‘အမှန်တရား၏ဝိညာဉ်တော်’ ကို သင်ရထားပြီးပြီလော
‘အမှန်တရား၏ဝိညာဉ်တော်’ ကို သင်ရထားပြီးပြီလော
“ခမည်းတော်သည် [အမှန်] တရား၏ဝိညာဉ်တော်တည်းဟူသော အခြားသောထောက်မသူကို သင်တို့နှင့်အတူအစဉ်မပြတ်တည်နေစေခြင်းငှာ သင်တို့အားပေးတော်မူမည်။”—ယောဟန် ၁၄:၁၆၊ ၁၇၊ ကဘ။
၁။ ယေရှုသည် အထက်ခန်းမ၌ တမန်တော်များနှင့်အတူရှိခဲ့သော နောက်ဆုံးနာရီပိုင်းတွင် အဘယ်အရေးပါသောသတင်းကိုပေးခဲ့သနည်း။
“သခင်၊ ကိုယ်တော်သည် အဘယ်အရပ်သို့ကြွတော်မူမည်နည်း။” ယင်းကား ယေရုရှလင်မြို့၊ အထက်ခန်းမတစ်ခုတွင် တမန်တော်များနှင့်အတူနေခဲ့သော နောက်ဆုံးနာရီပိုင်းအတွင်း တမန်တော်တစ်ပါးက ယေရှုကိုမေးသောမေးခွန်းတစ်ခုဖြစ်သည်။ (ယောဟန် ၁၃:၃၆) ထိုအချိန်တွင် အတူရှိစဉ် ယေရှုက ယခု မိမိသည် ခမည်းတော်ထံပြန်ချိန်တန်ပြီဟု သူတို့ကိုအသိပေးခဲ့သည်။ (ယောဟန် ၁၄:၂၈; ၁၆:၂၈) သူတို့ကိုညွှန်ကြား၍ သူတို့၏မေးခွန်းများကိုဖြေဆိုဖို့ သူတို့နှင့်အတူ ကိုယ်တော်ရှိတော့မည်မဟုတ်။ သို့သော် ကိုယ်တော်က “ငါသည်ခမည်းတော်ကိုတောင်း၍ ခမည်းတော်သည် [အမှန်]တရား၏ဝိညာဉ်တည်းဟူသော အခြားသောထောက်မသူ [သို့မဟုတ် နှစ်သိမ့်ပေးသူ] ကို သင်တို့နှင့်အတူအစဉ်မပြတ်တည်နေစေခြင်းငှာ သင်တို့အားပေးတော်မူမည်” ဟုစိတ်ချရအောင် ပြောဆိုသည်။—ယောဟန် ၁၄:၁၆၊ ကဘ၊ အောက်ခြေမှတ်ချက်။
၂။ မိမိသွားပြီးနောက် တပည့်တော်နောက်တော်လိုက်များထံ အဘယ်အရာစေလွှတ်မည်ဟု ယေရှုကတိပြုခဲ့သနည်း။
၂ ယေရှုက ၎င်းထောက်မသူသည် အဘယ်အရာဖြစ်ကြောင်းနှင့် သူတို့ကို မည်သို့ထောက်ကူပေးမည်ဖြစ်ကြောင်း ရှင်းပြခဲ့၏။ သူတို့ကို ကိုယ်တော်ဤသို့မိန့်ဆိုခဲ့သည်– “အစအဦး၌ သင်တို့နှင့်အတူငါရှိသောကြောင့် ဤသို့မပြောဖူးသေး။ ငါ့ကိုစေလွှတ်တော်မူသောသူထံသို့ ယခုငါသွားရမည်။ . . . ငါသွားလျှင် သင်တို့အကျိုးရှိလိမ့်မည်။ အကြောင်းမူကား၊ ငါမသွားလျှင် [ထောက်မသူ]သည် သင်တို့ဆီသို့မလာ။ ငါသွားလျှင် ထိုသူကို သင်တို့ဆီသို့ငါစေလွှတ်မည်။ . . . [အမှန်]တရားနှင့်ပြည့်စုံသော ထိုဝိညာဉ်တော်သည်ရောက်လာသောအခါ၊ [အမှန်]တရားကိုသင်တို့အား အကြွင်းမဲ့သွန်သင်ပြသလိမ့်မည်။”—ယောဟန် ၁၆:၄၊ ၅၊ ၇၊ ၁၃။
၃။ (က) ‘အမှန်တရား၏ဝိညာဉ်’ ကို ကနဦးခရစ်ယာန်များထံ အဘယ်အချိန်ကစေလွှတ်ခဲ့သနည်း။ (ခ) ဝိညာဉ်တော်သည် အဘယ်အရေးပါသောနည်းတစ်နည်းဖြင့် သူတို့အတွက် “ထောက်မသူ” တစ်ဦးဖြစ်ခဲ့သနည်း။
၃ တမန်တော်ပေတရု သက်သေထူခဲ့သည့်အတိုင်း ဤကတိတော်သည် စီ.အီး. ၃၃ ပင်တေကုတ္တေပွဲနေ့တွင် ပြည့်စုံခဲ့၏– “ထိုယေရှုကို ဘုရားသခင်ထမြောက်စေတော်မူသည်ကို ငါတို့ရှိသမျှသည် သက်သေခံဖြစ်ကြ၏။ ထိုသို့ဘုရားသခင်သည် လက်ယာလက်တော်နှင့်ချီးမြှင့်တော်မူသဖြင့်၊ ထိုသခင်သည် ကတိတော်နှင့်ယှဉ်သော သန့်ရှင်းသောဝိညာဉ်တော်ကို ခမည်းတော်ထံ၌ခံပြီဖြစ်၍ သင်တို့သိမြင်ကြားရသောအရာကို သွန်းလောင်းတော်မူ၏။” (တမန်တော် ၂:၃၂၊ ၃၃) နောင်တွင် ကျွန်ုပ်တို့တွေ့ရကြမည်ဖြစ်သည့်အတိုင်း ပင်တေကုတ္တေပွဲနေ့တွင် သွန်းလောင်းခဲ့သော သန့်ရှင်းသောဝိညာဉ်တော်သည် ကနဦးခရစ်ယာန်များအတွက် အကျိုးများစွာဆောင်ရွက်ပေးခဲ့သည်။ သို့သော် ယေရှုက ‘အမှန်တရား၏ဝိညာဉ်’ သည် ‘ကိုယ်တော်ပြောခဲ့သမျှသောစကားတို့ကို မှတ်မိစေ’ မည်ဟုကတိပြုခဲ့သည်။ (ယောဟန် ၁၄:၂၆) ယေရှု၏ဓမ္မအမှု၊ ကိုယ်တော်၏သွန်သင်ချက်များနှင့် ကိုယ်တော့်စကားလုံးများကိုပင် ပြန်လည်သတိရကြပြီး ၎င်းတို့ကိုရေးသားစေပေမည်။ စီ.အီး. ပထမရာစုအဆုံးပိုင်း၌ သက်ကြီးရွယ်အို တမန်တော်ယောဟန်သည် မိမိ၏ခရစ်ဝင်ကျမ်းကို ရေးသားစပြုသောအခါ ယင်းသည် သူ့အတွက် အထူးအထောက်အကူဖြစ်ခဲ့ပေမည်၊ ထိုမှတ်တမ်းတွင် ယေရှု၏သေခြင်းအောက်မေ့ရာပွဲကို စတင်ကျင်းပခဲ့စဉ်က ကိုယ်တော်ပေးခဲ့သော အဖိုးတန်သွန်သင်ချက်ပါဝင်သည်။—ယောဟန်အခန်းကြီး ၁၃-၁၇။
၄။ ‘အမှန်တရား၏ဝိညာဉ်’ သည် ကနဦးဝိညာဉ်တော်ဖွားခရစ်ယာန်များကို မည်သို့ထောက်ကူပေးခဲ့သနည်း။
၄ ထိုကနဦးခရစ်ယာန်များအား ယေရှုက ဝိညာဉ်တော်သည် ‘ခပ်သိမ်းသောအရာတို့ကို သူတို့အား ပြသသွန်သင်’ ၍ ‘အမှန်တရား၁ ကောရိန္သု ၂:၁၀; ဧဖက် ၄:၃) သို့ဖြင့် သန့်ရှင်းသောဝိညာဉ်တော်သည် ကနဦးခရစ်ယာန်များကို “သစ္စာနှင့်သတိပညာရှိသောကျွန်” အဖြစ်အမှုဆောင်၍ ဝိညာဉ်တော်ဖွား ခရစ်ယာန်တစ်ဦးချင်းစီကို ဝိညာဉ်ရေးရာ ‘အချိန်တန်အစာ’ ထောက်ပံ့ပေးဖို့ အခွင့်အာဏာအပ်နှင်းတော်မူမည်ဖြစ်သည်။—မဿဲ ၂၄:၄၅၊ သမ။
ကို အကြွင်းမဲ့သွန်သင်ပြသ’ ပေးမည်ဖြစ်ကြောင်းကိုလည်း ကတိပြုခဲ့သည်။ ဝိညာဉ်တော်သည် ကျမ်းစာ၏နက်နဲရာများကို နားလည်စေ၍ သူတို့၏အတွေးအခေါ်၊ သိနားလည်မှုနှင့် ရည်ရွယ်ချက်တို့ကို တစ်စည်းတစ်လုံးတည်းဖြစ်စေလိမ့်မည်။ (ဝိညာဉ်တော်ကသက်သေခံ
၅။ (က) စီ.အီး. ၃၃၊ နိသန်လ ၁၄ ရက်ညတွင် ယေရှုသည် မိမိ၏တပည့်တော်နောက်တော်လိုက်များအား အဘယ်မျှော်လင့်ချက်အသစ်ကို ဖော်ပြခဲ့သနည်း။ (ခ) ယေရှု၏ကတိတော်ကိုပြည့်စုံစေရာ၌ သန့်ရှင်းသောဝိညာဉ်တော်သည် အဘယ်အပိုင်းကဏ္ဍမှပါဝင်မည်နည်း။
၅ စီ.အီး. ၃၃၊ နိသန်လ ၁၄ ရက်ညတွင် ယေရှုက တပည့်တော်နောက်တော်လိုက်များသည် နောက်ပိုင်းတွင် ကိုယ်တော်နှင့်အတူ ကောင်းကင်တွင်နေထိုင်ရန် ကိုယ်တော်နှင့် ကိုယ်တော့်ခမည်းတော်က လက်ခံလိမ့်မည်ဟု အသိပေးခဲ့သည်။ သူတို့ကိုကိုယ်တော်ဤသို့မိန့်ဆိုခဲ့သည်– “ငါ့အဘ၏အိမ်တော်၌ နေစရာအခန်းများရှိ၏။ သို့မဟုတ်လျှင် မဟုတ်ကြောင်းကို သင်တို့အားငါမပြောဘဲမနေ။ သင်တို့နေစရာအရပ်ကိုပြင်ဆင်ခြင်းငှာ ငါသွားရ၏။ ငါသည်သွား၍ သင်တို့နေစရာအရပ်ကိုပြင်ဆင်ပြီးမှ တစ်ဖန်လာပြန်၍၊ ငါရှိရာအရပ်၌ သင်တို့ရှိစေခြင်းငှာ သင်တို့ကို ငါ့ထံသို့သိမ်းဆည်းမည်။” (ယောဟန် ၁၃:၃၆; ၁၄:၂၊ ၃) သူတို့သည် ကိုယ်တော်၏နိုင်ငံတော်တွင် ကိုယ်တော်နှင့်အတူ အုပ်ချုပ်ကြမည်။ (လုကာ ၂၂:၂၈-၃၀) ဤကောင်းကင်မျှော်လင့်ချက်ကို သူတို့ခံစားရဖို့ ဘုရားသခင်၏ဝိညာဉ်ရေး,သားများအဖြစ် “ဝိညာဉ်တော်အားဖြင့် မွေးဖွားခြင်းကို” ခံရကြမည်ဖြစ်ပြီး ခရစ်တော်နှင့်အတူ ကောင်းကင်တွင် ဘုရင်များ၊ ယဇ်ပုရောဟိတ်များအဖြစ်အမှုထမ်းရန် ခန့်အပ်ခံရကြမည်။—ယောဟန် ၃:၅-၈၊ သတင်းကောင်း; ၂ ကောရိန္သု ၁:၂၁၊ ၂၂; တိတု ၃:၅-၇; ၁ ပေတရု ၁:၃၊ ၄; ဗျာဒိတ် ၂၀:၆။
၆။ (က) အဘယ်အချိန်၌ ကောင်းကင်ခေါ်တော်မူခြင်း စတင်ခဲ့ပြီး မည်မျှခေါ်တော်မူခြင်းခံခဲ့ကြရသနည်း။ (ခ) ခေါ်တော်မူခြင်းခံရသူများသည် အဘယ်အရာ၌နှစ်ခြင်းခံခဲ့ကြသနည်း။
၆ ဤ ‘ကောင်းကင်ခေါ်တော်မူခြင်း’ သည် စီ.အီး. ၃၃၊ ပင်တေကုတ္တေပွဲနေ့တွင် အစပြုခဲ့ပြီး အများစုမှာ ၁၉၃၀ ပြည့်လွန်နှစ်များအလယ်ပိုင်းတွင် ပြီးဆုံးသွားပုံရသည်။ (ဟေဗြဲ ၃:၁) ဝိညာဉ်ရေးဣသရေလအဝင်ဖြစ်ရန် “လူတို့အထဲကရွေးနုတ်၍” သန့်ရှင်းသောဝိညာဉ်တော်ဖြင့် တံဆိပ်ခတ်ခြင်းခံရသူ အရေအတွက်မှာ ၁၄၄,၀၀၀ ဖြစ်သည်။ (ဗျာဒိတ် ၇:၄; ၁၄:၁-၄) ထိုသူတို့သည် ခရစ်တော်၏ဝိညာဉ်ရေးကိုယ်ခန္ဓာ၊ ကိုယ်တော်၏အသင်းတော်နှင့် ကိုယ်တော်၏သေခြင်း၌ နှစ်ခြင်းယူခဲ့ကြသည်။ (ရောမ ၆:၃; ၁ ကောရိန္သု ၁၂:၁၂၊ ၁၃၊ ၂၇; ဧဖက် ၁:၂၂၊ ၂၃) သူတို့သည် ရေတွင်နှစ်ခြင်းခံပြီး သန့်ရှင်းသောဝိညာဉ်တော်ဖြင့် ခန့်အပ်ခံရပြီးနောက် သေသည့်တိုင် သမာဓိစောင့်သိခြင်းတည်းဟူသော ပူဇော်သကာလမ်းစဉ်ကို လိုက်လျှောက်ခဲ့ကြသည်။—ရောမ ၆:၄၊ ၅။
၇။ သတိရအောက်မေ့ပွဲတွင် ဝိညာဉ်တော်ဖွားခရစ်ယာန်များသာ အထိမ်းအမှတ်များကို အဘယ်ကြောင့်သုံးဆောင်သင့်သနည်း။
၇ ဤဝိညာဉ်တော်ဖွားခရစ်ယာန်များသည် ဝိညာဉ်ရေးဣသရေလလူမျိုးအဖြစ် ယေဟောဝါနှင့် “ဘုရားသခင်၏ဣသရေလအမျိုး” တို့ဖွဲ့ထားသော ပဋိညာဉ်တရားသစ်၌ရှိကြသည်။ (ဂလာတိ ၆:၁၆; ယေရမိ ၃၁:၃၁-၃၄) ပဋိညာဉ်တရားသစ်သည် ခရစ်တော်သွန်းခဲ့သောအသွေးတော်အားဖြင့် အတည်ပြုခံရသည်။ ယေရှုသည် မိမိ၏သေခြင်းအောက်မေ့ရာပွဲကို အစပြုကျင်းပစဉ်က ယင်းကိုဖော်ပြခဲ့သည်။ ဤသို့လုကာမှတ်တမ်းတင်ခဲ့သည်– “မုန့်ကိုယူ၍ ကျေးဇူးတော်ကိုချီးမွမ်းပြီးမှ မုန့်ကိုဖဲ့၍၊ ‘ဤမုန့်ကားသင်တို့အဖို့အလိုငှာ စွန့်သောငါ၏ကိုယ်ဖြစ်၏။ ငါ့ကိုအောက်မေ့ဖို့ရာ ဤသို့ပြုကြလော့’ ဟုမိန့်တော်မူ၏။ ထိုနည်းတူ ညစာစားပြီးမှ ခွက်ကိုလည်းယူ၍ ‘ဤခွက်ကား သင်တို့အဖို့အလိုငှာသွန်းသော ငါ၏အသွေး၌တည်သော ပဋိညာဉ်တရားသစ်ဖြစ်၏။’” (လုကာ ၂၂:၁၉၊ ၂၀) အကြွင်းအကျန်ဖြစ်သော မြေကြီးပေါ်ရှိ ၁၄၄,၀၀၀ မှကျန်ကြွင်းသူတို့သည် ခရစ်တော်၏သေခြင်းသတိရအောက်မေ့ပွဲ အထိမ်းအမှတ်မုန့်နှင့် စပျစ်ရည်ကို သင့်လျော်စွာသုံးဆောင်ကြ၏။
၈။ ဝိညာဉ်တော်ဖွားများသည် ကောင်းကင်ခေါ်တော်မူခြင်းခံရကြောင်း မည်သို့သိနိုင်သနည်း။
၈ ဝိညာဉ်တော်ဖွားများသည် ကောင်းကင်ခေါ်တော်မူခြင်းခံရကြောင်း မည်သို့သိရှိကြသနည်း။ သူတို့သည် သန့်ရှင်းသောဝိညာဉ်တော်၏ မမှားနိုင်သောသက်သေခံချက်ကို ရရှိကြ၏။ ထိုသူတို့ကို တမန်တော်ပေါလု ဤသို့ရေးသားခဲ့သည်– “ဘုရားသခင်၏ဝိညာဉ်တော် ဆုံးမပဲ့ပြင်တော်မူသမျှသောသူတို့သည် ဘုရားသခင်၏သားဖြစ်ကြ၏။ . . . ငါတို့သည် ဘုရားသခင်၏သားဖြစ်ကြသည်ဟု ဝိညာဉ်တော်သည် ငါတို့၏ဝိညာဉ်နှင့်အတူ သက်သေခံတော်မူ၏။ သားမှန်လျှင်အမွေခံ၊ ဘုရားသခင်၏အမွေခံဖြစ်ကြ၏။ ခရစ်တော်နှင့်အတူဘုန်းဝင်စားမည်အကြောင်း၊ ထိုသခင်နှင့်အတူ ဆင်းရဲ . . . ကိုခံရလျှင်၊ ထိုသခင်နှင့်ဆက်ဆံသော အမွေခံလည်းဖြစ်ကြ၏။” (ရောမ ၈:၁၄-၁၇) ဝိညာဉ်တော်၏ ဤသက်သေခံချက်သည် အလွန်တန်ခိုးပါသည်ဖြစ်၍ ကောင်းကင်ခေါ်တော်မူခြင်းရရှိထားသည်ကို အနည်းငယ်မျှသံသယဝင်သူသည် မိမိတို့ခေါ်တော်မူခြင်းမခံရဟု ကျိုးကြောင်းညီလျော်စွာ ကောက်ချက်ချနိုင်ပြီး သတိရအောက်မေ့ပွဲ အထိမ်းအမှတ်များကို သူတို့သုံးဆောင်တော့မည်မဟုတ်ချေ။
ဝိညာဉ်တော်နှင့် အခြားသိုး
၉။ ခရစ်ဝင်ကျမ်းများနှင့် ဗျာဒိတ်ကျမ်းတွင် အဘယ်သီးခြားအုပ်စုနှစ်စုအကြောင်း ဖော်ပြထားသနည်း။
၉ ဝိညာဉ်ရေးဣသရေလအဖြစ် ခေါ်တော်မူခြင်းခံရသူ ခရစ်ယာန်အရေအတွက်အကန့်အသတ်ရှိခြင်းကို စိတ်ထဲမှတ်လျက် ယေရှုသည် သူတို့အား “သိုးစုငယ်” ဟုခေါ်ဆိုခဲ့သည်၊ ထိုသူတို့သည် ပဋိညာဉ်တရားသစ်၏ “သိုးခြံ” ထဲသို့ဝင်ခွင့်ရကြသည်ဖြစ်ရာ မိမိစုသိမ်းရဦးမည်ဟု ယေရှုမိန့်ဆိုခဲ့သော မရေတွက်နိုင်သည့် “အခြားသိုး” များနှင့်မတူချေ။ (လုကာ ၁၂:၃၂; ယောဟန် ၁၀:၁၆) ဤဆုံးခန်းချိန်၌ စုသိမ်းခံရသောအခြားသိုးများသည် မြေကြီးပရဒိသုတွင် ထာဝစဉ်အသက်ရှင်ဖို့မျှော်လင့်သည့် “ကြီးစွာသောဆင်းရဲ” ခြင်းကိုကပ်ကျော်မည့် “လူအုပ်ကြီး” တွင်ပါဝင်ကြမည်။ စိတ်ဝင်စားစရာမှာ စီ.အီး. ပထမရာစုအကုန်ပိုင်းတွင် ယောဟန်ရရှိခဲ့သော အဆင်းအာရုံက ဤလူအုပ်ကြီးနှင့် ဝိညာဉ်ရေးဣသရေလ ၁၄၄,၀၀၀ တို့ကို ကွဲပြားခြားနားစေခဲ့သည်။ (ဗျာဒိတ် ၇:၄၊ ၉၊ ၁၄) အခြားသိုးများကော သန့်ရှင်းသောဝိညာဉ်တော်ခံစားကြရသလော၊ ခံစားရသည်ဆိုလျှင် သူတို့၏အသက်တာကို မည်သို့အကျိုးသက်ရောက်သနည်း။
၁၀။ အခြားသိုးများသည် “ခမည်းတော်၊ သားတော်၊ သန့်ရှင်းသောဝိညာဉ်တော်၏နာမ၌” မည်သို့ နှစ်ခြင်းခံယူကြသနည်း။
၁၀ သန့်ရှင်းသောဝိညာဉ်တော်သည် အခြားသိုးများ၏အသက်တာတွင် အမှန်ပင်အရေးပါသည်။ သူတို့သည် “ခမည်းတော်၊ သားတော်၊ သန့်ရှင်းသောဝိညာဉ်တော်၏နာမ၌” နှစ်ခြင်းယူခြင်းအားဖြင့် ယေဟောဝါထံဆက်ကပ်အပ်နှံကြောင်း ပြသကြသည်။ (မဿဲ ၂၈:၁၉) သူတို့သည် ယေဟောဝါ၏ပိုင်သအုပ်စိုးမှုကို အသိအမှတ်ပြုကြ၏၊ မိမိတို့၏ဘုရင်နှင့် ရွေးနုတ်ရှင်အဖြစ် ခရစ်တော်ကိုလက်အောက်ခံကြ၍ မိမိတို့အသက်တာတွင် ဘုရားသခင့်ဝိညာဉ်တော် သို့မဟုတ် လှုပ်ရှားသောစွမ်းအား၏လုပ်ဆောင်မှုကို လက်ခံကြသည်။ သူတို့၏အသက်တာတွင် ‘ဝိညာဉ်အသီးများ’ ဖြစ်သည့် “ချစ်ခြင်း၊ ဝမ်းမြောက်ခြင်း၊ ငြိမ်သက်ခြင်း၊ စိတ်ရှည်ခြင်း၊ ကျေးဇူးပြုခြင်း၊ ကောင်းမြတ်ခြင်း၊ သစ္စာစောင့်ခြင်း၊ နူးညံ့သိမ်မွေ့ခြင်း၊ . . . ချုပ်တည်းခြင်း” တို့ကို နေ့စဉ် ကြိုးစားပြုစုပျိုးထောင်ကြသည်။—ဂလာတိ ၅:၂၂၊ ၂၃။
၁၁၊ ၁၂။ (က) ဝိညာဉ်တော်ဖွားများသည် အလွန်ထူးခြားသောနည်းဖြင့် မည်သို့သန့်စင်ခံရကြသနည်း။ (ခ) အခြားသိုးများသည် အဘယ်နည်းဖြင့် သန့်စင်ခံရပြီး သန့်ရှင်းလာကြသနည်း။
၁၁ ထို့အပြင် အခြားသိုးများသည် သမ္မာကျမ်းစာနှင့် ကိုယ်တော်၏သန့်ရှင်းသောဝိညာဉ်တော်က သူတို့ကိုသန့်ရှင်းစင်ကြယ်စေရန်လည်း ခွင့်ပြုရမည်။ ဝိညာဉ်တော်ဖွားများသည် ခရစ်တော်၏သတို့သမီးအဖြစ် ဖြောင့်မတ်၍ သန့်ရှင်းကြောင်း ကြေညာခံရပြီးဖြစ်ရာ အလွန်ထူးခြားသောနည်းဖြင့် သန့်စင်ခံထားနှင့်ပြီးဖြစ်သည်။ (ယောဟန် ၁၇:၁၇; ၁ ကောရိန္သု ၆:၁၁; ဧဖက် ၅:၂၃-၂၇) ပရောဖက်ဒံယေလက သူတို့ကို “လူသား” ယေရှုခရစ်လက်အောက် နိုင်ငံတော်ကိုခံယူကြသော “အမြင့်ဆုံးသောဘုရား[သခင်]၏သန့်ရှင်းသူတို့” ဖြစ်သည်ဟု ဖော်ပြခဲ့သည်။ (ဒံယေလ ၇:၁၃၊ ၁၄၊ ၁၈၊ ၂၇) အစောပိုင်းတွင် ဣသရေလလူမျိုးကို မောရှေနှင့်အာရုန်မှတစ်ဆင့် ယေဟောဝါဤသို့မိန့်ဆိုခဲ့သည်– “ငါသည် သင်တို့ဘုရားသခင် ထာဝရဘုရား[သခင်]ဖြစ်၏။ ငါသည် သန့်ရှင်းသောကြောင့် သင်တို့လည်း ကိုယ်ကိုကိုယ်သန့်ရှင်းစေ၍ သန့်ရှင်းခြင်းရှိရကြမည်။”—ဝတ်ပြုရာ ၁၁:၄၄။
၁၂ “သန့်ရှင်းစေခြင်း” ဟူသောစကားလုံးသည် အခြေခံအားဖြင့် “ယေဟောဝါဘုရားသခင်၏လုပ်ငန်းတော် သို့မဟုတ် ကိုယ်တော်၏အသုံးတော်ခံအဖြစ် သန့်ရှင်းစေခြင်း၊ သီးသန့် သို့မဟုတ် သီးခြားဖြစ်စေခြင်း; သန့်ရှင်း၊ မြင့်မြတ် သို့မဟုတ် သန့်စင်ထားသောအခြေအနေ” ကိုဆိုလိုသည်။ ၁၉၃၈ ခုနှစ်ကတည်းက ကင်းမျှော်စင်က ယောနဒပ် သို့မဟုတ် အခြားသိုးများသည် “အုပ်စုကြီးတွင်ပါဝင်၍ မြေကြီးပေါ်အသက်ရှင်မည့်သူတိုင်းသည် အပ်နှံခြင်း ဆက်ကပ်အပ်နှံခြင်း နှင့် သန့်စင်ခြင်းခံဖို့လိုကြောင်း သင်ယူရကြမည်” ဟုဖော်ပြခဲ့သည်။ ဗျာဒိတ်ကျမ်း၏ လူအုပ်ကြီးအဆင်းအာရုံတွင် သူတို့သည် “မိမိတို့ဝတ်လုံကို သိုးသငယ်၏အသွေး၌လျှော်၍ဖြူစေ” ကြသူများ၊ ယေဟောဝါ၏ ‘ဝတ်ပြုရာအိမ်တော်၌ မြင့်မြတ်သောလုပ်ငန်းတော်ကို နေ့ညမပြတ်’ ထမ်းဆောင်နေကြသူများဖြစ်သည်ဟု ဖော်ပြထားသည်။ (ဗျာဒိတ် ၇:၉၊ ၁၄၊ ၁၅) အခြားသိုးများသည် သန့်ရှင်းသောဝိညာဉ်တော်၏အကူအညီဖြင့် ယေဟောဝါ၏ သန့်ရှင်းသောတောင်းဆိုချက်များနှင့်အညီဖြစ်ဖို့ အတတ်နိုင်ဆုံးလုပ်ဆောင်ကြသည်။—၂ ကောရိန္သု ၇:၁။
ခရစ်တော်၏ညီတော်များအား ကောင်းမှုပြုခြင်း
၁၃၊ ၁၄။ (က) ယေရှု၏သိုးနှင့်ဆိတ်ပုံဥပမာအရ သိုးများကယ်တင်ခံရခြင်းသည် အဘယ်အရာပေါ်မူတည်သနည်း။ (ခ) ဤဆုံးခန်းချိန်တွင် အခြားသိုးများသည် ခရစ်တော်၏ညီတော်များကို မည်သို့ကောင်းမှုပြုကြသနည်း။
၁၃ ယေရှုသည် ‘ဤစနစ်ဆုံးခန်း၏’ ပရောဖက်ပြုချက်တွင်ပါဝင်မဿဲ ၂၄:၃; ၂၅:၃၁-၃၄၊ ၄၀။
သော သိုးနှင့်ဆိတ်ပုံဥပမာတွင် အခြားသိုးနှင့် သိုးစုငယ်တို့၏ ရင်းနှီးသောနှောင်ကြိုးကို ပေါ်လွင်စေခဲ့သည်။ ထိုပုံဥပမာတွင် ခရစ်တော်က “ငါ့ညီတို့” ဟုကိုယ်တော်ခေါ်ဆိုခဲ့သော ဝိညာဉ်တော်ဖွားများအား အခြားသိုးပြုမူဆက်ဆံပုံအပေါ်မူတည်ပြီး သူတို့ကယ်တင်ခံရစရာအကြောင်းရှိသည်ဟု အတိအလင်းဖော်ပြခဲ့သည်။ ကိုယ်တော်ဤသို့မိန့်ဆိုခဲ့သည်– “လက်ယာတော်ဘက်၌ရှိသောသူတို့အား မင်းကြီးက၊ ‘ငါ့ခမည်းတော်ထံကောင်းချီးမင်္ဂလာကိုခံသောသူတို့၊ ကမ္ဘာဦးကပင် သင်တို့အဖို့ပြင်ဆင်သောနိုင်ငံကို လာ၍အမွေခံကြလော့။ . . . ငါအမှန်ဆိုသည်ကား၊ သင်တို့သည် ဤသူတည်းဟူသောငါ့ညီတို့တွင် အငယ်ဆုံးသောသူတစ်ယောက်အား ပြုကြသမျှတို့ကို ငါ့အားပြုကြပြီ’ ဟုပြန်၍မိန့်တော်မူလတ္တံ့။”—၁၄ “ပြုကြသမျှ” ဟူသောအသုံးအနှုန်းက ခရစ်တော်၏ဝိညာဉ်တော်ဖွားညီများအား မေတ္တာရှိစွာထောက်ပံ့ကူညီပေးခဲ့သောလုပ်ရပ်များကို ရည်ညွှန်းသည်၊ စာတန့်လောကမူကား ထိုညီတော်များကို သူစိမ်းများကဲ့သို့ ဆက်ဆံပြီး အချို့တို့ကို ထောင်ချသည့်အထိပင် ပြုခဲ့ကြသည်။ သူတို့သည် အစားအစာ၊ အဝတ်အစားနှင့် ကျန်းမာရေးဂရုစိုက်မှု အလုံအလောက်မရရှိခဲ့ကြချေ။ (မဿဲ ၂၅:၃၅၊ ၃၆၊ ကဘ၊ အောက်ခြေမှတ်ချက်) ၁၉၁၄ ခုနှစ်မှစ၍၊ ဤဆုံးခန်းကာလတွင် ဝိညာဉ်တော်ဖွားအများစုသည် ထိုသို့သောအခြေအနေမျိုးတွင် ရောက်ရှိခဲ့ကြသည်။ သူတို့သည် ဝိညာဉ်တော်တိုက်တွန်းမှုခံရသည့် အခြားသိုးများဖြစ်သူ သူတို့၏တည်ကြည်သောအပေါင်းပါများ၏ ထောက်မကူညီမှုရရှိခဲ့ကြကြောင်း ယေဟောဝါသက်သေများ၏ မျက်မှောက်ခေတ်သမိုင်းက သက်သေထူသည်။
၁၅၊ ၁၆။ (က) အခြားသိုးများသည် ခရစ်တော်၏မြေကြီးပေါ်ရှိ ဝိညာဉ်တော်ဖွားညီတော်များကို အဘယ်လုပ်ငန်း၌ အထူးကူညီခဲ့ကြပြီနည်း။ (ခ) ဝိညာဉ်တော်ဖွားများသည် အခြားသိုးများကိုကျေးဇူးတင်ကြောင်း မည်သို့ဖော်ပြခဲ့ကြပြီနည်း။
၁၅ ဤဆုံးခန်းချိန်တွင် ခရစ်တော်၏ မြေကြီးပေါ်ရှိဝိညာဉ်တော်ဖွားညီတော်များသည် ‘လူမျိုးအပေါင်းတို့အား သက်သေဖြစ်မည်အကြောင်း [ဘုရားသခင့်]နိုင်ငံတော်နှင့်ယှဉ်သောသတင်းကောင်းကို လောကနိုင်ငံအရပ်ရပ်ရှိသမျှတို့၌ဟော’ ပါဟူသော ဘုရားသခင်ပေးသည့်တာဝန်ကို ကျေပွန်စေရာ၌ အခြားသိုး၏ အားတက်သရောပူးပေါင်းဆောင်ရွက်မှုကို အထူးသဖြင့်ရရှိထားကြသည်။ (မဿဲ ၂၄:၁၄; ယောဟန် ၁၄:၁၂) နှစ်များတစ်လျှောက် ဝိညာဉ်တော်ဖွားအရေအတွက်သည် လျော့နည်းလာသော်လည်း အခြားသိုးအရေအတွက်မှာမူ စာသားအတိုင်း သန်းပေါင်းများစွာဖြစ်ဖို့ တိုးများလာခဲ့ချေပြီ။ ဤသူထောင်ပေါင်းများစွာမှာ အချိန်ပြည့်ဧဝံဂေလိတရားဟောပြောသူများ—ရှေ့ဆောင်များနှင့် ခရစ်ယာန်သာသနာပြုများ—အဖြစ်အမှုထမ်းခဲ့ကြကာ ဘုရားသခင့်နိုင်ငံတော်သတင်းကောင်းကို “မြေကြီးစွန်းတိုင်အောင်” ပျံ့နှံ့စေလျက်ရှိသည်။ (တမန်တော် ၁:၈) အခြားသူများလည်း သက်သေခံခြင်းလုပ်ငန်း၌ တတ်အားသရွေ့ပါဝင်ကြပြီး ဤအရေးကြီးလုပ်ငန်းကို ငွေကြေးဖြင့် ပျော်ရွှင်စွာထောက်ပံ့ကြသည်။
၁၆ ခရစ်တော်၏ဝိညာဉ်တော်ဖွားညီတော်များသည် မိမိတို့၏အပေါင်းပါအခြားသိုးများ၏ ဤတည်ကြည်သောထောက်မမှုကို ကျေးဇူးတင်လိုက်လေခြင်း! သူတို့၏ခံစားချက်များကို ၁၉၈၆ ခုနှစ်တွင် ကျေးကျွန်အတန်းအစားထုတ်ဝေသော “ငြိမ်းချမ်းရေးမင်းသား” လက်အောက် ကမ္ဘာချီလုံခြုံမှု စာအုပ်ကဖော်ပြခဲ့သည်။ ယင်းကဤသို့ဆို၏– “‘ဤစနစ်ဆုံးခန်း’ ဆိုင်ရာ ယေရှု၏ပရောဖက်ပြုချက်ပြည့်စုံခြင်းသည် ဒုတိယကမ္ဘာစစ်မှစ၍ အများအားဖြင့် ‘အခြားသိုး’ တွင်ပါဝင်သည့် ‘လူအုပ်ကြီး’ ၏အခန်းကဏ္ဍကြောင့်ဖြစ်သည်။ . . . ထို့ကြောင့် မဿဲ ၂၄:၁၄ မှ[ယေရှု၏]ပရောဖက်ပြုချက်ပြည့်စုံရေးအတွက် နိုင်ငံပေါင်းစုံ၊ ဘာသာစကားအမျိုးမျိုးမှ ‘လူအုပ်ကြီး’ ထမ်းဆောင်သောအပိုင်းကဏ္ဍကို ကျေးဇူးတင်မဆုံးပါလေ!”
‘ငါတို့မပါဘဲ စုံလင်ခြင်းသို့မရောက်’
၁၇။ မြေကြီးပေါ်ရှင်ပြန်ထမြောက်လာကြမည့် ရှေးခေတ်တည်ကြည်သူများသည် အဘယ်နည်းဖြင့် ဝိညာဉ်တော်ဖွားများ “မပါဘဲ စုံလင်ခြင်းသို့မရောက်” သနည်း။
၁၇ ခရစ်တော်မတိုင်မီ အသက်ရှင်ခဲ့ကြသော တည်ကြည်သည့်အမျိုးသား၊ အမျိုးသမီးများကိုရည်ညွှန်းလျက် တမန်တော်ပေါလုသည် ဝိညာဉ်တော်ဖွားတစ်ဦးအနေနှင့် ဤသို့ရေးသားခဲ့သည်– “ထိုသူအပေါင်းတို့သည် ယုံကြည်ခြင်းအားဖြင့် ချီးမွမ်းခြင်းသို့ရောက်သော်လည်း၊ ကတိတော်အတိုင်း အကျိုးကျေးဇူးကိုမခံရကြ။ အဘယ်ကြောင့်နည်းဟူမူကား၊ ထိုသူတို့သည် ငါတို့မပါဘဲ စုံလင်ခြင်းသို့မရောက်ရမည်အကြောင်း၊ ဘုရားသခင်သည် ငါတို့ [ဝိညာဉ်တော်ဖွားများ] အဖို့အလို့ငှာ သာ၍မြတ်သောကျေးဇူးကိုကြံစည်တော်မူ၏။” (ဟေဗြဲ ၁၁:၃၅၊ ၃၉၊ ၄၀) ခရစ်တော်နှင့် ကိုယ်တော်၏ဝိညာဉ်တော်ဖွားညီတော် ၁၄၄,၀၀၀ တို့သည် အနှစ်တစ်ထောင်ကာလအတွင်း ဘုရင်များနှင့် ယဇ်ပုရောဟိတ်များအဖြစ် အမှုထမ်းဆောင်ကြပြီး ခရစ်တော်၏ရွေးဖိုးပူဇော်သကာအကျိုးကျေးဇူးများကို မြေကြီးပေါ်သို့ ဆောင်ကြဉ်းပေးကြပါလိမ့်မည်။ သို့ဖြင့် အခြားသိုးများသည် ကိုယ်စိတ်နှစ်ဖြာ “စုံလင်” ကြပါလိမ့်မည်။—ဗျာဒိတ် ၂၂:၁၊ ၂။
၁၈။ (က) အခြားသိုးများသဘောပေါက်နားလည်စေဖို့ အဘယ်ကျမ်းဆိုင်ရာဖြစ်ရပ်များက ထောက်ကူပေးသင့်သနည်း။ (ခ) အခြားသိုးများသည် အဘယ်မျှော်လင့်ချက်ဖြင့် “ဘုရားသခင့်သားတို့၏ပေါ်ထွန်းခြင်း” ကိုစောင့်မျှော်ကြသနည်း။
၁၈ ဤအကြောင်းအရာအားလုံးတို့သည် ခရစ်ယာန်ဂရိကျမ်းစာစောင်များက ခရစ်တော်နှင့် ကိုယ်တော်၏ဝိညာဉ်တော်ဖွားညီတော်များကိုမက ယေဟောဝါ၏ရည်ရွယ်ချက် အကောင်အထည်ပေါ်ရေးနှင့်ပတ်သက်၍ သူတို့၏ အဓိကအခန်းကဏ္ဍကို အဘယ်ကြောင့်အထူးအလေးပေးဖော်ပြကြောင်း အခြားသိုးများအား စိတ်စွဲမှတ်စေသင့်သည်။ ထို့ကြောင့် အခြားသိုးများသည် အာမဂေဒုန်နှင့် အနှစ်တစ်ထောင်ကာလအတွင်း “ဘုရားသခင့်သားတို့၏ပေါ်ထွန်းခြင်း” ကိုစောင့်ဆိုင်းနေကြစဉ် ဝိညာဉ်တော်ဖွားကျေးကျွန်များအား တတ်နိုင်သ၍ ထောက်ကူပေးရခြင်းကို အခွင့်ထူးတစ်ခုအဖြစ်ယူမှတ်ကြသည်။ သူတို့သည် “ဘုရားသခင့်သားတို့၏ ထူးမြတ်သောလွတ်ခြင်းချမ်းသာတည်းဟူသော ဖောက်ပြန်ပျက်စီးခြင်းအနှောင်အဖွဲ့မှ ကယ်လွတ်ခြင်းချမ်းသာကိုဝင်စား” ရန် စောင့်မျှော်နိုင်ကြသည်။—ရောမ ၈:၁၉-၂၁။
သတိရအောက်မေ့ပွဲတွင် ဝိညာဉ်တော်၌ တစည်းတလုံးဖြစ်ခြင်း
၁၉။ ‘အမှန်တရား၏ဝိညာဉ်’ သည် ဝိညာဉ်တော်ဖွားနှင့် သူတို့၏အပေါင်းပါများအတွက် အဘယ်အရာပြုခဲ့ပြီနည်း၊ သူတို့သည် မတ်လ ၂၈ ရက်ညနေခင်းတွင် မည်သို့အထူးသဖြင့်တစည်းတလုံးဖြစ်ကြမည်နည်း။
၁၉ စီ.အီး. ၃၃၊ နိသန်လ ၁၄ ရက်ည နိဂုံးချုပ်ဆုတောင်းချက်တွင် ယေရှုသည် ဤသို့မိန့်မြွက်ခဲ့သည်– “ကိုယ်တော်သည် အကျွန်ုပ်ကိုစေလွှတ်တော်မူသည်ကို လော[က]သားတို့သည်ယုံကြမည်အကြောင်း၊ ထိုသူအပေါင်းတို့သည် တစ်လုံးတစ်ဝတည်းဖြစ်လျက်၊ အဘ၊ ကိုယ်တော်သည် အကျွန်ုပ်၌ရှိတော်မူ၍ အကျွန်ုပ်သည်လည်း ကိုယ်တော်၌ရှိသကဲ့သို့၊ ထိုသူအပေါင်းတို့သည် ငါတို့၌ တစ်လုံးတစ်ဝတည်းဖြစ်စေခြင်းငှာ [အကျွန်ုပ်] ဆုတောင်းပါ၏။” (ယောဟန် ၁၇:၂၀၊ ၂၁) ဘုရားသခင်သည် မေတ္တာတော်ကြောင့် ဝိညာဉ်တော်ဖွားများနှင့် နာခံမှုရှိသောလောကသားများ ကယ်တင်ခြင်းရဖို့ သားတော်အားစေလွှတ်၍ အသက်ကိုစွန့်တော်မူစေခဲ့သည်။ (၁ ယောဟန် ၂:၂) ‘အမှန်တရား၏ဝိညာဉ်’ က ခရစ်တော်၏ညီတော်များနှင့် သူတို့၏အပေါင်းပါများကို တစည်းတလုံးတည်းဖြစ်စေခဲ့ပြီ။ ဤအတန်းအစားနှစ်ခုစလုံးသည် မတ်လ ၂၈ ရက်ညနေခင်း နေဝင်ပြီးအချိန်တွင် ခရစ်တော်၏သေခြင်းကိုအောက်မေ့ပွဲကျင်းပရန်နှင့် ယေဟောဝါချစ်မြတ်နိုးတော်မူသောသားတော်၊ ယေရှုခရစ်၏ပူဇော်သကာအားဖြင့် မိမိတို့အတွက် ကိုယ်တော်ပြုလုပ်ပေးခဲ့သမျှကို ပြန်လည်သတိရဖို့ အတူတကွစုရုံးကြပါလိမ့်မည်။ ထိုအရေးပါသောအခါသမယကိုတက်ရောက်ခြင်းက သူတို့၏စည်းလုံးမှုကို ခိုင်ခံ့စေ၍ ဘုရားသခင့်အလိုတော်ကိုဆက်လက်ထမ်းဆောင်ရန် သူတို့၏စိတ်ပိုင်းဖြတ်ချက်ကို အားသစ်လောင်းပေးပါလေစေ၊ သို့ဖြင့် ယေဟောဝါချစ်မြတ်နိုးသူများအဝင်ဖြစ်ရခြင်းကို မိမိတို့ဝမ်းမြောက်ကြောင်း သက်သေထူကြပါလေစေ။
ပြန်လည်သုံးသပ်ခြင်းဖြင့်
• ကနဦးခရစ်ယာန်များထံ ‘အမှန်တရား၏ဝိညာဉ်’ ကိုအဘယ်အချိန်၌စေလွှတ်ခဲ့သနည်း၊ ယင်းသည် “ထောက်မသူ” ဖြစ်ကြောင်း မည်သို့ပြခဲ့သနည်း။
• ဝိညာဉ်တော်ဖွားများသည် ကောင်းကင်ခေါ်တော်မူခြင်းခံရကြောင်း မည်သို့သိရှိကြသနည်း။
• ဘုရားသခင့်ဝိညာဉ်တော်သည် အခြားသိုးများအပေါ် အဘယ်နည်းများဖြင့် အကျိုးသက်ရောက်သနည်း။
• အခြားသိုးများသည် ခရစ်တော်၏ညီတော်များကို မည်သို့ကောင်းမှုပြုခဲ့ကြသနည်း၊ အဘယ်ကြောင့် သူတို့သည် ဝိညာဉ်တော်ဖွားများ “မပါဘဲ စုံလင်ခြင်းသို့ . . . ရောက်” မည်မဟုတ်သနည်း။
[လေ့လာရန်မေးခွန်းများ]
[စာမျက်နှာ ၂၁ ပါ ရုပ်ပုံ]
စီ.အီး. ၃၃၊ ပင်တေကုတ္တေပွဲနေ့တွင် ‘အမှန်တရား၏ဝိညာဉ်’ ကို တပည့်တော်နောက်တော်လိုက်များအပေါ်သွန်းလောင်းခဲ့
[စာမျက်နှာ ၂၃ ပါ ရုပ်ပုံ]
အခြားသိုးများသည် ဘုရားသခင်ပေးသည့် ဟောပြောခြင်းတာဝန်ကိုကျေပွန်ရန် ထောက်မကူညီပေးခြင်းဖြင့် ခရစ်တော်၏ညီတော်များအား ကောင်းမှုပြုကြ