ဘုရားသခင်ကား မည်သူနည်း
ဘုရားသခင်ကား မည်သူနည်း
“စကြဝဠာ အမြင့်မြတ်ဆုံးစွမ်းအား၏ ရင်းမြစ်၊ ကိုးကွယ်ဝတ်ပြုခံရရှင်အား ဘုရားသခင်ဟူသောအမည် ပေးထားသည်” ဟု အမေရိကားနား စွယ်စုံကျမ်းကဆို၏။ ဘုရားသခင်ဟူသည့် စကားလုံး၏အဓိပ္ပာယ်သည် အထွတ်အမြတ်ဆုံး အမှန်တရားဖြစ်၏။ ထိုသို့သောစိုးရွံ့ထိတ်လန့်ဖွယ် အမှန်တရား၏ သဘာဝသွင်ပြင်လက္ခဏာကား အဘယ်နည်း။
ဘုရားသခင်သည် သက်မဲ့သဘာဝစွမ်းအားတစ်မျိုး သို့မဟုတ် တကယ့်ပုဂ္ဂိုလ်တစ်ပါးလော။ ကိုယ်တော်၌ အမည်နာမရှိသလော။ ကိုယ်တော်သည် လူအများ ယုံကြည်သကဲ့သို့ သုံးပါးပေါင်းတစ်ဆူဖြစ်သလော။ ဘုရားသခင်ကို ကျွန်ုပ်တို့မည်သို့သိရှိလာနိုင်မည်နည်း။ သမ္မာကျမ်းစာက ဤမေးခွန်းများအတွက် မှန်ကန်ပြီး ကျေနပ်စရာကောင်းသောအဖြေများကို ပေးထားပါသည်။ အမှန်ဆိုရလျှင် ဘုရားသခင်ကိုရှာဖွေရန် ကျွန်ုပ်တို့ကို ဤသို့အားပေးတိုက်တွန်းသည်– “ဘုရားသခင်သည် ငါတို့တွင် အဘယ်သူနှင့်မျှဝေးတော်မူသည်မဟုတ်။”—တမန်တော် ၁၇:၂၇။
သက်မဲ့သဘာဝစွမ်းအားတစ်မျိုး သို့မဟုတ် တကယ့်ပုဂ္ဂိုလ်တစ်ပါးလော
ဘုရားသခင်ကိုယုံကြည်သူ များစွာတို့သည် ကိုယ်တော်အား ပုဂ္ဂိုလ်တစ်ပါးအဖြစ်မဟုတ်ဘဲ စွမ်းအားတစ်မျိုးအဖြစ် ယူမှတ်ကြသည်။ ဥပမာ၊ အချို့သောယဉ်ကျေးမှုများတွင် နတ်ဘုရားများကို သဘာဝစွမ်းအားများနှင့် တစ်တန်းတစ်စားတည်း သတ်မှတ်ခဲ့ကြသည်။ စကြဝဠာဖွဲ့စည်းတည်ဆောက်ပုံနှင့် မြေကြီးပေါ်မှ သဘာဝသက်ရှိတို့၏ သဘောသကန်နှင့်စပ်လျဉ်း၍ ပထမအကြောင်းတရားတစ်ခု မုချရှိရမည်ဟု သိပ္ပံပညာဆိုင်ရာ စူးစမ်းရှာဖွေမှုဖြင့် စုဆောင်းရရှိထားသည့် အထောက်အထားများကို စစ်ဆေးကြည့်ရှုသူတချို့က ကောက်ချက်ချခဲ့ကြသည်။ သို့သော် သူတို့သည် ဤပထမအကြောင်းတရားကို ဥပဓိရုပ်တစ်ခုနှင့် တွဲဖက်ပေးရန်မူကား တွန့်ဆုတ်ကြ၏။
သို့တိုင်၊ ပထမအကြောင်းတရား၌ ကြီးမားသောအသိဉာဏ်ရှိရမည်ဟု ဖန်ဆင်းခြင်း၏ရှုပ်ထွေးပွေလီမှုက ဖော်ညွှန်းသည် မဟုတ်ပေလော။ အသိဉာဏ်ရှိရန် အသိစိတ်လိုအပ်၏။ အရာခပ်သိမ်းဖန်ဆင်းနိုင်သော မဟာအသိစိတ်ကို ဘုရားသခင်ပိုင်ဆိုင်တော်မူ၏။ မှန်ပါသည်၊ ဘုရားသခင်တွင် ကိုယ်ခန္ဓာရှိတော်မူ၏၊ ၎င်းသည် ကျွန်ုပ်တို့၏ရုပ်ခန္ဓာနှင့်မတူဘဲ ဝိညာဉ်ခန္ဓာဖြစ်တော်မူ၏။ ကျမ်းစာက ‘ရုပ်ခန္ဓာရှိလျှင် ဝိညာဉ်ခန္ဓာလည်းရှိ၏’ ဟုဆို၏။ (၁ ကောရိန္သု ၁၅:၄၄၊ သမ) ဘုရားသခင့်ဇာတိတော်ကိုရှင်းပြရာတွင် ကျမ်းစာက “ဘုရားသခင်သည် . . . ဝိညာဉ်ဖြစ်တော်မူ၏” ဟုရှင်းလင်းစွာဆိုသည်။ (ယောဟန် ၄:၂၄) . . . ဝိညာဉ်၏အသက်တာပုံစံသည် ကျွန်ုပ်တို့နှင့်အကြီးအကျယ်ခြားနား၏၊ ၎င်းသည် လူ့မျက်စိနှင့်မြင်၍မရချေ။ (ယောဟန် ၁:၁၈) မျက်မြင်မရသော ဝိညာဉ်သတ္တဝါများလည်း ရှိကြပါသည်။ သူတို့သည် “[စစ်မှန်သော]ဘုရားသခင်၏ သား[များ]” ဖြစ်ကြသည့် ကောင်းကင်တမန်များဖြစ်၏။—ယောဘ ၁:၆; ၂:၁။
ဘုရားသခင်သည် ဖန်ဆင်းခြင်းမခံရသော ဝိညာဉ်ခန္ဓာရှိ ပုဂ္ဂိုလ်တစ်ပါးဖြစ်တော်မူရာ ဆင်ခြင်တုံတရားအရ ကိုယ်တော်သည် တစ်နေရာရာတွင် ကျိန်းဝပ်တော်မူ၏။ နာမ်ဝိညာဉ်ဘုံကိုရည်ညွှန်းလျက် ကျမ်းစာက ကောင်းကင်သည် ဘုရားသခင့် “ကျိန်းဝပ်တော်မူရာ [နေရာ]” ဖြစ်ကြောင်း ကျွန်ုပ်တို့အားပြောပြ၏။ (၃ ဓမ္မရာဇဝင် ၈:၄၃) ထို့အပြင်၊ ကျမ်းရေးသူပေါလုက ‘ခရစ်တော်သည် . . . ငါတို့အတွက်ကြောင့် . . . ဘုရားသခင်၏ရှေ့တော်၌ ကိုယ်ကိုပြခြင်းငှာ ကောင်းကင်ကိုယ်ထဲသို့ဝင်တော်မူပြီ’ ဟုဆိုသည်။—ဟေဗြဲ ၉:၂၄။
သမ္မာကျမ်းစာတွင် “ဝိညာဉ်” ဟူသည့်စကားလုံးကို အခြားသဘောတစ်မျိုးဖြင့်လည်း အသုံးပြုထားသည်။ ဘုရားသခင်အား ဆုတောင်းရာတွင်၊ ဆာလံဆရာက “ဝိညာဉ်တော်ကိုလွှတ်၍ သူတို့ကိုဖန်ဆင်းတော်မူ” ၏ဟုဆိုခဲ့သည်။ (ဆာလံ ၁၀၄:၃၀) ဤဝိညာဉ်သည် ဘုရားသခင်ကိုယ်တော်တိုင်မဟုတ်ဘဲ ကိုယ်တော်အလိုရှိရာကို ပြီးမြောက်အောင်မြင်စေရန် ဘုရားသခင်စေလွှတ်သည့် သို့မဟုတ် အသုံးပြုသည့် စွမ်းအားတစ်ခုဖြစ်သည်။ ဘုရားသခင်သည် ၎င်းစွမ်းအားဖြင့် ပကတိကောင်းကင်၊ မြေကြီးနှင့် သက်ရှိအပေါင်းတို့ကို ဖန်ဆင်းတော်မူခဲ့၏။ (ကမ္ဘာဦး ၁:၂; ဆာလံ ၃၃:၆) ကိုယ်တော့်ဝိညာဉ်တော်ကို သန့်ရှင်းသောဝိညာဉ်တော်ဟု ခေါ်ဆိုကြသည်။ ကျမ်းရေးသူများကို မှုတ်သွင်းပေးရန် ဘုရားသခင်သည် မိမိ၏သန့်ရှင်းသောဝိညာဉ်တော်ကို အသုံးပြုတော်မူခဲ့၏။ (၂ ပေတရု ၁:၂၀၊ ၂၁) ထို့ကြောင့်၊ သန့်ရှင်းသောဝိညာဉ်တော်သည် မိမိ၏ရည်ရွယ်တော်မူချက်များကို ပြည့်စုံစေရန် ဘုရားသခင်အသုံးပြုတော်မူသည့် မမြင်နိုင်သော တက်ကြွလှုပ်ရှားသည့်စွမ်းအားဖြစ်၏။
ဘုရားသခင်၌ ထူးခြားသောနာမတော်ရှိ
“အဘယ်သူသည် လေကိုမိမိလက်နှင့်ဆုပ်ယူသနည်း။ အဘယ်သူသည် ရေကိုအဝတ်နှင့်ထုပ်ထားသနည်း။ မြေကြီးစွန်းရှိသမျှတို့ကို အဘယ်သူတည်စေသနည်း။ ထိုသို့ပြုသောသူ၏အမည်နှင့် သူ၏သားအမည်ကား အဘယ်သို့နည်း” ဟု ကျမ်းရေးသူအာဂုရက မေးမြန်းခဲ့သည်။ (သု. ၃၀:၄) အမှန်မှာ အာဂုရက ‘ဤအရာများကိုပြုလုပ်ခဲ့သူ တစ်ဦးတစ်ယောက်၏ မျိုးနွယ်တော် သို့မဟုတ် အမည်နာမကို သင်သိပါသလော’ ဟုမေးမြန်းနေခြင်းဖြစ်သည်။ ဘုရားသခင်တစ်ပါးတည်းသာလျှင် သဘာဝစွမ်းအားများကို ထိန်းချုပ်နိုင်စွမ်းရှိတော်မူ၏။ ဘုရားသခင်တည်ရှိကြောင်း ဖန်ဆင်းရာများက ခိုင်လုံသည့် သက်သေအထောက်အထားပေးသော်လည်း ဘုရားသခင့်နာမတော်နှင့်ပတ်သက်၍မူကား မဖော်ပြချေ။ အမှန်မှာ ဘုရားသခင်ကိုယ်တော်တိုင်က ကျွန်ုပ်တို့အား မဖော်ပြပေးလျှင် ကိုယ်တော့်နာမတော်ကို အဘယ်နည်းဖြင့်မျှ သိနိုင်မည်မဟုတ်ချေ။ ထိုနာမတော်ကို ဖန်ဆင်းရှင်က ဤသို့ဖော်ပြတော်မူ၏– “ငါသည် ထာဝရဘုရား[သခင်] [“ယေဟောဝါ၊” ကဘ] ဖြစ်၏။ ထိုနာမသည် ငါ့နာမဖြစ်၏။”—ဟေရှာယ ၄၂:၈။
ဘုရားသခင်၏ထူးခြားသောနာမတော်၊ ယေဟောဝါကို ဟေဗြဲကျမ်းစာစောင်များ၌သာ အကြိမ် ၇,၀၀၀ နီးပါး တွေ့ရှိရသည်။ ယေရှုခရစ်သည် ထိုနာမတော်ကို အခြားသူများအား သိရှိစေခဲ့ပြီး သူတို့ရှေ့တွင်လည်း ယင်းကိုချီးမြှောက်ခဲ့၏။ (ယောဟန် ၁၇:၆၊ ၂၆) “ဂျားကိုချီးမွမ်းလော့” ဟုအဓိပ္ပာယ်ရသည့် “ဟာလေလုယ” ဟူသည့်အသုံးအနှုန်း၏ အစိတ်အပိုင်းတစ်ခုအဖြစ် သမ္မာကျမ်းစာ၏ နောက်ဆုံးစာစောင်တွင် ထိုနာမတော်ကို တွေ့ရှိရသည်။ “ယ” ဟူသည် “ယေဟောဝါ” ၏အတိုကောက်ပုံစံဖြစ်သည်။ (ဗျာဒိတ် ၁၉:၁-၆) သို့တိုင်၊ ခေတ်သစ်သမ္မာကျမ်းစာများစွာက ထိုနာမတော်ကို အသုံးမပြုကြချေ။ ဘာသာစကားတချို့တွင် “God” နှင့် “Lord” ဟူသည့် သာမန်ဂုဏ်ပုဒ်များနှင့် ကွဲပြားခြားနားစေရန် “GOD” သို့မဟုတ် “LORD” ဟူ၍ စာလုံးတိုင်းကို စာလုံးကြီးများဖြင့် ရေးသားဖော်ပြကြသည်။ ဘုရားသခင့်နာမတော်ကို ယာဝေးဟု အသံထွက်နိုင်ကြောင်း ပညာရှင်တချို့က အကြံပြုကြသည်။
စကြဝဠာတွင်အကြီးမြတ်ဆုံးပုဂ္ဂိုလ်၏ နာမတော်နှင့်ပတ်သက်၍ ထိုသို့သောအမြင်များ အဘယ်ကြောင့်ကွဲပြားခြားနားရသနည်း။ အဆိုပါပြဿနာမှာ ဂျူးများသည် လွန်ခဲ့သော ရာစုနှစ်ပေါင်းများစွာက အယူသီးစွာ ဘုရားသခင့်နာမတော်၏အသံထွက်ကို မရွတ်ဆိုကြတော့ဘဲ ကျမ်းစာကိုဖတ်ရွတ်သည့်အခါ ဘုရားသခင့်နာမတော်သို့ရောက်တိုင်း “အကြွင်းမဲ့ပိုင်သအုပ်စိုးရှင်” ဟူသည့် ဟေဗြဲစကားလုံးကို အစားထိုးအသုံးပြုခဲ့ချိန်ကစတင်ခဲ့သည်။ ဟေဗြဲကျမ်းစာစောင်ကို သရသံများမပါဘဲရေးသားခဲ့သောကြောင့် ရှေးအချိန်က မောရှေ၊ ဒါဝိဒ်နှင့်အခြားသူတို့သည် ဘုရားသခင့်နာမတော်၏ စာလုံးပေါင်းကို မည်သို့အသံထွက်ခဲ့ကြကြောင်း တိတိကျကျမသိနိုင်ကြချေ။ သို့ရာတွင် ယေဟောဝါဟူသော အသံထွက်ကို နှစ်ချီအသုံးပြုခဲ့ကြပြီဖြစ်ရာ ယနေ့ဘာသာစကားပေါင်းမြောက်မြားစွာတွင် ယင်းနှင့်တူညီသည့်အသံထွက်ကို ကျယ်ကျယ်ပြန့်ပြန့် လက်ခံအသုံးပြုခဲ့ကြပြီ။—ထွက်မြောက်ရာ ၆:၃; ဟေရှာယ ၂၆:၄၊ ဂျိမ်းစ်ဘုရင်ဘာသာပြန်ကျမ်း။
ရှေးဟေဗြဲဘာသာ၌ ဘုရားသခင့်နာမတော်ကို အသံထွက်ပုံနှင့်ပတ်သက်၍ ဒွိဟဖြစ်နေသော်လည်း ၎င်း၏အဓိပ္ပာယ်မှာ ခက်ခဲနက်နဲရာ လုံးလုံးမဟုတ်ချေ။ ကိုယ်တော်၏နာမတော်သည် “ကိုယ်တော်ဖြစ်လာစေသည်” ဟုအဓိပ္ပာယ်ရှိ၏။ သို့ဖြင့် ယေဟောဝါ ဘုရားသခင်ကိုယ်တော်တိုင်သည် မဟာရည်ရွယ်တော်မူရှင်ဖြစ်၏ဟု ခွဲခြားဖော်ပြတော်မူ၏။ ကိုယ်တော်သည် မိမိ၏ရည်ရွယ်တော်မူချက်နှင့် ကတိတော်များကို အမြဲပင် အမှန်တကယ် ဖြစ်လာစေတော်မူ၏။ ထိုသို့လုပ်ဆောင်နိုင်စွမ်းရှိသူ စစ်မှန်သောဘုရားသခင်တစ်ပါးတည်းသာ ထိုနာမတော်ကို ပိုင်ထိုက်တော်မူ၏။—ဟေရှာယ ၅၅:၁၁။
အတိုင်းအဆမဲ့ တန်ခိုးရှင်ဘုရားသခင်နှင့် ရှိရှိသမျှ အခြားနတ်ဘုရားများ မတူနိုင်သည်ကို ယေဟောဝါဟူသော နာမတော်က သံသယကင်းရှင်းစွာ ခွဲခြားဖော်ပြသည်။ ယင်းကြောင့် ထိုနာမတော်ကို သမ္မာကျမ်းစာတွင် အကြိမ်ပေါင်းများစွာ တွေ့မြင်နေရခြင်းဖြစ်၏။ ဘာသာပြန်ကျမ်းများစွာက ဘုရားသခင့်နာမတော်ကို အသုံးမပြုသော်လည်း ဆာလံ ၈၃:၁၈ က ဤသို့ရှင်းလင်းစွာဆိုသည်– “ထာဝရဘုရား[သခင်] [“ယေဟောဝါ၊” ကဘ] ဟူ၍နာမတော်ရှိသော ကိုယ်တော်တစ်ပါးတည်းသာလျှင် မြေကြီးတစ်ပြင်လုံးအပေါ်မှာ အမြင့်ဆုံးသောဘုရား[သခင်]ဖြစ်တော်မူ” ၏။ ယေရှုခရစ်သည် ဓမ္မအမှုဆောင်ချိန်တွင် နောက်တော်လိုက်များအား ဤသို့သွန်သင်တော်မူခဲ့သည်– “ထို့ကြောင့် သင်တို့ဆုတောင်းရမည်မှာ ‘ကောင်းကင်ဘုံ၌ရှိတော်မူသော အကျွန်ုပ်တို့အဘ၊ ကိုယ်တော်၏နာမတော်အား ရိုသေလေးမြတ်ခြင်းရှိပါစေသော။’” (မဿဲ ၆:၉) ထို့ကြောင့် ကျွန်ုပ်တို့ဆုတောင်းသည့်အခါ ဘုရားသခင့်နာမတော်ကို အသုံးပြု၍ ကိုယ်တော့်အကြောင်း ပြောဆိုသင့်ပြီး အခြားသူများရှေ့တွင် ကိုယ်တော့်အား ချီးမွမ်းသင့်ပေသည်။
ယေရှုသည်ဘုရားသခင်လော
ယေဟောဝါဘုရားသခင် ကိုယ်တော်တိုင်က မိမိသားတော်သည် မည်သူမည်ဝါဖြစ်ကြောင်း ခွဲခြားဖော်ပြတော်မူ၏။ ယေရှုနှစ်ခြင်းခံပြီးနောက်၊ “ကောင်းကင်မှ . . . ‘ဤသူကား ငါနှစ်သက်မြတ်နိုးရာ၊ ငါ၏ချစ်သားပေတည်း’ ဟု အသံတော်ဖြစ်လေ၏” ဟု မဿဲ၏ခရစ်ဝင်ကျမ်းမှတ်တမ်းက ပြောပြသည်။ (မဿဲ ၃:၁၆၊ ၁၇၊ သမ္မာ) ယေရှုခရစ်သည် ဘုရားသခင်၏သားတော်ဖြစ်၏။
သို့တိုင်၊ ဘာသာရေးသမားတချို့က ယေရှုသည် ဘုရားသခင်ဖြစ်၏ဟု ဆိုကြသည်။ အခြားသူများကမူ ဘုရားသခင်သည် သုံးပါးပေါင်းတစ်ဆူဖြစ်၏ဟု ဆိုကြသည်။ ဤသွန်သင်ချက်အရ “ခမည်းတော်သည် ဘုရားသခင်၊ သားတော်သည် ဘုရားသခင်၊ သန့်ရှင်းသောဝိညာဉ်တော်သည် ဘုရားသခင်ဖြစ်၏။ သို့တိုင် ၎င်းတို့သည် ဘုရားသခင်သုံးဆူမဟုတ်ဘဲ တစ်ဆူဖြစ်သည်။” ထိုသုံးဦးသည် “ထာဝစဉ်အတူတကွရှိ၍ တန်းတူရည်တူဖြစ်ကြသည်” ဟုယူဆကြ၏။ (ကက်သလစ်စွယ်စုံကျမ်း) ထိုသို့သော ယူဆချက်များသည် မှန်ကန်ပါသလော။
ယေဟောဝါနှင့်စပ်လျဉ်း၍ မှုတ်သွင်းခံကျမ်းစာကဤသို့ဆိုသည်– “ကိုယ်တော်သည် ရှေးကမ္ဘာအဆက်ဆက်မှစ၍ နောက်ကမ္ဘာအဆက်ဆက်တိုင်အောင် ဘုရားသခင်ဖြစ်တော်မူ၏။” (ဆာလံ ၉၀:၂) ကိုယ်တော်သည် အဆုံးအစမရှိသည့် “ထာဝရဘုရင်” ဖြစ်တော်မူ၏။ (၁ တိမောသေ ၁:၁၇) အခြားတစ်ဖက်တွင်မူ၊ ယေရှုသည် “သတ္တဝါအပေါင်းတို့တွင် . . . သားဦး၊” “ဘုရားသခင်၏ . . . သတ္တဝါတို့အထွတ်” ဖြစ်တော်မူ၏။ (ကောလောသဲ ၁:၁၃-၁၅; ဗျာဒိတ် ၃:၁၄) ဘုရားသခင်ကို မိမိ၏ခမည်းတော်အဖြစ်ရည်ညွှန်းရာတွင် ယေရှုဤသို့မိန့်တော်မူခဲ့သည်– “ခမည်းတော်သည် ငါ့ထက်သာ၍ကြီးမြတ်တော်မူ၏။” (ယောဟန် ၁၄:၂၈) မိမိမသိ၊ ကောင်းကင်တမန်များမသိ၊ ဘုရားသခင်တစ်ပါးတည်းသာ သိတော်မူသည့် အရာအချို့ ရှိကြောင်းကိုလည်း ယေရှုရှင်းပြတော်မူခဲ့သည်။ (မာကု ၁၃:၃၂) ထို့အပြင် ယေရှုသည် မိမိခမည်းတော်ထံ ဤသို့ဆုတောင်းတော်မူခဲ့သည်– “အကျွန်ုပ်အလိုရှိသည်အတိုင်း မဖြစ်ပါစေနှင့်။ ကိုယ်တော်အလိုရှိသည်အတိုင်း ဖြစ်ပါစေသော်။” (လုကာ ၂၂:၄၂) မိမိထက် ကြီးမြတ်သောပုဂ္ဂိုလ်တစ်ဦးမဟုတ်လျှင် ကိုယ်တော်ဆုတောင်းပါမည်လော။ ထို့အပြင် ယေရှုကို သေခြင်းမှ ထမြောက်ပေးခဲ့သူမှာ ဘုရားသခင်ဖြစ်သည်၊ ယေရှုကိုယ်တိုင်မဟုတ်ပေ။—တမန်တော် ၂:၃၂။
ထို့ကြောင့် ကျမ်းစာအရ ယေဟောဝါသည် အတိုင်းအဆမဲ့တန်ခိုးရှင် ဘုရားသခင်ဖြစ်တော်မူ၏၊ ယေရှုမူကား ဘုရားသခင်၏သားတော် ဖြစ်၏။ ယေရှုကမ္ဘာမြေကြီးပေါ်သို့ ကြွမလာမီဖြစ်စေ၊ မြေကြီးပေါ်တွင် သက်တော်ထင်ရှားစဉ်ဖြစ်စေ ကိုယ်တော်တို့သည် တန်းတူမဖြစ်ချေ; ကောင်းကင်သို့ထမြောက်ပြီး နောက်ပိုင်းတွင်လည်း မိမိခမည်းတော်နှင့် တန်းတူညီတူ ဖြစ်မသွားချေ။ (၁ ကောရိန္သု ၁၁:၃; ၁၅:၂၈) ကျွန်ုပ်တို့သိရှိခဲ့ကြပြီးဖြစ်သည်အတိုင်း သုံးပါးပေါင်းတစ်ဆူ၏ တတိယပုဂ္ဂိုလ်ဟုခေါ်ကြသည့် သန့်ရှင်းသောဝိညာဉ်တော်သည် ပုဂ္ဂိုလ်တစ်ဦးမဟုတ်ချေ။ ၎င်းအစား၊ ယင်းသည် ဘုရားသခင်ဆန္ဒရှိရာကို အထမြောက်စေရန် အသုံးပြုတော်မူသည့် စွမ်းအားတစ်ခုဖြစ်၏။ သို့ဖြစ်၍ သုံးပါးပေါင်းတစ်ဆူသည် ကျမ်းစာဆိုင်ရာသွန်သင်ချက်တစ်ခု မဟုတ်ပေ။ * သမ္မာကျမ်းစာက “ငါတို့၏ဘုရားသခင် ထာဝရဘုရား[သခင်] [“ယေဟောဝါ၊” ကဘ] သည် တစ်ဆူတည်းသောထာဝရဘုရား[သခင်] [“ယေဟောဝါ၊” ကဘ] ဖြစ်တော်မူ၏” ဟုဆိုသည်။—တရားဟောရာ ၆:၄။
ဘုရားသခင်ကို ပိုမိုသိကျွမ်းလာပါလေ
ကျွန်ုပ်တို့သည် ဘုရားသခင်အား ချစ်မြတ်နိုးပြီး ကိုယ်တော်ရထိုက်သည့် အကြွင်းမဲ့ဆည်းကပ်ဝတ်ပြုမှုကို ပြုနိုင်ရန် ကိုယ်တော်သည် မည်သို့သောဘုရားသခင်မျိုး အမှန်ဖြစ်ကြောင်း သိရှိဖို့လိုသည်။ ဘုရားသခင်ကို ကျွန်ုပ်တို့ မည်သို့ပိုမိုသိကျွမ်းလာနိုင်မည်နည်း။ “ဖန်ဆင်းတော်မူသောအရာများကိုထောက်ရှုသဖြင့်၊ ထာဝရတန်ခိုးတော်နှင့် ထာဝရအဖြစ်တော်တည်းဟူသော မျက်မြင်မရသောဘုရားသခင်၏အရာတို့သည် ကမ္ဘာတည်သည်ကာလမှစ၍ ထင်ရှားလျက်ရှိကြ၏” ဟု သမ္မာကျမ်းစာကဆို၏။ (ရောမ ၁:၂၀) ဘုရားသခင်ကို ပိုမိုသိကျွမ်းလာစေနိုင်သည့် နည်းတစ်နည်းမှာ ကိုယ်တော်ဖန်ဆင်းထားရာကို ကျေးဇူးတင်လေးမြတ်စွာ ကြည့်ရှုလေ့လာခြင်းနှင့် တွေးတောဆင်ခြင်ခြင်းအားဖြင့်ဖြစ်သည်။
သို့ရာတွင် ဖန်ဆင်းရာများက ဘုရားသခင်နှင့်ပတ်သက်၍ ကျွန်ုပ်တို့သိဖို့လိုသမျှအားလုံးကို မပြောပြချေ။ ဥပမာ၊ ကိုယ်တော်သည် ထူးခြားသည့်နာမတော်နှင့် တကယ့်ဝိညာဉ်ပုဂ္ဂိုလ်တစ်ပါးဖြစ်ကြောင်း သိနားလည်ရန် ကျမ်းစာ၌ စေ့စေ့စပ်စပ်စစ်ဆေးဖို့ လိုအပ်သည်။ အမှန်ဆိုရလျှင် ဘုရားသခင်ကို ပိုမိုသိကျွမ်းလာရန် သမ္မာကျမ်းစာကိုလေ့လာခြင်းသည် အကောင်းဆုံးနည်းဖြစ်၏။ ကျမ်းစာတွင် ယေဟောဝါသည် မိမိမည်သို့သောဘုရားသခင်ဖြစ်ကြောင်း ကျွန်ုပ်တို့အား ပြောပြတော်မူသည်။ ကိုယ်တော်သည် မိမိ၏ရည်ရွယ်တော်မူချက်များကိုလည်း ကျွန်ုပ်တို့အား ဖော်ပြတော်မူပြီး ကိုယ်တော့်နည်းလမ်းတော်များအတိုင်း ကျွန်ုပ်တို့အားသွန်သင်တော်မူ၏။ (အာမုတ် ၃:၇; ၂ တိမောသေ ၃:၁၆၊ ၁၇) ဘုရားသခင်သည် ကျွန်ုပ်တို့အား “[အမှန်]တရား [“တိကျမှန်ကန်သည့်အသိပညာ၊” ကဘ] ကို သိစေ” ရန်အလိုတော်ရှိရာ ကိုယ်တော်၏မေတ္တာပါ ပြင်ဆင်ပေးချက်များမှ ကျွန်ုပ်တို့ အကျိုးခံစား နိုင်ကြပါသည်တကား! (၁ တိမောသေ ၂:၄) သို့ဖြစ်၍ ယေဟောဝါအကြောင်း ကျွန်ုပ်တို့သင်ယူနိုင်သမျှ အစွမ်းကုန်သင်ယူကြရန် ကြိုးစားကြပါစို့။
[အောက်ခြေမှတ်ချက်များ]
^ အပိုဒ်၊ 19 ဤအကြောင်းအရာကို အသေးစိတ်ဆွေးနွေးသိရှိလိုလျှင် ယေဟောဝါသက်သေများထုတ်ဝေသည့် သုံးပါးပေါင်းတစ်ဆူကို သင်ယုံကြည်သင့်သလောဘရိုရှာ [လိပ်] ကို ကြည့်ပါ။
[စာမျက်နှာ ၅ ပါ ရုပ်ပုံ]
ဘုရားသခင်သည် ကမ္ဘာမြေကြီးကို ဖန်ဆင်းရန်နှင့် သမ္မာကျမ်းစာကိုရေးသားရန် လူတို့ကိုမှုတ်သွင်းပေးဖို့ မိမိ၏သန့်ရှင်းသောဝိညာဉ်တော်ကို အသုံးပြုတော်မူခဲ့
[စာမျက်နှာ ၅ ပါ ရုပ်ပုံ]
ကောင်းကင်မှအသံတော်က “ဤသူကား . . . ငါ၏ ချစ်သားပေတည်း” ဟုမိန့်ဆိုခဲ့
[စာမျက်နှာ ၇ ပါ ရုပ်ပုံ]
ယေရှုသည် မိမိထက်ကြီးမြတ်တော်မူသည့် ဘုရားသခင်ထံ ဆုတောင်းတော်မူခဲ့
[စာမျက်နှာ ၇ ပါ ရုပ်ပုံ]
ယေရှုသည် ဘုရားသခင့်နာမတော်ကို အခြားသူများအား သိရှိစေခဲ့
[စာမျက်နှာ ၇ ပါ ရုပ်ပုံ]
ကျွန်ုပ်တို့သည် ဘုရားသခင်ကို ပိုမိုသိကျွမ်းလာနိုင်