အမှန်တကယ်ရှိတော်မူသော ဘုရားသခင်ယေဟောဝါအား ယုံကြည်ကိုးစားလော့
အမှန်တကယ်ရှိတော်မူသော ဘုရားသခင်ယေဟောဝါအား ယုံကြည်ကိုးစားလော့
တိမ်ကင်းစင်သောညတစ်ညတွင် မိုးကောင်းကင်ကို မော့ကြည့်၍ ရာနှင့်ချီသောကြယ်များကို ရှုစားဖူးသလော။ ၎င်းတို့တည်ရှိနေခြင်းကို သင်မည်သို့ ရှင်းပြမည်နည်း။
ဆိတ်ငြိမ်သောညအခါတွင် ကြယ်များသည် ရှေးဣသရေလဘုရင်ဒါဝိဒ်အား နှုတ်မြွက်ပြောဆိုခဲ့ရာ ဤသို့ရေးသားရန် သူလှုံ့ဆော်ခံခဲ့ရသည်– “မိုးကောင်းကင်သည် ဘုရားသခင်၏ဘုန်းအသရေတော်ကိုကြားပြော၍ မိုးမျက်နှာကြက်သည် လက်တော်နှင့်လုပ်သောအရာများကိုပြသ၏။” (ဆာလံ ၁၉:၁) မှန်ပါသည်၊ ဖန်ဆင်းခြင်းလက်ရာများထက် ဖန်ဆင်းရှင်သည် “ဘုန်းအသရေတန်ခိုးတော်ကို ခံစားထိုက်တော်မူ၏။”—ဗျာဒိတ် ၄:၁၁; ရောမ ၁:၂၅။
“အလုံးစုံတို့ကိုတည်ဆောက်သောသူကား ဘုရားသခင်ပေတည်း” ဟုသမ္မာကျမ်းစာဆိုသည်။ (ဟေဗြဲ ၃:၄) မှန်ပါသည်၊ ‘ယေဟောဝါဟူ၍ နာမတော်ရှိသော’ စစ်မှန်သောဘုရားသခင်သည် ‘မြေကြီးတစ်ပြင်လုံးတွင် အမြင့်ဆုံးဖြစ်တော်မူ၏။’ (ဆာလံ ၈၃:၁၈) ကိုယ်တော်သည် ထင်ယောင်ထင်မှားဖြစ်စေသည့် တံလျှပ်မဟုတ်ချေ။ ယေရှုခရစ်က ကိုယ်တော်၏ကောင်းကင်ခမည်းတော်နှင့်စပ်လျဉ်း၍ ဤသို့ဆိုသည်– “ငါ့ကိုစေလွှတ်တော်မူသောအရှင်သည် အမှန်တကယ်ရှိတော်မူ၏။”—ယောဟန် ၇:၂၈၊ ကဘ။
ယေဟောဝါ—ရည်ရွယ်ချက်များကို ပြည့်စေသောအရှင်
ဘုရားသခင်၏ ထူးခြားသောနာမတော် ယေဟောဝါသည် ဟေဗြဲကျမ်းစောင်များတွင်ပင် အကြိမ် ၇,၀၀၀ နီးပါးပါရှိသည်။ ထိုနာမတော်ကိုယ်နှိုက်က ကိုယ်တော်သည် အမှန်တည်ရှိတော်မူကြောင်း ဖော်ပြသည်။ ဘုရားသခင့်နာမတော်သည် “ကိုယ်တော်ဖြစ်လာစေသည်” ဟုအဓိပ္ပာယ်ရသည်။ သို့ဖြင့် ယေဟောဝါဘုရားသခင်သည် မိမိ၏ရည်ရွယ်တော်မူချက်များကို ပြည့်စုံစေတော်မူသောအရှင်ဖြစ်ကြောင်း ဖော်ပြသည်။ ဘုရားသခင်အား နာမတော်ကိုဖော်ပြရန် မောရှေတောင်းဆိုသောအခါ ယေဟောဝါက ယင်း၏အဓိပ္ပာယ်ကို ဤသို့အသေးစိတ် ဖော်ပြတော်မူသည်– “ငါဖြစ်စေမည့်အရာကို ငါဖြစ်စေမည်။” (ထွက်မြောက်ရာ ၃:၁၄၊ ကဘ) ရော့သဟမ်ဘာသာပြန်ကျမ်းက ဤသို့ရှင်းလင်းပြတ်သားစွာ ဆိုသည်– “ငါဖြစ်လိုသမျှအတိုင်း ငါဖြစ်မည်။” ယေဟောဝါသည် မိမိ၏ဖြောင့်မတ်သောရည်ရွယ်တော်မူချက်များနှင့် ကတိတော်များ ပြည့်စုံစေရန် လိုအပ်သမျှအတိုင်း ကိုယ်တော်ဖြစ်တော်မူသည် သို့မဟုတ် ဖြစ်လာရန်ရွေးချယ်တော်မူသည်။ သို့ဖြစ်၍ ဖန်ဆင်းရှင်၊ ခမည်းတော်၊ အုပ်စိုးပိုင်သသောသခင်၊ သိုးထိန်း၊ ဗိုလ်ခြေတို့၏အရှင် ယေဟောဝါ၊ ဆုတောင်းချက်ကို နားညောင်းတော်မူသောအရှင်၊ တရားသူကြီး၊ မြင့်မြတ်သောသွန်သင်သူ၊ ရွေးနုတ်တော်မူသောအရှင် အစရှိသည့် စိတ်တွင်စွဲငြိ မှတ်သားဖွယ်ရာဘွဲ့နာမများကို ကိုယ်တော်ပိုင်သတော်မူသည်။—တရားသူကြီး ၁၁:၂၇; ဆာလံ ၂၃:၁; ၆၅:၂; ၇၃:၂၈; ၈၉:၂၆; ဟေရှာယ ၈:၁၃; ၃၀:၂၀; ၄၀:၂၈; ၄၁:၁၄။
စစ်မှန်သောဘုရားသခင်တစ်ပါးတည်းသာလျှင် ယေဟောဝါဟူသောနာမတော်နှင့် ထိုက်တန်၏၊ အကြောင်းမှာ လူသားများသည် ၎င်းတို့၏အစီအစဉ်များ အထမြောက်မည်ဟု အသေအချာမပြောနိုင်ကြချေ။ (ယာကုပ် ၄:၁၃၊ ၁၄) ယေဟောဝါတစ်ပါးတည်း သာလျှင် “မိုးရေနှင့်မိုးပွင့်တို့သည် မိုးကောင်းကင်မှဆင်းသက်၍ နောက်တစ်ဖန်မပြန်၊ မြေသည် မျိုးစေ့ကြဲသောသူအား မျိုးစေ့ကိုလည်းကောင်း၊ အစာစားသောသူအား အစာကိုလည်းကောင်းပေးမည်အကြောင်း မြေကိုစိုစေသဖြင့် အပင်ပေါက်စေ၍ အသီးကိုသီးစေသကဲ့သို့၊ ထိုအတူ ငါ၏နှုတ် [ထွက်] စကားသည် ဖြစ်လိမ့်မည်။ အကျိုးမရှိဘဲ ငါ့ထံသို့မပြန်ရ။ ငါ့အလိုကို ပြည့်စုံစေမည်။ ငါစေခိုင်းသောအမှု၌ အောင်လိမ့်မည်” ဟူ၍ မိန့်ဆိုနိုင်၏။—ဟေရှာယ ၅၅:၁၀၊ ၁၁။
ယေဟောဝါသည် မိမိ၏ရည်ရွယ်ချက်ကို ကျိန်းသေဖြစ်မြောက်စေတော်မူမည်ဖြစ်သဖြင့် လူသားများအနေနှင့် မဖြစ်နိုင်ဟုထင်ရသည့်အရာများသည် ကိုယ်တော်၏ရှုထောင့်မှဆိုလျှင် အမှန်တကယ်ဖြစ်ပေသည်။ အာဗြဟံ၊ ဣဇာက်၊ ယာကုပ်တို့သေဆုံးပြီး ကာလအတန်ကြာပြီးနောက်၌ပင် သူတို့အကြောင်းကို ယေရှုဤသို့ဖော်ပြခဲ့သည်– “[ယေဟောဝါ] ဘုရားသခင်သည် သေနေသောသူတို့၏ဘုရား[သခင်]မဟုတ်။ အသက်ရှင်သောသူတို့၏ဘုရား[သခင်]ဖြစ်တော်မူ၏။ ထိုသူအပေါင်းတို့သည် ဘုရားသခင်၌အသက်ရှင်ကြသည်။” (လုကာ ၂၀:၃၇၊ ၃၈) တည်ကြည်သော ထိုဘိုးဘေးသုံးဦးသည် သေလွန်ကြပြီဖြစ်သော်လည်း သူတို့ကို ရှင်ပြန်ထမြောက်စေဖို့ ဘုရားသခင့်ရည်ရွယ်တော်မူချက်သည် သေချာလွန်းရကား ကိုယ်တော်အတွက် သူတို့သည် အသက်ရှင်လျက်ရှိသကဲ့သို့ဖြစ်ကြသည်။ ဤတည်ကြည်သောကျေးကျွန်များကို ယေဟောဝါအသက်ပြန်ရှင်စေခြင်းသည် ပထမဆုံးလူသားကို မြေမှုန့်မှဖန်ဆင်းခဲ့ခြင်းလောက် ခက်ခဲလိမ့်မည်မဟုတ်ချေ။—ကမ္ဘာဦး ၂:၇။
ဘုရားသခင်သည် ဆောင်ရွက်ရန်ရည်ရွယ်ထားရာများကို ဖြစ်မြောက်စေကြောင်း အခြားဥပမာတစ်ခုကို တမန်တော်ပေါလုဖော်ပြသည်။ ကျမ်းစာ၌ အာဗြဟံကို “လူမျိုးအများတို့၏အဘ” ဟုခေါ်ဆိုထားသည်။ (ရောမ ၄:၁၆၊ ၁၇) အာဗြံမှာ ကလေးမရှိသေးချိန်၌ပင် ယေဟောဝါသည် သူ့ကို အာဗြဟံ၊ “လူအုပ်ကြီး (လူအမြောက်အမြား) ၏ဖခင်” ဟုအဓိပ္ပာယ်ရှိသည့်အမည်ဖြင့် ပြောင်းခေါ်ခဲ့သည်။ ယေဟောဝါသည် သက်ကြီးရွယ်အို အာဗြဟံနှင့် သူ့ဇနီးစာရာတို့ကို သားသမီးထွန်းကားနိုင်သည့်အစွမ်း ပြန်လည်ရရှိစေခြင်းဖြင့် ထိုနာမည်၏အဓိပ္ပာယ်နှင့်အညီ အမှန်ဖြစ်စေတော်မူခဲ့သည်။—ဟေဗြဲ ၁၁:၁၁၊ ၁၂။
တန်ခိုးအာဏာများစွာ အပ်နှင်းခြင်းခံခဲ့ရသော ယေရှုခရစ်သည် လူသားများထက် သာလွန်သောရှုထောင့်မှ အဖြစ်မှန်များကိုဖော်ပြ ပြောဆိုခဲ့သည်။ ယေရှု၏မိတ်ဆွေရင်း လာဇရုသေဆုံးသွားသော်လည်း တပည့်တော်များကို ကိုယ်တော်ဤသို့မိန့်ဆိုသည်– “ငါတို့အဆွေလာဇရုသည် အိပ်ပျော်၏။ သူ့ကိုနှိုးခြင်းအလိုငှာ ငါသွားမည်။” (ယောဟန် ၁၁:၁၁) သေနေသူတစ်ဦးကို အိပ်နေသည်ဟု ယေရှု အဘယ်ကြောင့်မိန့်တော်မူခဲ့ရသနည်း။
လာဇရု၏ဇာတိ ဗေသနိရွာသို့ ယေရှုရောက်သောအခါ သင်္ချိုင်းဂူသို့သွား၍ အဝ၌ပိတ်ထားသောကျောက်တုံးကိုရွှေ့လိုက်ရန် ညွှန်ကြားတော်မူ၏။ အသံကျယ်ကျယ်ဖြင့်ဆုတောင်းပြီးနောက် “လာဇရု ထွက်၍လာလော့” ဟုမိန့်တော်မူ၏။ ဘေးမှကြည့်နေသူများသည် သင်္ချိုင်းဂူကို စိုက်၍ကြည့်နေစဉ် “သေလွန်သောသူသည် မိမိခြေလက်၌ ပုဆိုးနံငယ်နှင့်ရစ်ပတ်လျက်၊ မျက်နှာကိုလည်း ပဝါနှင့်စည်းလျက်ထွက်လာ၏။” ထိုအခါယေရှုက “သူ့ကိုဖြေ၍လွှတ်ကြလော့” ဟုမိန့်တော်မူ၏။ (ယောဟန် ၁၁:၄၃၊ ၄၄) ယေရှုသည် လေးရက်ကြာသေဆုံးနေသူလာဇရုကို အသက်ပြန်ရှင်စေခဲ့သည်တကား! ခရစ်တော်က မိမိ၏အဆွေသည် အိပ်ပျော်နေသည်ဟုပြောသောအခါ အမှန်တရားကို ထင်ယောင်ထင်မှားဖြစ်စေခဲ့သည်မဟုတ်။ ယေဟောဝါနှင့်ယေရှု၏ ရှုထောင့်မှကြည့်လျှင် သေဆုံးသူလာဇရုသည် အိပ်ပျော်နေသကဲ့သို့ဖြစ်သည်။ မှန်ပါသည်၊ ယေရှုနှင့် ကိုယ်တော့်ကောင်းကင်ခမည်းတော်သည် အမှန်တကယ်ဖြစ်ရပ်များနှင့် ပတ်သက်ကြ၏။
ယေဟောဝါသည် ကျွန်ုပ်တို့၏မျှော်လင့်ချက်များကို အမှန်တကယ်ဖြစ်လာစေနိုင်
ထင်ယောင်ထင်မှားဖြစ်စေသော ရုပ်ပုံများနှင့် အမှန်တည်ရှိသောဘုရားသခင်သည် ကွာခြားလိုက်လေခြင်း! . . . အခြားတစ်ဖက်တွင်မူ ယေဟောဝါဘုရားသခင်သည် နှစ်ပေါင်းများစွာ သေဆုံးနေသောကျေးကျွန်များကို အသက်ပြန်ပေးနိုင်သောကြောင့် သူတို့သည် အသက်ရှင်နေဘိသကဲ့သို့ တော်မှန်စွာပြောဆိုနိုင်ပေသည်။ “ထာဝရဘုရား[သခင်]မူကား မှန်သောဘုရား [သခင်] ဖြစ်တော်မူ” ၍လူတို့ကိုဘယ်တော့မျှ ထင်ယောင်ထင်မှားမဖြစ်စေပါ။—ယေရမိ ၁၀:၁၀။
ယေဟောဝါချိန်းချက်ထားတော်မူချိန်တွင် ကိုယ်တော့်မှတ်ဉာဏ်တော်ထဲရှိသူတို့သည် သေရာမှ အသက်ပြန်ရှင်လာကြမည်ကို သိရခြင်းမှာ တကယ်စိတ်အားတက်စရာပါတကား! (တမန်တော် ၂၄:၁၅) မှန်ပါသည်၊ ရှင်ပြန်ထမြောက်စေခြင်းတွင် လူတစ်ဦး၏ဘဝပုံစံကို ပြန်ဖော်ပေးခြင်းပါဝင်သည်။ သေလွန်သူတို့၏ဘဝပုံစံများကို မှတ်မိပြီး သူတို့ကိုရှင်ပြန်ထမြောက်စေခြင်းသည် ဖန်ဆင်းရှင်အတွက် အခက်အခဲတစ်ရပ်မဟုတ်ပေ၊ ကိုယ်တော်၌ အကန့်အသတ်မဲ့ဉာဏ်ပညာနှင့် တန်ခိုးတော်ရှိ၏။ (ယောဘ ၁၂:၁၃; ဟေရှာယ ၄၀:၂၆) ယေဟောဝါသည် မေတ္တာနှင့်ပြည့်ဝတော်မူသောကြောင့် မြေကြီးပရဒိသုပေါ်သို့ သေလွန်သူများကို အသက်ပြန်ရှင်စေမည်၊ သူတို့မသေဆုံးမီကရှိခဲ့သည့် ဥပဓိရုပ်များအတိုင်းဖြစ်လာစေရန် မိမိ၏စုံလင်သောမှတ်ဉာဏ်တော်ကို အသုံးပြုတော်မူမည်။—၁ ယောဟန် ၄:၈။
စာတန့်လောက၏အဆုံး နီးကပ်လာလေ စစ်မှန်သောဘုရားသခင်ကို ယုံကြည်ကိုးစားသူများ၏ အနာဂတ်သည် ပိုတောက်ပလေဖြစ်သည်။ (သု. ၂:၂၁၊ ၂၂; ဒံယေလ ၂:၄၄၊ ၄၅; ၁ ယောဟန် ၅:၁၉) ဆာလံဆရာက ဤသို့အာမခံထားသည်– “ခဏကြာပြီးမှ မတရားသောသူသည်မရှိရ။ . . . စိတ်နှိမ့်ချသောသူတို့မူကား ပြည်တော်ကိုအမွေခံ၍ များပြားသောငြိမ်သက်ခြင်း၌ မွေ့လျော်ကြလိမ့်မည်။” (ဆာလံ ၃၇:၁၀၊ ၁၁) ရာဇဝတ်မှုနှင့် အကြမ်းဖက်မှုတို့သည် အတိတ်တွင်ကျန်ရစ်ကြလိမ့်မည်။ တရားမျှတမှု လွှမ်းမိုး၍ စီးပွားရေးအခက်အခဲများ ပပျောက်သွားမည်။ (ဆာလံ ၃၇:၆; ၇၂:၁၂၊ ၁၃; ဟေရှာယ ၆၅:၂၁-၂၃) လူမှုရေး၊ လူမျိုးရေး၊ လူမျိုးနွယ်နှင့် လူမျိုးစုခွဲခြားမှုများတို့သည် စိုးစဉ်းမျှ ရှိတော့မည်မဟုတ်။ (တမန်တော် ၁၀:၃၄၊ ၃၅) စစ်ပွဲများနှင့် စစ်လက်နက်များလည်း မရှိတော့ချေ။ (ဆာလံ ၄၆:၉) ထိုအချိန်တွင် “မြို့သားကလည်း ငါနာသည်ဟုမဆိုရ။” (ဟေရှာယ ၃၃:၂၄) လူတိုင်း၏ကျန်းမာရေးသည် စုံလင်၍ ဒေါင်ဒေါင်မြည်ဖြစ်လာလိမ့်မည်။ (ဗျာဒိတ် ၂၁:၃၊ ၄) မြေကြီးပရဒိသုသည် မကြာမီ အမှန်တကယ်ဖြစ်လာတော့မည်။ ယင်းသို့ ယေဟောဝါရည်ရွယ်ထားတော်မူသတည်း!
မှန်ပါသည်၊ ကျမ်းစာအခြေပြုမျှော်လင့်ချက်အားလုံးသည် မကြာမီ ပြည့်စုံလာတော့မည်။ ယေဟောဝါအပေါ် အပြည့်အဝယုံကြည်ကိုးစားနိုင်လျက်နှင့် ဤလောကရှိ ကြည်ညိုလေးမြတ်ခံရရာများကြောင့် အဘယ်ကြောင့် ထင်ယောင်ထင်မှားအဖြစ်ခံကြမည်နည်း။ “လူအပေါင်းတို့သည် ကယ်တင်ခြင်းသို့ရောက်၍ [အမှန်] တရားကိုသိစေ” ရန်မှာ ကိုယ်တော့်အလိုတော်ဖြစ်သည်။ (၁ တိမောသေ ၂:၃၊ ၄) ကျွန်ုပ်တို့၏အချိန်နှင့် ကျွန်ုပ်တို့၏စွမ်းရည်ကို ဤအစီအစဉ်စနစ်ရှိ ထင်ယောင်ထင်မှားဖြစ်စေရာများနှင့် ယင်း၏ဘုရား[သခင်]များ၌မြှုပ်နှံထားမည့်အစား အမှန်တကယ်ရှိသောဘုရားသခင်ကို ပိုမိုသိကျွမ်းလာ၍ ကိုယ်တော်အား စိတ်နှလုံးအကြွင်းမဲ့ ကိုးစားကြစို့လေ။—သု. ၃:၁-၆; ယောဟန် ၁၇:၃။
[စာမျက်နှာ ၆ ပါ ရုပ်ပုံ]
ယေဟောဝါနှင့်ယေရှု၏ ရှုထောင့်မှကြည့်လျှင် လာဇရုသည် အိပ်ပျော်ခဲ့ခြင်းသာဖြစ်
[စာမျက်နှာ ၇ ပါ ရုပ်ပုံ]
မကြာမီ မြေကြီးပေါ်တွင် ပရဒိသု အမှန်တကယ်တည်ရှိလာမည်