မတူညီသည့်သဘောထားများကို ကြီးထွားစေသောညီနောင်
မတူညီသည့်သဘောထားများကို ကြီးထွားစေသောညီနောင်
မိဘများ၏ဆုံးဖြတ်ချက်များသည် သားသမီးများအပေါ် အမှန်ပင်သြဇာသက်ရောက်၏။ ဧဒင်ဥယျာဉ်တွင်သာမက မျက်မှောက်ခေတ်တွင်လည်း ထို့အတူဖြစ်သည်။ အာဒံနှင့်ဧဝတို့၏ ပုန်ကန်သောလမ်းစဉ်သည် လူသားအားလုံးအပေါ် အကြီးအကျယ်ဆိုးကျိုးသက်ရောက်ခဲ့၏။ (ကမ္ဘာဦး ၂:၁၅၊ ၁၆; ၃:၁-၆; ရောမ ၅:၁၂) သို့တိုင် ကျွန်ုပ်တို့တစ်ဦးစီသည် ဖန်ဆင်းရှင်နှင့် ကောင်းသောဆက်ဆံရေးရှိလိုလျှင် ၎င်းဆက်ဆံရေးကို တည်ဆောက်ခွင့်ရှိသည်။ လူ့သမိုင်းတွင် ဦးဆုံးညီနောင်ရင်းချာဖြစ်သော ကာဣနနှင့် အာဗေလတို့၏မှတ်တမ်းက ယင်းကိုဖော်ပြသည်။
ဧဒင်ဥယျာဉ်မှ အာဒံနှင့်ဧဝကိုနှင်ထုတ်ပြီးနောက် သူတို့နှင့် ဘုရားသခင်စကားပြောသည်ဟု ကျမ်းစာမှတ်တမ်းကမဖော်ပြချေ။ မည်သို့ပင်ဖြစ်ပါစေ၊ ယေဟောဝါသည် သူတို့၏သားများနှင့် စကားမပြောဘဲနေမည်မဟုတ်ပေ။ ကာဣနနှင့် အာဗေလတို့သည် ဖြစ်ပျက်ခဲ့သမျှကို သူတို့မိဘများထံမှ သိရှိခဲ့မည်မှာ သေချာသည်။ “အသက်ပင်လမ်းကို စောင့်ရှောက်စေခြင်းငှာ မီးစက်လက်နက်နှင့်တကွ ခေရုဗိမ်တို့ကို” သူတို့တွေ့မြင်နေကြ၏။ (ကမ္ဘာဦး ၃:၂၄) ပင်ပန်းနာကျင်မှုက ဘဝဖြစ်ရပ်မှန်များဖြစ်လာလိမ့်မည်ဟူသည့် ဘုရားသခင်၏ကြေညာချက် မှန်ကန်ကြောင်းကိုလည်း သူတို့တွေ့မြင်ခဲ့ကြ၏။—ကမ္ဘာဦး ၃:၁၆၊ ၁၉။
မြွေကို ယေဟောဝါပြောခဲ့သော ဤစကားများကိုလည်း ကာဣနနှင့် အာဗေလတို့သိကြပေမည်– “သင်နှင့်မိန်းမကိုလည်းကောင်း၊ သင်၏အမျိုးအနွယ်နှင့် မိန်းမ၏အမျိုးအနွယ်ကိုလည်းကောင်း ငါသည် ရန်ငြိုးဖွဲ့စေမည်။ သူသည် သင်၏ခေါင်းကိုကြိတ်လိမ့်မည်၊ သင်သည် သူ၏ဖနောင့်ကိုကြိတ်လိမ့်မည်။” (ကမ္ဘာဦး ၃:၁၅) ယေဟောဝါအကြောင်း ကာဣနနှင့် အာဗေလတို့ သိရှိခဲ့ရာများသည် ကိုယ်တော်နှင့် မျက်နှာသာရဆက်ဆံရေးရှိစေနိုင်မည်။
ယေဟောဝါ၏ပရောဖက်ပြုချက်နှင့် မေတ္တာရှိကျေးဇူးရှင်အဖြစ် ကိုယ်တော်၏အရည်အသွေးများကို ဆင်ခြင်တွေးတောခြင်းက ကာဣနနှင့် အာဗေလတို့အား ဘုရားသခင်၏မျက်နှာတော် ရလိုစိတ်ကိုဖြစ်ပေါ်စေပေမည်။ သို့သော် သူတို့သည် ထိုစိတ်ဆန္ဒကို အဘယ်အတိုင်းအတာအထိ ပြုစုပျိုးထောင်ကြမည်နည်း။ ဘုရားသခင်ကို ဝတ်ပြုလိုသည့် သူတို့၏မွေးရာပါဆန္ဒနှင့်အညီ ပြုမူကြပြီး ကိုယ်တော်ကို ယုံကြည်ကြောင်းတင်ပြသည့်အထိ သူတို့၏ဝိညာဉ်ရေးကို တိုးပွားစေမည်လော။—မဿဲ ၅:၃။
ညီနောင်တို့ ပူဇော်ရာများ ယူဆောင်လာ
အချိန်တန်သောအခါ ကာဣနနှင့် အာဗေလတို့သည် ဘုရားသခင်ထံ ပူဇော်ရာများ ယူဆောင်လာကြ၏။ ကာဣနသည် မြေအသီးများကို ဆက်သပြီး အာဗေလမူ သူ၏သိုးစုမှ အဦးဖွားသောသိုးများကို ပူဇော်ခဲ့သည်။ (ကမ္ဘာဦး ၄:၃၊ ၄) သူတို့၏အသက်သည် ၁၀၀ ခန့်ရှိနိုင်၏၊ အကြောင်းမှာ အာဒံ၏သား ရှေသမွေးဖွားချိန်တွင် သူ၏အသက် ၁၃၀ ရှိသည်။—ကမ္ဘာဦး ၄:၂၅; ၅:၃။
ကာဣနနှင့် အာဗေလတို့၏ပူဇော်ရာများက သူတို့တွင် အပြစ်ရှိအနေအထားကို အသိအမှတ်ပြုပြီး ဘုရားသခင်၏မျက်နှာသာရလိုကြောင်းဖော်ပြ၏။ မြွေနှင့် မိန်းမ၏အမျိုးအနွယ်အကြောင်း ယေဟောဝါ၏ကတိတော်ကို သူတို့ အနည်းငယ်စဉ်းစားခဲ့ကြပေမည်။ ကာဣနနှင့် အာဗေလတို့သည် ယေဟောဝါ၏မျက်နှာသာရဆက်ဆံရေးရရှိရန် အချိန်မည်မျှပေး၍ မည်မျှကြိုးစားအားထုတ်ခဲ့သည်ကို မဖော်ပြထားချေ။ သို့သော် သူတို့၏ပူဇော်ရာများကို ဘုရားသခင်တုံ့ပြန်ပုံက တစ်ဦးစီ၏စိတ်နှလုံးအကြံအစည်ကို ပေါ်လွင်စေခဲ့၏။
ကာဣနမွေးဖွားချိန်တွင် ဧဝက “ထာဝရဘုရား[သခင်]၏လူကို ငါရပြီဟုဆို” သောကြောင့် ကာဣနသည် မြွေကိုဖျက်ဆီးမည့် “အမျိုးအနွယ်” ဖြစ်လိမ့်မည်ဟု ဧဝယူဆခဲ့ကြောင်း ကျမ်းပညာရှင်အချို့ကဆို၏။ (ကမ္ဘာဦး ၄:၁) ဤသို့ ကာဣနယူမှတ်ခဲ့လျှင် အမှားကြီးမှားပါသည်။ အခြားတစ်ဖက်တွင်မူ၊ အာဗေလ၏ပူဇော်ရာယဇ်တွင် ယုံကြည်ခြင်းနှင့်ဒွန်တွဲနေ၏။ သို့ဖြစ်၍ “အာဗေလသည် ကာဣနပူဇော်သောယဇ်ထက် သာ၍မြတ်သောယဇ်ကို ယုံကြည်ခြင်းအားဖြင့် ဘုရားသခင်အားပူဇော်၏။”—ဟေဗြဲ ၁၁:၄။
အာဗေလ၏ ဝိညာဉ်ရေးထိုးထွင်းသိမြင်မှုရှိခြင်းနှင့်ကာဣန၏ ဝိညာဉ်ရေးထိုးထွင်းသိမြင်မှုမရှိခြင်းတို့သည် ဤညီနောင်စပ်ကြား တစ်ခုတည်းသောကွာခြားချက်သာ မဟုတ်ချေ။ သူတို့၏သဘောထားချင်းလည်း ကွာခြား၏။ ထို့ကြောင့် “ထာဝရဘုရား[သခင်]သည် အာဗေလနှင့် သူ၏ပူဇော်[ရာယဇ်]ကို ပမာဏပြုတော်မူ၏။ ကာဣနနှင့်သူ၏ပူဇော်[ရာယဇ်]ကို ပမာဏပြုတော်မမူ။” ကာဣနသည် သူ၏ပူဇော်ရာယဇ်ကို အပေါ်ယံသဘောဖြင့်သာ ပူဇော်ပြီး ဝတ်ကျေတမ်းကျေမျှဆက်သခဲ့ပုံရသည်။ သို့ရာတွင် ဘုရားသခင်သည် ဟန်ပြဝတ်ပြုကိုးကွယ်မှုကို မနှစ်သက်ချေ။ ကာဣနတွင် ဆိုးညစ်သောနှလုံးရှိလာပြီး သူ၏ရည်ရွယ်ချက်မှားများကို ယေဟောဝါသတိပြုမိသည်။ ကာဣန၏ပူဇော်ရာယဇ် ငြင်းပယ်ခံရခြင်းကို သူ၏တုံ့ပြန်ပုံက သူ၏သဘောထားအမှန်ကို ပေါ်လွင်စေခဲ့သည်။ တည့်မတ်ပြုပြင်မည့်အစား “ကာဣနသည် အလွန်စိတ်ဆိုး၍ မျက်နှာပျက်လေ၏။” (ကမ္ဘာဦး ၄:၅) သူ၏အမူအကျင့်က ဆိုးညစ်သောအယူအဆများရှိပြီး ရည်ရွယ်ချက်မှားကြောင်း ဖော်ပြနေသည်။
သတိပေးခြင်းနှင့် တုံ့ပြန်ခြင်း
ဘုရားသခင်သည် ကာဣန၏သဘောထားကိုသိရှိသောကြောင့် ဤသို့ဆုံးမခဲ့၏– “သင်သည် အဘယ်ကြောင့် စိတ်ဆိုးသနည်း။ အဘယ်ကြောင့်မျက်နှာပျက်သနည်း။ သင်သည် ကောင်းမွန်စွာပြုလျှင် အခွင့်မရလော။ ကောင်းမွန်စွာမပြုလျှင် အပြစ်ဖြေသောယဇ်ကောင်သည် တံခါးနားမှာ ဝပ်လျက်ရှိ၏။ သူသည် သင်၏အလိုသို့လိုက်၍ သင်သည် သူ့ကိုအုပ်စိုးရ၏။”—ကမ္ဘာဦး ၄:၆၊ ၇။
ဤတွင် ကျွန်ုပ်တို့အတွက် လက်တွေ့ကျသင်ခန်းစာရှိသည်။ အမှန်ဆိုသော် ကျွန်ုပ်တို့ရှေ့မှောက် အပြစ်ပြုနိုင်စရာအကြောင်း များစွာရှိ၏။ သို့တိုင် ဘုရားသခင်သည် ကျွန်ုပ်တို့ကို လွတ်လပ်စွာဆုံးဖြတ်ပိုင်ခွင့်ပေးထားရာ မှန်ရာကိုရွေးချယ်ပြုလုပ်နိုင်သည်။ ယေဟောဝါသည် ကာဣနကို “ကောင်းမွန်စွာပြု” ရန်ပြောဆိုသော်လည်း အတင်းအကျပ်မပြုလုပ်ခဲ့ချေ။ ကာဣနသည် သူ့လမ်းသူရွေးချယ်ခဲ့၏။
မှုတ်သွင်းခံမှတ်တမ်းက ဤသို့ဆက်ဆိုသည်– “ကာဣနကလည်း ‘လယ်သို့သွားကြကုန်အံ့’ ဟု ညီအာဗေလကိုခေါ်၍ လယ်သို့ရောက်သောအခါ ညီအာဗေလကို ရန်ဘက်ပြု၍သတ်လေ၏။” (ကမ္ဘာဦး ၄:၈) သို့နှင့် ကာဣနသည် နာခံမှုမရှိသော သွေးအေးလူသတ်သမားတစ်ဦးဖြစ်လာခဲ့သည်။ ယေဟောဝါက “သင့်ညီအာဗေလသည် အဘယ်မှာရှိသနည်း” ဟုမေးသောအခါ သူသည် နည်းနည်းလေးမှနောင်တမရခဲ့ချေ။ ယင်းအစား၊ အကြင်နာကင်းမဲ့စွာ မောက်မောက်မာမာဖြင့် “အကျွန်ုပ်မသိပါ။ အကျွန်ုပ်သည် ညီကိုစောင့်ရသောသူဖြစ်ပါသလော” ဟုကာဣနလျှောက်ဆို၏။ (ကမ္ဘာဦး ၄:၉) ဤသို့ဗြောင်လိမ်ညာပြီး တာဝန်မယူခြင်းက ကာဣန၏အကြင်နာကင်းမဲ့မှုကို ဖော်ပြသည်။
ယေဟောဝါသည် ကာဣနကို ကျိန်ပြီး ဧဒင်ဥယျာဉ်ဝန်းကျင်မှ နှင်ထုတ်လိုက်လေသည်။ ကျိန်ခြင်းခံရပြီးသောမြေကြီးသည် ကာဣနကိစ္စတွင် ပို၍ထင်ရှားလာပြီး မြေကြီးကို သူစိုက်ပျိုးသည့်အခါ အသီးသီးလိမ့်မည်မဟုတ်ပေ။ သူသည် မြေကြီးပေါ်တွင် ခြေဦးတည့်ရာလှည့်လည်သွားလာရလိမ့်မည်။ ကြီးလေးသောပြစ်ဒဏ်စီရင်ခံရခြင်းကို ကာဣနညည်းညူခဲ့ခြင်းက ညီကိုလုပ်ကြံမှုကြောင့် မိမိလက်တုံ့ပြန်ခံရမည်ကို စိုးရိမ်ကြောင်း ထင်ရှားသော်လည်း သူ့တွင် စိတ်ရင်းမှန်သောနောင်တမရှိကြောင်း ပေါ်လွင်သည်။ ယေဟောဝါသည် ကာဣနအတွက် “အမှတ်” လက္ခဏာတစ်ခုပေးတော်မူခဲ့သည်၊ ယင်းကား အရေးပါလေးနက်သောအမိန့်တစ်ခုဖြစ်နိုင်ပြီး ၎င်းကို အခြားသူများ လိုက်နာကြရပေမည်၊ သူ့ကို ကလဲ့စားချေပြန်သတ်ခြင်းမှ ကာကွယ်ခံရလိမ့်မည်ဖြစ်သည်။—ကမ္ဘာဦး ၄:၁၀-၁၅။
ထို့နောက် ကာဣနသည် “ထာဝရဘုရား[သခင်]ထံတော်မှထွက်သွား၍ ဧဒင်ပြည်အရှေ့ နောဒပြည်တွင်နေလေ၏။” (ကမ္ဘာဦး ၄:၁၆) သူ၏ညီမများမှ သို့မဟုတ် တူမများမှ ဇနီးအဖြစ် တစ်ဦးကိုယူပြီး သူ၏သားဦး ဧနောက်အမည်ဖြင့် မြို့တစ်မြို့ကို တည်ထောင်ခဲ့သည်။ ကာဣနမှဆင်းသက်လာသူ လာမက်သည် ဘုရားတရားမဲ့ဘိုးဘေးကဲ့သို့ပင် အကြမ်းဖက်သူတစ်ဦးဖြစ်လာလေသည်။ သို့သော် ကာဣန၏ဆွေစဉ်မျိုးဆက်သည် နောဧခေတ် ရေလွှမ်းမိုးချိန်တွင် ဖျက်ဆီးခံခဲ့ရ၏။—ကမ္ဘာဦး ၄:၁၇-၂၄။
ကျွန်ုပ်တို့အတွက်သင်ခန်းစာများ
ကာဣနနှင့် အာဗေလတို့၏မှတ်တမ်းမှ ကျွန်ုပ်တို့သင်ခန်းစာရယူနိုင်သည်။ “[စာတန်]နှင့်ဆိုင်၍ မိမိညီကိုသတ်သောကာဣနကဲ့သို့မဟုတ်၊” အချင်းချင်းတစ်ယောက်ကိုတစ်ယောက် ချစ်ကြရန် ခရစ်ယာန်များကို တမန်တော်ယောဟန်တိုက်တွန်းခဲ့သည်။ ကာဣန၏ “အကျင့်သည် ဆိုးယုတ်၍ ညီ၏အကျင့်သည် ဖြောင့်မတ်သတည်း။” “မိမိညီအစ်ကိုကိုမုန်းသောသူမည်သည်ကား၊ လူအသက်ကိုသတ်သောသူဖြစ်၏။ လူအသက်ကိုသတ်သောသူတစ်စုံတစ်ယောက်၌မျှ ထာဝရအသက်မတည်သည်ကို သင်တို့သိကြ၏” ဟူ၍လည်း ယောဟန်ဖော်ပြသည်။ မှန်ပါသည်၊ ခရစ်ယာန်ချင်းများကို ကျွန်ုပ်တို့ဆက်ဆံပုံသည် ဘုရားသခင်နှင့် ကျွန်ုပ်တို့၏ဆက်ဆံရေး၊ ကျွန်ုပ်တို့၏အသက်ရရေးအပေါ် ဩဇာသက်ရောက်သည်။ ယုံကြည်သူချင်းတစ်ဦးတစ်ယောက်ကို မုန်းလျှင် ဘုရားသခင်၏မျက်နှာသာတော် ရရှိနိုင်မည်မဟုတ်ချေ။—၁ ယောဟန် ၃:၁၁-၁၅; ၄:၂၀။
ကာဣနနှင့် အာဗေလတို့သည် တစ်ပုံစံတည်းပြုစုပျိုးထောင်ခံခဲ့ရသော်လည်း ကာဣနမှာမူ ဘုရားသခင်ကို ယုံကြည်ခြင်းမရှိချေ။ အမှန်ဆိုရလျှင် သူသည် အဦးဆုံး ‘လူသတ်သမားနှင့် မုသာ၏အဘ’ ဖြစ်သူ စာတန်၏စိတ်ဓာတ်ကို ပြသခဲ့သည်။ (ယောဟန် ၈:၄၄) ကာဣန၏လမ်းစဉ်က ကျွန်ုပ်တို့အားလုံး ရွေးချယ်မှုပြုရမည်ကိုဖော်ပြသည်၊ အပြစ်ပြုလိုသူများသည် ဘုရားသခင်နှင့်ဝေးကွာသွားပြီး နောင်တမရသူများကို ယေဟောဝါတရားစီရင်မည်ဖြစ်ကြောင်း သိရှိစေသည်။
အခြားတစ်ဖက်တွင်မူ၊ အာဗေလသည် ယေဟောဝါကိုယုံကြည်ကြောင်း တင်ပြခဲ့သည်။ မှန်ပါသည်၊ “အာဗေလသည် ကာဣနပူဇော်သောယဇ်ထက် သာ၍မြတ်သောယဇ်ကို ယုံကြည်ခြင်းအားဖြင့် ဘုရားသခင်အားပူဇော်၏။ ထိုသို့သောယဇ်ကိုပူဇော်၍ မိမိဖြောင့်မတ်သည်ဟု သက်သေခံတော်မူခြင်းကိုရလေ၏။ အဘယ်သို့နည်းဟူမူကား၊ သူလှူသောအလှူကို ဘုရားသခင်သည် လက်ခံတော်မူ၏။” သမ္မာကျမ်းစာတွင် အာဗေလ၏စကား တစ်ခွန်းတစ်ပါဒမျှမပါရှိသော်လည်း သူ၏ယုံကြည်ခြင်းပုံနမူနာအားဖြင့် သူသည် “ယခုပင် တရားဟောသေး၏။”—ဟေဗြဲ ၁၁:၄။
သမာဓိစောင့်သိသူများစာရင်းတွင် အာဗေလသည် ထိပ်ဆုံးဖြစ်သည်။ သူ့အသွေး၏ ‘အသံသည် မြေထဲက ယေဟောဝါကို အော်ဟစ်’ လျက်ရှိ၏၊ မေ့ပျောက်၍မရနိုင်ချေ။ (ကမ္ဘာဦး ၄:၁၀; လုကာ ၁၁:၄၈-၅၁) အာဗေလနည်းတူ ကျွန်ုပ်တို့လည်း ယုံကြည်ခြင်းတင်ပြကြမည်ဆိုလျှင် ယေဟောဝါနှင့် တန်ဖိုးမဖြတ်နိုင်သော မြဲမြံသည့်ဆက်ဆံရေးကို ရရှိနိုင်ကြပါသည်။
[စာမျက်နှာ ၂၂ ပါ လေးထောင့်ကွက်]
လယ်သမားနှင့် သိုးထိန်း
စိုက်ပျိုးခြင်းနှင့် တိရစ္ဆာန်များထိန်းကျောင်းခြင်းသည် အာဒံကို ဘုရားသခင် ဦးဆုံးပေးခဲ့သည့် တာဝန်အချို့ဖြစ်၏။ (ကမ္ဘာဦး ၁:၂၈; ၂:၁၅; ၃:၂၃) သူ၏သားကာဣနသည် လယ်လုပ်ပြီး အာဗေလသည် သိုးထိန်းခဲ့သည်။ (ကမ္ဘာဦး ၄:၂) သို့သော် ရေလွှမ်းမိုးခြင်းမတိုင်မီ ဟင်းသီးဟင်းရွက်များကိုသာ လူတို့စားကြရာအဘယ်ကြောင့် သိုးမွေးမြူကြသနည်း။—ကမ္ဘာဦး ၁:၂၉; ၉:၃၊ ၄။
သိုးများသည် ကျန်းမာသန်စွမ်းရန် ဂရုစိုက်ပေးဖို့လိုသည်။ လူ့သမိုင်းအစအဦးကတည်းက လူသည် အဆိုပါအိမ်မွေး တိရစ္ဆာန်များကို မွေးမြူခဲ့ကြောင်း အာဗေလ၏အလုပ်က ထင်ရှားစေသည်။ ကနဦးလူသားများသည် တိရစ္ဆာန်နို့ကို သောက်သုံးသည်၊ မသောက်သုံးသည်ကို ကျမ်းစာကမဖော်ပြသော်လည်း ဟင်းသီးဟင်းရွက်စားသူများပင် သိုးမွေးကိုအသုံးပြုနိုင်ကြသည်။ ထို့ပြင် သိုးများသေသောအခါ သူတို့၏သားရေများကိုလည်း အသုံးပြုကြ၏။ ဥပမာ၊ ယေဟောဝါသည် အာဒံနှင့် ဧဝ,ဝတ်ဆင်ရန် “သားရေဖြင့် ဝတ်လုံ” ကိုပေးခဲ့သည်။—ကမ္ဘာဦး ၃:၂၁။
မည်သို့ပင်ဖြစ်ပါစေ၊ ကာဣနနှင့် အာဗေလတို့သည် အစပိုင်း၌ တစ်ဦးနှင့် တစ်ဦး ပူးပေါင်းဆောင်ရွက်ခဲ့ကြသည်ဟု ယူဆဖို့အကြောင်းရှိသည်။ မိသားစုထဲရှိသူများဝတ်ဆင်ရန်နှင့် စားသောက်ရန် သူတို့ပြုလုပ်ပေးခဲ့ကြသည်။
[စာမျက်နှာ ၂၃ ပါ ရုပ်ပုံ]
ကာဣန၏ “အကျင့်သည် ဆိုးယုတ်၍ ညီ၏အကျင့်သည် ဖြောင့်မတ်သတည်း”