ကျွန်ုပ်တို့ အတတ်နိုင်ဆုံးလုပ်ဆောင်ကြ!
ကျွန်ုပ်တို့ အတတ်နိုင်ဆုံးလုပ်ဆောင်ကြ!
“အတတ်နိုင်ဆုံး လုပ်ပါ။” လက်တွေ့ကျသော ဤအကြံပြုချက်ကို ယေဟောဝါသက်သေများ၏ အုပ်ချုပ်ရေးအဖွဲ့ဝင်တစ်ဦးက ခရစ်ယာန်သာသနာပြုတစ်ဦးအား ပေးခဲ့သည်။ သို့သော် အတွေ့အကြုံရှိပြီးသား ဓမ္မအမှုဆောင်တစ်ဦးအား ယင်းသို့သော အခြေခံအကြံပြုချက်ကို အဘယ်ကြောင့်ပေးရသနည်း။ ခံနိုင်ရည်ရှိသောသာသနာပြုအများသည် ကြမ်းပိုးများ၊ မြွေများ၊ အပူချိန်၊ ရောဂါနှင့်အခက်အခဲအမျိုးမျိုးကို နေ့စဉ် ရင်ဆိုင်ကြရသည်မဟုတ်ပေလော။
အမှန်မှာ ယေဟောဝါသက်သေများ၏သာသနာပြုများသည် တိုင်းတစ်ပါးတွင် အမှုတော်ထမ်းဆောင်ရန် ယေဟောဝါနှင့် လူလူချင်းအပေါ် သူတို့၏နက်ရှိုင်းသောမေတ္တာ၏ လှုံ့ဆော်မှုကိုခံရသည့် သာမန်အမျိုးသား၊ အမျိုးသမီးများသာဖြစ်ကြသည်။ သူတို့သည် အတတ်နိုင်ဆုံး ယေဟောဝါ၏အမှုတော်ထမ်းရန် ကြိုးစားနေကြပြီး လိုအပ်သောအစွမ်းခွန်အားရဖို့အတွက် ကိုယ်တော်ကို မျှော်ကိုးကြ၏။—ဧဖက် ၆:၁၀။
ခရစ်ယာန်သာသနာပြုလုပ်ငန်းအကြောင်း ပိုမိုသိရှိရန် အနောက်အာဖရိကရှိ သာသာနာပြုအိမ်တစ်အိမ်သို့ တစ်ရက်တာအလည်အပတ်ရောက်သွားသည်ဟု စိတ်ကူးကြည့်ကြပါစို့။
ခရစ်ယာန်သာသနာပြုလုပ်ငန်း၌ တစ်ရက်တာ
နံနက် ၇:၀၀ နာရီထိုးလုပြီ။ တစ်နေ့တာအတွက် ကျမ်းချက်ဆွေးနွေးခြင်း၌ပါဝင်ရန် သာသနာပြုအိမ်သို့ အချိန်မီပင် ကျွန်ုပ်တို့ရောက်ရှိလာခဲ့ကြ၏။ သာသနာပြုဆယ်ဦးက ကျွန်ုပ်တို့ကို လှိုက်လှဲစွာကြိုဆိုကြပြီး နံနက်စာစားရန် စားပွဲတွင် ကျွန်ုပ်တို့ကိုနေရာချပေးကြသည်။ ကျွန်ုပ်တို့မိတ်ဖွဲ့ကြစဉ် မိမိတာဝန်ကျရာနေရာ၌ နှစ်ပေါင်းများစွာနေထိုင်ခဲ့သော သာသနာပြုတစ်ဦးက ခရစ်ယာန်ဓမ္မအမှုဆောင်ရာတွင် သူတွေ့ကြုံခဲ့သော ဟာသအဖြစ်အပျက်တစ်ခုကို စတင်ပြောပြနေသည်။ သို့သော် ပျော်ရွှင်နေကြသောအုပ်စုကို ထိုနေ့၏ သဘာပတိက နေ့စဉ်ကျမ်းချက်သုံးသပ်ရန် အချိန်ကျရောက်ပြီဖြစ်ကြောင်း သတိပေးလိုက်သောအခါ ကျွန်ုပ်တို့စကားပြောဆိုရာမှ တိတ်ဆိတ်သွားသည်။ ဆွေးနွေးခန်းကို ပြင်သစ်စကားဖြင့် ပြုလုပ်ကြမည်။ ထိုဘာသာစကားကို ကျွန်ုပ်တို့မပြောဆိုနိုင်သော်လည်း တိုင်းတစ်ပါးသားသာသနာပြုများသည် အဆိုပါဘာသာစကားကို ကျွမ်းကျင်လိမ္မာစွာပြောဆိုနိုင်ရန် ကြိုးစားခဲ့ကြောင်း သိသာထင်ရှားပါသည်။
ကျမ်းစာဆွေးနွေးခန်းပြီးနောက် လှိုက်လှဲစွာဆုတောင်းပြီး နံနက်စာစားရန်အချိန် ရောက်လာသည်။ နံနက်စာစားဖွယ်ကောက်နှံတစ်ခွက်မောက်မောက်ကို ကျွန်ုပ်တို့စားနေစဉ် နံဘေး၌ထိုင်သောသာသနာပြုက ငှက်ပျောသီးပါလှီးထည့်ရောစားရန် တိုက်တွန်းသည်။ ငှက်ပျောသီးမကြိုက်ကြောင်း ကျွန်ုပ်တို့ရှင်းပြလိုက်သောအခါ သူက ဒေသထွက်ငှက်ပျောသီးကို မြည်းစမ်းကြည့်လျှင် ကျွန်ုပ်တို့စိတ်ပြောင်းသွားမည်ဟု အာမခံသည်။ သို့နှင့် ကောက်နှံစားဖွယ်ထဲ အနည်းငယ်လှီးထည့်စားကြည့်သည်။ မှန်လိုက်လေခြင်း! ဤငှက်ပျောသီးများသည် ချိုမွှေး၍ရေခဲမုန့် အရသာအတိုင်းပင်! ထို့အပြင် ချကျွေးသော ပြင်သစ်ပုံစံပေါင်မုန့်မှာ သာသနာပြုအိမ်ရှေ့က ဆိုင်ငယ်လေးမှ ဤနံနက်၌ပင် စောစောစီးစီးဖုတ်ထားကြောင်း ကျွန်ုပ်တို့သိရှိခဲ့ရ၏။
နံနက်စာစားပြီးနောက် ကျွန်ုပ်တို့သည် ဘဲန်နှင့် ကယ်ရင်ဟု အမည်တပ်ခေါ်မည့် သာသနာပြုမောင်နှံစုံတစ်စုံနှင့် တစ်နေကုန်အတူနေကြမည်။ အနောက်အာဖရိကရှိ ဤနိုင်ငံ၏တိုးတက်မှုအကြောင်း ကျွန်ုပ်တို့ကြားခဲ့ကြဖူး၍ အဆိုပါသတင်းမှန်မမှန် ကျွန်ုပ်တို့သိချင်နေကြသည်။
ဘတ်စကားမှတ်တိုင်သို့ ကျွန်ုပ်တို့ရောက်သောအခါ လူတစ်ဒါဇင်ခန့် ကားစောင့်နေသည်ကို တွေ့လိုက်သည်။ မကြာမီ ကျွန်ုပ်တို့၏အဖော် သာသနာပြုများသည် အမျိုးသမီးတစ်ဦးနှင့် သူ၏သားကို သမ္မာကျမ်းစာအကြောင်း အားတက်သရောပြောဆိုနေလေတော့သည်။ ပြင်သစ်စကားနားမလည်သောကြောင့် ကျွန်ုပ်တို့မှာမူ ပြုံးပြုံးလေးဖြင့်သာ ရပ်နေနိုင်ကြသည်! ထိုအမျိုးသမီးသည် ကင်းမျှော်စင်နှင့် နိုးလော့! ကို လက်ခံယူနေစဉ်ပင် ဘတ်စကားဆိုက်လာပြီး လူတိုင်း ကားပေါ်သို့ တစ်ပြိုင်တည်းအားလုံးတက်ရန် ကြိုးစားကြသည်! ကျွန်ုပ်တို့လည်း အလုအယက်တက်နေကြစဉ် ကြိတ်ကြိတ်တိုးနေသောလူအုပ်က အနောက်မှ ကျွန်ုပ်တို့ကို တွန်းထိုးတင်ကြသည်။ ဘတ်စကားအတွင်းသို့ မလဲဘဲဝင်သွားကြရန်မှာ ကျွန်ုပ်တို့အတွက် စိန်ခေါ်ချက်တစ်ရပ်ဖြစ်ခဲ့၏။ ဒရိုင်ဘာက စက်နှိုးလိုက်သည်နှင့်တစ်ပြိုင်နက် ကျွန်ုပ်တို့မှီရာလှမ်းဆွဲကိုင်ထားကြရသည်။ ဘတ်စကားသည် အခါအားလျော်စွာ တုန့်ခနဲရပ်လိုက်ပြီး လူများပို၍ကျပ်ညှပ်တိုးတက်လာကြသည်။ ကျွန်ုပ်တို့၏ခရီးဖော်ချင်းတို့ကို ကျွန်ုပ်တို့ကပြုံးပြလိုက်ရာ သူတို့ကလည်း ပြန်ပြုံးပြကြသည်။ သူတို့နှင့် စကားပြောဆိုဆက်သွယ်နိုင်လျှင် တကယ်ကောင်းပေမည်!
ဘတ်စကားအရှိန်နှင့်ဆက်သွားနေစဉ် ပြတင်းပေါက်မှ လမ်းပေါ်ကို ကျွန်ုပ်တို့လှမ်းကြည့်ကြ၏။ အမျိုးသမီးနှစ်ဦးသည် ခေါင်းပေါ်တွင်လေးလံသောဝန်ထုပ်များတင်၍ ဘေးချင်းယှဉ်လမ်းသွားနေကြသည်။ တစ်ဦးသည် သစ်သားရေစည်ကြီးကိုရွက်၍သွားနေ၏။ ဈေးသည်တစ်ဦးသည် လမ်းဘေးစင်္ကြံတွင် စောင်တစ်ထည်ခင်း၍ သူရောင်းလိုသည့် တိုလီမုတ်စများကို ဖြန့်ကြဲထားသည်။ ရောင်းနိုင်၊ ဝယ်နိုင်သည့်အရာမှန်သမျှကို နေရာတိုင်းတွင် လူတို့ရောင်းဝယ်လျက်ရှိကြသည်။
ကျွန်တော့်နံဘေး၌ရပ်နေသောဘဲန်က သူ၏ခြေထောက် ထိုးဆိတ်ခံရသည်ကို ရုတ်တရက်ခံစားလိုက်ရ၏။ အဘယ်အရာဖြစ်နိုင်သနည်း။ ဘတ်စကားမှာ ကျပ်ညှပ်နေသည်၊ သို့သော် ထပ်၍ထိုးဆိတ်ခံရပြန်သည်။ သူကြိုးစားငုံ့ကြည့်လိုက်ရာ သူခြေထောက်နားရှိ အိတ်တစ်လုံးထဲမှ ဝမ်းဘဲတစ်ကောင်သည် တစ်ခါတစ်ရံ ခေါင်းပြူထွက်လာပြီး သူ့ကို တစ်ချက်တစ်ချက်ထိုးဆိတ်နေသည်! ဤဝမ်းဘဲပိုင်ရှင်သည် ၎င်းကိုရောင်းရန် ဈေးသို့ယူသွားခြင်းဖြစ်နိုင်ကြောင်း ဘဲန်ကရှင်းပြသည်။
ရပ်ကွက်သို့ကျွန်ုပ်တို့ရောက်ကြသောအခါ အာဖရိကကျေးရွာပီပီတစ်ခုသို့ ရောက်လာကြောင်း တွေ့ရှိရ၍ဝမ်းမြောက်မိကြ၏။ ပထမအိမ်သို့ရောက်သောအခါ အိမ်ရှင်ကိုအသိပေးရန် ဘဲန်သည် လက်ခုပ်ခပ်ကျယ်ကျယ်တီးလိုက်သည်။ ကမ္ဘာ၏ဤဒေသအခြမ်းတွင် လူတို့သည် ဤသို့ “တံခါးခေါက်” ကြသည်။ လူရွယ်တစ်ဦးထွက်လာပြီး မိမိအလုပ်များနေကြောင်းရှင်းပြ၏၊ သို့သော် ခဏအကြာမှပြန်လာရန်ပြောသည်။
နောက်တံခါးတွင် ဘဲန်နားမလည်သည့် ဒေသခံစကားတစ်မျိုးပြောသော အမျိုးသမီးတစ်ဦးနှင့်တွေ့ဆုံသည်။ သူသည် သားဖြစ်သူကိုလှမ်းခေါ်လိုက်ရာ ဘဲန်ပြောသမျှကို သူကဘာသာပြန်ပေး၏။ ဘဲန်ပြောပြီးသောအခါ သမ္မာကျမ်းစာအကြောင်းများပါ ဘရိုရှာတစ်စောင်ကို ထိုအမျိုးသမီးလက်ခံယူလိုက်၏၊ သားဖြစ်သူက သူ့အား ရှင်းပြပေးမည်ဟုကတိပြုသည်။ တတိယအိမ်တွင် အိမ်ရှေ့ခြံဝင်းထဲ၌ လူငယ်များစွာထိုင်နေကြသည်။ သူတို့ထဲမှနှစ်ဦးက ဧည့်သည်များထိုင်စေရန် သူတို့ထိုင်ခုံများမှ ထပေးလိုက်သည်။ ဝတ်ပြုရေး၌ လက်ဝါးကားတိုင်အသုံးပြုခြင်းအကြောင်း တက်ကြွစွာဆွေးနွေးပြောဆိုခွင့်ရခဲ့ကြ၏။ နောက်အပတ်တွင်လည်း အခြားအကြောင်းဆက်ဆွေးနွေးရန် ချိန်းချက်စီစဉ်လိုက်ကြသည်။ ယခု ပထမအိမ်၌တွေ့ခဲ့သည့် အလုပ်များနေသော လူငယ်ထံပြန်သွားချိန်ရောက်လာလေပြီ။ တစ်အိမ်နှစ်အိမ်ကျော်မှလူငယ်တို့နှင့် ကျွန်ုပ်တို့၏ဆွေးနွေးခန်းအကြောင်း သူတစ်နည်းနည်းဖြင့် ကြားနှင့်ပြီးဖြစ်သည်။ သမ္မာကျမ်းစာနှင့်ပတ်သက်၍ သူ့မှာမေးစရာမေးခွန်းများစွာရှိပြီး ကျမ်းစာသင်အံမှု တောင်းဆိုလေသည်။ ဘဲန်က သူ၏အချိန်ဇယားကိုစစ်ဆေးပြီးနောက် နောက်အပတ် ဤအချိန်၌ပင် ပြန်လာရန်သဘောတူလိုက်သည်။ နေ့လယ်စာစားရန် သာသနာပြုအိမ်သို့ အပြန်ခရီးတွင် ဘဲန်နှင့် ကယ်ရင်တို့က မိမိတို့၏ကျမ်းစာသင်အံမှုလုပ်ငန်းကို အစီအစဉ် အသေအချာဆွဲရကြောင်း၊ သို့မဟုတ်လျှင် မိမိတို့ကျင်းပနိုင်သည်ထက် ကျမ်းစာသင်အံမှုများ အလွယ်တကူရနိုင်ကြောင်း ရှင်းပြသည်။
ပြင်သစ်စကားကို သူတို့ကျွမ်းကျွမ်းကျင်ကျင်ပြောဆိုနိုင်ကြခြင်းကို သူတို့အား ကျွန်ုပ်တို့ချီးကျူးလိုက်သည်။ ဘဲန်က သူနှင့် ကယ်ရင်သည် သာသနာပြုလုပ်ငန်းတွင် ခြောက်နှစ်ရှိပြီး ပြင်သစ်စကားကိုပြောရဲဆိုရဲရှိပြီဟု ရှင်းပြ၏။ ဘာသာစကားအသစ်တစ်ခု သင်ယူခြင်းမှာမလွယ်ကူသော်လည်း စွဲစွဲမြဲမြဲသင်ယူခဲ့ကြခြင်းက အကျိုးပေးနေကြောင်း သူတို့ပြောပြသည်။
နေ့လယ် ၁၂:၃၀ နာရီတွင် နေ့လယ်စာစားရန် သာသနာပြုအားလုံး အစားအစာစားပွဲသို့ ပြန်စုရုံးရောက်ရှိလာကြ၏။ နံနက်စာနှင့် နေ့လယ်စာချက်ပြုတ်ပြင်ဆင်ရန်နှင့် ထို့နောက်တွင် ပန်းကန်ခွက်ယောက်များ ဆေးကြောရန် သာသနာပြုကို အလှည့်ကျတာဝန်ပေးထားကြောင်း ပြောပြသည်။ ယနေ့ တာဝန်ကျသူ သာသနာပြုက သူ၏အထူးဟင်းလျာဖြစ်သည့် ခရမ်းချဉ်သီးသုပ်နှင့် ကြက်သားကျော်၊ ပြင်သစ်အာလူးကျော်တို့ကို လျှာလည်သွားအောင် ချက်ပြုတ်ထားသည်။
ဘဲန်နှင့် ကယ်ရင်တို့၏ နေ့လယ်ပိုင်းအစီအစဉ်ကား အဘယ်နည်း။ အပူရှိန်ကြောင့် နေ့လယ် ၁ နာရီမှ ၃ နာရီအထိ တစ်မြို့လုံးသည် အိမ်တွင်အနားယူလေ့ရှိကြရာ သာသနာပြုများသည် ထိုအချိန်ပိုင်းကို လေ့လာမှုပြုရန် သို့မဟုတ် တစ်မှေးလောက်အိပ်ရန် များသောအားဖြင့် အသုံးပြုကြောင်းပြောပြသည်။ သာသနာပြုအသစ်များသည် ဤထုံးစံကို မကြာမီပင် လိုက်တတ်သွားကြောင်း ကယ်ရင်က ကျွန်ုပ်တို့ကိုပြောပြသောအခါ ကျွန်ုပ်တို့မအံ့သြကြပါ။
အနားယူပြီးနောက် လယ်ကွင်းဓမ္မအမှုသို့ ကျွန်ုပ်တို့ပြန်သွားကြသည်။ ဘဲန်ကြိုးစားပြန်သွားရှာသော စိတ်ဝင်စားသူအမျိုးသားတစ်ဦးသည် ယခုထိအိမ်တွင်မရှိသေးချေ၊ သို့သော် ဘဲန် လက်ခုပ်တီးလိုက်ရာ တံခါးပေါက်သို့ လူငယ်နှစ်ဦးထွက်လာသည်။ အိမ်ရှင်က ဘဲန်လာခဲ့ကြောင်း မိမိတို့အား ပြောပြခဲ့ဖူးပြီး ထာဝရအသက်သို့ပို့ဆောင်သောအသိပညာ ကျမ်းစာလေ့လာမှုအထောက်အကူပြုစာအုပ်သည် တကယ်ကောင်းကြောင်း သူထောက်ခံပြောဆိုသည်ဟု သူတို့ကပြောပြသည်။ သူတို့နှင့် ထိုစာအုပ်တစ်အုပ်ကို ကျွန်ုပ်တို့ဝမ်းမြောက်အားရစွာ ထားခဲ့ကြသည်။ ထို့နောက် ဘတ်စကားစီးပြီး စိတ်ဝင်စားသူအမျိုးသမီးတစ်ဦးနှင့် ကယ်ရင် ကျမ်းစာသင်မည့်နေရာသို့ ကျွန်ုပ်တို့သွားကြသည်။
ပြည့်ကျပ်ရှုပ်ထွေးနေသောလမ်းများပေါ် ကျွန်ုပ်တို့ကားစီးသွားစဉ် ကယ်ရင်က အဆိုပါအမျိုးသမီးကို အခြားခရီးသည်များနှင့်အတူ တက္ကစီစီးရင်းတွေ့ဆုံခဲ့ကြောင်း ကျွန်ုပ်တို့အား ပြောပြသည်။ ကားစီးရင်းဖတ်ရှုရန် အဆိုပါအမျိုးသမီးကို ကယ်ရင်က ဝေစာတစ်စောင်ပေးလိုက်၏။ ထိုအမျိုးသမီးသည် ဝေစာကိုဖတ်ပြီးနောက် နောက်တစ်မျိုးကို တောင်းဆိုလေသည်။ ဒုတိယဝေစာကို သာ၍စိတ်ဝင်တစား ဖတ်ရှုလိုက်သည်။ ကယ်ရင်သည် ကားပေါ်မှမဆင်းမီ ထိုအမျိုးသမီး၏အိမ်သို့ လည်ပတ်လာရန်စီစဉ်ခဲ့ပြီး ကျွန်ုပ်တို့ထံမှ ဘုရားသခင် အဘယ်ရာတောင်းဆိုတော်မူသနည်းဘရိုရှာဖြင့် သင်အံမှုကို အောင်မြင်စွာစတင်ခဲ့သည်။ ယနေ့ ကယ်ရင်သည် ထိုဘရိုရှာမှ သင်ခန်းစာငါးကိုလေ့လာတော့မည်ဖြစ်သည်။
တစ်နေ့တာလယ်ကွင်းလုပ်ငန်းတွင် ကျွန်ုပ်တို့ပျော်ရွှင်မှုများစွာရရှိခဲ့ကြပြီ၊ သို့သော် သာသနာပြုလုပ်ငန်းနှင့်ပတ်သက်၍ မေးစရာမေးခွန်းအချို့ရှိနေသည်။ ကျွန်ုပ်တို့ကိုဧည့်ခံသူများက အိမ်ပြန်ရောက်သောအခါ ကျွန်ုပ်တို့အတွက် အဆာပြေပြင်ဆင်ပေးပြီးနောက် မေးခွန်းများကိုဖြေဆိုပေးမည်ဟု ကတိပြုသည်။
သူတို့ မည်သို့ဆက်ဆောင်ရွက်သွားနိုင်
ကြက်ဥကျော်၊ ပြင်သစ်ပေါင်မုန့်နှင့် ဒိန်ခဲကို ကျွန်ုပ်တို့စားသုံးနေကြစဉ် သာသနာပြုဘဝအကြောင်း ကျွန်ုပ်တို့ပိုမိုသိရှိလာရကြသည်။ တနင်္လာနေ့တွင် သာသနာပြုများ အများအားဖြင့် အနားယူခြင်း သို့မဟုတ် ကိုယ်ရေးကိုယ်တာကိစ္စများကို လုပ်ဆောင်ကြသည်။ သာသနာပြုအများစုသည် ထိုနေ့တွင် မိသားစုနှင့် မိတ်ဆွေများထံစာရေးလေ့ရှိကြ၏။ သာသနာပြုများအတွက် အိမ်မှလာသောသတင်းသည် အလွန်အရေးကြီးပြီး သူတို့သည် စာပို့ခြင်းနှင့် စာရရှိခြင်းမှ ပျော်ရွှင်မှုများစွာရရှိကြ၏။
သာသနာပြုများသည် အခြားသူများနှင့်နီးနီးကပ်ကပ် နေထိုင်လုပ်ဆောင်ကြရာ အချင်းချင်းပေါင်းသင်းခြင်းနှင့် ဝိညာဉ်ရေးရာအကြောင်းများ ဆွေးနွေးခြင်းဖြင့် ဆက်ဆံရေးကောင်းကို ထိန်းထားရန်အရေးကြီး၏။ ၎င်းနှင့်ပတ်သက်၍ သမ္မာကျမ်းစာကို ကိုယ်ပိုင်လေ့လာမှု မှန်မှန်ပြုလုပ်သည့်အပြင် တနင်္လာနေ့ညနေတိုင်း သာသနာပြုများသည် သမ္မာကျမ်းစာကို ကင်းမျှော်စင်မဂ္ဂဇင်းနှင့် အတူတကွလေ့လာကြသည်။ နောက်ခံမတူသောသာသနာပြုများ အတူတကွနေထိုင်ကြသောအခါ ထင်မြင်ယူဆချက် အနည်းငယ်ကွာခြားမှု မလွဲမသွေတွေ့ကြုံတတ်ကြကြောင်း၊ သို့သော် မိသားစုလိုက်လေ့လာမှုပြုခြင်း ဝိညာဉ်ရေးအစီအစဉ်က သူတို့ကိုကို ဆက်၍သင့်မြတ်နေစေပြီး စည်းလုံးစေကြောင်း ဘဲန်ကညွှန်ပြသည်။ ထို့ပြင် မိမိကိုယ်ကို သိပ်အရေးပါလွန်းသည်ဟု မယူမှတ်ခြင်းသည်လည်း အထောက်အကူပြုကြောင်း သူကအလေးပေးဖော်ပြသည်။
နှိမ့်ချမှုရှိဖို့လည်း အရေးကြီး၏။ သာသနာပြုများသည် သူတစ်ပါးကိုစေစားဖို့မဟုတ်၊ သူတစ်ပါးအစေကိုခံဖို့ စေလွှတ်ခံရကြသည်။ မည်သည့်ဘာသာစကားမဆိုတွင် “ကျွန်ုပ်မှားသွားတယ်” ဟူ၍ပြောဆိုရန် အခဲယဉ်းဆုံးဖြစ်သည်၊ အထူးသဖြင့် လူတစ်ဦးသည် မရည်ရွယ်ဘဲ သူပြောဆိုပြုမူမိသည့်အရာတစ်ခုအတွက် တောင်းပန်ရန်ဖြစ်သည်ဟု ကျွန်ုပ်တို့၏မိတ်ဆွေများက ပြောပြကြသည်။ ခင်ပွန်းဖြစ်သူ၏ ရိုင်းပျသောအပြုအမူကို တောင်းပန်ခဲ့ရာ ဘေးတွေ့နိုင်သည့်အခြေအနေကို ဖြေရှင်း၍ ပြေလည်စေခဲ့သော အဘိဂဲလ၏သမ္မာကျမ်းစာပုံနမူနာအကြောင်း ဘဲန်က ကျွန်ုပ်တို့ကိုသတိပေးခဲ့သည်။ (၁ ဓမ္မရာဇဝင် ၂၅:၂၃-၂၈) သာသနာပြုကောင်းတစ်ဦးအဖြစ် “အချင်းချင်းအသင့်အတင့်နေ” ခြင်းစွမ်းရည်မှာ အရေးကြီး၏။—၂ ကောရိန္သု ၁၃:၁၁။
သာသနာပြုများသည် မိသားစုနှင့်သက်ဆိုင်သည့် အကြောင်းကိစ္စများအပြင် အပြောင်းအလဲများကို စီစဉ်ဆွေးနွေးရန် တစ်လတစ်ခါ စည်းဝေးကြသည်။ ထို့နောက် အထူးအချိုပွဲတစ်မျိုးမျိုးကို အားလုံးအတူတူသုံးဆောင်ကြ၏။ ယင်းက ကျွန်ုပ်တို့အတွက် အလွန်လက်တွေ့ကျပြီး နှစ်သက်ဖွယ်ကောင်းသော အစီအစဉ်တစ်ရပ်ဖြစ်ပုံရှိသည်။
ကျွန်ုပ်တို့သည် ညစာစားပြီးနောက် သာသနာပြုအိမ်ထဲ တစ်ခဏလှည့်လည်ကြည့်ရှုကြသည်။ အဆိုပါအိမ်မှာ မခမ်းနားလှသော်လည်း အသေးအဖွဲကအစ သန့်ရှင်းစင်ကြယ်စွာရှိစေရန် သာသနာပြုများ ပူးပေါင်းလုပ်ဆောင်ကြကြောင်း ကျွန်ုပ်တို့ကြားသိကြရ၏။ ရေခဲသေတ္တာတစ်လုံး၊ အဝတ်လျှော်စက်နှင့် မီးဖိုရှိသည်။ အနောက်အာဖရိကရှိ ဤကဲ့သို့သော အပူပိုင်းဒေသနိုင်ငံများတွင် လေအေးစက်ကိုလည်းရရှိနိုင်ကြောင်း ကယ်ရင်က ပြောပြသည်။ သင့်လျော်သော နေရာထိုင်ခင်းများ၊ ကျန်းမာရေးနှင့်ညီညွတ်သောအစားအစာ၊ ကျန်းမာရေးကာကွယ်မှုအတွက် ရိုးရှင်းသောအစီအစဉ်များက သာသနာပြုများကို ကျန်းကျန်းမာမာဆက်ရှိစေ၍ ထိရောက်စွာလုပ်ဆောင်ရန် အထောက်အကူပြုသည်။
အပြုသဘောကို အာရုံစိုက်ခြင်း
ကျွန်ုပ်တို့တွေ့မြင်သမျှသည် စိတ်စွဲမှတ်စရာပင်ဖြစ်ခဲ့သည်။ သာသနာပြုလုပ်ငန်းသည် ကျွန်ုပ်တို့အတွက် ဖြစ်နိုင်မည်လော။ မည်သို့သိနိုင်မည်နည်း။ ကျွန်ုပ်တို့ကိုဧည့်ခံသူများက ကျွန်ုပ်တို့အား စဉ်းစားစရာအနည်းငယ်ရှိစေသည်။
ဦးဆုံး ခရစ်ယာန်သာသနာပြုများသည် စွန့်စားခန်းရှာဖွေနေကြသူများမဟုတ်ကြောင်း ကျွန်ုပ်တို့အားသိစေ၏။ သူတို့သည် ဘုရားသခင့်အံ့ချီးဖွယ်ကတိတော်များကို သိလိုသူ စိတ်နှလုံးရိုးဖြောင့်သူတို့ကို ရှာဖွေနေကြ၏။ သာသနာပြုများသည် လယ်ကွင်းလုပ်ငန်း၌ တစ်လလျှင်နာရီအနည်းဆုံး ၁၄၀ ပါဝင်ကြရာ ဓမ္မအမှုကိုတန်ဖိုးထားသည့်စိတ် မရှိမဖြစ်လိုအပ်သည်။
‘သို့သော် မြွေများ၊ အိမ်မြှောင်များ၊ ကြမ်းပိုးများကော’ ဟုကျွန်ုပ်တို့သိလိုကြသည်။ ၎င်းတို့ကို သာသနာပြုတာဝန်ကျရာနေရာများစွာ၌ တွေ့ရှိနိုင်သည်ဖြစ်သော်လည်း သာသနာပြုများသည် ယင်းတို့နှင့် နေသားတကျဖြစ်ကြ၏ဟု ဘဲန်ကကျွန်ုပ်တို့ကိုပြောပြသည်။ သာသနာပြုတာဝန်ကျရာနေရာတိုင်းတွင် ထူးခြားသောစွဲမက်စရာရှိပြီး အချိန်တန်သော် သာသနာပြုများသည် မိမိတို့၏တာဝန်ကျရာနေရာရှိ မက်မောစရာများကို အာရုံစိုက်သတိမူမိကြသည်ဟု သူထပ်ဆင့်ပြောပြသည်။ “ခြားနားသည်” ဟုအစောပိုင်းက ယူမှတ်ခဲ့မည်ဖြစ်သောအခြေအနေများမှာ များမကြာမီ မဆန်းတော့ချေ၊ အချို့ကိစ္စများတွင် နှစ်သက်စရာပင်ဖြစ်လာတတ်သည်။ အနောက်အာဖရိကတွင် နှစ်ပေါင်းများစွာ အမှုဆောင်ခဲ့သော သာသနာပြုတစ်ဦးသည် ကိုယ်ရေးကိုယ်တာတာဝန်များအတွက် သူ၏ဇာတိမြေသို့ မလွှဲမရှောင်ပြန်သွားရန် အကြောင်းပေါ်သောအခါ လွန်ခဲ့သောနှစ်များစွာက မိမိ၏နေရင်းပြည်မှ ထွက်ခွာခဲ့ရခြင်းထက် မိမိတာဝန်ကျရာနေရာကို စွန့်ခွာသွားရခြင်းမှာ သူ့အတွက်ပို၍ခက်ခဲကြောင်း ပြောပြသည်။ သူ၏သာသနာပြုတာဝန်ကျရာနေရာသည် သူစံအိမ်ဖြစ်ခဲ့ချေပြီ။
သင် အသင့်ရှိသလော
ဘဲန်နှင့် ကယ်ရင်တို့သည် ကျွန်ုပ်တို့ကို စဉ်းစားစရာ အတော်များများရှိစေခဲ့သည်။ အသင်ကော။ တိုင်းတစ်ပါးလယ်ကွင်းတစ်ခုခုတွင် သာသနာပြုတစ်ဦးအဖြစ် အမှုတော်ထမ်းဆောင်ရန် စဉ်းစားခဲ့ဖူးသလော။ သို့ဆိုလျှင် သင်ထင်သည်ထက် အဆိုပါပန်းတိုင်ပို၍နီးကပ်နေပေမည်။ လိုအပ်သော အဓိကအရာတစ်ခုမှာ အချိန်ပြည့်ဓမ္မအမှုကို မြတ်နိုးခြင်းနှင့် လူအများကိုအကူအညီပေးသည့်လုပ်ငန်းတွင် ပျော်မွေ့နေခြင်းဖြစ်သည်။ သတိရပါ၊ သာသနာပြုများသည် လူစွမ်းကောင်းများမဟုတ်၊ သာမန်အမျိုးသား အမျိုးသမီးများသာဖြစ်ကြသည်။ သူတို့သည် အလွန်အရေးကြီးသော လုပ်ငန်းတစ်ခုကို ပြီးမြောက်အောင်မြင်ရန် အတတ်နိုင်ဆုံးလုပ်ဆောင်နေသူများဖြစ်ကြသည်။
[စာမျက်နှာ ၂၇ ပါ ရုပ်ပုံ]
ကျမ်းချက်တစ်ချက်ဆွေးနွေးခြင်းဖြင့် နေ့စဉ်စတင်ကြ
[စာမျက်နှာ ၂၈၊ ၂၉ ပါ ရုပ်ပုံ]
အာဖရိကမှ ရှုမျှော်ခင်းများ
[စာမျက်နှာ ၂၉ ပါ ရုပ်ပုံ]
ခရစ်ယာန်သာသနာပြုတစ်ဦးအနေနှင့် ဘဝသည် ကျေနပ်နှစ်သက်ဖွယ်ရာဖြစ်နိုင်