မိဘတို့ သင်တို့ကလေးများ၏လိုအပ်ရာကို ဖြည့်ဆည်းပေးကြလော့!
မိဘတို့ သင်တို့ကလေးများ၏လိုအပ်ရာကို ဖြည့်ဆည်းပေးကြလော့!
ကလေးများသည် အထူးသဖြင့် သူတို့မိဘများ၏ ညွှန်ကြားမှုနှင့် မေတ္တာပါဆုံးမပဲ့ပြင်မှုကို လိုအပ်သည်။ ယင်းနှင့်စပ်လျဉ်း၍ ဘရာဇီးပညာပေးသူ တာနီယာ ဇာဂူရီက “ကလေးတိုင်းရဲ့သဘောထားက စိတ်ကျေနပ်မှုရဖို့ဖြစ်တယ်။ ကန့်သတ်ချက်တွေ ချမှတ်ပေးဖို့လိုတယ်။ အဲဒါကို မိဘတွေက ချမှတ်ပေးရမယ်။ မချမှတ်ပေးရင် ကလေးတွေကို ထိန်းလို့သိမ်းလို့ရမှာမဟုတ်တော့ဘူး” ဟုဆိုသည်။
သို့သော် ကြိုက်ရာလုပ်ပိုင်ခွင့်ကို အားပေးအားမြှောက်ပြုသည့် စည်းလွတ်ဝါးလွတ်လူ့အဖွဲ့အစည်း၏ လွှမ်းမိုးမှုကိုခံနေရသောနိုင်ငံအများတွင် အထက်ပါအကြံပြုချက်ကို လိုက်လျှောက်ရန် ခက်ခဲနိုင်မည်။ သို့ဆိုလျှင် မိဘများသည် မည်သည့်နေရာမှ အကူအညီရရှိနိုင်သနည်း။ ဘုရားသခင်ကိုကြောက်ရွံ့သော မိဘများသည် မိမိတို့ကလေးများက “ထာဝရဘုရား . . . ပေးသနားတော်မူသော အမွေဥစ္စာဖြစ်ကြ” သည်ကို အသိအမှတ်ပြုကြ၏။ (ဆာလံ ၁၂၇:၃) သို့ဖြစ်၍ သူတို့သည် ကလေးများကိုကျွေးမွေးပြုစုရာတွင် လမ်းညွှန်မှုအတွက် ဘုရားသခင့်နှုတ်မြွက်တော် သမ္မာကျမ်းစာကို အားထားကြသည်။ ဥပမာ၊ နယပုံပြင် ၁၃:၂၄ တွင်ဤသို့ဆိုသည်– “ကြိမ်လုံးကိုမသုံးသောသူသည် မိမိသားကိုမုန်းရာသို့ရောက်၏။ သားကိုချစ်သောသူမူကား ငယ်သောအရွယ်မှစ၍ ဆုံးမတတ်၏။”
သမ္မာကျမ်းစာတွင် အသုံးပြုထားသော “ကြိမ်လုံး” ဟူသည် ကာယရေးအပြစ်ပေးခြင်းကိုသာ ဆိုလိုနေသည်ဟု သဘောပေါက်ဖို့မဟုတ်ချေ; မည်သည့်ပုံစံမျိုးဖြင့်မဆို ပြုပြင်တည့်မတ်ပေးနည်းကိုဆိုလိုသည်။ ကလေးတစ်ဦး၏ကလန်ကဆန်ပြုလုပ်လိုစိတ်ကို ပြုပြင်တည့်မတ်ပေးရန် များသောအားဖြင့် နှုတ်ဖြင့်ဆုံးမဖို့သာ လိုအပ်ပေမည်။ နယပုံပြင် ၂၉:၁၇ ကဤသို့ဆို၏– “သင်၏သားကို ဆုံးမလော့။ သို့ပြုလျှင် သူသည် သင့်ကိုချမ်းသာပေးမည်။ ထိုမျှမက စိတ်ရွှင်လန်းစရာအခွင့်ကိုပေးမည်။”
ကလေးများ၏မနှစ်မြို့ဖွယ်ဝသီများကို ဖယ်ရှားပေးရန် မေတ္တာပါဆုံးမပဲ့ပြင်မှုလိုသည်။ ဤသို့ခိုင်မာပြီး ကြင်နာစွာပြုပြင်တည့်မတ်ပေးခြင်းက မိဘသည် ကလေးကိုချစ်ကြောင်း သက်သေထူသည်။ (သု. ၂၂:၆) ထို့ကြောင့် မိဘတို့ အားယူကြလော့! ကျမ်းစာ၏ခြေမြစ်ပြီး လက်တွေ့ကျသော အကြံပြုချက်ကို လိုက်လျှောက်ခြင်းအားဖြင့် သင်သည် ယေဟောဝါဘုရားသခင်၏အလိုတော်နှင့်တွေ့မည့်အပြင် သင့်ကလေးများ၏ရိုသေလေးစားမှုကိုလည်း ရရှိပါလိမ့်မည်။