“လူများတို့သည် ငါ့ကိုအဘယ်သူ ဖြစ်သည် ဆိုကြသနည်း”
“လူများတို့သည် ငါ့ကိုအဘယ်သူ ဖြစ်သည် ဆိုကြသနည်း”
ခရစ္စမတ်ရာသီ ရောက်၍လာပြန်ပြီ။ ကမ္ဘာတစ်ဝန်းရှိလူတို့သည် မွေးနေ့ပွဲတစ်ခုကို ကျင်းပလိုကြသည်။ မည်သူ့မွေးနေ့ပွဲနည်း။ ဘုရားသခင့်သားတော်၏မွေးနေ့ပွဲလော၊ ပထမရာစုတွင် မိမိအရပ်ဒေသ၌ရေပန်းစားသော ဘာသာရေးကိုပြုပြင်ရန် ဆန္ဒပြင်းပြသူ ဘုရားတရားကြည်ညိုသော ဂျူးတစ်ဦး၏မွေးနေ့ပွဲလော။ ဆင်းရဲသားများဘက်မှ ကာကွယ်ပြောဆိုပေးသူ သို့မဟုတ် ရောမအင်ပါယာကို အန္တရာယ်ပေးမည့်သူဖြစ်သောကြောင့် ကွပ်မျက်ခံရသည့် ပုန်ကန်သူတစ်ဦး၏မွေးနေ့လော။ သို့မဟုတ် ထိုသူသည် ကိုယ့်ဘာသာအလုံးစုံသိခြင်းနှင့် အတွင်းထဲတွင်ဉာဏ်ပညာစိုးမိုးခြင်းကို အလေးပေးသော ပညာရှိတစ်ဦးလော။ ‘အမှန်တကယ်တွင် ယေရှုခရစ်သည် မည်သူနည်း’ ဟု သင်တွေးက တွေးထိုက်သည်။
ယေရှုကိုယ်တော်တိုင် ထိုမေးခွန်းကို လူတို့ မည်သို့တုံ့ပြန်မည်ကို စိတ်ဝင်စားတော်မူခဲ့၏။ တစ်ကြိမ်တစ်ခါတွင် ကိုယ်တော်က မိမိ၏တပည့်တော်များအား “လူများတို့သည် ငါ့ကိုအဘယ်သူဖြစ်သည် ဆိုကြသနည်း” ဟုမေးတော်မူခဲ့သည်။ (မာကု ၈:၂၇) ထိုမေးခွန်းကို အဘယ်ကြောင့် မေးခဲ့ရသနည်း။ ကိုယ်တော်၏နောက်တော်မှ တပည့်များစွာ ခွဲထွက်သွားခဲ့ကြပြီ။ ကိုယ်တော်အား မင်းမြှောက်လိုသူတို့၏ဆန္ဒကို မလိုက်လျောသည့်အတွက် အခြားတပည့်များသည် ဇဝေဇဝါဖြစ်ပြီး စိတ်ပျက်ခဲ့ပုံပေါက်သည်။ ထို့ပြင် ရန်သူများက ယေရှုအား ကိုယ်တော်မည်သူမည်ဝါဖြစ်ကြောင်းကို သက်သေထူဖို့ ကောင်းကင်မှတန်ခိုးပြရန် စိန်ခေါ်ခဲ့သောအခါ ကိုယ်တော်ငြင်းပယ်ခဲ့သည်။ သို့ဖြစ်၍ အထက်ပါမေးခွန်းကို ဖြေဆိုရာတွင် တမန်တော်များက ကိုယ်တော်မည်သူမည်ဝါဖြစ်ကြောင်းနှင့်ပတ်သက်၍ အဘယ်သို့ဆိုသနည်း။ သူတို့က လူတို့တွင်ရှိသော ရှုမြင်ချက်အချို့ကို ဤသို့ဖော်ပြခဲ့ကြသည်– “လူအချို့က ကိုယ်တော်သည် ဗတ္တိဇံဆရာယောဟန်ဖြစ်သည်ဟူ၍လည်းကောင်း၊ အချို့က ဧလိယဖြစ်သည်ဟူ၍လည်းကောင်း၊ အချို့က ယေရမိမှစ၍ ပရောဖက်တစ်ပါးပါးဖြစ်သည်ဟူ၍လည်းကောင်း ဆိုကြပါ၏။” (မဿဲ ၁၆:၁၃၊ ၁၄) ယေရှုကို အပြစ်ရှာဂုဏ်ဖျက်၍ ဘုရားသခင်ကိုရှုတ်ချသူ၊ အယောင်ဆောင်သူ၊ ပရောဖက်အတု၊ အရူး အစရှိသည့် ပါလက်စတိုင်းနယ်တွင် ထိုအချိန်က ပျံ့နှံ့နေသောအမည်များကိုကား သူတို့ မဖော်ပြခဲ့ကြချေ။
ယေရှု၏ အသွင်အမျိုးမျိုး
ယနေ့ ထပ်တူမေးခွန်းကို ယေရှုမေးခဲ့ပါက “ပညာရှင်တို့သည် ငါ့ကိုအဘယ်သူဖြစ်သည် ဆိုကြသနည်း” ဟုအသုံးအနှုန်းပြုပြင်၍ မေးပေမည်။ ဤတွင် တစ်ဖန် အဖြေများက ဤသို့သာဖြစ်ပေမည်– အမျိုးမျိုးထင်မြင်ယူဆကြတယ်။ ချီကာဂိုတက္ကသိုလ်မှ ဒေးဗစ်ထရေစီ၏အဆိုအရ “ယေရှုနှင့်ပတ်သက်၍လည်းကောင်း၊ ကိုယ်တော်မိန့်ဆိုပြုမူခဲ့ရာများနှင့် ပတ်သက်၍လည်းကောင်း အယူအဆအမျိုးမျိုး၊ အဓိပ္ပာယ်ဖွင့်ဆိုချက်အဖုံဖုံရှိသည်။” လွန်ခဲ့သောရာစုနှစ်တစ်လျှောက် ပညာရှင်များက အမှန်စင်စစ် ယေရှုသည် မည်သူမည်ဝါဖြစ်ကြောင်းနှင့် ပတ်သက်သောမေးခွန်းကို တိကျစွာဖြေဆိုဖို့ ကြိုးစားရာတွင် ရှုပ်ထွေးနက်နဲသည့် လူမှုရေးသိပ္ပံပညာ၊ မနုဿဗေဒ၊ စာပေကျမ်းဂန်တို့နှင့်ဆိုင်သော နည်းစနစ်များစွာကို အသုံးပြုခဲ့ကြပြီ။ နောက်ဆုံးတွင် ယေရှုသည် အမှန်အားဖြင့် မည်သူမည်ဝါဖြစ်သည်ဟု သူတို့ယူမှတ်ကြသနည်း။
ပညာရှင်အချို့က သမိုင်းဝင်ပုဂ္ဂိုလ်ယေရှုသည် နောင်တယူကြရန် တိုက်တွန်းနှိုးဆော်ပြီး ကမ္ဘာကုန်ဆုံးခြင်းအကြောင်းဟောသော ဂျူးပရောဖက်တစ်ဦးဖြစ်သည်ဟု ပြောမြဲပြောကြ၏။ သို့ရာတွင် ကိုယ်တော်အား ဘုရားသခင့်သားတော်၊ မေရှိယနှင့် ရွေးနုတ်ရှင်ဟု မခေါ်ကြချေ။ ပညာရှင်အများက ကိုယ်တော်သည် ကောင်းကင်ဘုံမှလာကြောင်းနှင့် ထမြောက်တော်မူခဲ့ကြောင်း ကျမ်းစာပါမှတ်တမ်းကို သံသယဝင်ကြသည်။ အခြားသူများအတွက်မူ ယေရှုသည် သူ၏စံပြအသက်တာနှင့် သွန်သင်ချက်များအားဖြင့် ခရစ်ယာန်ဘာသာလောကအဝင်ဖြစ်သည့် [ခရစ်ယာန်]ဘာသာတရားများစွာကို ဖြစ်ပေါ်စေခဲ့သူတစ်ဦးမျှသာဖြစ်သည်။ ယနေ့ဘာသာရေးပညာ မဂ္ဂဇင်း၌ ဖော်ပြထားသကဲ့သို့ အခြားသူများကလည်း ယေရှုကို “အပြစ်ချည်းသာမြင်သူ၊ ခြေဦးတည့်ရာလျှောက်သွားတတ်သော ပညာရှင်၊ အကြားအမြင်ရသည့် ကျေးလက်သား; ရပ်ရွာစည်းရုံးရေးသမား၊ အာဏာပိုင်များကို အပြစ်ရှာသော ဟစ်ပီလင်္ကာဆရာ၊ သို့မဟုတ် ပါလက်စတိုင်းရှိ ပြွတ်သိပ်ကျပ်ညပ်၊ ဆင်းရဲမွဲတေပြီး ဒေါသအိုးပေါက်ကွဲတော့မည့် အပယ်ခံကျေးရွာများအား မည်သို့စည်းရုံးရမည်ကိုနောကျေသည့် ဆွပေးသူ” အဖြစ် ရှုမြင်ကြသည်။
သာ၍ဆန်းပြားသော အခြားရှုမြင်ချက်များလည်းရှိသေးသည်။ ရက်ပ်တေးဂီတ၊ မြို့ပြ ပန်းချီပန်းပုအနုပညာအပြင် အက၌ပင် လူမည်းယေရှု၏ပုံသဏ္ဌာန်သည် ရံဖန်ရံခါ ရုတ်တရက်ပေါ်ထွက်လာသည်။ * အခြားသူများကြပြန်လျှင် ယေရှုသည် စင်စစ်အားဖြင့် အမျိုးသမီးတစ်ဦးဖြစ်သည်ဟု ထင်ကြေးပေးကြ၏။ ၁၉၉၃ ခုနှစ်၊ နွေရာသီတွင် ကယ်လီဖိုးနီးယား၊ ဩရင်ဂျ်ကောင်တီ ဈေးပွဲတော်လာသူများသည် ကားတိုင်ပေါ်မှ ဝတ်လစ်စလစ် မိန်းမသား “ခရစ်တော်” ဖြစ်သော “ခရစ္စတီး” ရုပ်ပုံကို တွေ့မြင်ခဲ့ကြရသည်။ ထိုအချိန်လောက်တွင်ပင် နယူးယောက်မြို့၌ ကားစင်တင်ထားသော မိန်းမသား “ယေရှု၊” “ခရစ္စတာ” ကိုပြသခဲ့ကြသည်။ ထိုပန်းပုရုပ်နှစ်ခုစလုံးသည် အငြင်းပွားမှုကို ဖြစ်ပေါ်စေခဲ့သည်။ ထို့ပြင် ၁၉၉၉ ခုနှစ်အစောပိုင်း၌ ဈေးဝယ်ထွက်သူများသည် “သူငယ်တော်ယေရှုနှင့် ကောင်းကင်တမန်ဖြစ်သော သူ၏ခွေးသည် အချင်းချင်းဘယ်လောက်ချစ်ကြကြောင်း” ပါသောစာအုပ်ကို တွေ့ခဲ့ကြမည်။ ၎င်းတို့၏ဆက်ဆံရေးသည် “ဝိညာဉ်ရေးဆိုင်ရာထိမိမှုရှိပြီး ထိုသူငယ်နှင့် သူ၏ခွေးသည် တစ်ဦးအတွက်တစ်ဦး အသက်ပင်စွန့်ရန် အသင့်ရှိကြောင်း” ဖော်ပြထားသည်။
ယင်းသည် တကယ်အရေးပါသလော
ယေရှုသည် မည်သူမည်ဝါဖြစ်ခဲ့ကြောင်းနှင့် ယခု မည်သူမည်ဝါဖြစ်သည်ကို အဘယ်ကြောင့် စိတ်ဝင်စားသင့်သနည်း။ တစ်ချက်အနေနှင့် နပိုလီယန်၏အဆိုအရ “ယေရှုခရစ်သည် မျက်မြင်ရခန္ဓာဖြင့်ရှိမနေဘဲနှင့် ကိုယ်တော့်လက်အောက်ခံသူတို့ကို ဩဇာညောင်း၍အမိန့်ပေးခဲ့” သောကြောင့်ဖြစ်သည်။ ယေရှုသည် မိမိ၏ထိရောက်သောသွန်သင်ချက်များနှင့် အသက်ရှင်နေထိုင်ပုံဖြင့် အသက်ရှင်ခဲ့သူ သန်းပေါင်းများစွာတို့၏ဘဝအပေါ် အနှစ်နှစ်ထောင်နီးပါး အလွန်သြဇာသက်ရောက်ခဲ့ပေပြီ။ စာရေးဆရာတစ်ဦးက ဤသို့လျော်ကန်စွာဖော်ပြခဲ့သည်– “ချီတက်ခဲ့သမျှ ကြည်းတပ်များ၊ တည်ရှိခဲ့သမျှ ရေတပ်များ၊ ဖွဲ့စည်းခဲ့သမျှ လွှတ်တော်များ၊ အုပ်စိုးခဲ့သမျှ ဧကရာဇ်များကို စုပေါင်းလိုက်လျှင်ပင် ကမ္ဘာပေါ်အသက်ရှင်ခဲ့သူ လူသားတို့၏ဘဝအပေါ် ကိုယ်တော်လောက် တန်ခိုးပါပါနှင့် ထိရောက်စွာလွှမ်းမိုးနိုင်စွမ်းမရှိပေ။”
ထို့ပြင် ယေရှုသည် သင့်အနာဂတ်ကို တိုက်ရိုက်အကျိုးသက်ရောက်မည်ဖြစ်သောကြောင့် ကိုယ်တော်သည် မည်သူမည်ဝါဖြစ်ခဲ့၍ ယခု မည်သူမည်ဝါဖြစ်ကြောင်းကို သိရှိရန်လိုသည်။ သင်သည် ယေရှုအုပ်ချုပ်သည့် ဘုရားသခင့်နိုင်ငံတော်ဖြစ်သော တည်ထောင်ပြီးဖြစ်သည့် ကောင်းကင်အစိုးရလက်အောက်တွင် နေထိုင်ခွင့်ရရန် အလားအလာရှိသည်။ ယေရှု၏ညွှန်ကြားမှုအောက်တွင် ဆင်းရဲမှုပြည့်နှက်နေသော ဤကမ္ဘာဂြိုဟ်သည် ထူးခြားစွာများပြားသော ဇီဝမျိုးစိတ်နှင့် သဘာဝ,ဝန်းကျင်မျှတမှု ပြန်ရှိလာပေမည်။ ယေရှု၏နိုင်ငံတော်သည် မွတ်သိပ်သူကိုကျွေးမွေးမည်၊ ဆင်းရဲသူကို ကြည့်ရှုထောက်ပံ့မည်၊ ရောဂါများကို ကုသပေးမည်၊ သေလွန်သူများကို ပြန်ထမြောက်လာစေမည်ဟု ကျမ်းစာပရောဖက်ပြုချက်က အာမခံသည်။
ဤမျှလိုအပ်နေသည့် ဘုရားသခင့်အစိုးရကို ဦးဆောင်မည့်သူသည် အဘယ်သို့သောသူဖြစ်ကြောင်း သင်အမှန်ပင်သိလိုပေမည်။ နောက်ဆောင်းပါးက ယေရှုအစစ်အမှန်ကို ထိုးထွင်းသိမြင်စေလိမ့်မည်။
[အောက်ခြေမှတ်ချက်]
^ အပိုဒ်၊ 7 ယေရှု၏ရုပ်ဆင်းသွင်ပြင်နှင့်စပ်လျဉ်း၍ ၁၉၉၈ ခုနှစ်၊ ဒီဇင်ဘာ ၈ ရက်ထုတ် နိုးလော့! [လိပ်] “ယေရှု၏ပုံပန်းသဏ္ဌာန်ကားအဘယ်နည်း” ဆောင်းပါးကိုရှုပါ။