမည်။ ထိုသို့သောအခြေအနေမျိုးတွင် မိဘများ အဘယ်အရာပြုလုပ်နိုင်သနည်း။ ရှေးဣသရေလလူများနှင့် ယေဟောဝါ မည်သို့လုပ်ဆောင်တော်မူခဲ့ကြောင်း သုံးသပ်ကြည့်ပါ။ ကိုယ်တော်သည် သူတို့၏ထင်ရာစိုင်းလမ်းစဉ်သို့ သူတို့ကိုမအပ်မီ ဤ “လည်ပင်းခိုင်မာ” သောဣသရေလလူမျိုးကို နှစ်ပေါင်း ၉၀၀ ကျော်သည်းခံခဲ့သည်။ (ထွက်မြောက်ရာ ၃၄:၉; ၂ ရာဇဝင်ချုပ် ၃၆:၁၇-၂၁; ရောမ ၁၀:၂၁) သူတို့သည် “ဘုရားသခင်ကို အဖန်ဖန်စုံစမ်း” သည့်ကြားမှ ယေဟောဝါသည် သူတို့အပေါ် “ကရုဏာစိတ်” ပြတော်မူခဲ့သည်။ “ကြိမ်ဖန်များစွာစိတ်တော်ပြေ၍ အမျက်တော်ကိုနှိုးဆော်တော်မမူ။” (ဆာလံ ၇၈:၃၈-၄၂) ဘုရားသခင်သည် သူတို့နှင့်စီရင်ဆက်ဆံရာတွင် အမှားမရှိခဲ့ချေ။ မေတ္တာရှိသောမိဘများသည် ယေဟောဝါကိုတုပကာ မိမိတို့၏ကြိုးစားကူညီပေးမှုကို ကလေးသည် ချက်ချင်းမတုံ့ပြန်သောအခါ စိတ်ရှည်ကြ၏။
၁၀ သည်းခံလျက်နေခြင်း သို့မဟုတ် စိတ်ရှည်ခြင်းက “ကြာမြင့်စွာသည်းခံနေခြင်း” ကိုဆိုလိုသည်မဟုတ်ဘဲ ဖရိုဖရဲဖြစ်သွားသောဆက်ဆံရေး တိုးတက်ကောင်းမွန်လာရန်အတွက် မျှော်လင့်ချက်ရှိသမျှကို စွန့်ပစ်ရန်ငြင်းဆန်ခြင်းကို ဆိုလိုသည်။ ယေဟောဝါသည် မည်သို့သည်းခံခြင်းတွင် စံနမူနာချမှတ်ပေးခဲ့၏။ ဣသရေလလူတို့ထံ မိမိ၏စေတမန်များကို “အထပ်ထပ်” စေလွှတ်ခြင်းဖြင့် အစပြုခဲ့သည်။ ယေဟောဝါ၏လူမျိုးသည် “ဘုရားသခင်၏တမန်တို့ကိုပြက်ရယ်ပြု၍ အမိန့်တော်ကို နားမထောင်” သော်လည်း ကိုယ်တော်သည် ‘မိမိလူမျိုးကို သနား’ တော်မူသည်။ (၂ ရာဇဝင်ချုပ် ၃၆:၁၅၊ ၁၆) ကိုယ်တော်သည် ဣသရေလလူတို့ကို မေတ္တာရပ်ခံ၍ ‘သင်တို့လိုက်သောမကောင်းလမ်းနှင့် ဆိုးသွမ်းသောအကျင့်များမှ ပြန်လာကြလော့’ ဟုမိန့်တော်မူခဲ့၏။ (ယေရမိ ၂၅:၄၊ ၅၊ သမ္မာ) သို့တိုင် ယေဟောဝါသည် မိမိ၏ဖြောင့်မတ်သောမူများကို မလျှော့ပေါ့ခဲ့ချေ။ ဣသရေလလူတို့သည် ဘုရားသခင်ထံတော်နှင့် ကိုယ်တော်၏လမ်းစဉ်တော်များသို့ ‘ပြန်လှည့်လာကြ’ ရန် သွန်သင်ခံခဲ့ရသည်။
၁၁။ မိဘများသည် သွေဖည်သွားသောကလေးကို သည်းခံလျက်နေစဉ် တစ်ကြိမ်တည်းတွင် မည်သို့ခိုင်မာနိုင်သနည်း။
၁၁ မိဘများသည် သွေဖည်နေသောကလေးကို အလျင်စလိုလက်မလျှော့လိုက်ခြင်းဖြင့် သည်းခံခြင်းတွင် ယေဟောဝါကို တုပနိုင်ကြသည်။ သူတို့သည် မျှော်လင့်ချက်ထားကာ ကိုယ်တိုင်အစပြု၍ ဆက်သွယ်ရေးလမ်းကြောင်းကို ဖွင့်ထားခြင်း၊ ပြန်လည်ဆက်သွယ်ခြင်းတို့ကို ပြုလုပ်နိုင်သည်။ သူတို့သည် ဖြောင့်မတ်သောမူများကို စွဲကိုင်ထားစဉ် မိမိကလေးအား အမှန်တရားလမ်းစဉ်သို့ ပြန်လှည့်လာရန် “အထပ်ထပ်” မေတ္တာရပ်ခံနိုင်ကြသည်။
အရွယ်မရောက်သေးသူတစ်ဦး နှင်ထုတ်ခံရသောအခါ
၁၂။ အသင်းတော်မှ နှင်ထုတ်ခံရသည့် မိမိတို့နှင့်နေထိုင်သော အရွယ်မရောက်သေးသူတစ်ဦးအပေါ် မိဘများ၌ အဘယ်တာဝန်ရှိသနည်း။
၁၂ မိဘများနှင့် အတူနေထိုင်သော အရွယ်မရောက်သေးသူတစ်ဦးသည် ကြီးလေးသည့်အပြစ်ကို ကျူးလွန်၍ သူ၏နောင်တမယူသောသဘောထားကြောင့် အသင်းတော်မှ နှင်ထုတ်ခံရသည်ဆိုလျှင် အသို့နည်း။ ထိုကလေးသည် မိဘများနှင့် အတူနေထိုင်ဆဲရှိသောကြောင့် ဘုရားသခင့်စကားတော်နှင့်အညီ သူ့ကိုသွန်သင်ပေးရန်၊ ဆုံးမပဲ့ပြင်ရန်တာဝန် သူတို့တွင်ရှိနေဆဲဖြစ်၏။ ယင်းကို မည်သို့ပြုလုပ်နိုင်သနည်း။—သု. ၆:၂၀-၂၂; ၂၉:၁၇။
၁၃။ မိဘများသည် အမှားပြုလျက်ရှိသောကလေးတစ်ဦး၏စိတ်နှလုံးကိုထိမိရန် မည်သို့ကြိုးစားပြုလုပ်နိုင်မည်နည်း။
၁၃ သမ္မာကျမ်းစာကို သူနှင့်သီးသန့်လေ့လာချိန်တွင် လိုအပ်သလို သွန်သင်ဆုံးမပဲ့ပြင်ပေးနိုင်ပေမည်၊ အမှန်မှာ ထိုသို့ပြုရန် အကောင်းဆုံးဖြစ်ပေမည်။ ထိုကလေး၏ မာကျောသောစိတ်ထားနောက်ဝယ် အဘယ်အရာရှိသည်ကိုတွေ့မြင်ရန်ကြိုးစားပြီး သူ့စိတ်နှလုံးသဘောထားကို သိရှိရန်ကြိုးစားသင့်သည်။ သူ၏ဝိညာဉ်ရေးရာဖျားနာမှု၏ အတိုင်းအတာကား အဘယ်နည်း။ (သု. ၂၀:၅) သူ၏စိတ်ထိခိုက်လှုပ်ရှားလွယ်သောအပိုင်းကို ထိမိနိုင်သလော။ အဘယ်ကျမ်းချက်များကို ထိထိရောက်ရောက်အသုံးပြုနိုင်မည်နည်း။ တမန်တော်ပေါလုက ကျွန်ုပ်တို့ကို ဤသို့အာမခံခဲ့သည်– “ဘုရားသခင်၏ နှုတ်[မြွက်စကား] တော်သည် အသက်ရှင်ခြင်း၊ တန်ခိုးနှင့်ပြုပြင်ခြင်း၊ သန်လျက်တကာတို့ထက် ထက်ခြင်းနှင့်ပြည့်စုံသည်ဖြစ်၍၊ အသက်နှင့်စိတ်ဝိညာဉ်ကိုလည်းကောင်း၊ အရိုးဆစ်နှင့်ခြင်ဆီကိုလည်းကောင်း ပိုင်းခြား၍ ထုတ်ချင်းခွင်းတတ်၏။ စိတ်နှလုံးအကြံအစည်များကိုလည်း သိမြင်တတ်၏။” (ဟေဗြဲ ၄:၁၂) မှန်ပါသည်၊ မိဘများသည် သူတို့၏သားသမီးကို နောက်ထပ်မမှားနှင့်ဟု နှုတ်ဖြင့်ပြောဆိုခြင်းထက်မက ပြုလုပ်နိုင်ပေသည်။ ရောဂါပျောက်ကင်းစေခြင်းအစီအစဉ်ကို အစပြု၍ ကြိုးစားပြုစုပျိုးထောင်ပေးနိုင်သည်။
၁၄။ ယေဟောဝါနှင့် မိမိ၏ဆက်ဆံရေး ပြန်ကောင်းလာစေရန် အမှားပြုမိသူလူငယ်တစ်ဦးအနေဖြင့် ဦးဆုံးပြုလုပ်သင့်သည့်အရာကား အဘယ်နည်း၊ ထိုသို့ပြုလုပ်စေရန် မိဘများသည် အဆိုပါကလေးကို မည်သို့ကူညီပေးနိုင်သနည်း။
၁၄ အမှားပြုမိသောလူငယ်သည် ယေဟောဝါနှင့် မိမိ၏ဆက်ဆံရေးကို ထူထောင်ဖို့လိုသည်။ သူဦးဆုံးလှမ်းရမည့်ခြေလှမ်းမှာ “နောင်တရ၍ စိတ်ပြောင်းလဲ” ခြင်းဖြစ်သည်။ (တမန်တော် ၃:၁၉၊ ၂၀; ဟေရှာယ ၅၅:၆၊ ၇) မိမိတို့အိမ်တွင်းရှိ လူငယ်အား နောင်တယူစေရန် ကူညီပေးရာတွင် မိဘများသည် အဆိုပါဆီးတားငြင်းဆန်သောကလေးကို ‘သည်းခံနိုင်သောသူဖြစ်၍ နူးညံ့သိမ်မွေ့စွာဆုံးမရပေမည်။’ (၂ တိမောသေ ၂:၂၄-၂၆) သမ္မာကျမ်းစာအရ သူတို့ကို “ဆုံးမ” ပေးရန်လိုသည်။ “ဆုံးမ” ဟုဘာသာပြန်ဆိုထားသော ဂရိစကားလုံးကို ‘ထင်ရှားစွာဖော်ပြခြင်း’ ဟူ၍လည်းအနက်ပြန်ဆိုနိုင်သည်။ (ဗျာဒိတ် ၃:၁၉; ယောဟန် ၁၆:၈) သို့ဖြစ်၍ ထိုကလေးအားဆုံးမခြင်းတွင် သူ၏အပြစ်ရှိလမ်းစဉ်ကို အထင်အရှားဖော်ပြရန် သက်သေအထောက်အထား အလုံအလောက်တင်ပြခြင်းပါဝင်သည်။ ထိုသို့ပြုလုပ်ရန် အမှန်တကယ်ပင် မလွယ်ကူချေ။ ဖြစ်နိုင်လျှင် မိဘများသည် သူ့အပြစ်ကိုဖော်ပြရန် သမ္မာကျမ်းစာနှင့်အညီ သင့်လျော်သည့်နည်းမျိုးစုံကိုသုံး၍ သူ၏စိတ်နှလုံးကို လှုံ့ဆော်ပေးနိုင်ပါသည်။ သူ့အား “[မကောင်းမှု] ကိုမုန်း၍ [ကောင်းမှု] ကိုချစ်” ရန်လိုကြောင်း သိမြင်နားလည်လာစေဖို့ ကြိုးစားကူညီပေးသင့်သည်။ (အာမုတ် ၅:၁၅) ထိုအခါ သူသည် ‘[စာတန်] ၏အလိုအတိုင်းဖမ်းမိခံရာမှ’ သတိပြန်ရလာပေမည်။
၁၅။ အမှားပြုမိသူတစ်ဦးသည် ယေဟောဝါနှင့် ဆက်ဆံရေး ပြန်လည်ကောင်းမွန်လာစေရန် ဆုတောင်းခြင်းက အဘယ်အခန်းကဏ္ဍမှပါဝင်သနည်း။
၁၅ ယေဟောဝါနှင့် ဆက်ဆံရေး ပြန်လည်ကောင်းလာစေရန် ကြိုးစားပြုလုပ်ရမည့်အရာတွင် ဆုတောင်းခြင်းသည် မရှိမဖြစ်လိုအပ်၏။ ခရစ်ယာန်အသင်းတော်နှင့် စပေါင်းသင်းပြီးနောက်တွင် နောင်တမယူဘဲ အထင်အရှားဆက်ပြုမူနေသည့် ပြစ်မှုနှင့်စပ်လျဉ်း၍ မည်သူမျှ “ဆုတောင်း” ခြင်းမပြုသင့်ချေ။ (၁ ယောဟန် ၅:၁၆၊ ၁၇; ယေရမိ ၇:၁၆-၂၀; ဟေဗြဲ ၁၀:၂၆၊ ၂၇) သို့တိုင် မိဘများသည် အဆိုပါအခြေအနေကို ကိုင်တွယ်ရာ၌ ဉာဏ်ပညာပေးရန် ယေဟောဝါထံ ဆုတောင်းနိုင်၏။ (ယာကုပ် ၁:၅) နှင်ထုတ်ခံထားရသူ လူငယ်တစ်ဦးသည် နောင်တရကြောင်းအထင်အရှားဖော်ပြသော်လည်း “ဘုရားသခင်ရှေ့တော်၌ ရဲရင့်ရသောအခွင့်” မရရှိလျှင် ထိုကလေး၏အပြစ်ကိုလွှတ်ရန် အခြေခံအကြောင်းကို ဘုရားသခင်တွေ့ရှိပါက ကိုယ်တော်၏အလိုတော်အတိုင်းဖြစ်ပါစေဟု မိဘများ ဆုတောင်းပေမည်။ (၁ ယောဟန် ၃:၂၁) ဤသို့သောဆုတောင်းချက်များကို ကြားနာရခြင်းဖြင့် ထိုလူငယ်သည် ယေဟောဝါအား သနားကြင်နာတတ်သောဘုရားသခင်အဖြစ်တွေ့မြင်စေရန် ထောက်ကူသင့်သည်။ *—ထွက်မြောက်ရာ ၃၄:၆၊ ၇; ယာကုပ် ၅:၁၆။
၁၆။ အရွယ်မရောက်သေးသော နှင်ထုတ်ခံရသူများ၏ မိသားစုကို ကျွန်ုပ်တို့ မည်သို့ကူညီပေးနိုင်ကြသနည်း။
၁၆ နှစ်ခြင်းခံပြီးသား လူငယ်တစ်ဦး နှင်ထုတ်ခံရပါက အသင်းသားများသည် သူနှင့် “မပေါင်းဖော်” ရန်တောင်းဆိုထားသည်။ (၁ ကောရိန္သု ၅:၁၁; ၂ ယောဟန် ၁၀၊ ၁၁) ယင်းက သူ့အား နောက်ဆုံးတွင် ‘သတိပြန်ရလာ’ စေ၍ ဘုရားသခင်၏ကာကွယ်မှုပေးသည့်သိုးခြံထဲသို့ ပြန်လှည့်ဝင်လာစေရန် ကူညီပေးပေမည်။ (လုကာ ၁၅:၁၇) သို့သော် သူပြန်လာသည်ဖြစ်စေ၊ ပြန်မလာသည်ဖြစ်စေ အသင်းတော်သားများသည် နှင်ထုတ်ခံရသည့်သူငယ်၏မိသားစုကို အားပေးတည်ဆောက်နိုင်ကြသည်။ ကျွန်ုပ်တို့အားလုံးသည် သူတို့အပေါ် “စိတ်ကြင်နာခြင်း” နှင့် “သနားစုံမက်ခြင်း” တင်ပြရန် အခွင့်အလမ်းများကို ရှာဖွေနိုင်ကြသည်။—၁ ပေတရု ၃:၈၊ ၉။
အခြားသူတို့ မည်သို့ကူညီပေးနိုင်
၁၇။ လမ်းလွဲနေသောကလေးတစ်ဦးကို ကူညီပေးသောအခါ အသင်းတော်သားများအနေဖြင့် အဘယ်အရာကို စိတ်ထဲစွဲမှတ်ထားသင့်သနည်း။
၁၇ ခရစ်ယာန်အသင်းတော်မှ နှင်ထုတ်မခံရသော်လည်း ယုံကြည်ခြင်းအားနည်းလာသော လူငယ်တစ်ဦးနှင့်ပတ်သက်၍ကော အသို့နည်း။ “အင်္ဂါတစ်ခုတည်းဆင်းရဲခြင်းကိုခံရလျှင်၊ အင်္ဂါအပေါင်းတို့သည် [သူနှင့်] အတူခံရကြ၏” ဟု တမန်တော်ပေါလုရေးသားခဲ့သည်။ (၁ ကောရိန္သု ၁၂:၂၆) ထိုသို့သောလူငယ်ကို တက်တက်ကြွကြွစိတ်ဝင်စားကြောင်း အခြားသူတို့လည်း ဖော်ပြနိုင်သည်။ ဝိညာဉ်ရေးအရဖျားနာနေသူ လူငယ်တစ်ဦးသည် အခြားလူငယ်များကို အကျိုးယုတ်စွာ ဩဇာလွှမ်းမိုးနိုင်သောကြောင့် အတော်အတန်သတိပြုရန်တော့လိုသည်။ (ဂလာတိ ၅:၇-၉) အသင်းတော်တစ်ခုတွင် ဝိညာဉ်ရေးဘက်အားနည်းလာသော လူငယ်အချို့ကိုကူညီပေးရန် ရည်ရွယ်ချက်ကောင်းရှိသူ လူကြီးအချို့သည် လူကြိုက်များသောတေးသီချင်းများကို အတူတကွတီးမှုတ်သီဆိုကြရန် ဖိတ်ခေါ်ခဲ့၏။ အဆိုပါလူငယ်များသည် ထိုအစီအစဉ်ကို သဘောကျကြပြီးလွယ်လင့်တကူပါဝင်ခဲ့ကြသော်လည်း တစ်ဦးအပေါ်တစ်ဦး သူတို့၏လွှမ်းမိုးမှုက နောက်ဆုံးတွင် အသင်းတော်နှင့်ပေါင်းသင်းမှု ရပ်စဲလိုက်စေခဲ့၏။ (၁ ကောရိန္သု ၁၅:၃၃; ယုဒ ၂၂၊ ၂၃) ဖျားနာနေသောကလေးတစ်ဦးကို ရောဂါကုသပေးမည်ကား ဝိညာဉ်ရေးလမ်းညွှန်မှုမပါသည့် လူမှုပေါင်းသင်းဆက်ဆံရေးမဟုတ်ဘဲ ဝိညာဉ်ရေးရာများကိုအရသာတွေ့စေရန် ကူညီပေးမည့်ပေါင်းသင်းဆက်ဆံမှုဖြစ်သည်။ *
၁၈။ ယေရှု၏ပုံဥပမာထဲမှ ဖခင်၏ဖြုန်းတီးသောသားသဘောထားကို ကျွန်ုပ်တို့ မည်သို့တုပနိုင်ကြသနည်း။
၁၈ အသင်းတော်မှထွက်သွားခဲ့သောလူငယ်တစ်ဦးသည် ဘုရားသခင့်နိုင်ငံတော်ခန်းမသို့ ပြန်လှည့်လာသောအခါ သို့မဟုတ် စည်းဝေးကြီးတစ်ခုကိုတက်ရောက်သောအခါ သူမည်သို့ခံစားရမည်ကို စဉ်းစားကြည့်ပါလေ။ ယေရှု၏ပုံဥပမာထဲမှ ဖြုန်းတီးသောသား၏ဖခင်ကဲ့သို့ ကြိုဆိုသောသဘောထားကို ကျွန်ုပ်တို့ မတင်ပြသင့်ပေလော။ (လုကာ ၁၅:၁၈-၂၀၊ ၂၅-၃၂) ခရစ်ယာန်အသင်းတော်ကို စွန့်ခွာထွက်သွားပြီးနောက်မှ ခရိုင်စည်းဝေးကြီးတစ်ခုကို တက်ရောက်ခဲ့သော ဆယ်ကျော်သက်တစ်ဦးက ဤသို့ပြောပြသည်– “ကျွန်တော့်လိုလူမျိုးကို လူတိုင်းက အရေးမထားဘဲနေလိမ့်မယ်လို့ ထင်မိတာ၊ ဒါပေမဲ့ ညီအစ်ကို ညီအစ်မတွေက ကျွန်တော့်ကို တရေးတယူ လှိုက်လှိုက်လှဲလှဲကြိုဆိုကြတယ်။ ကျွန်တော့်စိတ်ကို တကယ်လှုပ်ရှားစေခဲ့တယ်။” ထို့နောက် သမ္မာကျမ်းစာကို သူပြန်လေ့လာ၍ နောက်ပိုင်းတွင် နှစ်ခြင်းခံယူလိုက်လေသည်။
လက်မလျှော့ပါနှင့်
၁၉၊ ၂၀။ ဖြုန်းတီးသောသားတစ်ဦးနှင့်ပတ်သက်၍ အပြုသဘောထား အဘယ်ကြောင့်ရှိသင့်သနည်း။
၁၉ “ဖြုန်းတီးသောသား” ဖြစ်သူကလေးတစ်ဦး ‘သတိပြန်ရလာရန်’ ကူညီပေးရာတွင် စိတ်ရှည်ဖို့လိုသည်၊ မိဘများနှင့် အခြားသူတို့အတွက်ပါ စိန်ခေါ်ချက်တစ်ရပ်ဖြစ်နိုင်ပေသည်။ သို့သော် လက်မလျှော့ပါနှင့်။ “လူအချို့တို့သည်၊ နှေးခြင်းကိုမှတ်သည်အတိုင်း၊ ထာဝရဘုရားသည် ကတိတော်အရာမှာ နှေးတော်မမူ။ ငါတို့တွင် အဘယ်သူမျှမပျက်စီးဘဲ၊ ရှိသမျှတို့သည် နောင်တရစေခြင်းငှာ အလိုတော်ရှိ၍၊ ငါတို့ကိုသည်းခံတော်မူ၏။” (၂ ပေတရု ၃:၉) ယေဟောဝါသည် လူတို့ကို နောင်တရ၍ အသက်ရှင်စေလိုကြောင်း သမ္မာကျမ်းဆိုင်ရာ အာမခံချက်ရှိထားသည်။ အမှန်မှာ လူသားတို့ကို မိမိကိုယ်နှိုက်နှင့်မိတ်သဟာယဖွဲ့ရန်အစီအစဉ်ကို ကိုယ်တော်သည် အစပြုလုပ်ဆောင်ခဲ့လေပြီ။ (၂ ကောရိန္သု ၅:၁၈၊ ၁၉) ကိုယ်တော်၏စိတ်ရှည်ခြင်းက သန်းနှင့်ချီသောသူတို့အား အသိတရားဝင်စေရန် ဖြစ်စေနိုင်ခဲ့သည်။—ဟေရှာယ ၂:၂၊ ၃။
၂၀ ထို့ကြောင့် အရွယ်မရောက်သေးသော ဖြုန်းတီးသောသားတစ်ဦးကို သတိပြန်ရလာစေရန် မိဘများကူညီပေးရာတွင် သမ္မာကျမ်းစာနည်းလမ်းရှိရှိသမျှကို အသုံးမပြုသင့်ပေလော။ ယေဟောဝါကို တုပပြီး ကိုယ်တော့်ထံ သင့်ကလေး ပြန်လှည့်လာစေရန် အပြုသဘောထားခြေလှမ်းများလှမ်းရာတွင် သည်းခံပါ။ သမ္မာကျမ်းစာမူများကို အခိုင်အမာဆုပ်ကိုင်ထားပါ၊ ကိုယ်တော့်အကူအညီရဖို့အတွက် သင်ဆုတောင်းစဉ် ယေဟောဝါ၏အရည်အသွေးများဖြစ်သော မေတ္တာ၊ တရားမျှတမှုနှင့် ဉာဏ်ပညာကို ရောင်ပြန်ဟပ်ဖို့ကြိုးစားပါလေ။ ခေါင်းမာ၍ ကလန်ကဆန်လုပ်ခဲ့သူများစွာသည် ပြန်လှည့်လာကြရန် ယေဟောဝါ၏ မေတ္တာပါဖိတ်ခေါ်ချက်ကို တုံ့ပြန်ခဲ့သကဲ့သို့ သင်၏ဖြုန်းတီးသောသား သို့မဟုတ် သမီးသည် ဘုရားသခင်၏ ကာကွယ်မှုရရှိသောသိုးအုပ်ထဲသို့ ပြန်ဝင်လာစရာအကြောင်းရှိပေသည်။—လုကာ ၁၅:၆၊ ၇။
[အောက်ခြေမှတ်ချက်များ]
^ အပိုဒ်၊ 6 ငယ်ရွယ်သူတို့ကို ထိထိရောက်ရောက် သွန်သင်နိုင်ပုံအတွက် ထပ်ဆင့်အကြံပြုချက်များရလိုလျှင် ၁၉၉၉၊ ဇူလိုင် ၁၊ ကင်းမျှော်စင် စာမျက်နှာ ၁၃-၁၇ ကိုရှု။
^ အပိုဒ်၊ 15 ငယ်ရွယ်သောနှင်ထုတ်ခံရသူတစ်ဦးအတွက် ထိုသို့သောဆုတောင်းချက်များကို အသင်းတော်အစည်းအဝေး၌ လူအများရှေ့တွင် တောင်းလျှောက်မည်မဟုတ်ချေ၊ အကြောင်းမှာ အခြားသူတို့သည် နှင်ထုတ်ခံရသူ၏အခြေအနေကို သိချင်မှသိပေမည်။—၁၉၇၉၊ အောက်တိုဘာ ၁၅၊ ကင်းမျှော်စင် [လိပ်] စာမျက်နှာ ၃၁ ကိုရှု။
^ အပိုဒ်၊ 17 အသေးစိတ်အကြံပြုချက်များအတွက် နိုးလော့! ၁၉၇၂၊ ဇွန် ၂၂ စာမျက်နှာ ၁၃-၁၆ [လိပ်]; ၁၉၉၆ စက်တင်ဘာ ၂၂ စာမျက်နှာ ၂၁-၃ [လိပ်] ကိုရှု။
သင်မှတ်မိသလော
• လူငယ်များ အသင်းတော်မှထွက်သွားသောအခါ အကြောင်းရင်းကား အဘယ်အရာဖြစ်နိုင်သနည်း။
• ယေဟောဝါနှင့် နှစ်ကိုယ်ကြားဆက်ဆံရေးရှိစေရန် လူငယ်များကို မည်သို့ကူညီပေးနိုင်သနည်း။
• ဖြုန်းတီးသောသားတစ်ဦးကို ကူညီပေးရာတွင် မိဘများသည် သည်းခံရမည်ဖြစ်သော်လည်း အဘယ်ကြောင့်ခိုင်မာဖို့လိုသနည်း။
• ဖြုန်းတီးသောသားတစ်ဦး ပြန်လှည့်လာစေရန် အသင်းတော်တွင်ရှိသူတို့က မည်သို့ကူညီပေးနိုင်သနည်း။
[လေ့လာရန်မေးခွန်းများ]
[စာမျက်နှာ ၁၅ ပါ ရုပ်ပုံ]
ယေဟောဝါနှင့် ရင်းရင်းနှီးနှီးရှိဖို့အတွက် ဘုရားသခင့်စကားတော်ကို ဖတ်ရှုခြင်းသည်အရေးကြီး
[စာမျက်နှာ ၁၅ ပါ ရုပ်ပုံ]
မိဘများ၏ နှလုံးပါသောဆုတောင်းချက်က မိဘနှင့် ယေဟောဝါစပ်ကြား မေတ္တာဖွဲ့နှောင်ထားမှုကို သားသမီးများအား ခံစားမိစေနိုင်
[စာမျက်နှာ ၁၇ ပါ ရုပ်ပုံ]
ဖြုန်းတီးသောသားတစ်ဦး “သတိရ” လာသောအခါ သူ့ကို ကြိုဆိုပါ
[စာမျက်နှာ ၁၈ ပါ ရုပ်ပုံ]
ယေဟောဝါထံတော်သို့ သင့်ကလေးပြန်လှည့်လာစေရန် အပြုသဘောပါပါပြုလုပ်ပါ