တည်ကြည်သောနှလုံးဖြင့် ယေဟောဝါအား ဆက်၍ဝတ်ပြုကိုးကွယ်လော့
တည်ကြည်သောနှလုံးဖြင့် ယေဟောဝါအား ဆက်၍ဝတ်ပြုကိုးကွယ်လော့
“အိုဘုရားသခင် အကျွန်ုပ်နှလုံးသည် တည်ကြည်ပါ၏။ အကျွန်ုပ်နှလုံးသည် တည်ကြည်ပါ၏။”—ဆာလံ ၅၇:၇။
၁။ ကျွန်ုပ်တို့တွင်ဒါဝိဒ်ကဲ့သို့သောယုံကြည်စိတ်ချမှုအဘယ်ကြောင့်ရှိနိုင်သနည်း။
ယေဟောဝါသည် ကျွန်ုပ်တို့ကို ကိုယ်တော့်ဆက်ကပ်အပ်နှံကျေးကျွန်များအဖြစ် စစ်မှန်သော ခရစ်ယာန်အယူဝါဒကို စွဲမြဲစွာဆုပ်ကိုင်ထားရန် ခရစ်ယာန်ယုံကြည်ခြင်းတွင် တည်ကြည်ဖို့ လုပ်ဆောင်ပေးနိုင်တော်မူ၏။ (ရောမ ၁၄:၄) ထို့ကြောင့် “အိုဘုရားသခင် အကျွန်ုပ်နှလုံးသည် တည်ကြည်ပါ၏” ဟုသီဆိုရန် လှုံ့ဆော်ခံခဲ့ရသူ ဆာလံဆရာဒါဝိဒ်ကဲ့သို့သော ယုံကြည်စိတ်ချမှု ကျွန်ုပ်တို့တွင်ရှိနိုင်သည်။ (ဆာလံ ၁၀၈:၁) ကျွန်ုပ်တို့၏နှလုံး တည်ကြည်မည်ဆိုလျှင် ဘုရားသခင်ထံ ကျွန်ုပ်တို့၏ဆက်ကပ်အပ်နှံမှုအတိုင်း အောင်မြင်စွာဆောင်ရွက်ရန် လှုံ့ဆော်ခံရကြမည်။ ထို့ပြင် လမ်းညွှန်မှုနှင့် ခွန်အားရရှိရန် ကိုယ်တော်ကိုမှီခိုအားထားခြင်းဖြင့် ကျွန်ုပ်တို့သည် ‘သခင်ဘုရား၏အမှုတော်၌ လုပ်ကိုင်စရာများစွာ’ ရှိသည့် တည်ကြည်ဖြောင့်မတ်သူများအနေနှင့် မတိမ်းယိမ်းဘဲ မြဲမြံသောစိတ်ပိုင်းဖြတ်မှုနှင့် ယုံကြည်စိတ်ချမှုရှိနိုင်ကြမည်။—၁ ကောရိန္သု ၁၅:၅၈။
၂၊ ၃။ ၁ ကောရိန္သု ၁၆:၁၃ တွင်မှတ်တမ်းတင်ထားသော ပေါလု၏တိုက်တွန်းချက်များ ဆိုလိုရင်းကား အဘယ်နည်း။
၂ ရှေးကောရိန္သုမြို့ရှိ ယေရှု၏တပည့်နောက်လိုက်များကို ရည်ညွှန်းရေးသားခြင်းဖြစ်သော်လည်း မျက်မှောက်ခေတ်ခရစ်ယာန်များနှင့်ပါ အမှန်သက်ဆိုင်သည့် တိုက်တွန်းချက်များတွင် တမန်တော်ပေါလု ဤသို့ဆို၏– “သတိနှင့်စောင့်နေကြလော့။ ယုံကြည်ခြင်း၌တည်ကြလော့။ ယောက်ျားအစွမ်းသတ္တိနှင့်တကွ ခွန်အားစုံလင်လျက်နေကြလော့။” (၁ ကောရိန္သု ၁၆:၁၃) ဂရိစကားတွင် ဤမိန့်ဆိုချက်တစ်ခုစီသည် ပစ္စုပ္ပန်ကာလပြ ကြိယာသဏ္ဌာန်ဖြစ်ရကား ဆက်လုပ်ဆောင်ရန် တိုက်တွန်းပေးသည်။ ဤဆုံးမစကား၏ ဆိုလိုရင်းကား အဘယ်နည်း။
၃ ကျွန်ုပ်တို့သည် စာတန်ကိုဆီးတားပြီး ဘုရားသခင်နှင့် နီးကပ်စွာနေခြင်းအားဖြင့် ဝိညာဉ်ရေးအရ “သတိနှင့်စောင့်နေ” နိုင်ကြသည်။ (ယာကုပ် ၄:၇၊ ၈) ယေဟောဝါအား ယုံကြည်ကိုးစားခြင်းက ကျွန်ုပ်တို့ကို စည်းလုံးစွာဆက်ရှိနေစေပြီး ‘ခရစ်ယာန်ယုံကြည်ခြင်း၌တည်ကြည်’ စေသည်။ ကျွန်ုပ်တို့တွင်ရှိ အမျိုးသမီးများစွာအပါအဝင် “ယောက်ျားအစွမ်းသတ္တိ” နှင့် ဘုရားသခင့်နိုင်ငံတော်ကြွေးကြော်သူများအဖြစ် ဘုရားသခင့်အမှုတော်ကို ရဲရဲရင့်ရင့်ဆောင်ရွက်ကြသည်။ (ဆာလံ ၆၈:၁၁) ဘုရားသခင့်အလိုတော်ဆောင်ရွက်ရန် ကောင်းကင်ခမည်းတော်ထံမှ ခွန်အားရဖို့ အဆက်မပြတ်မျှော်ကိုးခြင်းအားဖြင့် ကျွန်ုပ်တို့သည် “ခွန်အားနှင့်ပြည့်စုံ” ကြ၏။—ဖိလိပ္ပိ ၄:၁၃။
၄။ ခရစ်ယာန်များအဖြစ် ကျွန်ုပ်တို့၏နှစ်ခြင်းခံယူသည့်အဆင့်သို့ အဘယ်ခြေလှမ်းများက ဦးတည်ပေးခဲ့သနည်း။
၄ ကျွန်ုပ်တို့သည် ယေဟောဝါထံ အကြွင်းမဲ့ဆက်ကပ်အပ်နှံမှုပြုပြီး ယင်းကို ရေ၌နှစ်ခြင်းခံခြင်းဖြင့် တင်ပြခဲ့ချိန်တွင် အမှန်တရားဘက် ကျွန်ုပ်တို့ရပ်တည်ခဲ့ကြသည်။ သို့သော် ကျွန်ုပ်တို့နှစ်ခြင်းခံယူသည့်အဆင့်အထိရောက်ဖို့ အဘယ်အရာများ ပြုလုပ်ခဲ့ရသနည်း။ ဦးဆုံး၊ ဘုရားသခင့်နှုတ်မြွက်စကားတော်မှ တိကျမှန်ကန်သော အသိပညာကို ကျွန်ုပ်တို့သင်ယူခဲ့ကြသည်။ (ယောဟန် ၁၇:၃) ယင်းကြောင့် ယုံကြည်ခြင်းတိုးပွားလာပြီး နောင်တရ၍ ယခင်က ပြုမိသောအမှားများအတွက် အမှန်တကယ်ဝမ်းနည်းကြောင်း ဖော်ပြစေခဲ့သည်။ (တမန်တော် ၃:၁၉၊ ၂၀; ဟေဗြဲ ၁၁:၆) ထို့နောက် ကျွန်ုပ်တို့သည် ဘုရားသခင့်အလိုတော်နှင့်အညီ အသက်ရှင်ရန် မှားယွင်းသောအကျင့်များကိုစွန့်လွှတ်ခြင်းဖြင့် ပြုပြင်ပြောင်းလဲလာခဲ့ကြသည်။ (ရောမ ၁၂:၂; ဧဖက် ၄:၂၃၊ ၂၄) ၎င်းမှတစ်ဆင့် ဆုတောင်းခြင်းဖြင့် ယေဟောဝါထံစိတ်နှလုံးအကြွင်းမဲ့ ဆက်ကပ်အပ်နှံခဲ့ကြသည်။ (မဿဲ ၁၆:၂၄; ၁ ပေတရု ၂:၂၁) ထို့နောက် ကောင်းသောသိစိတ်ရှိရန် ဘုရားသခင်ထံ အသနားခံခဲ့ကြပြီး ကိုယ်တော်ထံ ကျွန်ုပ်တို့ကိုယ်ကိုဆက်ကပ်အပ်နှံခြင်း၏ အထိမ်းအမှတ်အဖြစ် နှစ်ခြင်းခံယူခဲ့ကြသည်။ (၁ ပေတရု ၃:၂၁) အဆင့်ဆင့်ပြုလုပ်ဆောင်ရွက်ခဲ့ရသည့် ဤအမှုများကို စိတ်ထဲစွဲမှတ်ထားခြင်းဖြင့် ကျွန်ုပ်တို့၏ဆက်ကပ်အပ်နှံမှုနှင့်အညီ အဆက်မပြတ်ကြိုးစားအားထုတ်ဖို့လိုကြောင်းကို အာရုံစူးစိုက်နေပြီး တည်ကြည်သောနှလုံးဖြင့် ယေဟောဝါအားဆက်၍ဝတ်ပြုကိုးကွယ်ရန် ကျွန်ုပ်တို့အထောက်အကူရပေမည်။
တိကျမှန်ကန်သောအသိပညာကို ဆက်၍ရှာဖွေလော့
၅။ ကျမ်းစာအသိပညာကို ကျွန်ုပ်တို့အဘယ်ကြောင့်ဆက်၍ ဆည်းပူးသင့်သနည်း။
၅ ဘုရားသခင်ထံ ကျွန်ုပ်တို့၏ဆက်ကပ်အပ်နှံမှုနှင့်အညီ အသက်ရှင်နေထိုင်ရန် ယုံကြည်ခြင်းတည်ဆောက်ပေးသော ကျမ်းစာအသိပညာကို ကျွန်ုပ်တို့ဆက်ဆည်းပူးရမည်။ ဘုရားသခင့်အမှန်တရားကို ကျွန်ုပ်တို့ဦးဆုံးစတင်သိလာချိန်တွင် ဝိညာဉ်အစာစားသုံးရခြင်းသည် အမှန်တကယ်ဝမ်းမြောက်စရာဖြစ်ခဲ့သည်! (မဿဲ ၂၄:၄၅-၄၇) ထို “အစားအစာများ” သည် အလွန်အရသာရှိရုံမက ဝိညာဉ်ရေးခွန်အား ဖြည့်တင်းပေးခဲ့သည်။ ယခု ယေဟောဝါ၏ဆက်ကပ်အပ်နှံ ကျေးကျွန်များအဖြစ် တည်ကြည်သောနှလုံးကို ဆက်ထိန်းသိမ်းထားနိုင်ရန် အာဟာရရှိဝိညာဉ်အစာများကို ဆက်သုံးဆောင်ဖို့ အလွန်အရေးကြီးသည်။
၆။ သမ္မာကျမ်းစာအမှန်တရားကို စိတ်ရင်းမှန်ဖြင့်ကျေးဇူးတင်တတ်လာရန် သင်မည်သို့အကူအညီရရှိခဲ့ခြင်းဖြစ်နိုင်သနည်း။
၆ ကျမ်းစာအသိပညာ ထပ်ဆင့်တိုးပွားလာရန် ကြိုးစားအားထုတ်ဖို့လိုသည်။ ဝှက်ထားသောဘဏ္ဍာကို ရှာဖွေသကဲ့သို့ အားစိုက်ထုတ်ရန်လိုသည်။ သို့သော် “ဘုရားသခင်ကိုသိသောဉာဏ်” ဆည်းပူးခြင်းသည် အလွန်အကျိုးရှိသည်! (သု. ၂:၁-၆) ဘုရားသခင့်နိုင်ငံတော်ကြေညာသူတစ်ဦးသည် သင်နှင့် ဦးဆုံးကျမ်းစာသင်အံမှုပြုစဉ် ထာဝရအသက်ရစေသော အသိပညာစာအုပ်ကို သူအသုံးပြုခဲ့ပေမည်။ အခန်းတစ်ခုစီကို တစ်ခါတစ်ရံတစ်ကြိမ်ထက်မက ဆွေးနွေးလေ့လာရန် အချိန်အတော်အတန် ကုန်ခဲ့ပေမည်။ ကိုးကားဖော်ပြထားသော ကျမ်းချက်များကို ဖွင့်ဖတ်ပြီး ဆွေးနွေးခဲ့ခြင်းမှ သင်အကျိုးရရှိခဲ့သည်။ နားလည်ရန်ခက်ခဲသောအချက်တစ်ခု ရှိမည်ဆိုလျှင် ရှင်းပြပေးခဲ့သည်။ သင့်ကိုကျမ်းစာသင်ပေးခဲ့သူသည် ကောင်းစွာပြင်ဆင်ခဲ့၍ ဘုရားသခင့်ဝိညာဉ်တော်ရရှိဖို့ ဆုတောင်းခဲ့ပြီး အမှန်တရားကို အလေးအနက်တန်ဖိုးထားတတ်ရန် သင့်ကိုကူညီပေးခဲ့သည်။
၇။ အခြားသူများအား ဘုရားသခင့်အမှန်တရား သွန်သင်ပေးရန် အဘယ်အရာက လူတစ်ဦးကို အရည်အချင်းရှိစေသနည်း။
၇ ဤသို့ကြိုးစားအားထုတ်ခြင်းသည် သင့်လျော်ပါသည်၊ အကြောင်းမှာ ပေါလုဤသို့ရေးသားခဲ့သည်– “နှုတ်[မြွက်]တရားကိုသင်သောသူသည် သင်ပေးသောသူအား ကောင်းသောအရာရှိသမျှတို့ကိုဝေမျှစေ။” (ဂလာတိ ၆:၆) ဤတွင် ဂရိစာသားက ဘုရားသခင့်နှုတ်မြွက်စကားတော်မှ သွန်သင်ချက်များကို ‘သင်ယူသောသူ’ ၏စိတ်နှလုံးထဲ စွဲမှတ်စေခြင်းကို ညွှန်ပြ၏။ သင်ထိုနည်းအတိုင်းသွန်သင်ခံခဲ့ရခြင်းက အခြားသူများကို ထပ်ဆင့်သွန်သင်ပေးရန် သင့်အား အရည်အချင်းရှိစေသည်။ (တမန်တော် ၁၈:၂၅) သင့်ဆက်ကပ်အပ်နှံခြင်းနှင့်အညီ အသက်ရှင်နေထိုင်ရန် ဘုရားသခင့်နှုတ်မြွက်စကားတော်ကို အဆက်မပြတ်လေ့လာခြင်းအားဖြင့် သင့်ဝိညာဉ်ရေးကျန်းမာမှုနှင့်တည်ကြည်ခြင်းကို ထိန်းသိမ်းစောင့်ရှောက်ရမည်။—၁ တိမောသေ ၄:၁၃; တိတု ၁:၁၃၊ ၁၄; ၂:၂။
သင့်နောင်တနှင့် ပြောင်းလဲမှုတို့ကို သတိရပါ
၈။ ဘုရားသခင်ရေးရာအမူအကျင့်ကို မည်သို့ထိန်းသိမ်းထားနိုင်သနည်း။
၈ သင်သည် အမှန်တရားသိရှိလာပြီး နောင်တယူကာ ယေရှု၏ရွေးနုတ်ဖိုးပူဇော်သကာကို ယုံကြည်သဖြင့် ဘုရားသခင့်ခွင့်လွှတ်ခြင်းခံရသည်ဟု ခံစားခဲ့ရချိန်က မည်မျှစိတ်သက်သာမှုရရှိခဲ့သည်ကို အမှတ်ရပါသလော။ (ဆာလံ ၃၂:၁-၅; ရောမ ၅:၈; ၁ ပေတရု ၃:၁၈) အပြစ်ပြုသောဘဝသို့ သင်ပြန်မရောက်လိုသည်မှာ သေချာသည်။ (၂ ပေတရု ၂:၂၀-၂၂) အခြားအရာများအပြင် ယေဟောဝါထံ မှန်မှန်ဆုတောင်းခြင်းသည် ဘုရားသခင်ရေးရာအမူအကျင့်ကို ဆက်ထိန်းသိမ်းစေ၏၊ သင့်ဆက်ကပ်အပ်နှံမှုနှင့်အညီ အသက်ရှင်နေထိုင်စေမည်၊ ယေဟောဝါ၏အမှုတော်ကို တည်ကြည်မှုရှိရှိဆောင်ရွက်နေစေပါလိမ့်မည်။—၂ ပေတရု ၃:၁၁၊ ၁၂။
၉။ အပြစ်ရှိသောအကျင့်များကို စွန့်လွှတ်ခဲ့ပြီဖြစ်ရာ အဘယ်လမ်းစဉ်ကို ကျွန်ုပ်တို့လိုက်သင့်သနည်း။
၉ အပြစ်ရှိသောအကျင့်များကိုစွန့်လွှတ်ပြီး ပြုပြင်ပြောင်းလဲလာခဲ့ပြီဖြစ်ရာ တည်ကြည်သောနှလုံးကို ဆက်ထိန်းသိမ်းနိုင်ရန် ဘုရားသခင့်အကူအညီတောင်းပါ။ တစ်နည်းအားဖြင့်ဆိုလျှင် သင်သည် လမ်းမှားပေါ်ခရီးသွားနေခဲ့ရာ ယုံကြည်စိတ်ချရသည့် မြေပုံတစ်ခုကိုကြည့်ပြီးနောက် လမ်းမှန်ပေါ်တွင် စ၍ခရီးဆက်ခဲ့သည်။ ယခု လမ်းမမှားစေပါနှင့်။ ဘုရားသခင့်လမ်းညွှန်မှုကို ဆက်စိတ်ချပြီး အသက်လမ်းပေါ်တည်ရှိနေရန် စိတ်ဆုံးဖြတ်ထားပါလေ။—ဟေရှာယ ၃၀:၂၀၊ ၂၁; မဿဲ ၇:၁၃၊ ၁၄။
သင့်ဆက်ကပ်အပ်နှံခြင်းနှင့် နှစ်ခြင်းကို ဘယ်တော့မျှမမေ့နှင့်
၁၀။ ဘုရားသခင်ထံ ကျွန်ုပ်တို့ကိုယ်ကိုဆက်ကပ်အပ်နှံခြင်းနှင့်ပတ်သက်၍ အဘယ်အချက်များကို စိတ်စွဲမှတ်ထားသင့်သနည်း။
၁၀ သင်သည် ယေဟောဝါ၏အမှုတော်ကို ထာဝစဉ် တည်ကြည်မှုရှိရှိဆောင်ရွက်မည်ဟု ရည်မှန်းလျက် ဆုတောင်းခြင်းဖြင့် မိမိကိုယ်ကိုဆက်ကပ်အပ်နှံခဲ့ကြောင်း စိတ်စွဲမှတ်ထားပါ။ (ယုဒ ၂၀၊ ၂၁) ဆက်ကပ်အပ်နှံခြင်းသည် မြင့်မြတ်သောရည်ရွယ်ချက်တစ်ခုအတွက် သီးသန့်ခွဲထားခြင်း၊ သို့မဟုတ် သီးခြားနေခြင်း သဘောရှိသည်။ (ဝတ်ပြုရာ ၁၅:၃၁; ၂၂:၂) သင့်ဆက်ကပ်အပ်နှံမှုသည် ယာယီသဘောတူညီမှုမဟုတ်၊ လူတို့အားကတိပြုခြင်းလည်းမဟုတ်ပါ။ စကြဝဠာပိုင်သအုပ်စိုးရှင်အား မိမိကိုယ်ကို ထာဝစဉ်ဆက်ကပ်အပ်နှံခြင်းဖြစ်ပြီး ၎င်းနှင့်အညီ အသက်ရှင်နေထိုင်ရန် ဘုရားသခင်အား တစ်သက်တာလုံး တည်ကြည်ရန်လိုသည်။ မှန်ပါသည်၊ ကျွန်ုပ်တို့ ‘အသက်ရှင်သည်ဖြစ်စေ၊ သေသည်ဖြစ်စေ ကျွန်ုပ်တို့ကို သခင်ဘုရားပိုင်ဆိုင်တော်မူ၏။’ (ရောမ ၁၄:၇၊ ၈) ကျွန်ုပ်တို့၏ပျော်ရွှင်မှုသည် ကိုယ်တော့်အလိုတော်ကိုဆောင်ရွက်ခြင်း၊ တည်ကြည်သောနှလုံးဖြင့် ကိုယ်တော်၏အမှုကို အဆက်မပြတ်ထမ်းဆောင်ခြင်းအပေါ် မူတည်သည်။
၁၁။ သင့်နှစ်ခြင်းနှင့် ၎င်း၏အဓိပ္ပာယ်ကို အဘယ်ကြောင့်သတိရသင့်သနည်း။
၁၁ ဘုရားသခင်အား သင့်ကိုယ်သင် စိတ်နှလုံးအကြွင်းမဲ့ဆက်ကပ်အပ်နှံခြင်း၏ အထိမ်းအမှတ်အဖြစ် သင်၏နှစ်ခြင်းကို အမြဲသတိရပါ။ ဖိအားပေးမှုခံရ၍ သင်နှစ်ခြင်းခံခဲ့ခြင်းမဟုတ်ဘဲ သင့်ကိုယ်ပိုင်ဆုံးဖြတ်ချက်ဖြစ်သည်။ ယခု သင့်ဘဝအသက်တာတစ်လျှောက် သင့်အလိုဆန္ဒကို ဘုရားသခင့်အလိုတော်နှင့်အညီရှိစေမည်ဟု သင်စိတ်ဆုံးဖြတ်ပါသလော။ သင်သည် ကြည်လင်သောသိစိတ်ရှိဖို့ ဘုရားသခင်ထံ တောင်းလျှောက်ခဲ့ပြီး သင့်ကိုယ်သင်ဆက်ကပ်အပ်နှံခြင်း၏ အထိမ်းအမှတ်အနေနှင့် သင်နှစ်ခြင်းခံခဲ့ပေပြီ။ သင့်ဆက်ကပ်အပ်နှံခြင်းနှင့်အညီ ဆောင်ရွက်ခြင်းဖြင့် ထိုကြည်လင်သောသိစိတ်ကို ထိန်းသိမ်းထားပါ၊ ယေဟောဝါ၏ ကြွယ်ဝသောကောင်းချီးမင်္ဂလာကို သင်ခံစားရလိမ့်မည်။—သု. ၁၀:၂၂။
သင့်စိတ်အလိုဆန္ဒ ပါဝင်ပတ်သက်
၁၂၊ ၁၃။ ကျွန်ုပ်တို့၏ကိုယ်ပိုင်အလိုဆန္ဒသည် ဆက်ကပ်အပ်နှံပြီး နှစ်ခြင်းခံခြင်းနှင့် မည်သို့ပတ်သက်သနည်း။
၁၂ ဆက်ကပ်အပ်နှံခြင်းနှင့် နှစ်ခြင်းသည် ကမ္ဘာတစ်ဝန်းရှိ သန်းနှင့်ချီသောသူများအပေါ် ကြီးမားသောကောင်းချီးများ အမှန်သက်ရောက်ခဲ့ပြီ။ ရေနှစ်ခြင်းခံခြင်းဖြင့် ဘုရားသခင်ထံ ကျွန်ုပ်တို့၏ဆက်ကပ်အပ်နှံမှုကို တင်ပြချိန်တွင် ကျွန်ုပ်တို့၏ အတိတ်ကဘဝလမ်းစဉ်ကို သေစေခဲ့ပြီဖြစ်သော်လည်း ကျွန်ုပ်တို့၏ကိုယ်ပိုင်အလိုဆန္ဒများကိုမူ မသေစေကြပါ။ သင့်လျော်စွာသွန်သင်ခံခဲ့ရသော ယုံကြည်သူများအနေနှင့် ကျွန်ုပ်တို့သည် ဆုတောင်းခြင်းဖြင့် ဘုရားသခင်ထံဆက်ကပ်အပ်နှံပြီး နှစ်ခြင်းခံခဲ့ချိန်တွင် ကိုယ်ပိုင်အလိုဆန္ဒအလျောက် ထိုသို့ပြုလုပ်ခဲ့ကြသည်။ ဆက်ကပ်အပ်နှံပြီး နှစ်ခြင်းခံခြင်းလမ်းစဉ်က ဘုရားသခင့်အလိုတော်သည် အဘယ်အရာဖြစ်ကြောင်းကို ဆုံးဖြတ်ကာ ထိုအတိုင်းလုပ်ဆောင်ရန် မဖြစ်မနေရွေးချယ်ဖို့တောင်းဆိုသည်။ (ဧဖက် ၅:၁၇) ဤနည်းဖြင့် ကျွန်ုပ်တို့သည် ယေရှုကိုအတုယူကြသည်၊ ကိုယ်တော်သည် မိမိ၏အလိုဆန္ဒအလျောက် လက်သမားအလုပ်ကိုစွန့်ပြီး နှစ်ခြင်းခံ၍ ကောင်းကင်ခမည်းတော်၏အလိုတော်ကို အပြည့်အဝဆောင်ရွက်ခဲ့သည်။—ဆာလံ ၄၀:၇၊ ၈; ယောဟန် ၆:၃၈-၄၀။
၁၃ ယေဟောဝါဘုရားသခင်က မိမိ၏သားတော်ကို “[ဆင်းရဲခြင်း] အားဖြင့် စုံလင်ခြင်းသို့ရောက်စေရန်” ရည်ရွယ်တော်မူခဲ့သည်။ ထို့ကြောင့် ယေရှုသည် ထိုဆင်းရဲခြင်းများကို တည်ကြည်မှုရှိရှိခံရပ်ရန် အလိုရှိခဲ့သည်။ ထို့ကြောင့် ကိုယ်တော်သည် “ကြီးစွာသောကြွေးကြော်ခြင်း၊ မျက်ရည်ကျခြင်းနှင့် ဆုတောင်း[ခြင်း]ဖြင့် ဘုရားသခင်ကိုကြောက်ရွံ့သောသဘောကြောင့် နားညောင်းတော်မူခြင်းကိုခံ” ခဲ့ရသည်။ (ဟေဗြဲ ၂:၁၀၊ ၁၈; ၅:၇၊ ၈၊ သမ္မာ) ကျွန်ုပ်တို့လည်း ဘုရားသခင်ကို အလားတူရိုသေခန့်ညားကြောက်ရွံ့မည်ဆိုလျှင် ကျွန်ုပ်တို့သည် “နားညောင်းတော်မူခြင်းကိုခံရ” ပြီး ယေဟောဝါ၏ဆက်ကပ်အပ်နှံသက်သေခံများအဖြစ် တည်ကြည်စေမည်ဟု ယုံကြည်စိတ်ချနိုင်ကြပါသည်။—ဟေရှာယ ၄၃:၁၀။
တည်ကြည်သောနှလုံးကို သင်ထိန်းသိမ်းထားနိုင်
၁၄။ ကျွန်ုပ်တို့သည် သမ္မာကျမ်းစာကို အဘယ်ကြောင့် နေ့တိုင်းဖတ်သင့်သနည်း။
၁၄ တည်ကြည်သောနှလုံးကိုထိန်းသိမ်းပြီး ဘုရားသခင်ထံ သင့်ဆက်ကပ်အပ်နှံမှုနှင့်အညီ အသက်ရှင်နေထိုင်နိုင်ရန် အဘယ်အရာက သင့်အား အကူအညီပေးမည်နည်း။ ဘုရားသခင့်နှုတ်မြွက်စကားတော်၏ အစဉ်တိုးပွားလျက်ရှိသောအသိပညာကို ဆည်းပူးရန်ရည်ရွယ်ချက်ဖြင့် သမ္မာကျမ်းစာကို နေ့စဉ်ဖတ်ပါ။ ထိုသို့ပြုလုပ်ရန် ‘သစ္စာနှင့်သတိပညာရှိသောကျွန်’ သည် ကျွန်ုပ်တို့ကို အစဉ်မပြတ်တိုက်တွန်းနေသည်။ ကျွန်ုပ်တို့၏ဆက်ကပ်အပ်နှံမှုနှင့်အညီ အသက်ရှင်နေထိုင်ဖို့ ဘုရားသခင့်အမှန်တရားအတိုင်း ဆက်လျှောက်လှမ်းနေရန် လိုသောကြောင့် ထိုသို့အကြံပြုရခြင်းဖြစ်သည်။ ယေဟောဝါ၏အဖွဲ့အစည်းသည် မှောက်မှားသောသွန်သင်ချက်များကို သိသိနှင့်သဘောတူလက်ခံထားမည်ဆိုလျှင် ယေဟောဝါသက်သေများနှင့် သူတို့ဟောပြောသည့်သူများအား သမ္မာကျမ်းစာဖတ်ရှုရန် ဘယ်တော့မျှအကြံပေးလိမ့်မည်မဟုတ်ပါ။
၁၅။ (က) ဆုံးဖြတ်ချက်များချသည့်အခါ အဘယ်အရာကို ဆင်ခြင်သုံးသပ်သင့်သနည်း။ (ခ) လောကအလုပ်သည် ခရစ်ယာန်တစ်ဦး၏ ဒုတိယအသက်မွေးဝမ်းကျောင်းအလုပ်ဖြစ်သည်ဟု အဘယ်ကြောင့်ဆိုနိုင်သနည်း။
၁၅ ဆုံးဖြတ်ချက်များချသည့်အခါ ယေဟောဝါထံ သင်၏ဆက်ကပ်အပ်နှံမှုနှင့်အညီ ဆောင်ရွက်ခြင်းကို မည်သို့ထိခိုက်နိုင်ကြောင်း အမြဲဆင်ခြင်သုံးသပ်ပါ။ ၎င်းသည် သင့်လောကအလုပ်နှင့် ပတ်သက်နိုင်သည်။ စစ်မှန်သောဝတ်ပြုရေးတိုးမြှင့်လာစေရန် ၎င်းလုပ်ငန်းကို သင်ကြိုးစားအသုံးပြုပါသလော။ အလုပ်ရှင်အများစုက ဆက်ကပ်အပ်နှံပြီးခရစ်ယာန်များသည် စိတ်ချရ၍ လုပ်ရည်ကိုင်ရည်ရှိသူများဖြစ်ကြကြောင်း တွေ့ရှိကြသော်လည်း ယေဟောဝါသက်သေများသည် လောကတွင်ထွန်းပေါက်ရန် ရည်မှန်းချက်ကြီးသူများမဟုတ်ကြောင်းနှင့် ဝင်ငွေအများဆုံးရာထူးများရရန် အခြားသူများနှင့်ပြိုင်ဆိုင်ခြင်းမရှိကြောင်းကိုလည်း သူတို့သတိပြုမိကြသည်။ အကြောင်းမှာ သက်သေခံများ၏ပန်းတိုင်သည် ကြွယ်ဝချမ်းသာရန်၊ ကျော်စောထင်ရှားရန်၊ ဂုဏ် သို့မဟုတ် ဩဇာအာဏာရှိရန် မဟုတ်ပါ။ ဘုရားသခင်ထံဆက်ကပ်အပ်နှံမှုနှင့်အညီ အသက်ရှင်နေထိုင်သူများအတွက် အရေးအကြီးဆုံးအရာမှာ ဘုရားသခင့်အလိုတော်ဆောင်ရွက်ခြင်းဖြစ်သည်။ ဘဝ၏လိုအပ်ရာများကိုရရှိစေသော လောကအလုပ်တစ်ခုသည် သူတို့အတွက် ဒုတိယအရေးကြီးသောအရာဖြစ်သည်။ တမန်တော်ပေါလုကဲ့သို့ပင် သူတို့အဓိကအလုပ်အကိုင်မှာ ခရစ်ယာန်ဓမ္မအမှုဆောင်ခြင်းလုပ်ငန်းဖြစ်သည်။ (တမန်တော် ၁၈:၃၊ ၄; ၂ သက်သာလောနိတ် ၃:၇၊ ၈; ၁ တိမောသေ ၅:၈) သင့်ဘဝအသက်တာတွင် ဘုရားသခင့်နိုင်ငံတော်အကျိုးစီးပွားကို ရှေးဦးထားပါသလော။—မဿဲ ၆:၂၅-၃၃။
၁၆။ အလွန်အကျွံစိုးရိမ်ပူပန်မှုများက ဘုရားသခင်ထံ ကျွန်ုပ်တို့၏ဆက်ကပ်အပ်နှံမှုနှင့်အညီ အသက်ရှင်နေထိုင်ဖို့ အခက်တွေ့နေစေပါက အဘယ်အရာပြုလုပ်နိုင်သနည်း။
၁၆ အချို့သူများသည် အမှန်တရားကိုမလေ့လာမီ စိုးရိမ်ပူပန်မှုအမျိုးမျိုးကြောင့် မခံမရပ်နိုင်အောင် ဖိစီးခံခဲ့ရပေမည်။ သို့သော် ဘုရားသခင့်နိုင်ငံတော်မျှော်လင့်ချက်ကို ယုံကြည်လက်ခံလာချိန်တွင် သူတို့၏နှလုံးသည် ရွှင်လန်းမှု၊ ကျေးဇူးတင်မှု၊ ဘုရားသခင်ကိုချစ်သည့်မေတ္တာ ပြည့်လျှံယိုဖိတ်ခဲ့သည်! ထိုအချိန်မှစ၍ သူတို့ပျော်မွေ့ခံစားခဲ့ရသော ကောင်းချီးများကို ပြန်သုံးသပ်ခြင်းက ယေဟောဝါထံ သူတို့၏ဆက်ကပ်အပ်နှံမှုနှင့်အညီ အသက်ရှင်နေထိုင်စေလိမ့်မည်။ အခြားတစ်ဖက်တွင်မူ ဆူးများသည် ပျိုးပင်များ၏ ကြီးထွားသီးပွင့်မှုကို တားဆီးနိုင်သကဲ့သို့ မျက်မှောက်ခေတ်အစီအစဉ်စနစ်အတွင်းရှိ သာမန်ဘဝပြဿနာများအတွက် အလွန်အကျွံစိုးရိမ်ပူပန်ခြင်းက “ဘုရားသခင်၏တရားစကား” ကိုဆီးတားနှောင့်ယှက်နေလျှင် မည်သို့နည်း။ (လုကာ ၈:၇၊ ၁၁၊ ၁၄; မဿဲ ၁၃:၂၂; မာကု ၄:၁၈၊ ၁၉) သင် သို့မဟုတ် သင့်မိသားစုသည် ဤသို့ခံစားနေရသည်ဟု သင်သတိပြုမိပါက သင့်စိုးရိမ်ပူပန်မှုကို ယေဟောဝါအပေါ်ချထားပြီး မေတ္တာနှင့်ကျေးဇူးတင်လေးမြတ်မှု တိုးများလာစေရန် ကိုယ်တော်အကူအညီပေးဖို့ ဆုတောင်းပါ။ သင်ထမ်းရွက်ရသောဝန်ကို ကိုယ်တော်၌ချထားမည်ဆိုလျှင် သင့်ကိုမစတော်မူမည်၊ တည်ကြည်သောနှလုံးဖြင့် ကိုယ်တော့်အမှုတော်ကို ပျော်ရွှင်စွာ ဆက်ဆောင်ရွက်နိုင်ရန် သင့်ကိုခွန်အားပေးတော်မူမည်။—ဆာလံ ၅၅:၂၂; ဖိလိပ္ပိ ၄:၆၊ ၇; ဗျာဒိတ် ၂:၄။
၁၇။ ပြင်းထန်သောစုံစမ်းနှောင့်ယှက်မှုများကို မည်သို့ခံရပ်နိုင်မည်နည်း။
၁၇ သင့်ကိုယ်သင်ဆက်ကပ်အပ်နှံချိန်က ဆုတောင်းခဲ့သကဲ့သို့ ယေဟောဝါဘုရားသခင်ထံ ဆက်၍မှန်မှန်ဆုတောင်းပါလေ။ (ဆာလံ ၆၅:၂) အမှားပြုရန် သွေးဆောင်ခံရချိန် သို့မဟုတ် ပြင်းထန်သောစမ်းသပ်ချက်တစ်ခုနှင့် ရင်ဆိုင်ရချိန်တွင် ဘုရားသခင့်လမ်းညွှန်မှုကိုတောင်းဆိုပြီး ထိုအတိုင်းလိုက်လျှောက်နိုင်ရန် ကိုယ်တော့်ထံမှအကူအညီယူပါ။ ယုံကြည်ခြင်းရှိဖို့လိုကြောင်း စိတ်စွဲမှတ်ထားပါ၊ အကြောင်းမှာ တပည့်တော်ယာကုပ် ဤသို့ရေးခဲ့၏– “သင်တို့တွင် တစ်စုံတစ်ယောက်သောသူသည် [စမ်းသပ်မှုတစ်ခုကို ခံရပ်ရန်] ပညာကိုလိုလျှင်၊ ကဲ့ရဲ့ပြစ်တင်ခြင်းကိုပြုတော်မမူဘဲ ခပ်သိမ်းသောသူတို့အား စေတနာစိတ်နှင့်ပေးသနားတော်မူသော ဘုရားသခင်ကိုတောင်းစေ။ တောင်းလျှင်ရလိမ့်မည်။ သို့ရာတွင် တွေးတောခြင်းမရှိဘဲ ယုံကြည်သောစိတ်နှင့်တောင်းရမည်။ တွေးတောခြင်းရှိသောသူသည်ကား လေခတ်၍လှုပ်ရှားတတ်သော လှိုင်းတံပိုးနှင့်တူ၏။ ထိုသို့သောသူသည် စိတ်နှစ်ခွရှိသောသူ၊ ပြုလေသမျှတို့၌ မတည်ကြည်သောသူဖြစ်၍ ထာဝရဘုရား၏လက်တော်မှ တစ်စုံတစ်ခုကိုရမည်ဟု မထင်မမှတ်စေနှင့်။” (ယာကုပ် ၁:၅-၈) စုံစမ်းနှောင့်ယှက်ခြင်း၏လွှမ်းမိုးမှုကို ခံနေရမည်ဆိုလျှင် ဤအချက်ကို စိတ်ချနိုင်သည်– “လူ၌ဖြစ်တတ်သော စုံစမ်းနှောင့်ယှက်ခြင်းကိုသာ သင်တို့သည်ခံရကြ၏။ ဘုရားသခင်သည် [တည်ကြည်မှု]နှင့်ပြည့်စုံတော်မူသည်ဖြစ်၍ သင်တို့မခံနိုင်သောစုံစမ်းနှောင့်ယှက်ခြင်းကို သင်တို့၌ရောက်စိမ့်သောငှာ အခွင့်ပေးတော်မမူ။ သင်တို့သည်ခံနိုင်မည်အကြောင်း စုံစမ်းနှောင့်ယှက်ခြင်းအရာနှင့်တကွ၊ ထွက်မြောက်သောလမ်းကိုလည်း စီရင်ပြုပြင်တော်မူလိမ့်မည်။”—၁ ကောရိန္သု ၁၀:၁၃။
၁၈။ ဖုံးကွယ်ထားသော ကြီးလေးသည့်အပြစ်တစ်ခုသည် ဘုရားသခင်ထံ ဆက်ကပ်အပ်နှံထားမှုနှင့်အညီ အသက်ရှင်နေထိုင်ရန် သင့်ဆုံးဖြတ်ချက်ကို ချည့်နဲ့နေစေမည်ဆိုလျှင် အဘယ်အရာပြုလုပ်နိုင်သနည်း။
၁၈ ဖုံးကွယ်ထားသော ကြီးလေးသည့်အပြစ်တစ်ခုသည် သင်၏သိစိတ်ကို နှောင့်ယှက်နေပြီး ဘုရားသခင်ထံ ဆက်ကပ်အပ်နှံထားမှုနှင့်အညီ အသက်ရှင်နေထိုင်ရန် သင့်ဆုံးဖြတ်ချက်ကို ချည့်နဲ့လာစေမည်ဆိုလျှင် အသို့နည်း။ သင်နောင်တရမည်ဆိုပါက ယေဟောဝါသည် “ကျိုးပဲ့ကြေမွသောနှလုံးကို ငြင်းပယ်တော်မမူတတ်” ကြောင်းသိရခြင်းမှ နှစ်သိမ့်မှုရနိုင်သည်။ (ဆာလံ ၅၁:၁၇) မေတ္တာပြည့်ဝသော ခရစ်ယာန်အကြီးအကဲများ၏ အကူအညီကိုတောင်းဆိုပါ၊ သူတို့သည်—ယေဟောဝါကိုအတုယူကာ—ကောင်းကင်ခမည်းတော်နှင့် ကောင်းသောဆက်ဆံရေးပြန်ရလိုသော သင်၏ဆန္ဒကို ပေါ့ပေါ့တန်တန်သဘောထားမည် မဟုတ်ချေ။ (ဆာလံ ၁၀၃:၁၀-၁၄; ယာကုပ် ၅:၁၃-၁၅) ထို့နောက် သင်သည် ဝိညာဉ်ရေးခွန်အား၊ တည်ကြည်သောနှလုံးအသစ်ပြန်ရလာပြီး ဖြောင့်သောလမ်းတို့တွင်လျှောက်နိုင်၍ ဘုရားသခင်ထံ သင့်ဆက်ကပ်အပ်နှံမှုနှင့်အညီ အသက်ရှင်နေထိုင်နိုင်ပါလိမ့်မည်။—ဟေဗြဲ ၁၂:၁၂၊ ၁၃။
တည်ကြည်သောနှလုံးဖြင့် ဆက်၍ဝတ်ပြုကိုးကွယ်ပါ
၁၉၊ ၂၀။ ကျွန်ုပ်တို့၏ဆက်ကပ်အပ်နှံမှုနှင့်အညီ ဆက်၍အသက်ရှင်နေထိုင်ရန် အဘယ်ကြောင့်အရေးကြီးသနည်း။
၁၉ ဤခဲယဉ်းသောကာလတွင် ကျွန်ုပ်တို့၏ဆက်ကပ်အပ်နှံထားမှုနှင့်အညီ အသက်ရှင်နေထိုင်ရန်နှင့် တည်ကြည်သောနှလုံးဖြင့် ဘုရားသခင်၏အမှုတော်ကို ဆက်ဆောင်ရွက်ရန် ကြိုးစားအားထုတ်ရမည်။ ယေရှုဤသို့မိန့်တော်မူ၏– “အကြင်သူသည် အဆုံးတိုင်အောင်တည်ကြည်၏၊ ထိုသူသည် ကယ်တင်ခြင်းသို့ရောက်လိမ့်မည်။” (မဿဲ ၂၄:၁၃) ကျွန်ုပ်တို့သည် “နောက်ဆုံးသောအချိန်၌” အသက်ရှင်နေရသောကြောင့် မည်သည့်အချိန်တွင်မဆို အဆုံးရောက်လာနိုင်သည်။ (၂ တိမောသေ ၃:၁၊ ကဘ) ထို့ပြင် နက်ဖြန်နေ့၌ ကျွန်ုပ်တို့အသက်ရှင်မည်မရှင်မည်ကို မည်သူမျှမသိနိုင်ကြပါ။ (ယာကုပ် ၄:၁၃၊ ၁၄) ထို့ကြောင့် ကျွန်ုပ်တို့၏ဆက်ကပ်အပ်နှံမှုနှင့်အညီ ယနေ့အသက်ရှင်နေထိုင်ရန် အလွန်အရေးကြီးသည်!
၂၀ ဤအချက်ကို တမန်တော်ပေတရုက သူ၏ဒုတိယစာစောင်တွင် အလေးပေးဖော်ပြခဲ့သည်။ ရေလွှမ်းမိုးဘေးတွင် လူဆိုးများ ဖျက်ဆီးခံခဲ့ရသကဲ့သို့ ပုံဆောင်မြေကြီး သို့မဟုတ် ဆိုးသွမ်းသောလူ့ဘောင်အဖွဲ့အစည်းသည် “ယေဟောဝါ၏နေ့” တွင်ဖျက်ဆီးခံရမည်ဟု သူဖော်ပြခဲ့သည်။ ထို့ကြောင့် ပေတရုဤသို့ကြွေးကြော်ခဲ့၏– “သန့်ရှင်းသောအကျင့်ကိုကျင့်ခြင်း၊ ဘုရား[သခင်]ဝတ်၌မွေ့လျော်ခြင်းအားဖြင့် အဘယ်သို့သောသူဖြစ်အပ်ကြသနည်း”! သူတို့ကို ဤသို့လည်းအားပေးခဲ့၏– “ချစ်သူတို့၊ [အယူမှားဆရာများနှင့် လူဆိုးများ] ၏ပရိယာယ်အားဖြင့် သင်တို့သည်လည်း သွေးဆောင်ရာသို့လိုက်၍ သင်တို့တည်ကြည်ခြင်းမှ မရွေ့လျော့မည်အကြောင်း ဤအရာများကိုသိနှင့်ပြီဖြစ်၍ ကိုယ်ကိုကိုယ်စောင့်ရှောက်ကြလော့။” (၂ ပေတရု ၃:၅-၁၇) နှစ်ခြင်းခံပြီးသူတစ်ဦးသည် လမ်းလွဲသွားပြီး တည်ကြည်သောနှလုံးကို ထိန်းသိမ်းရန်ပျက်ကွက်ခဲ့သူအဖြစ် ဘဝနိဂုံးချုပ်ခဲ့ရမည်ဆိုလျှင် အလွန်ဝမ်းနည်းစရာပါတကား!
၂၁၊ ၂၂။ ဆာလံ ၅၇:၇ ပါစကားများသည် ဒါဝိဒ်နှင့် စစ်မှန်သောခရစ်ယာန်များ၏ အဖြစ်အပျက်တွင် မှန်ကန်ကြောင်း မည်သို့သက်သေထူခဲ့ပြီနည်း။
၂၁ သင်နှစ်ခြင်းခံခဲ့သော ပျော်ရွှင်ဖွယ်နေ့ကို စိတ်ထဲစွဲမှတ်ထားပြီး သင့်အပြောအဆို၊ သင့်အကျင့်အကြံများသည် ကိုယ်တော့်နှလုံးကိုရွှင်လန်းစေရန်အလို့ငှာ ဘုရားသခင့်အကူအညီကို တောင်းခံမည်ဆိုလျှင် ဘုရားသခင်ထံ သင့်ဆက်ကပ်အပ်နှံမှုနှင့်အညီ အသက်ရှင်နေထိုင်ဖို့ သင့်ဆုံးဖြတ်ချက်သည် ခိုင်မြဲနေပါလိမ့်မည်။ (သု. ၂၇:၁၁) ယေဟောဝါသည် မိမိလူတို့ကို ဘယ်တော့မှစိတ်ပျက်စေမည်မဟုတ်ပါ၊ ကျွန်ုပ်တို့သည် ကိုယ်တော့်အပေါ် အမှန်ပင်တည်ကြည်သင့်သည်။ (ဆာလံ ၉၄:၁၄) ဘုရားသခင်သည် ရန်သူများ၏ အကြံအစည်များကိုပျက်ပြားစေပြီး ဒါဝိဒ်ကိုကယ်တင်ခြင်းအားဖြင့် ကရုဏာနှင့်ကြင်နာမှုကို ပြသခဲ့သည်။ ဒါဝိဒ်သည် ယင်းကိုကျေးဇူးတင်သောကြောင့် မိမိ၏ကယ်တင်ရှင်အပေါ်ထားသောမေတ္တာ မရွေ့မလျော့၊ ခိုင်မြဲကြောင်း ကြွေးကြော်ခဲ့သည်။ ခံစားမှုအပြည့်ဖြင့် သူဤသို့သီဆိုခဲ့၏– “အိုဘုရားသခင် အကျွန်ုပ်နှလုံးသည် တည်ကြည်ပါ၏။ အကျွန်ုပ်နှလုံးသည် တည်ကြည်ပါ၏။ သီချင်းဆိုပါမည်။ ချီးမွမ်းထောမနာပြုပါမည်။”—ဆာလံ ၅၇:၇။
၂၂ ဒါဝိဒ်ကဲ့သို့ပင် စစ်မှန်သောခရစ်ယာန်များသည် ဘုရားသခင်အား ဆည်းကပ်ဝတ်ပြုမှုမှ မတိမ်းယိမ်းခဲ့ကြပါ။ သူတို့၏လွတ်မြောက်မှု၊ ကာကွယ်စောင့်ရှောက်မှုသည် ယေဟောဝါကြောင့်ဖြစ်၏ဟု တည်ကြည်သောနှလုံးများဖြင့် မှတ်ယူကြပြီး ရွှင်လန်းဝမ်းမြောက်စွာဖြင့် ချီးမွမ်းသီချင်းများဆိုကြသည်။ သင့်နှလုံးတည်ကြည်ပါက ဘုရားသခင်ကို သင်မှီခိုအားထားလိမ့်မည်၊ ကိုယ်တော့်အကူအညီဖြင့်လည်း သင့်ဆက်ကပ်အပ်နှံမှုနှင့်အညီ သင်အသက်ရှင်နေထိုင်နိုင်လိမ့်မည်။ သင်သည် ဆာလံဆရာသီဆိုခဲ့သော “ဖြောင့်မတ်သောသူ” ကဲ့သို့ အမှန်ပင်ဖြစ်နိုင်မည်– “မကောင်းသောသတင်းကိုမကြောက်ရ။ စိတ်နှလုံးသည် ထာဝရဘုရားကိုကိုးစားသဖြင့် တည်ကြည်တတ်၏။” (ဆာလံ ၁၁၂:၆၊ ၇) သင်သည် ဘုရားသခင်အားယုံကြည်ပြီး ကိုယ်တော့်ကိုအကြွင်းမဲ့ကိုးစားခြင်းဖြင့် သင့်ဆက်ကပ်အပ်နှံမှုနှင့်အညီ အသက်ရှင်နေထိုင်နိုင်ပြီး တည်ကြည်သောနှလုံးဖြင့် ယေဟောဝါအမှုတော်ကို ဆက်၍ထမ်းဆောင်နိုင်ပါလိမ့်မည်။
သင်မှတ်မိပါသလော
• ကျွန်ုပ်တို့သည် သမ္မာကျမ်းစာ၏ တိကျမှန်ကန်သောအသိပညာကို အဘယ်ကြောင့်ဆက်ဆည်းပူးသင့်သနည်း။
• ကျွန်ုပ်တို့၏နောင်တယူမှုနှင့် အကျင့်ပြောင်းလဲမှုကို အဘယ်ကြောင့်စိတ်စွဲမှတ်ထားသင့်သနည်း။
• ကျွန်ုပ်တို့၏ဆက်ကပ်အပ်နှံခြင်း၊ နှစ်ခြင်းခံခြင်းကို သတိရခြင်းမှ အဘယ်အကျိုးရရှိသနည်း။
• ယေဟောဝါအား တည်ကြည်သောနှလုံးဖြင့် ဆက်၍ဝတ်ပြုကိုးကွယ်ရန် အဘယ်အရာက အကူအညီပေးမည်နည်း။
[လေ့လာရန်မေးခွန်းများ]
[စာမျက်နှာ ၁၈ ပါ ရုပ်ပုံ]
ဘုရားသခင့်နှုတ်မြွက်စကားတော်ကို နေ့စဉ်ဖတ်ရှုခြင်းအားဖြင့် သင့်ဝိညာဉ်ရေးကျန်းမာမှုကို ထိန်းသိမ်းနေပါသလော
[စာမျက်နှာ ၁၈ ပါ ရုပ်ပုံ]
ခရစ်ယာန်ဓမ္မအမှုကို ကျွန်ုပ်တို့၏ အဓိကအလုပ်ဖြစ်စေခြင်းဖြင့် တည်ကြည်သောနှလုံးနှင့် ယေဟောဝါအမှုတော်ကို ဆက်၍ဆောင်ရွက်ရန် အထောက်အကူရရှိကြ