မသန်မစွမ်းမှုများ မည်သို့ အဆုံးတိုင်
မသန်မစွမ်းမှုများ မည်သို့ အဆုံးတိုင်
မျက်မမြင်များ ပြန်မြင်လာကြမည့်၊ နားပင်းသူများ အသံတိုင်းကို ကြားကြရမည့်၊ စကားအသူများ ရွှင်လန်းအားရစွာ သီချင်းဆိုကြမည့်၊ ခြေဆွံ့သူများ လမ်းလျှောက်နိုင်ကြမည့်အချိန်ကို မြင်ယောင်ကြည့်လိုက်ပါ! ဤတွင် ဆေးသိပ္ပံတိုးတက်အောင်မြင်မှုများအကြောင်း ပြောဆိုနေခြင်းမဟုတ်ဘဲ လူသားတို့၏အကျိုးအတွက် ဘုရားသခင်ကြားဝင်လုပ်ဆောင်ပေးခြင်းမှ ဖြစ်ပေါ်လာသောအကျိုးကျေးဇူးများကို ရည်ညွှန်းနေခြင်းဖြစ်၏။ သမ္မာကျမ်းစာက ဤသို့ကြိုဟောထားသည်– “ထိုအခါ မျက်စိကန်းသောသူတို့သည် မျက်စိပွင့်လင်းကြလိမ့်မည်။ နားပင်းသောသူတို့သည် နားပင်းခြင်းနှင့်လွတ်ကြလိမ့်မည်။ ခြေဆွံ့သောသူတို့သည် ဒရယ်ကဲ့သို့ခုန်ကြလိမ့်မည်။ စကားအသောသူတို့သည် သီချင်းဆိုကြလိမ့်မည်။” (ဟေရှာယ ၃၅:၅၊ ၆) သို့သော် ဤအံ့သြဖွယ်ကောင်းသော ပရောဖက်ပြုချက် အမှန်ပင်ပြည့်စုံလာမည်ဟု ကျွန်ုပ်တို့ မည်သို့သေချာသိနိုင်သနည်း။
ပထမဦးစွာ၊ ကမ္ဘာပေါ်တွင် ယေရှုရှိစဉ်က ရောဂါအမျိုးမျိုးနှင့် မသန်မစွမ်းမှုအမျိုးမျိုး ရှိသူများကို ကိုယ်တော်ကုသပေးတော်မူခဲ့သည်။ ထို့ပြင် ကိုယ်တော်၏အံ့ဖွယ်အမှုအများကို ကိုယ်တော်၏ရန်သူများအပါအဝင် လူများစွာ မြင်တွေ့ခဲ့ကြသည်။ အမှန်မှာ ယေရှုကိုသိက္ခာချရန် မယုံကြည်သောဆန့်ကျင်သူများသည် ကိုယ်တော်ကုသပေးနည်းကို အနည်းဆုံးတစ်ကြိမ် အသေအချာ စစ်ဆေးမေးမြန်းခဲ့ကြသည်။ သို့သော် သူတို့ပြုခဲ့သမျှသည် ကိုယ်တော်၏အံ့ဖွယ်အမှုကို အတည်ပြုစေခဲ့ရာ သူတို့သည် များစွာပင် သိက္ခာကျခဲ့ကြ၏။ (ယောဟန် ၉:၁၊ ၅-၃၄) ယေရှုသည် မငြင်းသာနိုင်သော အခြားအံ့ဖွယ်အမှုတစ်ခုကို ပြုလုပ်ပြီးနောက် သူတို့ကစိတ်ပျက်စွာဖြင့် “ငါတို့သည် အဘယ်သို့ပြုလျက်နေကြသနည်း။ ထိုသူသည် များစွာသောနိမိတ်လက္ခဏာကိုပြ၏” ဟုဆိုကြသည်။ (ယောဟန် ၁၁:၄၇) သို့သော် သာမန်လူတန်းစားများက ထိုသူတို့နှင့်မတူဘဲ ယေရှုကို ယုံကြည်လာကြသူ များစွာရှိလေသည်။—ယောဟန် ၂:၂၃; ၁၀:၄၁၊ ၄၂; ၁၂:၉-၁၁။
ယေရှု၏အံ့ဖွယ်အမှုများ—ကမ္ဘာချီကုသမှု၏ရှေ့ပြေး
ယေရှု၏အံ့ဖွယ်အမှုများက ကိုယ်တော်သည် မေရှိယ အမှန်ဖြစ်သည်၊ ဘုရားသခင့်သားတော် ဖြစ်သည်ဟု သက်သေထူရုံမကခဲ့ချေ။ ထိုအံ့ဖွယ်အမှုများက နာခံမှုရှိသောလူသားများသည် အနာဂတ်တွင် အနာရောဂါပျောက်ကင်းမည်ဟူသော ကျမ်းစာကတိတော်များကို ယုံကြည်စိတ်ချရန် အခြေအမြစ်ရှိစေသည်။ အဆိုပါကတိတော်များတွင် အဖွင့်စာပိုဒ်၌ဖော်ပြထားသည့် ဟေရှာယအခန်းကြီး ၃၅ ပါပရောဖက်ပြုချက်ပါဝင်သည်။ ဘုရားသခင်ကိုကြောက်ရွံ့သူများ၏ အနာဂတ်ကျန်းမာရေးနှင့်စပ်လျဉ်း၍ ဟေရှာယ ၃၃:၂၄ တွင်ဤသို့ဆိုသည်– “မြို့သားကလည်း ‘ငါနာသည်’ ဟုမဆိုရ။” ထိုနည်းတူ၊ ဗျာဒိတ် ၂၁:၄ တွင်လည်း ဤသို့ကတိပြုသည်– “ဘုရားသခင်သည် သူတို့၏မျက်စိ၌ မျက်ရည်ရှိသမျှတို့ကို သုတ်တော်မူမည်။ နောက်တစ်ဖန် သေဘေးမရှိရ။ စိတ်မသာညည်းတွားခြင်း၊ အော်ဟစ်ခြင်း၊ ပင်ပန်းခြင်းလည်းမရှိရ။ အကြောင်းမူကား၊ ရှေးဖြစ်ဖူးသောအရာတို့သည် ရွေ့သွားကြပြီ။”
“[ဘုရားသခင့်]နိုင်ငံတော် တည်ထောင်ပါစေသော။ အလိုတော်သည် ကောင်းကင်ဘုံ၌ပြည့်စုံသကဲ့သို့ မြေကြီးပေါ်မှာ ပြည့်စုံပါစေသော” ဟူသည့် ယေရှု၏စံပြဆုတောင်းချက်မှ စကားအချို့ကို လူတို့ရွတ်ဆိုသောအခါ ထိုပရောဖက်ပြုချက်များ ပြည့်စုံစေရန် ပုံမှန်ဆုတောင်းနေကြသည်။ (မဿဲ ၆:၁၀) ဘုရားသခင်၏အလိုတော်တွင် ကမ္ဘာမြေကြီးနှင့် လူသားအတွက်ပါ,ပါဝင်၏။ အကြောင်းတစ်ခုခုကြောင့် ခွင့်ပြုထားသည့် ရောဂါဝေဒနာနှင့် မသန်မစွမ်းမှုများသည် မကြာမီ ရှိတော့မည်မဟုတ်; ဘုရားသခင်၏ “ခြေတင်ရာခုံ” ကိုထာဝစဉ်ပျက်စီးစေမည်မဟုတ်ချေ။—ဟေရှာယ ၆၆:၁။ *
နာကျင်မှုမရှိ၊ အဖိုးအခမကုန်ဘဲ ကုသပေးခံခဲ့ရ
မည်သည့်ရောဂါကိုပင် လူတို့ခံစားနေရကြစေကာမူ အဖိုးအခမယူ၊ နာကျင်မှုမရှိ ယေရှုကုသပေးခဲ့၏။ ဤသတင်းသည် တစ်မုဟုတ်ချင်းပျံ့နှံ့သွားခဲ့ရာ မကြာမီတွင် “များစွာသောလူအပေါင်းတို့သည် ခြေမစွမ်း၊ မျက်စိကန်း၊ စကားအ၊ အင်္ဂါချို့တဲ့သောသူမှစ၍ အခြားသောအနာရောဂါစွဲသူများကို ဆောင်ခဲ့လျက် အထံတော်သို့ရောက်လာ၍ ခြေတော်ရင်း၌ချထားကြ၏။ အနာရောဂါများကို ငြိမ်းစေတော်မူ” သည်။ လူတို့ မည်သို့တုံ့ပြန်ခဲ့ကြသနည်း။ မျက်မြင်သက်သေတစ်ဦးဖြစ်သူ မဿဲက သူ၏မှတ်တမ်းတွင် ဤသို့ဆက်၍ဆို၏– “အနာရောဂါများကို ငြိမ်းစေတော်မူသဖြင့် အသောသူသည် စကားပြောသည်ကိုလည်းကောင်း၊ ချို့တဲ့သောသူသည် ပကတိဖြစ်သည်ကိုလည်းကောင်း၊ ခြေမစွမ်းသောသူသည် လှမ်းသွားသည်ကိုလည်းကောင်း၊ မျက်စိကန်းသောသူသည် မြင်ရသည်ကိုလည်းကောင်း လူအစုအဝေးတို့သည်မြင်လျှင် အံ့သြခြင်းသို့ရောက်၍ ဣသရေလအမျိုး၏ ဘုရားသခင်ဂုဏ်တော်ကို ချီးမွမ်းကြ၏။”—မဿဲ ၁၅:၃၀၊ ၃၁။
ယေရှုသည် လူလိမ်များနည်းတူ ကိုယ်တော်ကုသပေးမည့်သူများကို လူအုပ်ထဲမှ အသေအချာရွေးခေါ်သွားခြင်းမရှိသည်ကို သတိပြုပါ။ ၎င်းအစား၊ ရောဂါဝေဒနာခံစားနေရသူ၏ ဆွေမျိုးများနှင့် မိတ်ဆွေများက ရောဂါသည်တို့ကို “[ယေရှု၏] ခြေတော်ရင်း၌ ချထားကြ၏။ အနာရောဂါများကို ငြိမ်းစေတော်မူ” ၏။ ယခု ယေရှု၏ကုသနိုင်စွမ်း၏ သတ်သတ်မှတ်မှတ်နမူနာအချို့ကို ပြန်လည်သုံးသပ်ကြည့်ကြစို့။
မျက်စိကန်းခြင်း– ယေရုရှလင်မြို့တွင် ယေရှုရှိစဉ်အခါ “အမိဝမ်းတွင်းကပင် မျက်စိကန်းသော” သူတစ်ဦးကို မြင်စေခဲ့၏။ ဤသူသည် မျက်မမြင်သူတောင်းစားဖြစ်၏ဟု မြို့သူမြို့သားများသိကြသည်။ ထို့ကြောင့် မျက်စိမြင်လျက် လမ်းလျှောက်နေသည့် ထိုသူကို လူတို့မြင်သောအခါ စိတ်လှုပ်ရှားပြီး ရုတ်ရုတ်သဲသဲဖြစ်နေပုံကို သင်မြင်ယောင်ကြည့်နိုင်သည်! သို့တိုင် လူတိုင်း မပျော်ရွှင်ကြချေ။ ဖာရိရှဲများဟုခေါ်သော ထင်ပေါ်ကျော်ကြားပြီး ဩဇာရှိသော ဂျူးဂိုဏ်းအဖွဲ့ဝင်အချို့သည် မိမိတို့၏ဆိုးညစ်မှုများကို ယေရှု အစောပိုင်းက ဖော်ထုတ်ထားသောကြောင့် စိတ်နာနေကြရာ ထိုသို့ယေရှုပြုခြင်းသည် လူတို့ကိုလှည့်စားနေခြင်းဖြစ်သည်ဟု ပေါ်လွင်စေရန် အစွမ်းကုန်ကြိုးစားခဲ့ကြသည်။ (ယောဟန် ၈:၁၃၊ ၄၂-၄၄; ၉:၁၊ ၆-၃၁) သို့နှင့် သူတို့သည် မျက်စိမြင်လာသူကို စစ်ဆေးမေးမြန်းပြီးနောက် သူ၏မိဘများကိုစစ်ဆေး၏၊ ထို့နောက် ထိုသူကို ပြန်မေးမြန်းလေ၏။ သို့သော် ဖာရိရှဲများ မေးမြန်းစစ်ဆေးလေ ယေရှုသည် အံ့ဖွယ်အမှုကို အမှန်တကယ်ပြုလုပ်ခဲ့ကြောင်း ပို၍ထင်ရှားလေဖြစ်ရာ သူတို့အတွက် အမျက်ထွက်စရာဖြစ်ခဲ့သည်။ အဆိုပါဘာသာရေးအရေခြုံသူများ၏ ကတ်သီးကတ်သတ်နိုင်မှုကို မျက်စိမြင်လာသူ နားမလည်နိုင်၍ သူက “အမိဝမ်းတွင်းကပင် မျက်စိကန်းသောသူကို မျက်စိမြင်စေခြင်းငှာ တတ်နိုင်သည်ကို ကမ္ဘာဦးမှစ၍ မကြားစဖူး။ ထိုသူသည် ဘုရားသခင်စေလွှတ်တော်မူသောသူမဟုတ်လျှင် အဘယ်အမှုကိုမျှ မတတ်နိုင်ဟုပြောဆို၏။” (ယောဟန် ၉:၃၂၊ ၃၃) ရိုးသားပွင့်လင်း၊ ပညာပါစွာ သူ၏ယုံကြည်ချက်ကို ထိုသို့ဖော်ပြခဲ့ရာ ဖာရိရှဲများသည် ‘ထိုသူကို နှင်ထုတ်ခဲ့ကြ၏၊’ ဆိုလိုသည်မှာ တစ်ချိန်က မျက်စိကန်းသူကို တရားဇရပ်မှ နှင်ထုတ်လိုက်သည်။—ယောဟန် ၉:၂၂၊ ၃၄။
နားပင်းခြင်း– ယော်ဒန်မြစ်အရှေ့ဘက်ရှိ ဒေကာပေါလိတွင် ယေရှုရောက်ခဲ့စဉ် “နားပင်း၍ စကားအသောသူတစ်ယောက်ကို အထံတော်သို့ဆောင်ခဲ့” ကြသည်။ (မာကု ၇:၃၁၊ ၃၂) ထိုသူကို ယေရှုကုသပေးခဲ့ရုံမက လူအုပ်ကြားတွင် အနေရခက်မည့် နားပင်းသူ၏ခံစားချက်များကို အလွန်နားလည်မှုရှိကြောင်း ဖော်ပြခဲ့သည်။ ယေရှုသည် နားပင်းသူကို “လူအစုအဝေးထဲကခေါ်” ထုတ်သွားပြီး ကုသပေးခဲ့သည်ဟု သမ္မာကျမ်းစာကဆို၏။ ထို့ပြင် မျက်မြင်သက်သေများသည် “အတိုင်းထက်အလွန်မိန်းမောတွေဝေလျက်ရှိ၍ သူသည် အလုံးစုံတို့ကို လျောက်ပတ်စွာပြုတော်မူပြီ။ နားပင်းသောသူတို့ကို ကြားစေတော်မူပြီ။ အသောသူတို့ကို စကားပြောစေတော်မူပြီဟု ဆိုကြ၏။”—မာကု ၇:၃၃-၃၇။
ခြေလက်သေခြင်း– ကပေရနောင်မြို့တွင် ယေရှုရှိစဉ်အခါ လူတို့သည် အိပ်ရာပေါ်မှာ တုံးလုံးလဲနေသော ခြေလက်သေနေသူတစ်ဦးကို ကိုယ်တော်ထံ ခေါ်ဆောင်လာကြသည်။ (မဿဲ ၉:၂) ထိုအဖြစ်အပျက်ကို အခန်းငယ် ၆ မှ ၈ ကဖော်ပြ၏။ “‘ကိုယ်အိပ်ရာကိုဆောင်၍ ကိုယ်အိမ်သို့သွားလော့’ ဟုလက်ခြေသေသောသူအား [ယေရှု]မိန့်တော်မူ၏။ ထိုသူသည်လည်းထ၍ မိမိအိမ်သို့သွားလေ၏။ လူအစုအဝေးတို့သည်မြင်လျှင် အံ့သြခြင်းရှိ၍ လူသားတို့အား ဤသို့သောအခွင့်ကို အပ်ပေးတော်မူသော ဘုရားသခင်၏ဂုဏ်တော်ကို ချီးမွမ်းကြ၏။” ဤအံ့ဖွယ်အမှုကိုလည်း ယေရှု၏တပည့်တော်များနှင့် ရန်သူများရှေ့မှောက်တွင် ကိုယ်တော်ပြုလုပ်ခဲ့သည်။ မုန်းတီးမှုနှင့် စိတ်စွန်းကွက်မှုမရှိသော လူအုပ်သည် မိမိတို့မြင်တွေ့ခဲ့ရာများကြောင့် “ဘုရားသခင်၏ဂုဏ်တော်ကို ချီးမွမ်းကြ” ကြောင်းသတိပြုပါ။
ရောဂါ– “နူနာစွဲသောသူတစ်ယောက်သည် [ယေရှု]အထံတော်သို့လာ၍ ဒူးထောက်လျက် ‘ကိုယ်တော်အလိုရှိလျှင် ကျွန်တော်ကို သန့်ရှင်းစေနိုင်တော်မူသည်’ ဟုတောင်းပန်လေ၏။ ယေရှုသည် သနားသောစိတ်ရှိသဖြင့် လက်တော်ကိုဆန့်၍ ထိုသူကိုတို့လျက် ‘ငါအလိုရှိ၏။ သန့်ရှင်းခြင်းသို့ရောက်စေ’ ဟုမိန့်တော်မူ၏။ ထိုသို့မိန့်တော်မူသည်ခဏချင်းတွင် နူနာပျောက်” လေသည်။ (မာကု ၁:၄၀-၄၂) ယေရှုသည် ဤလူကို မကုပေးချင်ကုပေးချင်ဖြင့်မဟုတ်ဘဲ အမှန်တကယ်သနားကြင်နာစွာဖြင့် ကုသပေးခဲ့သည်ကို သတိပြုပါ။ သင်သည် နူနာစွဲသူတစ်ဦးဖြစ်သည်ဟု ဆိုပါစို့။ သင်၏ကိုယ်ခန္ဓာကို တဖြည်းဖြည်းရုပ်ပျက်စေပြီး လူ့ဘောင်အဖွဲ့အစည်းမှ သင့်ကိုပစ်ပယ်ခံရစေသော ကြောက်မက်ဖွယ် ဤရောဂါဆိုးကို နာကျင်မှုကင်းစွာ တစ်ခဏချင်းပင် ပျောက်ကင်းစေမည်ဆိုလျှင် သင်မည်သို့ခံစားရမည်နည်း။ ယင်းကြောင့် အံ့ဖွယ်နည်းဖြင့် ကုသပေးခံရသော အခြားနူနာစွဲသူတစ်ဦးသည် “[ယေရှု၏]ခြေတော်ရင်း၌ ပျပ်ဝပ်၍ ကျေးဇူးတော်ကြီးလှပါသည်ဟု ဝန်ခံ” ခဲ့သည်ကို သင်သဘောပေါက်နိုင်ပေမည်။—လုကာ ၁၇:၁၂-၁၆။
ထိခိုက်ဒဏ်ရာ– ယေရှုသည် ဖမ်းဆီးခံရပြီး နှက်တိုင်တင်မခံရမီ ပြုလုပ်ခဲ့သော နောက်ဆုံးအံ့ဖွယ်အမှုမှာ ကုသပေးမှုဖြစ်၏။ ယေရှုအား ဖမ်းဆီးခေါ်ဆောင်သွားကြတော့မည့်သူများကို ဆန့်ကျင်၍ တမန်တော်ပေတရုသည် စိတ်လိုက်မာန်ပါ “မိမိ၌ပါသောဓားကို ဆွဲထုတ်ပြီးလျှင် ယဇ်ပုရောဟိတ်မင်း၏ ကျွန်တစ်ယောက်ကို ခုတ်သဖြင့် လက်ယာနားရွက်ပြတ်လေ၏။” (ယောဟန် ၁၈:၃-၅၊ ၁၀) ယေရှုက “နားရွက်ကိုလက်တော်နှင့်တို့သဖြင့် အနာကိုပျောက်စေတော်မူ၏” ဟုလုကာကျမ်းပါ အပြိုင်မှတ်တမ်းက ဖော်ပြသည်။ (လုကာ ၂၂:၅၀၊ ၅၁) ဤတွင်တစ်ဖန်၊ အဆိုပါသနားစာနာမှုရှိသောလုပ်ရပ်ကို ယေရှု၏မိတ်ဆွေများအပြင် ရန်သူများဖြစ်သော ကိုယ်တော့်ကို ဖမ်းဆီးမည့်သူများရှေ့မှောက်တွင်လည်း ပြုလုပ်ပြခဲ့သည်။
မှန်ပါ၏၊ ယေရှု၏အံ့ဖွယ်အမှုများကို ကျွန်ုပ်တို့စေ့စေ့စပ်စပ်ဆန်းစစ်ကြည့်လေ၊ ယုံကြည်စိတ်ချရသော အချက်များစွာကို ကျွန်ုပ်တို့ ခွဲခြားသိမြင်လာရလေဖြစ်သည်။ (၂ တိမောသေ ၃:၁၆) အစပိုင်းတွင်ဖော်ပြထားသကဲ့သို့ပင် ဤသို့လေ့လာသုံးသပ်ခြင်းက နာခံမှုရှိသောလူသားများကို ကုသပေးမည်ဟူသည့် ဘုရားသခင့်ကတိတော်အပေါ် ကျွန်ုပ်တို့၏ယုံကြည်ခြင်း ခိုင်မြဲစေသင့်သည်။ ခရစ်ယာန်ယုံကြည်ခြင်းကို သမ္မာကျမ်းစာက “မျှော်လင့်သောအရာများကို စိတ်ချစွာစောင့်မျှော်ခြင်း၊ မမြင်ရသော်လည်း အမှန်တည်ရှိသောအရာတို့၏ ထင်ရှားသောသက်သေ” အဖြစ် အနက်ဖွင့်ဆို၏။ (ဟေဗြဲ ၁၁:၁၊ ကဘ) အဆင်အခြင်မဲ့ သို့မဟုတ် စိတ်ကူးယဉ် အတွေးမျှသာမဟုတ်ဘဲ သက်သေသာဓကများအပေါ် အခြေပြုသောယုံကြည်ခြင်းရှိဖို့ ဘုရားသခင်က တိုက်တွန်းထားသည်။ (၁ ယောဟန် ၄:၁) ကျွန်ုပ်တို့သည် ဤသို့သောယုံကြည်ခြင်းရှိလာလေ ဝိညာဉ်ရေးအရ ပိုမိုသန်စွမ်းကျန်းမာလာလေဖြစ်ပြီး ပျော်ရွှင်သူများဖြစ်လာကြ၏။—မဿဲ ၅:၃; ရောမ ၁၀:၁၇။
ဝိညာဉ်ရေးကုသမှု ဦးစားထားရ!
ကာယရေးကျန်းမာနေသူများစွာသည် မပျော်ရွှင်ကြချေ။ အချို့ဆိုလျှင် ကိုယ့်ကိုယ်ကိုသတ်သေရန်ပင် ကြိုးစားကြသည်၊ အကြောင်းမှာ သူတို့တွင် အနာဂတ်မျှော်လင့်ချက်မရှိကြသောကြောင့် သို့မဟုတ် ပြဿနာဖြင့် ဖိစီးခံနေရသောကြောင့်ဖြစ်သည်။ အမှန်ဆိုရလျှင် သူတို့သည် ဘုရားသခင်ရှေ့မှောက်တွင် ကာယရေးမသန်မစွမ်းမှုထက် သာ၍ဆိုးရွားသော ဝိညာဉ်ရေးအရ မသန်မစွမ်းဖြစ်နေကြ၏။ (ယောဟန် ၉:၄၁) အခြားတစ်ဖက်တွင်မူ၊ ရှေ့ဆောင်းပါးတွင်ဖော်ပြထားသည့် ခရစ်ရှန်နှင့် ဂျူနီယာတို့နည်းတူ ကာယရေးအရ မသန်မစွမ်းဖြစ်နေကြသူများစွာသည် ပျော်ရွှင်ကျေနပ်ရောင့်ရဲသော အသက်တာများရှိကြသည်။ အဘယ်ကြောင့်နည်း။ အကြောင်းမှာ သူတို့သည် ဝိညာဉ်ရေးအရ ကျန်းမာသန်စွမ်းနေကြပြီး သမ္မာကျမ်းစာအပေါ် အခြေပြုထားသည့် စိတ်ချရသောမျှော်လင့်ချက်ဖြင့် ခွန်အားရရှိနေကြသောကြောင့်ဖြစ်၏။
လူသားများအနေဖြင့် ကျွန်ုပ်တို့အထူးလိုအပ်ရာကို ယေရှုဤသို့ညွှန်ပြခဲ့၏– “လူသည် မုန့်အားဖြင့်သာ အသက်ကိုမွေးရမည်မဟုတ်။ ဘုရားသခင်မိန့်တော်မူသမျှအားဖြင့် အသက်ကိုမွေးရမည် ကျမ်းစာလာသည်။” (မဿဲ ၄:၄) လူသားများသည် တိရစ္ဆာန်များနှင့်မတူဘဲ ကာယအစာထက်မက လိုအပ်သည်။ ဘုရားသခင်၏ “ပုံသဏ္ဌာန်နှင့်အညီ” ဖန်ဆင်းခံရသော ကျွန်ုပ်တို့သည် ဝိညာဉ်အစာဖြစ်သည့် ဘုရားသခင်အားသိကျွမ်းခြင်းပညာ၊ ကိုယ်တော်၏ရည်ရွယ်ချက်နှင့် ကျွန်ုပ်တို့သက်ဆိုင်ပုံအပြင် ကိုယ်တော်၏အလိုတော်နှင့်အညီ လုပ်ဆောင်ရန် လိုအပ်၏။ (ကမ္ဘာဦး ၁:၂၇; ယောဟန် ၄:၃၄) ဘုရားသခင်အားသိကျွမ်းခြင်းပညာသည် ကျွန်ုပ်တို့၏ဘဝကို အဓိပ္ပာယ်လေးနက်စေပြီး ဝိညာဉ်ခွန်အားရှိစေသည်။ ထို့ပြင် ယင်းသည် ပရဒိသုမြေကြီးတွင် ထာဝရအသက်ရရှိခြင်းအပေါ်လည်း အခြေပြုထားသည်။ ယေရှုက “ထာဝရအသက်ဟူမူကား မှန်သောဘုရားသခင်တစ်ဆူတည်းဖြစ်တော်မူသော ကိုယ်တော်ကိုလည်းကောင်း၊ စေလွှတ်တော်မူသော ယေရှုခရစ်ကိုလည်းကောင်း သိကျွမ်းခြင်းတည်း” ဟုမိန့်တော်မူခဲ့၏။—ယောဟန် ၁၇:၃။
ယေရှု၏တစ်ခေတ်တည်းသားများသည် ကိုယ်တော်အား “ကုသပေးသူ” ဟု မခေါ်ကြဘဲ “ဆရာ” ဟုခေါ်ခဲ့ကြခြင်းသည် မှတ်သားထိုက်ပေ၏။ (လုကာ ၃:၁၂; ၇:၄၀) အဘယ်ကြောင့်နည်း။ အကြောင်းမှာ ဘုရားသခင့်နိုင်ငံတော်သည် လူတို့၏ပြဿနာများကို ထာဝစဉ်ဖြေရှင်းပေးမည်ဟု ယေရှုသွန်သင်ပေးခဲ့သောကြောင့်ဖြစ်သည်။ (လုကာ ၄:၄၃; ယောဟန် ၆:၂၆၊ ၂၇) ယေရှုခရစ်၏လက်ထဲတွင်ရှိသော ဤကောင်းကင်အစိုးရသည် ကမ္ဘာမြေကြီးတစ်ခုလုံးကို အုပ်ချုပ်ပြီး ဖြောင့်မတ်သောလူသားများနှင့် သူတို့၏မြေကြီးနေအိမ်ကို လုံးလုံးတည်မြဲစေ၍ ပြန်လည်ထူထောင်ရေးနှင့်စပ်လျဉ်းသည့် ကျမ်းစာပရောဖက်ပြုချက်အားလုံးကို ပြည့်စုံစေပါလိမ့်မည်။ (ဗျာဒိတ် ၁၁:၁၅) ထို့ကြောင့် ယေရှုသည် မိမိ၏စံပြဆုတောင်းချက်၌ မြေကြီးပေါ်တွင် ဘုရားသခင်၏အလိုတော် ပြည့်စုံစေရန် ကိုယ်တော်၏နိုင်ငံတော် တည်ထောင်ပါစေသောဟု ကွင်းဆက်ဖော်ပြခဲ့ခြင်းဖြစ်သည်။—မဿဲ ၆:၁၀။
မသန်မစွမ်းဖြစ်နေသူများစွာသည် အဆိုပါစိတ်လှုပ်ရှားဖွယ် မျှော်လင့်ချက်အကြောင်း သိရှိလာကြသောအခါ သူတို့၏ဝမ်းနည်းခြင်းမျက်ရည်များသည် ဝမ်းသာခြင်းမျက်ရည်များအဖြစ်သို့ ပြောင်းလဲသွားခဲ့ကြသည်။ (လုကာ ၆:၂၁) အမှန်မှာ၊ ဘုရားသခင်သည် ဖျားနာမှုနှင့် မသန်မစွမ်းမှုတို့ကို ပပျောက်စေရုံမျှမက လူသားတို့အား ဆင်းရဲခြင်းများကိုခံစားစေသည့် အပြစ်ကိုပင် ဖယ်ရှားပစ်ပါလိမ့်မည်။ အစပိုင်း၌ကိုးကားဖော်ပြခဲ့သော ဟေရှာယ ၃၃:၂၄ နှင့် မဿဲ ၉:၂-၇ တို့က ကျွန်ုပ်တို့၏အပြစ်ရှိအခြေအနေကြောင့် ဖျားနာရ၏ဟုဆိုသည်။ (ရောမ ၅:၁၂) သို့ဖြစ်၍ အပြစ်တရားမရှိတော့သည့်အခါ လူသားများသည် “ဘုရားသခင်သားတို့၏ ထူးမြတ်သောလွတ်ခြင်းချမ်းသာ” အပြင် စိတ်ရောကိုယ်ပါ စုံလင်သည့် လွတ်ခြင်းချမ်းသာကို နောက်ဆုံးခံစားကြရပါလိမ့်မည်။—ရောမ ၈:၂၁။
ကျန်းမာရေး အတော်အတန်ကောင်းသူများသည် သူတို့၏ကျန်းမာရေးအခြေအနေကောင်းခြင်းကို အမှုမထားမိရန် လွယ်ကူနိုင်၏။ သို့သော် မသန်မစွမ်းဖြစ်နေသူများမှာမူ ထိုသို့မဟုတ်ကြချေ။ ကျန်းမာရေးကောင်းခြင်းနှင့် အသက်ရှင်ခြင်းကို သူတို့တကယ်တန်ဖိုးထားကြပြီး ၎င်းတို့သည် ရုတ်တရက် မမျှော်လင့်ဘဲ ပြောင်းလဲသွားနိုင်ကြောင်း သိထားကြ၏။ (ဒေ. ၉:၁၁) ထို့ကြောင့် ကျွန်ုပ်တို့၏စာဖတ်ပရိသတ်မှ မသန်မစွမ်းဖြစ်နေသူများသည် သမ္မာကျမ်းစာတွင် ဖော်ပြထားသည့် ဘုရားသခင်၏အံ့ချီးဖွယ်ကတိတော်များကို အလေးအနက်ဆင်ခြင်သုံးသပ်ကြမည်ဟု ကျွန်ုပ်တို့မျှော်လင့်ပါသည်။ ၎င်းကတိတော်များ ပြည့်စုံစေရန် ယေရှုသည် မိမိ၏အသက်ကို ပေးဆပ်ခဲ့၏။ ထိုထက်သာ၍ကောင်းသောအာမခံချက် ကျွန်ုပ်တို့တွင် ရှိနိုင်ပါဦးမည်လော။—မဿဲ ၈:၁၆၊ ၁၇; ယောဟန် ၃:၁၆။
[အောက်ခြေမှတ်ချက်]
^ အပိုဒ်၊ 6 ဘုရားသခင်သည် ဆင်းရဲခြင်းကို အဘယ်ကြောင့်ခွင့်ပြုထားရကြောင်း အသေးစိတ်သိလိုလျှင် ယေဟောဝါသက်သေများထုတ်ဝေသည့် ဘုရားသခင်သည် ကျွန်ုပ်တို့ကို အမှန်ပင်ဂရုစိုက်တော်မူသလော ဘရိုရှာကိုရှု။