“ကိုယ်၌စူးသောဆူး” ကို ကိုင်တွယ်ဖြေရှင်းခြင်း
“ကိုယ်၌စူးသောဆူး” ကို ကိုင်တွယ်ဖြေရှင်းခြင်း
“ငါ့ကျေးဇူး [“မခံစားထိုက်သောကရုဏာ၊” ကဘ] သည် သင့်အဖို့လောက်ပေ၏။”—၂ ကောရိန္သု ၁၂:၉။
၁၊ ၂။ (က) ကျွန်ုပ်တို့သည် စမ်းသပ်မှုများနှင့် ပြဿနာများရင်ဆိုင်ရခြင်းကြောင့် အဘယ်ကြောင့်ကြံရာမရမဖြစ်သင့်သနည်း။ (ခ) စုံစမ်းနှောင့်ယှက်မှုများခံရသည့်ကြား အဘယ်ကြောင့်ယုံကြည်စိတ်ချနိုင်သနည်း။
“ယေရှုခရစ်၏တရားတော်နှင့်အညီ၊ ဘုရား[သခင်]ဝတ်၌မွေ့လျော်၍ နေခြင်းငှာ အလိုရှိသောသူအပေါင်းတို့သည် ညှဉ်းဆဲခြင်းကိုခံရကြလိမ့်မည်။” (၂ တိမောသေ ၃:၁၂) အဘယ်ကြောင့်ထိုသို့ဖြစ်ရသနည်း။ အကြောင်းမှာ စာတန်က လူသည် ကိုယ်ကျိုးအတွက်သာ ဘုရားသခင်ကိုဝတ်ပြုသည်ဟုအခိုင်အမာဆိုပြီး သူ၏အဆိုမှန်ကြောင်း သက်သေထူလိုစိတ် အားကြီးသောကြောင့်ဖြစ်သည်။ မိမိ၏တည်ကြည်သောတမန်တော်များကို ယေရှုတစ်ကြိမ်ကဤသို့သတိပေးခဲ့သည်– “ဂျုံဆန်ကိုဆန်ခါနှင့်ချသကဲ့သို့ စာတန်သည် သင်တို့ကိုချရမည်အကြောင်း အခွင့်တောင်းသည်။” (လုကာ ၂၂:၃၁) ဘုရားသခင်သည် အမှန်တကယ်ခက်ခဲသောပြဿနာများဖြင့် ကျွန်ုပ်တို့ကို စာတန်အားစမ်းသပ်စေလိမ့်မည်အကြောင်း ယေရှုကောင်းစွာသိတော်မူ၏။ သို့သော် ဘဝတွင်တွေ့ကြုံရသမျှအခက်အခဲသည် စာတန်နှင့် သူ၏နတ်ဆိုးများကြောင့် ဖြစ်သည်ဟုမဆိုလိုပေ။ (ဒေ. ၉:၁၁) သို့ရာတွင် ကျွန်ုပ်တို့၏တည်ကြည်မှုကိုချိုးဖျက်ဖို့ စာတန်သည် အစွမ်းကုန် ကြိုးစားလိုပေသည်။
၂ ကျွန်ုပ်တို့စုံစမ်းနှောင့်ယှက်ခံရကြသည့်အတွက် ကြံရာမရ မဖြစ်သင့်ဟု သမ္မာကျမ်းစာကဆို၏။ မည်သည့်အခက်အခဲကိုမဆို ခံရပါလေစေ ဖြစ်ရိုးဖြစ်စဉ်မဟုတ်သောအရာ၊ မမျှော်လင့်ထားသောအရာမဟုတ်ပေ။ (၁ ပေတရု ၄:၁၂) အမှန်မှာ “လူပြည်အရပ်ရပ်တို့၌ရှိသော [ကျွန်ုပ်]တို့ညီအစ်ကိုများတို့သည် ထိုသို့သောဆင်းရဲကိုခံရကြသည်။” (၁ ပေတရု ၅:၉) ယနေ့ စာတန်သည် ဘုရားသခင့်ကျေးကျွန်အားလုံးအပေါ် အလွန့်အလွန်ဖိအားပေးလျက်ရှိသည်။ ကျွန်ုပ်တို့အား ဆူးကဲ့သို့သောပြဿနာ များနိုင်သမျှများများ အနှောင့်အယှက်ပေးသည်ကို သူမြင်တွေ့လိုစိတ်ရှိသည်။ ထိုသို့ဖြစ်စေရန် ကျွန်ုပ်တို့ ‘ကိုယ်၌စူးသော’ အဘယ် ‘ဆူး’ ကိုမဆို ပိုတိုးများလာစေဖို့၊ သို့မဟုတ် ပို၍စူးစေဖို့ သူ၏အစီအစဉ်စနစ်ကို အသုံးပြုသည်။ (၂ ကောရိန္သု ၁၂:၇) သို့သော်လည်း စာတန့်တိုက်ခိုက်မှုများသည် ကျွန်ုပ်တို့၏တည်ကြည်မှုကို ချိုးဖျက်စေရာမဖြစ်သင့်ပါ။ ယေဟောဝါသည် အပြစ်သွေးဆောင်ရာကိုခံရပ်နိုင်ဖို့ “ထွက်မြောက်သောလမ်းကို . . . စီရင်ပြုပြင်” တော်မူမည်ဖြစ်သကဲ့သို့ ကျွန်ုပ်တို့ကိုယ်၌စူးသော ဆူးများနှင့်တူသည့် ပြဿနာများကိုရင်ဆိုင်ရသောအခါ၌လည်း ထပ်တူပြုတော်မူပါလိမ့်မည်။—၁ ကောရိန္သု ၁၀:၁၃။
ဆူးကိုကိုင်တွယ်ဖြေရှင်းနိုင်ပုံ
၃။ မိမိကိုယ်၌စူးသောဆူးကို ဖယ်ရှားပေးဖို့ ပေါလုတောင်းဆိုသောအခါ ယေဟောဝါမည်သို့ဖြေကြားခဲ့သနည်း။
၃ တမန်တော်ပေါလုသည် သူ၏ကိုယ်မှဆူး ကိုဖယ်ရှားပေးဖို့ ဘုရားသခင်အား အသနားခံခဲ့သည်။ “ထိုဆင်းရဲခြင်းနှင့်ကင်းလွတ်မည်အကြောင်း သုံးကြိမ်မြောက်အောင် သခင်ဘုရားကိုငါဆုတောင်း၍ အသနားတော်ခံ” ပြီ။ ပေါလု၏စိတ်အားထက်သန်သောတောင်းဆိုမှုကို ယေဟောဝါမည်သို့ဖြေကြားခဲ့သနည်း။ “ငါ့ကျေးဇူး [“မခံစားထိုက်သောကရုဏာ၊” ကဘ] သည် သင့်အဖို့လောက်ပေ၏။ ငါ့တန်ခိုးသည် အားနည်းခြင်းအဖြစ်၌ စုံလင်တတ်သည်။” (၂ ကောရိန္သု ၁၂:၈၊ ၉) ဤအဖြေကို ဆန်းစစ်လေ့လာပြီး ယင်းက ကျွန်ုပ်တို့အား နာကျင်စေသည့် ဆူးကဲ့သို့သောပြဿနာများကို ကိုင်တွယ်ဖြေရှင်းရန် မည်သို့ထောက်ကူပေးနိုင်ကြောင်း ကြည့်ကြပါစို့။
၄။ ယေဟောဝါ၏မခံစားထိုက်သော ကရုဏာတော်ကို အဘယ်နည်းများဖြင့် ပေါလုခံစားခဲ့သနည်း။
၄ ခရစ်တော်မှတစ်ဆင့်ပေးထားပြီးဖြစ်သော မခံစားထိုက်သောကရုဏာတော်ကို တန်ဖိုးထားရန် ပေါလုအားယေဟောဝါတိုက်တွန်းခဲ့ကြောင်း သတိပြုပါ။ ပေါလုသည် နည်းမျိုးစုံဖြင့် ကောင်းချီးများစွာ အမှန်ခံစားခဲ့ရပြီဖြစ်သည်။ ယေရှု၏နောက်တော်လိုက်များကို တစ်ယူသန်ဆန်ဆန် ဆန့်ကျင်ခဲ့ဖူးသော်လည်း ယေဟောဝါသည် မေတ္တာရှိစွာဖြင့် သူ့ကို တပည့်ဖြစ်ခွင့်ပေးခဲ့သည်။ (တမန်တော် ၇:၅၈; ၈:၃; ၉:၁-၄) ထို့နောက် ယေဟောဝါသည် စိတ်လှုပ်ရှားဖွယ်တာဝန်များနှင့် အခွင့်ထူးများစွာတို့ကို ပေါလုအား ကြင်နာစွာပေးသနားခဲ့သည်။ ကျွန်ုပ်တို့ရရှိသောသင်ခန်းစာကား ရှင်းလင်းပြတ်သားပေသည်။ အဆိုးဆုံးအချိန်အခါများ၌ပင် ကျေးဇူးတင်စရာကောင်းချီးများစွာကို ကျွန်ုပ်တို့ခံစားရကြသည်။ ကျွန်ုပ်တို့ခံစားရသော စုံစမ်းနှောင့်ယှက်မှုများကြောင့် ယေဟောဝါ၏ကြွယ်ဝသောကောင်းမြတ်ခြင်းကို ဘယ်သောအခါမျှမမေ့လျော့သင့်ပါ။—ဆာလံ ၃၁:၁၉။
၅၊ ၆။ (က) ဘုရားသခင့်တန်ခိုးတော်သည် “အားနည်းခြင်းအဖြစ်၌ စုံလင်တတ်” ကြောင်း ပေါလုကို ယေဟောဝါမည်သို့သွန်သင်ပေးသနည်း။ (ခ) စာတန်သည် မုသာကောင်ဖြစ်ကြောင်း ပေါလု၏ပုံသက်သေက မည်သို့သက်သေထူခဲ့သနည်း။
၅ ယေဟောဝါ၏မခံစားထိုက်သော ကရုဏာတော်သည် အခြားနည်းတစ်နည်းဖြင့် လုံလောက်ပေ၏။ စုံစမ်းနှောင့်ယှက်မှုများကို ခံရပ်နိုင်ရန် ဘုရားသခင်၏တန်ခိုးတော် အလုံအလောက်ရထားပေပြီ။ (ဧဖက် ၃:၂၀) ဘုရားသခင့်တန်ခိုးတော်သည် “အားနည်းခြင်းအဖြစ်၌ စုံလင်တတ်” ကြောင်း ပေါလုကို ယေဟောဝါသွန်သင်ပေးခဲ့သည်။ မည်သို့အားဖြင့်နည်း။ စုံစမ်းနှောင့်ယှက်ခြင်းကို ပေါလုကိုင်တွယ်ဖြေရှင်းနိုင်ဖို့ လိုအပ်သမျှခွန်အားကို မေတ္တာတော်ဖြင့် ထောက်ပံ့ပေးခဲ့သည်။ တစ်ဖန် ပေါလု၏ခံနိုင်ရည်နှင့် အကြွင်းမဲ့ယုံကြည်စိတ်ချမှုက ဘုရားသခင့်တန်ခိုးတော်သည် ဤအားနည်းသောအပြစ်သား၌ အောင်ပွဲခံနေကြောင်း လူအပေါင်းကို ယေဟောဝါတွေ့မြင်စေ၏။ လူတို့သည် သက်သောင့်သက်သာရှိ၍ ပြဿနာကင်းမဲ့မှသာ ဘုရားသခင်အား ဝတ်ပြုကြသည်ဟုဆိုသော စာတန်အပေါ် အဘယ်အကျိုးသက်ရောက်သည်ကို ယခုသုံးသပ်ကြည့်ပါ။ ပေါလု၏တည်ကြည်မှုက ထိုသားပုပ်လေလွင့်ပြောဆိုသူကို ပါးရိုက်လိုက်သည့်ပမာပင်!
၆ အခွင့်သာသူလူတန်းစား၌ မွေးဖွားလာသောကြောင့် တစ်ချိန်က ဘဝစည်းစိမ်များစွာကိုခံစားခဲ့သူ ပေါလုသည် စာတန်နှင့်အတူ ဘုရားသခင်ကို တိုက်ခိုက်ခဲ့၍ ခရစ်ယာန်များကို ရက်စက်ကြမ်းကြုတ်စွာ ညှဉ်းဆဲခဲ့သော ဇွဲလုံ့လရှိ ဖာရိရှဲတစ်ဦးဖြစ်ခဲ့သည်။ ယခုမူကား ပေါလုသည် “တမန်တော်တို့တွင် အသိမ်အငယ်” အဖြစ် ယေဟောဝါနှင့်ခရစ်တော်၏အမှုတော်ကို ထမ်းလျက်ရှိသည်။ (၁ ကောရိန္သု ၁၅:၉၊ သမ) အမှုတော်ထမ်းသူတစ်ဦးအဖြစ် သူသည် ပထမရာစု ခရစ်ယာန်အုပ်ချုပ်ရေးအဖွဲ့၏ အခွင့်အာဏာကို နှိမ့်ချစွာလက်အောက်ခံ၏။ သူ၏ကိုယ်၌ ဆူးစူးနေသည့်ကြားမှပင် သူသည် တည်ကြည်မှုရှိ၏။ ပေါလုခံရသော စုံစမ်းနှောင့်ယှက်မှုများက သူ၏ဇွဲကိုမလျော့နည်းစေခဲ့သောကြောင့် စာတန်သည် အလွန်ဒေါသထွက်ခဲ့သည်။ ပေါလုမူကား ခရစ်တော်၏ကောင်းကင်နိုင်ငံတော်၌ အမွေခံတစ်ဦးဖြစ်ရမည့်မျှော်လင့်ချက်ကို တစ်ခါမျှ မျက်ခြည်မပြတ်ခဲ့ချေ။ (၂ တိမောသေ ၂:၁၂; ၄:၁၈) မည်မျှပင်နာကျင်ပါစေ အဘယ်ဆူးမျှ သူ၏ဇွဲကိုမလျော့နည်းစေနိုင်ခဲ့ချေ။ ကျွန်ုပ်တို့၏ဇွဲလည်း ထပ်တူပင် ဆက်၍ကြံ့ခိုင်နိုင်ပါစေ! ကျွန်ုပ်တို့စုံစမ်းနှောင့်ယှက်မှုများခံရစဉ် ခွန်အားရှိစေခြင်းအားဖြင့် စာတန်သည် မုသာကောင်ဖြစ်ကြောင်း သက်သေထူရသည့်အခွင့်ထူးကို ကျွန်ုပ်တို့အား ယေဟောဝါချီးမြှင့်တော်မူသည်။—သု. ၂၇:၁၁။
ယေဟောဝါ၏ပြင်ဆင်ပေးချက်များ မရှိလျှင်မဖြစ်
၇၊ ၈။ (က) ယေဟောဝါသည် မျက်မှောက်ခေတ်ကျေးကျွန်များကို အဘယ်နည်းများဖြင့် ခွန်အားပေးတော်မူသနည်း။ (ခ) ကျွန်ုပ်တို့ကိုယ်၌စူးသောဆူးကို ကိုင်တွယ်ဖြေရှင်းနိုင်ရန် နေ့စဉ်ကျမ်းစာဖတ်ရှုခြင်းနှင့် လေ့လာခြင်းသည် အဘယ်ကြောင့်အလွန်အရေးပါသနည်း။
၇ ယေဟောဝါသည် ယနေ့ တည်ကြည်သောခရစ်ယာန်များကို သန့်ရှင်းသောဝိညာဉ်တော်၊ မိမိ၏နှုတ်မြွက်စကားတော်နှင့် ခရစ်ယာန်ညီအစ်ကိုအသင်းအပင်းအားဖြင့် ခွန်အားပေးတော်မူသည်။ တမန်တော်ပေါလုနည်းတူ ကျွန်ုပ်တို့သည် ဆုတောင်းခြင်းအားဖြင့် မိမိတို့ဝန်များကို ယေဟောဝါ၌ချထားနိုင်ကြသည်။ (ဆာလံ ၅၅:၂၂) ကျွန်ုပ်တို့၏စုံစမ်းနှောင့်ယှက်မှုများကို ဘုရားသခင်ဖယ်ရှားပေးတော်မူမည်မဟုတ်သော်လည်း အထူးခံရခက်သောစုံစမ်းနှောင့်ယှက်မှုများကိုပင် ကိုင်တွယ်ဖြေရှင်းနိုင်ဖို့ ဉာဏ်ပညာပေးသနားနိုင်ပါသည်။ ကျွန်ုပ်တို့ခံရပ်နိုင်ဖို့ “သာမန်ထက်ထူးကဲသော တန်ခိုးတော်” ခွန်အားကိုလည်း ယေဟောဝါပေးသနားနိုင်ပါသည်။—၂ ကောရိန္သု ၄:၇၊ ကဘ။
၈ ထိုသို့သောအကူအညီကို ကျွန်ုပ်တို့မည်သို့ရရှိနိုင်သနည်း။ ဘုရားသခင့်နှုတ်မြွက်စကားတော်တွင် ကိုယ်တော်၏ယုံကြည်စိတ်ချရသော နှစ်သိမ့်ပေးမှုများကိုတွေ့ရှိမည်ဖြစ်သောကြောင့် ယင်းကို အပတ်တကုတ်လေ့လာရမည်။ (ဆာလံ ၉၄:၁၉) ဘုရားသခင်၏ထောက်မကူညီမှုကို တောင်းခံခဲ့ကြသော ကိုယ်တော့်ကျေးကျွန်များ၏ နှလုံးကိုထိမိစေသောစကားများ သမ္မာကျမ်းစာတွင် ကျွန်ုပ်တို့ဖတ်ရှုကြရသည်။ အများအားဖြင့် နှစ်သိမ့်မှုစကားများပါဝင်သည့် ယေဟောဝါ၏တုံ့ပြန်မှုကို ကျွန်ုပ်တို့တွေးတောဆင်ခြင်သင့်သည်။ ‘သာမန်ထက်ထူးကဲသော တန်ခိုးတော်သည် ငါတို့နှင့်မဆိုင်၊ ဘုရားသခင်နှင့်ဆိုင်’ စေဖို့ လေ့လာမှုပြုခြင်းက ကျွန်ုပ်တို့ကိုသန်စွမ်းစေပါလိမ့်မည်။ ကြီးထွားဖွံ့ဖြိုး၍ ခွန်အားရှိရန် နေ့စဉ် အစာစားသုံးရသကဲ့သို့ ဘုရားသခင့်နှုတ်မြွက်စကားတော်ကို ကျွန်ုပ်တို့မှန်မှန်ဆည်းပူးရမည်။ ထိုသို့ပြုကြသလော။ သို့ပြုလျှင် “သာမန်ထက်ထူးကဲသောတန်ခိုးတော်” က ယခု ကျွန်ုပ်တို့ကိုနှိပ်စက်နေသည့် အဘယ်ပုံဆောင်ဆူးကိုမဆို ခံရပ်နိုင်စေပါလိမ့်မည်။
၉။ အခက်အခဲပြဿနာများရင်ဆိုင်နေရသူတို့ကို အကြီးအကဲများ မည်သို့ထောက်ကူပေးနိုင်သနည်း။
၉ စိတ်ဆင်းရဲခြင်းနှင့် ပြဿနာများရင်ဆိုင်ရသည့်အခါ ဘုရားသခင်ကိုကြောက်ရွံ့သော ခရစ်ယာန်အကြီးအကဲများသည် ‘လေကွယ်ရာ’ သို့မဟုတ် ‘မိုးသက်မုန်တိုင်းကွယ်ရာ’ အရပ်ကဲ့သို့ ဖြစ်နိုင်ပါသည်။ ထိုမှုတ်သွင်းခံဖော်ပြချက်နှင့်ကိုက်ညီလိုသော အကြီးအကဲများသည် ဆင်းရဲခံရသူတို့အား သင့်တော်သည့်စကားများဖြင့် မည်သို့ဖြေဆိုပေးရမည်ကိုသိနိုင်ဖို့ “လူတတ်၏နှုတ်သတ္တိ” ကိုပေးရန် ယေဟောဝါအား နှိမ့်ချရိုးသားစွာတောင်းလျှောက်ကြသည်။ ခက်ခဲသောအချိန်အခါများတွင် အကြီးအကဲများ၏စကားများသည် ညင်သာစွာရွာသွန်းသောမိုးရေပမာ ကျွန်ုပ်တို့၏စိတ်ကိုအေးချမ်းစေ၍ နှစ်သိမ့်မှုပေးသည်။ အကြီးအကဲများသည် “စိတ်ငယ်သောသူတို့ကို အားပေး” စကားပြောခြင်းဖြင့် ကိုယ်၌စူးသောဆူးတစ်မျိုးမျိုးကြောင့် ပင်ပန်းနွမ်းလျ သို့မဟုတ် စိတ်ဓာတ်ကျနေသော ဝိညာဉ်ရေးညီအစ်ကို၊ ညီအစ်မများကို အမှန်ပင်ထောက်ကူပေးကြသည်။—ဟေရှာယ ၃၂:၂; ၅၀:၄; ၁ သက်သာလောနိတ် ၅:၁၄။
၁၀၊ ၁၁။ ဘုရားသခင့်ကျေးကျွန်များသည် ပြင်းထန်သောစမ်းသပ်မှုများခံနေရသူတို့ကို မည်သို့အားပေးနိုင်ကြသနည်း။
၁၀ ယေဟောဝါ၏ကျေးကျွန်အားလုံးသည် ကိုယ်တော်၏စည်းလုံးသော ခရစ်ယာန်မိသားစုဝင်များဖြစ်ကြသည်။ ကျွန်ုပ်တို့သည် “အသီးအသီးအင်္ဂါချင်းဖြစ်” ၍ “အချင်းချင်းချစ်ကြဖို့ဝတ္တရားရှိ” ၏။ (ရောမ ၁၂:၅; ၁ ယောဟန် ၄:၁၁၊ ကဘ) ဤတာဝန်ကို မည်သို့ကျေပွန်နိုင်မည်နည်း။ ၁ ပေတရု ၃:၈ အရ ယုံကြည်ခြင်း၏အိမ်သူအိမ်သားတို့ကို “စိတ်ကြင်နာခြင်း၊ ညီအစ်ကိုချင်းကဲ့သို့ချစ်ခြင်း [နှင့်] သနားစုံမက်ခြင်း” တင်ပြခြင်းဖြင့်ဖြစ်သည်။ ကိုယ်၌အလွန်နာကျင်စွာစူးနေသောဆူးကို နိုင်နင်းစွာကိုင်တွယ်သူ လူကြီးလူငယ်မရွေးကို ကျွန်ုပ်တို့အားလုံး အထူးထောက်ထားစာနာကြရမည်။ မည်သို့အားဖြင့်နည်း။
၁၁ သူတို့ခံစားနေရသောဝေဒနာကို အထူးသိမြင်နားလည်ပေးသင့်သည်။ ကျွန်ုပ်တို့သည် အကြင်နာကင်းမည်၊ ဖော်ရွေမှုမရှိ သို့မဟုတ် စိတ်ဝင်စားမှုမပြပါက သူတို့၏ဝေဒနာကို မထင်မှတ်ဘဲ ပို၍တိုးစေပေမည်။ သူတို့ခံရသောစုံစမ်းနှောင့်ယှက်မှုများကို ကျွန်ုပ်တို့သိရှိထားခြင်းက ကျွန်ုပ်တို့ပြောဆိုရာ၊ ပြောဆိုပုံနှင့် လုပ်ကိုင်ပုံတို့ကို သတိပြုစေသင့်သည်။ ကျွန်ုပ်တို့သည် အပြုသဘောရှိခြင်း၊ အားပေးခြင်းဖြင့် သူတို့ကိုစူးနေသော မည်သည့်ဆူးမဆို၏စူးရှနာကျင်မှုကို အနည်းငယ်သက်သာစေနိုင်သည်။ သို့ဖြင့် ကျွန်ုပ်တို့သည် သူတို့ကိုနှစ်သိမ့်ပေးသူများဖြစ်ကြပေမည်။—ကောလောသဲ ၄:၁၁။
အချို့ အောင်မြင်စွာကိုင်တွယ်ခဲ့ကြပုံ
၁၂-၁၄။ (က) ကင်ဆာရောဂါကိုရင်ဆိုင်နိုင်ဖို့ ခရစ်ယာန်တစ်ဦး မည်သို့ပြုလုပ်ခဲ့သနည်း။ (ခ) ၎င်းအမျိုးသမီး၏ ဝိညာဉ်ရေးညီအစ်ကို၊ ညီအစ်မများသည် သူ့ကို မည်သို့ထောက်မ၊ အားပေးခဲ့ကြသနည်း။
၁၂ ဤနောက်ဆုံးကာလ၏အဆုံးနီးလာသည်နှင့် “. . . ဆင်းရဲခြင်း” နေ့စဉ်နှင့်အမျှတိုးများလာသည်။ (မဿဲ ၂၄:၈) ထို့ကြောင့်မြေကြီးပေါ်ရှိသူအားလုံး အထူးသဖြင့် ယေဟောဝါ၏အလိုတော်နှင့်တွေ့လိုသူ၊ ကိုယ်တော်၏တည်ကြည်သောကျေးကျွန်များသည် စုံစမ်းနှောင့်ယှက်မှုများ ခံရကြပေမည်။ ဥပမာ၊ အချိန်ပြည့်ဓမ္မအမှုဆောင်အဖြစ် အမှုထမ်းနေသော ခရစ်ယာန်တစ်ဦးကိုသုံးသပ်ကြည့်ပါ။ သူ့မှာ ကင်ဆာရောဂါရှိကြောင်းသိရပြီးနောက် တံတွေးဂလင်းနှင့် ပြန်ရည်ဂလင်းတို့ကို ခွဲထုတ်လိုက်ရသည်။ ဤရောဂါရှိကြောင်းကို သူတို့ဇနှီးမောင်နှံသိရှိရသောအခါ ယေဟောဝါထံ ချက်ချင်း ရှည်ရှည်လျားလျားဆုတောင်း အသနားခံခဲ့ကြသည်။ ထိုသို့ပြုပြီးနောက် မယုံနိုင်ဖွယ်ကောင်းလောက်အောင် စိတ်ငြိမ်သက်မှုရှိခဲ့သည်ဟု နောက်ပိုင်းတွင်သူပြောပြသည်။ သို့တိုင် ကောင်းတစ်ချီ ဆိုးတစ်လှည့်နှင့် အထူးသဖြင့် ဆေးကုသမှု၏ဘေးထွက်ဆိုးကျိုးများကို သူရင်ဆိုင်ခဲ့ရသည်။
၁၃ ဤညီအစ်မသည် မိမိ၏အခြေအနေကို ကိုင်တွယ်ဖြေရှင်းနိုင်ဖို့ ကင်ဆာအကြောင်း တတ်နိုင်သမျှကြိုးစားလေ့လာခဲ့သည်။ သူ၏ဆရာဝန်များနှင့် တိုင်ပင်ဆွေးနွေးသည်။ ကင်းမျှော်စင်၊ နိုးလော့! နှင့် သက်ဆိုင်ရာခရစ်ယာန်စာပေစာတမ်းများတွင် ၎င်းရောဂါနှင့်ပတ်သက်၍ စိတ်ပိုင်းဆိုင်ရာအရ သူတို့မည်သို့ရင်ဆိုင်ကိုင်တွယ်ခဲ့ကြောင်းဖော်ပြသည့် ဘဝအတ္ထုပ္ပတ္တိများကို သူတွေ့ရှိခဲ့သည်။ ထို့အပြင် ခက်ခဲကျပ်တည်းချိန်တွင် မိမိ၏လူမျိုးတော်ကို ယေဟောဝါမည်သို့ထောက်မကူညီပေးကြောင်းနှင့်ဆိုင်သည့် သက်ဆိုင်ရာကျမ်းပိုဒ်များအပြင် အခြားအထောက်အကူပြုသတင်းအချက်အလက်များကိုလည်း သူဖတ်ရှုခဲ့သည်။
၁၄ စိတ်ပျက်အားလျော့မှုကို ရင်ဆိုင်ခြင်းနှင့်ပတ်သက်သော ဆောင်းပါးတစ်ခုက ဤပညာရှိစကားများကို ကိုးကားသည်– ‘ထီးတည်းနေသူသည် ကိုယ့်အတ္တဆန္ဒကိုသာ ရှာကြံမည်။’ (သု. ၁၈:၁၊ ကဘ) ထို့ကြောင့် ၎င်းဆောင်းပါးက “တစ်ဦးတည်းမနေပါနှင့်” * ဟုအကြံပြုသည်။ ထိုညီအစ်မက ဤသို့ပြန်ပြောပြသည်– “ကျွန်မအတွက်ဆုတောင်းပေးနေကြတယ်လို့ ပြောတဲ့သူတွေ; ဖုန်းဆက်အားပေးကြတဲ့သူတွေ အတော်များပါတယ်။ ကျွန်မဘယ်လိုနေသလဲဆိုတာကိုသိဖို့ အကြီးအကဲနှစ်ယောက်က မှန်မှန်ဖုန်းဆက်တယ်။ ပန်းတွေ၊ ကတ်တွေအများကြီးပို့ပေးကြတယ်။ တချို့ဆိုရင် စားစရာတောင် ချက်ပြုတ်ပို့ပေးခဲ့ကြတယ်။ ကျွန်မ ဆေးကုသမှုခံယူဖို့ လိုက်ပို့ပေးတဲ့သူတွေလည်း မနည်းဘူး။”
၁၅-၁၇။ (က) မတော်တဆဖြစ်မှုများကြောင့် ကြုံတွေ့ရသည့်အခက်အခဲများကို ခရစ်ယာန်တစ်ဦး မည်သို့နိုင်နင်းခဲ့သနည်း။ (ခ) အသင်းတော်ရှိသူများက မည်သို့ထောက်မကူညီပေးခဲ့ကြသနည်း။
၁၅ ယူ.အက်စ်.အေ. နယူးမက္ကစီကိုမှ ယေဟောဝါ၏လုပ်သက်ရင့်ကျေးကျွန်တစ်ဦးသည် ယာဉ်တိုက်မှုနှစ်ခုကြုံခဲ့ရသည်။ သူ၏လည်တိုင်နှင့် ပခုံးများတွင် ဒဏ်ရာရရှိခဲ့ရာ ၂၅ နှစ်ကျော်ခံခဲ့ရသည့် ရိုးဆက်ရောင်ရမ်းနာကို ပိုဆိုးဝါးသွားစေခဲ့သည်။ သူကဤသို့ပြန်ပြောပြသည်– “ကျွန်မ မနည်းကြိုးစားခေါင်းထောင်ရပြီး အလေးချိန်ငါးပေါင်ကျော်ရှိတဲ့ ဘာပစ္စည်းကိုမျှမသယ်နိုင်ဘူး။ ဒါပေမဲ့ ယေဟောဝါကို စိတ်ထက်ထက်သန်သန်ဆုတောင်းခဲ့လို့ အတော်ခံသာတယ်။ ကျွန်မတို့လေ့လာခဲ့တဲ့ ကင်းမျှော်စင်ဆောင်းပါးတွေကလည်း အတော်အကူအညီဖြစ်တယ်။ ဆောင်းပါးတစ်ခုက မိက္ခာ ၆:၈ နဲ့ပတ်သက်တယ်၊ ဘုရားသခင်နှင့်အတူ ကျိုးနွံစိတ်နဲ့သွားလာတယ်ဆိုတာက ကိုယ့်ကန့်သတ်ချက်တွေကို ကိုယ်သိဖို့လိုတယ်လို့ဖော်ပြပါတယ်။ အဲဒီအကြောင်းက ကျွန်မရဲ့အခြေအနေကြောင့် ဓမ္မအမှုမှာ ကျွန်မပါဝင်ချင်သလောက် မပါဝင်နိုင်ပေမဲ့ စိတ်ဓာတ်မကျသင့်ဘူးဆိုတာကို သိနားလည်စေတယ်။ အရေးအကြီးဆုံးက မှန်ကန်တဲ့သဘောထားနဲ့ ကိုယ်တော်ရဲ့အမှုကိုထမ်းခြင်းပါပဲ။”
၁၆ သူကဤသို့လည်းပြောပြသည်– “အစည်းအဝေးတွေတက်ဖို့၊ လယ်ကွင်းဓမ္မအမှုမှာပါဝင်ဖို့ ကျွန်မကြိုးစားသမျှကို အကြီးအကဲတွေက အမြဲချီးမွမ်းကြတယ်။ လူငယ်တွေဆိုရင်လည်း ကျွန်မကိုဖက်ယမ်းနှုတ်ဆက်တတ်ကြတယ်။ ခရစ်ယာန်ဓမ္မအမှုဆောင်ရှေ့ဆောင်တွေလည်း ကျွန်မအပေါ်တကယ်စိတ်ရှည်ကြတာ၊ ကျွန်မနေမကောင်းတဲ့နေ့တွေမှာ သူတို့ရဲ့အစီအစဉ်တွေကို ပြုပြင်ပြောင်းလဲပေးတတ်ကြတယ်။ ရာသီဥတုမကောင်းတဲ့အခါ ထောက်ထားညှာတာတဲ့အနေနဲ့ ကျွန်မကိုပြန်လည်ပတ်မှုတွေခေါ်သွား၊ ဒါမှမဟုတ် သူတို့ရဲ့ကျမ်းစာသင်အံမှုတွေကိုခေါ်သွားကြတယ်။ ဟောပြောခြင်းလုပ်ငန်းမှာ ကျွန်မပါဝင်တဲ့အခါ စာအုပ်ထည့်တဲ့အိတ်ကို မလွယ်နိုင်တဲ့အတွက် တခြားကြေညာသူတွေက ကျွန်မရဲ့စာပေတွေကို သူတို့အိတ်ထဲထည့်သယ်ပေးကြတယ်။”
၁၇ အထက်ပါညီအစ်မနှစ်ဦး၏ ဆူးနှင့်တူသောမကျန်းမာမှုများကို ရင်ဆိုင်ဖြေရှင်းနိုင်ဖို့ အသင်းတော်အကြီးအကဲများနှင့် ယုံကြည်သူချင်းများက မည်သို့ကူညီပေးခဲ့ကြောင်း သတိပြုပါ။ ဝိညာဉ်ရေး၊ ကာယရေးနှင့် စိတ်ပိုင်းဆိုင်ရာလိုအပ်ချက်များကို ဖြည့်ဆည်းပေးဖို့ လက်တွေ့ကျကျ ကြင်နာမှုရှိရှိ သူတို့ကူညီပေးခဲ့ကြသည်။ ပြဿနာများကြုံတွေ့နေရသော အခြားညီအစ်ကို၊ ညီအစ်မများကိုကူညီပေးဖို့ ယင်းက သင့်ကိုအားပေးလှုံ့ဆော်သည်မဟုတ်ပေလော။ အသင်လူငယ်များလည်း ကိုယ်၌စူးသောဆူးများနှင့် ရင်ဆိုင်ဖြေရှင်းနေရသော အသင်းတော်သားများကို ကူညီပေးနိုင်ကြပါသည်။—သု. ၂၀:၂၉။
၁၈။ ကင်းမျှော်စင်နှင့် နိုးလော့!မဂ္ဂဇင်းများပါ ဘဝအတ္ထုပ္ပတ္တိများမှ အဘယ်အားပေးမှုကို ကျွန်ုပ်တို့ရရှိသနည်း။
၁၈ ဘဝပြဿနာများရင်ဆိုင်ခဲ့ကြရ၍ ရင်ဆိုင်နေကြဆဲရှိ သက်သေခံများ၏ ဘဝအတ္ထုပ္ပတ္တိများနှင့် တွေ့ကြုံမှုများစွာကို ကင်းမျှော်စင်နှင့် နိုးလော့!မဂ္ဂဇင်းများတွင် ဖော်ပြထားသည်။ ၎င်းဆောင်းပါးကို မှန်မှန်ဖတ်ရှုကြည့်လျှင် ကမ္ဘာတစ်ဝန်းရှိ ကျွန်ုပ်တို့၏ဝိညာဉ်ရေးညီအစ်ကို၊ ညီအစ်မများသည် စီးပွားရေးအခက်အခဲများ၊ သဘာဝဘေးဒဏ်များကြောင့် ချစ်မြတ်နိုးရသူများကိုဆုံးရှုံးခဲ့ရသည့်အပြင် ကြောက်မက်ဖွယ်စစ်တွင်းအခြေအနေများကိုလည်း တွေ့ကြုံခဲ့ရကြသည်။ အခြားသူများမှာမူ မစွမ်းဆောင်နိုင်စေသည့်ရောဂါများနှင့် အသက်ရှင်နေကြရ၏။ များစွာသောသူတို့မှာ ကျန်းမာသန်စွမ်းသူများ အလေးမထားတတ်သည့် လွယ်ကူသောအရာများကိုပင် မလုပ်ကိုင်နိုင်ကြပါ။ သူတို့၏ဖျားနာမှုများသည် အကြီးအကျယ်စမ်းသပ်မှုဖြစ်၏၊ အထူးသဖြင့် ခရစ်ယာန်လုပ်ဆောင်မှုများတွင် သူတို့ပါဝင်ချင်သလောက် မပါဝင်နိုင်ကြသောအခါတွင်ဖြစ်သည်။ ဤသူများသည် သူတို့၏ညီအစ်ကို၊ ညီအစ်မကြီးငယ်မရွေးတို့၏ ကူညီထောက်မမှုကို ရရှိကြသောခါ အလွန်ကျေးဇူးတင်ကြပါသည်!
ခံနိုင်ရည်ရှိခြင်းက ပျော်ရွှင်စေ
၁၉။ ပေါလုသည် ဆူးနှင့်တူသောစုံစမ်းနှောင့်ယှက်မှုများနှင့် အားနည်းချက်များရှိသည့်ကြားမှ အဘယ်ကြောင့်ပျော်ရွှင်နိုင်ခဲ့သနည်း။
၁၉ မိမိအား ဘုရားသခင်ခွန်အားပေးခဲ့ပုံကို ပေါလုတွေ့မြင်ရ၍ ဝမ်းမြောက်ခဲ့သည်။ သူကဤသို့ဆိုခဲ့သည်– “ခရစ်တော်၏တန်ခိုးသည် ငါ့အပေါ်၌ကျိန်းဝပ်မည်အကြောင်း ငါ့ကိုယ်၌အားနည်းခြင်းအဖြစ်ကို ဝမ်းမြောက်သောစိတ်နှင့် ဝါကြွားခြင်းငှာ သာ၍ငါအလိုရှိ၏။ သို့ဖြစ်၍ ခရစ်တော်ကြောင့်ခံရသော အားနည်းခြင်း၊ ကဲ့ရဲ့ခြင်း၊ ဆင်းရဲခြင်း၊ ညှဉ်းဆဲနှိပ်စက်ခြင်း၊ ကျပ်တည်းစွာသော . . . ဝေဒနာခံခြင်းတို့ကို ငါနှစ်သက်၏။ အကြောင်းမူကား၊ ငါသည်အားနည်းသောအခါ တန်ခိုးနှင့်ပြည့်စုံလျက်ရှိ၏။” (၂ ကောရိန္သု ၁၂:၉၊ ၁၀) ပေါလုသည် ကိုယ်ပိုင်အတွေ့အကြုံများကြောင့် ဤသို့ယုံကြည်စိတ်ချစွာ ဆိုနိုင်ခဲ့၏– “ထိုသို့ငါဆိုသော်၊ ကိုယ်တိုင်ဆင်းရဲခြင်းကိုရည်မှတ်၍ဆိုသည်မဟုတ်။ အကြောင်းမူကား၊ ငါသည်တွေ့ကြုံသမျှသောအခြင်းအရာတို့၌ ရောင့်ရဲသောစိတ်ရှိအံ့သောငှာ သင်မိပြီ။ ရှုတ်ချခြင်းကိုလည်းကောင်း၊ ကြွယ်ဝခြင်းကိုလည်းကောင်း ခံတတ်၏။ ဝစွာစားခြင်း၊ မွတ်သိပ်ခြင်း၊ စည်းစိမ်ရှိခြင်း၊ ဆင်းရဲခြင်းတို့ကိုခံရအံ့သောငှာ၊ အရပ်ရပ်တို့တွင် အရာရာ၌သင်မိပြီ။ ငါ့ကိုခွန်အားနှင့်ပြည့်စုံစေတော်မူသော ခရစ်တော်အားဖြင့် ခပ်သိမ်းသောအမှုတို့ကို ငါတတ်စွမ်းနိုင်၏။”—ဖိလိပ္ပိ ၄:၁၁-၁၃။
၂၀၊ ၂၁။ (က) “မထင်ရှားသောအရာ” ကိုစဉ်းစားဆင်ခြင်ရာ၌ အဘယ်ကြောင့်ပျော်ရွှင်မှုရနိုင်သနည်း။ (ခ) မြေကြီးပရဒိသုတွင်တွေ့မြင်ရဖို့ သင်မျှော်လင့်သည့် “မထင်ရှားသောအရာ” တချို့ကား အဘယ်နည်း။
၂၀ သို့ဖြစ်၍ ကျွန်ုပ်တို့ကိုယ်၌စူးသော မည်သည့်ဆူးကိုမဆိုဆက်ခံခြင်းအားဖြင့် ကျွန်ုပ်တို့၏အားနည်းမှုတွင် ယေဟောဝါ၏တန်ခိုးတော်ကို ပြည့်ဝစုံလင်စေကြောင်း လူတိုင်းကိုပြသခြင်းမှ ကျွန်ုပ်တို့ကျေနပ်မှု၊ ပျော်ရွှင်မှုရရှိနိုင်ကြသည်။ ပေါလုဤသို့ရေးသားခဲ့သည်– “ငါတို့သည် အားလျော့စိတ်ပျက်ခြင်းနှင့်ကင်းလွတ်ကြ၏။ ငါတို့၏ . . . အတွင်းလူမူကား တစ်နေ့ထက်တစ်နေ့ ပြုပြင်ခြင်းကိုခံရ၏။ အကြောင်းမူကား၊ . . . မထင်ရှားသောအရာတို့သည် အစဉ်အမြဲတည်ကြောင်းကို ငါတို့သည်ထောက်လျက်၊ . . . မထင်ရှားသောအရာတို့ကိုကြည့်မှတ်ကြစဉ်အခါ၊ ယခုခဏခံရ၍ ပေါ့ပါးသောဆင်းရဲခြင်း . . . သည် အတိုင်းထက်အလွန်ကြီးမြတ်လေးလံသော . . . ထာဝရဘုန်းအသရေကို ငါတို့အဖို့ဖြစ်စေတတ်၏။”—၂ ကောရိန္သု ၄:၁၆-၁၈။
၂၁ ယေဟောဝါ၏မျက်မှောက်ခေတ် လူမျိုးတော်အများစုသည် မြေကြီးပရဒိသုတွင်နေထိုင်ပြီး ကိုယ်တော်ကတိထားရာ ကောင်းချီးများကိုခံစားရဖို့ မျှော်လင့်ကြသည်။ ထိုကောင်းချီးများသည် ကျွန်ုပ်တို့အတွက် ယနေ့ “မထင်ရှား” ဖြစ်ပေမည်။ သို့ရာတွင် အဆိုပါကောင်းချီးများကို ကျွန်ုပ်တို့ကိုယ်တိုင်တွေ့မြင်ကြပြီး ၎င်းတို့ကို ထာဝစဉ်မွေ့လျော်ရမည့်အချိန် အလျင်အမြန်နီးသည်ထက်နီးကပ်လာပေပြီ။ ၎င်းကောင်းချီးတစ်ခုမှာ ဆူးကဲ့သို့သောမည်သည့်ပြဿနာမျှ ဘယ်တော့မှပြန်မပေါ်လာရတော့မည့် စိတ်သက်သာမှုပင်တည်း! ဘုရားသခင့်သားတော်သည် “[စာတန့်]အမှုတို့ကိုပယ်ဖျက်” ပြီး “သေခြင်းတရားကိုအစိုးရသောသူ . . . ၏တန်ခိုးကို ချိုးဖဲ့ဖျက်ဆီး” ပစ်ပါလိမ့်မည်။—၁ ယောဟန် ၃:၈; ဟေဗြဲ ၂:၁၅။
၂၂။ ကျွန်ုပ်တို့အဘယ်အရာကို ယုံကြည်စိတ်ချ၍ အဘယ်သို့ စိတ်ပိုင်းဖြတ်ထားသင့်သနည်း။
၂၂ ထို့ကြောင့် ယနေ့ ကျွန်ုပ်တို့ကိုယ်၌ မည်သည့်ဆူးပင်စူးနေပါစေ ၎င်းကိုဆက်၍ ကိုင်တွယ်နိုင်နင်းကြပါစို့။ ပေါလုနည်းတူ ကျွန်ုပ်တို့သည် ရက်ရောစွာခွန်အားပေးသနားတော်မူသော ယေဟောဝါကြောင့် ထိုသို့ပြုဖို့ခွန်အားရှိကြပါလိမ့်မည်။ မြေကြီးပရဒိသုတွင် ကျွန်ုပ်တို့နေထိုင်ကြရသောအခါ ယေဟောဝါပြုတော်မူသမျှ အံ့ဖွယ်ရာတို့အတွက် ဘုရားသခင်ကိုနေ့စဉ်ကောင်းချီးပေးကြပါမည်။—ဆာလံ ၁၀၃:၂။
[အောက်ခြေမှတ်ချက်]
^ အပိုဒ်၊ 14 ၂၀၀၀၊ မေ ၈ [လိပ်] ထုတ်နိုးလော့! မဂ္ဂဇင်းမှ “သမ္မာကျမ်းစာရှုထောင့်– စိတ်ပျက်အားလျော့မှုကို အောင်မြင်စွာကျော်လွှားနိုင်ပုံ” ဟူသောဆောင်းပါးကိုရှု။
သင်မည်သို့ဖြေဆိုမည်နည်း
• စာတန်သည် ခရစ်ယာန်စစ်များ၏တည်ကြည်မှုကို အဘယ်ကြောင့်နှင့် အဘယ်သို့ ချိုးဖျက်ဖို့ကြိုးပမ်းသနည်း။
• ယေဟောဝါ၏တန်ခိုးတော်သည် မည်သို့ “အားနည်းခြင်းအဖြစ်၌ စုံလင်တတ်” သနည်း။
• အကြီးအကဲများနှင့် အခြားသူများသည် အခက်အခဲပြဿနာများကြောင့် စိတ်ဆင်းရဲသူတို့ကို မည်သို့အားပေးနိုင်ကြသနည်း။
[လေ့လာရန်မေးခွန်းများ]
[စာမျက်နှာ ၁၈ ပါ ရုပ်ပုံ]
ပေါလုသည် သူ၏ကိုယ်၌စူးသောဆူးကို ဖယ်ရှားပေးပါမည်အကြောင်း ဘုရားသခင်ထံသုံးကြိမ်ဆုတောင်းခဲ့