စာရှုသူများထံမှ မေးခွန်းလွှာ
စာရှုသူများထံမှ မေးခွန်းလွှာ
စစ်မှန်သောခရစ်ယာန်တစ်ဦးသည် ချာ့ခ်ျတွင်ကျင်းပသည့် အသုဘအခမ်းအနား သို့မဟုတ် လက်ထပ်မင်္ဂလာပွဲကို တက်ရောက်ခြင်းက ပညာရှိရာကျမည်လော။
မှားယွင်းသောဘာသာ၏ မည်သည့်ပုံစံမဆိုတွင် ကျွန်ုပ်တို့ပါဝင်ခြင်းကို ယေဟောဝါမနှစ်သက်သည့်အတွက် ရှောင်ကြဉ်ရမည်ဖြစ်၏။ (၂ ကောရိန္သု ၆:၁၄-၁၇; ဗျာဒိတ် ၁၈:၄) ချာ့ခ်ျတွင်ကျင်းပသည့် အသုဘအခမ်းအနားတွင် မသေနိုင်သောဝိညာဉ်စိုးလ်နှင့် လူကောင်းအားလုံး ကောင်းကင်ဆုကျေးဇူးရမည် အစရှိသည့် ကျမ်းစာနှင့်မညီညွတ်သော အယူအဆများကို ထောက်ခံပြောဆို တရားဟောပါလိမ့်မည်။ ထို့အပြင် လက်ဝါးကပ်တိုင် သင်္ကေတပြုလုပ်ခြင်းနှင့် ခရစ်ယာန်ဘုန်းတော်ကြီးဆုတောင်းရာတွင် ပါဝင်ရခြင်း အစရှိသည့် ဓလေ့ထုံးစံများတွင် ပါဝင်ဖို့လိုပေမည်။ သမ္မာကျမ်းစာသွန်သင်ချက်နှင့်ဆန့်ကျင်သည့် ဆုတောင်းချက်များနှင့် အခြားဘာသာရေးလုပ်ရပ်များသည်လည်း ချာ့ခ်ျ သို့မဟုတ် အခြားတစ်နေရာရာတွင်ကျင်းပသည့် ဘာသာရေးဆိုင်ရာ လက်ထပ်မင်္ဂလာအခမ်းအနားတစ်ခုတွင် ပါဝင်နိုင်သည်။ မှားယွင်းသော ဘာသာရေးလုပ်ရပ်တစ်ခုကို လူတိုင်းပါဝင်ပြုလုပ်နေသည့် အုပ်စုတစ်စုတွင် ခရစ်ယာန်တစ်ဦးရောက်ရှိနေခြင်းက ထိုလုပ်ဆောင်ချက်တွင် မပါဝင်ဘဲနေရန် သူ့အတွက်ခက်ခဲပေမည်။ ထိုသို့သောအခြေအနေမျိုးတွင် ရောက်နေခြင်းက ပညာမဲ့ရာကျမည်ဖြစ်ခြင်း!
ခရစ်ယာန်တစ်ဦးသည် ချာ့ခ်ျတွင်ကျင်းပသည့် အသုဘ သို့မဟုတ် လက်ထပ်မင်္ဂလာပွဲတစ်ခုကို မတက်မနေ တက်ရောက်သင့်သည်ဟု ယူမှတ်လျှင်ကော အသို့နည်း။ ဥပမာ၊ မယုံကြည်သူခင်ပွန်းသည်က သူ၏ခရစ်ယာန်ဇနီးသည်အား ထိုအချိန်အခါတွင် မိမိနှင့်အတူရှိရမည်ဟုဆိုပေသည်။ သူသည် တိတ်တဆိတ် ဘေးမှရပ်ကြည့်သူတစ်ဦးအဖြစ် ခင်ပွန်းနှင့်လိုက်သွားနိုင်ပါသလော။ ဇနီးသည်သည် ဘာသာရေးအခမ်းအနားမှန်သမျှတွင် မပါဝင်ဖို့ စိတ်ပိုင်းဖြတ်ထားလျက် ခင်ပွန်းသည်၏ဆန္ဒအတိုင်း လိုက်သွားရန် ဆုံးဖြတ်ပေမည်။ အခြားတစ်ဖက်တွင်မူ အခြေအနေ၏ဖိအားပေးမှုကြောင့် ဘုရားသခင်ရေးရာမူများကို အလျှော့ပေးလိုက်လျောမိမည်စိုး၍ မသွားတော့ရန် ဆုံးဖြတ်ပေမည်။ ဆုံးဖြတ်ချက်ချရမည့်သူမှာ သူကိုယ်တိုင်ဖြစ်၏။ သူ၏သိစိတ်ကြည်လင်ကာ စိတ်ရှင်းနေသင့်သည်။—၁ တိမောသေ ၁:၁၉။
မည်သို့ပင်ဖြစ်စေ၊ သူသည် မိမိ၏သိစိတ်ကြောင့် ဘာသာရေးအခမ်းအနားများတွင် မပါဝင်နိုင်ကြောင်း၊ ဓမ္မသီချင်းများ မဆိုနိုင်ကြောင်း၊ ဆုတောင်းသည့်အခါ မိမိခေါင်းမငုံ့နိုင်ကြောင်း ခင်ပွန်းအား ကြိုတင်ရှင်းပြထားလျှင် ကောင်းပေမည်။ သူ့ ရှင်းပြချက်ကိုထောက်၍ ခင်ပွန်းသည်,က မိမိဇနီးသည် ရှိနေခြင်းသည် သူ့အတွက် မျက်နှာပျက်စရာဖြစ်စေနိုင်မည်ဟု ကောက်ချက်ချပေမည်။ မိမိဇနီးသည်အားချစ်သည့်မေတ္တာ၊ သူ၏ယုံကြည်ချက်များကို လေးစားမှုရှိသဖြင့်၊ သို့မဟုတ် အရှက်ကွဲစရာအကြောင်း မှန်သမျှကို ရှောင်ကြဉ်လိုသည့်ဆန္ဒတို့ကြောင့် မိမိဘာသာ တစ်ဦးတည်းသွားလိုပေမည်။ သို့သော် ခင်ပွန်းသည်က ဇနီးသည်အား သူနှင့်အတူလိုက်ရမည်ဟု အနိုင်အထက်တောင်းဆိုမည်ဆိုလျှင် လေ့လာအကဲခတ်သူတစ်ဦးအဖြစ် ဇနီးဖြစ်သူ လိုက်သွားနိုင်ပါသည်။
ကျွန်ုပ်တို့ထည့်စဉ်းစားသုံးသပ်ရမည်မှာ ဘာသာရေးအဆောက်အအုံတစ်ခုရှိ အခမ်းအနားတစ်ခုကို တက်ရောက်ခြင်းဖြင့် ကျွန်ုပ်တို့၏ယုံကြည်သူချင်းများအပေါ် သက်ရောက်မည့်အကျိုးဖြစ်သည်။ ထိုသို့ပြုခြင်းဖြင့် အချို့သောသူများ၏ သိစိတ်ကို ထိခိုက်နိုင်ပါသလော။ ရုပ်ပုံကိုးကွယ်ခြင်း၌ပါဝင်မှုကို ရှောင်ကြဉ်ရန် သူတို့၏ ခုခံနိုင်သည့်စွမ်းအားသည် အားနည်းသွားနိုင်မည်လော။ ‘သင်တို့သည် ခြားနားသောအရာတို့ကို ပိုင်းခြားစေခြင်းငှာ ခရစ်တော်၏နေ့ရက်တိုင်အောင် စိတ်ကြည်ဖြူလျက်၊ တိုက်မိ၍လဲစရာအမှုနှင့် ကင်းလွတ်လျက်ရှိ’ ရန်ပြုလုပ်ပါဟု တမန်တော်ပေါလုသတိပေးသည်။—ဖိလိပ္ပိ ၁:၉၊ ၁၁။
အဆိုပါအချိန်အခါသည် အလွန်ရင်းနှီးသော ဆွေမျိုးသားချင်းတစ်ဦးနှင့်ပတ်သက်နေလျှင် မိသားစု၏ ဖိအားပေးမှုများကိုခံရရန် ထပ်ဆင့်အကြောင်းရှိပေသည်။ မည်သို့ပင်ဖြစ်စေ၊ ခရစ်ယာန်တစ်ဦးသည် ပါဝင်ပတ်သက်သည့်အကြောင်းအရာမှန်သမျှကို ဂရုတစိုက်ချင့်ချိန်ရမည်။ အခြေအနေအချို့တွင် ချာ့ခ်ျအသုဘ သို့မဟုတ် လက်ထပ်မင်္ဂလာအခမ်းအနားတစ်ခုသို့ သွားရာတွင် လေ့လာသူတစ်ဦးအဖြစ် သွားခြင်းမှ အဘယ်အခက်အခဲမျှ ပေါ်ပေါက်လာစရာအကြောင်းမရှိဟု ကောက်ချက်ချနိုင်ပေမည်။ သို့သော် ၎င်းကိုတက်ရောက်ခြင်းမှ ရရှိနိုင်ဖွယ်အကျိုးကျေးဇူးများထက် ပိုပြီးအလေးထားရမည့်ကိစ္စမှာ မိမိ သို့မဟုတ် အခြားသူများ၏သိစိတ်ကို ထိခိုက်စေနိုင်ခြင်းဖြစ်သည်။ မည်သည့်အခြေအနေမျိုးပင်ဖြစ်ပါစေ အဆိုပါခရစ်ယာန်သည် မိမိ၏ဆုံးဖြတ်ချက်ကြောင့် ဘုရားသခင်နှင့်လူတို့ရှေ့တွင် မိမိ၏ကောင်းသောသိစိတ်ကို မထိခိုက်စေသင့်ပါ။