ပျော်ရွှင်ဖွယ်လောက၏ သော့ချက်
ပျော်ရွှင်ဖွယ်လောက၏ သော့ချက်
“ဤအနှစ်နှစ်ထောင်၌သာမဟုတ်ဘဲ လူ့သမိုင်းတစ်လျှောက်လုံး၌ ပြိုင်ဘက်မရှိသြဇာအရှိဆုံးပုဂ္ဂိုလ်မှာ နာဇရက်မြို့သားယေရှုဖြစ်သည်” ဟုတိုင်းမ်မဂ္ဂဇင်းက ဖော်ပြခဲ့သည်။ ယေရှု ကမ္ဘာပေါ်ရှိစဉ် ကိုယ်တော်၏ကြီးမြတ်မှုကိုသာမက အခြားသူများအပေါ် ကိုယ်တော်၏စိုးရိမ်ပူပန်မှုကိုပါ ထောင်နှင့်ချီသောစိတ်နှလုံးရိုးဖြောင့်သူများသိမြင်ခဲ့ကြ၏။ ထို့ကြောင့် ကိုယ်တော့်ကို ရှင်ဘုရင်တင်မြှောက်လိုကြသည်မှာ အံ့ဩစရာမဟုတ်ချေ။ (ယောဟန် ၆:၁၀၊ ၁၄၊ ၁၅) သို့တိုင် ရှေ့ဆောင်းပါးတွင် ဖော်ပြထားသည့်အတိုင်း ယေရှုသည် နိုင်ငံရေးတွင်ပတ်သက်ရန် ငြင်းပယ်ခဲ့သည်။
ယေရှု၏တုံ့ပြန်မှုသည် အနည်းဆုံးဤအချက်သုံးချက်အပေါ် အခြေပြုသည်– လူ့အုပ်ချုပ်မှုအပါအဝင် လူများမိမိတို့ဘာသာစိတ်ပိုင်းဖြတ်ခြင်းအပေါ် ကိုယ်တော်၏ခမည်းတော်ရှုမြင်ပုံ; အုပ်ချုပ်မှုအတွက် လူတို့ အကောင်းဆုံးကြိုးစားအားထုတ်ကြသော်လည်း ၎င်းကိုတိုက်ခိုက်နေသော မျက်မြင်မရ တန်ခိုးစွမ်းအားများရှိကြောင်းကို ယေရှုသိမြင်ခြင်း; ကမ္ဘာမြေတစ်ခွင်အုပ်ချုပ်ရန် ကောင်းကင်အစိုးရကိုတည်ထောင်ဖို့ ဘုရားသခင်၏ရည်ရွယ်ချက်ရှိခြင်းတို့ဖြစ်သည်။ အဆိုပါအချက်သုံးချက်ကို ပိုမိုအနီးကပ် ဆန်းစစ်သည်နှင့်အမျှ လောကကို သာ၍ကောင်းသောနေရာတစ်ခုဖြစ်စေရန် လူ့ကြိုးပမ်းမှုများ အဘယ်ကြောင့်မအောင်မြင်ရသည့် အကြောင်းရင်းကို ကျွန်ုပ်တို့တွေ့မြင်ရပါလိမ့်မည်။ မည်သို့ဖြစ်မြောက်အောင်မြင်လာမည်ကိုလည်း သိရှိကြရမည်ဖြစ်သည်။
လူသားများသည် သူတို့ဘာသာ အုပ်ချုပ်နိုင်သလော
ဘုရားသခင်သည် လူကိုဖန်ဆင်းစဉ်က သူတို့အား တိရစ္ဆာန်လောကအပေါ် အခွင့်အာဏာပေးခဲ့သည်။ (ကမ္ဘာဦး ၁:၂၆) သို့သော် လူသားမူကား ဘုရားသခင်၏ပိုင်သအုပ်စိုးမှုအောက်တွင် ရှိခဲ့ကြ၏။ ကနဦးလူသားမောင်နှံသည် “ကောင်းမကောင်းကိုသိကျွမ်းရာအပင်” တစ်ပင်တည်း၏အသီးကို နာခံမှုရှိရှိ မစားခြင်းအားဖြင့် ဘုရားသခင်အား သူတို့လက်အောက်ခံကြောင်း တင်ပြကြရမည်ဖြစ်သည်။ (ကမ္ဘာဦး ၂:၁၆) ဝမ်းနည်းစရာကား၊ အာဒံနှင့်ဧဝသည် သူတို့၏လွတ်လပ်စွာရွေးချယ်ပိုင်ခွင့်ကို တလွဲအသုံးပြုပြီး ဘုရားသခင်ကို အာခံခဲ့ကြ၏။ တားမြစ်ထားသောအသီးကို စားသုံးခြင်းသည် ခိုးယူခြင်းမျှသာမဟုတ်။ ဘုရားသခင်၏ပိုင်သအုပ်စိုးမှုကို ပုန်ကန်ခြင်းဖြစ်သည်။ ယေရုရှလင်ကျမ်းစာမှ ကမ္ဘာဦး ၂:၁၇ ၏အောက်ခြေမှတ်ချက်က အာဒံနှင့်ဧဝသည် “ဖန်ဆင်းရာမျှဖြစ်သည့် မိမိ၏အခြေအနေကို အသိအမှတ်မပြုဘဲ လွတ်လပ်စွာရွေးချယ်ပိုင်ခွင့်ရှိသည် . . . ” ဟုဆိုကာ “ပထမအပြစ်သည် ဘုရားသခင်၏ပိုင်သအုပ်စိုးမှုကို တိုက်ခိုက်ခြင်းပင်ဖြစ်သည်” ဟုဖော်ပြသည်။
ကြီးလေးသောကိုယ်ကျင့်တရားကိစ္စရပ်များ ပါဝင်ပတ်သက်နေသောကြောင့် ဘုရားသခင်သည် အာဒံနှင့်ဧဝ၊ သူတို့၏သားစဉ်မြေးဆက်များကို သူတို့ကိုယ်ပိုင်ဘဝလမ်းစဉ်ကို ရွေးချယ်ခွင့်ပြုပြီး သူတို့ကိုယ်တိုင် အမှားအမှန်စံနှုန်းများ ချမှတ်ခဲ့ကြသည်။ (ဆာလံ ၁၄၇:၁၉၊ ၂၀; ရောမ ၂:၁၄) အချုပ်အားဖြင့်၊ ထိုအချိန်တွင် မိမိတို့ဘာသာ ဆုံးဖြတ်ချက်ချခြင်းနှင့်အတူ လူ့စမ်းသပ်မှု စတင်ခဲ့သည်။ အောင်မြင်ခဲ့သလော။ နှစ်ပေါင်းထောင်နှင့်ချီ၍ အကျိုးရလဒ်ကို သိရှိခဲ့ပြီဖြစ်ရာ မအောင်မြင်ပါဟု ကျွန်ုပ်တို့ပြောနိုင်၏! “လူသည် တစ်ဦးအပေါ်တစ်ဦး အကျိုးနစ်နာအောင် အုပ်စိုးလာခဲ့ကြ၏” ဟူ၍ ဒေ. ၈:၉ [ကဘ] ကဖော်ပြသည်။ လူ့အုပ်ချုပ်မှု၏ ဤဝမ်းနည်းဖွယ်မှတ်တမ်းက ယေရမိ ၁၀:၂၃ ပါဤစကားများမှန်ကန်ကြောင်း အတည်ပြုသည်– “အိုထာဝရဘုရား လူသည် မိမိသွားရာလမ်းကို အစိုးမရ။ သွားစဉ်အခါ မိမိခြေရာတို့ကို မစီရင်တတ်သည်ကို အကျွန်ုပ်သိပါ၏။” လူသားတို့သည် မိမိတို့၏ဖန်ဆင်းရှင်မပါဘဲ အောင်မြင်စွာအုပ်ချုပ်နိုင်စွမ်းမရှိကြောင်း သမိုင်းက သက်သေထူခဲ့သည်။
၎င်းကို ယေရှုအပြည့်အဝထောက်ခံ၏။ ဘုရားသခင်နှင့်ကင်းကွာနေခြင်းသည် ကိုယ်တော့်အတွက် မုန်းတီးစက်ဆုပ်ဖွယ်ဖြစ်ခဲ့သည်။ “ငါသည် ကိုယ်အလိုအလျောက် အဘယ်အမှုကိုမျှမပြု” ဟုကိုယ်တော်မိန့်ဆိုခဲ့သည်။ “[ဘုရားသခင်] နှစ်သက်တော်မူသောအမှုကို အစဉ်မပြတ်ငါပြုသည်။” (ယောဟန် ၄:၃၄; ၈:၂၈၊ ၂၉) ထို့ကြောင့် ယေရှုသည် လူသားများထံမှ ရှင်ဘုရင်အရာကိုလက်ခံယူရန် ဘုရားသခင်ထံမှအခွင့်အာဏာမရရှိသောကြောင့် ယင်းကိုလက်ခံဖို့ စိတ်ကူးထဲပင်မထည့်ခဲ့ပေ။ သို့သော် ကိုယ်တော်သည် လူသားချင်းကိုကူညီရန် တွန့်ဆုတ်ခဲ့သည်ဟု ယင်းကဆိုလိုနေခြင်းမဟုတ်ချေ။ ထိုသို့ပြုမည့်အစား၊ ယင်းအချိန်နှင့် အနာဂတ်တွင် အကြီးမားဆုံးသောပျော်ရွှင်မှုကို လူတို့တွေ့ရှိရန် ကိုယ်တော်သည် အစွမ်းကုန်ကူညီပေးခဲ့၏။ လူသားတို့အတွက် မိမိ၏အသက်ကိုပင် စွန့်ခဲ့သည်။ (မဿဲ ၅:၃-၁၁; ၇:၂၄-၂၇; ယောဟန် ၃:၁၆) သို့ရာတွင် လူသားများအပေါ် ဘုရားသခင်၏ပိုင်သအုပ်စိုးမှုကို အခိုင်အမာဖော်ပြရန် ကိုယ်တော်၏အချိန်အပါအဝင် “ခပ်သိမ်းသောအမှုအရာတို့သည် မိမိတို့အချိန်ရှိ” သည်ကို ယေရှုသိခဲ့သည်။ (ဒေ. ၃:၁; မဿဲ ၂၄:၁၄၊ ၂၁၊ ၂၂၊ ၃၆-၃၉) သို့သော် ဧဒင်ဥယျာဉ်၌ ကျွန်ုပ်တို့၏ကနဦးမိဘများသည် မျက်မြင်ရမြွေတစ်ကောင်မှတစ်ဆင့် စကားပြောခဲ့သော ဆိုးညစ်သည့် . . . ဝိညာဉ်သား၏အလိုသို့ လိုက်ခဲ့သည်ကို ပြန်အမှတ်ရပါ။ ယင်းက နိုင်ငံရေးတွင် ယေရှုမပတ်သက်ခဲ့ရသည့် ဒုတိယအကြောင်းရင်းကို ဖော်ပြသည်။
လောက၏လျှို့ဝှက်အုပ်စိုးရှင်
တစ်ကြိမ်တည်းသာ ယေရှုညွတ်ပျပ်ကိုးကွယ်လျှင် “ဤလောက၌ရှိသမျှသော တိုင်းနိုင်ငံတို့ကိုလည်းကောင်း၊ ထိုတိုင်းနိုင်ငံတို့၏ ဘုန်းစည်းစိမ်ကိုလည်းကောင်း” ပေးမည်ဟု စာတန်ဆိုကြောင်း ကျမ်းစာကဖော်ပြသည်။ (မဿဲ ၄:၈-၁၀) အဓိကအားဖြင့် ယေရှုသည် ကမ္ဘာကိုအုပ်ချုပ်ခွင့် ကမ်းလှမ်းခံနေရ၏၊ သို့သော် စာတန်၏တောင်းဆိုချက်များအတိုင်းဖြစ်ရမည်။ ယေရှုသည် ဤသွေးဆောင်မှုနောက် ပါမသွားခဲ့ချေ။ သို့သော် ယင်းသည် အမှန်တကယ်ပင် သွေးဆောင်မှုတစ်ခုလော။ ဤမျှလောက်ကြီးကျယ်သော ကမ်းလှမ်းမှုကို စာတန် အမှန်ပင်ပေးနိုင်သလော။ ပေးနိုင်ပါသည်၊ အကြောင်းမှာ ယေရှုကိုယ်တော်တိုင်က စာတန်ကို “ဤလောကကို အစိုးရသောမင်း” ဟူ၍ခေါ်ဆိုခဲ့ပြီး ပေါလုက “ဤအစီအစဉ်၏ဘုရား” ဟူ၍ဖော်ပြခဲ့သည်။—ယောဟန် ၁၄:၃၀; ၂ ကောရိန္သု ၄:၄၊ ကဘ; ဧဖက် ၆:၁၂။
စင်စစ်အားဖြင့် စာတန်သည် လူသားတို့၏အကောင်းဆုံးအကျိုးကို လိုလားသည်မဟုတ်ကြောင်း ယေရှုသိရှိခဲ့သည်။ ကိုယ်တော်သည် စာတန်ကို “လူသတ်သမား” ဟူ၍လည်းကောင်း၊ “မုသာနှင့် မကောင်းမှုရှိသမျှ၏အဘ” ဟူ၍လည်းကောင်း ဖော်ပြခဲ့၏။ (ယောဟန် ၈:၄၄၊ အကျယ်ဖွင့်ဆိုသည့်သမ္မာကျမ်း) ထင်ရှားသည်မှာ၊ ဤသို့သောဆိုးညစ်သည့် . . . ဝိညာဉ်သား၏ “တန်ခိုးဩဇာအောက်တွင်” ရောက်နေသောလောကသည် မည်သည့်အခါမျှ အမှန်တကယ်ပျော်ရွှင်နိုင်မည်မဟုတ်ချေ။ (၁ ယောဟန် ၅:၁၉၊ ကဘ) သို့သော် စာတန်သည် ဤအုပ်စိုးခွင့်ကို အစဉ်အမြဲပိုင်ဆိုင်မည်မဟုတ်ပေ။ ယခု တန်ခိုးကြီးသော . . . ဝိညာဉ်သားဖြစ်နေသော ယေရှုသည် စာတန်ကို မကြာမီပယ်ရှားပြီး သူ၏သြဇာအာဏာကို အပြီးသတ်ရှင်းပစ်တော့မည်။—ဟေဗြဲ ၂:၁၄; ဗျာဒိတ် ၂၀:၁-၃။
လောက၏အုပ်စိုးရှင်အဖြစ် မိမိ၏အချိန်ကာလသည် ကုန်ဆုံးတော့မည်ကို စာတန်ကိုယ်တိုင်သိ၏။ ထို့ကြောင့် သူသည် နောဧခေတ်ရေလွှမ်းမိုးခြင်းမတိုင်မီကကဲ့သို့ပင် ပြုပြင်ပြောင်းလဲ၍မရနိုင်သည်အထိ လူသားများကို အကျင့်ပျက်နေစေရန် မီးကုန်ယမ်းကုန်ကြိုးစားလျက်ရှိသည်။ (ကမ္ဘာဦး ၆:၁-၅; ယုဒ ၆) “မြေကြီးနှင့်ပင်လယ်သည် အမင်္ဂလာရှိ၏။ အကြောင်းမူကား [စာတန်]သည် မိမိကာလတစ်ခဏသာရှိသည်ကိုသိ၍ ပြင်းစွာသောဒေါသအမျက်နှင့်တကွ သင်တို့ရှိရာသို့ဆင်းလေပြီ” ဟုဗျာဒိတ် ၁၂:၁၂ ကဆိုသည်။ အဆိုပါ “ကာလတစ်ခဏ” ၏အဆုံးပိုင်းတွင် ကျွန်ုပ်တို့အသက်ရှင်နေရကြကြောင်း ကျမ်းစာပရောဖက်ပြုချက်နှင့် ကမ္ဘာ့ဖြစ်ရပ်များက ဖော်ပြသည်။ (၂ တိမောသေ ၃:၁-၅) ယခုတွင် လွတ်မြောက်ချိန် နီးကပ်နေပေပြီ။
ပျော်ရွှင်မှုကို ဆောင်ကြဉ်းပေးမည့်အစိုးရတစ်ခု
နိုင်ငံရေးတွင် ယေရှုမစွက်ဖက်ခဲ့သည့် တတိယအကြောင်းရင်းမှာ အနာဂတ်၌ သတ်မှတ်ထားသောအချိန်တစ်ချိန်တွင် ကမ္ဘာမြေတစ်ခွင်အုပ်ချုပ်ရန် ကောင်းကင်အစိုးရကို ဘုရားသခင်တည်ထောင်မည်ဖြစ်ကြောင်း ကိုယ်တော်သိရှိထားခြင်းကြောင့်ဖြစ်သည်။ ဤအစိုးရကို ဘုရားသခင့်နိုင်ငံတော်ဟု ကျမ်းစာကခေါ်ဆိုပြီး ယင်းက ယေရှုသွန်သင်ချက်၏ အဓိကအကြောင်းအရာဖြစ်သည်။ (လုကာ ၄:၄၃; ဗျာဒိတ် ၁၁:၁၅) ယေရှုသည် ဘုရားသခင့်နိုင်ငံတော်လာပါစေဟု ဆုတောင်းရန် မိမိ၏တပည့်တော်များကို သွန်သင်ပေးခဲ့သည်၊ ၎င်း၏အုပ်ချုပ်မှုအောက်တွင်သာ ‘ဘုရားသခင်၏အလိုတော်သည် ကောင်းကင်၌ပြည့်စုံသကဲ့သို့ မြေကြီးပေါ်မှာပြည့်စုံ’ မည်ဖြစ်သောကြောင့်တည်း။ (မဿဲ ၆:၉၊ ၁၀) ‘ဘုရားသခင်၏နိုင်ငံတော်သည် ကမ္ဘာမြေတစ်ခွင်တွင် အုပ်ချုပ်သောအခါ လူ့အစိုးရများ မည်သို့ဖြစ်ပျက်ကြမည်နည်း’ ကိုသင်သိလိုပေမည်။
အဖြေကို ဒံယေလ ၂:၄၄ [ကဘ] တွင်ဤသို့တွေ့ရှိရသည်– “ပျက်စီးခြင်းသို့မရောက်နိုင်သောနိုင်ငံကို [လက်ရှိအစီအစဉ်စနစ်အဆုံးတွင် အုပ်ချုပ်နေကြသော] ထိုဘုရင်များလက်ထက်၌ ကောင်းကင်ဘုံရှင်ဘုရားသခင်သည် တည်ထောင်တော်မူမည်။ ထိုနိုင်ငံသည်လည်း အခြားအဘယ်လူမျိုး၏လက်သို့မျှမရောက်ဘဲ အထက်ဆိုခဲ့ပြီးသော [လူ့]နိုင်ငံရှိသမျှကို ချိုးဖဲ့ဖျက်ဆီး၍ အစဉ်အမြဲတည်လိမ့်မည်။” ဘုရားသခင့်နိုင်ငံတော်သည် မြေကြီးအုပ်ချုပ်မှုများကို အဘယ်ကြောင့် “ဖျက်ဆီး” ပစ်ရမည်နည်း။ အကြောင်းမူကား ဧဒင်ဥယျာဉ်တွင် စာတန်ဆွပေးခဲ့သည့် ဘုရားသခင်ကိုအာခံလိုသော မိမိဘာသာဆုံးဖြတ်ပြုလုပ်ခြင်းကို ဤအုပ်ချုပ်မှုများက အစဉ်တည်ရှိစေလိုသောကြောင့်ဖြစ်သည်။ လူ့ကောင်းကျိုးကို ဆန့်ကျင်၍ လုပ်ဆောင်နေကြသည့်အပြင် ထိုစိတ်ဓာတ်ကို အစဉ်အမြဲရှိစေဖို့ ကြိုးစားနေသူများသည် ဖန်ဆင်းရှင်ကို ကလန်ကဆန်ပြုလုပ်နေကြသည်။ (ဆာလံ ၂:၆-၁၂; ဗျာဒိတ် ၁၆:၁၄၊ ၁၆) ထို့ကြောင့် မိမိကိုယ်ကိုမေးရမည်မှာ ‘ကျွန်ုပ်တို့သည် ဘုရားသခင်၏အုပ်ချုပ်မှုဘက်မှာရှိသလော၊ သို့မဟုတ် ၎င်း၏တစ်ဖက်တွင်ရှိသလော’ ဟူ၍ဖြစ်သည်။
မည်သူ၏ပိုင်သအုပ်စိုးမှုကို သင်ရွေးချယ်မည်နည်း
လူတို့သည် အုပ်ချုပ်မှုနှင့်ပတ်သက်၍ သိနားလည်စွာဆုံးဖြတ်ချက်ချဖို့ သူတို့ကို ကူညီပေးရန် မိမိ၏တပည့်တော်များကို ယေရှုစေလွှတ်ပြီး လက်ရှိစနစ်၏အဆုံးမတိုင်မီ “လူမျိုးအပေါင်းတို့အား သက်သေဖြစ်မည်အကြောင်း [ဘုရားသခင်]နိုင်ငံတော်နှင့်ယှဉ်သော ဧဝံဂေလိတရားကို” ဟောပြောစေခဲ့သည်။ (မဿဲ ၂၄:၁၄) ယနေ့ ဘုရားသခင့်နိုင်ငံတော်သတင်း ဟောပြောခြင်း၌ ကမ္ဘာတစ်ခွင် နာမည်ကျော်ကြားသူတို့သည် မည်သူများနည်း။ ယေဟောဝါသက်သေများဖြစ်ကြသည်။ ဤဂျာနယ်၏မျက်နှာဖုံးတွင် “ယေဟောဝါ၏နိုင်ငံတော်ကိုကြေညာခြင်း” ဟူသောစကားပါရှိသည်မှာ ကြာမြင့်ပေပြီ။ ယနေ့ နိုင်ငံပေါင်း ၂၃၀ ကျော်မှ သက်သေခံခြောက်သန်းခန့်သည် ဘုရားသခင့်နိုင်ငံတော်နှင့်ပတ်သက်၍ တိကျမှန်ကန်သောအသိပညာကိုရရှိစေရန် လူတို့အား ကူညီပေးလျက်ရှိကြသည်။ *
ဘုရားသခင့်နိုင်ငံတော် လက်အောက်ခံများအတွက် ကောင်းချီးများ
ယေရှုသည် ဘုရားသခင်၏နည်းလမ်းတော်အတိုင်း အစဉ်ပြုမူခဲ့၏။ သို့ဖြစ်၍ ကိုယ်တော်သည် ထင်ရာစိုင်းလမ်းစဉ်ကိုရွေးချယ်ပြီး လက်ရှိအစီအစဉ်စနစ်ကို နိုင်ငံရေးအရ ပံ့ပိုးကူညီရန် သို့မဟုတ် တိုးတက်ကောင်းမွန်စေရန် ကြိုးစားမည့်အစား လောက၏ပြဿနာများကို ဖြေရှင်းနိုင်သည့် ဘုရားသခင့်နိုင်ငံတော်၏အကျိုးစီးပွား တိုးတက်လာစေရန် ကြိုးစားလုပ်ဆောင်ခဲ့၏။ ကိုယ်တော်၏တည်ကြည်မှုအတွက် ထိုနိုင်ငံတော်၏ဘုရင်အဖြစ် ကောင်းကင်တွင် ဘုန်းရှိသောပလ္လင်ပေါ်ထိုင်ခွင့်ရခဲ့သည်။ ဘုရားသခင်ကိုလက်အောက်ခံခြင်းအတွက် တကယ်ကောင်းမြတ်သောဆုကျေးဇူးပါတကား!—ဒံယေလ ၇:၁၃၊ ၁၄။
ယနေ့ ယေရှုကိုအတုယူ၍ ဘုရားသခင့်နိုင်ငံတော်ကို ရှေးဦးရှာပြီး ဘုရားသခင့်အလိုတော်ကို လိုက်နာသူ သန်းပေါင်းများစွာတို့သည်လည်း အလွန်ကောင်းသောဆုကျေးဇူးဖြစ်သည့် ဘုရားသခင့်နိုင်ငံတော်လက်အောက်ခံ မြေကြီးသားများဖြစ်ခွင့်ရကြပါလိမ့်မည်။ (မဿဲ ၆:၃၃) ၎င်း၏မေတ္တာပါအုပ်ချုပ်မှုအောက်တွင် သူတို့သည် ထာဝရအသက်ရနိုင်ခွင့်ဖြင့် စုံလင်ခြင်းသို့ မြှင့်တင်ခံရကြလိမ့်မည်။ (ဗျာဒိတ် ၂၁:၃၊ ၄) “လောကနှင့်လော[က]တပ်မက်ခြင်းသည် ရွေ့သွားကွယ်ပျောက်တတ်၏။ ဘုရားသခင်၏အလိုတော်နှင့်အညီ ကျင့်သောသူမူကား၊ . . . ထာဝရတည်၏” ဟူ၍ ၁ ယောဟန် ၂:၁၇ ကဆိုသည်။ စာတန်နှင့် သူ၏နောက်လိုက်များ ဖယ်ရှားခံရပြီဖြစ်ပြီး လူမျိုးရေးကွဲပြားမှု၊ ဖောက်ပြန်ပျက်ပြားသောစီးပွားရေးစနစ်များနှင့် မှားယွင်းသောဘာသာရေးတို့မရှိတော့သည့် ကမ္ဘာမြေပရဒိသုတွင် ထာဝစဉ်နေထိုင်ရခြင်းသည် အမှန်တကယ်ကောင်းမွန်သော အထူးရွှင်လန်းမှုပါတကား!—ဆာလံ ၃၇:၂၉; ၇၂:၁၆။
မှန်ပါသည်၊ ဘုရားသခင့်နိုင်ငံတော်သည် အမှန်တကယ်ပျော်ရွှင်သောလောက၏ စစ်မှန်သောသော့ချက်ဖြစ်ပြီး ယင်းကိုကြေညာသည့်သတင်းကို သတင်းကောင်းဟု ခေါ်ဆိုခြင်းသည် အလွန်လျောက်ပတ်ပေသည်။ အကယ်၍ သင်သည် ဤသတင်းကောင်းကိုလက်မခံရသေးလျှင် သင့်အိမ်သို့ နောက်တစ်ကြိမ် ယေဟောဝါသက်သေတစ်ဦး လည်ပတ်လာသောအခါ ထိုသတင်းကောင်းကို လက်ခံနားထောင်လိုက်ပါလေ။
[အောက်ခြေမှတ်ချက်]
^ အပိုဒ်၊ 16 ဘုရားသခင့်နိုင်ငံတော်ကို ကြေညာရာတွင် ယေဟောဝါသက်သေများကို ပိတ်ပင်ထားကြသည့် သို့မဟုတ် ညှဉ်းပန်းနှိပ်စက်ကြသည့် နိုင်ငံများ၌ပင် သူတို့သည် နိုင်ငံရေးနှင့်ရောထွေးခြင်းမရှိ၊ လောကအစိုးရများကို ဆန့်ကျင်ပုန်ကန်ရန် လှုံ့ဆော်ပေးခြင်းမရှိချေ။ (တိတု ၃:၁) ၎င်းအစား၊ သူတို့သည် ယေရှုနှင့် ကိုယ်တော်၏ပထမရာစုရှိ တပည့်တော်များ ပြုလုပ်ခဲ့ကြသည့်နည်းတူ နိုင်ငံရေးတွင်မပါဝင်ဘဲ ဝိညာဉ်ရေးအရ အပြုသဘောပါပါ ကြိုးစားကူညီပေးကြ၏။ သက်သေခံများသည် မိသားစုမေတ္တာ၊ ရိုးသားဖြောင့်မတ်မှု၊ ကိုယ်ကျင့်တရားစင်ကြယ်မှုနှင့် အလုပ်ကိုကောင်းစွာလုပ်ကိုင်သည့်အကျင့်အစရှိသော အကျိုးပြုသည့် ကျမ်းစာစံနှုန်းများကိုလက်ခံစေရန် ရပ်ကွက်အသီးသီးရှိ ဖြောင့်မတ်စွာကျင့်ကြံသူများကို ကြိုးစားကူညီပေးကြသည်။ အဓိကအားဖြင့် ကျမ်းစာမူများကို လူတို့ မည်သို့လိုက်နာရမည်၊ လူသားအတွက် စစ်မှန်သောမျှော်လင့်ချက်ဖြစ်သည့် ဘုရားသခင့်နိုင်ငံတော်ကို မည်သို့စောင့်မျှော်ရမည်ကို သူတို့ကြိုးစားသွန်သင်ပေးကြ၏။
[စာမျက်နှာ ၅ ပါ ရုပ်ပုံ]
လူသားတို့သည် ဘုရားသခင်မပါဘဲ အောင်မြင်စွာ မအုပ်ချုပ်နိုင်ကြောင်း သမိုင်းကသက်သေထူ
[စာမျက်နှာ ၅ ပါ ရုပ်ပုံ]
စာတန်သည် လက်ရှိ “အစီအစဉ်စနစ်” ကိုအုပ်ချုပ်နေသောကြောင့် ယေရှုအား “ဤလောက၌ရှိသမျှသော တိုင်းနိုင်ငံတို့” ကိုပေးနိုင်
[စာမျက်နှာ ၇ ပါ ရုပ်ပုံ]
ဘုရားသခင့်နိုင်ငံတော်အစီအစဉ်အောက်တွင် ဤလောကသည် ထူးခြားလှသောနေရာဖြစ်လိမ့်မည်ဟု ယေရှုသွန်သင်ပေးခဲ့