နောဧ၏ယုံကြည်ခြင်းသည် လောကကို ပြစ်တင်ရှုတ်ချ
နောဧ၏ယုံကြည်ခြင်းသည် လောကကို ပြစ်တင်ရှုတ်ချ
ကမ္ဘာချီရေလွှမ်းမိုးချိန်အတွင်း အသက်ရှင်ကျန်ရစ်ရန် သင်္ဘောဆောက်ခဲ့သော ဘုရားသခင်ကိုကြောက်ရွံ့သူ နောဧအကြောင်း သင်ကြားဖူးသလော။ နှစ်ပေါင်းများစွာကြာခဲ့ပြီဖြစ်သော်လည်း ဤဖြစ်ရပ်ကို သန်းနှင့်ချီသောသူတို့ အကျွမ်းတဝင်ရှိကြသည်။ သို့သော် နောဧ၏ဘဝအသက်တာသည် ကျွန်ုပ်တို့အားလုံးအတွက် အဓိပ္ပာယ်ရှိကြောင်း လူအများ သဘောမပေါက်ကြချေ။
နှစ်ပေါင်းထောင်နှင့်ချီကြာပြီဖြစ်သော ဇာတ်လမ်းတစ်ပုဒ်ကို အဘယ်ကြောင့် ကျွန်ုပ်တို့စိတ်ဝင်စားသင့်သနည်း။ နောဧ၏အခြေအနေနှင့် ကျွန်ုပ်တို့အခြေအနေစပ်ကြား တူညီချက်တစ်ခုရှိပါသလော။ ရှိမည်ဆိုလျှင် သူ၏ပုံသက်သေမှ ကျွန်ုပ်တို့ မည်သို့အကျိုးရယူနိုင်သနည်း။
နောဧခေတ်မှလောက
ဘီ.စီ.အီး. ၂၉၇၀ ပြည့်နှစ်—အာဒံသေပြီးနောက် ၁၂၆ နှစ်—တွင် နောဧမွေးဖွားခဲ့သည်ဟု ကျမ်းစာသက္ကရာဇ်စဉ်ဖြစ်ရပ်က ဖော်ပြသည်။ နောဧခေတ်တိုင်လေသော် မြေကြီးသည် အကြမ်းဖက်မှုနှင့်ပြည့်နှက်နေပြီး အာဒံ၏သားစဉ်မြေးဆက်အများစုသည် သူတို့ဘိုးဘေး၏ အာခံသောပုံသက်သေကို လိုက်လျှောက်ရန် ရွေးချယ်ခဲ့ကြသည်။ သို့ဖြစ်၍ “မြေကြီးပေါ်မှာ လူအပြစ်ကြီး၍ သူ၏စိတ်နှလုံးအကြံအစည်ရှိသမျှတို့သည် အစဉ်မပြတ်ဆိုးညစ်ခြင်းသက်သက်ရှိကြောင်းကို ဘုရားသခင်သိမြင်တော်မူ” လေသည်။—ကမ္ဘာဦး ၆:၅၊ ၁၁၊ ၁၂။
လူ့ပုန်ကန်မှုသည် ယေဟောဝါအမျက်ထွက်စရာ အကြောင်းတစ်ခုတည်းသာမဟုတ်ချေ။ ကမ္ဘာဦးမှတ်တမ်းက ဤသို့ရှင်းပြသည်– “ဘုရားသခင်၏သားတို့သည် လူသမီးတို့လှကြောင်းကိုမြင်၍ ကိုယ်စိတ်ရှိသည်အတိုင်း စုံဖက်ကြ၏။ . . . ထိုကာလ၌ မြေကြီးပေါ်မှာ ကိုယ်ကြီးမားသောသူအချို့ရှိကြ၏။ ထိုနောက်၌လည်း ဘုရားသခင်၏သားတို့သည် လူသမီးတို့နှင့်ဆက်ဆံ၍ရသောသားတို့သည် အားကြီးသောသူ၊ ရှေးကာလမှစ၍ ကျော်စောသောသူဖြစ်ကြ၏။” (ကမ္ဘာဦး ၆:၂-၄) ဤအခန်းငယ်များနှင့် တမန်တော်ပေတရု မှတ်တမ်းတင်ခဲ့သောစကားကို နှိုင်းယှဉ်ကြည့်သော် “ဘုရားသခင်၏သားတို့” သည်နာခံမှုမရှိသောကောင်းကင်တမန်များဖြစ်ကြကြောင်း ထင်ရှားသည်။ လူ့သမီးများနှင့် လူ့အသွင်ဆောင်ကောင်းကင်တမန်များ၏ တရားမဝင်ပေါင်းဖက်မှုများမှ နက်ဖလင်များဖြစ်ပေါ်လာသည်။—၁ ပေတရု ၃:၁၉၊ ၂၀။
“လဲကျစေသူများ” ဟူ၍အဓိပ္ပာယ်ရှိသော “နက်ဖလင်” သည်အခြားသူများအား လဲစေသူများဟု အဓိပ္ပာယ်ရသည်။ သူတို့သည် နိုင်ထက်ကလူပြုသူများဖြစ်ကြပြီး သူတို့၏ရမ္မက်ကြီးသောဖခင်များ၏အပြစ်ကို သောဒုံနှင့်ဂေါမောရမြို့များ၏အကျင့်ပျက်မှုများနှင့် ခိုင်းနှိုင်းထားသည်။ (ယုဒ ၆၊ ၇) သူတို့သည် ပူးပေါင်းပြီး မြေကြီးပေါ်တွင် မခံမရပ်နိုင်သည့်ဆိုးသွမ်းမှုများကို ဖြစ်ပေါ်စေခဲ့ကြသည်။
“မိမိအမျိုး၌ စုံလင်သူဖြစ်”
လူသားများကို ဖျက်ဆီးပစ်ဖို့ ဘုရားသခင်သန္နိဋ္ဌာန်ချရသည့်အထိ မကောင်းမှုများ အလွန်ထူပြောလာခဲ့၏။ သို့သော် မှုတ်သွင်းခံမှတ်တမ်းက ဤသို့ဖော်ပြသည်– “နောဧမူကား ထာဝရဘုရားစိတ်တော်နှင့်တွေ့သောသူဖြစ်သတည်း။ . . . နောဧသည် ဖြောင့်မတ်သောသူ၊ မိမိအမျိုး၌စုံလင်သောသူဖြစ်၏။ ဘုရားသခင်နှင့်အတူသွားလာ၏။” (ကမ္ဘာဦး ၆:၈၊ ၉) ဖျက်ဆီးထိုက်သော ဘုရားတရားမဲ့လောကတွင် “ဘုရားသခင်နှင့်အတူသွားလာ” ခြင်းသည် မည်သို့ဖြစ်နိုင်မည်နည်း။
တည်ကြည်ပြီး အာဒံနှင့်တစ်ခေတ်တည်းသားဖြစ်ခဲ့သူ မိမိ၏ဖခင် လာမက်ထံမှ နောဧများစွာသင်ယူခဲ့မည်မှာ သေချာသည်။ လာမက်သည် မိမိ၏သားကို (“ရပ်နားခြင်း” သို့မဟုတ် “နှစ်သိမ့်ခြင်း” ဟုအဓိပ္ပာယ်ရသည့်) နောဧဟူသောအမည်ကိုပေးသောအခါ သူဤသို့ပရောဖက်ပြုခဲ့သည်– “ဤသူသည်ကား ထာဝရဘုရားကျိန်တော်မူသောမြေ၌လုပ်၍ ပင်ပန်းစွာခံရသောငါတို့အား သက်သာစေသောသူဖြစ်လိမ့်မည်။” ဘုရားသခင်သည် မြေကြီးပေါ်မှ မိမိ၏ကျိန်ဆိုခြင်းကို ပယ်ဖျက်သောအခါ ထိုပရောဖက်ပြုချက် ပြည့်စုံခဲ့၏။—ကမ္ဘာဦး ၅:၂၉; ၈:၂၁။
ဘုရားသခင်ကိုကြောက်ရွံ့သောမိဘများရှိခြင်းသည် ဝိညာဉ်ရေးကောင်းမွန်မည်ဟု အာမခံချက်မရှိသောကြောင့် လူတိုင်းသည် ယေဟောဝါနှင့် မိမိ၏ကိုယ်ပိုင်ဆက်ဆံရေးကို တည်ထောင်ရမည်ဖြစ်သည်။ နောဧသည် ဘုရားသခင် နှစ်သက်လက်ခံသည့်လမ်းစဉ်ကို လိုက်ခြင်းအားဖြင့် “ဘုရားသခင်နှင့်အတူသွားလာ” ခဲ့၏။ ဘုရားသခင်အကြောင်း နောဧသိရှိခဲ့ရာသည် ကိုယ်တော်၏အမှုတော်ကို ထမ်းဆောင်ရန် သူ့ကိုလှုံ့ဆော်ပေးခဲ့သည်။ ‘သတ္တဝါအပေါင်းကို ရေလွှမ်းမိုးဖျက်ဆီး’ မည့်ဘုရားသခင်၏ရည်ရွယ်ချက်ကို နောဧသိရှိသောအခါ သူ၏ယုံကြည်ခြင်းသည် မယိမ်းယိုင်ခဲ့ချေ။—ကမ္ဘာဦး ၆:၁၃၊ ၁၇။
မဖြစ်စဖူးသောဤပျက်စီးခြင်းဘေး ဖြစ်လာမည်ကို ယုံကြည်စိတ်ချကာ နောဧသည် ယေဟောဝါ၏ဤအမိန့်တော်ကို နာခံခဲ့သည်– “ဂေါဖရသစ်သားဖြင့် သင်္ဘောကို ကိုယ်ဖို့တည်လုပ်လော့။ အထဲ၌လည်း အခန်းများကိုလုပ်လော့။ အတွင်း၊ ပြင်၊ ပတ်လည်ကို ထင်းရှူးစေးနှင့်သုတ်လော့။” (ကမ္ဘာဦး ၆:၁၄) သင်္ဘောဆောက်လုပ်ရန် ဘုရားသခင်ပေးသော အသေးစိတ်စာရင်းနှင့်အညီ ပြုလုပ်ရခြင်းသည် သေးသေးသောသောတာဝန်တစ်ခုမဟုတ်ချေ။ မည်သို့ပင်ဖြစ်ပါစေ၊ “ဘုရားသခင်မိန့်မှာတော်မူသမျှအတိုင်း နောဧပြုလေ၏။” မှန်ပါသည်၊ ‘ထိုအတိုင်း သူပြုလေ၏။’ (ကမ္ဘာဦး ၆:၂၂၊ သမ) နောဧသည် သူ၏ဇနီး၊ သားများဖြစ်ကြသော ရှေမ၊ ဟာမ၊ ယာဖက်နှင့် သူတို့၏ဇနီးများ၏ အကူအညီဖြင့် ယင်းကိုပြုလုပ်ခဲ့သည်။ ဤသို့သောယုံကြည်ခြင်းကို ယေဟောဝါကောင်းချီးပေးခဲ့သည်။ မျက်မှောက်ခေတ်ရှိ မိသားစုများအတွက် အလွန်ကောင်းသောပုံသက်သေများပါတကား!
သင်္ဘောဆောက်လုပ်ခြင်းတွင် အဘယ်အရာများပါဝင်မည်နည်း။ အလျား ၄၃၇ ပေ၊ အနံ ၇၃ ပေ၊ အမြင့် ၄၄ ပေရှိပြီး အထပ်သုံးထပ်ပါသည့် ဧရာမရေလုံသစ်သားသေတ္တာတစ်လုံးကို တည်ဆောက်ရန် နောဧအား ယေဟောဝါညွှန်ကြားခဲ့သည်။ (ကမ္ဘာဦး ၆:၁၅၊ ၁၆) ဤသို့သောသင်္ဘောတစ်စင်းသည် မျက်မှောက်ခေတ်ကုန်စည်သင်္ဘောများ၏ အကျယ်အဝန်းနှင့် ထပ်တူထပ်မျှရှိပေမည်။
အလွန်ကြီးမားသောတာဝန်တစ်ရပ်ပါတကား! ထောင်နှင့်ချီသစ်ပင်များကို ခုတ်လှဲပြီး ဆောက်လုပ်မည့်နေရာသို့ ပို့ဆောင်ကြရမည်ဖြစ်၍ ပျဉ်ချပ်များ သို့မဟုတ် ရက်မများအဖြစ် ဖြတ်ကြရပေမည်။ ငြမ်းဆောက်၊ ချိတ်များ သို့မဟုတ် ငုတ်များကိုပြုလုပ်ပြီး ရေလုံစေရန် ကတ္တရားစေးရှိရမည်၊ ထည့်စရာသေတ္တာများနှင့် ကိရိယာတန်ဆာပလာများ အစရှိသည်တို့ကို ရှာဖွေစုဆောင်းကြရမည်။ ဤလုပ်ငန်းတွင် ကုန်သည်များနှင့်ဆွေးနွေးညှိနှိုင်းကြရပြီး ကုန်ပစ္စည်းများနှင့်ဝန်ဆောင်ခများ ပေးချေရခြင်းတို့ လိုအပ်ခဲ့ပေမည်။ သစ်သားရက်မများကို အတိအကျတပ်ဆင်ရန်နှင့် အဆင့်မီခိုင်ခံ့သောကိုယ်ထည် ဆောက်လုပ်ရန် လက်သမားအတတ်ပညာ၌ ကျွမ်းကျင်မှုလိုအပ်မည်မှာ ထင်ရှားပါသည်။ ထိုဆောက်လုပ်ရေးသည် အနှစ် ၅၀ သို့မဟုတ် ၆၀ ခန့်ကြာရှည်နိုင်မည်ကိုလည်း စဉ်းစားကြည့်ပါ!
ကမ္ဘာဦး ၆:၁၂) သင်္ဘောထဲသွင်းရန် တိရစ္ဆာန်အုပ်ကို စုဝေးပြီး နေရာတကျချထားရပေမည်။ ဘုရားသခင်မှာသည့်အတိုင်း နောဧဆောင်ရွက်၍ လုပ်ငန်းပြီးဆုံးသွားလေ၏။ (ကမ္ဘာဦး ၆:၂၂) ၎င်း၏ပြီးမြောက်အောင်မြင်မှုမှာ ယေဟောဝါ၏ကောင်းချီးကြောင့်သာဖြစ်ကြောင်း သေချာပါသည်။
ထို့နောက် လူနှင့်တိရစ္ဆာန်များ စားစရာအစာ အလုံအလောက်ရှိရန် ကြိုတင်စီစဉ်ဖို့ နောဧအာရုံစိုက်ရတော့မည်။ (“ဖြောင့်မတ်ခြင်းတရားကိုဟော” သူ
နောဧသည် သင်္ဘောဆောက်လုပ်သည့်အပြင် သတိပေးခဲ့ရာ “ဖြောင့်မတ်ခြင်းတရားကိုဟော” သူအဖြစ် ဘုရားသခင်၏အမှုတော်ကို တည်ကြည်စွာဆောင်ရွက်ခဲ့သည်။ သို့သော် လူတို့သည် “ရေလွှမ်းမိုးခြင်းရောက်သဖြင့် လူခပ်သိမ်းတို့ကို သုတ်သင်ပယ်ရှင်းသည့်တိုင်အောင် သတိမဲ့နေကြသည်။”—၂ ပေတရု ၂:၅; မဿဲ ၂၄:၃၈၊ ၃၉။
ထိုခေတ်အခါ၏ ဝိညာဉ်ရေးနှင့် ကိုယ်ကျင့်တရားမရှိသည့် အခြေအနေကို စဉ်းစားကြည့်လျှင် နောဧ၏မိသားစုသည် မယုံနိုင်သူအိမ်နီးချင်းများ၏ ဟားတိုက်စရာနှင့် ဆဲရေးပြက်ရယ်ပြုစရာ ဖြစ်ခဲ့မည်ကို သဘောပေါက်ရန် လွယ်ကူသည်။ သူတို့ကို ရူးသွပ်နေပြီဟု လူတို့ထင်မှတ်ခဲ့ကြပေမည်။ သို့သော် နောဧသည် သူ၏အိမ်သူအိမ်သားများကို ဝိညာဉ်ရေးအားပေးမှု၊ ထောက်ပံ့ကူညီမှုပေးရာ၌ အောင်မြင်ခဲ့၏၊ အကြောင်းမှာ သူတို့သည် ၎င်းတို့၏ဘုရားတရားမဲ့ တစ်ခေတ်တည်းသားများ၏ အကြမ်းဖက်သော၊ အကျင့်ပျက်သော၊ ပုန်ကန်သောလမ်းစဉ်များကို ဘယ်သောခါမျှ မလိုက်လျှောက်ခဲ့ကြသောကြောင့်ဖြစ်သည်။ အပြောရော၊ အလုပ်နှင့်ပါ ယုံကြည်ခြင်းကိုတင်ပြခဲ့သည့် နောဧသည် ထိုခေတ်ရှိလောကကို ပြစ်တင်ရှုတ်ချခဲ့သည်။—ဟေဗြဲ ၁၁:၇။
ရေလွှမ်းမိုးခြင်းတစ်လျှောက် ကာကွယ်ခံခဲ့ရ
မိုးမရွာမီလေးတွင် ဘုရားသခင်သည် ဆောက်လုပ်ပြီးစီးသွားသောသင်္ဘောထဲသို့ဝင်ဖို့ နောဧကိုမှာတော်မူသည်။ နောဧ၏မိသားစုနှင့် တိရစ္ဆာန်များသည် သင်္ဘောပေါ်ရောက်သွားသောအခါ “ထာဝရဘုရားသည် သင်္ဘောကိုပိတ်” လိုက်ရာ ကဲ့ရဲ့ပြောင်လှောင်မှုများ မကြားရတော့ပေ။ ရေလွှမ်းမိုးသောအခါ နာခံမှုမရှိသောကောင်းကင်တမန်များသည် လူ့ခန္ဓာကိုစွန့်လိုက်ကြရာ ဖျက်ဆီးခြင်းဘေးမှ လွတ်မြောက်ခဲ့ပုံရှိသည်။ သို့သော် အခြားသူများကော အသို့နည်း။ နက်ဖလင်အပါအဝင် သင်္ဘောအပြင်ဘက်ရှိ ကုန်းပေါ်မှ သက်ရှိသတ္တဝါခပ်သိမ်းသည် သေကျေပျက်စီးခဲ့သည်! နောဧနှင့် သူ၏မိသားစုသာ ကပ်ကျော်ခဲ့သည်။—ကမ္ဘာဦး ၇:၁-၂၃၊ သမ။
နောဧနှင့် သူ၏အိမ်သူအိမ်သားများသည် သင်္ဘောပေါ်တွင် တစ်နှစ်နှင့်ဆယ်ရက်ကြာခဲ့၏။ သူတို့သည် တိရစ္ဆာန်များကို အစာရေစာတိုက်ကျွေးခြင်း၊ မစင်များကိုဖယ်ရှားပေးခြင်းနှင့် ရက်တွက်ခြင်းတို့ဖြင့် အလုပ်များနေခဲ့ကြသည်။ ကမ္ဘာဦးကျမ်းသည် သင်္ဘောခရီးသွားမှတ်တမ်းကဲ့သို့ ရေလွှမ်းမိုးခြင်းဖြစ်စဉ်အားလုံးကို အတိအကျရက်စွဲတပ်ဖော်ပြထားရာ ထိုမှတ်တမ်း၏တိကျမှုကို ပေါ်လွင်စေသည်။—ကမ္ဘာဦး ၇:၁၁၊ ၁၇၊ ၂၄; ၈:၃-၁၄။
သင်္ဘောထဲရှိကြစဉ် နောဧသည် မိသားစုလိုက် ဝိညာဉ်ရေးဆွေးနွေးခြင်းများနှင့် ဘုရားသခင်အား ကျေးဇူးတင်ချီးမွမ်းခြင်းများပြုရာတွင် ဦးဆောင်ခဲ့သည်မှာ သံသယဖြစ်ဖွယ်မရှိချေ။ နောဧနှင့် သူ၏မိသားစုအားဖြင့် ရေလွှမ်းမိုးဘေးမတိုင်မီ သမိုင်းကို ထိန်းသိမ်းခဲ့သည်မှာ ထင်ရှားပါသည်။ ယုံကြည်စိတ်ချရသော နှုတ်တိုက်ထုံးတမ်းစဉ်လာများ သို့မဟုတ် သူတို့လက်ထဲရှိ ရေးသားထားနှင့်ပြီးသား သမိုင်းဝင်မှတ်တမ်းများသည် ရေလွှမ်းမိုးချိန်အတွင်း သူတို့ အကျိုးရှိရှိဆင်ခြင်သုံးသပ်စရာ အချက်အလက်ကောင်းဖြစ်ပေလိမ့်မည်။
နောဧနှင့် သူ၏မိသားစုသည် ကုန်းမြေပေါ်သို့ တစ်ဖန်ပြန်၍ခြေချရသည့်အခါ မည်မျှဝမ်းသာလိုက်မည်ဖြစ်ခြင်း! သူဦးဆုံးပြုလုပ်သည့်အရာမှာ ယဇ်ပလ္လင်တည်ဆောက်၍ သူ၏မိသားစုအတွက် ယဇ်ပုရောဟိတ်အနေနှင့် မိမိတို့ကိုကယ်တင်တော်မူခဲ့သောအရှင်အား ယဇ်ပူဇော်ခြင်းဖြစ်သည်။—ကမ္ဘာဦး ၈:၁၈-၂၀။
“နောဧလက်ထက်၌ဖြစ်သကဲ့သို့”
“လူသားကြွလာသောအခါ နောဧလက်ထက်၌ဖြစ်သကဲ့သို့ ဖြစ်လိမ့်မည်” ဟုယေရှုခရစ်မိန့်ဆိုခဲ့သည်။ (မဿဲ ၂၄:၃၇) ယနေ့ ခရစ်ယာန်များသည်လည်း ဖြောင့်မတ်ခြင်းတရားကို ဟောပြောသူများဖြစ်ကြပြီး လူတို့ကို နောင်တယူကြရန် တိုက်တွန်းလျက်ရှိသည်။ (၂ ပေတရု ၃:၅-၉) ထိုဆင်တူမှုကို အခိုင်အမာဆိုထားရာ ရေလွှမ်းမိုးဘေးမတိုင်မီ နောဧ၏စိတ်ထဲတွင် အဘယ်အရာများရှိခဲ့မည်ကို ကျွန်ုပ်တို့သိချင်ကြမည်ဖြစ်သည်။ သူ၏ဟောပြောခြင်းသည် အကျိုးမရှိဟု သူအမြဲခံစားခဲ့ပါသလော။ တစ်ခါတစ်ရံ မောပန်းခဲ့သလော။ သမ္မာကျမ်းစာက မပြောထားချေ။ နောဧသည် ဘုရားသခင်၏စကားကို နာခံခဲ့သည်ဟု ရိုးရိုးလေးသာပြောပြသည်။
နောဧ၏အခြေအနေသည် ကျွန်ုပ်တို့နှင့်ဆင်တူသည်ကို သင်သဘောပေါက်ပါသလော။ သူသည် အတိုက်အခံနှင့်အခက်အခဲများကြား ယေဟောဝါကို နာခံခဲ့၏။ ယင်းကြောင့် ယေဟောဝါသည် သူ့ကို ဖြောင့်မတ်သည်ဟု ယူမှတ်ခဲ့ရခြင်းဖြစ်သည်။ ဘုရားသခင်သည် ရေလွှမ်းမိုးဘေးကို အဘယ်အချိန်၌ ကျရောက်စေမည်အကြောင်း နောဧ၏မိသားစုသည် အတိအကျမသိခဲ့ကြသော်လည်း ဖြစ်လာလိမ့်မည်ကို သိရှိခဲ့ကြသည်။ ဘုရားသခင်၏နှုတ်မြွက်စကားတော်ကို ယုံကြည်ခြင်းသည် အပင်ပန်းခံခဲ့ပြီး အကျိုးရှိပုံမပေါက်သော ဟောပြောခဲ့ရသည့် နှစ်များတစ်လျှောက် နောဧကို ထောက်မပေးခဲ့သည်။ မှန်၏၊ “နောဧသည် မမြင်သေးသောအမှုအရာတို့ကိုဖော်ပြသော ဗျာဒိတ်တော်ကိုခံရပြီးမှ ယုံကြည်ခြင်းအားဖြင့် ကြောက်ရွံ့သောစိတ်ရှိ၍ မိမိအိမ်သူအိမ်သားတို့ကို ကယ်တင်ခြင်းငှာ သင်္ဘောကိုတည်လေ၏။ ထိုယုံကြည်ခြင်းအားဖြင့် လော[က]သားတို့ကိုအပြစ်တင်၍ ယုံကြည်ခြင်းနှင့်ယှဉ်သော ဖြောင့်မတ်ခြင်းကိုလည်း အမွေခံရ၏” ဟုကျွန်ုပ်တို့သိရသည်။—ဟေဗြဲ ၁၁:၇။
နောဧသည် ဤသို့သောယုံကြည်ခြင်းမျိုးကို မည်သို့ရယူခဲ့သနည်း။ ယေဟောဝါအကြောင်း သူသိခဲ့သမျှအချက်အလက်တိုင်းကို အချိန်ယူဆင်ခြင်သုံးသပ်ပြီး ထိုအသိပညာ၏လမ်းညွှန်မှုကိုခံခဲ့ကြောင်း ထင်ရှားပါသည်။ နောဧသည် ဘုရားသခင်အားဆုတောင်း၍ စကားပြောဆိုခဲ့မည်မှာ သေချာသည်။ အမှန်ဆိုရလျှင် သူသည် “ဘုရားသခင်နှင့်အတူသွားလာ” ခဲ့သည့်တိုင် ယေဟောဝါနှင့် တရင်းတနှီးအကျွမ်းတဝင်ဖြစ်လာခဲ့သည်။ အိမ်ထောင်ဦးစီးတစ်ဦးအနေနှင့် နောဧသည် အိမ်သူအိမ်သားများကို အချိန်ပေးဖို့အသင့်ရှိပြီး မေတ္တာပါစွာအာရုံစိုက်ခဲ့သည်။ ၎င်းတွင် သူ၏ဇနီး၊ သားသုံးယောက်နှင့် ချွေးမသုံးယောက်တို့၏ ဝိညာဉ်ရေးအကျိုးကို ဂရုစိုက်ပေးခြင်းပါဝင်သည်။
နောဧနည်းတူ မျက်မှောက်ခေတ် ခရစ်ယာန်စစ်များသည် မကြာမီ ဘုရားတရားမဲ့ဤအစီအစဉ်စနစ်ကို ယေဟောဝါအဆုံးတိုင်စေတော့မည်ဟု သိရှိကြသည်။ ထိုနေ့ရက် သို့မဟုတ် ထိုနာရီကို ကျွန်ုပ်တို့မသိကြသော်လည်း “ဖြောင့်မတ်ခြင်းတရားကိုဟော” သောဤသူ၏ယုံကြည်ခြင်းနှင့် နာခံမှုကို တုပခြင်းဖြင့် “စိုးလ်ဝိညာဉ်အသက်ရှင်” လိမ့်မည်ကို ကျွန်ုပ်တို့သိရှိကြ၏။—ဟေဗြဲ ၁၀:၃၆-၃၉၊ ကဘ။
[စာမျက်နှာ ၂၉ ပါ လေးထောင့်ကွက်]
ယင်းသည် အမှန်တကယ်ဖြစ်ပျက်ခဲ့သလော
မနုဿဗေဒပညာရှင်များသည် လူအမျိုးအနွယ်ခပ်သိမ်းနီးပါးမှ ရေလွှမ်းမိုးဘေးဒဏ္ဍာရီ ၂၇၀ ခန့်ကိုစုဆောင်းနိုင်ခဲ့ကြပြီ။ “ရေလွှမ်းမိုးခြင်းဇာတ်လမ်းကို ကမ္ဘာအနှံ့တွင် တွေ့ ရှိရသည်” ဟုပညာရှင်ကလော့စ် ဝက်စ်တာမာန်ကဆိုသည်။ “ဖန်ဆင်းခြင်းပုံပြင်ကဲ့သို့ ယင်းသည် ကျွန်ုပ်တို့၏အခြေခံယဉ်ကျေးမှုအမွေအနှစ်တစ်ခုဖြစ်သည်။ ကမ္ဘာတစ်ဝန်းမှ နေရာတကာတွင် ကမ္ဘာဦးရေလွှမ်းမိုးဘေးကြီးဇာတ်လမ်းများကို ကျွန်ုပ်တို့တွေ့ ရှိရသည်မှာ အမှန်ပင်အံ့သြစရာဖြစ်သည်။” အဖြေကားအဘယ်နည်း။ အနက်ဖွင့်ဆရာ အန်ရီကို ဂါလ်ဘီအာတီက ဤသို့ဆိုသည်– “နေရာဒေသကွဲပြားပျံ့နှံ့သော လူအမျိုးမျိုးတွင် ရေလွှမ်းမိုးခြင်းအစဉ်အလာရှိနေခြင်းသည် ဤအစဉ်အလာ၏အခြေခံအချက်ဖြစ်သော သမိုင်းဝင်ဖြစ်ရပ်မှန်၏လက္ခဏာတစ်ရပ်ဖြစ်သည်။” သို့သော် ပညာရှင်များ၏ယူဆချက်များထက် ခရစ်ယာန်များအတွက် သာ၍အရေးကြီးသည်မှာ ရေလွှမ်းမိုးခြင်းကို လူ့သမိုင်းတွင် အဖြစ်အပျက်မှန်တစ်ခုအဖြစ် ယေရှုကိုယ်တော်တိုင် ပြောခဲ့ကြောင်းကို သိရှိရခြင်းဖြစ်သည်။—လုကာ ၁၇:၂၆၊ ၂၇။
[စာမျက်နှာ ၃၀ ပါ လေးထောင့်ကွက်]
ဒဏ္ဍာရီထဲတွင် နက်ဖလင်များလော
နတ်ဘုရားများနှင့် လူသားတို့ တရားမဝင်ဆက်ဆံမှုများ—ဤပေါင်းစပ်မှုမှ မွေးဖွားလာသော “လူစွမ်းကောင်းများ” သို့မဟုတ် “လူတစ်ပိုင်းဘုရားတစ်ပိုင်းများ”—နှင့်ပတ်သက်သည့် ဇာတ်ကြောင်းများသည် ဂရိ၊ အီဂျစ်၊ ယူဂရိုက်တစ်၊ ဟူရီယန်းနှင့် မက်စိုပိုတေမီယန်တို့၏ ကျမ်းပညာရပ်တွင်ပါရှိကြသည်။ ဂရိဒဏ္ဍာရီနတ်ဘုရားများသည် လူ့ပုံသဏ္ဌာန်ရှိပြီး အလွန်လှပကြသည်။ သူတို့သည် စားကြ၊ သောက်ကြ၊ အိပ်ကြ၊ သံဝါသပြုကြသည့်အပြင် ရန်လိုတိုက်ခိုက်၍ သွေးဆောင်ဖြားယောင်းကာ ဗလက္ကာရပြုခဲ့ကြသည်။ သူတို့သည် သန့်ရှင်းသည်ဟု ဆိုကြသော်လည်း လိမ်လည်လှည့်ဖြားပြီး ရာဇဝတ်မှုများကျူးလွန်ကြသည်။ အခီလက်ဇ်နည်းတူ လူစွမ်းကောင်းများသည် ဘုရားနှင့်လူတို့မှ ဆင်းသက်လာကြသည်ဟုဆိုကြပြီး စူပါလူ့ စွမ်းရည်များရှိကြသော်လည်း မသေနိုင်သည့်အနေအထား မရှိကြချေ။ ထို့ကြောင့် နက်ဖလင်နှင့်ပတ်သက်၍ ကမ္ဘာဦးကျမ်းပါအကြောင်းသည် ဤသို့သောဒဏ္ဍာရီများ စဖြစ်ပေါ်လာပုံကို မီးမောင်းထိုးပြသည်။