ယေဟောဝါ၏နှလုံးတော်နှင့်ညီညွတ်သော နှလုံးကိုရယူလော့
ယေဟောဝါ၏နှလုံးတော်နှင့်ညီညွတ်သော နှလုံးကိုရယူလော့
“အိုဘုရားသခင် အကျွန်ုပ်အထဲ၌ စင်ကြယ်သောနှလုံးကိုဖန်ဆင်းတော်မူပါ။ မြဲမြံတည်ကြည်သောသဘောကို အသစ်ပြုပြင်တော်မူပါ။”—ဆာလံ ၅၁:၁၀။
၁၊ ၂။ ကျွန်ုပ်တို့၏နှလုံးကို အဘယ်ကြောင့်စိတ်ဝင်စားသင့်သနည်း။
သူသည် အရပ်အမောင်းကောင်း၍ ရုပ်ရည်ချောမောသူတစ်ဦးဖြစ်သည်။ သူ့ကိုတွေ့သော် ပရောဖက်ရှမွေလသည် အလွန်စွဲမှတ်သွားပြီး ယေရှဲ၏ဤသားကြီးသည် ရှောလုပြီးလျှင် ဘုရင်ဖြစ်လာဖို့ ဘုရားသခင်ရွေးချယ်ထားသူဖြစ်မည်ဟု ကောက်ချက်ချခဲ့သည်။ သို့သော် ယေဟောဝါကဤသို့ကြေညာခဲ့သည်– “[ထိုသား၏] မျက်နှာ သူ၏အရပ်ကိုမကြည့်မရှုနှင့်။ သူ့ကိုငါပယ်ပြီ။ . . . လူသည် အဆင်းသဏ္ဌာန်ကိုကြည့်ရှုတတ်၏။ ထာဝရဘုရားမူကား နှလုံးကိုကြည့်ရှုတတ်သည်။” ယေဟောဝါရွေးချယ်သူမှာ ယေရှဲ၏သားထွေး၊ ‘ကိုယ်တော့်နှလုံးတော်နှင့်ညီညွတ်သောသူ’ ဒါဝိဒ်ဖြစ်ခဲ့သည်။—၁ ဓမ္မရာဇဝင် ၁၃:၁၄; ၁၆:၇။
၂ ဘုရားသခင်သည် လူ့နှလုံးကို သိမြင်နိုင်ကြောင်း နောက်ပိုင်းတွင် ဤသို့ရှင်းလင်းဖော်ပြခဲ့သည်– “ငါထာဝရဘုရားသည် လူအသီးအသီးတို့အား မိမိတို့အကျင့်အတိုင်း မိမိတို့ခံထိုက်သော အကျိုးအပြစ်ကိုပေးခြင်းငှာ နှလုံးကျောက်ကပ်တို့ကို စေ့စေ့စစ်ကြောတတ်၏။” (ယေရမိ ၁၇:၁၀) မှန်ပါသည်၊ “စိတ်နှလုံးကိုကား ထာဝရဘုရားစစ်တော်မူ၏။” (သု. ၁၇:၃) သို့သော် ယေဟောဝါစစ်ဆေးတော်မူသောနှလုံးကား အဘယ်နည်း။ ထို့အပြင် ကိုယ်တော့်နှလုံးတော်နှင့်ညီညွတ်သော နှလုံးကိုရရှိဖို့ ကျွန်ုပ်တို့အဘယ်အရာပြုလုပ်နိုင်သနည်း။
“စိတ်နှလုံး၏အတွင်းလူ”
၃၊ ၄။ သမ္မာကျမ်းစာတွင် “နှလုံး” ဟူသောစကားလုံးကို အဘယ်သဘောဖြင့် အဓိကအသုံးပြုထားသနည်း။ ဥပမာများပေးပါ။
၃ သမ္မာကျမ်းစာတွင် “နှလုံး” ဟူသောစကားလုံးကို အကြိမ်တစ်ထောင်ခန့်တွေ့ရှိရသည်။ အများအားဖြင့် ပုံဆောင်သဘောဖြင့် အသုံးပြုထားသည်။ ဥပမာ၊ ပရောဖက်မောရှေကို ယေဟောဝါဤသို့မိန့်ဆိုခဲ့သည်– “ငါ့အားလက်ဆောင်ပဏ္ဏာကိုဆောင်ခဲ့ရမည်အကြောင်း ဆင့်ဆိုလော့။ ကြည်ညိုသောစေတနာစိတ် [“နှလုံး၊” ကဘ] နှင့် ငါ့အားလှူသမျှသောသူတို့၌ သင်သည် အလှူကိုခံရမည်။” “မိမိစိတ်နှလုံးနှိုးဆော်သောသူ . . . အပေါင်းတို့သည် . . . လာ” ၍အလှူထည့်ကြ၏။ (ထွက်မြောက်ရာ ၂၅:၂; ၃၅:၂၁) ပုံဆောင်နှလုံး၏သွင်ပြင်တစ်ခုမှာ လှုံ့ဆော်မှု—လုပ်ဆောင်ရန် ကျွန်ုပ်တို့ကိုတိုက်တွန်းပေးသော အတွင်းစွမ်းအား—ဖြစ်သည်မှာရှင်းပါသည်။ ကျွန်ုပ်တို့၏ပုံဆောင်နှလုံးသည် ကျွန်ုပ်တို့၏စိတ်လှုပ်ရှားမှုနှင့် ခံစားချက်များ၊ လိုအင်ဆန္ဒနှင့် ချစ်ခင်တွယ်တာမှုတို့ကိုလည်း ထင်ဟပ်ဖော်ပြသည်။ နှလုံးသည် အမျက်ဒေါသဖြင့်လောင်ကျွမ်းနိုင်၍ ကြောက်ရွံ့မှုဖြင့်ပြည့်နိုင်သည်၊ ဝမ်းနည်းပူဆွေးတတ်၍ ရွှင်လန်းတတ်၏။ (ဆာလံ ၂၇:၃; ၃၉:၃; ယောဟန် ၁၆:၂၂; ရောမ ) ယင်းသည် မာနကြီးတတ်၍ နှိမ့်ချတတ်သည်၊ ချစ်တတ်၍ မုန်းတတ်သည်။— ၉:၂သု. ၁၆:၅; မဿဲ ၁၁:၂၉; ၁ ပေတရု ၁:၂၃။
၄ သို့ဖြစ်၍၊ “နှလုံး” သည် လှုံ့ဆော်မှု၊ စိတ်လှုပ်ရှားမှုတို့နှင့် ဆက်နွှယ်လေ့ရှိပြီး အခြားတစ်ဖက်တွင်မူ “စိတ်” သည် အသိဉာဏ်နှင့် အထူးသက်ဆိုင်သည်။ ဤအသုံးအနှုန်းများကို သမ္မာကျမ်းစာတွင် ကျမ်းပိုဒ်ထက်အောက်တစ်ခုတည်း၌ တွေ့ရသောအခါ ၎င်းတို့ကို ယင်းသို့နားလည်ဖို့ဖြစ်သည်။ (မဿဲ ၂၂:၃၇; ဖိလိပ္ပိ ၄:၇) သို့သော် စိတ်နှင့်နှလုံးတို့သည် အပြန်အလှန်မဆက်စပ်ရာများမဟုတ်ကြပေ။ ဥပမာအားဖြင့် မောရှေက ဣသရေလလူမျိုးကို ဤသို့တိုက်တွန်းခဲ့သည်– ‘ယေဟောဝါသည် မှန်သောဘုရားဖြစ်တော်မူကြောင်းကို သင်၏နှလုံးတွင်ပြန်လည်သတိရ [သို့မဟုတ် “သင့်စိတ်တွင်ပြန်သတိရ” အောက်ခြေမှတ်ချက်] ရမည်။’ (တရားဟောရာ ၄:၃၉၊ ကဘ) မိမိနှင့်ပတ်သက်၍ လျှို့ဝှက်ကြံစည်နေကြသော ကျမ်းတတ်များကို ယေရှုဤသို့မိန့်ဆိုခဲ့သည်– “သင်တို့သည် နှလုံးထဲ၌ ဆိုးညစ်သောအရာများကို အဘယ်ကြောင့်စဉ်းစားနေကြသနည်း။” (မဿဲ ၉:၄၊ ကဘ) ‘သိနားလည်မှု၊’ “အသိပညာ” နှင့် “ကျိုးကြောင်းဆင်ခြင်ခြင်း” တို့ကိုလည်း နှလုံးနှင့်ဆက်စပ်၍ဖော်ပြနိုင်သည်။ (၃ ဓမ္မရာဇဝင် ၃:၁၂; သု. ၁၅:၁၄၊ သမ; မာကု ၂:၇၊ ကဘ) ထို့ကြောင့် ပုံဆောင်နှလုံးတွင် ကျွန်ုပ်တို့၏အသိဉာဏ်—ကျွန်ုပ်တို့၏အတွေးအခေါ် သို့မဟုတ် သိနားလည်မှုတို့လည်း—အကျုံးဝင်နိုင်သည်။
၅။ ပုံဆောင်နှလုံးသည် အဘယ်အရာကိုဆိုလိုသနည်း။
၅ ကိုးကားဖော်ပြချက်တစ်ခုအရ ပုံဆောင်နှလုံးသည် “ယေဘုယျအားဖြင့် အချက်အချာအပိုင်း၊ အတွင်းသဘောကိုတင်စားရာ အတွင်းလူကို လူတစ်ဦးလုပ်ကိုင်လေသမျှတွင်၊ သူ၏ဆန္ဒများ၊ ချစ်ခင်တွယ်တာမှုများ၊ စိတ်လှုပ်ရှားမှုများ၊ မက်မောရာများ၊ ရည်ရွယ်ချက်များ၊ သူ၏အတွေးအခေါ်များ၊ သိမြင်နိုင်စွမ်းများ၊ စိတ်ကူးများ၊ သူ၏ဉာဏ်ပညာ၊ အသိပညာ၊ တတ်စွမ်းမှု၊ သူ၏ယုံကြည်ချက်များနှင့် သူ၏ကျိုးကြောင်းဆင်ခြင်မှုများ၊ သူ၏မှတ်ဉာဏ်နှင့်အသိတရားတို့တွင် သူ့ကိုယ်သူသိသာထင်ရှားစေသူအဖြစ်ဆိုလိုသည်။” ယင်းက ကျွန်ုပ်တို့သည် အမှန်တကယ်တွင် အတွင်းထဲ၌မည်သို့သောသူဖြစ်သည်ဟူသည့် “စိတ်နှလုံး၏အတွင်းလူ” ကို ကိုယ်စားပြုသည်။ (၁ ပေတရု ၃:၄) ယင်းကို ယေဟောဝါတွေ့မြင်၍ စစ်ဆေးတော်မူ၏။ ထို့ကြောင့် ဒါဝိဒ်က “အိုဘုရားသခင် အကျွန်ုပ်အထဲ၌ စင်ကြယ်သောနှလုံးကိုဖန်ဆင်းတော်မူပါ။ မြဲမြံတည်ကြည်သောသ ဘောကို အသစ်ပြုပြင်တော်မူပါ” ဟုဆုတောင်းနိုင်ခဲ့ခြင်းဖြစ်သည်။ (ဆာလံ ၅၁:၁၀) စင်ကြယ်သောနှလုံးကို ကျွန်ုပ်တို့မည်သို့ရယူနိုင်မည်နည်း။
ဘုရားသခင့်စကားတော်ကို “နှလုံးသွင်းကြလော့”
၆။ ဣသရေလလူတို့ မောဘလွင်ပြင်တွင် စခန်းချစဉ် သူတို့ကို မောရှေအဘယ်သို့တိုက်တွန်းခဲ့သနည်း။
၆ ကတိထားရာပြည်သို့မဝင်မီ မောဘလွင်ပြင်၌ ဣသရေလအမျိုးသားတို့စုဝေးနေစဉ် သူတို့ကို မောရှေဤသို့တိုက်တွန်းခဲ့သည်– “သင်တို့အား ယနေ့ငါသက်သေခံသမျှသောစကားတို့ကို နှလုံးသွင်းကြလော့။ သင်တို့သားသမီးတို့သည် ဤပညတ်တရားစကားတော်အလုံးစုံတို့ကို စောင့်ရှောက်စေခြင်းငှာ သူတို့အားထပ်ဆင့်၍ မှာထားရကြမည်။” (တရားဟောရာ ၃၂:၄၆) ဣသရေလလူတို့က “ဂရုစိုက်လိုက်နာ” ကြရမည်ဖြစ်သည်။ (နော့ခ်စ်) ဘုရားသခင့်ပညတ်တော်များကို သူတို့စေ့စေ့စပ်စပ်သိနားလည်ထားမှသာ သူတို့သားသမီးများ၏စိတ်ထဲ စွဲမှတ်စေနိုင်မည်ဖြစ်သည်။—တရားဟောရာ ၆:၆-၈။
၇။ ဘုရားသခင့်စကားတော်ကို ‘နှလုံးသွင်းခြင်း’ ၌အဘယ်အရာအကျုံးဝင်သနည်း။
၇ စင်ကြယ်သောနှလုံးရဖို့ အဓိကလိုအပ်ချက်တစ်ခုမှာ ဘုရားသခင့်အလိုတော်နှင့် ရည်ရွယ်တော်မူချက်များဆိုင်ရာ တိကျမှန်ကန်သောအသိပညာကို ရယူခြင်းဖြစ်သည်။ ထိုအသိပညာ၏ရင်းမြစ်တစ်ခုတည်းမှာ ဘုရားသခင့်မှုတ်သွင်းခံစကားတော်ဖြစ်သည်။ (၂ တိမောသေ ၃:၁၆၊ ၁၇) သို့သော် အသိပညာတစ်ခုတည်းက ဘုရားသခင့်စိတ်တော်နှင့်တွေ့သောနှလုံးရဖို့ ကျွန်ုပ်တို့ကိုကူညီပေးမည်မဟုတ်ပါ။ အသိပညာသည် ကျွန်ုပ်တို့၏အတွင်းလူကို အကျိုးသက်ရောက်စေဖို့ ကျွန်ုပ်တို့သင်ယူနေရာကို “နှလုံးသွင်း” ဖို့ သို့မဟုတ် “နှလုံးမှတ်ကျုံး” ဖို့လိုသည်။ (တရားဟောရာ ၃၂:၄၆၊ အမေရိကန်ဘာသာပြန်ကျမ်း) ယင်းကို မည်သို့ပြုလုပ်နိုင်သနည်း။ ဆာလံဆရာဒါဝိဒ်က ဤသို့ရှင်းပြသည်– “ရှေးလွန်လေပြီးသောကာလကိုအောက်မေ့၍ အလုံးစုံသောအမှုတော်တို့ကိုလည်းကောင်း၊ လက်တော်နှင့်ပြုပြင်သောအရာများကိုလည်းကောင်း ဆင်ခြင်ပါ၏။”—ဆာလံ ၁၄၃:၅။
၈။ ကျွန်ုပ်တို့လေ့လာနေစဉ် အဘယ်မေးခွန်းများကို ဆင်ခြင်သုံးသပ်နိုင်သနည်း။
၈ ကျွန်ုပ်တို့လည်း ယေဟောဝါ၏လုပ်ဆောင်မှုကို ကျေးဇူးတင်စွာ တွေးတောဆင်ခြင်သင့်သည်။ သမ္မာကျမ်းစာ သို့မဟုတ် ကျမ်းစာအခြေပြုစာပေများကို ကျွန်ုပ်တို့ဖတ်ရှုသောအခါ ဤမေးခွန်းများကို ဆင်ခြင်သုံးသပ်ဖို့လိုသည်– ‘ဒါက ယေဟောဝါနဲ့ပတ်သက်လို့ ငါ့ကိုဘာသင်ပေးသလဲ။ ဒီမှာ ယေဟောဝါရဲ့ဘယ်ဂုဏ်ရည်တော်တွေကို တွေ့ရသလဲ။ ဒီမှတ်တမ်းက ယေဟောဝါနှစ်သက်ရာ၊ မနှစ်သက်ရာနဲ့ပတ်သက်လို့ ငါ့ကိုဘာသင်ပေးသလဲ။ ယေဟောဝါကြိုက်တဲ့ လမ်းစဉ်လိုက်တာကို ကိုယ်တော်မုန်းတဲ့လမ်းစဉ်လိုက်တာနဲ့ နှိုင်းယှဉ်ကြည့်ရင် အကျိုးဆက်တွေက ဘာတွေလဲ။ ဒီအချက်က ငါသိထားနှင့်ပြီးသားနဲ့ ဘယ်လိုဆက်စပ်သလဲ။’
၉။ ကိုယ်ပိုင်လေ့လာမှုနှင့် တွေးတောဆင်ခြင်မှုသည် မည်မျှအရေးပါသနည်း။
၉ သုံးဆယ့်နှစ်နှစ်အရွယ် လီဆာ *ဆိုသူက ရည်ရွယ်ချက်ရှိရှိလေ့လာ၍ တွေးတောဆင်ခြင်ခြင်း၏တန်ဖိုးကို သူတန်ဖိုးထားတတ်လာပုံကို ဤသို့ရှင်းပြသည်– “၁၉၉၄ ခုနှစ်မှာ ကျွန်မနှစ်ခြင်းခံပြီးတဲ့နောက် အမှန်တရားမှာ နှစ်နှစ်လောက် တက်ကြွလှုပ်ရှားခဲ့တယ်။ ခရစ်ယာန်အစည်းအဝေးအားလုံးကို ကျွန်မတက်ရောက်ခဲ့တယ်၊ လယ်ကွင်းအမှုဆောင်ခြင်းမှာ တစ်လကိုနာရီ ၃၀ ကနေ ၄၀ အထိပါဝင်ခဲ့ပြီး ခရစ်ယာန်ချင်းတွေနဲ့ပေါင်းသင်းခဲ့တယ်။ နောက်တော့ ကျွန်မလမ်းလွဲစပြုလာတယ်။ ဘုရားသခင့်ပညတ်တော်တွေကို ကျူးလွန်တဲ့အထိ ကျွန်မဆုတ်ယုတ်ခဲ့တယ်။ ဒါပေမဲ့ ကျွန်မပြန်သတိလည်လာပြီး ကျွန်မရဲ့ဘဝကိုစင်ကြယ်စေဖို့ ဆုံးဖြတ်ခဲ့တယ်။ ကျွန်မရဲ့နောင်တကို ယေဟောဝါအသိအမှတ်ပြုပြီး ပြန်လက်ခံခဲ့တဲ့အတွက် ဝမ်းသာလိုက်တာ! ‘ငါဘာလို့ရွေ့လျော့သွားခဲ့တာလဲ’ ဆိုပြီး ကျွန်မအခါခါစဉ်းစားခဲ့တယ်။ ရည်ရွယ်ချက်ရှိရှိလေ့လာခြင်းနဲ့ တွေးတောဆင်ခြင်မှုမရှိခဲ့လို့ဆိုတဲ့အဖြေကို ကျွန်မရတယ်။ ကျွန်မရဲ့နှလုံးထဲကို ကျမ်းစာအမှန်တရား တကယ်မရောက်ခဲ့ဘူး။ ခုချိန်ကစပြီး ကိုယ်ပိုင်လေ့လာမှုနဲ့ တွေးတောဆင်ခြင်မှုဟာ ကျွန်မဘဝရဲ့ အရေးကြီးကဏ္ဍတစ်ခု အမြဲဖြစ်နေမှာပါ။” ယေဟောဝါ၊ ကိုယ်တော့်သားတော်နှင့် ကိုယ်တော့်စကားတော်ဆိုင်ရာအသိပညာ တိုးသိလာသည်နှင့်အမျှ အချိန်ယူပြီး အဓိပ္ပာယ်ရှိရှိပြန်လည်ဆင်ခြင်သုံးသပ်ဖို့ မည်မျှအရေးကြီးလှပါသည်တကား!
၁၀။ ကိုယ်ပိုင်လေ့လာမှုနှင့် တွေးတောဆင်ခြင်မှုပြုဖို့အချိန်ယူရန် အဘယ်ကြောင့်အရေးကြီးသနည်း။
၁၀ အလုပ်ရှုပ်နေသည့် ဤကမ္ဘာကြီးတွင် လေ့လာမှုနှင့် တွေးတောဆင်ခြင်မှုအတွက် အချိန်ရှာယူခြင်းသည် စိန်ခေါ်ချက်တစ်ရပ် အမှန်ပင်ဖြစ်သည်။ သို့သော် မျက်မှောက်ခေတ်ခရစ်ယာန်များသည် အထူးကောင်းမွန်သောကတိထားရာပြည်—ဘုရားသခင့်ဖြောင့်မတ်သောကမ္ဘာသစ်—၏တံခါးဝ၌ ရောက်ရှိနေကြသည်။ (၂ ပေတရု ၃:၁၃) ‘မဟာဗာဗုလုန်’ ဖျက်ဆီးခံရခြင်းနှင့် ယေဟောဝါ၏လူမျိုးတော်ကို “မာဂေါဂပြည်သား ဂေါဂမင်း” တိုက်ခိုက်ခြင်းစသည့် ထိတ်လန့်စရာကောင်းသောဖြစ်ရပ်များ နီးကပ်လာနေပြီ။ (ဗျာဒိတ် ၁၇:၁၊ ၂၊ ၅၊ ၁၅-၁၇; ယေဇကျေလ ၃၈:၁-၄၊ ၁၄-၁၆; ၃၉:၂) ရှေ့တွင်ကြုံတွေ့ရမည့်အရာက ယေဟောဝါအပေါ်ထားသော ကျွန်ုပ်တို့၏မေတ္တာကို စမ်းသပ်မှုဖြစ်စေနိုင်သည်။ ယခု ဘုရားသခင့်စကားတော်ကို နှလုံးသွင်းဖို့ ကာလအချိန်ကိုဝယ်ယူရန် အရေးကြီးသည်။—ဧဖက် ၅:၁၅၊ ၁၆။
‘ဘုရားသခင့်စကားတော်ကို ဆင်ခြင်သုံးသပ်ဖို့ သင့်နှလုံးကိုအသင့်ပြင်ဆင်’
၁၁။ ကျွန်ုပ်တို့၏နှလုံးကို မြေကြီးနှင့် မည်သို့ပုံခိုင်းနိုင်သနည်း။
၁၁ ပုံဆောင်နှလုံးကို အမှန်တရားမျိုးစေ့ စိုက်ပျိုးနိုင်သည့်မြေနှင့် ပုံခိုင်းနိုင်သည်။ (မဿဲ ၁၃:၁၈-၂၃) အပင်ကြီးထွားသန်မာစေဖို့ ပကတိမြေကြီးကို ထွန်ယက်ပြီးမှစိုက်ပျိုးလေ့ရှိသည်။ အလားတူ ဘုရားသခင့်စကားတော်ကို ပိုမိုလက်ခံလွယ်စေဖို့ နှလုံးကို အသင့်ပြင်ဆင်သင့်သည်။ ယဇ်ပုရောဟိတ်ဧဇရသည် ‘ယေဟောဝါ၏တရားတော်ကို ဆင်ခြင်သုံးသပ်ခြင်းငှာ နှလုံးကိုအသင့်ပြင်ဆင်ခဲ့၏။’ (ဧဇရ ၇:၁၀၊ ကဘ) ကျွန်ုပ်တို့၏နှလုံးကို မည်သို့အသင့်ပြင်ဆင်နိုင်သနည်း။
၁၂။ လေ့လာမှုပြုရန် နှလုံးကိုအသင့်ပြင်ဆင်ဖို့အတွက် အဘယ်အရာကအကူအညီဖြစ်မည်နည်း။
၁၂ ဘုရားသခင့်စကားတော်ကို ကျွန်ုပ်တို့ဆင်ခြင်သုံးသပ်သောအခါ နှလုံးကိုအကောင်းဆုံးပြင်ဆင်နည်းတစ်နည်းကား နှလုံးပါပါဆုတောင်းခြင်းဖြစ်သည်။ စစ်မှန်သောဝတ်ပြုသူများ၏ ခရစ်ယာန်အစည်းအဝေးများကို ဆုတောင်းခြင်းနှင့် ဖွင့်၍ပိတ်သည်။ ကိုယ်ပိုင်ကျမ်းစာလေ့လာမှုပြုတိုင်း စိတ်ရင်းမှန်စွာဆုတောင်းခြင်းနှင့်စတင်ပြီးနောက် လေ့လာနေစဉ်လည်း ထက်သန်သည့်သဘောထား ဆက်ရှိခြင်းသည် သင့်လျော်လှသည်တကား!
၁၃။ ဘုရားသခင်၏နှလုံးတော်နှင့် ညီညွတ်သောနှလုံးကိုရယူဖို့ ကျွန်ုပ်တို့အဘယ်အရာပြုရမည်နည်း။
၁၃ ပုံဆောင်နှလုံးသည် ရှိနှင့်ပြီးသော ထင်မြင်ချက်များကို ဖယ်ပစ်ရန် ပြင်ဆင်ထားရမည်။ ယေရှုခေတ်မှ ဘာသာရေးခေါင်းဆောင်များသည် ယင်းသို့ပြုလိုစိတ်မရှိကြချေ။ (မဿဲ ၁၃:၁၅) တစ်ဖက်တွင်မူ ယေရှု၏မိခင်မာရိသည် သူကြားခဲ့သော အမှန်တရားကိုအခြေပြု၍ “နှလုံးထဲ၌” စဉ်းစားဆင်ခြင်ခဲ့သည်။ (လုကာ ၂:၁၉၊ ၅၁) ထို့ကြောင့် သူသည် ယေရှု၏တည်ကြည်သောတပည့်တစ်ဦးဖြစ်လာခဲ့သည်။ သွာတိရဲမြို့သူလုဒိသည် ပေါလုဟောပြောသောစကားကိုနားထောင်ခဲ့ပြီး “မှီဝဲဆည်းကပ်စေခြင်းငှာ သူ၏စိတ်နှလုံးကို [ယေဟောဝါ] ဖွင့်တော်မူ၏။” သူလည်း ယုံကြည်သူတစ်ဦးဖြစ်လာခဲ့သည်။ (တမန်တော် ၁၆:၁၄၊ ၁၅) ကျွန်ုပ်တို့သည် ဘယ်သောအခါမျှ ကိုယ်ပိုင်အယူအဆများကို အသေစွဲကိုင်ထားခြင်း သို့မဟုတ် အယူဝါဒဆိုင်ရာအမြင်များကို အမြတ်တနိုးထားခြင်း မပြုကြစို့နှင့်။ ယင်းအစား “လူခပ်သိမ်းတို့သည် သစ္စာပျက်သော်လည်း၊ ဘုရားသခင်၏သစ္စာတော်သည် တည်စေ” ရန်အသင့်ရှိကြပါစို့။—ရောမ ၃:၄။
၁၄။ ခရစ်ယာန်အစည်းအဝေးများ၌နားထောင်ရန် ကျွန်ုပ်တို့၏နှလုံးကို မည်သို့အသင့်ပြင်ထားနိုင်သနည်း။
၁၄ ခရစ်ယာန်အစည်းအဝေးများ၌နားထောင်ရန် နှလုံးကိုအသင့်ပြင်ဆင်ခြင်းသည် အထူးအရေးကြီး၏။ စိတ်ပျံ့လွင့်ခြင်းက ပြောဆိုနေသောအကြောင်းအရာမှ ကျွန်ုပ်တို့အာရုံကိုလွဲသွားစေနိုင်သည်။ ကျွန်ုပ်တို့သည် တစ်နေ့တာဖြစ်ပျက်ခဲ့ရာများကို အာရုံရောက်နေမည်၊ သို့မဟုတ် မနက်ဖြန်စောင့်ကြိုနေရာများကို စိုးရိမ်ပူပန်နေမည်ဆိုလျှင် ပြောဆိုနေသောစကားများသည် ကျွန်ုပ်တို့အပေါ် ဩဇာသက်ရောက်လိမ့်မည်မဟုတ်ချေ။ ပြောဆိုနေသောအကြောင်းအရာမှ ကျွန်ုပ်တို့အကျိုးခံစားရဖို့ဆိုလျှင် နားထောင်၍သင်ယူရန် အခိုင်အမာသန္နိဋ္ဌာန်ချဖို့လိုသည်။ ရှင်းလင်းဖော်ပြသည့်ကျမ်းချက်များနှင့် ယင်း၏အနက်အဓိပ္ပာယ်ကို နားလည်ရန် စိတ်ပိုင်းဖြတ်ထားလျှင် အကျိုးကျေးဇူးများ တကယ်ရရှိနိုင်မည်တကား!—နေဟမိ ၈:၅-၈၊ ၁၂။
၁၅။ သွန်သင်မှုကိုပို၍ခံယူလွယ်သူများဖြစ်လာစေရန် နှိမ့်ချခြင်းက ကျွန်ုပ်တို့ကိုမည်သို့ထောက်ကူသနည်း။
၁၅ လျောက်ပတ်သောဖြည့်စွက်ပေးမှုများထပ်ထည့်ပေးခြင်းက မြေကြီးကို တိုးတက်ကောင်းမွန်စေသကဲ့သို့ နှိမ့်ချခြင်း၊ ဝိညာဉ်ရေးရာကိုဆာမွတ်ခြင်း၊ ယုံကြည်ကိုးစားခြင်း၊ ဘုရားသခင်ကိုကြောက်ရွံ့ခြင်းနှင့် ဘုရားသခင်ကိုချစ်ခြင်းတို့ကို ပြုစုပျိုးထောင်လျှင် ကျွန်ုပ်တို့၏ပုံဆောင်နှလုံးကို ဖွံ့ဖြိုးစေနိုင်သည်။ နှိမ့်ချခြင်းသည် နှလုံးကိုပျော့ပျောင်းစေပြီး သွန်သင်မှုခံယူလွယ်သူများဖြစ်လာစေသည်။ ယုဒရှင်ဘုရင်ယောရှိကို ယေဟောဝါဤသို့မိန့်ဆိုခဲ့သည်– ‘. . . ငါ့စကားကို သင်သည်ကြားသောအခါ နူးညံ့သောစိတ် [နှလုံး] ရှိ၍ ထာဝရဘုရားရှေ့တော်၌ ကိုယ်ကိုနှိမ့်ချခြင်း၊ . . . ငါ့ရှေ့မှာငိုကြွေးခြင်းကိုပြုသောကြောင့် သင့်စကားကိုငါနားထောင်၏။’ (၄ ဓမ္မရာဇဝင် ၂၂:၁၉) ယောရှိ၏နှလုံးသည် နှိမ့်ချ၍ ခံယူလွယ်ခဲ့သည်။ နှိမ့်ချခြင်းက ယေရှု၏ “လူတတ်မဟုတ်၊ လူသာမညသာဖြစ်” ကြသော တပည့်တော်များအား ‘ပညာရှိတို့နှင့်ဉာဏ်ကောင်းသူတို့’ သတိမပြုမိသော ဝိညာဉ်ရေးရာအမှန်တရားကို သဘောပေါက်စေ၍ လိုက်လျှောက်ကျင့်သုံးစေခဲ့သည်။ (တမန်တော် ၄:၁၃; လုကာ ၁၀:၂၁) ယေဟောဝါ၏နှလုံးတော်နှင့် ညီညွတ်သောနှလုံးကိုရယူရန် ကျွန်ုပ်တို့ကြိုးစားနေကြစဉ် “ဘုရားသခင့် . . . ရှေ့တော်၌ ကိုယ်ကိုနှိမ့်ချ” ကြပါစို့။—ဧဇရ ၈:၂၁၊ သမ္မာ။
၁၆။ ဝိညာဉ်အစာဆာလောင်စိတ်ကို ပြုစုပျိုးထောင်ရန် အဘယ်ကြောင့်ကြိုးစားအားထုတ်ဖို့လိုသနည်း။
၁၆ ယေရှုက “ဝိညာဉ်ရေးတွင် မိမိတို့လိုလျက်နေကြောင်း သတိပြုသူများသည် ဝမ်းမြောက်စရာရှိကြ၏” ဟုဆိုခဲ့သည်။ (မဿဲ ၅:၃၊ ကဘ) ကျွန်ုပ်တို့သည် ဝိညာဉ်ရေးရာကိုခံယူရန်စွမ်းရည် ပေးအပ်ခံရကြသော်လည်း ဆိုးသွမ်းသောဤလောကမှဖိနှိပ်မှုများ သို့မဟုတ် ပျင်းရိခြင်းကဲ့သို့သောစရိုက်များက ကျွန်ုပ်တို့လိုအပ်နေကြောင်းသိရှိစိတ်ကို ထုံထိုင်းစေနိုင်သည်။ (မဿဲ ၄:၄) ကျွန်ုပ်တို့သည် ဝိညာဉ်အစာအတွက် ခံတွင်းကောင်းကို မွေးမြူရမည်။ အစပိုင်းတွင် သမ္မာကျမ်းစာဖတ်ရှုခြင်းနှင့် ကိုယ်ပိုင်လေ့လာမှုပြုခြင်းမှ ကျွန်ုပ်တို့ပျော်ရွှင်မှုမရသည့်တိုင် မဆုတ်မနစ်ဇွဲဖြင့် ဆက်ပြုလုပ်ကြလျှင် အသိပညာကို ‘ကျွန်ုပ်တို့၏စိုးလ်ကနှစ်သက်လာ’ ကာ လေ့လာချိန်များကို စိတ်အားထက်သန်စွာ စောင့်မျှော်တတ်လာလိမ့်မည်။—သု. ၂:၁၀၊ ၁၁။
၁၇။ (က) ယေဟောဝါသည် ကျွန်ုပ်တို့၏အကြွင်းမဲ့ယုံကြည်ကိုးစားမှုကို အဘယ်ကြောင့်ရထိုက်သနည်း။ (ခ) ဘုရားသခင်၌ယုံကြည်ကိုးစားမှုကို ကျွန်ုပ်တို့မည်သို့ပြုစုပျိုးထောင်နိုင်သနည်း။
၁၇ ရှောလမုန်ဘုရင်က “ထာဝရဘုရားကို စိတ်နှလုံးအကြွင်းမဲ့ကိုးစားလော့။ ကိုယ်ဉာဏ်ကိုအမှီမပြုနှင့်” ဟူ၍သတိပေးခဲ့သည်။ (သု. ၃:၅) ယေဟောဝါကိုယုံကြည်ကိုးစားသောနှလုံးသည် ကျမ်းစာမှတစ်ဆင့် ကိုယ်တော်တောင်းဆို၍ ညွှန်ကြားသမျှသည် အစဉ်မှန်ကန်ကြောင်း သိထားသည်။ (ဟေရှာယ ၄၈:၁၇) ယေဟောဝါသည် ကျွန်ုပ်တို့၏အကြွင်းမဲ့ယုံကြည်ကိုးစားမှုကို အမှန်ပင်ရထိုက်တော်မူ၏။ ကိုယ်တော်သည် မိမိရည်ရွယ်တော်မူသမျှအားလုံးကို ဖြစ်မြောက်စေနိုင်သည်။ (ဟေရှာယ ၄၀:၂၆၊ ၂၉) ကိုယ်တော့်နာမတော်ကိုယ်၌က “ကိုယ်တော်ဖြစ်လာစေသည်” ဟုအဓိပ္ပာယ်ရှိပြီး ယင်းက ကတိထားတော်မူသမျှကိုပြည့်စုံစေရန် ကိုယ်တော့်စွမ်းရည်၌ ကျွန်ုပ်တို့အားယုံကြည်စိတ်ချစေသည်တကား! ကိုယ်တော်၏ “လမ်းခရီးတော်ရှိသမျှတို့သည် ဖြောင့်မတ်၍ ခပ်သိမ်းသောအမှုတော်တို့သည် သန့်ရှင်းကြပါ၏။” (ဆာလံ ၁၄၅:၁၇) မှန်ပါသည်၊ ကိုယ်တော်အားယုံကြည်ကိုးစားခြင်းကို ပြုစုပျိုးထောင်ရန် ကျွန်ုပ်တို့၏ဘဝအသက်တာတွင် သမ္မာကျမ်းစာမှသိရှိလာသမျှကို လက်တွေ့ကျင့်သုံးကာ ဖြစ်ပေါ်လာသောအကျိုးကျေးဇူးများကို ဆင်ခြင်သုံးသပ်ခြင်းဖြင့် ‘ယေဟောဝါသည် ကောင်းမြတ်တော်မူကြောင်းကို မြည်းစမ်း၍သိမှတ်’ ဖို့လိုသည်။—ဆာလံ ၃၄:၈။
၁၈။ ဘုရားသခင့်လမ်းညွှန်မှုကို လက်ခံယူတတ်ဖို့ ဘုရားသခင်ရေးရာကြောက်ရွံ့ခြင်းက ကျွန်ုပ်တို့ကိုမည်သို့ထောက်ကူပေးသနည်း။
၁၈ မြင့်မြတ်သောလမ်းညွှန်မှုကို လက်ခံယူနိုင်သောနှလုံးရှိစေသည့် အခြားအရည်အသွေးတစ်ခုကို ညွှန်ပြရာ၌ ရှောလမုန်ကဤသို့ဆိုသည်– “ထာဝရဘုရားကိုကြောက်ရွံ့၍ [မကောင်းမှု] ကိုရှောင်လော့။” (သု. ၃:၇) ရှေးခေတ်ဣသရေလလူမျိုးနှင့်စပ်လျဉ်း၍ ယေဟောဝါဤသို့မိန့်ဆိုခဲ့၏– “သူတို့သားမြေးအစဉ်အဆက်တို့သည် ချမ်းသာရမည်အကြောင်း ငါ့ကိုကြောက်ရွံ့၍ ငါပညတ်သမျှတို့ကို အစဉ်စောင့်ရှောက်ချင်သောစိတ်နှင့် ပြည့်စုံကြပါစေသော။” (တရားဟောရာ ၅:၂၉) မှန်ပါ၏၊ ဘုရားသခင်ကိုကြောက်ရွံ့သူတို့သည် ကိုယ်တော်အားနာခံကြသည်။ ယေဟောဝါသည် “အထံတော်၌စုံလင်သောစိတ်နှလုံးရှိသူတို့ဘက်တွင် တန်ခိုးတော်ပြတော်မူ” ၍မိမိအားမနာခံသူတို့ကို ဒဏ်စီရင်ခြင်းငှာ အစွမ်းရှိတော်မူ၏။ (၂ ရာဇဝင်ချုပ် ၁၆:၉) ကိုယ်တော့်စိတ်တော်နှင့်မတွေ့မည်ကို ရိုသေခန့်ညားသောသဘောဖြင့် ကြောက်ရွံ့ခြင်းက ကျွန်ုပ်တို့၏လုပ်ရပ်များ၊ အတွေးအခေါ်များနှင့် စိတ်လှုပ်ရှားမှုများအားလုံးကို ထိန်းချုပ်ပါလေစေ။
‘ယေဟောဝါကို သင့်နှလုံးအကြွင်းမဲ့ဖြင့်ချစ်လော့’
၁၉။ ယေဟောဝါ၏ညွှန်ကြားမှုကို တုံ့ပြန်ရန် အသင့်ရှိစေသောနှလုံးဖြစ်စေဖို့ မေတ္တာသည် အဘယ်အခန်းကဏ္ဍမှပါဝင်သနည်း။
၁၉ အခြားအရည်အသွေးအားလုံးတို့ထက် ချစ်ခြင်းမေတ္တာသည် ကျွန်ုပ်တို့၏နှလုံးကို ယေဟောဝါ၏ညွှန်ကြားမှုလက်ခံရန် အမှန်ပင်တုံ့ပြန်စေသည်။ ဘုရားသခင်ကို ချစ်သည့်မေတ္တာနှင့်ပြည့်နေသောနှလုံးသည် ကိုယ်တော်နှစ်သက်ရာနှင့် မနှစ်သက်ရာတို့ကို စိတ်ထက်သန်စွာသင်ယူစေသည်။ (၁ ယောဟန် ၅:၃) ယေရှုက “သင်၏ဘုရားသခင် [ယေဟောဝါ] ဘုရားကို စိတ်နှလုံးအကြွင်းမဲ့ ဉာဏ်ရှိသမျှနှင့်ချစ်လော့” ဟုဆို၏။ (မဿဲ ၂၂:၃၇) ဘုရားသခင်၏ကောင်းမြတ်ခြင်းကို ဆင်ခြင်သုံးသပ်ရန်အကျင့်ပြုလုပ်ခြင်း၊ ရင်းနှီးသောမိတ်ဆွေတစ်ဦးကဲ့သို့ ကိုယ်တော်အားစကားပြောဆိုခြင်းနှင့် သူတစ်ပါးကို ကိုယ်တော့်အကြောင်း စိတ်ထက်သန်စွာပြောပြခြင်းအားဖြင့် ဘုရားသခင်ကိုပိုမိုချစ်ကြစို့လေ။
၂၀။ ယေဟောဝါ၏နှလုံးတော်နှင့် ညီညွတ်သောနှလုံးကို ကျွန်ုပ်တို့မည်သို့ရနိုင်သနည်း။
၂၀ ပြန်လည်သုံးသပ်သည့်အနေဖြင့်– ယေဟောဝါ၏နှလုံးတော်နှင့် ညီညွတ်သောနှလုံးကို ရယူခြင်းတွင် ဘုရားသခင့်စကားတော်ကို စိတ်နှလုံး၏အတွင်းလူဖြစ်သော ကျွန်ုပ်တို့၏အတွင်းလူကို လွှမ်းမိုးစေခြင်းပါဝင်သည်။ သမ္မာကျမ်းစာကို အဓိပ္ပာယ်ရှိရှိကိုယ်ပိုင်လေ့လာခြင်းနှင့် ကျေးဇူးတင်စွာ တွေးတောဆင်ခြင်ခြင်းတို့သည် မရှိမဖြစ်ချေ။ ယင်းကိုပြုရာတွင် အကောင်းဆုံးနည်းမှာ အသင့်ပြင်ဆင်ထားသောနှလုံး၊ ကြိုတင်ခံယူထားသည့် အယူအဆများကင်းရှင်းကာ ကျွန်ုပ်တို့အားသင်ပေးရလွယ်စေသည့် အရည်အသွေးများနှင့်ပြည့်နေသောနှလုံးပင်! မှန်ပါသည်၊ ယေဟောဝါ၏အကူအညီဖြင့် ကောင်းသောနှလုံးကိုရယူနိုင်ပါသည်။ သို့သော် ကျွန်ုပ်တို့၏နှလုံးကိုစောင့်ရှောက်ဖို့ အဘယ်အရေးယူဆောင်ရွက်မှုများပြုနိုင်သနည်း။
[အောက်ခြေမှတ်ချက်]
^ အပိုဒ်၊ 9 အမည်ပြောင်းထားသည်။
သင်မည်သို့တုံ့ပြန်မည်နည်း
• ယေဟောဝါစစ်ဆေးတော်မူသော ပုံဆောင်နှလုံးကား အဘယ်နည်း။
• ဘုရားသခင့်စကားတော်ကို ကျွန်ုပ်တို့မည်သို့ “နှလုံးသွင်း” နိုင်သနည်း။
• ဘုရားသခင့်စကားတော်ကို ဆင်ခြင်သုံးသပ်ရန် ကျွန်ုပ်တို့၏နှလုံးကို မည်သို့အသင့်ပြင်ဆင်သင့်သနည်း။
• ဤအကြောင်းအရာကိုသုံးသပ်ပြီးနောက် အဘယ်အရာကိုပြုလုပ်ရန် သင်လှုံ့ဆော်ခံရသနည်း။
[လေ့လာရန်မေးခွန်းများ]
[စာမျက်နှာ ၁၇ ပါ ရုပ်ပုံ]
ဒါဝိဒ်သည် ဝိညာဉ်ရေးရာများကို ကျေးဇူးတင်စွာတွေးတောဆင်ခြင်ခဲ့သည်၊ အသင်ကော
[စာမျက်နှာ ၁၈ ပါ ရုပ်ပုံ]
ဘုရားသခင့်စကားတော်ကို မလေ့လာမီ သင့်နှလုံးကို အသင့်ပြင်ဆင်ပါ