ယေဟောဝါ​ကို​ကြောက်ရွံ့​၍ ပညတ်တော်​တို့ကို စောင့်ရှောက်​လော့

“ဘုရားသခင်​ကို​ကြောက်ရွံ့​၍ ပညတ်တော်​တို့ကို စောင့်ရှောက်​လော့။ ဤ​ရွေ့​ကား လူ​နှင့်​ဆိုင်သော အမှုအရာ​အလုံးစုံ​တို့ကို ချုပ်ခြာ​သတည်း။”—ဒေ. ၁၂:၁၃။

၁၊ ၂။ (က) ကြောက်ရွံ့​ခြင်း​သည် ကာယရေး​အရ မည်သို့​ကာကွယ်​ပေး​နိုင်​သနည်း။ (ခ) ပညာ​ရှိသော​မိဘများသည် မိမိတို့​သားသမီး​များ​၌ အကျိုး​ဖြစ်ထွန်း​သော​ကြောက်စိတ်​ကို အဘယ်ကြောင့်​ကြိုးစား​ထည့်သွင်း​ပေး​ကြ​သနည်း။

“ရဲရင့်ခြင်း​သည် အသက်ဘေး​တွေ့​စေ​သကဲ့သို့ ကြောက်ရွံ့​ခြင်း​သည် ကာကွယ်​ပေး​၏” ဟု​လီ​ယို​နာ​ဒို ဒါ ဗင်ချီ​က​ဆို​ခဲ့​သည်။ မိုက်ရူး​ရဲ​လုပ်ခြင်း​သည် အန္တရာယ်ကို​မမြင်​စေ​သော်လည်း ကြောက်ရွံ့​ခြင်း​မူ​ကား သတိ​ဝီရိယ​ရှိစေသည်။ ဥပမာ၊ ချောက်​ကမ်းပါး​အစွန်းနား​သို့ ရောက်သွား​ပြီး အောက်​သို့​အဘယ်မျှ​တိုင်​ကျ​သွား​နိုင်​ကြောင်း ကျွန်ုပ်​တို့​သိမြင်​မည်​ဆိုလျှင် ကျွန်ုပ်​တို့​အများစု​သည် အလိုလို​နောက်ဆုတ်​သွား​ကြ​ပေမည်။ အလားတူ​ပင်၊ ရှေ့​ဆောင်းပါး​၌​သင်ယူ​ခဲ့​သည့်​အတိုင်း အကျိုး​ဖြစ်ထွန်း​သော​ကြောက်ရွံ့​ခြင်း​သည် ဘုရားသခင်​နှင့်​ကောင်း​သည့်​ဆက်ဆံ​ရေး​ရရှိစေ​ရုံ​မ​က ထိခိုက်​နစ်နာမှု​မှ​လည်း ကာကွယ်​ပေး​သည်။

^၂ သို့သော် မျက်မှောက်ခေတ်​ဘေးအန္တရာယ်​များစွာကို သိထားဖို့​လို​သည်။ ကလေးငယ်​များသည် လျှပ်စစ်​ဓာတ်အား သို့​မဟုတ် ယာဉ်​အသွားအလာ​အန္တရာယ်များ​ကို မသိကြ​သောကြောင့် စိုးရိမ်ဖွယ်​မတော်တဆမှု​တစ်ခု​ကို အလွယ်တကူ​ကြုံတွေ့​နိုင်​သည်။ * ပညာ​ရှိသော​မိဘများသည် ပတ်ဝန်းကျင်​ရှိ အန္တရာယ်များ​အကြောင်း ထပ်တလဲလဲ​သတိပေး​ကာ အကျိုး​ဖြစ်ထွန်း​သော​ကြောက်ရွံ့​စိတ်​ကို မိမိတို့​သားသမီး​များ​၌ ကြိုးစား​သွင်း​ပေး​ကြသည်။ ဤ​ကြောက်စိတ်​က မိမိတို့​ကလေးငယ်​များ​၏​အသက်ကို တကယ်​ကာကွယ်​ပေး​နိုင်​ကြောင်း မိဘများ​သိထားကြသည်။

၃။ ယေဟောဝါ​သည် ဝိညာဉ်​ရေး​အန္တရာယ်များ​အကြောင်း အဘယ်ကြောင့်​နှင့် အဘယ်​သို့​သတိပေး​တော်​မူ​သနည်း။

^၃ ယေဟောဝါ​သည် ကျွန်ုပ်​တို့၏​ကောင်းကျိုး​အတွက် အလားတူ​စိုးရိမ်​ပူပန်​တော်​မူ​၏။ မေတ္တာ​ရှိသော​ဖခင်​တစ်ဦး​အနေ​နှင့် ကိုယ်တော်​သည် သမ္မာကျမ်းစာ​နှင့် ကိုယ်တော်​၏​အဖွဲ့အစည်း​အားဖြင့် ကျွန်ုပ်​တို့​အကျိုးရှိ​ရာ​ကို သွန်သင်ပေး​တော်​မူ​၏။ (ဟေရှာယ ၄၈:၁၇) ဤ​မြင့်မြတ်​သော​သွန်သင်ခြင်း​အစီအစဉ်​တွင် ဝိညာဉ်​ရေး​ထောင်ချောက်များ​အကြောင်း “အထပ်ထပ်” သတိပေး​ခြင်း​ပါဝင်​သည်၊ သို့ဖြင့် ဤသို့​သော​အန္တရာယ်ကို အကျိုး​ဖြစ်ထွန်း​စွာ​ကြောက်​တတ်​သည့်​သဘော မွေးမြူ​နိုင်​ပေမည်။ (၂ ရာဇဝင်ချုပ် ၃၆:၁၅; ၂ ပေတရု ၃:၁-၂) ‘လူတို့သည် ဘုရားသခင်​ကို​ကြောက်ရွံ့​၍ ကိုယ်တော်​၏​ပညတ်တော်​များ​ကို စောင့်ရှောက်​လို​သော​စိတ်နှလုံး​သာ မွေးမြူ​ခဲ့​ကြ​မည်​ဆိုလျှင်’ သမိုင်း​တစ်လျှောက်​တွင် ဝိညာဉ်​ရေး​အန္တရာယ်များ​စွာ​ကို​ရှောင်​၍ ဆင်းရဲခြင်း​များစွာ​တို့ကို​လည်း လွှဲဖယ်​နိုင်​ခဲ့​ပေမည်။ (တရားဟောရာ ၅:၂၉) ဤ “ခဲယဉ်း​သော​ကာလ” တွင် ဘုရားသခင်​ကို​ကြောက်ရွံ့​သည့်​စိတ်နှလုံး​ကို မည်သို့​မွေးမြူ​ပြီး ဝိညာဉ်​ရေး​အန္တရာယ်များ​ကို ရှောင်နိုင်​မည်​နည်း။—၂ တိမောသေ ၃:၁။

 မကောင်းမှု​မှ​လွှဲရှောင်​လော့

၄။ (က) အဘယ်​မုန်းတီးမှု​ကို ခရစ်ယာန်​များ မွေးမြူ​သင့်​သနည်း။ (ခ) အပြစ်ရှိ​သော​အကျင့်အကြံ​ကို ယေဟောဝါ​မည်သို့​သဘောထား​တော်​မူ​သနည်း။ (အောက်ခြေမှတ်ချက်ကို​ရှု။)

^၄ “ထာဝရ​ဘုရား​ကို​ကြောက်ရွံ့​သော​သဘော​ကား [မကောင်းမှု] ကို​မုန်း​သော​သဘော” ဖြစ်သည်ဟု သမ္မာကျမ်းစာ​က​ရှင်းပြသည်။ (သု. ၈:၁၃) ဤ​မုန်း​သော​သဘောကို ကျမ်းစာ​အဘိဓာန်​တစ်စောင်​က “ဆန့်ကျင်ဘက်​ဖြစ်သော၊ စက်ဆုပ်​ရွံရှာ​သော၊ အထင်အမြင်​သေး​သော မပတ်သက်​လို​သော လူများ၊ သို့​မဟုတ် ပစ္စည်း​များ​အပေါ်​ထား​ရှိသည့်​စိတ်ထား” အဖြစ်​ရှင်းပြသည်။ ထို့​ကြောင့် ဘုရားသခင်​ရေးရာ​ကြောက်ရွံ့​ခြင်း​တွင် ယေဟောဝါ​၏​မျက်မှောက်တော်၌ မကောင်းသော​အရာ​မှန်သမျှကို စိတ်ထဲ​မှ စက်ဆုပ်​ရွံရှာခြင်း​ပါဝင်​သည်။ * (ဆာလံ ၉၇:၁၀) အလိုလို​ဖြစ်ပေါ်​လာ​သည့် ကြောက်စိတ်​က ကျွန်ုပ်​တို့ကို​သတိပေး​သောအခါ ချောက်​ကမ်းပါး​အစွန်း​မှ ကျွန်ုပ်​တို့​နောက်ဆုတ်​သွား​မည်​ဖြစ်​သကဲ့သို့ မကောင်းမှု​မှ​လွှဲ​ရန် ကျွန်ုပ်​တို့ကို​လှုံ့ဆော်ပေး​သည်။ “ထာဝရ​ဘုရား​ကို ကြောက်ရွံ့​သော​သဘော​အားဖြင့် [မကောင်းမှု] ကို​ရှောင်​တတ်၏” ဟု​သမ္မာကျမ်းစာ​က​ဆို​သည်။—သု. ၁၆:၆။

၅။ (က) ဘုရားသခင်​ရေးရာ​ကြောက်ရွံ့​ခြင်း​နှင့် မကောင်းမှုကို​မုန်းတီးခြင်း​တို့ကို ကျွန်ုပ်​တို့​မည်သို့​ပို​၍​ခိုင်မာ​စေနိုင်​သနည်း။ (ခ) ယင်း​နှင့်​ပတ်သက်​၍ ဣသရေလ​လူမျိုး၏​သမိုင်းက ကျွန်ုပ်​တို့ကို​အဘယ်အရာ​သွန်သင်ပေး​သနည်း။

^၅ အပြစ်​ကြောင့် ဧကန်​မုချ​ခံစားရ​သည့် ဆိုးကျိုး​များ​ကို​သုံးသပ်ခြင်း​ဖြင့် အကျိုး​ဖြစ်ထွန်း​သော ဤ​ကြောက်ရွံ့​ခြင်း​နှင့် မကောင်းမှု​မုန်းတီးခြင်း​တို့ကို တိုးများ​စေနိုင်​သည်။ ကျွန်ုပ်​တို့သည် ဇာတိ​ပကတိ​ဖြင့် မျိုးကြဲ​သည်​ဖြစ်စေ၊ ဝိညာဉ်​ပကတိ​ဖြင့် မျိုးကြဲ​သည်​ဖြစ်စေ—ကြဲ​သည့်​အတိုင်း ရိတ်​ရ​ကြ​မည်​ဟု သမ္မာကျမ်းစာ​က​အာမခံ​သည်။ (ဂလာတိ ၆:၇၊ ၈) ယင်းကြောင့် ယေဟောဝါ​သည် ကိုယ်တော်​၏​ပညတ်တော်​များ​ကို လျစ်လျူရှု​၍ စစ်မှန်သော​ဝတ်ပြုရေးကို ပစ်ပယ်​ခြင်း​၏ ရှောင်လွဲ​၍​မရ​သော​အကျိုးဆက်များ​ကို အတိအလင်း​ဖော်ပြ​ခဲ့​၏။ ခုခံနိုင်​စွမ်း​မရှိသော ဣသရေလ​လူမျိုး​သည် ဘုရားသခင့်​ကာကွယ်​မှု​သာ​မရ​ရှိလျှင် ရက်စက်​ကြမ်းကြုတ်​၍ တန်ခိုး​ကြီး​သည့်​အိမ်နီးချင်း​နိုင်ငံ​များ ပြု​သမျှ​ကို​ခံရ​ကြ​ပေမည်။ (တရားဟောရာ ၂၈:၁၅၊ ၄၅-၄၈) ဣသရေလလူ​တို့၏​မနာခံခြင်း​ကြောင့် သူတို့​ခံ​ခဲ့​ရသော ဝမ်းနည်းဖွယ်​အကျိုးဆက်များ​ကို ကျွန်ုပ်​တို့​သင်ခန်းစာယူ​ကြ​ပြီး ဘုရားသခင်​ရေးရာ​ကြောက်ရွံ့​ခြင်း​ကို မွေးမြူ​နိုင်​ကြဖို့ ‘ပုံသက်သေ​အဖြစ်’ သမ္မာကျမ်းစာ​တွင် အသေးစိတ်​မှတ်တမ်း​တင်ထား​သည်။—၁ ကောရိန္သု ၁၀:၁၁။

၆။ ဘုရားသခင်​ရေးရာ​ကြောက်ရွံ့​ခြင်း​ကို သင်ယူ​ရာ​၌ အဘယ်​ကျမ်းစာ​ဆိုင်ရာ​ပုံ​နမူနာ​အချို့​ကို ကျွန်ုပ်​တို့​သုံးသပ်​နိုင်​သနည်း။ (အောက်ခြေမှတ်ချက်ကို​ရှု။)

^၆ သမ္မာကျမ်းစာ​တွင် ဣသရေလလူ​မျိုး​တစ်မျိုးလုံး​အနေ​နှင့် ကြုံတွေ့​ခဲ့​ရသော​အဖြစ်အပျက်​များ​အပြင် မနာလို​ခြင်း၊ အကျင့်​ယိုယွင်းခြင်း၊ လောဘ​ကြီးခြင်း သို့​မဟုတ် စိတ်​နေ​မြင့်​ခြင်း​တို့၏ လွှမ်းမိုးမှုကို​ခံ​ခဲ့​ရသူ​တို့၏ တကယ့်​ဘဝ​အဖြစ်အပျက်​များ​ပါရှိ​သည်။ * ဤ​သူ​အချို့​မှာ ယေဟောဝါ​ကို​နှစ်ပေါင်း​များစွာ ဝတ်​ပြုခဲ့ကြသူ​များ​ဖြစ်သည်၊ သို့သော် သူတို့​ဘဝ​၌ အရေးကြုံ​သော​အချိန်​တစ်ချိန်​တွင် ဘုရားသခင်​ကို ကြောက်ရွံ့​သင့်​သလော​က်​မကြောက်ရွံ့​ခဲ့​ကြသော​ကြောင့် ဝမ်းနည်းဖွယ်​ဆိုးကျိုး ရိတ်သိမ်း​ခဲ့​ကြ​ရသည်။ အဆိုပါ​ကျမ်းစာ​ပုံ​နမူနာ​များ​ကို စဉ်းစား​ဆင်ခြင်ခြင်း​က ထပ်တူ​အမှား​များ​မပြုမိ​ဖို့ ကျွန်ုပ်​တို့၏​သန္နိ​ဋ္ဌာန်​ကို ခိုင်မြဲ​စေနိုင်​သည်။ ကြေကွဲဖွယ်​ဖြစ်ရပ်​တစ်ခု​ကို ကျွန်ုပ်​တို့​ကိုယ်တိုင်​တွေ့ကြုံ​ရပြီး​နောက်​မှ  ဘုရားသခင့်​အကြံပေး​ချက်​ကို နှလုံး​သွင်း​မည်​ဆိုလျှင် ဝမ်းနည်းစရာ​ကောင်း​လိုက်​မည်​ဖြစ်​ခြင်း! အများ​ယုံကြည်​သည်​နှင့်​ဆန့်ကျင်​လျက် အတွေ့အကြုံ—အထူးသဖြင့် စိတ်​အလိုလိုက်​လွန်း​ခြင်း—သည် အကောင်းဆုံး​ဆရာမ​ဟုတ်​ပါ။—ဆာလံ ၁၉:၇။

၇။ ယေဟောဝါ​သည် မိမိ၏​ပုံဆောင်​တဲ​တော်​သို့ မည်​သူ့ကို​ခေါ်ဖိတ်​တော်​မူ​သနည်း။

^၇ ဘုရားသခင်​ရေးရာ​ကြောက်ရွံ့​ခြင်း​ကို​မွေးမြူ​ရသည့် အကြောင်းကောင်း​နောက်တစ်ခု​မှာ ဘုရားသခင်​နှင့်​ကျွန်ုပ်​တို့၏​ဆက်ဆံ​ရေး​ကို ထိန်းသိမ်း​လို​သော ကျွန်ုပ်​တို့၏​ဆန္ဒ​ကြောင့်​ဖြစ်သည်။ ယေဟောဝါ​နှင့်​မိတ်ဆွေ​ဖြစ်​ခြင်း​ကို ကျွန်ုပ်​တို့​တန်ဖိုး​ထား​ကြသော​ကြောင့် ကိုယ်တော်​၏​စိတ်တော်နှင့်​မ​တွေ့​မည်​ကို​စိုးရိမ်​ကြသည်။ မိမိ၏​ပုံဆောင်​တဲ​တော်​ထဲ ဘုရားသခင်​ဖိတ်ခေါ်​မည့် မိတ်ဆွေ​ကား မည်သို့သော​သူ​ဖြစ်​မည်​နည်း။ “ဖြောင့်မတ်​သော​အကျင့်၊ တရားသော​အမှုကိုပြု​ကျင့်” သော​သူ​သာ​လျှင်​ဖြစ်သည်။ (ဆာလံ ၁၅:၁၊ ၂) ကျွန်ုပ်​တို့၏​ဖန်ဆင်း​ရှင်​နှင့် ဤသို့​ဆက်ဆံခွင့်​ရခြင်း​ကို ကျွန်ုပ်​တို့​တန်ဖိုး​ထား​ကြ​မည်​ဆိုလျှင် ကိုယ်တော့်​မျက်မှောက်တော်၌ ဖြောင့်မတ်​စွာ​ပြုကျင့်​ရန် ကျွန်ုပ်​တို့​သတိရှိ​ကြလိမ့်မည်။

၈။ မာလခိ​ခေတ်​မှ ဣသရေလလူ​အချို့​သည် ဘုရားသခင်​နှင့်​မိတ်ဆွေ​ဖြစ်​ရခြင်း​ကို မည်သို့​အရေးမထား​ခဲ့​ကြ​သနည်း။

^၈ ဝမ်းနည်းစရာမှာ မာလခိ​လက်ထက်​မှ ဣသရေလ​အချို့​သည် ဘုရားသခင်​နှင့်​မိတ်ဆွေ​ဖြစ်ခွင့်​ကို အရေးမထား​ခဲ့​ကြ​ချေ။ ယေဟောဝါ​ကို​ကြောက်ရွံ့​၍ ဂုဏ်တင်​မည့်​အစား ဖျားနာ​၍ ခြေဆွံ့​သော​တိရစ္ဆာန်​များ​ကို ကိုယ်တော်​အား​ပူဇော်​ခဲ့​ကြသည်။ သူတို့၌ ဘုရားသခင်​ရေးရာ​ကြောက်ရွံ့​ခြင်း​မရှိကြောင်း အိမ်ထောင်ရေး​အပေါ် သူတို့၏​သဘောထား​က ပေါ်လွင်​စေ​ခဲ့​သည်။ ငယ်ရွယ်​သော​အမျိုးသမီးများ​ကို သူတို့​လက်ထပ်​ယူ​နိုင်​ဖို့ မိမိတို့၏​ငယ်​ပေါင်း​ဇနီးသည်​များ​ကို အသေးအဖွဲ​ကိစ္စ​များ​အတွက်​နှင့် ကွာရှင်း​ခဲ့​ကြသည်။ ယေဟောဝါ​သည် “မယား​ကို​စွန့်​ခြင်း​အမှု” ကို​မုန်းတီး​၍ သူတို့၏​သွေဖည်​သော​စိတ်ဓာတ်​က သူတို့ကို ဘုရားသခင်​နှင့်​စိမ်းကား​စေ​ခဲ့ပြီ​ဟု မာလခိ​က​ပြောဆို​ခဲ့​သည်။ ယဇ်​ပလ္လင်​သည် စွန့်ပစ်​ခံ​ခဲ့​ရသော​ဇနီး​များ​၏ ခံရ​ခက်​သော​မျက်ရည်များ​နှင့် ပုံဆောင်​သဘော​အရ ဖုံးလွှမ်း​နေသည့်​အခါ ဘုရားသခင်​သည် သူတို့၏​ပူဇော်​သကာ​များ​ကို မည်သို့​နှစ်သက်​နိုင်​တော်​မူ​မည်​နည်း။ ကိုယ်တော်​၏​စံနှုန်း​များ​ကို ဤသို့​ဗြောင်ကျကျ​မထီမဲ့မြင်​ပြု​ကြ​ခြင်း​ကြောင့် “ငါ့ကို . . . အဘယ်သူ​ကြောက်ရွံ့​သနည်း” ဟု​ယေဟောဝါ​မေးခွန်းထုတ်​ခဲ့​ရသည်။—မာလခိ ၁:၆-၈; ၂:၁၃-၁၆။

၉၊ ၁၀။ ယေဟောဝါ​နှင့်​မိတ်ဆွေ​ဖြစ်​ရခြင်း​ကို တန်ဖိုး​ထား​ကြောင်း ကျွန်ုပ်​တို့​မည်သို့​တင်ပြ​နိုင်​ကြ​သနည်း။

^၉ ယနေ့လည်း လင်ယောက်ျား​များနှင့်​ဖခင်​များ သို့​မဟုတ် ဇနီးသည်​များနှင့်​မိခင်များ​ပင်​လျှင် တစ်ကိုယ်ကောင်း​ဆန်​၍ အကျင့်​ယိုယွင်း​သည့်​အတွက် ဖရိုဖရဲ​ဖြစ်​ခဲ့​ကြ​ရသည့် အပြစ်မဲ့​အိမ်ထောင်ဖက်​များနှင့် ကလေးငယ်​များစွာ​တို့၏ ဝမ်းနည်းပူဆွေးမှု​ကို ယေဟောဝါ​တွေ့မြင်​တော်​မူ​၏။ ယင်းက ကိုယ်တော်​အား​အမှန်ပင်​ဝမ်းနည်းပူဆွေး​စေ​သည်။ ဘုရားသခင့်​မိတ်ဆွေ​တစ်ဦး​သည် ကိစ္စရပ်​များ​ကို ဘုရားသခင်​မြင်​သကဲ့သို့​ရှုမြင်​မည်​ဖြစ်​ပြီး မိမိ၏​အိမ်ထောင်ရေး ခိုင်မြဲ​စေဖို့ ကြိုးပမ်း​လိမ့်​မည်၊ အိမ်ထောင်ရေး​နှောင်ကြိုး​၏ အရေးပါမှု​ကို အရေးမထား​သည့် လောက​အတွေး​ကို​ငြင်းပယ်​၍ “မတရားသော​မေထုန်​ကို ကြ​ဉ်​ရှောင်” လိမ့်​မည်။—၁ ကောရိန္သု ၆:၁၈။

^၁၀ အိမ်ထောင်ရေး​နှင့် ကျွန်ုပ်​တို့​ဘဝ၏​အခြား​ကဏ္ဍ​များ​တွင်​ပါ ယေဟောဝါ​၏​မျက်မှောက်တော်၌ မကောင်းမှု​မှန်သမျှကို မုန်းတီးခြင်း​အပြင် ကိုယ်တော်​နှင့်​မိတ်ဆွေ​ဖြစ်​ရခြင်း​ကို အလွန်​ကျေးဇူး​တင်​ခြင်း​သည် ယေဟောဝါ​၏​နှစ်သက်​လက်ခံမှုကို ရရှိစေ​ပါ​လိမ့်​မည်။ တမန်​တော်​ပေတရု​က ဤသို့​အခိုင်အမာ​ဆို​ခဲ့​သည်– “အကယ်စင်စစ် ဘုရားသခင်​သည် လူ​မျက်နှာကို​မှတ်​တော်​မ​မူ။ လူအမျိုးမျိုး​တို့​တွင် ဘုရားသခင်​ကို​ကြောက်ရွံ့​၍ တရား​သဖြင့်​ကျင့်ဆောင်​သော​သူသည် အထံတော်​၌​မျက်နှာ​ရသည်ကို ငါ​သိမြင်​၏။” (တမန်​တော် ၁၀:၃၄၊ ၃၅) ခက်ခဲ​သော​အခြေအနေ​အမျိုးမျိုး​တွင် မှန်ကန်​ရာ​ကို​လုပ်ဆောင်ဖို့ ဘုရားသခင်​ရေးရာ​ကြောက်ရွံ့​ခြင်း​က လူ​တို့ကို မည်သို့​လှုံ့ဆော်ပေး​ခဲ့​ကြောင်း​တင်ပြ​သည့် ကျမ်းစာ​ပုံ​နမူနာ​များစွာ​ရှိသည်။

ဘုရားသခင်​ကို​ကြောက်ရွံ့​ခဲ့​သူ​သုံးဦး

၁၁။ အာဗြဟံ​သည် အဘယ်​အခြေအနေ​မျိုး​အောက်တွင် “ဘုရားသခင်​ကို​ကြောက်ရွံ့​သည်” ဟု​ကြေညာ​ခံ​ခဲ့​ရသနည်း။

^၁၁ သမ္မာကျမ်းစာ​တွင် ယေဟောဝါ​ကိုယ်တော်တိုင်​က ဘိုးဘေး​အာဗြဟံ​ကို မိမိ၏​မိတ်ဆွေ​ဟု​ခေါ်​ခဲ့​သည်။ (ဟေရှာယ ၄၁:၈) အာဗြဟံ​၏​မျိုးနွယ်​သည် လူမျိုး​ကြီး​ဖြစ်လာ​မည်​ဟူသော​ကတိတော်​ကို ဣဇာက်​အားဖြင့် ဘုရားသခင်​ပြည့်စုံ​စေမည်​ဖြစ်၍ ဤ​တစ်ဦးတည်း​သော​သားကို​ပူဇော်​ဖို့ ဘုရားသခင်​တောင်းဆို​သောအခါ အာဗြဟံ​၏ ဘုရားသခင်​ရေးရာ​ကြောက်ရွံ့​ခြင်း​သည် စမ်းသပ်ခံ​ခဲ့​ရသည်။ (ကမ္ဘာဦး ၁၂:၂၊ ၃; ၁၇:၁၉) “ဘုရားသခင်​၏​အဆွေ” သည် ဤ​စိတ်ထိခိုက်​စေသော​စမ်းသပ်မှု​ကို အောင်​မည်​လော။ (ယာကုပ် ၂:၂၃) ဣဇာက်​ကို​သတ်​ဖို့ အာဗြဟံ​ဓားကို​မြှောက်​လိုက်​ချိန်​တွင်​ပင် ယေဟောဝါ​၏​ကောင်းကင်တမန်​က “ထို​လုလင်​ကို​မထိမခိုက်​နှင့်။ အလျှင်း​မပြု​နှင့်။ သင်သည် ဘုရားသခင်​ကို​ကြောက်ရွံ့​သည်​ဟု ယခု​ငါ​သိ​၏။ အကြောင်း​မူ​ကား၊ သင်၏​သား၊ သင်၌​တစ်ယောက်တည်း​သော​သားကို ငါ​တောင်း​၍၊ သင်သည် ငါ့ကို​မငြင်း” ဟု​မိန့်တော်မူ၏။—ကမ္ဘာဦး ၂၂:၁၀-၁၂။

၁၂။ အဘယ်အရာက အာဗြဟံ​၌ ဘုရားသခင်​ရေးရာ​ကြောက်ရွံ့​ခြင်း ရှိစေခဲ့​သနည်း၊ ထပ်တူ​စိတ်ထား​မျိုးကို ကျွန်ုပ်​တို့​မည်သို့​တင်ပြ​နိုင်​ကြ​သနည်း။

^၁၂ အာဗြဟံ​သည် ယေဟောဝါ​ကို​ကြောက်ရွံ့​သူ​ဖြစ်​ကြောင်း ယခင်​က သက်သေထူ​ခဲ့​ဖူး​သော်လည်း ထို​အခါသမယ​တွင် မိမိ၏​ဘုရားသခင်​ရေးရာ​ကြောက်ရွံ့​ခြင်း​ကို ထူးခြား​စွာ​ထင်ရှားစေ​ခဲ့​သည်။ ဣဇာက်​ကို​ပူဇော်​ဖို့ သူ​အသင့်ရှိခြင်း​က ရိုသေ​လေးစားမှု​နှင့် နာခံမှု​ကို​တင်ပြခြင်း​ထက်မက​ပါ။ မိမိ၏​ကောင်းကင်​ခမည်းတော်​သည် လိုအပ်​မည်​ဆိုလျှင် ဣဇာက်​ကို​ရှင်ပြန်ထမြောက်​စေခြင်း​ဖြင့် ကိုယ်တော်​၏​ကတိတော်​ကို ပြည့်စုံ​စေမည်​ဟု အာဗြဟံ​အကြွင်းမဲ့ယုံ​ကြည်​စိတ်ချ​ခြင်း​ကြောင့် ထိုသို့​ပြု​နိုင်​ခဲ့​ခြင်း​ဖြစ်သည်။ ပေါလု​ရေးခဲ့​သည့်​အတိုင်း အာဗြဟံ​သည် “ကတိ ထား​တော်​မူ​သော [ဘုရားသခင်] သည် ကတိတော်​အတိုင်း တတ်နိုင်​တော်​မူ​သည်ကို စိတ်​စွဲလမ်း [“အကြွင်းမဲ့ယုံ​ကြည်၊” က​ဘ] လေ​၏။” (ရောမ ၄:၁၆-၂၁) ကြီးမား​သည့်​စွန့်လွှတ်​မှုများ ပြု​ဖို့​လိုအပ်သော​အခါ​၌​ပင် ဘုရားသခင့်​အလိုတော်ကို​ဆောင်ရန် ကျွန်ုပ်​တို့​အသင့်ရှိ​သလော။ ယေဟောဝါ​သည် “ကိုယ်တော်​ကို​ရှာ​သော​သူအား အကျိုးပေး​တော်​မူ” ကြောင်း​သိထား​လျက် ယင်း​သို့​နာခံခြင်း​သည် ရေရှည်​အကျိုးများ​ရရှိစေ​မည်​ဟု ကျွန်ုပ်​တို့​အကြွင်းမဲ့ယုံ​ကြည်​စိတ်ချ​သလော။ (ဟေဗြဲ ၁၁:၆) ယင်းသည် ဘုရားသခင်​အား​ကြောက်ရွံ့​ခြင်း​အစစ်​ဖြစ်သည်။—ဆာလံ ၁၁၅:၁၁။

၁၃။ ယောသပ်​သည် ‘စစ်မှန်သော​ဘုရားသခင်​ကို ကြောက်ရွံ့​သော​သူ’ တစ်ဦး​အဖြစ် မိမိကိုယ်ကို အဘယ်ကြောင့် အမှန်အတိုင်း​ဖော်ပြ​နိုင်​ခဲ့​သနည်း။

^၁၃ ဘုရားသခင်​ရေးရာ​ကြောက်ရွံ့​ခြင်း​ကို အထင်အရှား​ပြ​သည့် အခြား​နမူနာ​တစ်ဦး​ဖြစ်သူ ယောသပ်​ကို သုံးသပ်ကြည့်​ကြ​စို့။ ယောသပ်​သည် ပေါတိဖာ​၏​အိမ်​၌ ကျွန်​တစ်ဦး​ဖြစ်နေ​စဉ် သူ့​သား​အိမ်ရာ​ပြစ်မှား​ရန် နေ့တိုင်း​ဖိအားပေး​ခံ​ခဲ့​ရသည်။ အကျင့်​ယိုယွင်း​ဖို့ သူ့ကို​ထပ်တလဲလဲ​မြှူဆွယ်​သူ သခင်၏​မယား​ကို​ရှောင်​ဖို့​နည်းလမ်း​မရှိခဲ့​ပုံ​ပေါ်​သည်။ နောက်ဆုံး သူ့ကို “ကိုင်ဆွဲ” သောအခါ ယောသပ်​သည် “ပြင်​သို့​ထွက်ပြေး​လေ​၏။” မကောင်းမှု​မှ ချက်ချင်း​တိမ်းရှောင်​ဖို့ အဘယ်အရာက သူ့ကို​လှုံ့ဆော်ပေး​ခဲ့​သနည်း။ အဓိက​အကြောင်းရင်း​မှာ ဘုရားသခင်​ကို​ကြောက်ရွံ့​ခြင်း၊ “အပြစ်ကြီး​သော​ဤ​အမှုကို . . . ပြု​၍ ဘုရားသခင်​ကို . . . ပြစ်မှား” ခြင်း​အား ရှောင်​လို​သော​ဆန္ဒ​ဖြစ်သည်​မှာ သံသယ​ရှိ​စ​ရာ​မလို​ပေ။ (ကမ္ဘာဦး ၃၉:၇-၁၂) ယောသပ်​သည် ‘စစ်မှန်သော​ဘုရားသခင်​ကို ကြောက်ရွံ့​သော​သူ’ တစ်ဦး​အဖြစ် မိမိကိုယ်ကို​မှန်ကန်​စွာ​ဖော်ပြ​နိုင်​ခဲ့​သည်။—ကမ္ဘာဦး ၄၂:၁၈။

၁၄။ ယောသပ်​၏​ကရုဏာ​က ဘုရားသခင်​အား စစ်မှန်​စွာ​ကြောက်ရွံ့​ခြင်း​ကို မည်သို့​ပေါ်လွင်​စေ​သနည်း။

^၁၄ နှစ်များ​လွန်​လေ​ပြီး​နောက် ယောသပ်​သည် သူ့ကို​အကြင်နာမဲ့​စွာ ကျွန်​အဖြစ်​ရောင်းချ​ခဲ့​သော အစ်ကို​များနှင့် မျက်နှာ​ချင်း​ဆိုင် ရင်ဆိုင်ခဲ့​ရသည်။ သူတို့​အလွန်​တ​ရာ​လိုအပ်​နေသော​အစားအစာကို အခွင့်ကောင်း​ယူ၍ သူတို့​မှားယွင်း​ခဲ့​ရာ​အတွက် အလွယ်တကူ​သူ​လက်စားချေ​နိုင်​ခဲ့​သည်။ သို့သော် လူ​တို့ကို​နိုင်ထက်စီးနင်း​ပြုမူခြင်း​သည် ဘုရားသခင်​အား​ကြောက်ရွံ့​ခြင်း မတင်ပြ​ပေ။ (ဝတ်ပြုရာ ၂၅:၄၃) ထို့​ကြောင့် ယောသပ်​သည် အစ်ကို​များ​၏​နှလုံး​ပြောင်းလဲ​ကြောင်း လုံလောက်​သော​အထောက်အထား​တွေ့သော​အခါ သူတို့ကို​ကြင်နာ​စွာ​ခွင့်လွှတ်​ခဲ့​သည်။ ယောသပ်​ကဲ့သို့​ပင် ကျွန်ုပ်​တို့၏​ဘုရားသခင်​ရေးရာ​ကြောက်ရွံ့​ခြင်း​သည် အဆိုးကို​အကောင်း​ဖြင့်​အနိုင်​ယူဖို့ ကျွန်ုပ်​တို့ကို​လှုံ့ဆော်ပေး​သည်​သာမက အပြစ်​သွေးဆောင်​ရာ​သို့​မကျရောက်​စေဖို့​လည်း ကာကွယ်​ပေး​ပါ​လိမ့်​မည်။—ကမ္ဘာဦး ၄၅:၁-၁၁; ဆာလံ ၁၃၀:၃၊ ၄; ရောမ ၁၂:၁၇-၂၁။

၁၅။ ယောဘ​၏​အမူအကျင့်​က ယေဟောဝါ​၏​နှလုံးကို အဘယ်ကြောင့်​ရွှင်ပြုံး​စေ​ခဲ့​သနည်း။

^၁၅ ဘုရားသခင်​ကို​ကြောက်ရွံ့​ရာ​၌ ထင်ရှားသော​ပုံ​နမူနာ​ဖြစ်​ခဲ့​သူ​နောက်​တစ်ဦး​မှာ ယောဘ​ဖြစ်သည်။ ယေဟောဝါ​က စာတန်​ကို​ဤသို့​မိန့်ဆိုခဲ့သည်– “ငါ့​ကျွန်​ယောဘ​ကို​ဆင်ခြင်​ပြီ​လော။ မြေကြီး​ပေါ်မှာ သူနှင့်​တူသော​သူ​တစ်ယောက်မျှ​မရှိ။ စုံလင်​ဖြောင့်မတ်​ပေ​၏။ ဘုရားသခင်​ကို​ကြောက်ရွံ့​သော​သူ၊ မကောင်းသော​အကျင့်ကို​ရှောင်​သော​သူ​ဖြစ်သည်။” (ယောဘ ၁:၈) ယောဘ​၏​အပြစ်တင်​ခွင့်​မရှိသော​အမူအကျင့်​က ကောင်းကင်​ခမည်းတော်​၏​နှလုံးကို နှစ်ပေါင်း​များစွာ​ရွှင်ပြုံး​စေ​ခဲ့ပြီ။ ဘုရားသခင်​ကို​ယောဘ​ကြောက်ရွံ့​ခဲ့​ခြင်း​မှာ ယင်းသည် ပြုလုပ်​သင့်​သော​အရာ​ဖြစ်​ပြီး အကောင်းဆုံး​အသက်ရှင်​နည်း​ဖြစ်​ကြောင်း သူသိ​ထားသော​ကြောင့်​ဖြစ်သည်။ “ထာဝရ​ဘုရား​ကို​ကြောက်ရွံ့​ခြင်း​သည် ပညာ​ဖြစ်​ကြောင်း​နှင့် [မကောင်းမှု] ကို​ရှောင်ခြင်း​သည် ဉာဏ်​ဖြစ်” သည်​ဟု​ယောဘ​မြွက်ဆို​ခဲ့​သည်။ (ယောဘ ၂၈:၂၈) အိမ်ထောင်သည်​တစ်ဦး​အနေ​နှင့် ယောဘသည် ငယ်ရွယ်​သော​အမျိုးသမီးများ​ကို မသင့်​လျော်​စွာ​စိုက်ကြည့်​ခြင်း​မပြု​ခဲ့​သကဲ့သို့ ဖောက်ပြန်​မည့်​အကြံ​ကို နှလုံး​ထဲ​၌​မ​သိုထား​ခဲ့​ချေ။ ချမ်းသာ​ကြွယ်ဝသူ​တစ်ဦး​ဖြစ်သော်လည်း သူ၏​စည်းစိမ်ဥစ္စာ​ကို အားထား​ဖို့​သူ​ငြင်းပယ်​ခဲ့​ပြီး ရုပ်ပုံ​ကိုးကွယ်​ခြင်း​ပုံစံ​အားလုံး​ကို ရှောင်ကြဉ်​ခဲ့​သည်။—ယောဘ ၃၁:၁၊ ၉-၁၁၊ ၂၄-၂၈။

၁၆။ (က) ယောဘသည် အဘယ်​နည်းများဖြင့် ချစ်ခင်​ကြင်နာ​မှု​ကို​ကျင့်သုံး​ခဲ့​သနည်း။ (ခ) ယောဘသည် ခွင့်လွှတ်​ကြောင်း မည်သို့​တင်ပြ​ခဲ့​သနည်း။

^၁၆ သို့သော် ဘုရားသခင်​အား​ကြောက်ရွံ့​ခြင်း​ဟူသည် ကောင်းမွန်​ရာ​ကို​ပြုလုပ်ခြင်း​သာမက မကောင်းမှုကို​ရှောင်ရှား​ခြင်း​လည်း​ဖြစ်သည်။ ထို့​ကြောင့် ယောဘသည် မျက်မမြင်​သူ၊ ခြေဆွံ့သူ​နှင့် ဆင်းရဲသူ​တို့ကို သဘောထားကြီး​စွာ​စိတ်ဝင်စားမှု​ပြ​ခဲ့​သည်။ (ဝတ်ပြုရာ ၁၉:၁၄; ယောဘ ၂၉:၁၅၊ ၁၆) ‘အဆွေ​ခင်ပွန်း​အား မ​သနား​လျှင် [အဆုံးမဲ့] တန်ခိုးရှင်​ကို ကြောက်ရွံ့​သော​သဘော​နှင့်​ကင်းလွတ်’ ကြောင်း ယောဘ​နားလည်​ထား​သည်။ (ယောဘ ၆:၁၄) မ​သနားခြင်း​တွင် ခွင့်​မလွှတ်​ခြင်း သို့​မဟုတ် အငြိုး​ထားခြင်း​ပါဝင်​နိုင်​သည်။ ဘုရားသခင့်​ညွှန်ကြားမှု​ဖြင့် ယောဘသည် မိမိကို​အလွန်​စိတ်သောက​ရောက်​စေ​ခဲ့​သူ အပေါင်းအဖော်​သုံးဦး​အတွက် ဆုတောင်းပေး​ခဲ့​သည်။ (ယောဘ ၄၂:၇-၁၀) ကျွန်ုပ်​တို့ကို​တစ်နည်း​နည်းဖြင့် စိတ်နာ​စေ​ခဲ့​သော ယုံကြည်သူချင်း​တစ်ဦး​ကို ထပ်တူ​ခွင့်လွှတ်​နိုင်​မည်​လော။ ကျွန်ုပ်​တို့ကို​စော်ကား​ခဲ့​သူ​အတွက် စိတ်ရင်းမှန်​ဖြင့်​ဆုတောင်း​ပေးခြင်း​ဖြင့် နာကြည်းမှု​ပြေပျောက် စေဖို့ မိမိတို့​အား များစွာ​ထောက်ကူ​ပေး​နိုင်​သည်။ ဘုရားသခင်​ရေးရာ​ကြောက်ရွံ့​ခြင်း​ရှိသည့်​အတွက် ယောဘ​ခံစား​ခဲ့​ရသော​ကောင်းချီး​များ​က ‘ကိုယ်တော်​ကို​ကြောက်ရွံ့​သူတို့​အဖို့ သိုထား​တော်​မူ​သော ကြွယ်ဝ​သည့် ကောင်းမြတ်​ခြင်း​များ’ ၏​ကြိုတင်​မြင်ကွင်း​တစ်ခု​ဖြစ်သည်။—ဆာလံ ၃၁:၁၉; ယာကုပ် ၅:၁၁။

ဘုရားသခင်​အား​ကြောက်ရွံ့​ခြင်း​တစ်ဖက် လူကို​ကြောက်ရွံ့​ခြင်း

၁၇။ လူကို​ကြောက်ရွံ့​ခြင်း​က ကျွန်ုပ်​တို့ကို​အဘယ်​သို့​ပြု​နိုင်​သနည်း၊ သို့သော် ထို​ကြောက်ရွံ့​ခြင်း​က အဘယ်ကြောင့်​အမြော်အမြင်​နည်း​သနည်း။

^၁၇ ဘုရားသခင်​ကို​ကြောက်ရွံ့​ခြင်း​က မှန်ရာကို​ပြုလုပ်​ဖို့ ကျွန်ုပ်​တို့ကို​လှုံ့ဆော်ပေး​နိုင်​သည်​မှန်​သော်လည်း လူကို​ကြောက်ရွံ့​ခြင်း​က ကျွန်ုပ်​တို့၏​ယုံကြည်ခြင်းကို လှိုက်စား​သွား​နိုင်​သည်။ ဤ​အကြောင်းကြောင့် ဇွဲရှိ​သော​သတင်းကောင်း​ဟောပြောသူများ​ဖြစ်​ဖို့ တမန်​တော်​များ​ကို​တိုက်တွန်း​ရာ​၌ သူတို့ကို ယေရှု​ဤသို့​မိန့်ဆိုခဲ့သည်– “ကိုယ်ခန္ဓာ​ကို​သာ​သတ်​၍ စိတ်​ဝိညာဉ်​ကို​မ​သတ်​နိုင်သော​သူတို့ကို မကြောက်​ကြ​နှင့်။ ကိုယ်ခန္ဓာ​နှင့်​စိတ်​ဝိညာဉ်​ကို ငရဲ [“ဂေဟင်နာ၊” က​ဘ] ၌​ဖျက်ဆီး​နိုင်သော​သူကို သာ၍​ကြောက်​ကြလော့။” (မဿဲ ၁၀:၂၈) လူသည် ကျွန်ုပ်​တို့၏​အနာဂတ်​အသက်တာ အလားအလာ​တို့ကို မဖျက်ဆီး​နိုင်သော​ကြောင့် လူကို​ကြောက်​ခြင်း​သည် အမြော်အမြင်​နည်း​သည်​ဟု ယေရှု​ရှင်းပြ​ခဲ့​သည်။ ထို့​အပြင် ဘုရားသခင်​၏​စိုးရွံ့ဖွယ်​တန်ခိုးတော်​ကို ကျွန်ုပ်​တို့​အသိအမှတ်ပြု​သောကြောင့် ကိုယ်တော်​အား ကျွန်ုပ်​တို့​ကြောက်ရွံ့​ကြသည်၊ ယင်း​တန်ခိုးတော်​နှင့်​နှိုင်းယှဉ်လျှင် လူအမျိုးမျိုး​တို့၏​အစွမ်း​ခွန်အား​သည် အဘယ်အရာမျှ​မဟုတ်ပေ။ (ဟေရှာယ ၄၀:၁၅) ကျွန်ုပ်​တို့သည် အာဗြဟံ​နည်းတူ ကိုယ်တော်​၏​တည်ကြည်သော​ကျေးကျွန်​များ​ကို ထမြောက်​စေနိုင်​သည့်​ယေဟောဝါ​၏​တန်ခိုးတော်​ကို အကြွင်းမဲ့ယုံ​ကြည်​စိတ်ချ​ကြသည်။ (ဗျာဒိတ် ၂:၁၀) ထို့​ကြောင့် ကျွန်ုပ်​တို့သည် ယုံကြည်​စိတ်ချ​စွာ​ဖြင့် “ဘုရားသခင်​သည် ငါ​တို့​ဘက်၌​ရှိတော်မူလျှင်၊ အဘယ်သူ​သည် ငါ​တို့​တစ်ဖက်၌​နေနိုင်​မည်​နည်း” ဟု​ဆို​ကြသည်။—ရောမ ၈:၃၁။

၁၈။ ယေဟောဝါ​အား​ကြောက်ရွံ့​သူတို့ကို ကိုယ်တော်​အဘယ်​နည်းဖြင့်​ဆုချ​တော်​မူ​သနည်း။

^၁၈ ကျွန်ုပ်​တို့ကို​ဆန့်ကျင်သူ​သည် မိသားစု​မှ​တစ်ဦး​ဖြစ်စေ၊ ကျောင်းတွင်​ဗိုလ်ကျသူ​တစ်ဦး​ဖြစ်စေ “[ယေဟောဝါ] ကို​ကြောက်ရွံ့​ခြင်း​သည် အား​ကြီးသော​ကိုးစားရာ” ဖြစ်​ကြောင်း ကျွန်ုပ်​တို့​တွေ့ရှိ​ကြလိမ့်မည်။ (သု. ၁၄:၂၆) ကျွန်ုပ်​တို့ကို ဘုရားသခင်​နားညောင်း​မည်​ဟု​သိထား​လျက် ခွန်အား​ရှိဖို့ ကိုယ်တော်​ထံ​ဆုတောင်း​နိုင်​ကြသည်။ (ဆာလံ ၁၄၅:၁၉) ယေဟောဝါ​အား​ကြောက်ရွံ့​သူတို့ကို ဘယ်​သောအခါ​မျှ ကိုယ်တော်​မမေ့လျော့​ပါ။ မိမိ၏​ပရောဖက်​မာလခိ​မှ​တစ်ဆင့် ကျွန်ုပ်​တို့ကို​ကိုယ်တော်​ဤသို့​ထပ်မံ​စိတ်ချ​စေ​သည်– “ထို​အခါ [ယေဟောဝါ] ကို​ကြောက်ရွံ့​သော​သူတို့သည် တစ်ယောက်ကို​တစ်ယောက်​နှုတ်​ဆက်၍​ပြောဆို​ကြ​၏။ ထာဝရ​ဘုရား​သည်လည်း​နားထောင်​၍ ကြား​တော်​မူ​၏။ ထာဝရ​ဘုရား​ကို​ကြောက်ရွံ့​၍ နာမတော်​ကို​အောက်မေ့​သော​သူတို့​အဖို့ ရှေ့တော်တွင် စာရင်း​၌​မှတ်သား​လျက်​ရှိ၏။”—မာလခိ ၃:၁၆။

၁၉။ အဘယ်​ကြောက်ရွံ့​မှု​မျိုး​များ အဆုံးတိုင်​လိမ့်​မည်​နည်း၊ သို့သော် အဘယ်​ကြောက်ရွံ့​မှု​မျိုး​က ထာဝစဉ်​တည်ရှိ​မည်​နည်း။

^၁၉ မြေကြီးသား​အပေါင်းတို့သည် ယေဟောဝါ​ကို​ဝတ်ပြု​၍ လူကို​ကြောက်ရွံ့​ခြင်း ပပျောက်​သွား​မည့်​အချိန် ရောက်လု​နီးပြီ။ (ဟေရှာယ ၁၁:၉) ငတ်မွတ်​ခြင်း၊ အနာ​ရောဂါ၊ ရာဇဝတ်မှု​နှင့် စစ်​ကို​ကြောက်ရွံ့​ခြင်း​တို့​လည်း ပျောက်ကွယ်​သွားပါ​လိမ့်​မည်။ သို့သော် ကောင်းကင်​နှင့် မြေကြီးပေါ်​ရှိ ကိုယ်တော်​၏​တည်ကြည်သော​ကျေးကျွန်​များ ကိုယ်တော်​အား ရိုသေ​လေးစားမှု၊ နာခံမှု​နှင့် ဂုဏ်တင်မှု​တို့ကို ဆက်၍​တင်ပြ​ကြသည်​နှင့်​အမျှ ဘုရားသခင်​ကို​ကြောက်ရွံ့​ခြင်း​သည် ထာဝရ​တည်ရှိ​သွားပါ​လိမ့်​မည်။ (ဗျာဒိတ် ၁၅:၄) ထို​အတောအတွင်း ကျွန်ုပ်​တို့အားလုံး ရှောလမုန်​၏​မှုတ်သွင်းခံ ဤ​အကြံပေး​ချက်​ကို နှလုံး​သွင်း​ကြပါစို့– “အပြစ်သား​တို့ကို မငြူစူ​နှင့်။ ထာဝရ​ဘုရား​ကို​ကား အစဉ် [“တစ်နေ့လုံး၊” က​ဘ] ကြောက်ရွံ့​ရိုသေ​လော့။ သို့ပြုလျှင် နောင်​၌​အကျိုးကျေးဇူး​ရှိ​လိမ့်​မည်။ သင်​မျှော်လင့်​ရာ​လည်း​မပျက်​ရ။”—သု. ၂၃:၁၇၊ ၁၈၊ သမ္မာ။

[အောက်ခြေ​မှတ်ချက်များ]

သင်​မှတ်မိ​သလော

• မကောင်းမှုကို​မုန်း​ရန် ကျွန်ုပ်​တို့​မည်သို့​သင်ယူ​နိုင်​သနည်း။

• မာလခိ​လက်ထက်​မှ ဣသရေလလူ​အချို့​သည် ယေဟောဝါ​နှင့်​မိတ်ဆွေ​ဖြစ်​ရခြင်း​ကို မည်သို့​အရေးမထား​ခဲ့​ကြ​သနည်း။

• ဘုရားသခင်​ကို​ကြောက်ရွံ့​ခြင်း​နှင့်​စပ်လျဉ်း၍ အာဗြဟံ၊ ယောသပ်​နှင့် ယောဘ​တို့​ထံ​မှ ကျွန်ုပ်​တို့​အဘယ်အရာ​သင်ယူ​နိုင်​သနည်း။

• အဘယ်​ကြောက်ရွံ့​ခြင်း​သည် အစဉ်​တည်ရှိ​မည်​နည်း၊ အဘယ်ကြောင့်​နည်း။

[လေ့လာ​ရန်​မေးခွန်းများ]

[စာမျက်နှာ ၁၉ ပါ ရုပ်ပုံ]

ပညာ​ရှိသော​မိဘများသည် မိမိတို့​သားသမီး​များ​၌ အကျိုး​ဖြစ်ထွန်း​သော​ကြောက်ရွံ့​စိတ်​ကို သွင်း​ပေး​ကြသည်

[စာမျက်နှာ ၂၀ ပါ ရုပ်ပုံ]

ကြောက်ရွံ့​ခြင်း​က ကျွန်ုပ်​တို့ကို ဘေးမသင့်​စေ​သကဲ့သို့ ဘုရားသခင်​ရေးရာ​ကြောက်ရွံ့​ခြင်း​က မကောင်းမှု​မှ​လွှဲရှောင်​စေ​သည်

[စာမျက်နှာ ၂၃ ပါ ရုပ်ပုံ]

ယောဘသည် မိတ်ဆွေ​အတု​သုံးဦး​နှင့် ရင်ဆိုင်​ရသောအခါ​၌​ပင် ဘုရားသခင်​အား​ကြောက်ရွံ့​ခြင်း​ကို ထိန်းသိမ်း​ခဲ့

[Credit Line]

From the Bible translation Vulgata Latina, 1795