ဖိလစ်ပိုင် တောင်တန်းများတွင် ဘုရားသခင်အား ဂုဏ်တင်ခြင်း
ဖိလစ်ပိုင် တောင်တန်းများတွင် ဘုရားသခင်အား ဂုဏ်တင်ခြင်း
ဖိလစ်ပိုင်ကို ကျွန်းနိုင်ငံအဖြစ် ထင်မြင်ယူဆမည်ဆိုလျှင် သင်မှန်ပါသည်။ သို့သော် ယင်းသည် စွဲမှတ်ဖွယ်တောင်တန်းများရှိသော နိုင်ငံတစ်နိုင်ငံလည်းဖြစ်သည်။ မြို့များနှင့် မြေနိမ့်ပိုင်းနယ်မြေဒေသများ၌ ဟောပြောရခြင်းသည် ယေဟောဝါသက်သေများအတွက် အတော်ပင်လွယ်ကူပြီး အကျိုးလည်းထိရောက်ပါသည်။ သို့သော် တောင်တန်းဒေသများ၌မူ ထိုသို့မဟုတ်ချေ။
ဤနိုင်ငံ၏ထည်ဝါသောတောင်တန်းများသည် သဲသောင်ပြင်ကြီးများ၊ သန္တာကျောက်တန်းများ၊ တံငါရွာများနှင့် လွင်ပြင်ဒေသရှိ စည်ကားသောမြို့များနှင့် ထီးထီးကြီးခြားနားပေသည်။ ထိုတောင်တန်းဒေသတွင် ဘုရားသခင့်နိုင်ငံတော် “သတင်းကောင်း” ဟောပြောရာတွင် ခက်ခဲသည်။—မဿဲ ၂၄:၁၄။
ဖိလစ်ပိုင်ကျွန်းများသည် တက်တိုနစ်ကျောက်လွှာနှစ်လွှာ ပေါင်းဆုံမိရာနေရာ၌ တည်ရှိသည်။ ဤဒေသတွင် မြေတွန့်တက်လာခြင်းက ပိုကြီးသောကျွန်းများပေါ်တွင် မြင့်မားထိုးထွက်သောတောင်တန်းများ ဖြစ်ပေါ်စေခဲ့သည်။ ကျွန်းပေါင်း ၇,၁၀၀ ကျော်ပါရှိသည့် ဖိလစ်ပိုင်နိုင်ငံသည် ပစိဖိတ်မီးတောင်စက်ဝန်း၏ အနောက်ပိုင်းတွင် တည်ရှိသည်။ ထို့ကြောင့် ၎င်းကျွန်းများပေါ်တွင် မီးတောင်များစွာရှိရာ တောင်ထူထပ်သောရှုခင်းများပေါ်နေသည်။ ထိုကြမ်းတမ်းသောနယ်မြေဒေသက တောင်ပေါ်သားများကို သီးခြားဖြစ်စေခဲ့သည်။ မော်တော်ကားလမ်းများ နည်းသောကြောင့် သူတို့ထံရောက်ဖို့လည်း ခက်သည်။
ဤအခက်အခဲများကြားမှ “လူအပေါင်း” ထံသတင်းကောင်းရောက်ဖို့လိုကြောင်း ယေဟောဝါသက်သေများ သိနားလည်ကြသည်။ (၁ တိမောသေ ၂:၄) သို့ဖြင့် ဖိလစ်ပိုင်နိုင်ငံရှိ သက်သေခံများသည် ဟေရှာယ ၄၂:၁၁၊ ၁၂ ပါ ဤစိတ်ထားနှင့်အညီ လုပ်ဆောင်ခဲ့ကြပြီ– “ကျောက်၌နေသောသူတို့သည် သီချင်းဆိုကြစေ။ တောင်ထိပ်ပေါ်က ကြွေးကြော်ကြစေ။ ထာဝရဘုရားကို ချီးမြှောက်၍ တစ်ကျွန်းတစ်နိုင်ငံအရပ်တို့၌ ဂုဏ်တော်ကို ထင်ရှားစွာချီးမွမ်းကြစေ။”
လွန်ခဲ့သောအနှစ် ၅၀ ကျော်ကတည်းကစ၍ တောင်ပေါ်သားများကို ဖိဖိစီးစီး ကြိုးစားသက်သေခံခဲ့ကြသည်။ ဒုတိယကမ္ဘာစစ်ပြီးနောက် ခရစ်ယာန်သာသနာပြုများသည် ထိုလုပ်ငန်းကို တွန်းအားပေးခဲ့ကြသည်။ ကျမ်းစာအမှန်တရားကို ဒေသခံများစွာ လက်ခံခဲ့ကြရာ ဤအမှန်တရားကို တောင်တန်းဒေသရှိ အခြားကျေးရွာများထံသို့လည်း တစ်ဖန်ဖြန့်ချိပေးခဲ့ကြသည်။ ယင်းကြောင့် ရလဒ်ကောင်းများစွာရရှိခဲ့၏။ ဥပမာ၊ မြောက်ပိုင်းလူဇုန်ကျွန်းရှိ ခေါဒီလဲရာဗဟိုတောင်တန်းတွင် သတင်းကောင်းကြေညာသူ ၆,၀၀၀ ကျော်ရှိသည်။ ထိုသူအများစုမှာ ဒေသခံ တိုင်းရင်းသားများဖြစ်ကြသည့် အဘားလိုလူမျိုး၊ အဖူဂါအိုလူမျိုးနှင့် ကလင်းဂါလူမျိုးများဖြစ်သည်။
သို့ရာတွင် ရောက်ဖို့ခဲယဉ်းသည့် တောင်တန်းဒေသများရှိသေးသည်။ သို့သော် ထိုတွင်နေထိုင်ကြသူများကိုလည်း မေ့မထားပါ။ ထိုသူအချို့ထံ ရောက်ရှိခဲ့ပြီလော၊ သူတို့ မည်သို့တုံ့ပြန်ခဲ့ကြပြီနည်း။
ထုံးတမ်းစဉ်လာအစား စစ်မှန်သောယုံကြည်ခြင်း
မြောက်ပိုင်းလူဇုန်ကျွန်းရှိ အယ်ဘရာပြည်နယ် တောင်တန်းဒေသများတွင် တင်ဂျင်းလူမျိုးများနေထိုင်ကြသည်။ ၎င်းအမည်သည် “တောင်တန်း” ဟုအဓိပ္ပာယ်ရှိသော ရှေးခေတ်မလေးစကားလုံး တင်ဂျီမှဆင်းသက်လာခြင်းဖြစ်နိုင်သည်။ အမှန်သင့်လျော်လှသည်တကား! ထိုသူတို့သည် မိမိတို့ကိုယ်တိုင်နှင့် သူတို့၏ဘာသာစကားကို အစ်နက်ဂ်ဟူ၍လည်း ခေါ်ဆိုကြသည်။ သူတို့သည် ကာဘူနီယံအမည်ရှိ ဘုရားတစ်ဆူကို ယုံကြည်ကြပြီး အယူသီးမှုက သူတို့၏နေ့စဉ်အသက်တာကို အလွန်သြဇာညောင်းသည်။ ဥပမာ၊ တစ်နေရာရာသို့သွားဖို့ အစီအစဉ်ရှိသူတစ်ဦးသည် နှာချေခဲ့သော် နိမိတ်မကောင်းပေ။ ဆိုးကျိုးပြယ်ပျောက်သွားဖို့ နာရီအနည်းငယ်ခန့် သူစောင့်ဆိုင်းရပေမည်။
၁၅၇၂ ခုနှစ်တွင် စပိန်လူမျိုးနှင့်အတူ ကက်သလစ်အယူဝါဒရောက်လာသည်၊ သို့သော် စစ်မှန်သောခရစ်ယာန်ဘာသာတရားကို တင်ဂျင်းလူမျိုးတို့အား သွန်သင်မပေးခဲ့ကြချေ။ ကက်သလစ်များဖြစ်လာကြသူတို့သည် ကာဘူနီယံကိုဆက်ယုံကြည်ကြ၍ ဒေသခံထုံးစံများကို လိုက်မြဲလိုက်ကြသည်။ ၁၉၃၀ ပြည့်လွန်နှစ်များတွင် ထိုတောင်တန်းများ၌ ဘုရားသခင့်နိုင်ငံတော်သတင်းကို ယေဟောဝါသက်သေများ စတင်ဟောပြောခဲ့ရာ ၎င်းလူမျိုးထံသို့ ကျမ်းစာမှတိကျမှန်ကန်သောအသိပညာ ဦးဆုံးရောက်ရှိခဲ့သည်။ ထိုအချိန်မှစ၍ စိတ်ရိုးဖြောင့်သူ တင်ဂျင်းများစွာတို့သည် ယေဟောဝါကို “တောင်ထိပ်ပေါ်” မှ ချီးမွမ်းစပြုခဲ့ကြသည်။
သာဓကအနေနှင့် လင်ဘဝမ်းသည် ယခင်က ထိုနယ်မြေတွင် ရိုသေလေးစားခံရသော လူမျိုးစုခေါင်းဆောင်တစ်ဦး ဖြစ်၏။ သူသည် တင်ဂျင်းယဉ်ကျေးမှုကို အတော်ပင် လိုက်စားခဲ့သည်။ “တင်ဂျင်းထုံးတမ်းစဉ်လာတွေကို ကျွန်တော်သစ္စာရှိရှိ လိုက်လျှောက်ခဲ့တာ။ လူတစ်ယောက် အသတ်ခံရရင် မြှုပ်နှံသင်္ဂြိုဟ်ပြီးတော့ ကျွန်တော်တို့ကကြ၊ ပြီးတော့ ကြေးစည်တီးကြတယ်။ တိရစ္ဆာန်တွေကိုလည်း ယဇ်ပူဇော်ကြတယ်။ ကာဘူနီယံကို ကျွန်တော်တို့ ယုံကြည်ကြပြီး ကျမ်းစာမှာပါတဲ့ ဘုရားသခင်ကိုတော့ ကျွန်တော်မသိခဲ့ဘူး။” သူသည် ကက်သလစ်တစ်ဦးဖြစ်လျက်နှင့် ထိုသို့ဖြစ်ခဲ့ရှာသည်။
ယေဟောဝါသက်သေဓမ္မအမှုဆောင်များ ထိုဒေသသို့ ရောက်လာပြီး ဟောပြောခဲ့ကြသည်။ လင်ဘဝမ်းကို သူတို့တွေ့ဆုံခဲ့ကြပြီး ကျမ်းစာကိုဖတ်ရှုဖို့ သူ့ကိုတိုက်တွန်းခဲ့ကြ၏။ သူဤသို့ပြန်ပြောပြသည်– “ယေဟောဝါဟာ စစ်မှန်တဲ့ဘုရားသခင်ဖြစ်တယ်ဆိုတာကို ကျမ်းစာက ကျွန်တော့်ကိုယုံကြည်သက်ဝင်စေခဲ့တယ်။” ထို့နောက် သက်သေခံတစ်ဦးက သူနှင့်ကျမ်းစာလေ့လာခဲ့ရာ လင်ဘဝမ်းသည် စစ်မှန်သောဘုရားသခင်ကို ဝတ်ပြုကိုးကွယ်ဖို့ စိတ်ဆုံးဖြတ်ခဲ့သည်။ မျိုးနွယ်စုခေါင်းဆောင်ရာထူးအပါအဝင် ယခင်လမ်းစဉ်များကို လင်ဘဝမ်းစွန့်လွှတ်ခဲ့ရာ ဒေသခံခရစ်ယာန်ဘုန်းကြီးနှင့် သူ၏အပေါင်းအသင်းဟောင်းများက စိတ်ဆိုးခဲ့ကြသည်။ သို့သော် လင်ဘဝမ်းသည် ကျမ်းစာထဲမှ သူသိရှိလာသောအမှန်တရားကို လိုက်လျှောက်ဖို့စိတ်ဆုံးဖြတ်ခဲ့သည်။ ယခု သူသည် အသင်းတော်အကြီးအကဲတစ်ဦးအဖြစ် အမှုထမ်းလျက်ရှိ၏။
ခုနစ်ရက်နှင့် ခြောက်ည
ယခုအခါ အယ်ဘရာဒေသအချို့၌ သတင်းကောင်းကို ပုံမှန်ဆိုရမလောက် ကြားနာနေရသော်လည်း အခြားဝေးလံသောဒေသများသို့မူ တစ်ခါတစ်ရံသာ သွားရောက်သက်သေခံနိုင်သည်။ မကြာသေးမီက ဤသို့သောဒေသတစ်ခုသို့သွားကြဖို့ ကြိုးစားခဲ့သည်။ သက်သေခံ ၃၅ ယောက်အုပ်စုတစ်စုသည် ၂၇ နှစ်တိုင် သက်သေခံရန် မရောက်ခဲ့သည့် ခန့်အပ်မထားသောရပ်ကွက်ဖြစ်သော ထီးနက်ဒ်၊ အယ်ဘရာသို့သွားခဲ့ကြသည်။
ဤဟောပြောခြင်း ခြေလျင်ခရီးစဉ်ကို ဆောင်ရွက်ရန်ခုနစ်ရက်ကျော် လမ်းလျှောက်ခဲ့ရကြ၏။ မိမိရိက္ခာကို မိမိသယ်ဆောင်လျက် ကြိုးတံတားများနှင့် နက်ရှိုင်းသောမြစ်များကို ဖြတ်ကျော်ကာ တောင်တန်းများကို နာရီပေါင်းများစွာ ဖြတ်ကျော်လျှောက်သွားခဲ့ကြသည်ကို မြင်ယောင်ကြည့်ပါ၊ ထိုသို့ပြုကြခြင်းသည် သတင်းကောင်းကြားခဲသောသူတို့အား ဟောပြောဖို့ဖြစ်သည်! ထိုခရီးစဉ်၏ခြောက်ညမှ လေးညကို လဟာပြင်၌ တောင်လေအတိုက်ခံပြီး အိပ်စက်ခဲ့ကြသည်။
၎င်းခရီးစဉ်တွင်ပါဝင်ခဲ့သည့် ကျန်းမာသန်စွမ်းသောသက်သေခံများသည် အစားအစာယူဆောင်သွားခဲ့ကြသော်လည်း ခရီးစဉ်တစ်လျှောက်လုံးအတွက် အလုံအလောက်မသယ်နိုင်ခဲ့ကြချေ။ သို့သော် ယင်းသည် ပြဿနာမဟုတ်ခဲ့ပါ၊ အကြောင်းမှာ ကျမ်းစာအခြေပြုစာပေစာတမ်းများအတွက် အစားအစာနှင့် အားရဝမ်းသာလဲလှယ်ယူလိုကြသူ များစွာရှိသောကြောင့်ပင်။ လယ်ယာထွက်ဟင်းသီးဟင်းရွက်၊ ငါးနှင့် ဒရယ်သားမြောက်မြားစွာကို သက်သေခံများရရှိခဲ့ကြသည်။ အခက်အခဲအချို့ရှိခဲ့သော်လည်း ထိုအုပ်စုကဤသို့ဆိုသည်– “ကျွန်တော်တို့အနစ်နာခံခဲ့တာတွေထက် အဆပေါင်းများစွာသာလွန်တဲ့ ပျော်ရွှင်မှုကို ခံစားခဲ့ကြရတယ်။”
၎င်းခုနစ်ရက်အတွင်း ထိုသက်သေခံများသည် ကျေးရွာဆယ်ရွာ၌ သက်သေခံခဲ့ကြ၍ စာအုပ်ကြီး ၆၀၊ မဂ္ဂဇင်း ၁၈၆ စောင်၊ ဘရိုရှာ ၅၀ နှင့်ဝေစာများစွာကို ဝေငှခဲ့ကြရသည်။ ကျမ်းစာသင်အံမှုများကို မည်သို့ကျင်းပကြောင်း ၇၄ အုပ်စုအား တင်ဆက်ပြသခဲ့ကြသည်။ တင်နက်ဂ်မြို့တွင် ဒေသခံအရာရှိများနှင့် အထင်ကရမြို့သားအချို့၏တောင်းဆိုမှုဖြင့် အသင်းတော်အစည်းအဝေးတစ်ခုကျင်းပခဲ့ရာ ၇၈ ဦးတက်ရောက်ခဲ့သည်။ တက်ရောက်သူအများစုမှာ ဆရာ၊ ဆရာမများနှင့် ရဲများဖြစ်ကြ၏။ နောက်ထပ် တင်ဂျင်းမြောက်မြားစွာတို့သည်လည်း တောင်ထိပ်များပေါ်မှ ယေဟောဝါအားချီးမွမ်း ‘ကြွေးကြော်’ သူတို့တွင် ပါဝင်လာကြမည်ဟု မျှော်လင့်ပါသည်။
ရွှေထက်သာ၍ကောင်းသောအရာ
ဖိလစ်ပိုင်တောင်ဘက်ပိုင်းတွင် စပိန်လူမျိုးတို့ ရွှေတွေ့ရှိခဲ့သည့် ကျွန်းအနည်းငယ်ရှိသည်။ သို့ဖြင့် ၎င်းကျွန်းစုသည် စပိန်စကား မီနာဒီအော်ရို သို့မဟုတ် “ရွှေတွင်း” ကိုချုံ့၍ မင်ဒေါရိုဟူသောအမည်ရခဲ့သည်။ သို့သော် အဆိုပါကျွန်းများတွင် ရွှေထက်သာ၍ကောင်းသောအရာကို ယခုတွေ့ရှိနေကြပြီ၊ ၎င်းမှာ စစ်မှန်သောဘုရားသခင် ယေဟောဝါကို ဝတ်ပြုလိုသူများဖြစ်သည်။
မင်ဒေါရိုကျွန်းအတွင်းပိုင်း တောကြီးမျက်မည်းထဲတွင် မဲန်ရန်းဟုခေါ်သော တိုင်းရင်းသား ၁၂၅,၀၀၀ ခန့်နေထိုင်ကြသည်။ သူတို့သည် ရိုးစင်းစွာ အများအားဖြင့် သူတစ်ပါးနှင့်မရောနှောဘဲနေထိုင်ကြပြီး သူတို့၌ ကိုယ်ပိုင်ဘာသာစကားရှိသည်။ သူတို့အများစုသည် နတ်ကိုးကွယ်သူများနှင့် ဘုရားအများကိုးကွယ်သူများဖြစ်ကြပြီး နတ်သားနတ်သမီးများစွာရှိသည်ဟု ယုံကြည်ကြသည်။
မဲန်ရန်းများမှာ အစားအစာနှင့် အခြားရိက္ခာ အလုံအလောက်မရှိသောအခါ သူတို့သည် ရံဖန်ရံခါ ကမ်းရိုးတန်းဒေသများသို့ဆင်းလာပြီး အလုပ်လာရှာကြသည်။ ဘာတဂန်ဟုခေါ်သည့် မဲန်ရန်းအုပ်စုဝင် လူစုတစ်စုမှသူတစ်ဦးဖြစ်သူ ပိုင်လင်းဆိုသူသည် ထိုသို့ပြုခဲ့၏။ သူသည် တောတောင်ထဲတွင် သူ့လူမျိုးအလယ်၌ ကြီးပြင်းလာခဲ့ပြီး ဘာတဂန်ယုံကြည်ချက်နှင့် ဓလေ့ထုံးစံများကို ခံယူထားသူတစ်ဦးဖြစ်သည်။ အများအားဖြင့် နံငယ်ပိုင်းကိုသာ သူတို့ဝတ်ဆင်ကြသည်။ သီးနှံအထွက်ကောင်းစေဖို့ ဘာတဂန်ထုံးတမ်းစဉ်လာအရ ကြက်တစ်ကောင်ကိုသတ်ပြီး သူတို့ဆုတောင်းနေစဉ် ကြက်သွေးကိုရေထဲ တစက်စက်ကျစေရ၏။
၎င်းထုံးတမ်းစဉ်လာများကို ပိုင်လင်းမလိုက်တော့ပါ။ အဘယ်ကြောင့်နည်း။ မြေနိမ့်ပိုင်းသို့ သူသွားသောအခါ ယေဟောဝါသက်သေမိသားစုများနှင့်အတူ အလုပ်လုပ်ခဲ့သည်။ ထိုမိသားစုများမှ တစ်စုသည် အခွင့်ကောင်းယူကာ ပိုင်လင်းကို ကျမ်းစာအမှန်တရားသိစေခဲ့သည်။ ပိုင်လင်းသည်လည်း ကောင်းစွာတုံ့ပြန်ခဲ့ပြီး လူနှင့်ကမ္ဘာမြေကြီးအတွက် ယေဟောဝါ၏ရည်ရွယ်ချက်အကြောင်း သိရှိလာရသည်ကို အမှန်တန်ဖိုးထားလေးမြတ်ခဲ့သည်။ ထိုမိသားစုက သူ့ကိုအလယ်တန်းကျောင်းတက်ဖို့သာမက ကျမ်းစာလေ့လာဖို့ပါ စီစဉ်ပေးခဲ့သည်။ အသက် ၂၄ နှစ်အရွယ်တွင် ပိုင်လင်းသည် ယေဟောဝါသက်သေတစ်ဦးအဖြစ် နှစ်ခြင်းခံခဲ့သည်။ သူသည် အသက် ၃၀ တွင် အထက်တန်းကျောင်း ဒုတိယနှစ်တက်ခဲ့ပြီး ကျောင်းကို သူ၏ဟောပြောရာရပ်ကွက်ဖြစ်စေခဲ့သည်။ ယခု သူ့ကိုရိုလဲန်းဒိုဟူသော မြေပြန့်အမည်ဖြင့်ခေါ်ကြသည်။
ရိုလဲန်းဒိုကို ယခုသင်တွေ့ဆုံလျှင် မင်ဒေါရိုရှိ အသင်းတော်တစ်ခုတွင် အချိန်ပြည့်ဟောပြောသူနှင့် ဓမ္မအမှုထမ်းတစ်ဦးအဖြစ် အမှုထမ်းနေသော သပ်ရပ်ကောင်းမွန်စွာဝတ်ဆင်၍ ပြုံးရွှင်သောခရစ်ယာန်ဓမ္မအမှုဆောင်တစ်ဦးအဖြစ် သင်တွေ့ရပေမည်။ မကြာသေးမီက ရိုလဲန်းဒိုသည် တောင်တန်းဒေသသို့ပြန်သွားခဲ့သည်၊ ဘာတဂန်တို့၏ထုံးတမ်းစဉ်လာများ၌ ပြန်ပါဝင်ဖို့မဟုတ်ဘဲ သမ္မာကျမ်းစာမှ အသက်ပေးအမှန်တရားကို သူတို့အား ဝေမျှပေးဖို့ဖြစ်သည်။
ဘုရားသခင့်နိုင်ငံတော်ခန်းမတစ်ခု ရလိုစိတ်ပြင်းပြ
တောင်ပိုင်းရှိ မင်ဒနာအိုကျွန်းပေါ်တွင် စီဘူအာနိုစကားဖြင့် “တောင်ပေါ်သားများ” ဟုအဓိပ္ပာယ်ရှိသော ဘာခီးနွန်းပြည်နယ် တည်ရှိသည်။ ယင်းသည် တောင်တန်းများ၊ ချောက်ကြီးများ၊ မြစ်ဝှမ်းများနှင့် ကုန်းပြင်မြင့်နယ်မြေဒေသဖြစ်သည်။ မြေသြဇာကောင်းသောကြောင့် နာနတ်သီး၊ ပြောင်းဖူး၊ ကော်ဖီ၊ ဆန်စပါးနှင့် ငှက်ပျော ထွက်သည်။ ထိုတွင် ကုန်းမြင့်ပိုင်းသား ထလန်အန်ဒစ်နှင့် ဟိုက်ဂါအိုနန်မျိုးနွယ်စုတို့ နေထိုင်ကြသည်။ ဤသူများလည်း ယေဟောဝါအကြောင်း သိလာကြဖို့လိုပါသည်။ မကြာသေးမီက တလာကက်မြို့အနီးတွင် အလွန်စိတ်ဝင်စားဖွယ်ကောင်းသောနည်းဖြင့် ထိုအခွင့်အရေးပေါ်လာခဲ့ပါသည်။
ထိုကုန်းမြင့်ပိုင်းသို့ တက်သွားကြသည့် သက်သေခံများသည် ရာသီဥတုအေးသော်လည်း နွေးထွေးစွာကြိုဆိုခံခဲ့ကြရသည်။ ဒေသခံတို့သည် တန်ခိုးရှင်ဘုရားသခင်၊ ခမည်းတော်ကို ယုံကြည်သည်ဟုဆိုကြသော်လည်း ကိုယ်တော့်အမည်ကိုကား မသိကြချေ။ သူတို့သည် တောထဲတွင် အနေများကြသောကြောင့် ယေဟောဝါသက်သေများကို ယခုမှ ပထမဆုံးအကြိမ် တွေ့ဆုံခြင်းဖြစ်သည်။ သူတို့အား ဘုရားသခင့်နာမတော်အပြင် ဘုရားသခင့်နိုင်ငံတော်နှင့်ပတ်သက်၍ ကိုယ်တော်၏အံ့ဖွယ်ရည်ရွယ်တော်မူချက်ကိုလည်း အသိပေးခဲ့ကြသည်။ ထိုသူတို့သည် အလွန်ဝမ်းသာအားရကြပုံရှိသောကြောင့် သူတို့၏ရွာသို့ ထပ်လည်ပတ်ရန် ဆုံးဖြတ်ခဲ့ကြသည်။
အကြိမ်ကြိမ်ပြန်လည်ပတ်ခဲ့ကြသည်။ ရလဒ်အနေနှင့် ဒေသခံများက ယေဟောဝါသက်သေများအတွက် “အိမ်” တစ်လုံးဆောက်ဖို့ မြေကွက်တစ်ခုကိုပေးကြသည်။ ထိုကမ်းလှမ်းချက်ကို သက်သေခံများ ဝမ်းမြောက်ဝမ်းသာလက်ခံခဲ့ကြသည်။ သူတို့ပေးသည့်မြေကွက်မှာ ထိုနယ်မြေဒေသ၏ အမြင့်ဆုံးတောင်ကုန်းထိပ်တွင်တည်ရှိပြီး လမ်းကိုအပေါ်စီးမှမြင်ရသည်။ ထိုအဆောက်အဦကို သစ်၊ ဝါးနှင့် ထန်းရွက်များဖြင့် ဆောက်လုပ်ထားကြ၏။ ၎င်းကို သုံးလနှင့် ဆယ်ရက်ကြာ ဆောက်ခဲ့ကြသည်။ ထိုအဆောက်အဦရှေ့တွင် “ယေဟောဝါသက်သေများ၏ နိုင်ငံတော်ခန်းမ” ဟူသောဆိုင်းဘုတ်ကို အထင်အရှားမြင်နိုင်၏။ စဉ်းစားကြည့်ပါ၊ အသင်းတော်တစ်ခုမတည်ထောင်မီ ဘုရားသခင့်နိုင်ငံတော်ခန်းမတစ်လုံး ဆောက်လုပ်ထားနှင့်ပြီ!
ထိုအချိန်မှစ၍ အချိန်ပြည့်ဓမ္မအမှုဆောင်တစ်ဦးဖြစ်သော အသင်းတော်အကြီးအကဲတစ်ဦးနှင့် ဓမ္မအမှုထမ်းတစ်ဦးသည် ထိုနေရာသို့ ပြောင်းရွှေ့နေထိုင်ခဲ့ကြသည်။ အသင်းတော်တစ်ခုတည်ထောင်ဖို့ပန်းတိုင်ဖြင့် သူတို့သည် အနီးတစ်ဝိုက်နယ်မြေများမှ သက်သေခံများနှင့်အတူ တွဲဖက်အမှုဆောင်ခဲ့ကြသည်။ ၁၉၉၈၊ ဩဂုတ်လတွင် အကောင်အထည်ပေါ်လာခဲ့သည်။ ယခု အသင်းတော်ငယ်လေးတစ်ခုသည် ၎င်းနိုင်ငံတော်ခန်းမကို အပြည့်အဝအသုံးပြုလျက် ကျမ်းစာအမှန်တရားကို တောင်ပေါ်သားများအား သွန်သင်ပေးနေကြသည်။
မှန်ပါသည်၊ ရောက်ဖို့ခက်ခဲသောတောင်တန်းဒေသများ၌ပင် ဘုရားသခင့်နိုင်ငံတော်အမှန်တရားကို ဖြန့်ဝေရန်အသင့်ရှိသော ဖိလစ်ပိုင်မှ ကိုယ်တော်၏ကျေးကျွန်များကို ယေဟောဝါအကြီးအကျယ်အသုံးပြုနေပါသည်။ ဟေရှာယ ၅၂:၇ ကိုကျွန်ုပ်တို့အားသတိရစေသည်၊ ထိုတွင်ဤသို့ဆိုသည်– “ဝမ်းမြောက်စရာသတင်းကို ကြားပြောသောသူ . . . ၏ခြေတို့သည် တောင်ပေါ်မှာ အလွန်တင့်တယ်လှစွတကား။”
[စာမျက်နှာ ၁၁ ပါ မြေပုံ]
အယ်ဘရာ
မင်ဒေါရို
ဘာခီးနွန်း
[Credit Line]
Globe: Mountain High Maps® Copyright © 1997 Digital Wisdom, Inc.
[စာမျက်နှာ ၁၀ ပါ ရုပ်ပုံ]
တောင်တန်းဒေသ၌ ဟောပြောခြင်းတွင် ကြမ်းတမ်းခက်ခဲသော နယ်မြေကို နာရီပေါင်းများစွာ ခြေလျင်လျှောက်ခြင်းပါဝင်
[စာမျက်နှာ ၁၀ ပါ ရုပ်ပုံ]
တောင်ကျချောင်း၌ နှစ်ခြင်းယူခြင်း