တစ်လောက​လုံး ဖျက်ဆီး​ခံရ!

သင့်​ဝန်းကျင်​လောက​ရှိ မြို့​ပြ​များ၊ ၎င်း​၏​ယဉ်ကျေးမှု၊ သိပ္ပံ​ဆိုင်ရာ အောင်မြင်မှု​များနှင့် သန်းပေါင်း​များစွာသော​လူဦးရေ​တို့ကို ရှု​လိုက်ပါ။ ၎င်းတို့၏​တည်မြဲ​ဟန်​ရှိ​ခြင်း​သည် အထင်ကြီး​စ​ရာ​ပင် မဟုတ်ပေ​လော။ ဤ​လောကသည် တစ်နေ့​နေ့တွင် လုံးလုံး​ပျောက်ကွယ်​သွား​လိမ့်​မည်​ကို သင်​တွေးကြည့်​နိုင်​သလော။ တွေး​ရ​ခက်​ပေ​လိမ့်​မည်။ သို့ရာတွင် ယုံကြည်​စိတ်ချ​ရသော ဇာစ်​မြစ်​တစ်ခု​အရ ဤ​ကမ္ဘာ​လောက​မတည်ရှိ​မီ လောက​တစ်ခု​တည်​ရှိခဲ့​ပြီး ၎င်း​သည်​လုံးလုံး​ဖျက်ဆီး​ခံ​ခဲ့​ရ​ကြောင်း သင်​သိပါသလော။

ရှေးခေတ်​လူမျိုးစု​များ နေထိုင်​သည့် ကမ္ဘာ​လောက​တစ်ခု​ကို ပြောနေခြင်း​မဟုတ်ပါ။ ပျက်စီး​သွား​သည့်​လောကသည် မြို့​ပြ​များ၊ အနုပညာ​ဆိုင်ရာ​အောင်မြင်မှု​များနှင့် သိပ္ပံ​ပညာ​ထွန်းကားသော ယဉ်ကျေး​သည့် လောက​တစ်ခု​ဖြစ်သည်။ သို့​တိုင် ဘိုးဘေး​အာဗြဟံ​မမွေး​မီ နှစ်ပေါင်း ၃၅၂ နှစ်၊ ဒုတိယ​လ၊ ၁၇ ရက်​နေ့တွင် ရုတ်တရက် ရေလွှမ်းမိုး​ဘေး​ကျရောက်​ခဲ့​ပြီး တစ်လောက​လုံး သုတ်သင်​ရှင်းလင်း​ခံ​ခဲ့​ရ​ကြောင်း ကျမ်းစာ​မှတ်တမ်းက​ဆို​၏။ *

၎င်း​မှတ်တမ်း​သည် မှန်​ပါသလော။ ထိုသို့ အမှန်တကယ်​ဖြစ်ပျက်​ခဲ့​ပါသလော။ လက်ရှိ​လောက​မတိုင်မီ စည်ပင်​ထွန်းကား​ခဲ့​ပြီး နောက်ပိုင်း​တွင်​ဖျက်ဆီး​ခံ​ခဲ့​ရသည့် ရှေး​လောကဓာတ်​တစ်ခု အမှန်​တည်ရှိ​ခဲ့​သလော။ သို့​ဖြစ်​လျှင် အဘယ်ကြောင့် အဆုံးတိုင်​ခဲ့​ရသနည်း။ ပြဿနာ​ကား​အဘယ်နည်း။ ၎င်း​ဖျက်ဆီး​ခံရ​ခြင်း​မှ သင်ခန်းစာယူ​နိုင်​စ​ရာ ရှိပါ​သလော။

 ရှေး​လောကဓာတ်​တစ်ခု အမှန်တကယ် ဖျက်ဆီး​ခံ​ခဲ့​ရ​သလော

စိုးရွံ့​ထိတ်လန့်ဖွယ် ထိုသို့​သော​ကပ်ဘေး​ကြီး​တစ်ခု အမှန်တကယ်​ဖြစ်ပျက်​ခဲ့​ပါ​မူ ယင်းကို​ဘယ်​သောအခါ​မျှ လုံးဝ​မေ့ပျောက်​နိုင်​ကြ​မည်​မဟုတ်ပေ။ ထို့​ကြောင့် လူမျိုးများ​စွာ​တွင် ထို​ပျက်စီးခြင်း​ဘေး​ကို သတိပေး​သော​စကား​များ​ရှိသည်။ ဥပမာ၊ သမ္မာကျမ်းစာ​တွင် မှတ်တမ်း​တင်ထားသော ရက်စွဲ​အတိအကျ​ကို သုံးသပ်ကြည့်​ပါ။ ရှေးခေတ်​ပြက္ခဒိန်​၏ ဒုတိယ​လ​သည် ယခု​ကျွန်ုပ်​တို့​သတ်မှတ်​သော အောက်တိုဘာ​လလယ်​မှ နိုဝင်ဘာ​လလယ်​အထိ​ဖြစ်သည်။ ထို့​ကြောင့် ၁၇ ရက်​သည် ခန့်မှန်းခြေ​အားဖြင့် နိုဝင်ဘာ​ပထမ​ရက်​နှင့်​ကိုက်ညီ​သည်။ ထို့​ကြောင့် နိုင်ငံ​များစွာ​တွင် ကွယ်လွန်​သူတို့​အတွက်​ပွဲနေ့​များ​ကို ထို​အချိန်တွင်​ပင် ကျင်းပ​ကြ​ခြင်း​သည် တိုက်ဆိုင်မှု​မျှ​မဖြစ်​နိုင်​ပေ။

ရေလွှမ်းမိုး​ဘေး​၏ အခြားသော​အထောက်အထား​များသည် လူတို့၏​ထုံးတမ်း​စဉ်​လာ​များ​တွင် ဆက်လက်​တည်ရှိ​သည်။ ရှေးကျ​သော​လူမျိုးစု​တိုင်း​တွင် မိမိတို့​ဘိုးဘေး​များသည် ကမ္ဘာချီ​ရေလွှမ်းမိုး​ဘေး​ကို ကပ်ကျော်​ခဲ့​ကြသည်​ဟူ​သည့် ဒဏ္ဍာရီ​ရှိသည်။ အနည်းငယ်​ကို​သာ​ဖော်ပြ​ရ​လျှင် တရုတ်၊ န​ယူးဇီ​လ​န်၊ မက္ကစီကို၊ မိုက်ခရို​နီး​ရှား၊ မြောက်​အမေရိက​တိုက် ဒေသ​အသီးသီး၊ လစ်သူယေးနီးယား၊ အလာစကာ၊ ဩစတြေးလျ​နှင့် အိန္ဒိယ​ရှိ​လူမျိုးများ​နည်းတူ အာဖရိကန် ပစ်​ဂ​မီ​လူမျိုးများ၊ ဥရောပ က​က်​လူမျိုးများ၊ တောင်​အမေရိက အင်​ဂါ​လူမျိုး​အားလုံး​တို့​တွင် အလားတူ ဒဏ္ဍာရီ​များ​ရှိကြသည်။

အချိန်​ကုန်လွန်​လာ​သည်​နှင့်​အမျှ ထို​ဒဏ္ဍာရီ​များ​ကို အမွှမ်းတင်​ရေးသားခဲ့​ကြသည်​မှန်​သော်လည်း ၎င်း​တို့အားလုံး​သည် ရင်းမြစ်​တူ​ဇာတ်လမ်း​တစ်ခု​ကို​ရည်ညွှန်း​သည့် အသေးစိတ်​အချက်အလက်​များစွာ​ပါရှိ​သည်၊ ၎င်းမှာ လူသား​တို့၏​ဆိုးညစ်မှု​ကြောင့် ဘုရားသခင် အမျက်ထွက်​တော်​မူ​ခဲ့​ခြင်း​ဖြစ်သည်။ ထို့​ကြောင့် ရေလွှမ်းမိုး​ဘေး​ကြီး​ကို ကျရောက်​စေတော်မူ​သည်။ လူသား​တစ်ရပ်လုံး ဖျက်ဆီး​ခံ​ခဲ့​ရသည်။ သို့ရာတွင် ဖြောင့်မတ်​သူ​လူနည်းစု​သည် ကာကွယ်​ခံ​ခဲ့​ရသည်။ ထို​သူတို့သည် လူ​နှင့်​တိရစ္ဆာန်​များ​ကို လွတ်မြောက်​စေသည့် သင်္ဘော​တစ်စီး ဆောက်လုပ်​ခဲ့​ကြသည်။ အချိန်တန်သော် ခြောက်သွေ့​ရာ​အရပ်​ကို​ရှာ​ရန် ငှက်​များ​ကို စေလွှတ်ခဲ့​၏။ နောက်ဆုံး သင်္ဘော​သည် တောင်​တစ်လုံး​ပေါ်​တွင် တင်​သွား​သည်။ လွတ်မြောက်​လာ​သူများ​သည် သင်္ဘော​မှ​ဆင်း​၍ ပူဇော်​ပ​သ​ခဲ့​ကြသည်။

ယင်းက အဘယ်အရာကို သက်သေထူ​သနည်း။ တူညီချက်​များသည် တိုက်ဆိုင်မှု​သာ မဖြစ်​နိုင်​ချေ။ ထို​ဒဏ္ဍာရီ​များ​၏ စုပေါင်း​အထောက်အထား​က လူသား​လောက​တစ်ခုလုံး​ကို​ဖျက်ဆီး​ခဲ့​သည့် ရေလွှမ်းမိုး​ဘေး​ကို လွတ်မြောက်​သူများ​မှ လူအားလုံး ဆင်းသက်လာ​သည်​ဟူသော ကျမ်းစာ​၏​ရှေး​သက်သေခံချက်​ကို ထောက်ခံ​အတည်ပြု​သည်။ ယင်းကြောင့် အဘယ်အရာ​ဖြစ်ပျက်​ခဲ့​ကြောင်း​သိရှိ​ရန် ဒဏ္ဍာရီ​များ​ကို ယုံကြည်​အားထားစရာ​မလိုပါ။ ကျွန်ုပ်​တို့​တွင် ကျမ်းစာ​၏​ဟေဗြဲစာစောင်​များ​၌ ဂရုတစိုက်​ထိန်းသိမ်း​ထားသော မှတ်တမ်း​ရှိသည်။—ကမ္ဘာဦး အခန်းကြီး ၆-၈။

သမ္မာကျမ်းစာ​တွင် လူ့​ဘဝ​အစပိုင်း​အထိ ပြန်ရောက်​သွား​စေသည့် သမိုင်း​ဆိုင်ရာ မှုတ်သွင်းခံ​မှတ်တမ်း ပါရှိ​သည်။ သို့ရာတွင် အထောက်အထား​များ​က ယင်းသည် သမိုင်း​မှတ်တမ်း​မျှ​သာမက ကြောင်း သက်သေထူ​၏။ ၎င်း​၏ စိတ်ချ​ရသော​ပရောဖက်ပြုချက်​နှင့် နက်နဲ​သော​ဉာဏ်ပညာ​တို့​က လူသားများ​နှင့်​ဘုရားသခင်​ဆက်ဆံ​သည့် နည်းလမ်း​ဖြစ်​ကြောင်း​ဖော်ပြ​သည်။ ဒဏ္ဍာရီ​များနှင့်​မတူဘဲ သမ္မာ​ကျမ်းစာ​ပါ သမိုင်း​မှတ်တမ်းများတွင် အမည်​နှင့်​ရက်စွဲများ​ရော ဆွေစဉ်မျိုးဆက်​စာရင်း​အပြင် ပထဝီ​ဆိုင်ရာ အသေးစိတ်​အချက်အလက်​များ​ပါရှိ​၏။ ရေလွှမ်းမိုး​ဘေး​မတိုင်မီ​က လူသား​ဘဝ​သည် အဘယ်အရာ​နှင့်​တူ​ကြောင်း​နှင့် တစ်လောက​လုံး​သည် အဘယ်ကြောင့် ရုတ်တရက်​ဆုံးခန်းတိုင်​ခဲ့​ရ​ကြောင်းကို​လည်း ဖော်ပြ​ပေး​သည်။

ရေလွှမ်းမိုး​ဘေး​မတိုင်မီ​က လူသားများ​သည် အဘယ်​အမှား​ကို ပြု​ခဲ့​ကြ​သနည်း။ နောက်​ဆောင်းပါး​က ထို​မေးခွန်း​ကို သုံးသပ်​ထား​ပါ​သည်။ ၎င်း​က လက်ရှိ​ယဉ်ကျေးမှု၏​အနာဂတ် တည်ရှိရေး​မှာ မည်မျှ​စိတ်ချ​ရ​ကြောင်း သိရှိ​လို​သူများ​အတွက် အရေးပါသည့်​မေးခွန်း​တစ်ခု​ဖြစ်သည်။

[အောက်ခြေမှတ်ချက်]

[စာမျက်နှာ ၄ ပါ ဇယား]

(ကား​ချက်​အပြည့်အစုံကို စာစောင်​တွင်​ကြည့်​ပါ)

ကမ္ဘာချီ​ရေလွှမ်းမိုး​ဘေး​ဒဏ္ဍာရီ​များ

နိုင်ငံ တူညီချက်​များ ၁ ၂ ၃ ၄ ၅ ၆ ၇ ၈ ၉ ၁၀

ဂရိ ၇ ◆ ◆ ◆ ◆ ◆ ◆ ◆

ရောမ ၆ ◆ ◆ ◆ ◆ ◆ ◆

လစ်သူယေးနီးယား ၆ ◆ ◆ ◆ ◆ ◆ ◆

အဆီးရီးယား ၉ ◆ ◆ ◆ ◆ ◆ ◆ ◆ ◆ ◆

တန်ဇန်းနီးယား ၇ ◆ ◆ ◆ ◆ ◆ ◆ ◆

အိန္ဒိယ – ဟိန္ဒူ ၆ ◆ ◆ ◆ ◆ ◆ ◆

န​ယူးဇီ​လ​န် – မေ​အို​ရီ ၅ ◆ ◆ ◆ ◆ ◆

မိုက်ခရို​နီး​ရှား ၇ ◆ ◆ ◆ ◆ ◆ ◆ ◆

ဝါ​ရှင်​တန် ယူ.အက်စ်.အေ. - ယကီ​မာ ၇ ◆ ◆ ◆ ◆ ◆ ◆ ◆

မ​စ်​စ​စ္စပီ ယူ.အက်စ်.အေ. - ချော့​ခ်ထော် ၇ ◆ ◆ ◆ ◆ ◆ ◆ ◆

မက်​ဆီ​ကို – မီ​ကို​အာ​ကန် ၅ ◆ ◆ ◆ ◆ ◆

တောင်​အမေရိက - က​စ်​ချူ​ဝါ ၄ ◆ ◆ ◆ ◆

ဘိုလီးဗီးယား - ခိရိဂူအာနို ၅ ◆ ◆ ◆ ◆ ◆

ဂူယာနာ - အားရဝါ့ခ် ၆ ◆ ◆ ◆ ◆ ◆ ◆

၁– ဆိုးသွမ်းမှု​ကြောင့် ဘုရားသခင်​အမျက်ထွက်​တော်​မူ​ခဲ့

၂– ရေလွှမ်းမိုး​ဘေး​ဖြင့် ဖျက်ဆီး​ခံ​ခဲ့​ရ

၃– ဘုရားသခင်​မိန့်တော်မူ​ခဲ့

၄– ဘုရားသခင် သတိပေး​ခဲ့

၅– လူ​အနည်းငယ်​သာ ကပ်ကျော်​ခဲ့

၆– သင်္ဘော​တစ်စီး​အားဖြင့် ကယ်တင်​ခံ​ခဲ့​ရ

၇– တိရစ္ဆာန်​များ ကယ်နုတ်​ခံ​ခဲ့​ရ

၈– ငှက် သို့​မဟုတ် အခြား​သတ္တဝါ​တစ်မျိုး စေလွှတ်ခဲ့

၉– နောက်ဆုံး​တွင် တောင်​တစ်လုံး​ပေါ် တင်​သွားခဲ့

၁၀– ပူဇော်​ပ​သ​ခဲ့​ကြ