ယေဟောဝါ—အမြင့်မြတ်ဆုံး ကောင်းမြတ်ခြင်း စံနမူနာရှင်
ယေဟောဝါ—အမြင့်မြတ်ဆုံး ကောင်းမြတ်ခြင်း စံနမူနာရှင်
“[ယေဟောဝါ] သည် ကောင်းမြတ်တော်မူ . . . သောကြောင့် . . . ဗိုလ်ခြေအရှင် [ယေဟောဝါ] ကိုချီးမွမ်းကြလော့။” —ယေရမိ ၃၃:၁၁။
၁။ ဘုရားသခင်၏ ကောင်းမြတ်တော်မူခြင်းအတွက် ကိုယ်တော်အားချီးမွမ်းရန် ကျွန်ုပ်တို့အဘယ်ကြောင့်လှုံ့ဆော်ခံရကြသနည်း။
ယေဟောဝါဘုရားသခင်သည် အကြွင်းမဲ့သဘောဖြင့် ကောင်းမြတ်တော်မူ၏။ “[ကိုယ်တော်၏ကောင်းမြတ်ခြင်း] သည် အလွန်ကြီးစွတကား” ဟုပရောဖက်ဇာခရိကြွေးကြော်ခဲ့သည်။ (ဇာခရိ ၉:၁၇) အမှန်ဆိုလျှင် ကျွန်ုပ်တို့မွေ့လျော်ခံစားဖို့ မြေကြီးကိုပြင်ဆင်ရာ၌ ဘုရားသခင်ပြုခဲ့လေသမျှတွင် ကောင်းမြတ်ခြင်းထင်ဟပ်လျက်ရှိသည်။ (ကမ္ဘာဦး ၁:၃၁) စကြဝဠာကိုဖန်ဆင်းစဉ်က ဘုရားသခင်အတည်ပြုခဲ့သော ရှုပ်ထွေးနက်နဲသည့်နိယာမအားလုံးကို ကျွန်ုပ်တို့ဘယ်သောအခါမျှ နားလည်နိုင်မည်မဟုတ်။ (ဒေ. ၃:၁၁; ၈:၁၇) သို့သော် ကျွန်ုပ်တို့သိထားသည့် အနည်းအကျဉ်းက ဘုရားသခင်၏ ကောင်းမြတ်တော်မူရာအတွက် ကိုယ်တော်အားချီးမွမ်းရန်လှုံ့ဆော်ပေးသည်။
၂။ ကောင်းမြတ်ခြင်းကို သင်မည်သို့အဓိပ္ပာယ်ဖွင့်မည်နည်း။
၂ ကောင်းမြတ်ခြင်းဟူသည် အဘယ်နည်း။ ယင်းသည် အထူးကောင်းမွန်သည့်ကိုယ်ကျင့်တရား သို့မဟုတ် မွန်မြတ်သောအကျင့်ဖြစ်သည်။ သို့သော် မကောင်းမှုမှန်သမျှ မရှိရုံမျှမကပါ။ ဝိညာဉ်အသီးတစ်လုံးဖြစ်သော ကောင်းမြတ်ခြင်းသည် အပြုသဘောပါသောအရည်အသွေးတစ်ခုဖြစ်သည်။ (ဂလာတိ ၅:၂၂၊ ၂၃) သူတစ်ပါးအကျိုးသယ်ပိုး၍ ကောင်းမှုပြုသောအခါ ကောင်းမြတ်ခြင်းကို ကျွန်ုပ်တို့တင်ပြကြသည်။ ဤအစီအစဉ်စနစ်တွင် အချို့အသိုင်းအဝိုင်းက အကောင်းဟုယူမှတ်ရာကို အခြားသူတို့က အဆိုးဟုရှုမြင်ကြပေမည်။ သို့သော် ငြိမ်သက်မှုနှင့်ပျော်ရွှင်မှုကို ကျွန်ုပ်တို့ခံစားလိုပါက ကောင်းမြတ်ခြင်းဆိုင်ရာ စံနှုန်းတစ်ခုတည်းရှိရပေမည်။ ၎င်းစံနှုန်းကို မည်သူမှန်ကန်စွာ ပြဋ္ဌာန်းပေးနိုင်သနည်း။
၃။ ကောင်းမြတ်ခြင်းစံနှုန်းနှင့်ပတ်သက်၍ ကမ္ဘာဦး ၂:၁၆၊ ၁၇ ကအဘယ်အရာကိုဖော်ပြသနည်း။
၃ ကောင်းမြတ်ခြင်းစံနှုန်းကို ဘုရားသခင်ပြဋ္ဌာန်းတော်မူသည်။ လူ့သမိုင်းအစတွင် ယေဟောဝါသည် ပထမလူသားကို ဤသို့မိန့်မှာခဲ့သည်– “ကောင်းမကောင်းကိုသိကျွမ်းရာအပင်မှတစ်ပါး ထိုဥယျာဉ်၌ရှိသမျှသောအပင်တို့၏အသီးကို သင်သည်စားရသောအခွင့်ရှိ၏။ ထိုအပင်၏အသီးကိုကားမစားရ။ စားသောနေ့တွင် ဧကန်အမှန်သေရမည်။”(ကမ္ဘာဦး ၂:၁၆၊ ၁၇) မှန်ပါသည်၊ ကောင်းမကောင်းကိုသိကျွမ်းဖို့ လူသားတို့သည် မိမိတို့ဖန်ဆင်းရှင်ကို မျှော်ကိုးဖို့လိုသည်။
မခံစားထိုက်သော ကောင်းမြတ်ခြင်းထင်ရှားပြသမှု
၄။ အာဒံအပြစ်ပြုပြီးချိန်မှစ၍ ဘုရားသခင်သည် လူသားတို့အတွက် အဘယ်အရာပြုတော်မူခဲ့ပြီနည်း။
၄ ကောင်းမြတ်ခြင်းစံနှုန်းများကို ဘုရားသခင်ပြဋ္ဌာန်းပိုင်ခွင့်ရှိကြောင်း အာဒံအပြစ်ပြုပြီး အသိအမှတ်ပြုဖို့ငြင်းပယ်ခဲ့စဉ်က စုံလင်မှုဖြင့် လူသားတို့ ထာဝရပျော်ရွှင်စွာနေထိုင်ရမည့် အလားအလာကိုထိခိုက်စေခဲ့သည်။ (ကမ္ဘာဦး ၃:၁-၆) သို့သော် အပြစ်နှင့်သေခြင်းကို အမွေခံရသူများအဖြစ် အာဒံ၏သားမြေးများမမွေးဖွားမီ ဘုရားသခင်သည် စုံလင်သောမျိုးနွယ်တော်ကြွလာမည့်အကြောင်း ကြိုပြောခဲ့သည်။ အမှန်မှာ “ရှေးမြွေဟောင်း” စာတန်ကိုရည်စူးပြီး ဤသို့ယေဟောဝါအတိအလင်းမိန့်ဆိုခဲ့သည်– “သင်နှင့်မိန်းမကိုလည်းကောင်း၊ သင်၏အမျိုးအနွယ်နှင့် မိန်းမ၏အမျိုးအနွယ်ကိုလည်းကောင်း ငါသည်ရန်ငြိုးဖွဲ့စေမည်။ သူသည်သင်၏ခေါင်းကိုကြိတ်လိမ့်မည်၊ သင်သည်သူ၏ဖနောင့်ကိုကြိတ်လိမ့်မည်။” (ဗျာဒိတ် ၁၂:၉; ကမ္ဘာဦး ၃:၁၅) ယေဟောဝါ၏ရည်ရွယ်တော်မူချက်မှာ အပြစ်သားများကို ပြန်လည်ရွေးနုတ်ဖို့ဖြစ်သည်။ မခံစားထိုက်သော ကောင်းမြတ်ခြင်းကို ထင်ရှားပြသရာတွင် ယေဟောဝါသည် မိမိချစ်မြတ်နိုးသောသားတော်၏ ရွေးနုတ်ဖိုးပူဇော်ခြင်းကို ယုံကြည်ကြောင်းတင်ပြသူတို့အား ကယ်တင်ဖို့ အမှန်စီစဉ်ထားတော်မူပြီ။—မဿဲ ၂၀:၂၈; ရောမ ၅:၈၊ ၁၂။
၅။ ဆိုးညစ်သောစိတ်နှလုံးအကြံအစည်ကို ကျွန်ုပ်တို့အမွေရခဲ့ကြသည့်တိုင် ကောင်းမြတ်ခြင်းကို အတိုင်းအတာတစ်ခုအထိ အဘယ်ကြောင့်တင်ပြနိုင်ကြသနည်း။
၅ အမှန်မှာ အာဒံ၏အပြစ်ကြောင့် ကျွန်ုပ်တို့သည် စိတ်နှလုံးအကြံအစည်ဆိုးကို အမွေရထားကြသည်။ (ကမ္ဘာဦး ၈:၂၁) သို့သော် ဝမ်းသာစရာမှာ ကောင်းမြတ်ခြင်းကို အတိုင်းအတာတစ်ခုအထိတင်ပြနိုင်ရန် ကျွန်ုပ်တို့ကို ယေဟောဝါကူညီပေးခြင်းဖြစ်သည်။ ကိုယ်တော်၏အဖိုးတန်သမ္မာကျမ်းစာမှ သင်ယူခဲ့ရာများ၌ တည်နေခြင်းအားဖြင့် ကျွန်ုပ်တို့သည် ‘ကယ်တင်ခြင်းအလိုငှာ ပညာ’ ရစေ၍ ‘ကောင်းမှုအမျိုးမျိုးတို့ကိုပြုဖို့ ပြင်ဆင်’ ခံရရုံမက ကိုယ်တော့်မျက်မှောက်တော်၌လည်း ကောင်းမှုပြုစေပါသည်။ (၂ တိမောသေ ၃:၁၄-၁၇) သို့သော် ကျမ်းစာသွန်သင်ချက်မှ အကျိုးရရှိပြီး ကောင်းမြတ်ခြင်းကိုတင်ပြဖို့ “ကိုယ်တော် [ယေဟောဝါ] သည် ကောင်းသောသဘော၊ ကျေးဇူးပြုတတ်သောသဘောရှိတော်မူ၏။ အထုံးအဖွဲ့တော်တို့ကို အကျွန်ုပ်၌ သွန်သင်တော်မူပါ” ဟုသီဆိုခဲ့သူ ဆာလံဆရာ၏သဘောထားမျိုး ကျွန်ုပ်တို့၌ရှိရကြမည်။—ဆာလံ ၁၁၉:၆၈။
ယေဟောဝါ၏ကောင်းမြတ်ခြင်း ချီးမွမ်းခံရ
၆။ ပဋိညာဉ်သေတ္တာကို ယေရုရှလင်မြို့သို့ ဒါဝိဒ်ယူဆောင်ခဲ့ပြီးနောက် အဘယ်ဖော်ပြချက်ပါရှိသော သီချင်းတစ်ပုဒ်ကို လေဝိသားတို့သီဆိုခဲ့ကြသနည်း။
၆ ရှေးခေတ်ဣသရေလရှင်ဘုရင်ဒါဝိဒ်သည် ဘုရားသခင်၏ကောင်းမြတ်ခြင်းကို အသိအမှတ်ပြု၍ ကိုယ်တော့်လမ်းညွှန်မှုကိုရှာယူခဲ့သည်။ “[ယေဟောဝါ] သည် ကောင်းသောသဘော၊ ဖြောင့်မတ်သောသဘောနှင့်ပြည့်စုံတော်မူသည်ဖြစ်၍ အပြစ်ရှိသောသူတို့ကို လမ်းပြတော်မူ၏” ဟုဒါဝိဒ်ဆိုခဲ့သည်။ (ဆာလံ ၂၅:၈) ဣသရေလလူမျိုးကိုပေးခဲ့သော ဘုရားသခင့်ညွှန်ကြားချက်တွင် ကျောက်ပြားနှစ်ပြားပေါ်ရေးသားပြီး မြင့်မြတ်သောသေတ္တာတော်ခေါ် ပဋိညာဉ်သေတ္တာထဲထည့်ထားသည့် အရေးကြီးဥပဒေဆယ်ခု—ပညတ်တော်ဆယ်ပါး—ပါဝင်သည်။ သေတ္တာတော်ကို ဣသရေလနိုင်ငံ၏မြို့တော် ယေရုရှလင်မြို့သို့ ဒါဝိဒ်ယူဆောင်လာပြီးနောက် ဤဖော်ပြချက်ပါသောသီချင်းတစ်ပုဒ်ကို လေဝိသားတို့သီဆိုခဲ့ကြသည်– “[ယေဟောဝါ] ဘုရား[သခင်]သည် ကောင်းမြတ်တော်မူ၍ ကရုဏာတော် [သနားကြင်နာခြင်း]အစဉ်အမြဲတည်သောကြောင့် ဂုဏ်ကျေးဇူးတော်ကို ချီးမွမ်းကြလော့။” (၁ ရာဇဝင်ချုပ် ၁၆:၃၄၊ ၃၇-၄၁) ဤစကားများကို လေဝိသီချင်းသည်များ၏နှုတ်မှ ကြားရခြင်းသည် နှစ်လိုဖွယ်ကောင်းလိုက်လေခြင်း!
၇။ ပဋိညာဉ်သေတ္တာတော်ကို အသန့်ရှင်းဆုံးအခန်းထဲယူဆောင်လာပြီး ရှောလမုန်၏အပ်နှံမှုဆုတောင်းချက်ပြီးနောက် အဘယ်အရာဖြစ်ပျက်ခဲ့သနည်း။
၇ ဒါဝိဒ်၏သားတော် ရှောလမုန်တည်ဆောက်ခဲ့သော ဘုရားသခင့်ဗိမာန်တော်အပ်နှံပွဲအတွင်း အလားတူချီးမွမ်းစကားများကို အလေးပေးဖော်ပြခဲ့ကြသည်။ ပဋိညာဉ်သေတ္တာတော်ကို တည်ဆောက်ထားခါစ ဗိမာန်တော်၏ အသန့်ရှင်းဆုံးဌာနအတွင်းထည့်ပြီးနောက် လေဝိသားတို့က “ကိုယ်တော်သည် ကောင်းမြတ်တော်မူ၏။ မေတ္တာကျေးဇူးတော်အစဉ်အမြဲတည်၏” ဟူ၍ ယေဟောဝါကိုစတင်ချီးမွမ်းခဲ့ကြသည်။ ထိုအခါသမယတွင် ဗိမာန်တော်သည် ယေဟောဝါ၏ဘုန်းတော်သက်ရောက်ကြောင်း ကိုယ်စားပြုသည့် မိုးတိမ်ဖြင့် အံ့ဖွယ်ကောင်းစွာပြည့်လေ၏။ (၂ ရာဇဝင်ချုပ် ၅:၁၃၊ ၁၄) ရှောလမုန်၏အပ်နှံမှုဆုတောင်းချက်ပြီးနောက် “ကောင်းကင်မှမီးကျ၍ မီးရှို့ရာယဇ်အစရှိသော ယဇ်မျိုးကိုလောင် . . . ၏။” ယင်းကိုမြင်သောအခါ “ဣသရေလအမျိုးသားအပေါင်းတို့သည် . . . ကျောက်ခင်းအရပ်၌ မြေပေါ်မှာဦးချပျပ်ဝပ်လျက် ‘ကောင်းမြတ်တော်မူသည်၊ ကရုဏာတော် [သနားကြင်နာခြင်း]အစဉ်အမြဲတည်သည်’ ဟု [ယေဟောဝါ] ကိုကိုးကွယ်၍ ဂုဏ်တော်ကိုချီးမွမ်းကြ၏။” (၂ ရာဇဝင်ချုပ် ၇:၁-၃) ၁၄ ရက်ကြာပွဲခံပြီးနောက် “[ယေဟောဝါ] သည် ဒါဝိဒ်နှင့်ရှောလမုန်မှစသော မိမိလူဣသရေလအမျိုးသားတို့၌ ပြုတော်မူသမျှသောကျေးဇူးတော်ကြောင့် ဝမ်းမြောက်ရွှင်လန်းလျက်” ဣသရေလလူတို့သည် မိမိတို့အိမ်သို့ပြန်သွားကြ၏။—၂ ရာဇဝင်ချုပ် ၇:၁၀။
၈၊ ၉။ (က) ဣသရေလလူတို့သည် ယေဟောဝါ၏ကောင်းမြတ်ခြင်းကိုချီးမွမ်းခဲ့ကြသော်လည်း အဆုံး၌ အဘယ်လမ်းစဉ်လိုက်ခဲ့ကြသနည်း။ (ခ) ယေရုရှလင်မြို့နှင့်ပတ်သက်၍ ယေရမိအားဖြင့် အဘယ်အရာကြိုဟောခဲ့ပြီး ထိုပရောဖက်ပြုချက်သည် မည်သို့ပြည့်စုံခဲ့သနည်း။
၈ ဝမ်းနည်းစရာမှာ ဣသရေလလူတို့သည် ဘုရားသခင်ထံ မိမိတို့၏ချီးမွမ်းသီချင်းများနှင့်အညီ ဆက်မနေထိုင်ခဲ့ကြချေ။ အချိန်တန်သော် ယုဒလူတို့သည် ‘နှုတ်ခမ်းနှင့်သာ ယေဟောဝါကို ဂုဏ်တင်ချီးမွမ်းခဲ့ကြသည်။’ (ဟေရှာယ ၂၉:၁၃) သူတို့သည် ဘုရားသခင်၏ ကောင်းမြတ်ခြင်းစံနှုန်းနှင့်လျော်ညီစွာ ပြုမူမည့်အစား မကောင်းမှုကိုကျင့်စပြုခဲ့ကြသည်။ သူတို့၏မကောင်းမှု၌ အဘယ်အရာများပါဝင်သနည်း။ ရုပ်ပုံကိုးကွယ်ခြင်း၊ အကျင့်ယိုယွင်းခြင်း၊ ဆင်းရဲသားများကိုဖိနှိပ်ခြင်းနှင့် အခြားကြီးလေးသောအပြစ်များကို ပြုကြသည်တကား! ယင်းကြောင့် ဘီ.စီ.အီး. ၆၀၇ ခုနှစ်တွင် ယေရုရှလင်မြို့ဖျက်ဆီးခံရပြီး ယုဒပြည်သူပြည်သားများသည် ဗာဗုလုန်နိုင်ငံသို့ သုံ့ပန်းအဖြစ်ခေါ်ဆောင်ခံခဲ့ရကြသည်။
၉ ဘုရားသခင်သည် ယင်းသို့ဖြင့် မိမိ၏လူမျိုးတော်ကို ပဲ့ပြင်ခဲ့သည်။ သို့သော် “[ယေဟောဝါ] သည် ကောင်းမြတ်တော်မူ၍ ကရုဏာတော် [သနားကြင်နာခြင်း]သည် အစဉ်အမြဲတည်သောကြောင့် ကောင်းကင်ဗိုလ်ခြေအရှင်ထာဝရဘုရား[သခင်]ကို ချီးမွမ်းကြလော့” ဟုဆိုသောသူတို့၏အသံကို ယေရုရှလင်မြို့၌ ကြားရကြလိမ့်ဦးမည်ဟု ပရောဖက်ယေရမိမှတစ်ဆင့် ကိုယ်တော်ကြိုဟောခဲ့သည်။ (ယေရမိ ၃၃:၁၀၊ ၁၁) ထိုအတိုင်းဖြစ်ပျက်ခဲ့ပါသည်။ အနှစ် ၇၀ ကြာ လူဆိတ်ညံရာဖြစ်ပြီးနောက် ဘီ.စီ.အီး. ၅၃၇ ခုနှစ်တွင် ဂျူးလူမျိုးအကြွင်းအကျန်တို့သည် ယေရုရှလင်မြို့သို့ပြန်လာခဲ့ကြသည်။ (ယေရမိ ၂၅:၁၁; ဒံယေလ ၉:၁၊ ၂) မောရိတောင်ပေါ်ရှိ ဗိမာန်တော်မြေနေရာ၌ ယဇ်ပလ္လင်ပြန်တည်ဆောက်ကာ ပူဇော်သကာများကို စတင်ပူဇော်ကြလေသည်။ သူတို့ပြန်ရောက်ပြီးဒုတိယနှစ်တွင် ဗိမာန်တော်အုတ်မြစ်ကိုချခဲ့ကြသည်။ ဝမ်းသာပီတိဖြစ်စရာအချိန်ပါတကား! ဧဇရဤသို့ဆိုခဲ့သည်– “လုပ်ဆောင်သောသူတို့သည် ထာဝရဘုရား[သခင်]၏ဗိမာန်တော်တိုက်မြစ်ကို ချသောအခါ၊ ဣသရေလရှင်ဘုရင်ဒါဝိဒ်စီရင်သည်အတိုင်း ထာဝရဘုရား[သခင်]၏ဂုဏ်တော်ကိုချီးမွမ်းစေခြင်းငှာ တံပိုးကိုင်သောလေဝိအမျိုး အာသပ်သားများတို့ကို ခန့်ထားကြ၏။ ‘ထာဝရဘုရားသည် ကောင်းမြတ်တော်မူ၏။ ဣသရေလအမျိုး၌ပြတော်မူသော ကရုဏာတော် [သနားကြင်နာခြင်း]အစဉ်အမြဲတည်ပါသည်’ ဟူ၍ ဂုဏ်တော်ကိုချီးမွမ်းလျက်၊ ကျေးဇူးတော်ကိုဝန်ခံလျက် အသံပြိုင်၍ အလှည့်လှည့်သီချင်းဆိုကြ၏။”—ဧဇရ ၃:၁-၁၁။
၁၀။ ဆာလံ ၁၁၈ ကို အဘယ်အရေးပါသောစကားများနှင့်စ၍ နိဂုံးချုပ်ထားသနည်း။
၁၀ ယေဟောဝါ၏ကောင်းမြတ်ခြင်းနှင့်ပတ်သက်၍ အလားတူချီးမွမ်းစကားကို ဆာလံကျမ်းအမြောက်အမြား၌တွေ့ရသည်။ ၎င်းတို့အနက်တစ်ခုမှာ ပသခါပွဲကိုနိဂုံးချုပ်ရန် ဣသရေလအိမ်ထောင်စုများသီဆိုခဲ့ကြသည့် ဆာလံ ၁၁၈ ဖြစ်သည်။ ထိုဆာလံကျမ်းသည် ဤစကားများနှင့်စ၍ ဆုံးသည်– “[ယေဟောဝါ] သည် ကောင်းမြတ်တော်မူ၍ ကရုဏာတော် [သနားကြင်နာခြင်း]အစဉ်အမြဲတည်သောကြောင့် ဂုဏ်ကျေးဇူးတော်ကိုချီးမွမ်းကြလော့။” (ဆာလံ ၁၁၈:၁၊ ၂၉) ယင်းတို့သည် စီ.အီး. ၃၃၊ ယေရှုမသေဆုံးမီည၌ မိမိ၏တည်ကြည်သောတမန်တော်များနှင့်အတူ ကိုယ်တော်သီဆိုခဲ့သော နောက်ဆုံးချီးမွမ်းစကားများ ဖြစ်ကောင်းဖြစ်နိုင်သည်။—မဿဲ ၂၆:၃၀။
‘ကျေးဇူးပြု၍ ကိုယ်တော်၏ဘုန်းကို အကျွန်ုပ်အားပြတော်မူပါ’
၁၁၊ ၁၂။ မောရှေသည် ဘုရားသခင့်ဘုန်းတော်ကို ရေးရေးမျှတွေ့မြင်ပြီးနောက် အဘယ်ကြေညာချက်ကို သူကြားခဲ့ရသနည်း။
၁၁ ဧဇရခေတ်မတိုင်မီ ရာစုနှစ်များစွာကပင် ယေဟောဝါ၏ကောင်းမြတ်ခြင်းနှင့် ရုဏာတော်သည် ဦးဆုံးအကြိမ် ပတ်သက်ဆက်နွှယ်ခဲ့သည်။ တောကန္တာရ၌ ဣသရေလလူမျိုးတို့ ရွှေနွားရုပ်ကိုးကွယ်ကြ၍ ပြစ်မှားသူတို့ကို အဆုံးစီရင်ပြီးမကြာမီ ယေဟောဝါကိုမောရှေ ဤသို့အသနားခံခဲ့သည်– “ကိုယ်တော်၏ဘုန်းကို အကျွန်ုပ်အားပြတော်မူပါ။ အကျွန်ုပ်တောင်းပန်ပါ၏။” မောရှေသည် မိမိ၏မျက်နှာတော်ကိုမြင်ပြီး အသက်မရှင်နိုင်ကြောင်းသိလျက် ယေဟောဝါဤသို့ဆိုခဲ့သည်– “ငါ၏ကောင်းမွန်ခြင်း [“ကောင်းမြတ်ခြင်း၊” ကဘ] ရှိသမျှကို သင့်ရှေ့၌ ငါလျှောက်သွားစေမည်။”—ထွက်မြောက်ရာ ၃၃:၁၃-၂၀။
၁၂ နောက်တစ်ရက်၌ သိနာတောင်ပေါ်တွင် ယေဟောဝါ၏ကောင်းမြတ်ခြင်းသည် မောရှေရှေ့ လျှောက်သွားခဲ့သည်။ ထိုအချိန်တွင် မောရှေသည် ဘုရားသခင်၏ဘုန်းတော်ကို ရေးရေးမျှတွေ့မြင်ခဲ့ရပြီး ဤကြေညာချက်ကိုကြားခဲ့ရသည်– “ယေဟောဝါ၊ ယေဟောဝါ သနားတတ်သောသဘော၊ ကျေးဇူးပြုတတ်သောသဘော၊ အမျက်ထွက်နှေးသောသဘော၊ ဂရုဏာ [သနားကြင်နာခြင်း]နှင့် [အမှန်တရား] ကြွယ်ဝသောသဘောရှိတော်မူသော၊ အထောင်အသောင်းသောသူတို့အား ကရုဏာ [သနားကြင်နာခြင်း]တရားကိုစောင့်တော်မူထသော၊ မှားယွင်းခြင်း၊ တရားတော်ကိုလွန်ကျူးခြင်း၊ [မကောင်းမှု]ပြုခြင်းများကိုဖြေလွှတ်သော်လည်း အပြစ်ဒဏ်စီရင်ခြင်းကို အဘယ်နည်းနှင့်မျှလွတ်ကင်းစေတော်မမူသော၊ သားစဉ်မြေးဆက်၊ တတိယအဆက်၊ စတုတ္ထအဆက်တိုင်အောင်၊ အဘတို့၏အပြစ်ကို သားတို့၌ ဆပ်ပေးစီရင်တော်မူသော ဘုရားသခင်။” (ထွက်မြောက်ရာ ၃၄:၆၊ ၇၊ ကဘ) ယေဟောဝါ၏ကောင်းမြတ်ခြင်းသည် ကိုယ်တော်၏ ကရုဏာတော်အပြင် အခြားကိုယ်ရည်ကိုယ်သွေးများနှင့် ဆက်နွှယ်ကြောင်း ဤစကားများကဖော်ပြသည်။ ယင်းတို့ကိုစဉ်းစားသုံးသပ်ခြင်းဖြင့် ကောင်းမြတ်ခြင်းကို ကျွန်ုပ်တို့တင်ပြရန် ထောက်ကူပေးပါလိမ့်မည်။ ဘုရားသခင့်ကောင်းမြတ်ခြင်းဆိုင်ရာ ဤအံ့ဖွယ်ကြေညာချက်တွင် နှစ်ကြိမ်ဖော်ပြထားသော အရည်အသွေးကို ဦးဆုံးသုံးသပ်ကြည့်ကြစို့။
“ကရုဏာ [သနားကြင်နာခြင်း]နှင့် . . . ကြွယ်ဝသော . . . ဘုရားသခင်”
၁၃။ ဘုရားသခင့်ကောင်းမြတ်ခြင်းဆိုင်ရာ ကြေညာချက်တွင် အဘယ်ဂုဏ်ရည်တော်ကို နှစ်ကြိမ်တိုင်ဖော်ပြထားသနည်း၊ ယင်းသည် အဘယ်ကြောင့်ဆီလျော်သနည်း။
၁၃ “ယေဟောဝါ [သည်]ကရုဏာ [သနားကြင်နာခြင်း]နှင့် . . . ကြွယ်ဝသောသဘောရှိတော်မူသော၊ အထောင်အသောင်းသောသူတို့အား ကရုဏာ [သနားကြင်နာခြင်း]တရားကို စောင့်တော်မူ . . . သောဘုရားသခင် [ဖြစ်တော်မူ၏။]” “ကရုဏာ သနားကြင်နာခြင်း” ဟုပြန်ဆိုထားသော ဟေဗြဲစကားလုံးသည် ‘တည်မြဲသောမေတ္တာ’ ဟုအဓိပ္ပာယ်ရသည်။ ၎င်းသည် မောရှေကို ဘုရားသခင်ကြေညာခဲ့သည့်စကား၌ နှစ်ကြိမ်ဖော်ပြသည့် ဂုဏ်ရည်တော်တစ်ခုတည်းဖြစ်သည်။ မေတ္တာသည် ယေဟောဝါ၏ အဓိကဂုဏ်ရည်တော်ဖြစ်ရာ ဆီလျော်လှသည်တကား! (၁ ယောဟန် ၄:၈) ယေဟောဝါသည် “ကောင်းမြတ်တော်မူ၍ ကရုဏာတော် [သနားကြင်နာခြင်း]အစဉ်အမြဲတည်သောကြောင့်” ကိုယ်တော်ကိုချီးမွမ်းကြဟူသော လူသိများသည့်ချီးမွမ်းစကားက ၎င်းဂုဏ်ရည်တော်ကို ထင်ရှားစေသည်။
၁၄။ ဘုရားသခင့်ကောင်းမြတ်ခြင်းနှင့် ကရုဏာတော်ကို မည်သူတို့ အထူးခံစားရကြသနည်း။
၁၄ ယေဟောဝါ၏ကောင်းမြတ်ခြင်း ထင်ရှားနည်းတစ်ခုမှာ ကိုယ်တော်သည် “ကရုဏာ [သနားကြင်နာခြင်း]နှင့် . . . ကြွယ်ဝ” တော်မူခြင်းဖြစ်၏။ ကိုယ်တော်သည် မိမိ၏ဆက်ကပ်အပ်နှံ၊ တည်ကြည်သောလူသားကျေးကျွန်များအားပြသော ဂရုစိုက်မှုတွင် ၎င်းအရည်အချင်း အထူးထင်ရှားသည်။ (၁ ပေတရု ၅:၆၊ ၇) ယေဟောဝါသက်သေများ ထောက်ခံပြောဆိုနိုင်သည့်အတိုင်း ကိုယ်တော်သည် မိမိကိုချစ်၍ ဝတ်ပြုသူတို့အပေါ် “ကရုဏာတရားကိုစောင့် [သနားကြင်နာ]တော်” မူ၏။ (ထွက်မြောက်ရာ ၂၀:၆) ဇာတိဣသရေလလူမျိုးသည် သားတော်ကိုငြင်းပယ်ခဲ့ကြသောကြောင့် ယေဟောဝါ၏ကရုဏာတော် သို့မဟုတ် တည်မြဲသောမေတ္တာတော်ကို သူတို့မခံစားရကြတော့ချေ။ သို့သော် ဘုရားသခင့်ကောင်းမြတ်ခြင်းနှင့် တည်မြဲသောမေတ္တာတော်သည် လူမျိုးအပေါင်းမှ တည်ကြည်သောခရစ်ယာန်များအပေါ် အစဉ်တည်ပါလိမ့်မည်။—ယောဟန် ၃:၃၆။
ယေဟောဝါ—သနားတတ်ပြီး ကျေးဇူးပြုတတ်
၁၅။ (က) သိနာတောင်ပေါ်တွင် မောရှေကြားခဲ့ရသောကြေညာချက်ကို အဘယ်စကားများနှင့်အစပြုခဲ့သနည်း။ (ခ) သနားခြင်းတွင် အဘယ်အရာပါဝင်သနည်း။
၁၅ သိနာတောင်ပေါ်တွင် မောရှေကြားခဲ့ရသောကြေညာချက်သည် “ယေဟောဝါ၊ ယေဟောဝါ သနားတတ်သောသဘော၊ ကျေးဇူးပြုတတ်သောသဘော . . . ရှိတော်မူသော . . . ဘုရားသခင်” ဟူသောစကားနှင့် အစပြုသည်။ “သနား” ဟုပြန်ဆိုထားသော ဟေဗြဲစကားလုံးသည် “အူမကြီး” ကိုဆိုလိုပြီး “သားအိမ်” ဟူသောစကားလုံးနှင့် အတော်ပင်ဆက်စပ်သည်။ ထို့ကြောင့် သနားခြင်းတွင် လူတစ်ဦး၏ အတွင်းအကျဆုံးအပိုင်း၌ရှိသော သနားကြင်နာတတ်သည့် သဘောထားများပါဝင်သည်။ သို့သော် သနားတတ်ခြင်းတွင် စိတ်ရင်းမှန်ဖြင့်သနားခြင်းမျှမကပါဝင်သည်။ သူတစ်ပါးခံစားရသည့်ဝေဒနာကို သက်သာစေဖို့ တစ်စုံတစ်ရာပြုလုပ်ရန် ယင်းက ကျွန်ုပ်တို့ကိုလှုံ့ဆော်ပေးသင့်သည်။ ဥပမာ၊ မေတ္တာရှိသောခရစ်ယာန်အကြီးအကဲများသည် သင့်လျော်သည့်အခါ ‘ရွှင်ပျသောစိတ်နှင့် သနားခြင်းကိုတင်ပြလျက်’ ယုံကြည်သူချင်းများအပေါ် သနားတတ်သောသဘော တင်ပြဖို့လိုကြောင်းသိမြင်ကြသည်။—ရောမ ၁၂:၈; ယာကုပ် ၂:၁၃; ယုဒ ၂၂၊ ၂၃။
၁၆။ ယေဟောဝါ ကျေးဇူးပြုတတ်သည်ဟု အဘယ်ကြောင့်ဆိုနိုင်သနည်း။
၁၆ ဘုရားသခင့်ကောင်းမြတ်ခြင်းသည် ကိုယ်တော်၏ကျေးဇူးပြုတတ်သောသဘော၌လည်း ထင်ရှားသည်။ ကျေးဇူးပြုတတ်သူတစ်ဦးသည် သူတစ်ပါး၏ခံစားချက်ကို သိသိသာသာ စာနာထောက်ထားတတ်ပြီး အထူးသဖြင့် မိမိထက်နိမ့်ကျသူများကို ချစ်ခင်ကြင်နာမှု တင်ပြတတ်သည်။ ယေဟောဝါသည် မိမိ၏တည်ကြည်သောကျေးကျွန်များနှင့် ဆက်ဆံရာတွင် ကျေးဇူးပြုခြင်း၏ အကောင်းဆုံးစံနမူနာရှင်ဖြစ်တော်မူ၏။ ဥပမာ၊ ဘုရားသခင်သည် ကျေးဇူးပြုသည့်သဘောနှင့် ကောင်းကင်တမန်များအားဖြင့် သက်ကြီးရွယ်အိုပရောဖက်ဒံယေလကို ခွန်အားပေးခဲ့၏၊ ယေရှုကိုမွေးဖွားမည့်အခွင့်ထူးကို အပျိုစင်မာရိအား သတင်းပေးခဲ့၏။ (ဒံယေလ ၁၀:၁၉; လုကာ ၁:၂၆-၃၈) ယေဟောဝါ၏လူမျိုးတော်အနေနှင့် ကျမ်းစာမှတစ်ဆင့် ယေဟောဝါကျေးဇူးပြုသည့်နည်းကို ကျွန်ုပ်တို့အမှန်ပင်တန်ဖိုးထားလေးမြတ်ကြပါသည်။ ကိုယ်တော်၏ကောင်းမြတ်ခြင်းကို ဤနည်းဖြင့်ထင်ရှားပြသသည့်အတွက် ကိုယ်တော်အားကျွန်ုပ်တို့ချီးမွမ်းကြပြီး သူတစ်ပါးနှင့်ဆက်ဆံရာတွင် ကြင်နာမှုတင်ပြတတ်ဖို့ ကြိုးစားကြသည်။ ဝိညာဉ်ရေးအရည်အချင်းများရှိသူတို့သည် ယုံကြည်သူချင်းတစ်ဦးကို “သိမ်မွေ့နူးညံ့သောသဘော” နှင့် ပြန်လည်တည့်မတ်ပေးသောအခါ သက်ညှာမှု၊ ကြင်နာမှုတင်ပြဖို့ ကြိုးစားကြသည်။—ဂလာတိ ၆:၁။
အမျက်ထွက်နှေးသော ဘုရားသခင်
၁၇။ ယေဟောဝါသည် “အမျက်ထွက်နှေး” ခြင်းကို ကျွန်ုပ်တို့အဘယ်ကြောင့်ကျေးဇူးတင်သင့်သနည်း။
၁၇ “အမျက်ထွက်နှေးသော . . . ဘုရားသခင်။” ဤစကားများက ယေဟောဝါ၏ကောင်းမြတ်ခြင်း ထင်ရှားသည့် နောက်ထပ်နည်းတစ်နည်းကို ပေါ်လွင်စေသည်။ ယေဟောဝါသည် ကျွန်ုပ်တို့၏ချွတ်ယွင်းချက်များကို စိတ်ရှည်စွာသည်းခံတော်မူပြီး ကျွန်ုပ်တို့၏ကြီးလေးသော အားနည်းချက်များကိုကျော်လွှား၍ ဝိညာဉ်ရေးဘက်တိုးတက်ဖို့ အချိန်ပေးတော်မူ၏။ (ဟေဗြဲ ၅:၁၂–၆:၃; ယာကုပ် ၅:၁၄၊ ၁၅) ဘုရားသခင့်စိတ်ရှည်ခြင်းသည် ကိုယ်တော်အားဝတ်မပြုကြသေးသူတို့ကိုလည်း အကျိုးပြုသည်။ သူတို့သည် ဘုရားသခင့်နိုင်ငံတော်သတင်းကို လက်ခံတုံ့ပြန်ကြပြီး နောင်တယူကြဖို့အချိန်ရှိပါသေးသည်။ (ရောမ ၂:၄) သို့သော် ယေဟောဝါသည် စိတ်ရှည်တော်မူသော်လည်း သိနာတောင်ပေါ်တွင် ဣသရေလလူမျိုးတို့ ရွှေနွားရုပ်ကိုကိုးကွယ်စဉ်ကကဲ့သို့ ကိုယ်တော်၏ကောင်းမြတ်ခြင်းသည် တစ်ခါတစ်ရံ အမျက်တော်ကိုဖော်ပြစေသည်။ များမကြာမီ စာတန့်စနစ်ဆိုးကို ဘုရားသခင်အဆုံးတိုင်စေသည့်အခါ ကိုယ်တော်၏အမျက်တော်သည် သာ၍ကြီးမားစွာ ထင်ရှားပေလိမ့်မည်။—ယေဇကျေလ ၃၈:၁၉၊ ၂၁-၂၃။
၁၈။ အမှန်တရားနှင့်ပတ်သက်၍ ယေဟောဝါနှင့် လူသားခေါင်းဆောင်များစပ်ကြား အဘယ်ကွာခြားမှုရှိသနည်း။
၁၈ ‘ယေဟောဝါ [သည်] အမှန်တရားကြွယ်ဝသော . . . ဘုရားသခင် [ဖြစ်တော်မူ၏။]’ ယေဟောဝါသည် လေလုံးထွားသောကတိများပေးပြီး ထိုအတိုင်းလုပ်ဆောင်ဖို့ပျက်ကွက်သည့် လူသားခေါင်းဆောင်များနှင့် ကွာခြားလှသည်တကား! ယင်းနှင့်ခြားနားစွာဖြင့် ယေဟောဝါအားဝတ်ပြုသူတို့သည် ကိုယ်တော်၏မှုတ်သွင်းခံကျမ်းစာ၌ မိန့်ဆိုခဲ့သမျှကို ယုံကြည်စိတ်ချနိုင်ကြသည်။ ဘုရားသခင်သည် အမှန်တရား၌ ကြွယ်ဝသောကြောင့် ကိုယ်တော့်ကတိတော်များကို ကျွန်ုပ်တို့အစဉ်ယုံကြည်စိတ်ချနိုင်ကြသည်။ ကျွန်ုပ်တို့၏ကောင်းကင်ခမည်းတော်သည် ကောင်းမြတ်တော်မူသောကြောင့် ဝိညာဉ်ရေးအမှန်တရားကို ကြွယ်ဝစွာပေးသနားခြင်းဖြင့် ကျွန်ုပ်တို့၏ဆုတောင်းချက်များကို မပျက်မကွက်ဖြေကြားပေးပါသည်။—ဆာလံ ၄၃:၃; ၆၅:၂။
၁၉။ ယေဟောဝါသည် နောင်တရသောအပြစ်သားများအား ကောင်းမြတ်ခြင်းကို အဘယ်နည်းဖြင့် ထူးခြားစွာတင်ပြသနည်း။
၁၉ “ယေဟောဝါ [သည်] မှားယွင်းခြင်း၊ တရားတော်ကိုလွန်ကျူးခြင်း၊ [မကောင်းမှု] ပြုခြင်းများကိုဖြေလွှတ် . . . သောဘုရားသခင် [ဖြစ်၏။]” ယေဟောဝါသည်ကောင်းမြတ်တော်မူသောကြောင့် နောင်တရသောအပြစ်သားများကို ခွင့်လွှတ်ရန်အသင့်ရှိတော်မူ၏။ ကျွန်ုပ်တို့၏မေတ္တာရှင် ကောင်းကင်ခမည်းတော်သည် ယေရှု၏ပူဇော်သကာအားဖြင့် အပြစ်လွှတ်ခြင်းအစီအစဉ်ကို စီမံပေးခဲ့သည့်အတွက် ကျွန်ုပ်တို့အမှန်တကယ် အလွန်ကျေးဇူးတင်ကြသည်။ (၁ ယောဟန် ၂:၁၊ ၂) ရွေးနုတ်ဖိုးကိုယုံကြည်သူအားလုံးသည် ကိုယ်တော်ကတိထားရာကမ္ဘာသစ်တွင် အဆုံးမဲ့အသက်ရရှိပြီး ယေဟောဝါ၏မျက်နှာသာရဆက်ဆံရေးကို ခံစားနိုင်ကြမည့်မျှော်လင့်ချက်ရှိသောကြောင့် ကျွန်ုပ်တို့အမှန်ပင်ဝမ်းမြောက်ကြရသည်။ လူသားတို့အပေါ် ကောင်းမြတ်ခြင်းတင်ပြသည့်အတွက် ယေဟောဝါအားချီးမွမ်းဖို့ကောင်းသည့် ထူးခြားလှသောအကြောင်းရင်းများပါတကား!—၂ ပေတရု ၃:၁၃။
၂၀။ ဘုရားသခင်သည် မကောင်းမှုကိုလျစ်လျူရှုမထားကြောင်း အဘယ်အထောက်အထားရှိသနည်း။
၂၀ “အပြစ်ဒဏ်စီရင်ခြင်းကို အဘယ်နည်းနှင့်မျှ လွတ်ကင်းစေတော်မမူသော [ယေဟောဝါ။]” ဤမည်ကား ယေဟောဝါ၏ကောင်းမြတ်ခြင်းကိုချီးမွမ်းဖို့ နောက်ထပ်အကြောင်းရင်းတစ်ခုဖြစ်သည်။ အဘယ်ကြောင့်နည်း။ အကြောင်းမှာ ကောင်းမြတ်ခြင်း၏ အရေးပါသောအသွင်အပြင်တစ်ခုမှာ မကောင်းမှုကို အဘယ်နည်းဖြင့်မျှ လျစ်လျူမရှုခြင်းဖြစ်သောကြောင့်ပင်။ ထို့အပြင် “သခင်ယေရှုခရစ်သည် တန်ခိုးရှိသောကောင်းကင်တမန်တို့နှင့်အတူ၊ ကောင်းကင်ဘုံကပေါ်ထွန်းတော်မူသောအခါ ဘုရားသခင်ကိုမသိသောသူ၊ . . . ဧဝံဂေလိတရားကို နားမထောင်သောသူတို့ကို” တရားသဖြင့်စီရင်တော်မူလိမ့်မည်။ သူတို့သည် “ထာဝရပျက်စီးခြင်းတည်းဟူသောအပြစ်ဒဏ်ကို ခံရကြလတ္တံ့။” (၂ သက်သာလောနိတ် ၁:၆-၁၀) ထိုအခါ ယေဟောဝါကိုဝတ်ပြုသော ကပ်ကျော်သူများသည် “ကောင်းမှုကိုမချစ်သောသူ” များဖြစ်သည့် ဘုရားတရားမဲ့သူများ၏ နှောင့်ယှက်ခြင်းကိုမခံရဘဲ ဘဝအရသာကို အပြည့်အဝခံစားနိုင်ကြပါလိမ့်မည်။—၂ တိမောသေ ၃:၁-၃၊ ကဘ။
ယေဟောဝါ၏ကောင်းမြတ်ခြင်းကိုတုပလော့
၂၁။ ကောင်းမြတ်ခြင်းကို ကျွန်ုပ်တို့အဘယ်ကြောင့်တင်ပြသင့်သနည်း။
၂၁ ယေဟောဝါ၏ကောင်းမြတ်ခြင်းကိုချီးမွမ်း၍ ကျေးဇူးတင်စရာအကြောင်း မြောက်မြားစွာရှိသည်မှာ သေချာပါသည်။ ကျွန်ုပ်တို့သည် ကိုယ်တော်၏ကျေးကျွန်များအနေနှင့် ၎င်းအရည်အချင်းကို အတတ်နိုင်ဆုံး မတင်ပြသင့်ပေလော။ တမန်တော်ပေါလုက “သင်တို့သည် ဘုရားသခင်၏ချစ်သားဖြစ်ကြသည်နှင့်အညီ၊ ဘုရားသခင်ကျင့်တော်မူသည်နည်းတူ ကျင့်ကြလော့” ဟုခရစ်ယာန်ချင်းတို့ကို တိုက်တွန်းခဲ့သည့်အတွက် တင်ပြသင့်ပါသည်။ (ဧဖက် ၅:၁) ကျွန်ုပ်တို့၏ကောင်းကင်ခမည်းတော်သည် ကောင်းမြတ်ခြင်းကို အစဉ်တင်ပြခဲ့သည်ဖြစ်၍ ကျွန်ုပ်တို့လည်း ထိုသို့ပြုသင့်သည်။
၂၂။ နောက်ဆောင်းပါးတွင် အဘယ်အကြောင်းကို ကျွန်ုပ်တို့သုံးသပ်ကြမည်နည်း။
၂၂ ယေဟောဝါထံ မိမိကိုယ်ကို စိတ်နှလုံးအကြွင်းမဲ့ ဆက်ကပ်အပ်နှံထားမည်ဆိုလျှင် ကိုယ်တော်၏ကောင်းမြတ်ခြင်းကို ကျွန်ုပ်တို့တုပလိုစိတ်ပြင်းပြကြရမည်။ ကျွန်ုပ်တို့သည် အပြစ်သားအာဒံ၏ သားမြေးများဖြစ်ကြသောကြောင့် ကောင်းမှုပြုဖို့မလွယ်ကူပါ။ သို့သော် ကျွန်ုပ်တို့သည် ကောင်းမြတ်ခြင်းကို အဘယ်ကြောင့်တင်ပြနိုင်ကြောင်း နောက်ဆောင်းပါး၌တွေ့ရပါမည်။ ကောင်းမြတ်ခြင်း၏ အမြင့်မြတ်ဆုံးစံနမူနာရှင်ဖြစ်သော ယေဟောဝါကို နည်းအမျိုးမျိုးဖြင့် ကျွန်ုပ်တို့တုပနိုင်၍ တုပသင့်ကြောင်းကိုလည်း သုံးသပ်ကြပါမည်။
သင်မည်သို့ဖြေဆိုမည်နည်း
• ကောင်းမြတ်ခြင်းဟူသည် အဘယ်နည်း။
• ဘုရားသခင်၏ကောင်းမြတ်ခြင်းကို ကျမ်းစာမှအဘယ်အသုံးအနှုန်းက ပေါ်လွင်စေသနည်း။
• ယေဟောဝါ၏ကောင်းမြတ်ခြင်း ထင်ရှားချက်အချို့ကား အဘယ်နည်း။
• ကောင်းမြတ်ခြင်းနှင့်ပတ်သက်၍ ယေဟောဝါ၏စံနမူနာကို ကျွန်ုပ်တို့အဘယ်ကြောင့်တုပသင့်သနည်း။
[လေ့လာရန်မေးခွန်းများ]
[စာမျက်နှာ ၁၂ ပါ ရုပ်ပုံ]
ယေဟောဝါ၏ရှေးခေတ်လူမျိုးတော်သည် မိမိတို့ချီးမွမ်းစကားများနှင့်အညီ မနေထိုင်ခဲ့ကြသောကြောင့် သူတို့ကို ကိုယ်တော်ပဲ့ပြင်ခဲ့
[စာမျက်နှာ ၁၂ ပါ ရုပ်ပုံ]
ယေရုရှလင်မြို့သို့ တည်ကြည်သော အကြွင်းအကျန် ပြန်လာခဲ့ကြ
[စာမျက်နှာ ၁၃ ပါ ရုပ်ပုံ]
ဘုရားသခင်၏ ကောင်းမြတ်ခြင်းအကြောင်း အံ့ဖွယ်ကြေညာချက်တစ်ခုကို မောရှေကြားခဲ့ရ
[စာမျက်နှာ ၁၅ ပါ ရုပ်ပုံ]
သမ္မာကျမ်းစာမှတစ်ဆင့် ကျွန်ုပ်တို့ကို ကိုယ်တော်မေတ္တာရပ်ခံပုံက ယေဟောဝါ၏ကောင်းမြတ်ခြင်းကို ထင်ရှားစေ