သန့်ရှင်းစင်ကြယ်မှု အမှန်အားဖြင့် အဘယ်အရာကိုဆိုလိုသနည်း
သန့်ရှင်းစင်ကြယ်မှု အမှန်အားဖြင့် အဘယ်အရာကိုဆိုလိုသနည်း
၁၈ရာစုနှင့် ၁၉ရာစုအတွင်း ဥရောပနှင့် အမေရိကန်ပြည်ထောင်စုတွင် အလွန်ညစ်ပတ်သောကြောင့် ထိုအချိန်က သာသနာပြုများ ဟောပြောခဲ့ရာကို “သန့်ရှင်းစင်ကြယ်မှု အယူဝါဒ” ဟုခေါ်တွင်နိုင်ပေသည်။ ထိုအယူဝါဒသည် ညစ်ညူးခြင်းကို အပြစ်နှင့်တန်းတူထား၏၊ သန့်ရှင်းစင်ကြယ်ခြင်းမူကား ဘုရားသခင်နှင့် ပိုမိုရင်းနှီးစေသည်ဟုဆို၏။ ယင်းကြောင့် “သန့်ရှင်းခြင်းသည် ဘုရားတရားနှင့် ဆက်နွှယ်၏” ဟူသောဆိုရိုး ရေပန်းစားလာခြင်းဖြစ်နိုင်သည်။
ဝီလျံနှင့် ကက်သရင်းဘုသ်တို့ ဖွဲ့စည်းတည်ထောင်ခဲ့သည့် ကယ်တင်ခြင်းတပ်က ထိုအတိုင်းရှုမြင်ခဲ့ကြ၏။ ဧဝံဂေလိထုံးတမ်းစဉ်လာပါ ကျန်းမာရေးနှင့် ဆေးပညာ စာအုပ်အရ သူတို့၏အစောပိုင်းဆောင်ပုဒ်တစ်ခုမှာ– “ဆပ်ပြာ၊ စွပ်ပြုတ်နှင့် ကယ်တင်ခြင်း” ဖြစ်သည်။ ၎င်းနောက် လူဝီပါစတာနှင့် အခြားသူများက ရောဂါဘယနှင့် ပိုးမွှားများသည် ဆက်စပ်မှုရှိကြောင်းကို သရုပ်ပြ၍ သံသယကင်းဝေးစေခဲ့ကြသောအခါ လူထုကျန်းမာရေး စီမံကိန်းများကို သာ၍ကောင်းမွန်လာစေရန် အရှိန်အဟုန်မြှင့်တင်ပြီး သိပ္ပံနည်းကျကျ ပို၍ဆောင်ရွက်ကြလေတော့သည်။
ချက်ချင်းအရေးယူ ဆောင်ရွက်ခဲ့သည့်အမှုအချို့တွင် တရားရုံးတော်၌ သက်သေထွက်ဆိုသူအား ကျမ်းစာကိုမနမ်းစေတော့ခြင်း၊ ကျောင်းများနှင့် ဘူတာရုံများတွင် ဘုံသောက်ရေခွက်များ မထားတော့ခြင်းတို့ပါဝင်သည်။ ခရစ်ယာန် ဘာသာရေးပွဲများတွင်သုံးသည့် ဘုံဝိုင်ခွက်ကို သီးသန့်ခွက်များဖြင့်အစားထိုးရန်ပင် ကြိုးစားအားထုတ်ခဲ့ကြသည်။ မှန်ပါသည်၊ အစောပိုင်းရှေ့ဆောင်လမ်းပြများသည် သန့်ရှင်းစင်ကြယ်မှုနှင့်ပတ်သက်၍ လူတို့၏သဘောထားကို ပြောင်းလဲပေးရာတွင် အတော်အတန်အောင်မြင်ပုံရခဲ့၏။ ရရှိသောရလဒ်ကို စာရေးဆရာတစ်ဦးက “သန့်ရှင်းစင်ကြယ်မှုကို ချစ်စိတ်ဝင်ခြင်း” ဟုခေါ်ဝေါ်ခဲ့သည့်တိုင်ဖြစ်သည်။
သို့ရာတွင် “သန့်ရှင်းစင်ကြယ်မှုကို ချစ်စိတ်ဝင်ခြင်း” သည်အပေါ်ယံမျှသာဖြစ်ကြောင်း ထင်ရှား၏။ များမကြာမီပင် စမ်းသပ်ကြည့်ရန်စိတ်ပြင်းပြသော ကုန်သည်များသည် နေ့စဉ်သုံးဆပ်ပြာကို အလှကုန်ပစ္စည်းအဖြစ် ပြောင်းလဲထုတ်လုပ်ခဲ့ကြသည်။ ကျွမ်းကျင်လိမ္မာစွာစီစဉ်ထားသော ကြော်ငြာများကလည်း တစ်ကိုယ်ရေသန့်ရှင်းမှုအတွက် ကုန်ပစ္စည်းအချို့ကိုအသုံးပြုခြင်းသည် အခြားသူများ မနာလိုစရာ လူနေမှုအဆင့်ရှိစေနိုင်မည်ဟု ဖောက်သည်များအား ယုံကြည်လာစေခဲ့ကြသည်။ ရုပ်မြင်သံကြားကလည်း ထိုစိတ်ကူးစိတ်သန်းကို အမြဲရှင်သန်နေစေသည်။ ကြော်ငြာများနှင့် အိမ်ထောင်ရေးဇာတ်လမ်းတွဲများ၌ ပါဝင်သရုပ်ဆောင်သည့် အောင်မြင်ကျော်ကြားပြီး စွဲမက်ဖွယ် ညှို့ဓာတ်ရှိသူတို့သည် အိမ်သန့်ရှင်းရေးလုပ်ခြင်း၊ ခြံဝင်းတံမြက်လှည်းခြင်း၊ အမှိုက်ကောက်ခြင်း သို့မဟုတ် သူတို့၏အိမ်မွေးကြောင်များနှင့် ခွေးများ၏ အညစ်အကြေးကို ကျုံးခြင်းတို့ကို တွေ့ရခဲသည်။
အပြင်ထွက်အလုပ်လုပ်လျှင် စားဝတ်နေရေးအတွက် အထောက်အကူပြုသည်၊ အိမ်မှုကိစ္စနှင့် သန့်ရှင်းရေးပြုလုပ်ခြင်းမှ အဘယ်ဝင်ငွေမျှမရဟု အကြောင်းပြသူများလည်းရှိသေးသည်။ အဘယ်ဝင်ငွေမျှမရရှိသည့်အတွက် ပတ်ဝန်းကျင်ကို အဘယ်ကြောင့် ထိန်းသိမ်းစောင့်ရှောက်ရမည်နည်းဟု ဆိုကြမည်။ ယင်းကြောင့် ယနေ့ လူအချို့က တစ်ကိုယ်ရေသန့်ရှင်းမှုအပြင် အခြားအဘယ်သန့်ရှင်းစင်ကြယ်မှုမျှမလိုဟု ထင်မှတ်ထားကြသည်။
သန့်ရှင်းစင်ကြယ်မှုအပေါ် ဘုရားသခင့်အမြင်
သန့်ရှင်းစင်ကြယ်မှုရှိဖို့ ကြိုးစားသင်ကြားပေးခဲ့ခြင်းတို့သည် လူ့အခြေအနေကို တိုးတက်စေခဲ့မည်ကား ယုံမှားဖွယ်မရှိချေ။ ထိုသို့ အမှန်ပင်ဖြစ်သင့်သည်၊ အကြောင်းမူကား သန့်ရှင်းစင်ကြယ်မှုသည် သန့်ရှင်းသောဘုရားသခင် ယေဟောဝါပိုင်ဆိုင်ရာအရည်အသွေးဖြစ်၍ ကိုယ်တော့်ထံမှ အစပြုခဲ့သောကြောင့်ဖြစ်သည်။ ပြုလေသမျှတွင် သန့်ရှင်းစင်ကြယ်စွာပြုမူခြင်းဖြင့် ကိုယ်တိုင်အကျိုးခံစားရရန် ကျွန်ုပ်တို့ကို ကိုယ်တော်သင်ကြားပေးတော်မူ၏။—ဟေရှာယ ၄၈:၁၇; ၁ ပေတရု ၁:၁၅။
ယေဟောဝါဘုရားသခင်သည် ဤကဏ္ဍတွင် စံနမူနာကောင်းပြခဲ့သည်။ သန့်ရှင်းစင်ကြယ်မှုသာမက ဘုရားသခင်၏ အခြားမျက်မြင်မရ အရည်အသွေးများကို ကိုယ်တော်၏ မျက်မြင်ရဖန်ဆင်းရာများ၌ တွေ့မြင်နိုင်သည်။ (ရောမ ၁:၂၀) ဖန်ဆင်းရာများကိုယ်နှိုက်သည် ရေရှည်ညစ်ညမ်းမှုကို မဖြစ်စေကြောင်း ကျွန်ုပ်တို့တွေ့မြင်နိုင်သည်။ ဂေဟစနစ်သံသရာများရှိ ကမ္ဘာမြေကြီးသည် အလိုအလျောက်သန့်စင်နိုင်စွမ်းရှိသော အံ့ဖွယ်ရာဖြစ်သည်၊ ယင်းကို သန့်ရှင်းပြီး ကျန်းမာစေသော အသက်တာအတွက် ပုံစံပြုထား၏။ ဤမျှသန့်ရှင်းသောအလုပ်သည် သန့်ရှင်းသောပုံစံပြုသူ ပြုလုပ်၍သာ ဖြစ်လာ၏။ ထို့ကြောင့် ဘုရားသခင်ကိုဝတ်ပြုသူများသည် ဘဝကဏ္ဍအသီးသီးတွင် သန့်ရှင်းစွာနေထိုင်သင့်ကြောင်း ကောက်ချက်ချနိုင်သည်။
သန့်ရှင်းစင်ကြယ်မှု၏ ကဏ္ဍလေးရပ်
သမ္မာကျမ်းစာက ဘုရားသခင်အားဝတ်ပြုသူများ ကြိုးစားပြုလုပ်သင့်သော သန့်ရှင်းစင်ကြယ်မှုကဏ္ဍလေးရပ်ကို ဖော်ပြသည်။ ယင်းတို့တစ်ခုစီကို သုံးသပ်ကြည့်ကြပါစို့။
ဝိညာဉ်ရေး။ ယင်းသည် လူတစ်ဦး၏ ထာဝရအသက်ရရေးအလားအလာ နှင့်သက်ဆိုင်သောကြောင့် ၎င်းကို အရေးအပါဆုံး သန့်ရှင်းစင်ကြယ်မှုကဏ္ဍအဖြစ် ယူမှတ်သင့်သည်။ သို့ရာတွင် ယင်းသည် လျစ်လျူရှုခြင်းအခံရဆုံးသော သန့်ရှင်းမှုကဏ္ဍရပ် ဖြစ်လေ့ရှိ၏။ ရိုးရိုးဆိုရလျှင် ဝိညာဉ်ရေးသန့်ရှင်းစင်ကြယ်မှုဟူသည် စစ်မှန်သောဝတ်ပြုရေးနှင့် မှားယွင်းသောဝတ်ပြုရေးအကြား ဘုရားသခင်ချမှတ်ထားသောစည်းကို မကျော်ခြင်းဖြစ်သည်၊ အကြောင်းကား မှားယွင်းသောဝတ်ပြုမှုပုံစံတိုင်းကို မသန့်ရှင်းဟု ဘုရားသခင်ရှုမြင်တော်မူသောကြောင့်ဖြစ်သည်။ တမန်တော်ပေါလုက ဤသို့ရေးသားခဲ့သည်– “ထာဝရဘုရား[သခင်]မိန့်တော်မူပြန်သည်ကား ‘သင်တို့သည် ထိုသူတို့အထဲမှထွက်၍ အသီးအခြားနေကြလော့။ မစင်ကြယ်သောအရာကို လက်နှင့်မျှမတို့ကြနှင့်။ ထိုသို့ပြုလျှင် သင်တို့ကို ငါသည်လက်ခံမည်။’” (၂ ကောရိန္သု ၆:၁၇) တပည့်တော်ယာကုပ်ကလည်း ဤကဏ္ဍကို တိတိကျကျဖော်ပြထားသည်– “ခမည်းတော်ဘုရားသခင့်ရှေ့၌ စင်ကြယ်သန့်ရှင်းသော [အကျင့်] ဟူမူကား . . . ကိုယ်တိုင်လည်း လော [က] အညစ်အကြေးနှင့် ကင်းစင်အံ့သောငှာ စောင့်ရှောက်ခြင်းပေတည်း။”—ယာကုပ် ၁:၂၇။
စစ်မှန်သောဝတ်ပြုရေးနှင့် မှားယွင်းသောဝတ်ပြုရေး ရောနှောခြင်းကို ဘုရားသခင် မနှစ်သက်ကြောင်း ရှင်းလင်းပြတ်သားစွာဖော်ပြထားတော်မူ၏။ မှားယွင်းသောဝတ်ပြုရေးတွင် မသန့်ရှင်းသောအမူအကျင့်များ၊ . . . များပါဝင်လေ့ရှိသည်။ (ယေရမိ ၃၂:၃၅) ယင်းကြောင့် စစ်မှန်သောခရစ်ယာန်များသည် မသန့်ရှင်းသောဝတ်ပြုရေးတွင် အဘယ်နည်းဖြင့်မျှမပါဝင်ရန် တိုက်တွန်းခံရ၏။—၁ ကောရိန္သု ၁၀:၂၀၊ ၂၁; ဗျာဒိတ် ၁၈:၄။
ကျင့်ဝတ်။ ဤကဏ္ဍတွင်လည်း ဘုရားသခင်သည် စင်ကြယ်သောအရာနှင့် မစင်ကြယ်သောအရာတို့ အလွန်ခြားနားကြောင်း ဖော်ပြတော်မူ၏။ ဤလောကတစ်နိုင်ငံလုံးသည် ဧဖက် ၄:၁၇-၁၉ (ကဘ) ဖော်ပြသည့်အတိုင်း ဖြစ်လာခဲ့ပြီ– “သူတို့သည် စိတ်ပိုင်းအရ အမှောင်ကျနေသည်။ ဘုရားသခင်၏အသက်နှင့် ကွာရှင်းလျက်ရှိကြ၏။ . . . အကျင့်သိက္ခာဆိုင်ရာအာရုံအားလုံးပြီးသည်နှင့် ညစ်ညူးသောအကျင့်အမျိုးမျိုးကို [လိုချင်တောင့်တမှုပြင်းစွာ] ကျင့်ရန်အတွက် မိမိတို့ကိုယ်ကို အကျင့်လျော့ရဲခြင်းသို့အပ်လိုက်ကြ၏။” ထိုသို့သော အကျင့်ယိုယွင်းမှုများကို နည်းအမျိုးမျိုးဖြင့် ထင်ပေါ်စေ၍ သိမ်သိမ်မွေ့မွေ့ ဖော်ပြနေသောကြောင့် ခရစ်ယာန်များ သတိပြုရန် လိုအပ်သည်။
ပြည့်တန်ဆာလုပ်ခြင်း၊ လိင်တူဆက်ဆံခြင်း၊ လက်မထပ်မီသံဝါသပြုခြင်းနှင့် အပြာစာပေများသည် ကျင့်ဝတ်စင်ကြယ်ခြင်းဆိုင်ရာဘုရားသခင့်စံနှုန်းများကို ဖောက်ဖျက်ခြင်းဖြစ်ကြောင်း ဘုရားသခင်ကို ချစ်မြတ်နိုးသူများ သဘောပေါက်ကြသည်။ သို့ရာတွင် ဖျော်ဖြေရေးနှင့် ဖက်ရှင်လောကတွင် ထိုသို့သောအမူအကျင့်များကို အမြဲဖော်ပြနေသည်။ ထို့ကြောင့် ယင်းသို့သော ခေတ်ရေစီးကြောင်းကို ခရစ်ယာန်များ သတိပြုရှောင်ရှားရမည်။ ခရစ်ယာန်အစည်းအဝေးများ သို့မဟုတ် မိတ်ဆုံပွဲများသို့ တိုနံ့နံ့ မလုံ့တလုံအဝတ်အစားများ ဝတ်ဆင်လာခြင်းသည် မလိုလားအပ်သောအာရုံစိုက်မှုကို ဆွဲဆောင်ရာရောက်သည့်ပြင် အကျင့်လျော့ရဲကြောင်း ပြသရာရောက်သည်။ ခရစ်ယာန်အပေါင်းအသင်းအတွင်း မစင်ကြယ်သော လောကအတွေးအခေါ်များ ယူဆောင်လာသည့်အပြင် ထိုသို့ဝတ်စားဆင်ယင်ခြင်းတို့က အခြားသူများကို မသန့်ရှင်းသောအတွေးအခေါ်များ ဖြစ်ပေါ်လာစေနိုင်သည်။ ယင်းကိစ္စမျိုးတွင် “အထက်မှသက်ရောက်သောပညာ” ကိုကျင့်သုံးကြရန် ခရစ်ယာန်များ ကြိုးစားအားထုတ်ဖို့လိုသည်။—ယာကုပ် ၃:၁၇။
စိတ်ဓာတ်ရေး။ ကျွန်ုပ်တို့စိတ်နှလုံး၏ အတွင်းအကျဆုံး နေရာများသည် မသန့်ရှင်းသောအတွေးအခေါ်များ သိုထားရာနေရာ မဖြစ်သင့်ချေ။ ယေရှုက “[တပ်မက်သော] စိတ်နှင့် သူ့မယားကိုကြည့်သောသူသည် စိတ်နှလုံးထဲ၌ ထိုမိန်းမနှင့်ပြစ်မှားပြီ” ဟုမိန့်တော်မူစဉ် မသန့်ရှင်းသောအတွေးအခေါ်များကို ဆန့်ကျင်ရန် သတိပေးနေသည်။ (မဿဲ ၅:၂၈; မာကု ၇:၂၀-၂၃) ထိုစကားများသည် အပြာရုပ်ပုံများနှင့် ရုပ်ရှင်များကြည့်ရှုခြင်း၊ ယုတ်ညံ့သောလိင်ဆိုင်ရာလုပ်ဆောင်မှု အကြောင်းများဖတ်ရှုခြင်းနှင့် မတော်လျော်သော သီချင်းစာသားများကို နားထောင်ခြင်းတို့နှင့်သက်ဆိုင်သည်။ ထို့ကြောင့် ခရစ်ယာန်များသည် မသန့်ရှင်းသော အပြောအဆို၊ အပြုအမူများကို ဖြစ်ပေါ်စေနိုင်သည့် စိတ်ရွှင်မြူးစရာ မသန့်ရှင်းသောအတွေးအခေါ်များကြောင့် မိမိကိုယ်ကိုညစ်ညူးစေခြင်းကို ရှောင်ကြဉ်ကြရမည်။—မဿဲ ၁၂:၃၄; ၁၅:၁၈။
ကာယရေး။ သန့်ရှင်းခြင်းနှင့် ကာယစင်ကြယ်မှုသည် သမ္မာကျမ်းစာတွင် အလွန်နီးကပ်စွာဆက်စပ်နေသည်။ ဥပမာ ပေါလုက ဤသို့ရေးသားခဲ့သည်– “ချစ်သူတို့၊ . . . ကိုယ်ခန္ဓာ၏အညစ်အကြေး၊ စိတ်ဝိညာဉ်၏အညစ်အကြေးရှိသမျှတို့နှင့် ကိုယ်ကိုကိုယ်ကင်းစင်စေလျက်၊ ဘုရားသခင်ကိုကြောက်ရွံ့၍ သန့်ရှင်းခြင်း [အကျင့်] နှင့်ပြည့်စုံကြကုန်အံ့။” (၂ ကောရိန္သု ၇:၁) ထို့ကြောင့် စစ်မှန်သောခရစ်ယာန်များသည် အခြေအနေခွင့်ပြုသမျှ မိမိတို့၏ကိုယ်ခန္ဓာ၊ နေအိမ်နှင့် ပတ်ဝန်းကျင်ကို သန့်ရှင်းသပ်ရပ်နေစေသင့်သည်။ ဆေးကြောရန် သို့မဟုတ် ရေချိုးရန် ရေအလုံအလောက်မရရှိစေကာမူ ခရစ်ယာန်များသည် သန့်ရှင်း၍ ကြည့်ပျော်ရှုပျော်ဖြစ်ရန် အတတ်နိုင်ဆုံးကြိုးစားအားထုတ်သင့်သည်။
ကာယရေးသန့်ရှင်းစင်ကြယ်မှုတွင် ဆေးလိပ်ကို တစ်နည်းနည်းဖြင့်သောက်ခြင်း၊ အရက်သေစာ သောက်ကြူးခြင်းနှင့် ခန္ဓာကိုယ်ကို ညစ်ညူးစေကာ ထိခိုက်ပျက်စီးစေသည့် အဘယ်ပုံစံဖြင့်မဆို မူးယစ်ဆေးအလွဲသုံးခြင်းကို ဆီးတားမည်ဖြစ်သည်။ ရှောလမုန်သီချင်းတွင် ဖော်ပြထားသော သိုးထိန်းသည် ရှုလမိတ်မိန်းမပျို၏အဝတ်တန်ဆာမှ မွှေးကြိုင်သောရနံ့ကို သဘောကျနှစ်သက်ခဲ့သည်။ (ရှောလမုန်သီချင်း ၄:၁၁) ကျွန်ုပ်တို့အနီးတစ်ဝိုက်ရှိသူများကို အော့နှလုံးနာစရာအနံ့အသက် မရစေလိုသည့်အတွက် ကျွန်ုပ်တို့၏ တစ်ကိုယ်ရေသန့်ရှင်းရေးကို ဂရုစိုက်ခြင်းသည် မေတ္တာပါသောလုပ်ရပ်တစ်ခုဖြစ်သည်။ အော်ဒီကလုံးရေမွှေးသည် သင်းပျံ့သောမွှေးရနံ့ကို ရရှိစေနိုင်သည်မှန်သော်လည်း ယင်းက ပုံမှန်ရေချိုးခြင်းနှင့် အဝတ်လျှော်ခြင်းကို အစားမထိုးနိုင်ပေ။
မျှတသောအမြင် ဆက်ရှိပါ
ကာယရေးသန့်ရှင်းစင်ကြယ်မှုနှင့်ပတ်သက်လာလျှင် လူတို့သည် တစ်ဖက်စွန်းရောက်သွားတတ်ကြ၏။ တစ်ဖက်တွင်မူ သန့်ရှင်းစင်ကြယ်မှုနှင့်စပ်လျဉ်း၍ အစွန်းရောက်ခြင်းက ဘဝပျော်ရွှင်မှုကို ကင်းမဲ့စေနိုင်သည်။ တန်ဖိုးရှိအချိန်ကိုလည်း အလဟဿကုန်ခန်းစေနိုင်သည်။ အခြားတစ်ဖက်တွင်မူ ညစ်ပတ်၍ သပ်ရပ်မှုမရှိသောအိမ်များသည် ပြန်လည်မွမ်းမံပြုပြင်ရန် အကုန်အကျများစေပေမည်။ ထိုတစ်ဖက်စွန်းရောက်ရှိမှုများအကြားတွင် ကျွန်ုပ်တို့၏နေအိမ်ကို သန့်ရှင်း၍ ကြည့်ပျော်ရှုပျော်ဖြစ်နေစေရန် ထိန်းထားနိုင်သော လက်တွေ့ကျ၍ မျှတသောနည်းလမ်းရှိပါသည်။
ရိုးရိုးရှင်းရှင်းထားပါ။ ရှုပ်ပွနေသောအိမ်များ သို့မဟုတ် အခန်းများကို သန့်ရှင်းသပ်ရပ်စေရန် ခက်ခဲသည်၊ ထိုသို့သော ပြွတ်သိပ်နေသည့်ဝန်းကျင်များတွင် အညစ်အကြေးကို အလွယ်တကူ မတွေ့မြင်နိုင်ချေ။ ပကာသနမဖက်၊ ရိုးရှင်းသောအိမ်များကို သန့်ရှင်းစွာထားရန် အချိန်မကုန်လှပေ။ သမ္မာကျမ်းစာတွင် ရိုးရှင်းသောဘဝပုံစံကို ထောက်ခံထားသည်– “စားရန်၊ ဝတ်ရန်ရှိသမျှနှင့် ရောင့်ရဲလျက်နေကြကုန်အံ့။”—၁ တိမောသေ ၆:၈။
သပ်သပ်ရပ်ရပ်ထားပါ။ အိမ်တစ်လုံး သန့်သန့်ရှင်းရှင်းဖြစ်ရေးသည် ယင်းတွင်နေထိုင်သူအားလုံး၏ တာဝန်ဖြစ်သည်။ ရှုပ်ပွနေသောအိမ်များသည် ရှုပ်ပွသောအခန်းများမှ အစပြုလေ့ရှိသည်။ သေသပ်မှုရှိခြင်းဟူသည် အရာရာတိုင်း သူ့နေရာနှင့်သူ ရှိနေခြင်းမည်၏။ ဥပမာ၊ ညစ်ပေနေသောအဝတ်အစားများကို ထားစရာနေရာသည် အိပ်ခန်းကြမ်းပြင်ပေါ် မဟုတ်ပေ။ ပို၍ဂရုပြုရမည်မှာ ကစားစရာအရုပ်များနှင့် တန်ဆာပလာများကို ဖြန့်ကြဲထားခြင်းသည် အန္တရာယ်ဖြစ်စေနိုင်၏။ အိမ်တွင်းမတော်တဆဖြစ်မှုအများသည် သပ်ရပ်မှုမရှိခြင်းကြောင့်ဖြစ်တတ်သည်။
ရှင်းနေသည်မှာ သန့်ရှင်းစင်ကြယ်ခြင်းနှင့် ခရစ်ယာန်ဘဝလမ်းစဉ်သည် ဒွန်တွဲနေ၏။ ဘုရားတရားကြည်ညိုသည့် ဘဝလမ်းစဉ်နှင့်စပ်လျဉ်း၍ ပရောဖက် ဟေရှာယက “သန့်ရှင်းရာလမ်း” အကြောင်းဖော်ပြထား၏။ “မစင်ကြယ်သောသူသည် ထိုလမ်း၌ မလျှောက်မသွားရ” ဟူသော အလေးအနက်စဉ်းစားစရာအချက်ကို ထပ်လောင်းပြောကြားသည်။ (ဟေရှာယ ၃၅:၈) မှန်ပါသည်၊ ယခုပင် သန့်ရှင်းစင်ကြယ်မှု အလေ့အကျင့်ကောင်းများကို မွေးမြူခြင်းသည် မကြာမီ သန့်ရှင်းစင်ကြယ်သည့် ပရဒိသုကမ္ဘာကို ဘုရားသခင်တည်ထောင်မည်ဟူသော ကတိတော်ကို ယုံကြည်ကြောင်း အခိုင်အလုံဖော်ပြသည်။ ထိုအခါ လှပသောဤကမ္ဘာဂြိုဟ်၏ ဒေသအားလုံးတွင် လူခပ်သိမ်းသည် ကိုယ်တော်၏ သန့်ရှင်းစင်ကြယ်ခြင်းဆိုင်ရာ စုံလင်သောစံနှုန်းများကို အပြည့်အဝလိုက်လျှောက်ခြင်းဖြင့် ယေဟောဝါဘုရားသခင်၏ဂုဏ်တော်ကို ချီးမွမ်းကြပေလိမ့်မည်။—ဗျာဒိတ် ၇:၉။
[စာမျက်နှာ ၆ ပါ ရုပ်ပုံ]
အိမ်တစ်လုံး သန့်သန့် ရှင်းရှင်းဖြစ်ရေးသည် ယင်းတွင် နေထိုင်သူအားလုံး၏ တာဝန်ဖြစ်
[စာမျက်နှာ ၇ ပါ ရုပ်ပုံ]
ကမ္ဘာကြီးသည် အလိုအလျောက်သန့်စင်နိုင်စွမ်းရှိ အံ့ဖွယ်ရာဖြစ်