ရပ်စယ်လ်​၏ စာပေ​များ​ကို တန်ဖိုး​ထား​လေးမြတ်​ခဲ့​ကြသော တရားဟော​ဆရာ​နှစ်ဦး

၁၈၉၁ ခုနှစ်​တွင် ယေဟောဝါ​ကို​ဝတ်ပြု​ကြ​သူ ခရစ်ယာန်စစ်​များ​အလယ်တွင် ထူးခြား​ထင်ရှား​စွာ အမှုဆောင်ခဲ့​သူ ချားလ်စ် တေ့ဇ် ရပ်စယ်လ်​သည် ဥရောပ​သို့ ပထမဦးဆုံး​အကြိမ် လည်ပတ်​ရောက်ရှိ​ခဲ့​၏။ သတင်း​အချို့​အရ အီတလီ​နိုင်ငံ၊ ပီ​နဲ​ရော့​လို​မြို့တွင် ခရီး​တစ်​ထောက်​ရပ်နား​စဉ် ဝေါ​လ်ဒဲန်း​ဆီ​ယန်​များ * ဟု​ခေါ်​သော ဘာသာရေး​အဖွဲ့​၏ တရားဟော​ဆရာ​ဖြစ်​ခဲ့​ဖူး​သူ ပါမောက္ခ ဒဲန်ယက်​လေး ရီ​ဗ်​ဝါ​ရ်​နှင့် ရပ်စယ်လ်​တွေ့ဆုံ​ခဲ့​သည်။ ရီ​ဗ်​ဝါ​ရ်​သည် ခရစ်ယာန်​ဓမ္မ​အမှုဆောင်ခြင်း​မှ နုတ်ထွက်​ပြီး​နောက် ဝေါ​လ်ဒဲန်း​ဆီ​ယန်​များနှင့် ဆက်​ပေါင်းသင်း​နေ​သော်လည်း သဘောထားကြီး​စွာ​ဖြင့် စီ. တီ. ရပ်စယ်လ်​ရေးသားခဲ့​သော စာပေ​များစွာကို ဖတ်ရှု​လေ့လာ​ခဲ့​သည်။

၁၉၀၃ ခုနှစ်​တွင် ရီ​ဗ်​ဝါ​ရ်​သည် ရပ်စယ်လ်​၏ ခေတ်​များ​တစ်လျှောက် ဘုရားသခင့်​အစီအစဉ် စာအုပ်​ကို အီတလီ​ဘာသာ​စကား​သို့ ပြန်ဆို​ခဲ့​ပြီး ပုံနှိပ်​ထုတ်ဝေ​ရန် အကုန်အကျ​ခံ​ခဲ့​သည်။ ယင်းသည် အီတလီ​ဘာသာပြန်​စာအုပ်​အဖြစ် တရားဝင်​မ​ထုတ်ဝေ​မီ​က​ဖြစ်၏။ ထို​စာအုပ်​၏​နိဒါန်း​တွင် ရီ​ဗ်​ဝါ​ရ်​က ဤသို့​ရေးခဲ့​သည်– “ပထမဦးဆုံး​အကြိမ် ထုတ်ဝေ​သော ဤ​အီတလီ​ဘာသာပြန်​စာအုပ်​ကို သခင်၏​ကာကွယ်​မှု​ထဲ အပ်နှံ​လိုက်​၏။ ဤ​စာအုပ်​၌ ချွတ်ယွင်းချက်​များ​ရှိသော်လည်း ကိုယ်တော်​၏​အသန့်ရှင်းဆုံး​နာမတော်​ကို ချီးမွမ်း​ရန်​နှင့် ကိုယ်တော်​၏ အီတလီ​စကားပြော​ကလေး​များ​အား ဘုရားသခင်​ဝတ်၌​မွေ့လျော်​ဖို့ တိုက်တွန်း​ပေး​နိုင်​စေရန် ၎င်းကို ကိုယ်တော်​ကောင်းချီး​ပေး​ပါ​လေ​စေ။ ဘုရားသခင်​၏​ကျေးဇူးတော်​ကြောင့် ဤ​စာအုပ်​ကို​ထုတ်ဝေ​နိုင်​ခဲ့​ရာ ၎င်းကို​ဖတ်ရှု​၍ ဘုရားသခင်​၏​အစီအစဉ်​နှင့် မေတ္တာတော်​ဆိုင်ရာ ကိုယ်တော်​၏​ပညာ​နှင့်​ဉာဏ်တော် အလွန်​ကျယ်ဝန်း​နက်နဲ​လှ​သည်ကို နားလည်​တန်ဖိုး​ထား​ကြ​သူအား​လုံး ကိုယ်တော်​ကို ကျေးဇူး​တင်​နိုင်​ကြ​ပါစေ။”

ရီ​ဗ်​ဝါ​ရ်​သည် ဇိအုန်​ကင်းမျှော်စင်​နှင့် ခရစ်တော်​ရောက်ရှိခြင်း​သံတော်ဆင့် တို့ကို​လည်း အီတလီ​ဘာသာ​စကား​သို့ ပြန်ဆို​လေ​တော့​သည်။ ကင်းမျှော်စင် ၏​ယခင်​ပုံစံ​ဖြစ်သော ဤ​မဂ္ဂဇင်း​ကို ၁၉၀၃ ခုနှစ်​တွင် သုံးလ​တစ်ကြိမ်​ထုတ်ဝေ​ခဲ့​၏။ ပါမောက္ခ​ရီ​ဗ်​ဝါ​ရ်​သည် ထို​အခါ​က ကျမ်းစာ​ကျောင်းသား​များ​ဟု​ခေါ်​သော ယေဟောဝါသက်သေ​တစ်ဦး ဖြစ်​မလာ​သော်လည်း ကျမ်းစာ​ကျောင်းသား​များ​၏ စာပေ​များ​တွင် ရှင်းပြ​ထား​သည့်​အတိုင်း ကျမ်းစာ​သတင်းတရား​ကြဲဖြန့်ခြင်း​၌ အတော်လေး​စိတ်ဝင်စား​ခဲ့​သည်။

“အကျွန်ုပ်​မျက်လုံး​မှ ငါး​ကြေး​ကွာကျ​သကဲ့သို့​ဖြစ်”

ရပ်စယ်လ်​၏​စာပေ​များ​ကို တန်ဖိုး​ထား​လေးစား​သော ဝေါ​လ်ဒဲန်း​ဆီ​ယန်​တရားဟော​ဆရာ နောက်​တစ်ဦး​မှာ ဂျူ​ဇ​က်​ပါ ဘဲ​န်​ချက်​တီ​ဖြစ်၏။ ကက်သလစ်​ဘာသာ​မှ ဘာသာ​ပြောင်း​ဝင်လာ​သူ ဂျူ​ဇ​က်​ပါ​၏​ဖခင်​သည် သူ့ကို ဝေါ​လ်ဒဲန်း​ဆီ​ယန်​ပညာ သင်ပေးခဲ့​သည်။ ၁၈၉၄ ခုနှစ်​တွင် ဂျူ​ဇ​က်​ပါ​သည် တရားဟော​ဆရာ​တစ်ဦး​ဖြစ်လာ​ပြီး အပူ​လီ​အာ၊ အဘ​ရူဇီ​နှင့် အယ်​လ်​ဘာ​ကျွန်း၊ စစ္စလီ​ကျွန်း​များ​ပေါ်​ရှိ ဝေါ​လ်ဒဲန်း​ဆီ​ယန်​ရပ်ရွာ​အသီးသီး​တွင် အမှုဆောင်ခဲ့သည်။

၁၉၀၅ ခုနှစ်​တွင် ရပ်စယ်လ်​၏ ခေတ်​များ​တစ်လျှောက် ဘုရားသခင့်​အစီအစဉ် စာအုပ်​ကို အီတလီ​ဘာသာ​စကား​ဖြင့် ထုတ်ဝေ​ခဲ့​သည်။ ဘဲ​န်​ချက်​တီ​သည် စာအုပ်​နှင့်​ပတ်သက်​၍​ထောက်ခံ​အားပေး​သော ဝေဖန်စာ​တစ်စောင် ရေးသားခဲ့​သည်။ ထို​စာ​သည် ပရိုတက်စတင့်​ဂျာနယ် လာ ရီ​ဗီစ်​တာ ခရီစ်တာနာ တွင်​ပါ​လာ​၏။ ရပ်စယ်လ်​၏​စာအုပ်​သည် “ကျွန်ုပ်​တို့အတွက် အလင်း​အများဆုံး​ပေး​ပြီး မည်သည့်​ခရစ်ယာန်​မဆို သမ္မာကျမ်းစာ​ကို အကျိုးရှိရှိ​လေ့လာ​ရန် ယုံကြည်​စိတ်ချ​ရသော လမ်းညွှန်​ဖြစ်သည်။ . . . ဤ​စာအုပ်​ကို ဖတ်​လိုက်​သည်​နှင့် အကျွန်ုပ်​မျက်လုံး​မှ ငါး​ကြေး​ကွာကျ​သကဲ့သို့​ဖြစ်သည်၊ ဘုရားသခင်​၏​လမ်းစဉ်သည် ထင်​သည်ထက် ပို​ဖြောင့်မတ်​လွယ်ကူ​၏။ ရှေ့နောက်​မညီ​ဟု​ထင်​ရသည့် အကြောင်းအရာများ​ပင် အများအားဖြင့် မရှိတော့​ချေ။ ယခင်​က နားလည်​ရ​ခက်​သော အယူဝါဒ​များသည် ရိုးရိုးလေး​ဖြစ်သွား​ပြီး လက်ခံလွယ်​ကူ​လာ​၏။ ယခု​အချိန်အထိ သဘောမပေါက်​သေး​သော အကြောင်းအရာများ​ကိုလည်း နားလည်​သွား​သည်။ ခရစ်တော်​အားဖြင့် ကမ္ဘာ​သားများ ကယ်တင်ခြင်း​ရ​ရန် အထူး​ကောင်းမွန်သော အစီအစဉ်သည် ကျွန်တော်​ရှေ့ အံ့ဖွယ်ကောင်း​လောက်​အောင် ရိုးရှင်း​စွာ ကွက်ကွက်ကွင်းကွင်း​ပေါ်လာ​ရာ တမန်​တော်​ပြော​ခဲ့​သည့်​အတိုင်း ဘုရားသခင်​၏​ပညာ​နှင့် ဉာဏ်တော်​သည် အလွန်​ကျယ်ဝန်း​နက်နဲ​စွ​တကား​ဟု အကျွန်ုပ်​ပြောဆို​ရန် လှုံ့ဆော်​ခံရ​ပါ​သည်” ဟု​ဘဲ​န်​ချက်​တီ​က ရေးခဲ့​၏။—ရောမ ၁၁:၃၃။

၁၉၂၅ ခုနှစ်​တွင် ရီ​မီဇို ကူ​မီ​နက်​တီ​သတိပြု​ခဲ့​သည့်​အတိုင်း ဘဲ​န်​ချက်​တီ​သည် ကျမ်းစာ​ကျောင်းသား​များ​၏​စာပေ​ကို “အလွန်​သဘောကျ” ၍ သူတို့​ရှင်းပြ​သည့် အယူဝါဒ​များ​ကို “အပြည့်အဝ​ယုံကြည်​လက်ခံ” ခဲ့​၏။ ဘဲ​န်​ချက်​တီ​သည် သူ့​နည်း​သူ့​ဟန်​ဖြင့် ၎င်း​အယူဝါဒ​များ​ကို လူအများ​သိလာ​စေရန် ကြိုးစား​ပြုလုပ်​ခဲ့​သည်။

ဘဲ​န်​ချက်​တီ​သည် ယေဟောဝါသက်သေ​များ​နည်းတူ ကျမ်းစာ​တွင်​သွန်သင်ထား​သည့် မြေကြီးဆိုင်ရာ​ထမြောက်ခြင်း​ရှိ​မည်​ကို ယုံကြည်​ကြောင်း သူ၏​အရေးအသား​များ​က ဖော်ပြ​သည်။ သီတင်း ၇၀ နှင့်​ပတ်သက်​သည့် ဒံယေလ​ပရောဖက်ပြုချက်​တွင် ယေရှု​သေဆုံး​မည့်​နှစ်ကို ဘုရားသခင်​သတ်မှတ်​ဖော်ပြ​ထား​နှင့်​ကြောင်း သူ​ရှင်းပြ​သောအခါ သူသည် ကျမ်းစာ​ကျောင်းသား​များနှင့် သဘောချင်း​တိုက်ဆိုင်​သည်။ (ဒံယေလ ၉:၂၄-၂၇) ယေရှု​ခရစ်​၏​သေခြင်း သတိရ​အောက်မေ့ရာပွဲကို “နှစ်ပတ်လည်​နေ့​ကျရောက်​သည့် ရက်​အတိအကျ” တွင်​တစ်နှစ်​လျှင် တစ်ကြိမ်​သာ ကျင်းပ​သင့်​သည်​ဟု သူ​ယုံကြည်​ကြောင်း တစ်ကြိမ်​ထက်မက​ပြောဆို​ခဲ့​ရာ သူ၏​ချာ့ခ်ျ​သွန်သင်ချက်​များ​ကို လူသိရှင်ကြား​ကန့်ကွက်​ခဲ့​၏။ (လုကာ ၂၂:၁၉၊ ၂၀) ဒါ​ဝင်​၏​ဆင့်ကဲ​သီအိုရီ​ကို သူ​ငြင်းပယ်​ပြီး လောက​စစ်ပွဲ​တွင် ခရစ်ယာန်စစ်​များ မပါဝင်​သင့်​ဟု သူ​အခိုင်အမာ​ပြောဆို​ခဲ့​သည်။—ဟေရှာယ ၂:၄။

တစ်ခါ​က ဘဲ​န်​ချက်​တီ​သည် ရပ်စယ်လ်​၏​စာပေ​များ​ကို ဂျေ၊ က​မ်​ဘယ်​လ် ဝေါ​လ်​ဆို​သူနှင့် ဆွေးနွေး​ခဲ့​၏။ ဝေါ​လ်​၏​ဝေဖန်ချက်​များ​ကို အဖြေပေး​ရာ​တွင် ဘဲ​န်​ချက်​တီ​က ဤသို့​ဆို​သည်– “ရပ်စယ်လ်​ရေး​တဲ့ စာအုပ်​ခြောက်​အုပ်​ကို ခင်ဗျား​ဖတ်​မယ်​ဆိုရင် ပျော်​လွန်းလို့ ကျွန်တော့်​ကို ကျေးဇူး​တင်​မှာ ကျိန်းသေ​တယ်။ အယူဝါဒ​ကို ကျွန်တော်​ထုတ်ဖော်​ပြ​နေတာ​မဟုတ်ဘူး; ဒါပေမဲ့ လွန်ခဲ့တဲ့​ဆယ့်တစ်နှစ်​က ဒီ​စာအုပ်​တွေ​ကို ကျွန်တော်​ဖတ်​ခဲ့တယ်၊ သမ္မာကျမ်းစာ​ကို လုံးလုံးလျားလျား အခိုင်အမာ​အခြေ​ပြုပြီး​ရေးထားတဲ့ အဲဒီ​စာအုပ်​တွေ​က​ရခဲ့တဲ့ ဒီလို​အလင်း​မျိုးနဲ့ ဒီလို​အားပေးမှု​မျိုး​အတွက် ဘုရားသခင်​ကို ကျွန်တော်​နေ့တိုင်း​ပဲ​ကျေးဇူး​တင်​တယ်။”

“နားထောင်ပါ၊ နားထောင်ပါ၊ နားထောင်ပါ”

ဝေါ​လ်ဒဲန်း​ဆီ​ယန် တရားဟော​ဆရာ​နှစ်ဦး​ဖြစ်သည့် ဒဲန်ယက်​လေး ရီ​ဗ်​ဝါ​ရ်​နှင့် ဂျူ​ဇ​က်​ပါ ဘဲ​န်​ချက်​တီ​တို့သည် သမ္မာကျမ်းစာ​ကို ရပ်စယ်လ်​ရှင်းပြ​ပုံ​အတွက် ကျေးဇူး​တင်​လေးမြတ်​ကြောင်း ပေါ်လွင်​ထင်ရှား​ပါ​သည်။ ဘဲ​န်​ချက်​တီ​က ဤသို့​ရေးသားခဲ့​၏– “ဧဝံဂေလိ​ဆရာ​တွေ​မပြော​နဲ့ ကျွန်တော်​တို့​ရဲ့​တရားဟော​ဆရာ​တွေ၊ ဘာသာရေး​ပါမောက္ခ​တွေ​တောင် အကုန်အစင်​မသိကြဘူး။ သိ​စ​ရာ​အကြောင်း အများကြီး​ရှိသေးတယ်။ . . . ကျွန်ုပ်​တို့​အသေအချာ​နားထောင် . . . [သင့်​ကြ​ပါ​တယ်]၊ အားလုံး​သိ​ပြီးပြီ​လို့​မထင်ကြ​ဘဲ ကျွန်ုပ်​တို့​စဉ်းစား​ဆင်ခြင်​ဖို့ ကမ်း​လှမ်းပေး​တာတွေကို လက်မခံ​ငြင်းပယ်​မယ့်​အစား နားထောင်ပါ၊ နားထောင်ပါ၊ နားထောင်ပါ။”

နှစ်စဉ်​နှစ်​တိုင်း ထောင်ပေါင်း​များစွာသော​သူတို့သည် မိမိတို့​အိမ်​သို့ ယေဟောဝါသက်သေ​များ​ယူဆောင်​လာ​ကြသော ဘုရားသခင့်​နိုင်ငံတော်​သတင်းတရားကို နားထောင်​လျက်​ရှိကြ​၏။ ကျမ်းစာ​အမှန်တရားကို ငတ်မွတ်​နေကြ​သော နေရာတကာ​မှ သဘောထားကြီး​သူများ​သည် “ငါ့​နောက်သို့​လိုက်​လော့” ဟူ​သည့် ယေရှု၏​ဖိတ်ခေါ်ချက်​ကို တုံ့ပြန်​နေကြ​သည်။—မာကု ၁၀:၁၇-၂၁; ဗျာဒိတ် ၂၂:၁၇။

[အောက်ခြေမှတ်ချက်]

[စာမျက်နှာ ၂၈ ပါ ရုပ်ပုံ]

ပါမောက္ခ ဒဲန်ယက်​လေး ရီ​ဗ်​ဝါ​ရ်

[Credit Line]

Banchetti: La Luce, April 14, 1926

[စာမျက်နှာ ၂၉ ပါ ရုပ်ပုံ]

ဂျူ​ဇ​က်​ပါ ဘဲ​န်​ချက်​တီ