သင့်စိတ်နှလုံးဖြင့် ဘုရားသခင်ကိုရှာလော့
သင့်စိတ်နှလုံးဖြင့် ဘုရားသခင်ကိုရှာလော့
စစ်မှန်သော ခရစ်ယာန်ဘာသာသည် ဘုရားသခင်နှစ်သက် လက်ခံနိုင်သည့် ယုံကြည်ခြင်းကို တည်ဆောက်ပေးရာတွင် စိတ်နှလုံးကိုအသုံးပြုဖို့ အားပေးတိုက်တွန်း၏။
အမှန်ဆိုရလျှင် ခရစ်ယာန်ဘာသာကိုစတည်ထောင်သူ ယေရှုခရစ်က ကျွန်ုပ်တို့သည် ဘုရားသခင်ကို “နှလုံးအကြွင်းမဲ့” နှင့် “ဝိညာဉ်စိုးလ်တစ်ခုလုံး” ဖြင့်ချစ်ရမည့်အပြင် ကျွန်ုပ်တို့၏ “စိတ်ရှိသမျှ၊” သို့မဟုတ် ဉာဏ်စွမ်းတို့ဖြင့် ချစ်ရမည်ဟု သွန်သင်တော်မူခဲ့၏။ (မဿဲ ၂၂:၃၇၊ ကဘ) မှန်ပါသည်၊ ကျွန်ုပ်တို့၏ဝတ်ပြုရေးတွင် ကျွန်ုပ်တို့၏စိတ်သတ္တိများသည် အဓိကကဏ္ဍမှပါဝင်ရမည်။
ယေရှုသည် မိမိ၏သွန်သင်ချက်ကို ဆင်ခြင်သုံးသပ်ရန် တရားနာသူများအား ဖိတ်ခေါ်ရာတွင် “အဘယ်သို့ထင်သနည်း” ဟု မေးလေ့ရှိတော်မူ၏။ (မဿဲ ၁၇:၂၅; ၁၈:၁၂; ၂၁:၂၈; ၂၂:၄၂) ထိုနည်းထပ်တူ တမန်တော်ပေတရုကလည်း ယုံကြည်သူချင်းများ၏ ‘ကြည်ဖြူသောစိတ်ဝိညာဉ် [“ကြည်လင်သောစိတ်၊” ကဘ] ကို သတိပေးနှိုးဆော်’ ရန် စာရေးခဲ့၏။ (၂ ပေတရု ၃:၁၊ ၂) ခရီးအကျယ်ပြန့်ဆုံးလှည့်လည်ခဲ့သော အစောပိုင်းက ခရစ်ယာန်သာသနာပြုသူ တမန်တော်ပေါလုသည် ခရစ်ယာန်များအား သူတို့၏ “ဆင်ခြင်နိုင်စွမ်း” ကိုအသုံးပြုရန်နှင့် “ကောင်းမြတ်သောအရာ၊ နှစ်သက်ဖွယ်သောအရာ၊ စုံလင်သောအရာတည်းဟူသော ဘုရားသခင်အလိုတော်ရှိသောအရာသည် အဘယ်အရာဖြစ်သည်ကို [ကိုယ်တိုင်] သိစေ” ရန် တိုက်တွန်းနှိုးဆော်ခဲ့၏။ (ရောမ ၁၂:၁၊ ၂၊ ကဘ) မိမိတို့၏ယုံကြည်ချက်များကို ထိုကဲ့သို့စေ့စပ်သေချာစွာ သုံးသပ်ဆင်ခြင်မှသာ ဘုရားသခင်၏အလိုတော်နှင့်တွေ့ပြီး ဘဝတွင်ပေါ်ပေါက်လာသည့် စမ်းသပ်မှုများကိုယှဉ်နိုင်သည့် ယုံကြည်ခြင်းမျိုး ခရစ်ယာန်များတည်ဆောက်နိုင်မည်ဖြစ်သည်။—ဟေဗြဲ ၁၁:၁၊ ၆။
ထိုကဲ့သို့သောယုံကြည်ခြင်းမျိုးကို အခြားသူများလည်း တည်ဆောက်နိုင်ကြစေရန် အစောပိုင်း ခရစ်ယာန်ဧဝံဂေလိတရားဟောပြောသူများသည် “ကျမ်းစာကိုအမှီပြု၍ ထိုသူတို့နှင့်ဆွေးနွေးနှီးနှော” ခဲ့ကြသည်။ (တမန်တော် ၁၇:၁-၃) ထိုသို့အကျိုးသင့်အကြောင်းသင့်ရှိရှိ ကိုင်တွယ်ခဲ့ခြင်းကြောင့် စိတ်နှလုံးရိုးဖြောင့်သူများသည် ကောင်းစွာတုံ့ပြန်ခဲ့ကြလေသည်။ ဥပမာ၊ မက်ဆီဒိုးနီးယားခရိုင်ရှိ ဗေရိမြို့သားအချို့တို့သည် “အလွန်ကြည်ညိုသောစေတနာစိတ်နှင့် [နှုတ်မြွက်စကားတော်] ကိုခံယူ၍ [ပေါလုနှင့်သူ၏အပေါင်းအဖော်တို့ ရှင်းပြရာများ] မှန်သည်မမှန်သည်ကို သိခြင်းငှာ၊ ကျမ်းစာကို နေ့တိုင်းအစဉ်စေ့စေ့ကြည့်ရှုကြ၏။” (တမန်တော် ၁၇:၁၁) ဤကျမ်းချက်တွင် သတိပြုသင့်ရာနှစ်ခုရှိ၏။ ပထမမှာ၊ ဗေရိမြို့သားများသည် ဘုရားသခင့်နှုတ်မြွက်စကားတော်ကို ကြားနာရန် စိတ်ပြင်းပြကြသည်; ဒုတိယမှာ၊ သူတို့ကြားသိခဲ့ရာများ မှန်ကန်သည်ဟု ဇွတ်မှိတ်မယူမှတ်ကြဘဲ စိတ်ချရအောင် ကျမ်းစာတွင်ပြန်၍ကြည့်ရှုစစ်ဆေးခဲ့ကြသည်။ ခရစ်ယာန်သာသနာပြုလုကာကလည်း ထိုသို့ပြုသော ဗေရိမြို့သားများအား “အလွန်ကြည်ညိုသောစေတနာစိတ်” ရှိသူများဖြစ်၏ဟုဆိုကာ တလေးတစား ချီးမွမ်းခဲ့၏။ အသင်လည်း ဝိညာဉ်ရေးရာများကို စဉ်းစားဆင်ခြင်သည့်အခါ ထိုကဲ့သို့သော အလွန်ကြည်ညိုသည့်စေတနာစိတ်တင်ပြပါသလော။
စိတ်နှင့်နှလုံးပူးပေါင်းဆောင်ရွက်
အစောပိုင်းတွင် ဖော်ပြခဲ့သည့်အတိုင်း စစ်မှန်သောဝတ်ပြုရေးတွင် စိတ်ရောနှလုံးပါ ပါဝင်ပတ်သက်၏။ (မာကု ၁၂:၃၀) ရှေ့ဆောင်းပါးတွင်ပါသည့် အိမ်ကိုအရောင်မှားပြီးဆေးသုတ်မိသော ဆေးသုတ်သမားပုံဥပမာကို ပြန်သုံးသပ်ကြည့်ပါ။ အကယ်၍ သူသည် မိမိအလုပ်ရှင်၏ ညွှန်ကြားချက်ကို ဂရုတစိုက် နားထောင်ခဲ့မည်ဆိုပါက သူ့အလုပ်ကို စိတ်ရောကိုယ်ပါနှစ်မြှုပ်လုပ်ကိုင်နိုင်ပြီး ပိုင်ရှင်၏မျက်နှာသာကိုလည်းရရှိမည်ဖြစ်ကြောင်း ယုံကြည်စိတ်ချနိုင်ပေမည်။ ကျွန်ုပ်တို့၏ဝတ်ပြုရေးနှင့်ပတ်သက်၍လည်း အလားတူပင်ဖြစ်၏။
ယေရှုက “စစ်မှန်စွာဝတ်ပြုသူတို့သည် ခမည်းတော်ကိုစိတ်ဖြင့်လည်းကောင်း၊ သမ္မာတရားဖြင့်လည်းကောင်း ဝတ်ပြုကြလိမ့်မည်” ဟုမိန့်တော်မူခဲ့သည်။ (ယောဟန် ၄:၂၃၊ ကဘ) ထို့ကြောင့်၊ တမန်တော်ပေါလုက ဤသို့ရေးသားခဲ့လေသည်– “ထိုအကြောင်းကြောင့်၊ ငါတို့သည် . . . သင်တို့အတွက်မပြတ်ဆုတောင်းသည်မှာ ဝိညာဉ်ရေးသိနားလည်မှု၊ ဉာဏ်ပညာအမျိုးမျိုးနှင့် ဝိညာဉ်ရေးဉာဏ်ဖြင့် အလိုတော်ကို သိကျွမ်းခြင်းပညာမှန်နှင့်ပြည့်စုံ၍ . . . ယေဟောဝါအားချီးမွမ်းဖွယ်ဖြစ်စေခြင်းနှင့်တကွ လျှောက်လှမ်းပြီး ကိုယ်တော်အား အစွမ်းကုန်နှစ်သက်မှုဖြစ်စေပါ။” (ကောလောသဲ ၁:၉၊ ၁၀၊ ကဘ) ထိုကဲ့သို့သော “တိကျမှန်ကန်သည့်အသိပညာ” သည် စိတ်ရိုးမှန်သူများကို မိမိတို့၏ဝတ်ပြုရေးတွင် ယုံကြည်စိတ်ချမှုအပြည့်ဖြင့် စိတ်ရောကိုယ်ပါနှစ်မြှုပ်ထားစေနိုင်သည်၊ အကြောင်းမှာ “[သူတို့] သိသောအရာကို ဝတ်ပြု” ကြသောကြောင့်ဖြစ်၏။—ယောဟန် ၄:၂၂။
ဤအကြောင်းများကြောင့်၊ ယေဟောဝါသက်သေများသည် ကလေးသူငယ်များ သို့မဟုတ် သမ္မာကျမ်းစာကို ဂရုတစိုက် မလေ့လာထားသည့် စိတ်ဝင်စားသူလူသစ်များကို နှစ်ခြင်းမပေးကြချေ။ ယေရှုက မိမိ၏နောက်တော်လိုက်များအား ဤသို့တာဝန်ပေးခဲ့သည်– “လူမျိုးတကာတို့ကို ငါ့တပည့်ဖြစ်စေလျက် . . . ငါသည် သင်တို့အားပေးသမျှသောပညတ်တော်တို့ကို စောင့်ရှောက်စေခြင်းငှာ ဆုံးမ . . . ပေးကြလော့။” (မဿဲ ၂၈:၁၉၊ ၂၀) ဘုရားသခင့်အလိုတော်နှင့်ဆိုင်သည့် တိကျမှန်ကန်သောအသိပညာမှန်ရရှိထားပြီးနောက်မှသာ စိတ်ရိုးမှန်သောကျမ်းစာကျောင်းသားများသည် ဝတ်ပြုရေးနှင့်ပတ်သက်၍ အသိတရားရှိရှိဆုံးဖြတ်ချက်ချနိုင်မည်ဖြစ်၏။ ထိုကဲ့သို့သော တိကျမှန်ကန်သည့်အသိပညာကိုရရှိရန် အသင်ကြိုးစားနေပါသလော။
သခင့်ဆုတောင်းချက်ကို သိနားလည်ခြင်း
တိကျမှန်ကန်သည့် သမ္မာကျမ်းစာအသိပညာရှိခြင်းနှင့် ကျမ်းစာကို အနည်းငယ်မျှသိခြင်းတို့၏ ကွာခြားမှုကိုသိမြင်ရန် မဿဲ ၆:၉-၁၃ တွင် မှတ်တမ်းတင်ထားသည့် အများခေါ်ဆိုကြသော အကျွန်ုပ်တို့၏အဘ သို့မဟုတ် သခင့်ဆုတောင်းချက်ကို သုံးသပ်ကြည့်ကြပါစို့။
ယေရှု၏စံပြဆုတောင်းချက်ကို ချာ့ခ်ျတွင် လူသန်းပေါင်းများစွာ ပုံမှန်ရွတ်ဆိုကြသည်။ သို့သော် ၎င်း၏အဓိပ္ပာယ်၊ အထူးသဖြင့် ဘုရားသခင့်နာမတော်၊ နိုင်ငံတော်နှင့်ပတ်သက်သည့် ဆုတောင်းချက်၏ပထမအပိုင်းကို လူပေါင်းမည်မျှသွန်သင်ခံခဲ့ရပြီနည်း။ ထိုအကြောင်းအရာများသည် အလွန်ပင်အရေးကြီးသောကြောင့် ဆုတောင်းချက်၏အစပိုင်းတွင် ယေရှုဖော်ပြခဲ့ရခြင်းဖြစ်၏။
ဆုတောင်းချက်ကဤသို့စတင်သည်– “ကောင်းကင်ဘုံ၌ရှိတော်မူသော အကျွန်ုပ်တို့၏အဘ၊ ကိုယ်တော်၏နာမတော်အား ရိုသေလေးမြတ်ခြင်းရှိပါစေသော။” ဘုရားသခင့်နာမတော်ကို ရိုသေလေးမြတ်ကြရန် ဆုတောင်းဖို့ ယေရှုမိန့်တော်မူခဲ့ကြောင်း သတိပြုပါ။ လူအများအတွက် ၎င်းက အနည်းဆုံး မေးခွန်းနှစ်ခုပေါ်ပေါက်စေပြီး ၎င်းတို့မှာ ပထမ၊ ဘုရားသခင့်နာမတော်ကား အဘယ်နည်းဖြစ်၍ ဒုတိယမှာ ယင်းကို အဘယ်ကြောင့်ရိုသေလေးမြတ်ဖို့ လိုအပ်ရသနည်းဖြစ်၏။
ပထမမေးခွန်းအတွက်အဖြေကို မူရင်းဘာသာစကားများဖြင့် ရေးသားထားသော သမ္မာကျမ်းစာတွင် နေရာပေါင်း ၇,၀၀၀ ကျော်၌ တွေ့ရှိနိုင်ပေသည်။ တစ်နေရာမှာ ဆာလံ ၈၃:၁၈ ၌ဖြစ်သည်– “[“ယေဟောဝါ၊” ကဘ] ဟူ၍နာမတော်ရှိသော ကိုယ်တော်တစ်ပါးတည်းသာလျှင် မြေကြီးတစ်ပြင်လုံးအပေါ်မှာ အမြင့်ဆုံးသောဘုရား[သခင်]ဖြစ်တော်မူကြောင်းကို သိကြပါစေသော။” ယေဟောဝါဟူသော ဘုရားသခင့်နာမတော်နှင့်စပ်လျဉ်း၍ ထွက်မြောက်ရာ ၃:၁၅ ကဤသို့ဆိုသည်– “ထိုအမည်သည် အစဉ်ငါ့အမည်ဖြစ်၏။ လူမျိုးအစဉ်အဆက်မပြတ် ငါ့ဘွဲ့နာမဖြစ်၏။” * သို့သော် စင်ကြယ်သန့်ရှင်းမှု၏ ပြယုဂ်ဖြစ်တော်မူသော ဘုရားသခင့်နာမတော်ကို အဘယ်ကြောင့်ရိုသေလေးမြတ်ဖို့ လိုအပ်လာသနည်း။ အကြောင်းမှာ ထိုနာမတော်သည် လူ့သမိုင်းအစကတည်းက အပုပ်ချပြစ်တင်ခံခဲ့ရသောကြောင့်ဖြစ်၏။
ဘုရားသခင်သည် အာဒံနှင့်ဧဝတို့အား တားမြစ်ထားသောအသီးကိုစားပါက သေရမည်ဟု ဧဒင်ဥယျာဉ်၌ မိန့်တော်မူခဲ့၏။ (ကမ္ဘာဦး ၂:၁၇) စာတန်သည် ဧဝအား “သင်တို့သည် ဧကန်အမှန်သေရမည်မဟုတ်” ဟုပြောဆိုလျက် ဘုရားသခင်အား ပြောင်ပြောင်တင်းတင်း ဆန့်ကျင်ပြောဆိုခဲ့သည်။ သို့ဖြင့် ဘုရားသခင်အား စာတန်က မုသားသုံးသူဟူ၍ စွပ်စွဲခဲ့သည်။ သို့တိုင်၊ ထိုသို့နှင့် သူ,မရပ်တန့်ခဲ့ချေ။ ဘုရားသခင်သည် အဖိုးတန်အသိပညာကို ဧဝအားမပေးဘဲ မတရားသဖြင့်ထိန်ချန်ထားသည်ဟု သူ့ကိုပြောဆိုလျက် ဘုရားသခင့်နာမတော်ကို ထပ်၍ရှုတ်ချခဲ့သည်။ “အကြောင်းမူကား ထို [ကောင်းမကောင်းသိကျွမ်းရာအပင်မှ] အသီးကိုစားသောနေ့၌ သင်တို့သည်မျက်စိပွင့်လင်းလျက် ကောင်းမကောင်းကိုသိ၍ ဘုရားသခင်ကဲ့သို့ဖြစ်ကြလတ္တံ့သည်ကို ဘုရားသခင်သိတော်မူသည်။” သားပုပ်လေလွင့်ပြောဆိုမှု အမှန်ပါတကား!—ကမ္ဘာဦး ၃:၄၊ ၅။
အာဒံနှင့်ဧဝတို့သည် တားမြစ်ထားသောအသီးကို ယူစားလိုက်ခြင်းအားဖြင့် စာတန်ဘက်ရပ်တည်ခဲ့ကြသည်။ ထိုအချိန်မှစ၍ လူသားအများစုသည် သိလျက်နှင့်ဖြစ်စေ၊ မသိဘဲနှင့်ဖြစ်စေ ဘုရားသခင့်ဖြောင့်မတ်သောစံနှုန်းများကို ငြင်းပယ်ခြင်းအားဖြင့် ထိုမူလရှုတ်ချမှုကို တိုးများစေခဲ့ကြ၏။ (၁ ယောဟန် ၅:၁၉) လူတို့သည် မိမိတို့၏ မကောင်းသောအကျင့်များကြောင့် ဝေဒနာခံရသည့်တိုင် မိမိတို့၏ဆင်းရဲခြင်းဝေဒနာများသည် ဘုရားသခင်ကြောင့်ဖြစ်၏ဟု ကိုယ်တော်အားအပြစ်ဖို့ခြင်းအားဖြင့် ဘုရားသခင်ကိုအပုပ်ချပြောဆိုနေဆဲပင်။ “လူတစ်ဦး၏မိုက်မဲမှုက သူ၏ဘဝကိုပျက်စီးစေ၍ စိတ်ထဲမှာ ဘုရားသခင်ကိုမကျေမနပ်ဖြစ်တတ်သည်” ဟု နယပုံပြင် ၁၉:၃ ကဆို၏။ (အင်္ဂလိပ်ကျမ်းစာသစ်) ခမည်းတော်ကို အမှန်စင်စစ်ချစ်မြတ်နိုးသောယေရှုသည် ကိုယ်တော့်နာမတော်အား ရိုသေလေးမြတ်ခြင်းရှိပါစေသောဟု အဘယ်ကြောင့်ဆုတောင်းခဲ့ရကြောင်းကို သင်သဘောပေါက်ပါသလော။
“နိုင်ငံတော်လာပါစေ”
ဘုရားသခင့်နာမတော်အား ရိုသေလေးမြတ်ခြင်းရှိပါစေသောဟု ဆုတောင်းပြီးနောက် ယေရှုက “နိုင်ငံတော်လာပါစေ။ အလိုတော်သည် ကောင်းကင်ဘုံ၌ပြည့်စုံသကဲ့သို့ မြေကြီးပေါ်မှာ ပြည့်စုံပါစေ” ဟုမိန့်ဆိုတော်မူခဲ့သည်။ (မဿဲ ၆:၁၀၊ ကဘ) ထိုကျမ်းပိုဒ်နှင့်ပတ်သက်၍ ကျွန်ုပ်တို့ဤသို့မေးပေမည်– ‘ဘုရားသခင့်နိုင်ငံတော်ကား အဘယ်နည်း။ ၎င်းရောက်ရှိလာခြင်းက ဘုရားသခင့်အလိုတော် မြေကြီးပေါ်မှာပြည့်စုံခြင်းနှင့် မည်သို့ဆက်စပ်သနည်း။’
သမ္မာကျမ်းစာတွင် “နိုင်ငံတော်” ဟူသည့်စကားလုံးသည် အခြေခံအားဖြင့် “ဘုရင်တစ်ပါးအုပ်ချုပ်သည့်အာဏာ” ကိုဆိုလိုသည်။ ထို့ကြောင့် ဆင်ခြင်တုံတရားအရ ဘုရားသခင့်နိုင်ငံတော်သည် ဘုရားသခင်ရွေးချယ်သည့်ဘုရင်တစ်ပါး အုပ်ချုပ်သောအုပ်ချုပ်မှု သို့မဟုတ် အစိုးရကို ရည်ညွှန်းပေမည်။ ဤရှင်ဘုရင်သည် ရှင်ပြန်ထမြောက်လာခဲ့သည့် “ဘုရင်တို့၏ဘုရင်၊ သခင်တို့၏သခင်” ယေရှုခရစ်ပင်ဖြစ်၏။ (ဗျာဒိတ် ၁၉:၁၆; ဒံယေလ ၇:၁၃၊ ၁၄) ယေရှုခရစ်၏လက်ထဲရှိ ဘုရားသခင့်မေရှိယနိုင်ငံတော်နှင့်စပ်လျဉ်း၍ ပရောဖက်ဒံယေလက ဤသို့ရေးသားခဲ့သည်– “ပျက်စီးခြင်းသို့မရောက်နိုင်သောနိုင်ငံတစ်ခုကို ထိုမင်းကြီးများ [လက်ရှိအုပ်ချုပ်နေသည့် လူ့အစိုးရများ] လက်ထက်၌ ကောင်းကင်ဘုံရှင်ဘုရားသခင်သည် တည်ထောင်စေတော်မူမည်။ ထိုနိုင်ငံသည် အခြားသောလူမျိုးလက်သို့မရောက်ရဘဲ အထက်ဆိုခဲ့ပြီးသောနိုင်ငံရှိသမျှတို့ကိုချိုးဖဲ့ဖျက်ဆီး၍ အစဉ်အမြဲတည်လိမ့်မည်။”—ဒံယေလ ၂:၄၅။
မှန်ပါသည်၊ ဘုရားသခင့်နိုင်ငံတော်သည် ဆိုးယုတ်မှုမှန်သမျှကို ဖျက်ဆီးပစ်ကာ ကမ္ဘာမြေကြီးကို အပြည့်အဝထိန်းချုပ်ပြီး “အစဉ်အမြဲ” ထာဝရအုပ်ချုပ်သွားလိမ့်မည်။ ဘုရားသခင့်နိုင်ငံတော်အားဖြင့် ယေဟောဝါသည် မိမိ၏နာမတော်ကို သန့်ရှင်းစင်ကြယ်စေတော်မူပြီး စာတန်နှင့် ဆိုးသွမ်းသောလူသားများ၏ လိမ်ညာရှုတ်ချပြောဆိုမှုမှန်သမျှကို ရှင်းလင်းတိုက်ထုတ်လိုက်မည်ဖြစ်၏။—ယေဇကျေလ ၃၆:၂၃၊ သမ္မာ။
အစိုးရအားလုံးနည်းတူ ဘုရားသခင့်နိုင်ငံတော်တွင် လက်အောက်ခံပြည်သူများရှိ၏။ အဘယ်သူများနည်း။ သမ္မာကျမ်းစာက ဤသို့ဖြေဆို၏– “စိတ်နှိမ့်ချသောသူတို့မူကား ပြည်တော်ကိုအပိုင်ရ၍ များပြားသောငြိမ်သက်ခြင်းချမ်းသာ၌ မွေ့ပျော်ကြလိမ့်မည်။” (ဆာလံ ၃၇:၁၁၊ ကဘ) အလားတူ ယေရှုကလည်း “စိတ်နူးညံ့သိမ်မွေ့သောသူတို့သည် မင်္ဂလာရှိ [“ပျော်ရွှင်၊” ကဘ] ကြ၏။ အကြောင်းမူကား၊ ထိုသူတို့သည် ပြည်တော် [“မြေကြီး၊” ကဘ] ကိုအမွေခံရကြလတ္တံ့” ဟုမိန့်တော်မူခဲ့သည်။ အသက်ရှင်ရန် တောင်းဆိုချက်တစ်ခုဖြစ်သည့် ဘုရားသခင်၏တိကျမှန်ကန်သောအသိပညာ ဤသူတို့တွင် အမှန်ရှိ၏။—မဿဲ ၅:၅; ယောဟန် ၁၇:၃။
ဘုရားသခင်ကို အမှန်တကယ်ချစ်မြတ်နိုးပြီး တစ်ဦးကိုတစ်ဦးချစ်ခင်ကြသည့် စိတ်နူးညံ့သိမ်မွေ့သောလူတို့ဖြင့် ကမ္ဘာမြေတစ်ခုလုံးပြည့်နေခြင်းကို အသင်စိတ်ကူး၍မြင်နိုင်ပါသလော။ (၁ ယောဟန် ၄:၇၊ ၈) ယေရှုက “နိုင်ငံတော်လာပါစေ။ အလိုတော်သည် ကောင်းကင်ဘုံ၌ပြည့်စုံသကဲ့သို့ မြေကြီးပေါ်မှာပြည့်စုံပါစေ” ဟုမိန့်ဆိုစဉ် ထိုသို့ဖြစ်စေရန် တောင်းလျှောက်ခဲ့ခြင်းပင်ဖြစ်၏။ ကိုယ်တော်သည် ထိုနည်းလမ်းအတိုင်း ဆုတောင်းကြရန် မိမိ၏နောက်လိုက်များအား အဘယ်ကြောင့်သွန်သင်တော်မူခဲ့ရကြောင်း အသင်သဘောပေါက်ပါသလော။ ထိုထက်အရေးကြီးသည်ကား၊ ထိုဆုတောင်းချက်၏ပြည့်စုံမှုသည် သင့်အတွက် အဘယ်အကျိုးရှိကြောင်း သဘောပေါက်ပါသလော။
ယခု လူသန်းပေါင်းများစွာ ကျမ်းစာကိုကျိုးကြောင်းဆင်ခြင်နေကြ
ဘုရားသခင်၏လာလတ္တံ့သောနိုင်ငံတော်ကို ကြေညာကြမည့် ကမ္ဘာချီဝိညာဉ်ရေးပညာပေးကင်ပိန်းတစ်ခုကို ယေရှုတင်ကူးမိန့်မြွက်ခဲ့သည်။ “လူမျိုးအပေါင်းတို့အားသက်သေဖြစ်မည်အကြောင်း [ဘုရားသခင့်] နိုင်ငံတော်နှင့်ယှဉ်သောဧဝံဂေလိတရားကို လောကီ [က]နိုင်ငံအရပ်ရပ်ရှိသမျှတို့၌ ဟောရလိမ့်မည်။ သို့ပြီးမှ [လက်ရှိလောက သို့မဟုတ် စနစ်၏] အဆုံးသည်ဖြစ်လတ္တံ့” ဟုကိုယ်တော်မိန့်ဆိုတော်မူခဲ့၏။—မဿဲ ၂၄:၁၄။
ကမ္ဘာနှင့်အဝန်း ခြောက်သန်းခန့်ရှိသော ယေဟောဝါသက်သေများသည် ထိုသတင်းကောင်းကို မိမိတို့၏အိမ်နီးချင်းများအား ဟောပြောလျက်ရှိ၏။ သင်၏ဆင်ခြင်နိုင်စွမ်းကိုအသုံးပြု၍ “ကျမ်းစာကို စေ့စေ့မြေ့မြေ့စူးစမ်းလေ့လာခြင်း” အားဖြင့် ဘုရားသခင်နှင့် ကိုယ်တော့်နိုင်ငံတော်အကြောင်း ပို၍သင်ယူသိရှိရန် သင့်အားသူတို့ဖိတ်ခေါ်ပါသည်။ ထိုသို့ပြုလုပ်ခြင်းအားဖြင့် သင်၏ယုံကြည်ခြင်း ခိုင်ခံ့လာပြီး “ပင်လယ်ရေသည် မိမိနေရာကိုလွှမ်းမိုးသကဲ့သို့ . . . ထာဝရဘုရား [ယေဟောဝါ] ကို သိကျွမ်းခြင်းပညာနှင့်ပြည့်စုံ” မည့် ပရဒိသုမြေကြီးပေါ် အသက်ရှင်နိုင်သည့်မျှော်လင့်ချက်ဖြင့် သင့်မျက်လုံးများ ရွှန်းလဲ့တောက်ပနေပေလိမ့်မည်။—ဟေရှာယ ၁၁:၆-၉။
[အောက်ခြေမှတ်ချက်]
^ အပိုဒ်၊ 14 အချို့ပညာရှင်များက “ယေဟောဝါ” အစား “ယာဝေး” ဟု ဘာသာပြန်ခြင်းကို နှစ်သက်ကြ၏။ သို့ရာတွင်၊ ခေတ်သစ်သမ္မာကျမ်းစာပြန်ဆိုသူအများစုသည် သူတို့၏ဘာသာပြန်ကျမ်းများမှ ဘုရားသခင့်နာမတော်ကို ဖယ်ရှားပစ်ကာ “သခင်” သို့မဟုတ် “ဘုရားသခင်” ဟူသည့် သာမန်ဂုဏ်ပုဒ်များဖြင့် အစားထိုးထားသည်။ ဘုရားသခင့်နာမတော်အကြောင်း ခရေစေ့တွင်းကျဆွေးနွေးမှုအတွက် ယေဟောဝါသက်သေများထုတ်ဝေသည့် ထာဝစဉ်တည်တံ့သွားမည့် မြင့်မြတ်သောနာမတော်ဘရိုရှာကို ကျေးဇူးပြု၍ရှုပါ။
[စာမျက်နှာ ၈ ပါ လေးထောင့်ကွက်/ ရုပ်ပုံ]
ကြီးမြတ်သောဆရာကို အတုယူလော့
ယေရှုသည် ကျမ်းစာအကြောင်းတစ်ခုခုကို အဓိကအာရုံစိုက်ပြီး သွန်သင်လေ့ရှိ၏။ ဥပမာ၊ယေရှု၏သေခြင်းနှင့်ပတ်သက်၍ ဇဝေဇဝါဖြစ်နေကြသော တပည့်တော်နှစ်ဦးအား ဘုရားသခင့်ရည်ရွယ်တော်မူချက်တွင် မိမိ၏ကဏ္ဍအကြောင်းကို ကိုယ်တော်ရှင်ပြန်ထမြောက်ပြီးနောက် ရှင်းပြတော်မူခဲ့၏။ လုကာ ၂၄:၂၇ ကဤသို့ဆို၏– “မောရှေ၏ကျမ်းစာမှစ၍ ပရောဖက်တို့၏ကျမ်းစာများ၌ ကိုယ်တော်ကိုရည်မှတ်၍ ရေးထားသမျှသောကျမ်းစာချက်အနက်ကို ရှင်းလင်းစွာဖော်ပြတော်မူ၏။”
ယေရှုသည် မေရှိယဖြစ်သူ “ကိုယ်တော်တိုင်” အကြောင်းကို သတ်သတ်မှတ်မှတ်ရွေးချယ်ပြီး “ကျမ်းစာများ” ကို ကိုးကားဆွေးနွေးခဲ့ကြောင်း သတိပြုပါ။ တစ်နည်းအားဖြင့်ဆိုလျှင် ယေရှုသည် ဆက်စပ်နေသောကျမ်းချက်များကို ဉာဏ်စမ်းကစားစရာ အပိုင်းအစများကဲ့သို့ ပေါင်းစပ်လိုက်ရာ ဝိညာဉ်ရေးအမှန်တရား၏ပုံစံတစ်ခုကို တပည့်တော်များအား ရှင်းရှင်းလင်းလင်းမြင်စေခဲ့သည်။ (၂ တိမောသေ ၁:၁၃) ရလဒ်အနေနှင့် သူတို့သည် ဉာဏ်အလင်းထွန်းလင်းခဲ့သည်သာမက အကြီးအကျယ်လှုံ့ဆော်ခံခဲ့ကြရ၏။ ကျွန်ုပ်တို့အား မှတ်တမ်းကဤသို့ဆို၏– “တပည့်တော်တို့ကလည်း၊ ‘လမ်းခရီး၌ ငါတို့နှင့်ဟောပြော၍ ကျမ်းစာအနက်ကိုဖွင့်ပြတော်မူသောအခါ၊ ငါတို့စိတ်နှလုံးသည် ယိုဖိတ်မတတ်ဖြစ်သည်မဟုတ်လော’ ဟု အချင်းချင်းပြောဆိုကြ၏။”—လုကာ ၂၄:၃၂။
ယေဟောဝါသက်သေများသည် မိမိတို့၏ဓမ္မအမှုတွင် ယေရှု၏နည်းလမ်းများကိုအတုယူရန် ကြိုးစားကြသည်။ သူတို့အသုံးပြုသည့် အဓိကအထောက်အကူပြုစာပေများမှာ ကျွန်ုပ်တို့ထံမှ ဘုရားသခင်အဘယ်အရာတောင်းဆိုတော်မူသနည်းဘရိုရှာနှင့် ထာဝရအသက်ရစေသော အသိပညာစာအုပ်တို့ ဖြစ်၏။ ထိုစာအုပ်များက “ဘုရားသခင်ကား မည်သူနည်း၊” “ဆင်းရဲဒုက္ခကို ဘုရားသခင်အဘယ်ကြောင့်ခွင့်ပြုတော်မူသနည်း၊” “စစ်မှန်သောဘာသာကို သင်မည်သို့တွေ့ ရှိနိုင်မည်နည်း၊” “ယခုနေ့ရက်များသည် နောက်ဆုံးသောနေ့ရက်များဖြစ်၏!” နှင့် “ဘုရားသခင်အားဂုဏ်တင်သည့် မိသားစုတစ်စုအဖြစ် တည်ဆောက်ခြင်း” အစရှိသည့် စိတ်ဝင်စားဖွယ်ကောင်းသော ကျမ်းစာအကြောင်းအရာများစွာတို့ကို ဖော်ပြထားသည်။ သင်ခန်းစာတစ်ခုစီတွင် ကျမ်းချက်များစွာပါရှိ၏။
သင့်ဒေသရှိ ယေဟောဝါသက်သေများကိုဆက်သွယ်ရန် သို့မဟုတ် ဤအကြောင်းအရာများနှင့် အခြားသောအကြောင်းအရာများနှင့်ပတ်သက်၍ အခမဲ့အိမ်တွင်းကျမ်းစာသင်အံမှုတောင်းဆိုရန် ဤမဂ္ဂဇင်း၏ စာမျက်နှာ ၂ တွင်ပါရှိသော လိပ်စာတစ်ခုကိုတပ်၍ စာရေးရန် သင့်အားကြိုဆိုပါသည်။
[ရုပ်ပုံ]
ကျမ်းစာအကြောင်းအရာတစ်ခုခုကို အဓိကအာရုံစိုက် ဆွေးနွေးခြင်းအားဖြင့် သင့်သင်သား၏နှလုံးကို ထိမိစေပါကြီးမြတ်သောဆရာကို အတုယူလော့
[စာမျက်နှာ ၇ ပါ ရုပ်ပုံ]
ယေရှု၏စံပြဆုတောင်းချက်၏အဓိပ္ပာယ်ကို အသင်နားလည်သဘောပေါက်ပါသလော
“ကောင်းကင်ဘုံ၌ရှိတော်မူသော အကျွန်ုပ်တို့၏အဘ၊ ကိုယ်တော်၏နာမတော်အား ရိုသေလေးမြတ်ခြင်း ရှိပါစေသော . . . ”
“[မေရှိယ] နိုင်ငံတော်တည်ထောင်ပါစေသော . . . ”
“အလိုတော်သည် ကောင်းကင်ဘုံ၌ပြည့်စုံသကဲ့သို့ မြေကြီးပေါ်မှာပြည့်စုံပါစေသော”