သင်၏နှလုံးကို စောင့်ရှောက်လော့
သင်၏နှလုံးကို စောင့်ရှောက်လော့
“နှလုံးသည် အသက်၏အခြေအမြစ်ဖြစ်သောကြောင့် သင်၏နှလုံးကို အထူးသဖြင့်စောင့်ရှောက်လော့။”—သု. ၄:၂၃။
၁၊ ၂။ ကျွန်ုပ်တို့၏နှလုံးကို အဘယ်ကြောင့်စောင့်ရှောက်ဖို့လိုသနည်း။
ကရစ်ဘီယံကျွန်းတစ်ကျွန်းပေါ်ရှိ အဖိုးအိုတစ်ဦးသည် ဟာရီကိန်းမုန်တိုင်းတိုက်ခတ်ပြီးနောက် သူခိုအောင်းနေသောနေရာမှထွက်လာခဲ့သည်။ သူ့ပတ်လည်ရှိအပျက်အစီးများကိုကြည့်လိုက်ရာ ခြံအဝင်ဝအနီးရှိ ဆယ်စုနှစ်ချီရှိခဲ့သော သစ်ပင်ကြီးလဲနေသည်ကိုတွေ့လိုက်ရ၏။ ‘ဘယ်လိုဖြစ်တာလဲ၊ အဲဒီအနီးတစ်ဝိုက်ကသစ်ပင်ငယ်တွေကျတော့ မလဲပါလား’ ဟုသူတွေးမိသည်။ လဲကျနေသောသစ်ပင်၏ သစ်ငုတ်တိုကိုကြည့်လိုက်ရာ အဖြေထွက်လာသည်။ မယိုင်လဲနိုင်ပုံပေါ်သည့်သစ်ပင်၏အတွင်းသားမှာ ဆွေးမြည့်နေ၏၊ မမြင်နိုင်သည့်ထိုပျက်စီးယိုယွင်းမှုကို လေမုန်တိုင်းက ဖော်ထုတ်လိုက်ရုံသာဖြစ်သည်။
၂ ခရစ်ယာန်ဘဝလမ်းစဉ်၌ ခိုင်မြဲနေပုံပေါက်သည့် စစ်မှန်သောဝတ်ပြုသူတစ်ဦးသည် ယုံကြည်ခြင်းစမ်းသပ်မှုကို အရှုံးပေးလိုက်သောအခါ ဝမ်းနည်းစရာပင်။ သမ္မာကျမ်းစာက “လူတို့သည် ငယ်သောအရွယ်မှစ၍ စိတ်နှလုံးအကြံအစည်ဆိုးကြ၏” ဟုမှန်ကန်စွာဆို၏။ (ကမ္ဘာဦး ၈:၂၁) ဆိုလိုသည်မှာ အမြဲသတိမရှိပါက အကောင်းဆုံးနှလုံးများပင်လျှင် မကောင်းမှုပြုရန် သွေးဆောင်ခံရနိုင်သည်။ မယိုယွင်းနိုင်သော မစုံလင်သည့်လူ့နှလုံးမရှိရာ “နှလုံးသည် အသက်၏အခြေအမြစ်ဖြစ်သောကြောင့် သင်၏နှလုံးကို အထူးသဖြင့်စောင့်ရှောက်လော့” ဟူသောအကြံပေးချက်ကို ကျွန်ုပ်တို့အလေးအနက်ထားဖို့လိုသည်။ (သု. ၄:၂၃) သို့ဖြစ်၍ ကျွန်ုပ်တို့၏ပုံဆောင်နှလုံးကို မည်သို့စောင့်ရှောက်နိုင်သနည်း။
မှန်မှန်စစ်ဆေးခြင်း—မရှိမဖြစ်
၃၊ ၄။ (က) ပကတိနှလုံးနှင့်စပ်လျဉ်း၍ အဘယ်မေးခွန်းများမေးနိုင်သနည်း။ (ခ) ကျွန်ုပ်တို့၏ပုံဆောင်နှလုံးကိုစစ်ဆေးရန် အဘယ်အရာကထောက်ကူပေးမည်နည်း။
၃ ကျန်းမာရေးစစ်ဆေးဖို့ ဆရာဝန်တစ်ဦးထံ သင်သွားမည်ဆိုလျှင် သင့်နှလုံးကိုသူစစ်ဆေးပေမည်။ သင့်နှလုံးအပါအဝင် သင့်ကျန်းမာရေးအခြေအနေက သင်အာဟာရဓာတ် အလုံအလောက်ရနေသည်ဟု ဖော်ပြပါသလော။ သင့်သွေးပေါင်ချိန်ကော မည်သို့ရှိသနည်း။ သင့်နှလုံးသည် မှန်မှန်နှင့် အားကောင်းကောင်းခုန်သလော။ လေ့ကျင့်ခန်း အလုံအလောက်လုပ်သလော။ သင့်နှလုံးသည် တရားလွန်ဖိစီးခံနေရသလော။
၄ ပကတိနှလုံးကို မှန်မှန်စစ်ဆေးဖို့လိုလျှင် သင့်ပုံဆောင်နှလုံးကိုကော စစ်ဆေးဖို့လိုမည်လော။ ယင်းကို ယေဟောဝါစစ်ဆေးတော်မူ၏။ (၁ ရာဇဝင်ချုပ် ၂၉:၁၇) ကျွန်ုပ်တို့လည်း အလားတူပြုသင့်သည်။ မည်သို့ပြုမည်နည်း။ ဤကဲ့သို့သောမေးခွန်းများကို မေးခြင်းအားဖြင့်ဖြစ်သည်– ကိုယ်ပိုင်လေ့လာမှုနှင့် အစည်းအဝေးတက်ခြင်းတို့ကို မှန်မှန်ပြုလုပ်ခြင်းအားဖြင့် အကျွန်ုပ်၏နှလုံးသည် ဝိညာဉ်အစာ အလုံအလောက်ရရှိနေပါသလော။ (ဆာလံ ၁:၁၊ ၂; ဟေဗြဲ ၁၀:၂၄၊ ၂၅) ယေဟောဝါ၏သတင်းတရားသည် “ငါ့အရိုးတို့၌ချုပ်ထား၍ လောင်သောမီး” ကဲ့သို့ အကျွန်ုပ်နှလုံး အဓိကအလေးထားရာဖြစ်ပြီး ဘုရားသခင့်နိုင်ငံတော်ဟောပြောခြင်းနှင့် တပည့်ဖြစ်စေခြင်းလုပ်ငန်း၌ပါဝင်ရန် စေ့ဆော်ပေးပါသလော။ (ယေရမိ ၂၀:၉; မဿဲ ၂၈:၁၉၊ ၂၀; ရောမ ၁:၁၅၊ ၁၆) ဖြစ်နိုင်သည့်အခါ အချိန်ပြည့်အမှုဆောင်နည်း တစ်မျိုးမျိုး၌ အင်တိုက်အားတိုက်ကြိုးစားပါဝင်ရန် အကျွန်ုပ်လှုံ့ဆော်ခံရသလော။ (လုကာ ၁၃:၂၄) အကျွန်ုပ်၏ပုံဆောင်နှလုံးကို အဘယ်ဝန်းကျင်အခြေအနေမျိုး၌ လှစ်ဟထားသနည်း။ စစ်မှန်သောဝတ်ပြုရေး၌ နှလုံးတညီတညွတ်တည်းရှိသော အခြားသူတို့နှင့် အကျွန်ုပ်ရှာဖွေပေါင်းဖော်နေသလော။ (သု. ၁၃:၂၀; ၁ ကောရိန္သု ၁၅:၃၃) လိုအပ်နေသည့်အရာကို သတိပြုမိရန်လျင်မြန်ပြီး ချက်ချင်းပြုပြင်ရန် ကြိုးစားကြပါစို့။
၅။ ယုံကြည်ခြင်းစမ်းသပ်မှုများက အဘယ်အကျိုးပြုနိုင်သနည်း။
၅ ယုံကြည်ခြင်းစမ်းသပ်မှုများကို မကြာခဏ ကျွန်ုပ်တို့ကြုံတွေ့ရကြသည်။ ယင်းတို့က ကျွန်ုပ်တို့၏နှလုံးအခြေအနေကို သတိပြုရန်အခွင့်အလမ်းများပေးသည်။ ကတိထားရာပြည်ထဲဝင်ခါနီးဆဲဆဲ ဣသရေလလူမျိုးကို မောရှေဤသို့ပြောခဲ့သည်– “သင်၏ဘုရားသခင်ထာဝရဘုရားသည် သင့်ကိုနှိမ့်ချစုံစမ်း၍ ပညတ်တော်တို့ကို ကျင့်ချင်သောစိတ် ရှိသည်မရှိသည်ကိုသိမည်အကြောင်း လွန်ခဲ့ပြီးသောအနှစ်လေးဆယ်ပတ်လုံး တော၌ပို့ဆောင်တော်မူသော လမ်းခရီးတစ်လျှောက်လုံးကို အောက်မေ့ရမည်။” (တရားဟောရာ ၈:၂) မမျှော်လင့်ဘဲ အခြေအနေ သို့မဟုတ် သွေးဆောင်မှုတစ်မျိုးမျိုးကို ရင်ဆိုင်ရသောအခါ ပေါ်ပေါက်လာတတ်သည့် ခံစားချက်များ၊ စိတ်ဆန္ဒများ သို့မဟုတ် တုံ့ပြန်ပုံများက ကျွန်ုပ်တို့ကိုအံ့အားသင့်သွားစေသည် မဟုတ်ပေလော။ ယေဟောဝါခွင့်ပြုသည့် စမ်းသပ်မှုများက ကျွန်ုပ်တို့၏အားနည်းချက်များကို အမှန်သတိပြုစေပြီး တိုးတက်ကောင်းမွန်လာစေရန် ပြုပြင်ဖို့အခွင့်ပေးသည်။ (ယာကုပ် ၁:၂-၄) စမ်းသပ်မှုများအား ကျွန်ုပ်တို့တုံ့ပြန်ပုံကို ဆင်ခြင်သုံးသပ်၍ ဆုတောင်းဖို့ ဘယ်သောအခါမျှ မပျက်ကွက်ကြစို့နှင့်!
ကျွန်ုပ်တို့၏စကားက အဘယ်အရာကိုဖော်ပြသနည်း
၆။ ကျွန်ုပ်တို့ဆွေးနွေးလိုသော အကြောင်းအရာများက ကျွန်ုပ်တို့၏နှလုံးအကြောင်း အဘယ်အရာကိုဖော်ပြနိုင်သနည်း။
၆ ကျွန်ုပ်တို့၏နှလုံးထဲ အဘယ်အရာကိုသိုထားကြောင်း မည်သို့သိနိုင်မည်နည်း။ ယေရှုက “ကောင်းသောသူသည် ကောင်းသောမိမိစိတ်နှလုံးဘဏ္ဍာတိုက်ထဲက ကောင်းသောအရာကို ထုတ်ဖော်တတ်၏။ မကောင်းသောသူသည် မကောင်းသောမိမိစိတ်နှလုံးဘဏ္ဍာတိုက်ထဲက မကောင်းသောအရာကိုထုတ်ဖော်တတ်၏။ အကြောင်းမူကား၊ စိတ်နှလုံးအပြည့်ရှိသည်အတိုင်း နှုတ်မြွက်တတ်၏” ဟုဆို၏။ (လုကာ ၆:၄၅) ကျွန်ုပ်တို့ပြောနေကျစကားသည် ကျွန်ုပ်တို့အာရုံစိုက်သည့်အရာကို ကောင်းစွာဖော်ပြသည်။ ရုပ်ပစ္စည်းများနှင့် လောကအောင်မြင်မှုများအကြောင်း ကျွန်ုပ်တို့ပြောဆိုလေ့ရှိသလော။ သို့မဟုတ် ဝိညာဉ်ရေးရာများနှင့် သီအိုကရက်တစ်ပန်းတိုင်များအကြောင်း ကျွန်ုပ်တို့စကားလက်ဆုံပြောဆိုလေ့ရှိသလော။ သူတစ်ပါး၏အမှားများကို လူတကာသိအောင်ပြုမည့်အစား ၎င်းတို့ကို မေတ္တာရှိစွာဖုံးအုပ်လိုစိတ်ရှိသလော။ (သု. ၁၀:၁၁၊ ၁၂) မူများနှင့် ယုံကြည်ချက်များအကြောင်း အပြောနည်းပြီး လူတို့နှင့် သူတို့၏ဘဝအဖြစ်အပျက်များအကြောင်း အပြောများသလော။ ကျွန်ုပ်တို့သည် သူတစ်ပါး၏ကိုယ်ရေးကိုယ်တာကိစ္စများကို တရားလွန်စိတ်ဝင်စားနေကြောင်း ယင်းကဖော်ပြသည်မဟုတ်လော။—၁ ပေတရု ၄:၁၅။
၇။ ကျွန်ုပ်တို့၏နှလုံးကိုစောင့်ရှောက်ခြင်းနှင့်ပတ်သက်၍ ယောသပ်အစ်ကိုဆယ်ယောက်၏မှတ်တမ်းမှ အဘယ်သင်ခန်းစာရနိုင်သနည်း။
၇ မိသားစုကြီးတစ်ခု၌ ဖြစ်ပျက်ခဲ့ရာကို သုံးသပ်ကြည့်ပါ။ ယာကုပ်၏သားကြီးဆယ်ယောက်သည် သူတို့၏ညီငယ်ယောသပ်အား “မေတ္တာစကားကို . . . မပြောနိုင်ကြ။” အဘယ်ကြောင့်နည်း။ သူသည် ဖခင်၏အချစ်ဆုံးသားဖြစ်သည့်အတွက် မနာလိုဖြစ်ကြသည်။ နောက်ပိုင်း ယောသပ်သည် ယေဟောဝါ၏မျက်နှာသာရကြောင်း သက်သေအဖြစ် ဘုရားသခင့်ထံတော်မှ အိပ်မက်များရသည့်ကောင်းချီးခံစားရသောအခါ သူတို့သည် “သာ၍မုန်းကြ၏။” (ကမ္ဘာဦး ၃၇:၄၊ ၅၊ ၁၁) ထိုအခါ ညီဖြစ်သူကို ကျွန်အဖြစ်ရက်စက်စွာ ရောင်းချလိုက်ကြသည်။ ထို့နောက် မိမိတို့အပြစ်ကိုကြိုးစားဖုံးအုပ်သည့်အနေဖြင့် ယောသပ်ကိုသားရိုင်းတိရစ္ဆာန်တစ်ကောင် သတ်လိုက်ပြီဟုထင်စေဖို့ ဖခင်ကိုလှည့်စားခဲ့ကြသည်။ ထိုအချိန်အခါတွင် ယောသပ်၏အစ်ကိုဆယ်ယောက်သည် သူတို့၏နှလုံးကို မစောင့်ရှောက်ခဲ့ကြချေ။ ကျွန်ုပ်တို့သည် သူတစ်ပါးကို အပြစ်ရှာလွယ်မည်ဆိုလျှင် ကျွန်ုပ်တို့၏နှလုံးထဲ၌ မနာလိုဝန်တိုမှုရှိသည့်လက္ခဏာဖြစ်နိုင်သလော။ ကျွန်ုပ်တို့နှုတ်မှ ထွက်လာသည့်စကားကို သတိနှင့်စစ်ဆေးကာ မသင့်လျော်သောစိတ်တိမ်းညွတ်မှုများကို ချက်ချင်းအမြစ်လှန်ပစ်ဖို့လိုသည်။
၈။ လိမ်လည်ပြောဆိုမိလျှင် ကျွန်ုပ်တို့၏နှလုံးကိုစစ်ဆေးဖို့ အဘယ်အရာကထောက်ကူမည်နည်း။
၈ “ဘုရားသခင်သည် မုသာမသုံးနိုင်” သော်လည်း မစုံလင်သောလူသားများမူ လိမ်လည်တတ်သည်။ (ဟေဗြဲ ၆:၁၈) “လူအပေါင်းတို့သည် မုသာကိုသုံးတတ်ကြ၏” ဟုဆာလံဆရာမြည်တမ်းခဲ့သည်။ (ဆာလံ ၁၁၆:၁၁) တမန်တော်ပေတရုပင် ယေရှုကို မုသာသုံး၍ သုံးကြိမ်ငြင်းပယ်ခဲ့၏။ (မဿဲ ၂၆:၆၉-၇၅) ယေဟောဝါသည် “မုသာ၌ကျင်လည်သောလျှာ” ကိုမုန်းသောကြောင့် လိမ်လည်ခြင်းကို ကျွန်ုပ်တို့သတိနှင့်ရှောင်ကြဉ်ရမည်မှာ ရှင်းနေပါသည်။ (သု. ၆:၁၆-၁၉) ကျွန်ုပ်တို့လိမ်လည်ပြောဆိုဖူးမည်ဆိုလျှင် အကြောင်းရင်းကိုဆန်းစစ်ကြည့်ဖို့ကောင်းသည်။ လူကိုကြောက်သောကြောင့်လော။ ဒဏ်ပေးခံရမည်ကိုကြောက်သည့်အတွက်လော။ အရင်းခံပြဿနာမှာ သိက္ခာဆယ်ခြင်း သို့မဟုတ် လုံးလုံးလျားလျားကိုယ်ကျိုးရှာခြင်းဖြစ်မည်လော။ မည်သို့ပင်ဖြစ်စေ ယင်းကိစ္စကိုပြန်လည်သုံးသပ်ပြီး ကိုယ့်အမှားကို နှိမ့်ချစွာဝန်ခံ၍ ယေဟောဝါ၏ခွင့်လွှတ်မှုရရန် အသနားခံကာ ထိုအားနည်းချက်ကို အနိုင်ယူနိုင်ဖို့ ကိုယ်တော့်အကူအညီ တောင်းဆိုခြင်းသည် သင့်လျော်လိုက်လေခြင်း! အကူအညီအကောင်းဆုံးပေးနိုင်သူတို့မှာ “အသင်းတော်အသက်ကြီးသူများ” ဖြစ်ပေမည်။—ယာကုပ် ၅:၁၄၊ ကဘ။
၉။ ကျွန်ုပ်တို့၏ဆုတောင်းချက်များက ကျွန်ုပ်တို့၏နှလုံးအကြောင်း အဘယ်အရာဖော်ပြနိုင်သနည်း။
၉ အသိဉာဏ်ပညာ တောင်းဆိုသူ ငယ်ရွယ်သောဘုရင်ရှောလမုန်အား ယေဟောဝါဤသို့မိန့်ဆိုခဲ့သည်– “သင်သည် ထိုသို့စိတ်စွဲလမ်း၍ စည်းစိမ်ဥစ္စာဂုဏ်အသရေကိုမတောင်း . . . သောကြောင့် ပညာနှင့်ဉာဏ်ကိုငါပေး၏။ ထိုမှတစ်ပါး . . . စည်းစိမ်ဥစ္စာ၊ ဂုဏ်အသရေကိုလည်း ငါပေးမည်။” (၂ ရာဇဝင်ချုပ် ၁:၁၁၊ ၁၂၊ သမ္မာ) ယေဟောဝါသည် ရှောလမုန်တောင်းဆိုရာနှင့် မတောင်းဆိုရာကိုထောက်၍ ရှောလမုန်စိတ်စွဲလမ်းရာကို သိတော်မူခဲ့သည်။ ဘုရားသခင်နှင့် ကျွန်ုပ်တို့၏ဆက်သွယ်ပြောဆိုသည့်စကားများက ကျွန်ုပ်တို့၏နှလုံး မည်သို့ရှိကြောင်းဖော်ပြသနည်း။ ကျွန်ုပ်တို့၏ဆုတောင်းချက်များက အသိပညာ၊ ဉာဏ်ပညာနှင့် ပိုင်းခြားသိမြင်မှုကို ကျွန်ုပ်တို့တောင့်တကြောင်း ဖော်ပြသလော။ (သု. ၂:၁-၆; မဿဲ ၅:၃) ဘုရားသခင့်နိုင်ငံတော်အကျိုးစီးပွားကို ကျွန်ုပ်တို့စိတ်စွဲလမ်းသလော။ (မဿဲ ၆:၉၊ ၁၀) ကျွန်ုပ်တို့၏ဆုတောင်းချက်များသည် ခံစားချက်မဲ့ပြီး ဝတ်ကျေတမ်းကျေမျှဖြစ်နေပါက ယေဟောဝါ၏စီရင်ချက်များကို အချိန်ယူတွေးတောဆင်ခြင်ဖို့လိုပြီဖြစ်ကြောင်း ဖော်ပြသည့်သာဓကပင်ဖြစ်သည်။ (ဆာလံ ၁၀၃:၂) ခရစ်ယာန်အားလုံး မိမိတို့၏ဆုတောင်းချက်များသည် အဘယ်အရာကိုထင်ရှားဖော်ပြကြောင်း သိမြင်ရန်ဂရုပြုသင့်သည်။
ကျွန်ုပ်တို့၏အပြုအမူများက အဘယ်အရာကိုဖော်ပြသနည်း
၁၀၊ ၁၁။ (က) သူ့မယားကိုပြစ်မှားခြင်းနှင့် မတရားမေထုန်တို့သည် အဘယ်နေရာမှအစပြုသနည်း။ (ခ) ‘စိတ်နှလုံးထဲ၌ မိန်းမနှင့်ပြစ်မှားခြင်း’ မပြုမိစေရန် အဘယ်အရာက အကူအညီပေးမည်နည်း။
၁၀ အပြောထက် အလုပ်တာသွားသည်ဟု အဆိုရှိ၏။ ကျွန်ုပ်တို့၏အပြုအမူများက အတွင်း၌ကျွန်ုပ်တို့ အဘယ်သို့သောသူဖြစ်ကြောင်း အမှန်ပင်ထင်ရှားပေါ်လွင်စေသည်။ ဥပမာ၊ ကိုယ်ကျင့်တရားကိစ္စရပ်များတွင် နှလုံးကိုစောင့်ရှောက်ခြင်း၌ မတရားမေထုန် သို့မဟုတ် သူ့မယားကိုပြစ်မှားခြင်းအမှုကို ရှောင်ကြဉ်ရုံမျှမက အကျုံးဝင်၏။ ကိုယ်တော်၏တောင်ပေါ်တရားတော်၌ ယေရှုဤသို့ဆိုသည်– “ကိလေသာစိတ်နှင့် သူ့မယားကိုကြည့်သောသူသည် စိတ်နှလုံးထဲ၌ ထိုမိန်းမနှင့်ပြစ်မှားပြီ။” (မဿဲ ၅:၂၈) စိတ်နှလုံးထဲ၌ပင် ပြစ်မှားခြင်းကို ကျွန်ုပ်တို့မည်သို့ရှောင်နိုင်မည်နည်း။
၁၁ တည်ကြည်သောဘိုးဘေးယောဘသည် အိမ်ထောင်သည်ခရစ်ယာန်အမျိုးသား၊ အမျိုးသမီးများအတွက် ပုံသက်သေကိုချမှတ်ခဲ့သည်။ ယောဘသည် အမျိုးသမီးငယ်များနှင့် ရိုးရိုးတမ်းတမ်းဆက်သွယ်မှုများရှိခဲ့ပြီး သူတို့အကူအညီလိုသည့်အခါ သနားကြင်နာစွာ ကူညီပေးခဲ့ပေမည်။ သို့သော် ဤသမာဓိစောင့်သိသူ၏စိတ်ကူးတွင်ပင် သူတို့ကိုမတော်လျော်သောစိတ်ဝင်စားမှု အလျှင်းမပေါ်ခဲ့ပေ။ အဘယ်ကြောင့်နည်း။ အကြောင်းမူကား အမျိုးသမီးများကို တပ်မက်စိတ်ဖြင့် ငေးစိုက်မကြည့်မိဖို့ သူအခိုင်အမာသန္နိဋ္ဌာန်ချထားသောကြောင့်ပင်ဖြစ်သည်။ “ငါသည် အပျိုကိုမျှမကြည့်ရှုမည်အကြောင်း ကိုယ်မျက်စိနှင့်ပဋိညာဉ်ဝန်ခံခြင်းကိုပြုပြီ” ဟုသူဆိုခဲ့သည်။ (ယောဘ ၃၁:၁) ကျွန်ုပ်တို့လည်း ကိုယ်မျက်စိနှင့် အလားတူပဋိညာဉ်ပြုကာ ကျွန်ုပ်တို့၏နှလုံးကို စောင့်ရှောက်ကြစို့။
၁၂။ သင်၏နှလုံးကိုစောင့်ရှောက်ခြင်းနှင့်ပတ်သက်၍ လုကာ ၁၆:၁၀ ကိုမည်သို့ကျင့်သုံးမည်နည်း။
၁၂ ဘုရားသခင့်သားတော်က “အနည်းငယ်သောအမှု၌သစ္စာရှိသောသူသည် ကြီးသောအမှု၌လည်းသစ္စာရှိလိမ့်မည်။ အနည်းငယ်သောအမှု၌သစ္စာမရှိသောသူသည် ကြီးသောအမှု၌လည်းသစ္စာမရှိ” ဟုအတိအလင်းဖော်ပြခဲ့သည်။ (လုကာ ၁၆:၁၀) မှန်ပါသည်၊ ကျွန်ုပ်တို့၏နေ့စဉ်အသက်တာတွင် အသေးအဖွဲဟုထင်ရသောကိစ္စများ၊ မိမိတို့နေအိမ်တွင် လွတ်လွတ်လပ်လပ်နေသောအခါ၌ပင် ကျွန်ုပ်တို့၏အမူအကျင့်တို့ကို စစ်ဆေးဖို့လိုသည်။ (ဆာလံ ၁၀၁:၂) အိမ်၌ထိုင်နေသောအခါ၊ ရုပ်မြင်သံကြားကြည့်နေသောအခါ သို့မဟုတ် အင်တာနက်နှင့်ဆက်သွယ်ထားသောအခါ ဤကျမ်းစာသတိပေးချက်ကို အသေအချာလိုက်နာသလော– “မတရားသောမေထုန်၌မှီဝဲခြင်း၊ အမျိုးမျိုးသောကိလေသာညစ်ညူးခြင်း၊ လောဘလွန်ကျူးခြင်းအမှုတို့ကို သန့်ရှင်းသူတို့သည်ရှောင်သင့်သည်အတိုင်း၊ စကားဖြင့်မျှမဆက်ဆံကြနှင့်။ မတော်မလျော်သော ညစ်ညူးပြက်ပြယ် ပြက်ရယ်သောစကားများကိုလည်းပယ် . . . ကြလော့။” (ဧဖက် ၅:၃၊ ၄) ရုပ်မြင်သံကြား သို့မဟုတ် ဗီဒီယိုဂိမ်းစ်များတွင်တွေ့ရသော အကြမ်းဖက်မှုများကော။ ဆာလံဆရာကဤသို့ဆို၏– “ယေဟောဝါသည် ဖြောင့်မတ်သူနှင့်ဆိုးယုတ်သူကိုပါ စစ်ဆေးတော်မူ၏။ အကြမ်းဖက်မှုကိုမြတ်နိုးသူအား ကိုယ်တော်၏စိုးလ်ဝိညာဉ်သည်မုန်းတော်မူ၏။”—ဆာလံ ၁၁:၅၊ ကဘ။
၁၃။ ကျွန်ုပ်တို့နှလုံးထဲမှထွက်ပေါ်လာရာကို ပြန်လည်သုံးသပ်သောအခါ အဘယ်သတိပေးချက်သည် ကျိုးကြောင်းဆီလျော်သနည်း။
၁၃ ယေရမိက “စိတ်နှလုံးသည် ခပ်သိမ်းသောအရာထက် စဉ်းလဲတတ်၏။ အလွန်ယိုယွင်းသောသဘောရှိ၏” ဟုသတိပေးခဲ့သည်။ (ယေရမိ ၁၇:၉) ကျွန်ုပ်တို့၏နှလုံးသည်စဉ်းလဲကြောင်း ကျွန်ုပ်တို့အမှားများကို ဆင်ခြေပေးခြင်း၊ ချွတ်ယွင်းချက်များကို အသေးအဖွဲဖြစ်စေခြင်း၊ ပင်ကိုအကျင့်စရိုက်ဆိုးများကို ဆင်ခြေပေးရှင်းလင်းချက်တင်ပြခြင်းပြုသောအခါ သို့မဟုတ် ပြီးမြောက်အောင်မြင်မှုများကို ပုံကြီးချဲ့သောအခါ ပေါ်လွင်နိုင်သည်။ ထင်ရာစိုင်းတတ်သောနှလုံးသည် ပုံစံနှစ်မျိုး—ချိုသာသည့်အပြောက တစ်မျိုး၊ အလုပ်က အခြားတစ်မျိုး—ဖမ်းနိုင်သည်။ (ဆာလံ ၁၂:၂; သု. ၂၃:၇) နှလုံးထဲမှထွက်သမျှကို ကျွန်ုပ်တို့စစ်ဆေးရာတွင် ရိုးသားဖို့အရေးကြီးလှသည်တကား!
ကျွန်ုပ်တို့၏မျက်စိ ရိုးရှင်းသလော
၁၄၊ ၁၅။ (က) ‘ရိုးရှင်း’ သောမျက်စိကား အဘယ်နည်း။ (ခ) မျက်စိကိုရိုးရှင်းစွာထားခြင်းက ကျွန်ုပ်တို့၏နှလုံးကိုစောင့်ရှောက်ရန် မည်သို့ထောက်ကူပေးသနည်း။
၁၄ “မျက်စိကား ကိုယ်၏ဆီမီးဖြစ်၏။ ထို့ကြောင့် မျက်စိကြည်လင် [“ရိုးရှင်း၊” ကဘ] လျှင် တစ်ကိုယ်လုံးလင်းလိမ့်မည်” ဟုယေရှုဆိုခဲ့သည်။ (မဿဲ ၆:၂၂) ရိုးရှင်းသောမျက်စိသည် ပန်းတိုင် သို့မဟုတ် ရည်ရွယ်ချက်တစ်ခုတည်းကိုသာ အာရုံစူးစိုက်ပြီး ယင်းမှ အာရုံပြောင်းလွဲခြင်း သို့မဟုတ် လမ်းကြောင်းပြောင်းခြင်းမရှိချေ။ ကျွန်ုပ်တို့၏မျက်စိသည် “ဘုရားသခင်၏နိုင်ငံတော်နှင့် ဖြောင့်မတ်ခြင်းတရားတော်ကို ရှေးဦးစွာရှာ” ခြင်းအပေါ် အမှန်ပင်အာရုံစူးစိုက်သင့်သည်။ (မဿဲ ၆:၃၃) ကျွန်ုပ်တို့၏မျက်စိကို ရိုးရှင်းစွာမထားလျှင် ကျွန်ုပ်တို့၏ပုံဆောင်နှလုံးသည် အဘယ်သို့ဖြစ်သွားနိုင်သနည်း။
၁၅ အသက်မွေးဝမ်းကြောင်းပြုခြင်းကိစ္စကို သုံးသပ်ကြည့်ပါ။ မိသားစုလိုအပ်ရာကို ရှာဖွေပြုစုပေးခြင်းသည် ခရစ်ယာန်လိုအပ်ချက်တစ်ခုဖြစ်၏။ (၁ တိမောသေ ၅:၈) သို့သော် နောက်ဆုံးပေါ်၊ အကောင်းဆုံးနှင့် အနှစ်သက်ဆုံးအစားအစာ၊ အဝတ်အစား၊ နေစရာနေရာနှင့် အခြားအရာများကို တပ်မက်လိုချင်စိတ်ရှိလျှင်ကော။ ၎င်းသည် ကျွန်ုပ်တို့၏စိတ်နှင့်နှလုံးကို အမှန်ပင်ကျွန်ဘဝရောက်စေပြီး ဝတ်ပြုရေးတွင် နှလုံးတစ်ဝက်တစ်ပျက်ဖြစ်စေနိုင်သည်မဟုတ်လော။ (ဆာလံ ၁၁၉:၁၁၃; ရောမ ၁၆:၁၈) ကျွန်ုပ်တို့၏ဘဝသည် မိသားစု၊ စီးပွားရေးနှင့် ရုပ်ပစ္စည်းများနှင့်ချည်း လုံးပန်းနေရသည့်အထိ ကာယရေးလိုအပ်ရာများအတွက်သာ အဘယ်ကြောင့်အာရုံနစ်မြုပ်နေရမည်နည်း။ ဤမှုတ်သွင်းခံအကြံပေးချက်ကို သတိရပါ– “သင်တို့သည် ကိုယ်ကိုကိုယ်သတိပြုကြလော့။ သို့မဟုတ် အစားအသောက်လွန်ကြူးခြင်း၊ လော[က]စိုးရိမ်ခြင်းအားဖြင့် စိတ်နှလုံးပင်ပန်းလျက်နေစဉ်တွင်၊ ထိုနေ့ရက်သည် အမှတ်တမဲ့သင်တို့နှင့်တွေ့ကြုံလိမ့်မည်။ ထိုနေ့ရက်သည် ပိုက်ကွန်ကဲ့သို့ မြေတစ်ပြင်လုံး၌နေသောလူအပေါင်းတို့ကို အုပ်မိလိမ့်မည်။”—လုကာ ၂၁:၃၄၊ ၃၅။
၁၆။ မျက်စိနှင့်ပတ်သက်၍ ယေရှု အဘယ်အကြံပေးခဲ့သနည်း၊ အဘယ်ကြောင့်နည်း။
၁၆ စိတ်နှင့်နှလုံးထံဆက်သွယ်သော အဓိကလမ်းကြောင်းမှာ မျက်စိဖြစ်သည်။ မျက်စိအာရုံစိုက်သည့်အရာသည် ကျွန်ုပ်တို့၏အတွေးအခေါ်များ၊ စိတ်လှုပ်ရှားမှုများနှင့် အပြုအမူများကို များစွာသြဇာလွှမ်းနိုင်သည်။ ယေရှုသည် မျက်စိသွေးဆောင်မှု၏သြဇာကို ပုံပမာစကားဖြင့် ဤသို့ဖော်ပြခဲ့သည်– “ထို့ကြောင့် လက်ယာမျက်စိဖြစ်သော်လည်း သင့်ကိုမှားယွင်းစေလျှင် ထိုမျက်စိကိုထုတ်ပစ်လော့။ တစ်ကိုယ်လုံး ငရဲသို့ချခြင်းကိုခံရသည်ထက် အင်္ဂါတစ်ခုပျက်သော် သာ၍ကောင်း၏။” (မဿဲ ၅:၂၉) မတော်လျော်သောမြင်ကွင်းများကို အာရုံမပြုမိရန် မျက်စိကို ချုပ်ထိန်းရပေမည်။ ဥပမာ၊ မလျောက်ပတ်သောရာဂစိတ်နှင့် ဆန္ဒများထကြွနှိုးဆွပေးရန် ရည်ရွယ်၍ထုတ်ဝေထားသော အရာများကို စူးစိုက်ကြည့်ရန် ယင်းကိုခွင့်မပြုရပါ။
၁၇။ ကောလောသဲ ၃:၅ ကိုကျင့်ခြင်းက နှလုံးကိုစောင့်ရှောက်ရန် မည်သို့အထောက်အကူရသနည်း။
၁၇ ကျွန်ုပ်တို့သည် အမြင်အာရုံတစ်ခုတည်းဖြင့်သာ ပြင်ပလောကနှင့် အဆက်အသွယ်ပြုကြသည်မဟုတ်ပါ။ အထိအတွေ့နှင့် ကြားနိုင်စွမ်းစသည့် အခြားအာရုံများကလည်း ၎င်းတို့ကဏ္ဍကိုထမ်းဆောင်ကြရာ သက်ဆိုင်ရာကိုယ်အင်္ဂါများကိုလည်း ကျွန်ုပ်တို့ကြိုတင်ကာကွယ်ဖို့လိုသည်။ တမန်တော်ပေါလုက ဤသို့တိုက်တွန်းခဲ့သည်– “ထိုကြောင့် မတရားသောမေထုန်၌မှီဝဲခြင်း၊ ညစ်ညူးစွာကျင့်ခြင်း၊ ကိလေသာပူပန်ခြင်း၊ ဆိုးညစ်သောတပ်မက်ခြင်း၊ . . . ကိုကိုးကွယ်ခြင်းဖြစ်သော လောဘလွန်ကျူးခြင်းတည်းဟူသော၊ မြေကြီးပေါ်မှာရှိသော သင်တို့၏ကိုယ်အင်္ဂါတို့ကို သေစေကြလော့။”—ကောလောသဲ ၃:၅။
၁၈။ မတော်လျော်သောအတွေးများနှင့်ပတ်သက်၍ အဘယ်ဆောင်ရွက်မှုများကို ကျွန်ုပ်တို့ပြုသင့်သနည်း။
၁၈ ကျွန်ုပ်တို့၏စိတ်ထဲတွင် မတော်လျော်သောလိုအင်ဆန္ဒများ စပေါ်ထွက်လာနိုင်သည်။ ယင်းတို့ကို ကြာရှည်တွေးတောခြင်းဖြင့် မတော်လျော်သောဆန္ဒကို တိုး၍ပြင်းထန်လာစေရာ နှလုံးကိုလွှမ်းမိုးစေသည်။ ထိုအခါ “တပ်မက်သောစိတ်သည် ပဋိသန္ဓေယူ၍ [မကောင်းမှု] ကိုဖွားတတ်၏။” (ယာကုပ် ၁:၁၄၊ ၁၅) ဤနည်းဖြင့် တစ်ကိုယ်တည်းရာဂစိတ်ဖြေသည့်အဖြစ်သို့ ရောက်သွားလေ့ရှိကြောင်း လူအများဝန်ခံကြသည်။ ထို့ကြောင့် ဝိညာဉ်ရေးရာများနှင့် ကျွန်ုပ်တို့၏စိတ်ကိုဖြည့်ထားဖို့ တကယ်အရေးကြီးလှသည်တကား! (ဖိလိပ္ပိ ၄:၈) ကျွန်ုပ်တို့စိတ်ထဲတွင် မတော်လျော်သောအတွေး ဝင်လာခဲ့သော် ယင်းကို ကြိုးစားဖျောက်ဖျက်သင့်ပေသည်။
‘စုံလင်သောနှလုံးနှင့် ယေဟောဝါအားဝတ်ပြုလော့’
၁၉၊ ၂၀။ စုံလင်သောနှလုံးနှင့် ယေဟောဝါအားဝတ်ပြုရန် ကျွန်ုပ်တို့မည်သို့အောင်မြင်နိုင်မည်နည်း။
၁၉ အိုမင်းလာသည့်အခါ ဘုရင်ဒါဝိဒ်က သူ၏သားကို ဤသို့မှာကြားခဲ့သည်– “ငါ့သားရှောလမုန်၊ သင့်အဘ၏ဘုရားသခင်ကိုသိလော့။ စုံလင်သောနှလုံး၊ ကြည်ညိုသောစိတ်သဘောနှင့်ဝတ်ပြုလော့။ ထာဝရဘုရားသည် ခပ်သိမ်းသောစိတ်နှလုံးတို့ကိုစစ်၍ အကြံအစည်ရှိလေသမျှတို့ကို သိတော်မူ၏။” (၁ ရာဇဝင်ချုပ် ၂၈:၉) ရှောလမုန်ကိုယ်တိုင် ‘နာခံတတ်သောနှလုံး’ ရှိဖို့ဆုတောင်းခဲ့သည်။ (၃ ဓမ္မရာဇဝင် ၃:၉) သို့တိုင် သူ၏ဘဝတစ်လျှောက်လုံး ထိုသို့သောနှလုံးကို ဆက်ထိန်းသိမ်းထားရသည့်စိန်ခေါ်ချက်ကို သူရင်ဆိုင်ခဲ့ရ၏။
၂၀ ယင်းနှင့်ပတ်သက်၍ ကျွန်ုပ်တို့အောင်မြင်လိုလျှင် ယေဟောဝါ၏နှလုံးတော်နှင့်ညီညွတ်သောနှလုံးကို ရယူရုံမက နှလုံးကိုစောင့်ရှောက်ဖို့လည်းလိုသည်။ ယင်းကိုအထမြောက်စေရန် ဘုရားသခင့်စကားတော်ရှိ သတိပေးချက်များကို ကျွန်ုပ်တို့၏နှလုံး—‘အတွင်း၌’ ထည့်ထားရမည်။ (သု. ၄:၂၀-၂၂) ကျွန်ုပ်တို့၏နှလုံးကိုစစ်ဆေးသည့်အကျင့်လည်းလုပ်သင့်ကာ ကျွန်ုပ်တို့၏အပြောနှင့် အလုပ်တို့က အဘယ်အရာကိုထင်ရှားပေါ်လွင်စေကြောင်း ဆုတောင်း၍စဉ်းစားရန်ဖြစ်သည်။ ကျွန်ုပ်တို့တွေ့ရှိသော အားနည်းချက်တစ်ခုခုကို တည့်မတ်ရန် ယေဟောဝါ၏အကူအညီကို ဇွဲရှိရှိဖြင့်မရှာယူလျှင် ထိုသို့ဆင်ခြင်စဉ်းစားခြင်းသည် အဘယ်အကျိုးရှိမည်နည်း။ ထို့ပြင် ကျွန်ုပ်တို့၏အာရုံများအားဖြင့် ကျွန်ုပ်တို့အဘယ်အရာကို သွင်းယူနေကြောင်း သတိရှိဖို့ အလွန်အရေးပါသည်တကား! ဤသို့ပြုရာတွင် “အဘယ်သူမျှကြံ၍မမီနိုင်သော ဘုရားသခင်၏ငြိမ်သက်ခြင်းသည် ယေရှုခရစ်အားဖြင့် [ကျွန်ုပ်တို့၏] စိတ်နှလုံးတို့ကို စောင့်မလိမ့်မည်” ဟူသောအာမခံချက်ကို ကျွန်ုပ်တို့ရရှိထားကြသည်။ (ဖိလိပ္ပိ ၄:၆၊ ၇) မှန်ပါသည်၊ ကာကွယ်ရန်ဖြစ်သော ကျွန်ုပ်တို့၏နှလုံးကို အခြားအရာအားလုံးတို့ထက် ကာကွယ်စောင့်ရှောက်ပြီး စုံလင်သောနှလုံးနှင့် ယေဟောဝါအားဝတ်ပြုဖို့ စိတ်ပိုင်းဖြတ်ထားကြပါစို့လေ။
သင်မှတ်မိသလော
• နှလုံးကိုစောင့်ရှောက်ဖို့ အဘယ်ကြောင့်အရေးကြီးသနည်း။
• ကျွန်ုပ်တို့၏နှလုံးကိုစောင့်ရှောက်ရန် ကျွန်ုပ်တို့ပြောဆိုသောစကားကို ဆန်းစစ်ကြည့်ခြင်းက မည်သို့အကူအညီဖြစ်စေသနည်း။
• ကျွန်ုပ်တို့၏မျက်စိကို အဘယ်ကြောင့် ‘ရိုးရှင်း’ စွာထားသင့်သနည်း။
[လေ့လာရန်မေးခွန်းများ]
[စာမျက်နှာ ၂၃ ပါ ရုပ်ပုံ]
လယ်ကွင်းလုပ်ငန်း၊ အစည်းအဝေးများနှင့် အိမ်၌ အဘယ်အကြောင်းကို ကျွန်ုပ်တို့ပြောဆိုလေ့ရှိသနည်း
[စာမျက်နှာ ၂၅ ပါ ရုပ်ပုံ]
ရိုးရှင်းသောမျက်စိသည် အာရုံပြောင်းလွဲခြင်းမရှိ