ခရစ်တော်၏ခေါင်းဆောင်မှုသည် သင့်အတွက် အမှန်တကယ်ဖြစ်သလော
ခရစ်တော်၏ခေါင်းဆောင်မှုသည် သင့်အတွက် အမှန်တကယ်ဖြစ်သလော
“သင်တို့သည် ခေါင်းဆောင်ဟူ၍လည်း အခေါ်မခံကြနှင့်။ သင်တို့တွင် မေရှိယ [“ခရစ်တော်၊” ကဘ] တည်းဟူသော ခေါင်းဆောင်တစ်ပါးတည်းသာရှိ၏။”—မဿဲ ၂၃:၁၀၊ သတင်းကောင်း။
၁။ မည်သူသာလျှင် ခရစ်ယာန်စစ်များ၏ခေါင်းဆောင်ဖြစ်သနည်း။
နိသန်လ ၁၁ ရက်၊ အင်္ဂါနေ့ဖြစ်သည်။ နောက်သုံးရက်အကြာတွင် ယေရှုခရစ် အသတ်ခံရတော့မည်။ ဤကား ဝတ်ပြုရာအိမ်တော်သို့ ကိုယ်တော်နောက်ဆုံးရောက်ရှိခြင်းတည်း။ ထိုနေ့ရက်တွင် စုဝေးလာခဲ့ကြသော လူအုပ်နှင့် တပည့်တော်များအား အရေးကြီးသော သွန်သင်ချက်တစ်ရပ်ကို ယေရှုကြားသိစေခဲ့သည်။ ကိုယ်တော်က ဤသို့မိန့်တော်မူသည်– “သင်တို့အားလုံးသည် ညီအစ်ကိုများဖြစ်လျက် သင်တို့မှာ ဆရာတော်တစ်ပါးတည်းသာရှိသည်ဖြစ်၍ ဆရာတော်ဟုအခေါ်မခံကြနှင့်။ ဤလောကတွင် အဘယ်သူကိုမျှ ‘အဘ’ ဟုမခေါ်ကြနှင့်။ သင်တို့တွင် ကောင်းကင်ဘုံရှင် အဘတစ်ပါးတည်းသာရှိ၏။ သင်တို့သည် ခေါင်းဆောင်ဟူ၍လည်း အခေါ်မခံကြနှင့်။ သင်တို့တွင် မေရှိယ [“ခရစ်တော်၊” ကဘ] တည်းဟူသော ခေါင်းဆောင်တစ်ပါးတည်းသာရှိ၏။” (မဿဲ ၂၃:၈-၁၀၊ သတင်းကောင်း) ရှင်းနေသည်ကား ခရစ်ယာန်စစ်များ၏ခေါင်းဆောင်သည် ယေရှုခရစ်ဖြစ်သည်။
၂၊ ၃။ ယေဟောဝါ၏စကားကိုနားထောင်လျက် ကိုယ်တော်ခန့်အပ်ထားသော ခေါင်းဆောင်ကို လက်ခံနေခြင်းက ကျွန်ုပ်တို့၏ဘဝအပေါ် အဘယ်အကျိုးသက်ရောက်သနည်း။
၂ ယေရှု၏ခေါင်းဆောင်မှုကို ကျွန်ုပ်တို့လက်ခံသောအခါ ကျွန်ုပ်တို့၏ဘဝတွင် အကျိုးဖြစ်ထွန်းလိုက်လေခြင်း! ဤခေါင်းဆောင် ကြွလာတော်မူမည့်အကြောင်း တင်ကူးဟောပြောရာ၌ ပရောဖက်ဟေရှာယမှတစ်ဆင့် ယေဟောဝါဘုရားသခင် ဤသို့ကြေညာခဲ့သည်– “အိုရေငတ်သောသူအပေါင်းတို့ ရေရှိရာသို့လာကြလော့။ ငွေမရှိသောသူတို့ လာကြ။ ဝယ်၍စားသောက်ကြလော့။ ငွေမပါဘဲ အဖိုးကိုမပေးဘဲလာ၍ စပျစ်ရည်နှင့်နို့ကိုဝယ်ကြလော့။ . . . ငါ့စကားကို စေ့စေ့နားထောင်လျက် ကောင်းသောအစာကိုစားကြလော့။ သင်တို့၏ဝိညာဉ်သည် ချိုသောအရာတို့၌ မိမိကိုမိမိ မွေ့လျော်စေလိမ့်မည်။ . . . ကြည့်ရှုလော့။ ထိုသူကို . . . ဆရာ [“ခေါင်းဆောင်၊” ကဘ] ဖြစ်စေခြင်းငှာလည်းကောင်း၊ စီရင်အုပ်စိုးသောအရှင် ဖြစ်စေခြင်းငှာလည်းကောင်း လူမျိုးတို့အားငါပေးပြီ။”—ဟေရှာယ ၅၅:၁-၄။
၃ ယေဟောဝါ၏စကားကိုနားထောင်၍ ကျွန်ုပ်တို့အား ကိုယ်တော်ပေးတော်မူသော ခေါင်းဆောင်နှင့် အုပ်စိုးရှင်၏နောက်သို့ လိုက်ကြသည့်အခါ ကျွန်ုပ်တို့ဘဝအပေါ် မည်မျှအကျိုးသက်ရောက်ကြောင်းဖော်ပြရန် ဟေရှာယက ရိုးရိုးအရည်များဖြစ်သည့် ရေ၊ နို့နှင့် စပျစ်ရည်တို့ကို တင်စားချက်အဖြစ် အသုံးပြုခဲ့သည်။ အကျိုးကျေးဇူးကား လန်းဆန်းအားတက်စရာ၊ ပူပြင်းသောနေ့တစ်နေ့တွင် ရေအေးတစ်ခွက်သောက်လိုက်ရသကဲ့သို့ပင်ဖြစ်သည်။ အမှန်တရားနှင့် ဖြောင့်မတ်ခြင်းတရားကို ကျွန်ုပ်တို့မွတ်သိပ်ခြင်းသည် အာသာပြေသွားသည်။ နို့ရည်သည် ကလေးငယ်များကို ခွန်အားပေး၍ ကြီးထွားစေသကဲ့သို့ ‘နှုတ်မြွက်တရားတော်၏နို့’ သည် ကျွန်ုပ်တို့ကိုအားရှိစေပြီး ဘုရားသခင်နှင့် ကျွန်ုပ်တို့၏ဆက်ဆံရေးတွင် ဝိညာဉ်ရေးကြီးထွားမှုရှိစေ၏။ (၁ ပေတရု ၂:၁-၃) ပွဲခံသည့်အခါ စပျစ်ရည်သည် လူ့နှလုံးကိုရွှင်လန်းစေကြောင်း မည်သူငြင်းဆိုမည်နည်း။ ထိုနည်းတူ စစ်မှန်သောဘုရားသခင်အား ဝတ်ပြုကိုးကွယ်၍ ကိုယ်တော်ခန့်အပ်ထားသော ခေါင်းဆောင်၏ခြေရာကို လိုက်လျှောက်ခြင်းက ‘အမှန်ရွှင်လန်းမှုရှိစေ၏။’ (တရားဟောရာ ၁၆:၁၅) သို့ဖြစ်၍ ကြီးငယ်မဟူ၊ ကျား/မ မရွေး ကျွန်ုပ်တို့အားလုံးသည် ခရစ်တော်၏ခေါင်းဆောင်မှုကို အမှန်တကယ်လက်ခံကြောင်း ဖော်ပြကြရမည်။ သို့သော် မေရှိယသည် ကျွန်ုပ်တို့၏ခေါင်းဆောင်ဖြစ်ကြောင်းကို ကျွန်ုပ်တို့၏နေ့စဉ်ဘဝအသက်တာ၌ မည်သို့ဖော်ပြကြမည်နည်း။
လူငယ်တို့—“ပညာတိုးပွားလျက်” နေလော့
၄။ (က) ပသခါပွဲအချိန်၌ ၁၂ နှစ်အရွယ်ရှိယေရှုသည် ယေရုရှလင်မြို့သို့ ရောက်ရှိခဲ့သောအခါ အဘယ်အရာဖြစ်ပျက်ခဲ့သနည်း။ (ခ) အသက် ၁၂ နှစ်အရွယ်၌ပင် ယေရှုသည် မည်သို့အသိပညာကြွယ်သနည်း။
၄ လူငယ်တို့ရှေ့ ကျွန်ုပ်တို့၏ခေါင်းဆောင်ချမှတ်ခဲ့သော စံနမူနာကိုသုံးသပ်ကြည့်ပါ။ ယေရှု၏ငယ်စဉ်ဘဝအကြောင်း အနည်းငယ်သာသိရှိရသော်လည်း ဖြစ်ရပ်တစ်ခုက အတော်အတန်ဖော်ပြပေး၏။ ယေရှု အသက် ၁၂ နှစ်ရှိစဉ် ကိုယ်တော်၏မိဘများသည် နှစ်စဉ်ပသခါပွဲအတွက် ယေရုရှလင်မြို့သို့ သူ့ကိုခေါ်သွားကြသည်။ ထိုအခါသမယတွင် ဝိညာဉ်ရေးရာဆွေးနွေးပွဲတစ်ရပ်၌ ကိုယ်တော်အလွန်စိတ်ဝင်စားခဲ့ရာ မိသားစုသည် ကိုယ်တော်မပါဘဲ အမှတ်တမဲ့ပြန်သွားကြသည်။ သုံးရက်ကြာသော် စိတ်ပူနေသောမိဘများဖြစ်သည့် ယောသပ်နှင့် မာရိတို့သည် ကိုယ်တော့်အား ဝတ်ပြုရာအိမ်တော်တွင် “ဆရာတို့အလယ်မှာထိုင်၍ သူတို့စကားကြားနာလျက်၊ သူတို့ကိုမေးမြန်းလျက်နေကြောင်း” တွေ့မြင်ခဲ့ကြသည်။ ထိုထက်ကား “သူ၏စကားကိုကြားသောသူအပေါင်းတို့သည် သူ၏ဉာဏ်ပညာကိုလည်းကောင်း၊ စကားအဖြေကိုလည်းကောင်း အံ့သြကြ၏။” စဉ်းစားကြည့်ပါ၊ အသက် ၁၂ နှစ်သာရှိစဉ် ယေရှုသည် အလေးအနက်ထားစဉ်းစားစရာ ဝိညာဉ်ရေးရာအမေးများကို မေးမြန်းနိုင်ရုံမက ပညာသားပါသောအဖြေများကိုလည်း ပြန်ဖြေဆိုနိုင်ခဲ့သည်တကား! မိဘတို့၏လေ့ကျင့်ပေးမှုက ကိုယ်တော်အတွက် အထောက်အကူဖြစ်ခဲ့မည်မှာ မလွဲဧကန်ပင်။—လုကာ ၂:၄၁-၅၀။
၅။ လူငယ်တို့သည် မိသားစုကျမ်းစာလေ့လာမှုအစီအစဉ်အပေါ် မိမိတို့၏သဘောထားကို မည်သို့အကဲဖြတ်နိုင်မည်နည်း။
၅ သင်သည် လူငယ်တစ်ဦးဖြစ်ပေမည်။ သင့်မိဘများသည် ဘုရားသခင်ကိုချစ်သောကျေးကျွန်များ ဖြစ်ကြမည်ဆိုလျှင် သင့်အိမ်တွင် မိသားစုလေ့လာမှုအစီအစဉ်ကို ပုံမှန်ပြုလုပ်ပေမည်။ မိသားစုလေ့လာမှုနှင့်ပတ်သက်၍ သင်၏သဘောထားကား အသို့နည်း။ ဤမေးခွန်းများကို စဉ်းစားဆင်ခြင်ကြည့်ပါ– ‘ငါ့မိသားစုကျမ်းစာလေ့လာမှုအစီအစဉ်ကို ငါ စိတ်နှလုံးအပြည့်နဲ့ထောက်ခံအားပေးသလား။ ပုံမှန်ပြုလုပ်သောအစီအစဉ်ကို မပျက်ကွက်စေရလေအောင် ငါပူးပေါင်းဆောင်ရွက်သလား။’ (ဖိလိပ္ပိ ၃:၁၆) ‘လေ့လာမှုမှာ ငါတက်တက်ကြွကြွပါဝင်ရဲ့လား။ သင့်လျော်တဲ့အခါ လေ့လာနေတဲ့အကြောင်းနဲ့ပတ်သက်လို့ မေးခွန်းတွေကိုမေးပြီး သက်ဆိုင်ပုံကို ငါတင်ပြသလား။ ဝိညာဉ်ရေးဘက်တိုးတက်နေရင်း “စုံလင်သောအရွယ်ရှိ [“ရင့်ကျက်သော၊” ကဘ] သူတို့အတွက် ကြေခဲသောအစာ” ကို ငါခံတွင်းတွေ့နေသလား။’—ဟေဗြဲ ၅:၁၃၊ ၁၄။
၆၊ ၇။ နေ့စဉ်ကျမ်းစာဖတ်ရှုခြင်းအစီအစဉ်သည် လူငယ်များအတွက် မည်သို့တန်ဖိုးရှိနိုင်သနည်း။
၆ နေ့စဉ် ကျမ်းစာဖတ်ရှုခြင်းအစီအစဉ်သည်လည်း အလွန်တန်ဖိုးရှိ၏။ ဆာလံဆရာက ဤသို့သီဆိုခဲ့သည်– “မတရားသောသူတို့၏တိုက်တွန်းခြင်းသို့မလိုက် . . . ထာဝရဘုရား၏တရားတော်ကိုမွေ့လျော်၍ တရားတော်ကို နေ့ညမပြတ် [“ဖတ်ရှု၊” ကဘ] ဆင်ခြင်အောက်မေ့သောသူသည် မင်္ဂလာရှိ၏။” (ဆာလံ ၁:၁၊ ၂) မောရှေ၏အရိုက်အရာကိုဆက်ခံသူ ယောရှုသည် ‘ပညတ်တရားတော်ကို နေ့ညမပြတ် ဖတ်ရှုသောသူဖြစ်သည်။’ ယင်းက သူ့အား ပညာရှိစွာပြုမူစေ၍ သူ၏ ဘုရားသခင်ပေးတာဝန်ကိုထမ်းဆောင်ရာတွင် အောင်မြင်မှုရရှိစေခဲ့သည်။ (ယောရှု ၁:၈) ကျွန်ုပ်တို့၏ခေါင်းဆောင်ယေရှုခရစ်က ဤသို့မိန့်တော်မူသည်– “ ‘လူသည် မုန့်အားဖြင့်သာ အသက်ကိုမွေးရမည်မဟုတ်။ ဘုရားသခင်မိန့်တော်မူသမျှအားဖြင့် အသက်ကိုမွေးရမည်’ ကျမ်းစာလာသည်။” (မဿဲ ၄:၄) ကာယအစာကို ကျွန်ုပ်တို့နေ့စဉ်စားသုံးဖို့လိုလျှင် ဝိညာဉ်အစာကို မှန်မှန်စားသုံးရန် မည်မျှလိုအပ်မည်ဖြစ်ခြင်း!
၇ မိမိ၏ဝိညာဉ်ရေးလိုအပ်ရာကို အသိအမှတ်ပြုလျက် ၁၃ နှစ်အရွယ် နီကိုးလ်သည် သမ္မာကျမ်းစာကို နေ့စဉ် စတင်၍ဖတ်ရှုခဲ့၏။ * ယခု အသက် ၁၆ နှစ်အရွယ်တွင် သူသည် ကျမ်းစာတစ်အုပ်လုံးကို တစ်ကြိမ်ဖတ်ပြီးသွား၍ ဒုတိယအကြိမ်ဖတ်ရှုရာတွင် တစ်ဝက်ခန့်ရှိပြီ။ သူ၏လုပ်ကိုင်နည်းမှာရိုးရိုးလေးပင်။ “ကျွန်မ တစ်နေ့ကိုအနည်းဆုံး တစ်ခန်းဖတ်ပြီးဖို့ စိတ်ပိုင်းဖြတ်ထားတယ်” ဟုသူပြောပြသည်။ နေ့စဉ်ကျမ်းစာဖတ်ရှုခြင်းက သူ့အတွက်မည်သို့အထောက်အကူဖြစ်သနည်း။ ဤသို့သူဖြေဆိုသည်– “အခု မကောင်းတဲ့သြဇာတွေ များတယ်။ ကျောင်းမှာရော၊ အခြားနေရာတွေမှာပါ ကျွန်မရဲ့ယုံကြည်ခြင်းကို စိန်ခေါ်ချက်ဖြစ်စေတဲ့ ဖိစီးမှုတွေ နေ့တိုင်းရင်ဆိုင်ရတယ်။ အဲ့ဒီဖိစီးမှုတွေကိုတွန်းလှန်စေတဲ့ ကျမ်းစာမိန့်မှာချက်တွေနဲ့ မူတွေကို ကျမ်းစာ နေ့တိုင်းဖတ်တဲ့အတွက် ချက်ချင်းမှတ်မိစေတယ်။ အကျိုးကတော့ ယေဟောဝါ၊ ယေရှုတို့နဲ့ ကျွန်မပိုပိုပြီးရင်းနှီးလာတယ်လို့ခံစားရတယ်။”
၈။ တရားဇရပ်နှင့်ပတ်သက်၍ ယေရှု၏အလေ့အထကား အဘယ်နည်း၊ ကိုယ်တော့်ကို လူငယ်များ မည်သို့တုပနိုင်ကြသနည်း။
၈ ယေရှုသည် တရားဇရပ်တွင် သမ္မာကျမ်းစာဖတ်ရှုခြင်းနှင့် နားထောင်ခြင်း အလေ့အထရှိခဲ့၏။ (လုကာ ၄:၁၆; တမန်တော် ၁၅:၂၁) ကျမ်းစာဖတ်ရှုလေ့လာသည့် ခရစ်ယာန်အစည်းအဝေးများကို မှန်မှန်တက်ရောက်ခြင်းဖြင့် ထိုစံနမူနာကို လူငယ်တို့ လိုက်လျှောက်ခြင်းက မည်မျှကောင်းလေစွတကား! ထိုအစည်းအဝေးများကို တန်ဖိုးထားလေးမြတ်သော ၁၄ နှစ်အရွယ် ရစ်ချက်ဒ်က ဤသို့ပြောဆိုသည်– “အစည်းအဝေးတွေဟာ ကျွန်တော့်အတွက် သိပ်တန်ဖိုးရှိတယ်။ အဲဒီမှာ ဘယ်အရာက ကောင်းတယ်၊ ဘယ်အရာမကောင်းဘူး၊ ကျင့်ဝတ်နဲ့ ဘယ်အရာညီတယ် မညီဘူး၊ ဘာက ခရစ်တော်ကဲ့သို့ဖြစ်တယ်၊ မဖြစ်ဘူး ဆိုတာတွေကို ကျွန်တော်အမြဲပဲ သတိပေးခံရတယ်။ ကိုယ်တိုင်ခက်ခက်ခဲခဲတွေ့ကြုံခံစားရပြီးမှ တတ်သိလာရစရာမလိုဘူး။” မှန်ပါ၏၊ “ယေဟောဝါ၏သတိပေးချက်သည် ယုံကြည်စိတ်ချထိုက်ပြီး အတွေ့အကြုံနည်းသူများကို ဉာဏ်ပညာရှိစေသည်။” (ဆာလံ ၁၉:၇၊ ကဘ) နီကိုးလ်သည်လည်း ပတ်စဉ်အသင်းတော်အစည်းအဝေး ငါးခုစလုံးကို မပျက်မကွက်တက်ရောက်သည်။ ထို့အပြင် စည်းဝေးများအတွက် နှစ်နာရီမှ သုံးနာရီကြာ သူကြိုတင်ပြင်ဆင်တတ်၏။—ဧဖက် ၅:၁၅၊ ၁၆။
၉။ လူငယ်တို့သည် မည်သို့ “ပညာဆက်တိုးပွား” နိုင်သနည်း။
၉ ငယ်ရွယ်ချိန်သည် ‘မှန်သောဘုရားသခင်တစ်ဆူတည်းနှင့် စေလွှတ်တော်မူသော ယေရှုခရစ်၏အသိပညာကို’ ဆည်းပူးရန်အချိန်ကောင်းဖြစ်၏။ (ယောဟန် ၁၇:၃) ကာတွန်းစာအုပ်များဖတ်ရှုခြင်း၊ ရုပ်မြင်သံကြားကြည့်ရှုခြင်း၊ ဗီဒီယိုဂိမ်းကစားခြင်း သို့မဟုတ် အင်တာနက်ကိုစူးစမ်းခြင်းတို့ဖြင့် အချိန်ဖြုန်းတတ်သည့် လူငယ်တို့ကို သင်သိကောင်းသိပေမည်။ ကျွန်ုပ်တို့ခေါင်းဆောင်၏ စုံလင်သောစံနမူနာကို သင်လိုက်လျှောက်နိုင်လျက်နှင့် သူတို့ကို အဘယ်ကြောင့်တုပကြရမည်နည်း။ ကိုယ်တော်သည် သူငယ်ဘဝကတည်းက ယေဟောဝါအကြောင်းသင်ယူခြင်းမှ ပျော်ရွှင်မှုများစွာရရှိခဲ့သည်။ ရလဒ်ကား အဘယ်နည်း။ ဝိညာဉ်ရေးရာများကို ကိုယ်တော်မြတ်နိုးသောကြောင့် ‘ယေရှုသည် အစဉ်အတိုင်း ပညာတိုးပွားလျက်ရှိ၏။’ (လုကာ ၂:၅၂) သင်လည်း ထိုသို့ဖြစ်နိုင်သည်။
‘အချင်းချင်း ကိုယ်ကိုနှိမ့်ချလျက်နေကြလော့’
၁၀။ မိသားစုဘဝကို ငြိမ်သက်မှုနှင့် ပျော်ရွှင်မှု၏ရင်းမြစ်ဖြစ်စေရန် အဘယ်အရာက ကူညီပေးလိမ့်မည်နည်း။
၁၀ အိမ်တစ်အိမ်သည် ငြိမ်သက်လုံခြုံ၍ ရောင့်ရဲတင်းတိမ်ရာနေရာဖြစ်နိုင်၏၊ သို့မဟုတ် ခိုက်ရန်ဒေါသနှင့် ငြင်းခုံရာစစ်တလင်းလည်းဖြစ်နိုင်သည်။ (သု. ၂၁:၁၉; ၂၆:၂၁) ခရစ်တော်၏ခေါင်းဆောင်မှုကို ကျွန်ုပ်တို့လက်ခံခြင်းက မိသားစုတွင် ငြိမ်သက်မှုနှင့် ပျော်ရွှင်မှုကိုဖြစ်ပွားစေ၏။ အမှန်မှာ ယေရှု၏ပုံသက်သေသည် မိသားစုဆက်ဆံရေးအတွက် စံနမူနာဖြစ်သည်။ သမ္မာကျမ်းစာက ဤသို့ဆိုသည်– “ခရစ်တော်ကိုခန့်ညားသောအားဖြင့်၊ အချင်းချင်းတစ်ယောက်အောက်တစ်ယောက် ကိုယ်ကိုနှိမ့်ချလျက်နေကြလော့။ အချင်းမိန်းမတို့ သခင်ဘုရား၏အုပ်စိုးတော်မူခြင်းကိုဝန်ခံသကဲ့သို့၊ ကိုယ်ခင်ပွန်း၏အုပ်စိုးခြင်းကို ဝန်ခံကြလော့။ အကြောင်းမူကား၊ ခရစ်တော်သည် အသင်းတော်၏အပေါ်မှာ ခေါင်းဖြစ်တော်မူသကဲ့သို့၊ ယောက်ျားသည် မိမိခင်ပွန်း၏အပေါ်မှာ ခေါင်းဖြစ်၏။ ခရစ်တော်သည်လည်း မိမိကိုယ်ကို ကယ်တင်သောသူဖြစ်တော်မူ၏။ . . . အချင်းယောက်ျားတို့၊ ခရစ်တော်သည် အသင်းတော်ကိုချစ်တော်မူသကဲ့သို့၊ သင်တို့လည်း ကိုယ်ခင်ပွန်းကိုချစ်ကြလော့။” (ဧဖက် ၅:၂၁-၂၅) ကောလောသဲအသင်းတော်ထံ တမန်တော်ပေါလုက ဤသို့ရေးသားခဲ့သည်– “သားသမီးတို့၊ မိဘစကားကို အရာရာ၌နားထောင်ကြလော့။ မိဘစကားကိုနားထောင်ခြင်းအမှုသည် သခင်ဘုရားနှစ်သက်တော်မူသောအမှုဖြစ်၏။”—ကောလောသဲ ၃:၁၈-၂၀။
၁၁။ ခရစ်တော်၏ခေါင်းဆောင်မှုသည် သူ့အတွက် အမှန်တကယ်ဖြစ်ကြောင်း ခင်ပွန်းတစ်ဦး မည်သို့ပြသနိုင်သနည်း။
၁၁ ဤဆုံးမစကားကို လိုက်နာလျှင် ခင်ပွန်းသည် မိသားစုတွင်ဦးစီးလိမ့်မည်၊ သူ၏ဇနီးသည် သူ့အား သစ္စာရှိရှိထောက်မပေးမည်၊ သားသမီးများကလည်း မိဘစကားကိုနားထောင်လိမ့်မည်။ သို့သော် ယောက်ျားသည် လျောက်ပတ်စွာဦးစီးမှသာလျှင် ပျော်ရွှင်မှုရရှိစေမည်။ ပညာရှိသောခင်ပွန်းသည် သူ၏ဦးခေါင်းနှင့် ခေါင်းဆောင်ဖြစ်သူ ခရစ်တော်ယေရှုကို တုပခြင်းအားဖြင့် မည်သို့ဦးစီးရမည်ကို သင်ယူရမည်။ (၁ ကောရိန္သု ၁၁:၃) ယေရှုသည် နောက်ပိုင်းတွင် ‘အသင်းတော်၏အချုပ်အခြာဦးခေါင်း’ ဖြစ်လာသော်လည်း ကိုယ်တော်သည် ကမ္ဘာမြေပေါ်သို့ “စေစားခြင်းငှာမလာ၊ သူတစ်ပါးအစေကိုခံခြင်းငှာ” ကြွလာတော်မူခဲ့သည်။ (ဧဖက် ၁:၂၂; မဿဲ ၂၀:၂၈၊ သမ္မာ) အလားတူ ခရစ်ယာန်ခင်ပွန်းတစ်ဦးသည် မိမိ၏ဦးခေါင်းဖြစ်မှုကို ကိုယ်ကျိုးစီးပွားအတွက်မဟုတ်ဘဲ ဇနီးသည်နှင့် သားသမီးများဖြစ်သည့် မိသားစုတစ်ရပ်လုံး၏အကျိုးစီးပွားကို ဂရုစိုက် ကျင့်သုံးရ၏။ (၁ ကောရိန္သု ၁၃:၄၊ ၅) သူသည် သူ၏ဦးခေါင်း၊ ယေရှုခရစ်၏ ဘုရားသခင့်ရေးရာအရည်အသွေးများကို ကြိုးစားတုပရသည်။ ယေရှုနည်းတူ သူသည် နူးညံ့သိမ်မွေ့ နှိမ့်ချသောသဘောရှိ၏။ (မဿဲ ၁၁:၂၈-၃၀) “တောင်းပန်ပါတယ်” သို့မဟုတ် “မင်းမှန်တယ်” စသည့်စကားများကို သူမှားသွားသောအခါပြောဆိုရန် ဝန်မလေးပါ။ သူ၏စံနမူနာကောင်းက ဇနီးအတွက် “အထောက်အမ၊” “ဖြည့်ဖက်၊” နှင့် “အဆွေခင်ပွန်း” တစ်ဦးဖြစ်ရန်လွယ်ကူစေပြီး သူ့ထံမှသင်ယူကာ သူနှင့်အတူ တွဲဖက်လုပ်ဆောင်စေ၏။—ကမ္ဘာဦး ၂:၂၀; မာလခိ ၂:၁၄။
၁၂။ ဦးစီးမှုမူဝါဒကို ဇနီးတစ်ဦးလိုက်နာနိုင်ရန် အဘယ်အရာက အကူအညီဖြစ်စေမည်နည်း။
၁၂ ဇနီးသည်အနေဖြင့်လည်း မိမိ၏ခင်ပွန်းကို လက်အောက်ခံရမည်ဖြစ်သည်။ သို့သော် ဇနီးသည် လောကစိတ်ဝိညာဉ်၏လွှမ်းမိုးမှုခံရမည်ဆိုလျှင် ဦးစီးမှုမူဝါဒအပေါ်ရှုမြင်ပုံ စတင်တိမ်းစောင်းလာမည်ဖြစ်ပြီး ယောက်ျားတစ်ဦး၏ လက်အောက်ခံဖြစ်ရခြင်းကို သူနှစ်သက်မည်မဟုတ်ချေ။ သမ္မာကျမ်းစာက ယောက်ျားတစ်ဦးအား ပိုင်စိုးပိုင်နင်းပြုရမည်ဟု မဆိုပါ၊ သို့သော် ဇနီးသည်များသည် မိမိတို့၏ခင်ပွန်းများကို လက်အောက်ခံရမည်ဟုဆိုသည်။ (ဧဖက် ၅:၂၄) သမ္မာကျမ်းစာက ခင်ပွန်း သို့မဟုတ် ဖခင်အား တာဝန်ခံလည်းဖြစ်စေသည်၊ ကျမ်းစာ၏ဆုံးမစကားကို လိုက်နာကျင့်သုံးသောအခါ မိသားစုတွင် ငြိမ်သက်ခြင်းနှင့် စည်းစနစ်ကျနမှုရှိစေ၏။—ဖိလိပ္ပိ ၂:၅။
၁၃။ ကလေးများအတွက် အဘယ်လက်အောက်ခံမှုပုံသက်သေကို ယေရှုချမှတ်ခဲ့သနည်း။
၁၃ မိဘစကားကို သားသမီးများ နားထောင်ကြရမည်ဖြစ်သည်။ ယင်းနှင့်စပ်လျဉ်း၍ ယေရှုသည် အထူးကောင်းမွန်သောစံနမူနာတစ်ရပ် ချမှတ်ပေးခဲ့၏။ အသက် ၁၂ နှစ်တွင် ဝတ်ပြုရာအိမ်တော်၌ သုံးရက်ကျန်ရစ်ခဲ့သည့်ဖြစ်ရပ်နောက်ပိုင်းတွင် သူသည် “မိဘတို့နှင့်အတူသွားသဖြင့် နာဇရက်မြို့သို့ရောက်၍ သူတို့စကားကိုနားထောင်လျက်နေလေ၏။” (လုကာ ၂:၅၁) မိဘအား သားသမီးများ လက်အောက်ခံခြင်းက မိသားစုငြိမ်သက်မှုနှင့် ညီညွတ်မှုတိုးပွားစေသည်။ ခရစ်တော်၏ခေါင်းဆောင်မှုကို မိသားစုတစ်စုလုံး လက်အောက်ခံကြသောအခါ ပျော်ရွှင်သောမိသားစုဖြစ်လာသည်။
၁၄၊ ၁၅။ အိမ်တွင် အခက်အခဲတစ်ခု ကြုံတွေ့နေလျှင် ၎င်းကိုအောင်မြင်စွာကိုင်တွယ်ဖြေရှင်းရန် အဘယ်အရာက ကျွန်ုပ်တို့ကိုကူညီပေးမည်နည်း။ ဥပမာပေးပါ။
၁၄ နေအိမ်တွင် ခက်ခဲသောအခြေအနေများ ပေါ်ပေါက်လာသည့်တိုင် အောင်မြင်မှု၏သော့ချက်မှာ ယေရှုကိုတုပခြင်းနှင့် ကိုယ်တော်၏လမ်းညွှန်မှုကို လက်ခံခြင်းဖြစ်သည်။ ဥပမာ၊ ဆယ်ကျော်သက်သမီးတစ်ဦးရှိသူ လာနာကို အသက် ၃၅ နှစ်အရွယ် ဂျယ်ရီလက်ထပ်ပြီးနောက် သူတို့နှစ်ဦးစလုံး မမျှော်လင့်သော ပြဿနာတစ်ခုဖြစ်ပေါ်ခဲ့၏။ ဂျယ်ရီက ဤသို့ရှင်းပြသည်– “ဦးဆောင်သူကောင်းတစ်ဦးဖြစ်ဖို့ အောင်မြင်တဲ့တခြားမိသားစုတွေလိုပဲ ထပ်တူကျမ်းစာမူတွေကို ကျင့်သုံးဖို့လိုတယ်ဆိုတာ ကျွန်တော်သိထားပါတယ်။ ဒါပေမဲ့ အဲ့ဒီမူတွေကို ဉာဏ်ပညာနဲ့ ပိုင်းခြားသိမြင်မှုရှိရှိ ကျင့်သုံးဖို့လိုတယ်ဆိုတာကို ကျွန်တော် မကြာမီမှာနားလည်လာတယ်။” သူ၏မယားပါသမီးသည် သူ့ကို မိမိနှင့် မိမိ၏မိခင်စပ်ကြား သွေးကွဲစေသူအဖြစ်ယူမှတ်ထားရာ သူ့အား အကြီးအကျယ်စိတ်ခုခဲ့သည်။ ထိုသူငယ်မ၏ပြောဆိုလုပ်ကိုင်ပုံက ဤသဘောထား လွှမ်းမိုးနေကြောင်းကို သိရှိနားလည်ဖို့ ဂျယ်ရီမှာ ပိုင်းခြားသိမြင်မှု လိုအပ်ခဲ့၏။ ထိုအခြေအနေကို သူမည်သို့ကိုင်တွယ်ခဲ့သနည်း။ ဂျယ်ရီက ဤသို့ဖြေသည်– “အနည်းဆုံးအခုတလောမှာတော့ မိဘဝတ်ကျေပွန်ခြင်းရဲ့ ဆုံးမပဲ့ပြင်မှုအပိုင်းကို လာနာပဲ ဆောင်ရွက်သင့်တယ်လို့ လာနာနဲ့ ကျွန်တော်သဘောတူခဲ့ကြတယ်။ ကျွန်တော်ကျတော့ ကျွန်တော့်မယားပါသမီးနဲ့ ဆက်ဆံရေးကောင်းလာဖို့ အာရုံစိုက်ကြိုးစားရဦးမယ်။ အချိန်အတန်ကြာတော့ အဲဒီလိုချဉ်းကပ်ကိုင်တွယ်ပုံကနေ ရလဒ်ကောင်းတွေရလာခဲ့ပါတယ်။”
၁၅ အိမ်တွင် ခဲယဉ်းသောအခြေအနေများ ပေါ်လာလျှင် မိသားစုမှ အချို့သူတို့သည် သူတို့ပြောဆိုပြုမူသည့်အတိုင်း အဘယ်ကြောင့် ပြုရကြောင်းအဖြေရရန် ပိုင်းခြားသိမြင်မှုကို အသုံးချဖို့လိုမည်။ ဘုရားသခင့်မူများကို သင့်လျော်စွာ ကျင့်သုံးရန် ဉာဏ်ပညာလည်းလိုပေမည်။ ဥပမာ၊ သွေးသွန်နာစွဲသောအမျိုးသမီးတစ်ဦးသည် မိမိအား အဘယ်ကြောင့်တို့ထိရကြောင်းကို ယေရှုရှင်းရှင်းသဘောပေါက်ခဲ့၍ ထိုအမျိုးသမီးနှင့် ပညာရှိရှိ ထောက်ထားစာနာစွာ ဆက်ဆံတော်မူခဲ့၏။ (ဝတ်ပြုရာ ၁၅:၂၅-၂၇; မာကု ၅:၃၀-၃၄) ဉာဏ်ပညာနှင့် ပိုင်းခြားသိမြင်မှုသည် ကျွန်ုပ်တို့ခေါင်းဆောင်၏ ထူးခြားသောဂုဏ်ရည်တော်များဖြစ်သည်။ (သု. ၈:၁၂) ကိုယ်တော့်နည်းတူ ကျွန်ုပ်တို့ပြုမူလျှင် ပျော်ရွှင်ကြပါလိမ့်မည်။
‘နိုင်ငံတော်ကို ဆက်၍ရှေးဦးရှာကြလော့’
၁၆။ ကျွန်ုပ်တို့၏ဘဝတွင် အဘယ်အရာသည် အဓိကကျသင့်သနည်း၊ ယေရှုသည် ယင်းကို စံနမူနာဖြင့် မည်သို့ဖော်ပြခဲ့သနည်း။
၁၆ ကိုယ်တော်၏ခေါင်းဆောင်မှုကို လက်ခံသူတို့၏ဘဝ၌ အဘယ်အရာ အဓိကကျသင့်ကြောင်း ယေရှု အထင်အရှားဖော်ပြခဲ့သည်။ ကိုယ်တော် ဤသို့မိန့်တော်မူ၏– “ဘုရားသခင်၏ နိုင်ငံတော်နှင့်ဖြောင့်မတ်ခြင်းတရားတော်ကို ရှေးဦးစွာရှာကြလော့။”(မဿဲ ၆:၃၃) ယင်းကို မည်သို့ပြုလုပ်နိုင်ကြောင်း ကိုယ်တော်၏စံနမူနာအားဖြင့် ဖော်ပြတော်မူခဲ့၏။ ယေရှုနှစ်ခြင်းခံပြီးနောက် ရက်ပေါင်း ၄၀ အစာရှောင်ခြင်း၊ ပြန်ပြောင်းစဉ်းစားခြင်း၊ ဆုတောင်းခြင်းကာလအဆုံးတွင် ကိုယ်တော်သည် သွေးဆောင်ခံခဲ့ရ၏။ စာတန်သည် ကိုယ်တော့်အား “ဤလောက၌ရှိသမျှသော တိုင်းနိုင်ငံတို့ကို” အုပ်စိုးခြင်းအခွင့် ကမ်းလှမ်းခဲ့သည်။ စာတန်၏ကမ်းလှမ်းမှုကို ကိုယ်တော်လက်ခံခဲ့ပါက ယေရှုရရှိနိုင်မည့်ဘဝကို စဉ်းစားကြည့်ပါ! သို့သော် ခရစ်တော်သည် ခမည်းတော်၏အလိုတော်ဆောင်ခြင်းကို အာရုံစိုက်တော်မူခဲ့သည်။ ထို့ပြင် စာတန့်လောက၌ ထိုသို့သောဘဝအသက်တာသည် တိုတောင်းလိမ့်မည်ကို ကိုယ်တော်သိတော်မူ၏။ ထိုအခါ ဤသို့မိန့်မြွက်၍ စာတန်၏ကမ်းလှမ်းမှုကို ကိုယ်တော်ချက်ချင်းငြင်းပယ်ခဲ့သည်– “သင်၏ဘုရားသခင်ထာဝရဘုရားကို ကိုးကွယ်ရမည်။ ထိုဘုရားသခင်ကိုသာ ဝတ်ပြုရမည် ကျမ်းစာလာသည်။” ထို့နောက် များမကြာမီ ယေရှုသည် “ ‘နောင်တရကြလော့။ ကောင်းကင်နိုင်ငံတော်သည် တည်လုနီးပြီ’ ဟူသောတရားကို ဟောစပြုတော်မူ၏။” (မဿဲ ၄:၂၊ ၈-၁၀၊ ၁၇) ထိုအချိန်မှစ၍ ခရစ်တော်၏မြေကြီးအသက်တာဘဝတစ်လျှောက်တွင် ဘုရားသခင်နိုင်ငံတော်ကို အချိန်ပြည့်ကြွေးကြော်သူတစ်ဦး ဖြစ်လာလေသည်။
၁၇။ ဘုရားသခင့်နိုင်ငံတော်အကျိုးစီးပွားကို ကျွန်ုပ်တို့ဘဝ၌ဦးစားပေးကြောင်း မည်သို့ဖော်ပြနိုင်ကြသနည်း။
၁၇ ကျွန်ုပ်တို့၏ခေါင်းဆောင်ကို ကျွန်ုပ်တို့အတုယူကာ ကျွန်ုပ်တို့၏ဘဝတွင် လစာမြင့်သည့်လုပ်ငန်းတစ်ခုကို အဓိကထားရန် စာတန့်လောက၏သွေးဆောင်မှုကိုမခံသင့်ချေ။ (မာကု ၁:၁၇-၂၁) လောကရေးရာများတွင် ကျော့မိလုံးပန်းနေလွန်း၍ ဘုရားသခင့်နိုင်ငံတော်အကျိုးစီးပွားကို ဒုတိယနေရာထားခြင်းက မည်မျှမိုက်မဲလိုက်လေခြင်း! ဘုရားသခင့်နိုင်ငံတော်သတင်းကောင်းဟောပြောခြင်းနှင့် တပည့်ဖြစ်စေခြင်းလုပ်ငန်းကို ကျွန်ုပ်တို့အား ယေရှုပေးအပ်ထားသည်။ (မဿဲ ၂၄:၁၄; ၂၈:၁၉၊ ၂၀) ကျွန်ုပ်တို့မှာ မိသားစု သို့မဟုတ် ဆောင်ရွက်စရာအခြားတာဝန်များ ရှိပေမည်၊ သို့သော် ဟောပြောသွန်သင်ခြင်း ခရစ်ယာန်တာဝန်ကို ညနေပိုင်းတွင်၊ သို့မဟုတ် ရက်သတ္တပတ်အဆုံးပိုင်းတွင် ပြုလုပ်ဆောင်ရွက်ရန် ကျွန်ုပ်တို့ဝမ်းမမြောက်ကြပေလော။ ၂၀၀၁ လုပ်ငန်းတော်နှစ်အတွင်း ၇၈၀,၀၀၀ ခန့်သည် အချိန်ပြည့်အမှုတော်ဆောင်များ သို့မဟုတ် ရှေ့ဆောင်များအဖြစ် အမှုထမ်းဆောင်နိုင်ခဲ့ခြင်းက မည်မျှအားရှိစရာပါတကား!
၁၈။ ခရစ်ယာန်ဓမ္မအမှုတွင် အဘယ်အရာက ကျွန်ုပ်တို့အား ပျော်ရွှင်မှုရရှိစေသနည်း။
၁၈ ခရစ်ဝင်မှတ်တမ်းများက ယေရှုအား လက်တွေ့သမားအဖြစ်ပုံဖော်ရုံမက နူးညံ့သိမ်မွေ့သော ခံစားချက်ရှိပုဂ္ဂိုလ်တစ်ဦးအဖြစ်လည်း ပုံဖော်ထားသည်။ ကိုယ်တော့်ဝန်းကျင်ရှိ ဝိညာဉ်ရေးလိုအပ်နေသူများကို ကိုယ်တော်တွေ့မြင်သောအခါ ကိုယ်တော်သည် သူတို့ကိုသနားတော်မူပြီး စိတ်အားထက်သန်စွာ ကူညီပေးတော်မူခဲ့၏။ (မာကု ၆:၃၁-၃၄) အခြားသူတို့ကိုချစ်သောမေတ္တာရှိ၍ သူတို့အား အမှန်တကယ်ကူညီလိုစိတ်ဖြင့် ခရစ်ယာန်ဓမ္မအမှုကို ကျွန်ုပ်တို့ဆောင်ရွက်ကြသောအခါ အမှုတော်ဆောင်ခြင်းသည် ပျော်ရွှင်ဖွယ်ရာဖြစ်လာလေသည်။ သို့သော် ထိုစိတ်ဆန္ဒကို ကျွန်ုပ်တို့ မည်သို့ရရှိနိုင်မည်နည်း။ ဂျေဆင်အမည်ရှိလူငယ်တစ်ဦးက “ကျွန်တော်ဆယ်ကျော်သက်အရွယ်မှာ ခရစ်ယာန်ဓမ္မအမှုဆောင်ရတာ မပျော်ခဲ့ဘူး” ဟုပြောပြသည်။ အဘယ်အရာက သူ့အား ဤလုပ်ငန်းကိုမြတ်နိုးတတ်လာစေခဲ့သနည်း။ ဂျေဆင်က ဤသို့အဖြေပေးသည်– “ကျွန်တော်တို့မိသားစုဟာ စနေနေ့နံနက်တိုင်း လယ်ကွင်းလုပ်ငန်းမှာပါဝင်ကြရတယ်။ ဒါက ကျွန်တော့်အတွက်အကျိုးဖြစ်ခဲ့တယ်၊ အကြောင်းကတော့ အမှုဆောင်ထွက်လေလေ ဖြစ်မြောက်အောင်မြင်မှုတွေကို တွေ့မြင်လေလေ ကျွန်တော်ပျော်ရွှင်မှုပိုရလာလေလေပဲ။” ကျွန်ုပ်တို့လည်း ခရစ်ယာန်ဓမ္မအမှုတွင် ဇွဲလုံ့လရှိရှိ ပုံမှန်ပါဝင်သင့်သည်။
၁၉။ ခရစ်တော်၏ခေါင်းဆောင်မှုနှင့်ပတ်သက်၍ အဘယ်သန္နိဋ္ဌာန်ကို ကျွန်ုပ်တို့ချသင့်သနည်း။
၁၉ ခရစ်တော်၏ခေါင်းဆောင်မှုကို လက်ခံခြင်းသည် အမှန်ပင် လန်းဆန်းမှုနှင့် အကျိုးရရှိစေ၏။ ထိုသို့လက်ခံကြသောအခါ လူငယ်ဘဝသည် အသိဉာဏ်ပညာ တိုးပွားများပြားလာသည့်အချိန် ဖြစ်လာစေသည်။ မိသားစုဘဝတွင် ငြိမ်သက်မှုနှင့် ပျော်ရွှင်မှုရှိပြီး ခရစ်ယာန်ဓမ္မအမှုမှလည်း ရွှင်လန်းမှုနှင့် စိတ်ကျေနပ်မှုရရှိလာ၏။ သို့ဖြစ်၍ ကျွန်ုပ်တို့၏နေ့စဉ်ဘဝအသက်တာနှင့် ကျွန်ုပ်တို့ချသောဆုံးဖြတ်ချက်များတွင် ခရစ်တော်၏ခေါင်းဆောင်မှုကို ကျွန်ုပ်တို့အမှန်တကယ် တန်ဖိုးထားလေးမြတ်ကြောင်းဖော်ပြရန် သန္နိဋ္ဌာန်ချကြစို့လေ။ (ကောလောသဲ ၃:၂၃၊ ၂၄) သို့သော် ယေရှုခရစ်သည် အခြားလမ်းကြောင်းတစ်ခုဖြစ်သည့် ခရစ်ယာန်အသင်းတော်မှတစ်ဆင့် ခေါင်းဆောင်မှုကိုပေးတော်မူသည်။ ဤပြင်ဆင်ပေးချက်မှ ကျွန်ုပ်တို့ အဘယ်အကျိုးကျေးဇူးရနိုင်ကြောင်း နောက်ဆောင်းပါးတွင် ဆွေးနွေးကြမည်။
[အောက်ခြေမှတ်ချက်]
^ အပိုဒ်၊ 7 အမည်အချို့ကို ပြောင်းလဲထားပါသည်။
သင်မှတ်မိသလော
• ဘုရားသခင်ခန့်အပ်ထားသော ခေါင်းဆောင်နောက်လိုက်ခြင်းက ကျွန်ုပ်တို့ကို မည်သို့အကျိုးပေးသနည်း။
• ယေရှု၏ခေါင်းဆောင်မှုကို လိုက်လိုကြောင်း လူငယ်များ မည်သို့ဖော်ပြနိုင်သနည်း။
• ခရစ်တော်၏ခေါင်းဆောင်မှုကို လက်အောက်ခံသောမိသားစုအပေါ် ယင်းက အဘယ်အကျိုးသက်ရောက်စေသနည်း။
• ခရစ်တော်၏ခေါင်းဆောင်မှုသည် ကျွန်ုပ်တို့အတွက် အမှန်တကယ်ဖြစ်ကြောင်း ကျွန်ုပ်တို့၏ခရစ်ယာန်ဓမ္မအမှုသည် မည်သို့ဖော်ပြနိုင်သနည်း။
[လေ့လာရန်မေးခွန်းများ]
[စာမျက်နှာ ၉ ပါ ရုပ်ပုံ]
လူငယ့်ဘဝသည် ဘုရားသခင်နှင့် ကိုယ်တော်ခန့်အပ်ထားတော်မူသော ခေါင်းဆောင်အကြောင်း အသိပညာတိုးပွားစေရန် အချိန်ကောင်းဖြစ်
[စာမျက်နှာ ၁၀ ပါ ရုပ်ပုံ]
ခရစ်တော်၏ခေါင်းဆောင်မှုကို လက်အောက်ခံခြင်းက မိသားစုပျော်ရွှင်မှု တိုးပွားစေ
[စာမျက်နှာ ၁၂ ပါ ရုပ်ပုံ]
ယေရှုသည် ဘုရားသခင့်နိုင်ငံတော်ကို ရှေးဦးထားခဲ့သည်။ အသင်ကော