စာရှုသူများထံမှမေးခွန်းလွှာ
စာရှုသူများထံမှမေးခွန်းလွှာ
ဧဒင်ဥယျာဉ်တွင် မြွေသည် ကောင်းမကောင်းသိကျွမ်းရာအပင်နှင့်ပတ်သက်သော ဘုရားသခင့်ပညတ်ကိုချိုးဖောက်ရန် ဧဝအား မည်သည့်နည်းဖြင့်သိရှိစေခဲ့သနည်း။
ကမ္ဘာဦး ၃:၁ ကဤသို့ဆိုသည်– “မြွေသည် ထာဝရအရှင်ဘုရားသခင်ဖန်ဆင်းတော်မူသော မြေတိရစ္ဆာန်တကာတို့ထက် လိမ္မာသည်ဖြစ်၍ မိန်းမအား သင်တို့သည် ဥယျာဉ်၌ရှိသမျှသော အပင်တို့၏အသီးကိုမစားရဟု ဧကန်စင်စစ် ဘုရားသခင်မိန့်တော်မူသလောဟုမေး၏။” မြွေသည် ဧဝနှင့်မည်သို့ဆက်သွယ်ခဲ့မည့်အကြောင်း အဆိုပြုချက်အမျိုးမျိုးရှိ၏။ ယူဆချက်တစ်ခုမှာ အမူအရာပြစကား သို့မဟုတ် ကိုယ်ဟန်အမူအရာအားဖြင့် ဆက်သွယ်ခဲ့သည်ဟုဆိုသည်။ ဥပမာ၊ အင်္ဂလိပ်ခရစ်ယာန်ဘုန်းကြီး ဂျိုးဇက် ဘင်ဆင်က ဤသို့ဝေဖန်ခဲ့သည်– “အရိပ်လက္ခဏာတစ်မျိုးမျိုးဖြင့် ဖြစ်ဖွယ်ရှိသည်။ ထိုအချိန်က မြွေ၏ထူးခြားသောဂုဏ်သတ္တိတွင် စဉ်းစားဆင်ခြင်နိုင်စွမ်းနှင့် စကားပြောနိုင်စွမ်းတို့ပါဝင်သည်ဟု အချို့ကမှတ်ယူခဲ့ကြသည်၊ . . . သို့သော် သက်သေအထောက်အထားမရှိချေ။”
သို့ရာတွင် မြွေသည် အမူအရာပြခြင်းဖြင့်သာ တားမြစ်ထားသောအသီးကိုစားလျှင် ဘုရားသခင်ကဲ့သို့ အကောင်းအဆိုးကိုဆုံးဖြတ်နိုင်မည်ဟု ဧဝအား မည်သို့သိစေနိုင်မည်နည်း။ ထို့ပြင် ဧဝသည် မြွေမေးခဲ့သောမေးခွန်းကို ဖြေဆို၍ အပြန်အလှန်စကားပြောခဲ့သည်။ (ကမ္ဘာဦး ၃:၂-၅) မြွေသည် အရိပ်အခြည် သို့မဟုတ် အမူအရာပြစကားဖြင့်သာ ဆက်သွယ်ခဲ့သည်ဟူသော ယူဆချက်က ဧဝသည် ကိုယ်ဟန်အမူအရာဖြင့် ပြန်ဖြေဆိုသည်ဟု ကောက်ချက်ချစေမည်၊ သို့သော် သမ္မာကျမ်းစာက သူစကားပြောသည်ဟုဆိုသည်။
ထိုဖြစ်ရပ်ကိုရည်ညွှန်းကာ တမန်တော်ပေါလုက ခရစ်ယာန်ချင်းများအား ဤသို့သတိပေးခဲ့သည်– “မြွေသည် မိမိပရိယာယ်အားဖြင့် ဧဝကိုလှည့်စားသကဲ့သို့၊ သင်တို့သည် စိတ်ဆွေးမြေ့ယိုယွင်း . . . မည်ဟု စိုးရိမ်ခြင်းရှိ၏။” ပေါလုပြောသောအန္တရာယ်သည် ‘အယူမှားတမန်များ၊ လှည့်ဖြားတတ်သောအမှုဆောင်များ’ ထံမှလာသည်။ ဤ “အထူးမြင့်မြတ်သောတမန်များ” ၏ခြိမ်းခြောက်မှုသည် အမူအရာပြစကား၊ ကိုယ်ဟန်အမူအရာများအားဖြင့်သာမဟုတ်ချေ။ သူတို့၏အပြောအဆို၊ အခြားသူများကို လှည့်ဖြားရန် ပါးနပ်လိမ္မာစွာပြောသောစကားများ ပါဝင်ခဲ့သည်။—၂ ကောရိန္သု ၁၁:၃-၅၊ ၁၃။
ဧဒင်ဥယျာဉ်တွင် ဧဝအားလှည့်ဖြားရန် စကားပြောနိုင်စွမ်းကို အသုံးပြုခဲ့သော်လည်း ပကတိမြွေတွင် အသံကြိုးများရှိသည်ဟု ထင်မှတ်စရာအကြောင်းမရှိချေ။ ၎င်းကို မြွေမလိုအပ်ပေ။ ဘုရားသခင့်ကောင်းကင်တမန်သည် မြည်းမှတစ်ဆင့် ဗာလမ်အားစကားပြောဆိုသောအခါ ထိုတိရစ္ဆာန်မှာ လူတစ်ဦးကဲ့သို့ ရှုပ်ထွေးသောအသံအိုးရှိစရာ မလိုအပ်ခဲ့ချေ။ (တောလည်ရာ ၂၂:၂၆-၃၁) ထင်ရှားသည်မှာ ‘စကားမပြောနိုင်သောမြည်းသည် လူ့အသံဖြင့်မြွက်ဆို’ သောအခါ . . . ဝိညာဉ်ဘုံမှတန်ခိုးဖြင့် ထိုသို့ပြောဆိုနိုင်ခဲ့ခြင်းဖြစ်သည်။—၂ ပေတရု ၂:၁၆။
ဧဝအားစကားပြောခဲ့သည့် မြွေ၏နောက်ကွယ်ရှိ . . . ဝိညာဉ်သတ္တဝါကို “စာတန်အမည်ရှိသော ရှေးမြွေဟောင်း” ဟုသမ္မာကျမ်းစာက ဖော်ပြထားသည်။ (ဗျာဒိတ် ၁၂:၉) ဧဝကြား၍ တုံ့ပြန်ခဲ့သည့် စကားများမှာ “လင်းသောကောင်းကင်တမန် ဖြစ်ယောင်ဆောင်တတ်” သူစာတန်၏ လှုံ့ဆော်ပေးမှုဖြင့်ဖြစ်သည်။—၂ ကောရိန္သု ၁၁:၁၄။
[စာမျက်နှာ ၂၇ ပါ ရုပ်ပုံ]
“ကောင်းမကောင်းကိုသိ၍ ဘုရားသခင်ကဲ့သို့ဖြစ်ကြလတ္တံ့”