ယေရှု အစစ်အမှန်
ယေရှု အစစ်အမှန်
မိမိအား လူတို့ မည်သို့ထင်မြင်ယူဆကြကြောင်း တပည့်တော်များထံမှ ကြားသိရပြီးနောက် ယေရှုက “သင်တို့လည်း ငါ့ကို အဘယ်သူဖြစ်သည်ဆိုကြသနည်း” ဟု မေးတော်မူ၏။ မဿဲခရစ်ဝင်ကျမ်းက တမန်တော်ပေတရု၏အဖြေကို ဤသို့မှတ်တမ်းတင်ထားသည်– “ကိုယ်တော်သည် ခရစ်တော်တည်းဟူသော အသက်ရှင်တော်မူသောဘုရားသခင်၏ သားတော်ဖြစ်တော်မူသည်။” (မဿဲ ၁၆:၁၅၊ ၁၆) အခြားသူတို့လည်း ထပ်တူအမြင်မျိုးရှိခဲ့ကြ၏။ နောက်ပိုင်း၌ တမန်တော်တစ်ပါးဖြစ်လာသူ နာသနေလက ယေရှုအား “အရှင်ဘုရား၊ ကိုယ်တော်သည် ဘုရားသခင်၏သားတော် ဖြစ်တော်မူ၏။ ဣသရေလလူတို့၏ ရှင်ဘုရင်လည်း ဖြစ်တော်မူ၏” ဟုလျှောက်ခဲ့သည်။ (ယောဟန် ၁:၄၉) ယေရှုကိုယ်တော်တိုင် မိမိ၏အရေးပါသောကဏ္ဍကို ဤသို့မြွက်ဆိုခဲ့သည်– “ငါသည်လမ်းခရီးဖြစ်၏။ [အမှန်] တရားလည်းဖြစ်၏။ အသက်လည်းဖြစ်၏။ ငါ့ကိုအမှီမပြုလျှင် အဘယ်သူမျှခမည်းတော်ထံသို့မရောက်ရ။” (ယောဟန် ၁၄:၆) ကိုယ်တော်သည် မိမိကိုယ်ကို “ဘုရားသခင်၏သားတော်” ဟု အကြိမ်ကြိမ်ရည်ညွှန်းခဲ့သည်။ (ယောဟန် ၅:၂၄၊ ၂၅; ၁၁:၄) ယင်းအဆိုမှန်ကန်ကြောင်း အံ့ဖွယ်အမှုများပြုခြင်း၊ သေသူကိုပင်ထမြောက်စေခဲ့ခြင်းဖြင့် သက်သေထူခဲ့သည်။
ခြေမြစ်သောသံသယများလော
သို့ရာတွင် ယေရှုအကြောင်း ခရစ်ဝင်ကျမ်းများတွင် ဖော်ပြထားချက်ကို ကျွန်ုပ်တို့ အမှန်ပင် ယုံကြည်စိတ်ချနိုင်သလော။ ယင်းတို့သည် တကယ့်ယေရှုအကြောင်း ဖော်ပြသလော။ အင်္ဂလန်နိုင်ငံ၊ မန်ချက်စ်တာ တက္ကသိုလ်မှ သမ္မာကျမ်းစာဆိုင်ရာ အကဲဖြတ်အဖွင့်ဋီကာချဲ့ရေး ပါမောက္ခဖြစ်သော မကြာမီကကွယ်လွန်သွားခဲ့သူ ဖရက်ဒရစ် အက်ဖ်၊ ဘရုစ် က ဤသို့ဆိုသည်– “သမ္မာကျမ်းစာအတွင်း သို့မဟုတ် ပြင်ပမှ ရှေးဟောင်းစာပေတစ်ခုပါ အချက်အလက်တိုင်း မှန်မမှန် သမိုင်းဝင်ထောက်ခံချက်များဖြင့်ဖော်ပြရန် များသောအားဖြင့်မဖြစ်နိုင်ပေ။ စာရေးဆရာတစ်ဦး၏ ယေဘုယျယုံကြည်စိတ်ချရမှုကို ကျိုးကြောင်းညီစွာ စိတ်ချနိုင်ကြောင်း သိထားခြင်းသည် လုံလောက်ပေသည်၊ သူ့ကိုယုံကြည်နိုင်ပြီဆိုလျှင် သူ၏အသေးစိတ်တင်ပြချက်များ မှန်သည်ဟူ၍သာ ယူဆနိုင်သည်။ . . . ခရစ်ယာန်များက ဓမ္မသစ်ကျမ်းကို ‘မြင့်မြတ်သော’ စာပေအဖြစ်လက်ခံထားကြသောကြောင့် ၎င်းသည် သမိုင်းအရ ယုံကြည်စိတ်ချစရာမဟုတ်ဟု မဆိုနိုင်ပေ။”
ခရစ်ဝင်ကျမ်းများတွင် ရေးသားဖော်ပြထားသော ယေရှုနှင့်စပ်လျဉ်းသည့် သံသယများကို ဆန်းစစ်ပြီးနောက် အမေရိကန်ပြည်ထောင်စု မြောက်ဒါကိုတာ၊ ဂျိမ်းစ်တောင်းကောလိပ်မှ ဘာသာရေးပါမောက္ခ ဂျိမ်း အာရ်. အက်ဒ်ဝပ် ဤသို့ရေးသားခဲ့သည်– “ခရစ်ဝင်ကျမ်းများသည် ယေရှုအကြောင်း တကယ့်အမှန်တရားဖြစ်သော သက်သေအထောက်အထားမြောက်မြားစွာကို ပုံစံအမျိုးမျိုးဖြင့် ထိန်းသိမ်းပေးထားကြောင်း ကျွန်ုပ်တို့ယုံကြည်စိတ်ချစွာ ပြောဆိုနိုင်သည်။ . . . ယေရှုအား ခရစ်ဝင်ကျမ်းများ ဖော်ပြထားသကဲ့သို့ အဘယ်ကြောင့်ဖော်ပြရသနည်းဟူသော မေးခွန်းအတွက် ကျိုးကြောင်းအညီညွတ်ဆုံးအဖြေမှာ ယေရှုသည် ထိုအတိုင်းပင်ဖြစ်ခဲ့သောကြောင့်ဖြစ်သည်။ ခရစ်ဝင်ကျမ်းများသည် မိမိ၏နောက်တော်လိုက် တပည့်များတွင် ကိုယ်တော် စွဲမှတ်ကျန်ရစ်ခဲ့စေရာကို တိကျမှန်ကန်စွာ ဖော်ပြသည်၊ ကိုယ်တော်သည် ဘုရားသခင်စေလွှတ်သူဖြစ်ကြောင်းနှင့် ဘုရားသခင့်သားတော်အဖြစ် အမှုထမ်းရန် အာဏာအပ်နှင်းခံရသူဖြစ်ကြောင်း သူတို့သိရှိကြသည်။” *
ယေရှုရှာပုံတော်
ယေရှုခရစ်နှင့်ပတ်သက်သော သမ္မာကျမ်းစာတွင်မပါသည့် ကိုးကားချက်များကော အသို့နည်း။ ၎င်းတို့ကို မည်သို့အကဲဖြတ်မည်နည်း။ တက်စီတပ်စ်၊ စူတိုးနီးယပ်စ်၊ ဂျိုစီဖတ်စ်၊ ပလင်နီအငယ်နှင့် စံတင်လောက်သော အခြားစာရေးဆရာအနည်းငယ်၏ သမိုင်းမှတ်တမ်းများတွင် ယေရှုအကြောင်း ကြိမ်ဖန်များစွာ ကိုးကားဖော်ပြထားပါသည်။ ယင်းတို့အထဲမှ ဗြိတဲန်နီကာ စွယ်စုံကျမ်းသစ် (၁၉၉၅) ကဤသို့မှတ်ချက်ချသည်– “ရှေးခေတ်က ခရစ်ယာန်ဘာသာကိုဆန့်ကျင်သူများပင် ယေရှုတကယ်ရှိခဲ့သည်ကို ယုံကြည်ကြကြောင်း ဤဘက်မလိုက်မှတ်တမ်းများက သက်သေထူသည်။ ယင်းကိစ္စကို အကြောင်းအချက်မခိုင်လုံဘဲ ၁၈ ရာစုအဆုံးပိုင်း၊ ၁၉ ရာစုအတွင်းနှင့် ၂၀ ရာစုအစပိုင်းတွင် စတင်ငြင်းခုံလာခဲ့ကြသည်။”
ဝမ်းနည်းစရာမှာ ခေတ်သစ်ပညာရှင်များသည် “အစစ်အမှန်” သို့မဟုတ် “သမိုင်းဝင်ပုဂ္ဂိုလ်” ယေရှုကို ရှာပုံတော်ဖွင့်ရာတွင် အခြေအမြစ်မရှိသော မှန်းဆချက်များ၊ အဓိပ္ပာယ်မဲ့သောသံသယများနှင့် ယုတ္တိမရှိသောအယူအဆများ အထပ်ထပ်နောက်ကွယ်၌ ကိုယ်တော်မည်သူမည်ဝါဖြစ်သည်ကို ဖုံးကွယ်ထားပုံရှိသည်။ တစ်နည်းအားဖြင့်ဆိုရလျှင် ခရစ်ဝင်ကျမ်းရေးသူများသည် ဒဏ္ဍာရီဖွဲ့နွဲ့ခြင်းဖြစ်သည်ဟု မမှန်မကန်စွပ်စွဲမှုအတွက် အပြစ်ရှိကြသည်။ အချို့တို့သည် ထူးခြားသည့်အယူအဆအသစ်တစ်ခု မိမိတို့ကြောင့် ထွက်ပေါ်လာသည်ဟု နာမည်ကျော်ကြားလို၍ ယေရှုအကြောင်းကို ရိုးသားမှန်ကန်စွာ မဆန်းစစ်ကြချေ။ ဤလုပ်စဉ်တွင် ပညာရှင်တို့သည် သူတို့၏စိတ်ကူးဖြင့် “ယေရှု” တစ်ဦးကိုဖန်တီးခဲ့ကြသည်။
သို့သော် ယေရှုအစစ်အမှန်ကို တွေ့လိုသူများသည် ကိုယ်တော်အား သမ္မာကျမ်းစာ၌ ရှာတွေ့နိုင်ပါသည်။ အယ်မရီတက္ကသိုလ်၊ ကဲန်ဒလာကျမ်းစာသင်ကျောင်းမှ ဓမ္မသစ်ကျမ်းနှင့် ခရစ်ယာန်ဇာစ်မြစ်ဆိုင်ရာ ပါမောက္ခ လုခ် ဂျောန်ဆင် က သမိုင်းဝင်ပုဂ္ဂိုလ်ယေရှု အကြောင်းနှင့်ပတ်သက်၍ ရှာဖွေလေ့လာမှုအများစုသည် ကျမ်းစာရည်ရွယ်ရာကို ချန်လှပ်ထားကြသည်ဟု အခိုင်အမာဆိုသည်။ သူက ယေရှု၏ဘဝနှင့် ကိုယ်တော့်ခေတ်ကာလ၏ လူမှုရေး၊ နိုင်ငံရေး၊ မနုဿဗေဒနှင့် ယဉ်ကျေးမှုတို့ကို ဆန်းစစ်ရန် စိတ်ဝင်စားစရာဖြစ်နိုင်သည်ဟုဆိုသည်။ သို့တိုင် ပညာရှင်များက သမိုင်းဝင်ပုဂ္ဂိုလ်ယေရှုဟုဆိုသည့်သူအကြောင်း တွေ့ရှိလာခြင်းသည် “ကျမ်းစာရည်ရွယ်ရာ မဟုတ်ချေ၊” ကျမ်းစာရည်ရွယ်ရာမှာ ယေရှု၏သတင်းတရား၊ ရွေးနုတ်ရှင်အဖြစ် ကိုယ်တော့်အခန်းကဏ္ဍ၊ ကိုယ်တော်၏ “စရိုက်လက္ခဏာကို ဖော်ပြရန် ပို၍အာရုံစူးစိုက်” ကြောင်း သူကထပ်လောင်းပြောကြားသည်။ သို့ဖြစ်လျှင် ယေရှု၏စရိုက်မှန်နှင့် သတင်းတရားမှန်ကား အဘယ်နည်း။
ယေရှုအစစ်အမှန်
ယေရှုဘဝအကြောင်း ကျမ်းစာမှတ်တမ်းတင်ချက်လေးစောင်ဖြစ်သော ခရစ်ဝင်ကျမ်းများသည် ကိုယ်တော်အား ထူးကဲစွာစာနာမှုပြသူတစ်ဦးအဖြစ် ဖော်ပြထားသည်။ သနားညှာတာစိတ်နှင့် ထောက်ထားစာနာတတ်သောသဘောကြောင့် ယေရှုသည် ဖျားနာသူ၊ မျက်စိကန်းသူနှင့် အခြားသောဝေဒနာများ ခံစားနေရသူများကို ကူညီပေးရန် လှုံ့ဆော်ခံခဲ့ရသည်။ (မဿဲ ၉:၃၆; ၁၄:၁၄; ၂၀:၃၄) ယေရှု၏မိတ်ဆွေလာဇရု သေဆုံးခြင်းနှင့် လာဇရု၏ညီအစ်မများ ဝမ်းနည်းကြေကွဲခြင်းတို့က ကိုယ်တော်အား ‘အလွန်ညှိုးငယ်၍ မျက်ရည်ကျ’ စေတော်မူခဲ့၏။ (ယောဟန် ၁၁:၃၂-၃၆) အမှန်ဆိုသော် ခရစ်ဝင်ကျမ်းများက ယေရှု၏ခံစားချက်အမျိုးမျိုးကို ဖော်ပြသည်၊ ဥပမာ၊ အနူသည်တစ်ဦးကို စာနာခြင်း၊ တပည့်တော်များ၏ အောင်မြင်မှုများကြောင့် စိတ်အားတက်ကြွခြင်း၊ စာနာမှုကင်းမဲ့သောဥပဒေကို လှေနံဓားထစ်လိုက်နာသူတို့အား အမျက်ထွက်ခြင်း၊ မေရှိယကို ယေရုရှလင်မြို့သားများ ငြင်းပယ်သည့်အတွက် ဝမ်းနည်းခြင်းစသည်တို့ဖြစ်သည်။
ယေရှုသည် အံ့ဖွယ်အမှုကိုပြုသောအခါ “သင်၏ယုံကြည်ခြင်းသည် သင့်အနာကိုငြိမ်းစေပြီ” ဟုဆိုကာ ကုသခံရသူ၏အပိုင်းကဏ္ဍကို အာရုံစိုက်လေ့ရှိသည်။ (မဿဲ ၉:၂၂) ကိုယ်တော်သည် နာသနေလအား “လှည့်စားခြင်းအပြစ်နှင့်ကင်းလွတ်သော ဣသရေလလူစစ်” ဟုချီးမွမ်းခဲ့သည်။ (ယောဟန် ၁:၄၇) အမျိုးသမီးတစ်ဦး၏ တန်ဖိုးထားလေးမြတ်စွာ ပေးဆက်သောလက်ဆောင်ကို အချို့တို့က ဖြုန်းတီးမှုဟုသဘောထားသောအခါ ထိုအမျိုးသမီးကို ယေရှုကာကွယ်ပေးပြီး သူ၏ရက်ရောမှုအကြောင်း ကြာမြင့်စွာ အောက်မေ့သတိရလိမ့်မည်ဟုဆို၏။ (မဿဲ ၂၆:၆-၁၃) ကိုယ်တော်သည် မိမိ၏တပည့်နောက်လိုက်များကို “အဆုံးတိုင်အောင်ချစ်တော်မူ” ကာ မိတ်ဆွေစစ်နှင့် ချစ်ခင်ကြင်နာသော အပေါင်းအဖော်ဖြစ်ကြောင်းကိုပြသခဲ့၏။—ယောဟန် ၁၃:၁; ၁၅:၁၁-၁၅။
ယေရှုတွေ့ဆုံခဲ့သူ အများစုကို ကိုယ်တော်သည် ချက်ချင်းသဘောပေါက်နားလည်ကြောင်းလည်း ခရစ်ဝင်ကျမ်းများကဖော်ပြသည်။ ကိုယ်တော်သည် ရေတွင်း၌ အမျိုးသမီးတစ်ဦးနှင့်ဖြစ်စေ၊ ဥယျာဉ်တွင် ဘာသာရေးဆရာတစ်ဦးနှင့်ဖြစ်စေ၊ ရေကန်အနီး၌ တံငါသည်တစ်ဦးနှင့်ဖြစ်စေ စကားပြောဆိုစဉ် သူတို့၏နှလုံးကို ချက်ချင်းထိမိခဲ့သည်။ ယေရှု စ,စကားပြောဆိုပြီးနောက် လူအများစုသည် သူတို့၏အတွင်းသဘောများကို ကိုယ်တော်အား ဖွင့်ပြောလေ့ရှိကြ၏။ ကိုယ်တော်သည် သူတို့နှလုံးကိုထိမိခဲ့သည်။ ယေရှု၏တစ်ခေတ်တည်းသားများသည် ဩဇာရှိသူများနှင့် ခပ်ကင်းကင်းနေကောင်းနေမည်ဖြစ်သော်လည်း ကိုယ်တော့်ကိုမူကား လူတို့ဝိုင်းအုံနေကြသည်။ လူတို့သည် ယေရှုနှင့်အတူရှိလိုကြ၏; ကိုယ်တော်နှင့် သူတို့ပေါင်းသင်းရလွယ်ကူ၏။ ကလေးများသည်လည်း ကိုယ်တော်နှင့်ရင်းရင်းနှီးနှီးရှိကြသည်။ ကလေးတစ်ယောက်ကို နမူနာအဖြစ် ကိုယ်တော်အသုံးပြုသောအခါ တပည့်တော်များရှေ့တွင် ထိုကလေးအား ရပ်ရုံရပ်စေသည်မဟုတ်ဘဲ “ချီပိုက်” ထားတော်မူခဲ့၏။ (မာကု ၉:၃၆; ၁၀:၁၃-၁၆) ခရစ်ဝင်ကျမ်းများက ယေရှုကို ဆွဲဆောင်မှုအား အလွန်ကောင်းသူဖြစ်၍ ယင်းကြောင့် လူများတို့သည် ကိုယ်တော်၏တရားကိုနာဖို့အတွက်သာ သုံးရက်ပတ်လုံး ကိုယ်တော်နှင့်အတူနေခဲ့ကြ၏ဟု ဖော်ပြသည်။—မဿဲ ၁၅:၃၂။
ယေရှုသည် စုံလင်သောသူဖြစ်သော်လည်း ကိုယ်တော်၏တရားကိုနာသော မစုံလင်သူများကို အလွန်အမင်းအပြစ်ရှာခြင်း၊ မောက်မောက်မာမာနှင့် နိုင်ထက်စီးနင်းပြုခြင်း မရှိခဲ့ချေ။ (မဿဲ ၉:၁၀-၁၃; ၂၁:၃၁၊ ၃၂; လုကာ ၇:၃၆-၄၈; ၁၅:၁-၃၂; ၁၈:၉-၁၄) ယေရှုသည် တစ်ခါမျှ အတင်းအကျပ်တောင်းဆိုခဲ့ခြင်းမရှိ။ လူတို့၏ဝန်ထုပ်ဝန်ပိုးများအပေါ် အခြားဝန်များထပ်တင်ခြင်းကိုလည်းမပြုခဲ့။ ယင်းအစား ကိုယ်တော်ဤသို့ဆိုသည်– “ဝန်လေး . . . သောသူအပေါင်းတို့၊ ငါ့ထံသို့လာကြလော့။ ငါသည်ချမ်းသာပေးမည်။” ကိုယ်တော်သည် “နူးညံ့သိမ်မွေ့နှိမ့်ချသောစိတ်သဘော” ရှိကြောင်း တပည့်တော်များတွေ့မြင်ခဲ့ကြ၏; ကိုယ်တော်၏ထမ်းပိုးသည် ထမ်းလွယ်၍ ဝန်လည်းပေါ့၏။—မဿဲ ၁၁:၂၈-၃၀။
ယေရှု၏ပင်ကိုစရိုက်လက္ခဏာကို ခရစ်ဝင်ကျမ်းမှတ်တမ်းများတွင် ရှင်းလင်းပြတ်သားစွာ တွေ့မြင်နိုင်သည်။ ထူးခြားသောစရိုက်လက္ခဏာရှိသူတစ်ဦးကို ပုဂ္ဂိုလ်လေးဦးက ဖန်တီးဖော်ပြပြီး သီးခြားဇာတ်ကြောင်းလေးခုလုံးတွင် ထိုသူကိုတစ်ပုံစံတည်း သရုပ်သကန်ဖော်ခြင်းဟူသည် လွယ်ကူမည်မဟုတ်ချေ။ အကယ်၍ ထိုသူသည် အမှန်တကယ်မတည်ရှိခဲ့ပါမူ စာရေးဆရာလေးဦးက ထိုသူကို တစ်သမတ်တည်း ရုပ်လုံးဖော်ရေးသားရန် မဖြစ်နိုင်ပေ။
သမိုင်းပညာရှင် မိုက်ကယ်ဂရန့်က စဉ်းစားတွေးတောစရာမေးခွန်းတစ်ခု ထုတ်ခဲ့သည်– “နာမည်ပျက်အမျိုးသမီးများအပါအဝင် အမျိုးသမီးများစွာနှင့် ပေါင်းသင်းဆက်ဆံသော်လည်း သူတို့အပေါ် မရိုးမသားမေတ္တာစိတ်သက်ဝင်ခြင်း၊ ဟန်ကြီးပန်ကြီးလုပ်လွန်းခြင်းမျိုးမရှိ၊ အဘက်ဘက်တွင် အကြွင်းမဲ့ ကိုယ်ကျင့်တရားဖြူစင်ဖြောင့်မတ်ပြီး ဆွဲဆောင်မှုရှိသောလူရည်မွန်တစ်ဦးကို ခရစ်ဝင်ကျမ်းဆိုင်ရာ ထုံးတမ်းတစ်လျှောက်တွင် ဖော်ပြထားခြင်းမှာ မည်သို့ဖြစ်နိုင်ပါမည်နည်း။” ကျိုးကြောင်းညီညွတ်သောအဖြေမှာ အဆိုပါပုဂ္ဂိုလ်သည် အမှန်တကယ်တည်ရှိခဲ့ပြီး ကျမ်းစာဖော်ပြသည့်အတိုင်း ပြုမူနေထိုင်ခဲ့သည်ဟူ၍ဖြစ်၏။
ယေရှုအစစ်အမှန်နှင့် သင့်အနာဂတ်
ယေရှုကမ္ဘာပေါ်ရှိစဉ် ဘဝအဖြစ်မှန်ကို သမ္မာကျမ်းစာ၌ ဖော်ပြသည့်အပြင် ကိုယ်တော်သည် လူသားဘဝမတိုင်မီက ‘သတ္တဝါအပေါင်းတို့တွင် သားဦး၊’ ဘုရားသခင်၏ တစ်ပါးတည်းသောသားတော်အဖြစ် အသက်ရှင်ခဲ့ကြောင်းလည်း တင်ပြထားသည်။ (ကောလောသဲ ၁:၁၅) ဘုရားသခင်သည် လွန်ခဲ့သောနှစ်ပေါင်းနှစ်ထောင်ကျော်က မိမိ၏ကောင်းကင်သားတော်ကို လူသားတစ်ဦးအဖြစ် မွေးဖွားလာစေရန် သူ၏အသက်ကို ဂျူးအပျိုကညာတစ်ဦး၏ဝမ်းထဲ ရွှေ့ပြောင်းပေးတော်မူခဲ့သည်။ (မဿဲ ၁:၁၈) ယေရှု မြေကြီးပေါ်အမှုဆောင်ခဲ့စဉ် ကိုယ်တော်သည် စိတ်ဓာတ်ကျသူများအတွက် တစ်ခုတည်းသောမျှော်လင့်ချက်မှာ ဘုရားသခင့်နိုင်ငံတော်ဖြစ်ကြောင်း ကြွေးကြော်တော်မူခဲ့၍ ဤဟောပြောခြင်းလုပ်ငန်းကို ဆက်လက်ဆောင်ရွက်ရန် တပည့်တော်များကို လေ့ကျင့်သွန်သင်ပေးတော်မူခဲ့၏။—မဿဲ ၄:၁၇; ၁၀:၅-၇; ၂၈:၁၉၊ ၂၀။
စီ.အီး. ၃၃၊ နိသန်လ ၁၄ ရက် (ဧပြီ ၁ ရက်ခန့်) တွင်ယေရှုသည် အဖမ်းခံရပြီး ရုံးတင်စစ်ဆေးခံရကာ တရားစီရင်ခံရ၍ ပုန်ကန်ရန်လှုံ့ဆော်သည်ဟူသော မတရားစွပ်စွဲချက်ဖြင့် အသတ်ခံခဲ့ရသည်။ (မဿဲ ၂၆:၁၈-၂၀၊မဿဲ ၂၆:၄၈-၂၇:၅၀) ယေရှုအသေခံ၍ ရွေးနုတ်ပေးတော်မူခဲ့သောကြောင့် ယုံကြည်သူလူသားအပေါင်းတို့သည် အပြစ်မှလွတ်မြောက်လာပြီး ကိုယ်တော်အား ယုံကြည်ကြောင်းတင်ပြသူအပေါင်း ထာဝရအသက်ရခွင့်ရှိစေသည်။ (ရောမ ၃:၂၃၊ ၂၄; ၁ ယောဟန် ၂:၂) နိသန်လ ၁၆ ရက်တွင် ယေရှုရှင်ပြန်ထမြောက်တော်မူခဲ့ပြီး ထို့နောက်များမကြာမီ ကိုယ်တော်သည် ကောင်းကင်သို့ပြန်တက်ကြွတော်မူခဲ့သည်။ (မာကု ၁၆:၁-၈; လုကာ ၂၄:၅၀-၅၃; တမန်တော် ၁:၆-၉) ထမြောက်တော်မူခဲ့သောယေရှုသည် ယေဟောဝါ၏ခန့်အပ်ခံရှင်ဘုရင်အဖြစ် လူသားအတွက် ဘုရားသခင်၏ကနဦးရည်ရွယ်ချက်ကို အထမြောက်စေရန် အခွင့်အာဏာအပြည့်အဝရှိတော်မူသည်။ (ဟေရှာယ ၉:၆၊ ၇; လုကာ ၁:၃၂၊ ၃၃) ယေရှုသည် ဘုရားသခင့်ရည်ရွယ်တော်မူချက် အကောင်အထည်ဖော်ရေးတွင် အဓိကပုဂ္ဂိုလ်ဖြစ်ကြောင်း သမ္မာကျမ်းစာက ဖော်ပြသည်။
ပထမရာစုတွင် ယေရှုကို ကတိထားရာမေရှိယ သို့မဟုတ် ခရစ်တော်၊ ယေဟောဝါ၏ပိုင်သအုပ်စိုးမှုကို သံသယကင်းရှင်းစေရန်နှင့် လူသားများအတွက် ရွေးနုတ်ဖိုးအဖြစ် အသေခံရန် မြေကြီးသို့စေလွှတ်ခံရသူအဖြစ် လူအမြောက်အမြားက လက်ခံခဲ့ကြသည်။ (မဿဲ ၂၀:၂၈; လုကာ ၂:၂၅-၃၂; ယောဟန် ၁၇:၂၅၊ ၂၆; ၁၈:၃၇) ကိုယ်တော်သည် မည်သူမည်ဝါဖြစ်ကြောင်း လူတို့ကျိန်းသေမသိကြလျှင် အပြင်းအထန်နှိပ်စက်ညှဉ်းပန်းခံရသည့်ကြား ယေရှု၏တပည့်များဖြစ်ဝံ့ကြမည်မဟုတ်ချေ။ သို့သော် သူတို့သည် ကိုယ်တော်ပေးအပ်တော်မူသည့် ‘လူမျိုးတကာတို့ကို တပည့်ဖြစ်စေခြင်း’ လုပ်ငန်းကို ထက်ထက်သန်သန် ရဲရင့်စွာလုပ်ကိုင်နိုင်ခဲ့ကြသည်။—မဿဲ ၂၈:၁၉။
ယနေ့တွင် ယေရှုသည် ဒဏ္ဍာရီထဲမှသူတစ်ဦးမဟုတ်ကြောင်း စိတ်ရင်းမှန်၍ အသိအမြင်ကြွယ်သော ခရစ်ယာန်သန်းပေါင်းများစွာ သိကြပါသည်။ သူတို့သည် ကိုယ်တော်အား ကမ္ဘာမြေကြီးနှင့် ၎င်း၏မှုရေးမှုရာများကို အပြည့်အဝတာဝန်ယူထမ်းဆောင်တော့မည့် ကောင်းကင်တွင်နန်းထိုင်အုပ်ချုပ်သည့် ဘုရားသခင့်နိုင်ငံတော်ဘုရင်အဖြစ် လက်ခံထားကြပြီ။ ဤဘုရားသခင့်အုပ်ချုပ်ရေးသည် ကမ္ဘာ့ပြဿနာများကို ငြိမ်းစေမည့်အတွက် သတင်းကောင်းဖြစ်သည်။ ဘုရားသခင် ရွေးချယ်ခန့်အပ်ထားတော်မူသောဘုရင်ကို ဤခရစ်ယာန်စစ်များ အကြွင်းမဲ့ထောက်ခံအားပေးကြောင်း “နိုင်ငံတော်နှင့်ယှဉ်သောသတင်းကောင်း” ကို လူအပေါင်းတို့အား ကြေညာခြင်းအားဖြင့် တင်ပြကြသည်။—မဿဲ ၂၄:၁၄။
အသက်ရှင်တော်မူထသော ဘုရားသခင်၏သားတော် ခရစ်တော်အစိုးရမည့် နိုင်ငံတော်အစီအစဉ်ကို ထောက်ခံသူများသည် ထာဝရကောင်းချီးများ ခံစားရကြမည်။ ဤကောင်းချီးများကို အသင်လည်းခံစားနိုင်သည်! ဤစာစောင်ထုတ်ဝေသူများသည် သင့်အား ယေရှုအစစ်အမှန်ကိုသိရှိစေရန် ကူညီပေးဖို့ အသင့်ရှိသည်။
[အောက်ခြေမှတ်ချက်]
^ အပိုဒ်၊ 5 ခရစ်ဝင်ကျမ်းမှတ်တမ်းများကို အသေးစိတ်စစ်ဆေးလေ့လာရန် ယေဟောဝါသက်သေများထုတ်ဝေသည့် သမ္မာကျမ်းစာ—ဘုရားသခင့်နှုတ်မြွက်စကားတော်လော၊ လူ့နှုတ်ထွက်လော [လိပ်] စာအုပ်၏ အခန်း ၅ မှ ၇ ကိုရှု။
[စာမျက်နှာ ၆ ပါ လေးထောင့်ကွက်/ ရုပ်ပုံ]
အခြားသူတို့၏ ထွက်ဆိုချက်
“နာဇရက်မြို့သားယေရှုကို လောကမှာပေါ်ထွန်းခဲ့တဲ့ တန်ခိုးကြီးသွန်သင်သူများထဲမှ တစ်ဦးအနေနဲ့ ကျွန်တော်လက်ခံတယ်။ ယေရှုရဲ့သွန်သင်ချက်တွေကို ရိုသေလေးမြတ်တဲ့သဘောနဲ့ မလေ့လာရသေးရင် သင်တို့ရဲ့ဘဝဟာ ပြည့်စုံဦးမှာမဟုတ်ဘူးလို့ ဟိန္ဒူတွေကိုပြောရလိမ့်မယ်။” မိုဟမ်းဒတ်စ် ကေ. ဂန္ဒီ၊ ယေရှုခရစ်၏ သတင်းတော်။”
“ဤမျှပြိုင်စံရှား၍ ဤမျှပြည့်စုံကာ မပြောင်းမလဲ တစ်သမတ်တည်းဖြစ်ပြီး ဤမျှစုံလင်၊ ဤမျှစာနာစိတ်ရှိ၍ တစ်ချိန်တည်းတွင် ကြီးမြတ်သောလူသားအားလုံးထက် ဤမျှသာလွန်မြင့်မြတ်သော သူတစ်ဦးသည် အယောင်ဆောင်သူမဟုတ်နိုင်သကဲ့သို့ စိတ်ကူးထဲမှလူတစ်ဦးလည်းမဟုတ်နိုင်ချေ။ . . . ယေရှုကိုဉာဏ်ဆင်ဖန်တီးဖို့ ယေရှုထက်သာ၍ကြီးမြတ်သူတစ်ဦး လိုအပ်ပေမည်။” ဖိလစ် ရှက်ဖ်၊ ခရစ်ယာန်ချာ့ခ်ျ၏သမိုင်း။
“သာမန်လူအနည်းငယ်သည် လူမျိုးဆက်တစ်ဆက်တည်းတွင် ဤမျှသြဇာကြီးမားပြီး ဤမျှဆွဲဆောင်မှုအားကောင်းသူ၊ ဤမျှမြင့်မားသောကျင့်ဝတ်စံချိန်ရှိ၍ လူ့အသင်းအပင်းအတွက် ဤမျှလှုံ့ဆော်မှုပေးနိုင်သူတစ်ဦးကို ဖန်တီးနိုင်ခဲ့ခြင်းသည် ခရစ်ဝင်ကျမ်းပါ အံ့ဖွယ်အမှုများထက် ပိုမို၍မယုံနိုင်စရာ အံ့ဖွယ်အမှုတစ်ခုဖြစ်ပေလိမ့်မည်။” ဝီလ်ဒူးရဲန့်၊ ကဲသာနှင့်ခရစ်တော်။
“ဘာသာတရားများကို အစပြုတည်ထောင်ရန် ကြိုးစားခဲ့ကြပြီး အရေးနိမ့်ခဲ့သော ငြင်းဖွယ်မရှိ အမှန်တည်ရှိခဲ့သူများကိုထောက်ရှု၍ ကမ္ဘာအနှံ့ကျယ်ပြန့်နေသော ဘာသာရေးလှုပ်ရှားမှုကို ရှေးမြှင့်တင်ရေးဆိုင်ရာ နည်းပရိယာယ်တစ်ခုအဖြစ် သက်ရှိထင်ရှားမရှိခဲ့သူတစ်ဦးက ဖန်တီးယူ အစပြုခဲ့သည်ဟုဆိုခြင်းကား နားလည်ရခက်ပုံရှိပေမည်။” ဂရဂ် အီစတာဘရုတ်၊ ငြိမ်သက်နေသောရေပြင်ဘေးဝယ်။
‘ခရစ်ဝင်ကျမ်းများသည် အဘယ်အရာပင်ဖြစ်ပါစေ ဒဏ္ဍာရီပုံပြင်များတော့မဟုတ်သည်ကို စာပေသမိုင်းပညာရှင်တစ်ဦးအနေနှင့် ကျွန်တော်ရာနှုန်းပြည့်ယုံကြည်သည်။ ယင်းတို့သည် ဒဏ္ဍာရီပုံပြင်များဖြစ်ရန် စိတ်ကူးဉာဏ်မပြောင်မြောက်လှချေ။ ယေရှု၏ဘဝအသက်တာ အတော်များများကို ကျွန်ုပ်တို့မသိရှိကြရချေ၊ ဒဏ္ဍာရီပုံပြင်တစ်ခုကို တီထွင်သူတို့သည် ထိုသို့ဖြစ်စေမည်မဟုတ်ပါ။’
စီ. အက်စ်. လူးဝိစ်၊ God in the Dock.
[စာမျက်နှာ ၇ ပါ ရုပ်ပုံ]
ခရစ်ဝင်ကျမ်းများက ယေရှု၏ခံစားချက် အလှမ်းအကျယ်ကြီးမားပုံကို ဖော်ပြ