အင်ဒီးစ်တောင်တန်းပေါ်တွင် အသက်ပေး ရေစီးဆင်းနေ
အင်ဒီးစ်တောင်တန်းပေါ်တွင် အသက်ပေး ရေစီးဆင်းနေ
အင်ဒီးစ်တောင်တန်းများသည် ပီရူးနိုင်ငံအလယ်ပိုင်းတွင် သွယ်တန်းသွားပြီး ယင်းနိုင်ငံကို အနောက်ပိုင်း ခြောက်သွေ့သော ပင်လယ်ကမ်းခြေဒေသနှင့် အရှေ့ပိုင်း မြေသြဇာကောင်းပြီး စိုစွတ်သည့်သစ်တောဒေသအဖြစ်သို့ ပိုင်းခြားပေးသည်။ ဤတောင်ရိုးပေါ်တွင် ပီရူးနိုင်ငံ၏လူဦးရေ ၂၇ သန်း၏သုံးပုံတစ်ပုံကျော် နေထိုင်ကြသည်။ သူတို့သည် အင်ဒီးစ်၏မြင့်မားသောကုန်းပြင်မြင့်များနှင့် မတ်စောက်သောတောင်စောင်းများတွင် လည်းကောင်း၊ ခွေးသွားစိပ်ပုံတောင်တန်း၏ အလွန်နက်သောတောင်ကြားများနှင့် မြေသြဇာကောင်းမွန်သော ချိုင့်ဝှမ်းများတွင်လည်းကောင်း နေထိုင်ကြသည်။
ခက်ခဲကြမ်းတမ်းသော အင်ဒီးစ်တောင်တန်းများကြောင့် အပြင်လူများ အလွယ်တကူမရောက်လာနိုင်ကြချေ။ ရလဒ်ကား၊ ထိုတွင်နေထိုင်ကြသော သန်းချီသောသူတို့သည် အတော်အတန်သီးခြားဖြစ်နေကြပြီး သူတို့၏နယ်မြေပြင်ပရှိ အဖြစ်အပျက်များနှင့် ကြီးပွားတိုးတက်မှုများကို အများအားဖြင့် မသိရှိကြချေ။
ကောက်ပဲသီးနှံများနှင့် လာမာ၊ အယ်လပါကား၊ ဗစ်ကျူနာနှင့် သိုးစသော တိရစ္ဆာန်အုပ်များအတွက် လိုအပ်သောရေရရှိရန် ချောင်းများတစ်လျှောက် ရွာငယ်လေးများကို စတည်လာခဲ့သည်။ သို့သော် အင်ဒီးစ်တောင်တန်းတွင် စီးဆင်းနေသော အသက်ရှင်စေသည့်ရေ နောက်ထပ်တစ်မျိုးရှိသည်၊ ၎င်းမှာ “အသက်စမ်းရေတွင်း” ယေဟောဝါထံမှ စီးဆင်းလာသည့် လန်းဆန်းစေသောဝိညာဉ်ရေးရေဖြစ်သည်။ (ယေရမိ ၂:၁၃) ဘုရားသခင်သည် မိမိနှင့် မိမိ၏ရည်ရွယ်ချက်များနှင့်ပတ်သက်၍ တိကျမှန်ကန်သောအသိပညာရရှိစေရန် အင်ဒီးစ်တောင်တန်းအထက်တွင် နေထိုင်ကြသူများကိုကူညီပေးဖို့ ကိုယ်တော်၏သက်သေခံများကို အသုံးပြုတော်မူသည်။—ဟေရှာယ ၁၂:၃; ယောဟန် ၁၇:၃။
“လူအပေါင်းတို့သည် ကယ်တင်ခြင်းသို့ရောက်၍ [အမှန်တရား]ကိုသိစေခြင်းငှာ” ဘုရားသခင်အလိုတော်ရှိသောကြောင့် ဤခရစ်ယာန်ဓမ္မအမှုဆောင်များသည် သမ္မာကျမ်းစာမှ အသက်ပေးသတင်းတရားသယ်ဆောင်၍ ရောက်ရှိရန်ခက်ခဲသောနယ်မြေများသို့ အစွမ်းကုန်ကြိုးစားသွားကြသည်။ (၁ တိမောသေ ၂:၄) ဤကျမ်းစာအခြေပြုသတင်းတရားသည် ဉာဏ်အလင်းပေးပြီး မြင့်မြတ်လှ၏။ ယင်းက စိတ်နှလုံးရိုးဖြောင့်သောဒေသခံများကို သေလွန်သူများ၊ ဆိုးညစ်သောနတ်ဆိုးများနှင့် သဘာဝစွမ်းအင်များကို ကြောက်ရွံ့စေသည့် အယူသီးမှုများ၊ ဓလေ့ထုံးစံများနှင့် အတွေးအခေါ်များမှ လွတ်မြောက်စေခဲ့ပြီ။ ထို့ထက်အရေးကြီးသည်မှာ ဤသတင်းတရားသည် မြေကြီးပရဒိသုတွင် ဘုန်းကျက်သရေရှိသော အဆုံးမဲ့အသက်ရှင်ခြင်း မျှော်လင့်ချက်ကိုပေးသည်။
ကြိုးစားအားထုတ်ခြင်း
အဆိုပါဝေးလံသောဒေသများသို့ လည်ပတ်ရောက်ရှိသော ဘုရားသခင့်နိုင်ငံတော်ဟောပြောသူများသည် ပြုပြင်ပြောင်းလဲမှုများစွာ ပြုလုပ်ကြရသည်။ လူတို့၏နှလုံးကိုထိမိကြရန် ကျမ်းစာသွန်သင်ပေးသူများသည် ဒေသခံဘာသာစကားနှစ်ခုဖြစ်သည့် ကွီချူဝါ သို့မဟုတ် အိုင်မာရာဘာသာစကားတို့ကို အနည်းအကျဉ်းသိဖို့လိုသည်။
အင်ဒီးစ်တောင်တန်းများရှိ ရွာများသို့ရောက်ရှိရန် မလွယ်ကူလှပေ။ အဆိုပါဒေသများသို့ရောက်သည့် မီးရထားလမ်းများမရှိချေ။ သယ်ယူပို့ဆောင်ရေးသည် စိုးရိမ်ရဖွယ်ရှိပြီး ဆိုးရွားသောရာသီဥတုနှင့် ပုံမှန်မဟုတ်သောမြေအနေအထားကိုပါ တွေ့ရှိကြရပေမည်။ သို့ဖြစ်၍ သက်သေခံများသည် ဘုရားသခင့်နိုင်ငံတော်သတင်းတရားကို လူတို့ထံ မည်သို့သယ်ဆောင်ကြသနည်း။
ရဲစွမ်းသတ္တိရှိသော သတင်းကောင်းဟောပြောသူများသည် ထိုစိန်ခေါ်ချက်ကိုရင်ဆိုင်၍ “အကျွန်ုပ်ရှိပါ၏။ အကျွန်ုပ်ကို စေလွှတ်တော်မူပါ” ဟုပရောဖက်ဟေရှာယ၏စိတ်ဓာတ်ဖြင့် တုံ့ပြန်ခဲ့ကြသည်။ (ဟေရှာယ ၆:၈) မြောက်ပိုင်း၊ အလယ်ပိုင်းနှင့် တောင်ပိုင်းဒေသများသို့သွားရန် ကားအိမ်သုံးစီးကို သူတို့အသုံးပြုခဲ့ကြသည်။ ကျမ်းစာနှင့် ကျမ်းစာ,စာပေများစွာကိုယူဆောင်သွားကြကာ စိတ်အားထက်သန်သော ရှေ့ဆောင်များ သို့မဟုတ် အချိန်ပြည့်ခရစ်ယာန်ဓမ္မအမှုဆောင်များသည် ထိုတွင်နေထိုင်ကြသည့် ဖော်ရွေပြီး ဧည့်ဝတ်ပျူငှာသော စိတ်နှလုံးရိုးသားသူများကြားတွင် ကျမ်းစာအမှန်တရားမျိုးစေ့များ ကြဲခဲ့ကြ၏။
အထူးသဖြင့် တောင်ပတ်လမ်းများသည် အထူးအန္တရာယ်ရှိသည်။ ဤအကွေ့အချို့တွင် ယာဉ်များကို ရှေ့တိုးနောက်ဆုတ်မောင်းနှင်ကြရ၏။ ကားကို ဤသို့မောင်းနှင်နေစဉ် ဘတ်စကားနောက်ခုံတွင်ထိုင်နေသော သာသနာပြုတစ်ဦးသည် ပြတင်းပေါက်မှကြည့်လိုက်ရာ နောက်ဘီးတစ်ဘီးသည်ပေ ၆၀၀ ကျော်နက်သည့် ချောက်ကမ်းပါးအစွန်းနားပေါ်တင်နေသည်ကို သတိပြုမိလိုက်သည်! ရှေ့သို့ ဘတ်စကားမရွေ့မချင်း သူမျက်စိမှိတ်ထားခဲ့၏။
အချို့သောလမ်းသည် ကြမ်းတမ်းပြီး အလွန်ကျဉ်းသည်။ ဤကြမ်းတမ်းသည့်နယ်မြေတွင် ကားအိမ်တစ်စီးကို လမ်းကျဉ်းလေးတစ်ခုအပေါ် မောင်းသွားနေစဉ် ကုန်တင်ကားတစ်စီးနှင့် ထိပ်တိုက်ဆုံမိသည်။ ထိုအခါ ကားနှစ်စီးဖြတ်ကျော်နိုင်သည့် နေရာအထိရောက်အောင် ကားအိမ်ကို တောင်ကုန်းပေါ်တွင် နောက်ဆုတ်ပေးခဲ့ရ၏။
မည်သို့ပင်ဖြစ်ပါစေ၊ ထိုသို့သောမဆုတ်မနစ်ဇွဲကြောင့် ထူးခြားသောရလဒ်များ ရရှိခဲ့၏။ ဤကြိုးစားမှုများအကြောင်း ပိုမိုသိလိုပါသလော။
တိတိကာကာအိုင်ကို “ရေလောင်းခြင်း”
ပင်လယ်ရေမျက်နှာပြင်အထက်ပေ ၁၂,၅၀၀ မြင့်သော အင်ဒီးစ်တောင်တန်းများ၏ ချိုင့်ဝှမ်းတစ်ခုတွင်တည်ရှိသော တိတိကာကာအိုင်သည် ကမ္ဘာပေါ်တွင် အမြင့်ဆုံးကုန်တွင်းပိုင်းကျသောအိုင်ဖြစ်ပြီး ၎င်းတွင် ရေယာဉ်များဖြင့် သွားလာနိုင်သည်။ ပေ ၂၁,၀၀၀ ကျော်မြင့်သော နှင်းဖုံးတောင်ထိပ်အချို့သည် တိတိကာကာအိုင်ကို ရေဖြည့်ပေးသည့် မြစ်ချောင်း ၂၅ ခု၏မြစ်ဖျားဖြစ်သည်။ မြင့်မားမှုကြောင့် ရာသီဥတုအေးချမ်းပြီး ဒေသခံမဟုတ်သူတို့သည် အမြင့်ပေကြောင့် မူးတတ်ကြသည်။
တစ်ချိန်တစ်ခါက ကွီချူဝါနှင့် အိုင်မာရာစကားပြောတတ်
သော ရှေ့ဆောင်တစ်စုသည် တိတိကာကာအိုင်ရှိ အာမာန်တာနီနှင့် တေကီလေကျွန်းများသို့ သွားခဲ့ကြသည်။ သူတို့သည် ခရစ်ယာန်ဘောင်၏မှားယွင်းမှုများကို ပွင့်လင်းစွာဆန်းစစ်ထားသော “ချာ့ခ်ျများကို အနီးကပ်ကြည့်ရှုခြင်း” အမည်ရှိ ဆလိုက်ပုံများကိုပါ ယူဆောင်သွားကြသည်။ ယင်းကို ကောင်းစွာလက်ခံခဲ့သည်။ လူတစ်ဦးသည် ညီအစ်ကိုများကို ဝမ်းမြောက်စွာကြိုဆိုကာ သူတို့နေထိုင်ပြီး ကျမ်းစာသင်ပေးနိုင်ဖို့ သူ့အိမ်ရှိအခန်းကျယ်ကြီးတစ်ခုကိုပေးခဲ့သည်။အာမာန်တာနီတွင်ကျင်းပသော ပထမဦးဆုံးအစည်းအဝေးကိုတက်ရောက်သူ ၁၀၀ ရှိသည်; တေကီလေတွင်ကျင်းပသော အစည်းအဝေးကိုလူ ၁၄၀ တက်ရောက်ခဲ့၏။ ကွီချူဝါဘာသာစကားဖြင့် တင်ဆက်ဟောပြောခဲ့သည်။ ယခင်က ကျွန်းကြီးပေါ်တွင်နေထိုင်ခဲ့ကြသော ဇနီးမောင်နှံတစ်စုံက ဤသို့ပြောခဲ့သည်– “ခင်ဗျားတို့ယေဟောဝါသက်သေတွေ ကျွန်တော်တို့ကို သတိရဖို့အချိန်တန်နေပြီ။ ခင်ဗျားတို့လာပါစေလို့ ကျွန်တော်တို့ဆုတောင်းခဲ့ကြတာ။”
အဆိုပါကျွန်းကြီးနှစ်ကျွန်းအပြင် တိတိကာကာအိုင်တွင် ခန့်မှန်းခြေ “ရေပေါ်” ကျွန်း ၄၀ ရှိရာ အချို့တွင်လည်း သတင်းကောင်းရောက်ရှိခဲ့ပြီ။ ရေပေါ်ကျွန်းများကား အဘယ်နည်း။ ၎င်းတို့သည် ထိုအိုင်၏ရေတိမ်ပိုင်းအချို့တွင်ပေါက်နေသော တိုတိုရတ်စ်ကျူပင်များဖြင့် ပြုလုပ်ထားခြင်းဖြစ်သည်။ တိုတိုရတ်စ်သည် ရေထဲမှပေါက်၍ ရေမျက်နှာပြင်ပေါ်တွင် ထိုးထွက်နေသည်။ ကျွန်းတစ်ကျွန်းဖြစ်ပေါ်လာစေရန် ဒေသခံများသည် ကန်အောက်မြေမျက်နှာပြင်ပေါ် အမြစ်စွဲပေါက်နေသော ကျူပင်များကိုလိမ်ယှက်၍ စင်မြင့်ပမာ ပြုလုပ်လိုက်သည်။ ထို့နောက် ၎င်းစင်မြင့်ကို ရွှံ့နှင့်ဖိသိပ်ကာ ၎င်းအပေါ်တွင် နောက်ထပ်ဖြတ်ထားသောကျူပင်များဖြင့် မြဲမြံခိုင်ခံ့စေသည်။ ယင်းအပေါ်တွင် ကျူတဲများဆောက်လုပ်၍ လူတို့နေထိုင်ကြသည်။
ယေဟောဝါသက်သေများသည် တိတိကာကာအိုင်၏ကျွန်းများပေါ်ရှိ လူတို့ကို ဟောပြောရန် လှေတစ်စင်းဝယ်ထားကြသည်။ ယင်းလှေသည်လူ ၁၆ ဦးကိုသယ်ဆောင်နိုင်၏။ သက်သေခံများသည် ရေပေါ်ကျွန်းများသို့ ကမ်းကပ်ပြီးနောက် ကျူခင်းပေါ်တက်၍ တစ်အိမ်မှတစ်အိမ် ခြေကျင်သွားဟောကြသည်။ ၎င်းကျူခင်းပြင် အနည်းငယ်လှုပ်နေသည်ကို သူတို့ခံစားရကြောင်းပြောပြသည်။ ယင်းသည် လှိုင်းမူးတတ်သူများနေရန် မသင့်ချေ။
အိုင်မာရာဘာသာစကားပြောဆိုသူများမှာမူ ကမ်းခြေတစ်လျှောက်ရှိ ရပ်ကွက်များ၊ ရွာများနှင့် ထိုအိုင်ထဲ ငေါထွက်နေသောကျွန်းဆွယ်များပေါ်တွင် နေထိုင်ကြ၏။ ဤနေရာများသို့ ခြေကျင်ထက် လှေဖြင့်သွားဖို့ ပိုလွယ်ကူသည်။ စုစုပေါင်းလူ ၄၀၀,၀၀၀ ခန့်နေထိုင်သည့် ဤနယ်မြေဒေသသို့ လှေများဖြင့် ဘုရားသခင့်နိုင်ငံတော်သတင်းတရားကို သယ်ယူပို့ဆောင်ပေးနေပါသည်။ ဤလှေများသည် အတန်ကြာ အလုပ်များနေကြပေဦးမည်။
ဝိညာဉ်ရေးဆာလောင်မှုပြေစေခြင်း
ဖလာဗ်ယိုသည် အင်ဒီးစ်တောင်တန်းရှိ ဟူလ်ယာကာအနီး စဲန်တာ လူဆီအာရွာတွင် နေထိုင်သည်။ သူ၏ဧဝံဂေလိချာ့ခ်ျတွင် ငရဲမီးအယူဝါဒကို သွန်သင်ခံခဲ့ရသည်။ သူသည် ဤသို့မီးဖြင့်ထာဝစဉ်အပြစ်ဒဏ် စီရင်ခံရမည်ကို နှစ်ချီ၍ ကြောက်ရွံ့ခဲ့၏။ မေတ္တာရှင်ဘုရားသခင်သည် လူသားများကို မီးထဲ၌ မည်သို့အစဉ်အမြဲညှဉ်းဆဲနိုင်မည်နည်းကို သိလိုခဲ့သည်။ ယေဟောဝါသက်သေများ၏ အချိန်ပြည့်အမှုဆောင်တစ်ဦးဖြစ်သူ တီတိုသည် ထိုရွာသို့ရောက်သောအခါ ဖလာဗ်ယိုထံရောက်သွားသည်။
ဖလာဗ်ယို ဦးဆုံးမေးသောမေးခွန်းအချို့တွင် တစ်ခုက “လူတွေကို ငရဲမီးထဲမှာ ညှဉ်းဆဲမယ်လို့ ခင်ဗျားတို့ရဲ့ဘာသာတရားက သွန်သင်ပေးသလား” ဟူ၍ဖြစ်သည်။ ဤသို့သောအယူအဆကို ဖန်ဆင်းရှင် မနှစ်သက်ချေ၊ ယင်းက မေတ္တာရှင်ဘုရားသခင် ယေဟောဝါ၏နာမတော်ကို ရှုတ်ချရာကျသည်ဟု တီတိုပြန်ဖြေခဲ့၏။ တီတိုသည် ဖလာဗ်ယို၏ဘာသာပြန်ကျမ်းကိုအသုံးပြု၍ သေလွန်သူများသည် အဘယ်အရာကိုမျှမသိ၊ ဘုရားသခင့်နိုင်ငံတော်တွင် မြေကြီးပေါ်ပြန်ရှင်လာဖို့ စောင့်မျှော်နေကြကြောင်း ရှင်းပြခဲ့သည်။ (ဒေ. ၉:၅; ယောဟန် ၅:၁၈၊ ၂၉) ယင်းသည် ဖလာဗ်ယိုကို မျက်စိပွင့်သွားစေသည်။ သူသည် ကျမ်းစာသင်အံမှုကို ချက်ချင်းလက်ခံခဲ့ပြီး မကြာမီပင် နှစ်ခြင်းခံခရစ်ယာန်တစ်ဦးဖြစ်လာခဲ့၏။
ကျေးဇူးတင်လေးမြတ်သောရွာတစ်ရွာ
ယခင်တစ်ခါကမျှ ကျမ်းစာအုပ်ကို မတွေ့ဖူးခဲ့သော ရွာသားများထံ ကျမ်းစာယူသွားပေးရခြင်း၊ ယေဟောဝါသက်သေများအကြောင်းသော်လည်းကောင်း၊ သူတို့ဟောပြောသော သတင်းကောင်းအကြောင်းသော်လည်းကောင်း တစ်ခါမျှမကြားဖူးခဲ့သော ရွာသူရွာသားများအား ဟောပြောရခြင်းသည် မည်မျှပီတိဖြာစရာကောင်းသည်ကို မြင်ယောင်ကြည့်လိုက်ပါ! ၎င်းသည် ပီရူးနိုင်ငံအလယ်ပိုင်းရှိပေ ၁၂,၀၀၀ ကျော်အမြင့်၌တည်ရှိသည့် အီစ်ကူချာကာနှင့် ကိုနစ်ကာရွာများတွင် ဟောပြောခဲ့ကြသော ရှေ့ဆောင်ညီအစ်မသုံးဦး ရိုဆာ၊ အာလစ်ရှာနှင့် စစီးလျားတို့၏ အတွေ့အကြုံဖြစ်သည်။
ပထမရွာသို့ရောက်သောအခါ သူတို့မှာ နေစရာမရှိခဲ့ချေ။ မိမိ
တို့ရောက်လာရခြင်းအကြောင်းရင်းကို ဒေသခံရဲအရာရှိအား သူတို့ပြောပြခဲ့သည်။ ရလဒ်ကားအဘယ်နည်း။ သူတို့ကို ရဲစခန်းတွင် တစ်ညအိပ်ခွင့်ပေးသည်။ နောက်တစ်နေ့တွင် ထိုရှေ့ဆောင်များသည် သူတို့၏လှုပ်ရှားဆောင်ရွက်မှုအတွက် အချက်အချာဖြစ်လာသည့် အတည်တကျနေထိုင်ဖို့ နေရာကို ရှာတွေ့ခဲ့ကြသည်။မကြာမီတွင် နှစ်ပတ်လည်ခရစ်တော်သေခြင်းအောက်မေ့ပွဲအချိန် ရောက်လာသည်။ ထိုရှေ့ဆောင်များသည် အီစ်ကူချာကာရွာမှ အိမ်တိုင်းထံလည်ပတ်ခဲ့ပြီးဖြစ်၍ သမ္မာကျမ်းစာမြောက်မြားစွာကိုဝေငှကာ ကျမ်းစာသင်အံမှုများစွာကို စတင်ကျင်းပခဲ့၏။ အောက်မေ့ပွဲမတိုင်မီ ထိုအထိမ်းအမှတ်ပွဲ၏ရည်ရွယ်ချက်နှင့် အခမ်းအနားတွင်အသုံးပြုမည့် အထိမ်းအမှတ်ပစ္စည်းများ၏အဓိပ္ပာယ်ကို သူတို့ရှင်းပြ၍ ဤပွဲကိုတက်ရောက်ဖို့ ဖိတ်စာများကို သူတို့ဝေငှခဲ့ကြသည်။ ဤအခါသမယတွင်ကူညီပေးရန် ညီအစ်ကိုတစ်စုကို ဖိတ်ခေါ်ထား၍ သူတို့ထဲမှတစ်ဦးက ဟောပြောချက်ပေးခဲ့သည်။ အဆိုပါအထူးပွဲကို ထိုရွာလေးမှလူပေါင်း ၅၀ တက်ရောက်ခဲ့သည်ကိုတွေ့မြင်ရခြင်းသည် တကယ်ကိုရွှင်လန်းစရာပင်! သခင့်ညစာစားပွဲ၏အဓိပ္ပာယ်အမှန်ကို သူတို့ ပထမဦးဆုံးအကြိမ် သဘောပေါက်နားလည်ခဲ့ကြရသည်။ ထို့ပြင် သူတို့လက်ဝယ်သမ္မာကျမ်းစာရရှိခြင်းကို အလွန်တန်ဖိုးထားခဲ့ကြသည်!
လေးလံသောဝန်များမှ လွတ်မြောက်လာ
ဗာဗုလုန်ဘာသာရေးသုံ့ပန်းများထံ လန်းဆန်းစေသောကျမ်းစာအမှန်တရားရေ ယူသွားပေးရခြင်းသည် အစဉ်အမြဲရွှင်လန်းစရာဖြစ်၏။ ပီဆက်သည် ရှေးအင်ကာအင်ပါယာ၏ ရဲတိုက်တစ်ခုဖြစ်သည်။ ယနေ့ ထိုတွင်နေထိုင်ကြသူအများစုသည် ကျမ်းစာနှင့်မညီသော ငရဲမီးသွန်သင်ချက်ကို သွန်သင်ပေးခံရသူများဖြစ်ကြသည်။ သူတို့၏ခရစ်ယာန်ဓမ္မဆရာများက သူတို့အတွက် အသနားခံတောင်းလျှောက်ပေးမှသာ သူတို့ကောင်းကင်သို့သွားနိုင်မည်ဟု ပြောထားသည်။
ယင်းကြောင့် ဤလူများသည် လန်းဆန်းစေသော ကျမ်းစာအမှန်တရားရေ ငတ်မွတ်နေကြသည်ကို နားလည်နိုင်ပါသည်။ တစ်အိမ်မှတစ်အိမ် ဟောပြောနေစဉ် ယေဟောဝါသက်သေများ၏ အချိန်ပြည့်အမှုဆောင်တစ်ဦးဖြစ်သူ ဆာန်တီဂိုသည် ဖြောင့်မတ်သောသူတို့သည် မြေကြီးပရဒိသုတွင်နေထိုင်ကြရမည်ဖြစ်ကြောင်း လူတစ်ဦးအား ရှင်းပြခွင့်ရခဲ့၏။ (ဆာလံ ၃၇:၁၁) လူသေများသည် ရှင်ပြန်ထမြောက်လာမည်၊ လူသားများ ထာဝရအသက်ကိုရည်မျှော်လျက် ယေဟောဝါ၏စုံလင်သောနည်းလမ်းတော်များကို သွန်သင်ခံရလိမ့်မည်ဖြစ်ကြောင်း သမ္မာကျမ်းစာမှ ဆာန်တီဂိုဖော်ပြခဲ့သည်။ (ဟေရှာယ ၁၁:၉) ယင်းအချိန်အထိ ထိုသူသည် ဘာသာတရားကိုင်းရှိုင်းသော . . . တစ်ဦးဖြစ်ပြီး နတ်ဝိဇ္ဇာအတတ်လိုက်စား၍ သောက်ကြူးတတ်သူဖြစ်သည်။ ယခု သူ့မှာ ကျမ်းစာအခြေပြုမျှော်လင့်ချက်တစ်ခုရှိ၍ ပရဒိသု၌အသက်ရှင်ရန် ဘဝပန်းတိုင်ရှိနေပြီ။ သူသည် သူ၏နတ်ဝိဇ္ဇာအတတ်နှင့်ဆိုင်သော ပစ္စည်းရှိသမျှကို မီးရှို့ပစ်၍ သောက်စားပျော်ပါးခြင်းကို စွန့်လွှတ်ခဲ့၏။ မိသားစုကိုစုဝေးစေပြီးနောက် ကျမ်းစာသင်အံမှုကို သူလက်ခံခဲ့သည်။ အချိန်တန်သော် ထိုမိသားစုတစ်စုလုံးသည် ယေဟောဝါဘုရားသခင်ထံ ဆက်ကပ်အပ်နှံ နှစ်ခြင်းခံခဲ့ကြသည်။
လှိုက်လှိုက်လှဲလှဲဧည့်ခံကြိုဆို
တောင်ပေါ်သားများသည် ဧည့်ဝတ်အလွန်ကျေပွန်သူများဖြစ်ကြသည်။ သူတို့အိမ်များသည် တော်ရုံသင့်ရုံမျှဖြစ်ပြီး ဆင်းရဲကြသော်လည်း မိမိမှာရှိရာကို ဧည့်သည်များအား ကျွေးမွေးလေ့ရှိသည်။ ကျမ်းစာ၏မြင့်မားသောစံနှုန်းများကို မသင်ယူမီက ဧည့်သည်များနှင့် စကားစမြည်ပြောဆိုနေကြစဉ် တမြုံ့မြုံ့ဝါးစားရန် ကိုကာရွက်များကို အိမ်ရှင်ပေးပေမည်။ သို့သော် သက်သေခံဖြစ်လာသောအခါ သူသည် ထိုသီးခြားနယ်မြေများ၌ ကိုကာနှင့်တန်ဖိုးထပ်တူရှိသော သကြားတစ်ဇွန်းကိုပေးပေမည်။
ညီအစ်ကိုတစ်ဦးသည် မိမိနှင့်အတူ ပြန်လည်ပတ်မှုလိုက်ရန် သာသနာပြုတစ်ဦးကို ဖိတ်ခေါ်ခဲ့သည်။ မတ်စောက်သောတောင်လမ်းကို ခဲယဉ်းစွာတက်ပြီးနောက် မိမိတို့ရောက်ရှိကြောင်း အိမ်ရှင်ကို သူတို့လက်ခုပ်တီး၍ အသိပေးခဲ့သည်။ သက်ငယ်မိုးထားသောအိမ်ထဲ သူတို့ဖိတ်ခေါ်ခံရရာ တံခါးပေါက်နိမ့်နိမ့်မှ ခေါင်းငုံ့ဝင်ခဲ့ကြသည်။ မြေကြီးကြမ်းပြင်အလယ်ကို သူတို့သတိထား၍လျှောက်သွားကြရ၏၊ ထိုတွင် မိခင်က တွင်းတူး၍ မိမိကလေးငယ်ကိုစောင်ပတ်ပြီး ထည့်ထားသည်။ လူကြီးများစကားပြောနေကြစဉ် မထွက်လာနိုင်သောဤကလေးငယ်သည် ပျော်ရွှင်မြူးထူးနေသည်။ သူတို့သည် ဘုရားသခင့်နိုင်ငံတော်ကောင်းချီးများအကြောင်း အပြန်အလှန်ဆွေးနွေးပြီးနောက် ထိုအမျိုးသမီးသည် ဒေသခံဖျော်ရည်ဘူးရှည်တစ်ခုဖြင့် ဧည့်ခံခဲ့သည်။ မကြာမီ ထိုညီအစ်ကိုများသည် နောက်ထပ်လည်ပတ်မှုများထံသွားရန် တောင်စောင်းသို့ ဆင်းသွားကြ၏။
ပေါများစွာရိတ်သိမ်းခြင်း
ယခု ဤဒေသတွင် ယေဟောဝါသက်သေများနှင့် ကျမ်းစာလေ့လာနေသူတစ်ထောင်ကျော်နှင့်အတူ သီးခြားအုပ်စုတစ်ရာခန့်ရှိနေပြီ။ ယင်းအုပ်စုများကို အသင်းတော်များဖြစ်လာစေရန် လီမာမြို့မှ ခရစ်ယာန်ဓမ္မအမှုထမ်းကျောင်းဆင်းများကို စေလွှတ်ထားသည်။ အချိန်အတန်ကြာ [ဗာဗုလုန်]ဘာသာတရားနှင့် အယူသီးမှုများ၏ သုံ့ပန်းများဖြစ်ခဲ့ကြသော စိတ်နှလုံးရိုးဖြောင့်သူများသည် ဘုရားသခင့်နိုင်ငံတော်သတင်းကောင်းကြောင့် လွတ်လပ်မှုရရှိခဲ့ကြလေပြီ! (ယောဟန် ၈:၃၂) သူတို့၏အမှန်တရားရေဆာလောင်မှု ပြေပျောက်လျက်ရှိနေပေပြီ။
[စာမျက်နှာ ၁၀ ပါ ရုပ်ပုံ]
တိတိကာကာအိုင်၏ “ရေပေါ်” ကျွန်းများတွင် သက်သေခံခြင်း