ယေဟောဝါ၏ချစ်ခင်ကြင်နာမှုမှ အကျိုးခံစားရခြင်း
ယေဟောဝါ၏ချစ်ခင်ကြင်နာမှုမှ အကျိုးခံစားရခြင်း
“အဘယ်သူသည် ပညာရှိသနည်း။ ထိုသူသည် . . . ယေဟောဝါ၏ ချစ်ခင်ကြင်နာမှုလုပ်ရပ်များကို အာရုံစိုက်လိမ့်မည်။”—ဆာလံ ၁၀၇:၄၃၊ ကဘ။
၁။ ‘ချစ်ခင်ကြင်နာမှု’ ဟုဘာသာပြန်ထားသော ဟေဗြဲစကားလုံးကို သမ္မာကျမ်းစာတွင် မည်သည့်နေရာ၌ ဦးဆုံးအသုံးပြုထားသနည်း၊ ဤအရည်အသွေးနှင့်ပတ်သက်၍ အဘယ်မေးခွန်းများကို ကျွန်ုပ်တို့သုံးသပ်ကြမည်နည်း။
လွန်ခဲ့သောအနှစ် ၄,၀၀၀ ခန့်က အာဗြံဟံ၏တူလောတသည် ယေဟောဝါနှင့်ပတ်သက်၍ ဤသို့ဆိုခဲ့သည်– “အကျွန်ုပ်၌ပြုတော်မူသော . . . ကျေးဇူး [“ချစ်ခင်ကြင်နာမှု၊” ကဘ] များပြားလှပါ၏။” (ကမ္ဘာဦး ၁၉:၁၉) ဤအခန်းငယ်တွင် ‘ချစ်ခင်ကြင်နာမှု’ ဟုဘာသာပြန်ဆိုထားသော ဟေဗြဲစကားလုံးကို သမ္မာကျမ်းစာတွင် ပထမအကြိမ်တွေ့ရှိရ၏။ ယေဟောဝါ၏ ဤအရည်အသွေးအကြောင်းကို ယာကုပ်၊ နောမိ၊ ဒါဝိဒ်နှင့် ဘုရားသခင်၏အခြားကျေးကျွန်များကလည်း ဖော်ပြခဲ့ကြသည်။ (ကမ္ဘာဦး ၃၂:၁၀; ရုသ ၁:၈; ၂ ဓမ္မရာဇဝင် ၂:၆) အမှန်မှာ ၎င်းဟေဗြဲစကားလုံးသည် ဟေဗြဲကျမ်း၏ မူရင်းကျမ်းတွင် အကြိမ်ပေါင်း ၂၅၀ ခန့်ပါရှိသည်။ သို့သော် ယေဟောဝါ၏ချစ်ခင်ကြင်နာမှုကား အဘယ်နည်း။ အတိတ်က ၎င်းကိုမည်သူတို့အားပြသခဲ့သနည်း။ ယနေ့ ၎င်း၏အကျိုးကျေးဇူးကို ကျွန်ုပ်တို့မည်သို့ခံစားကြရသနည်း။
၂။ ‘ချစ်ခင်ကြင်နာမှု’ ဟုပြန်ဆိုထားသောဟေဗြဲစကားလုံးကို အဓိပ္ပာယ်ဖွင့်ဆိုရန် အဘယ်ကြောင့်ခဲယဉ်းသနည်း၊ ၎င်း၏သင့်လျော်သော အခြားပြန်ဆိုပုံကား အဘယ်နည်း။
၂ သမ္မာကျမ်းစာတွင် ‘ချစ်ခင်ကြင်နာမှု’ ဟုဘာသာပြန်ထားသည့် ဟေဗြဲစကားလုံးသည် အဓိပ္ပာယ်ထိမိလွန်းရကား ဘာသာစကားအများစုတွင် ၎င်းစကားလုံး၏ဆိုလိုရင်းအတိအကျကို ဖော်ဆောင်နိုင်သည့် တစ်လုံးတည်းသောဝေါဟာရမရှိချေ။ ထို့ကြောင့် “မေတ္တာ” “သက်ညှာမှု” နှင့် “တည်ကြည်ခြင်း” စသည့်ပြန်ဆိုချက်များသည် ယင်း၏အဓိပ္ပာယ်အပြည့်အစုံကို မဖွင့်ဆိုချေ။ သို့ရာတွင် အဓိပ္ပာယ်ပို၍ကျယ်ဝန်းသော ‘ချစ်ခင်ကြင်နာမှု’ ဟုပြန်ဆိုခြင်းသည် “ထိုစကားလုံး၏အဓိပ္ပာယ်အပြည့်အစုံနှင့် နီးစပ်သည်” ဟုဓမ္မပညာရပ်ဆိုင်ရာ ဓမ္မဟောင်းကျမ်း၏စကားလုံးစာအုပ်ကဖော်ပြသည်။ သန့်ရှင်းသောကျမ်းစောင်များ၏ ကမ္ဘာသစ်ဘာသာပြန်ကျမ်း—အညွှန်းများဖြင့်က ‘ချစ်ခင်ကြင်နာမှု’ ဟုပြန်ဆိုထားသော ဟေဗြဲစကားလုံးကို အခြားတစ်နည်းဖြင့် ‘တည်ကြည်သောမေတ္တာ’ ဟုသင့်လျော်စွာပြန်ဆိုထားသည်။—ထွက်မြောက်ရာ ၁၅:၁၃; ဆာလံ ၅:၇၊ ကဘ၊ အောက်ခြေမှတ်ချက်။
ချစ်ခြင်းမေတ္တာ၊ တည်ကြည်ခြင်းနှင့် ကွာခြား
၃။ ‘ချစ်ခင်ကြင်နာမှု’ နှင့် ‘ချစ်ခြင်းမေတ္တာ’ ဟုပြန်ဆိုထားသော ဟေဗြဲစကားလုံးတို့သည် မည်သို့ကွာခြားသနည်း။
၃ ချစ်ခင်ကြင်နာမှု သို့မဟုတ် တည်ကြည်သောမေတ္တာသည် ချစ်ခြင်းမေတ္တာ၊ တည်ကြည်ခြင်း အရည်အသွေးများနှင့် အလွန်နီးစပ်သည်။ တစ်ချိန်တည်းတွင် အရေးပါသောနည်းဖြင့်လည်း ကွာခြားသည်။ ချစ်ခင်ကြင်နာမှုနှင့် ချစ်ခြင်းမေတ္တာ မည်သို့ကွာခြားကြောင်း သုံးသပ်ကြည့်ပါ။ အချို့ဘာသာစကားများတွင် မေတ္တာကို အရာဝတ္ထုများ၊ အယူအဆများနှင့် ဆက်စပ်အသုံးပြု ပြောဆိုတတ်ကြသည်။ သမ္မာကျမ်းစာတွင် “စပျစ်ရည်နှင့်ဆီကိုကြိုက်” ၍ “ပညာတရားကိုနှစ်သက်” သည်ဟုဆိုပါသည်။ (သု. ၂၁:၁၇; ၂၉:၃) သို့သော် ချစ်ခင်ကြင်နာမှုကိုကား အယူအဆများ သို့မဟုတ် သက်မဲ့အရာဝတ္ထုများနှင့် တွဲ၍အသုံးမပြုပါ၊ လူနှင့်သာ ဆက်စပ်အသုံးပြုသည်။ ဥပမာ၊ ယေဟောဝါသည် “အမျိုးအစဉ်အဆက် အထောင်အသောင်းတိုင်အောင်၊ ချစ်ခင်ကြင်နာမှုကိုပြသည်ဟု ထွက်မြောက်ရာ ၂၀:၆ (ကဘ) ကဆိုသောအခါ လူတို့ပါဝင်ပတ်သက်သည်။
၄။ ‘ချစ်ခင်ကြင်နာမှု’ ဟုပြန်ဆိုထားသော ဟေဗြဲဝေါဟာရသည် တည်ကြည်ခြင်းနှင့် မည်သို့ကွာခြားသနည်း။
၄ ‘ချစ်ခင်ကြင်နာမှု’ ဟုပြန်ဆိုထားသော ဟေဗြဲစကားလုံးသည် ‘တည်ကြည်ခြင်း’ ဟူသောစကားလုံးထက်လည်း အဓိပ္ပာယ်ပိုကျယ်ဝန်းသည်။ အချို့ဘာသာစကားများတွင် ‘တည်ကြည်ခြင်း’ ကို အထက်လူကြီးတစ်ဦးအား လက်အောက်ခံတစ်ဦးက ပြသသင့်သောသဘောနှင့်ဆက်စပ် အသုံးပြုလေ့ရှိသည်။ သို့သော် သုတေသီတစ်ဦးဖော်ပြသည်မှာ ကျမ်းစာရှုထောင့်မှဆိုလျှင် ချစ်ခင်ကြင်နာမှုသည် “များသောအားဖြင့် ၎င်းနှင့်ဆန့်ကျင်သော ဆက်ဆံရေးကို ဖော်ညွှန်းလေ့ရှိသည်– တန်ခိုးရှိသူသည် ဆင်းရဲချို့ငဲ့သူ သို့မဟုတ် မှီခိုသူကို တည်ကြည်ခြင်းဖြစ်သည်။ ထို့ကြောင့် ဘုရင်ဒါဝိဒ်က ယေဟောဝါအား ဤသို့အသနားခံနိုင်ခဲ့သည်– “မျက်နှာတော်၏အလင်းကို ကိုယ်တော်၏ကျွန်အပေါ်၌ ထွန်းလင်းစေတော်မူပါ။ ကိုယ်တော်၏ ချစ်ခင်ကြင်နာမှု၌ အကျွန်ုပ်ကိုကယ်တင်တော်မူပါ။” (ဆာလံ ၃၁:၁၆၊ ကဘ) တန်ခိုးကြီးမားတော်မူသော ယေဟောဝါသည် ချို့ငဲ့သူဒါဝိဒ်ကို ချစ်ခင်ကြင်နာမှု သို့မဟုတ် တည်ကြည်သောမေတ္တာပြပါရန် ဒါဝိဒ်အသနားခံခဲ့သည်။ တန်ခိုးရှိသူအပေါ် ချို့ငဲ့သူသည် အဘယ်အာဏာမျှ မရှိသောကြောင့် ဤအခြေအနေမျိုးတွင် ချစ်ခင်ကြင်နာမှုကို မပြမနေပြရခြင်းမဟုတ်ဘဲ တလိုတလားပြခဲ့ခြင်းဖြစ်သည်။
၅။ (က) ဘုရားသခင်၏ချစ်ခင်ကြင်နာမှုဆိုင်ရာ အဘယ်ထူးခြားချက်များကို သမ္မာကျမ်းစာတွင်တွေ့ရှိရသနည်း။ (ခ) ယေဟောဝါ ချစ်ခင်ကြင်နာမှုပြခဲ့သော အဘယ်အကြောင်းများကို ကျွန်ုပ်တို့သုံးသပ်ကြမည်နည်း။
၅ “အဘယ်သူသည် ပညာရှိသနည်း” ဟုဆာလံဆရာမေးခဲ့သည်။ “ထိုသူသည် . . . ယေဟောဝါ၏ ချစ်ခင်ကြင်နာမှုလုပ်ရပ်များကို အာရုံစိုက်လိမ့်မည်။” (ဆာလံ ၁၀၇:၄၃၊ ကဘ) ယေဟောဝါ၏ချစ်ခင်ကြင်နာမှုသည် ကယ်လွှတ်၍ ကာကွယ်စောင့်ရှောက်မှုပေးနိုင်သည်။ (ဆာလံ ၆:၄; ၁၁၉:၈၈၊ ၁၅၉) ၎င်းသည် အကာအကွယ်ပေးပြီး အခက်အခဲများကြားမှ စိတ်သက်သာမှုရစေသည့် အခြေခံအကြောင်းတစ်ခုဖြစ်သည်။ (ဆာလံ ၃၁:၁၆၊ ၂၁; ၄၀:၁၁; ၁၄၃:၁၂) ဤအရည်အချင်းကြောင့် ပြစ်မှားမိပြီး ပြန်နာလန်ထူနိုင်သည်။ (ဆာလံ ၂၅:၇) ကျမ်းစာဇာတ်လမ်းအချို့ကို ပြန်ပြောင်းဆင်ခြင်ပြီး အခြားကျမ်းချက်များကို ဂရုပြုသည့်အခါ ယေဟောဝါသည် ကိုယ်တော်၏ချစ်ခင်ကြင်နာမှုကို (၁) တစ်စုံတစ်ရာသောအပြုအမူဖြင့် ဖော်ပြကြောင်းနှင့် (၂) ကိုယ်တော်၏တည်ကြည်သောကျေးကျွန်များ ခံစားရကြောင်း ကျွန်ုပ်တို့တွေ့ရှိလိမ့်မည်။
ကယ်လွှတ်ခြင်း—ချစ်ခင်ကြင်နာမှု တင်ပြနည်းတစ်ခု
၆၊ ၇။ (က) ယေဟောဝါသည် လောတ၏ကိစ္စတွင် မိမိ၏ချစ်ခင်ကြင်နာမှုကို မည်သို့ဖော်ပြခဲ့သနည်း။ (ခ) ယေဟောဝါသည် ချစ်ခင်ကြင်နာမှုရှိကြောင်း အဘယ်အချိန်တွင် လောတဖော်ပြခဲ့သနည်း။
၆ ယေဟောဝါ၏ချစ်ခင်ကြင်နာမှုအတိုင်းအတာကို စိစစ်ရန် အကောင်းဆုံးနည်းမှာ ထိုအရည်အချင်းနှင့်ဆိုင်သော ကျမ်းစာမှတ်တမ်းများကို ဆန်းစစ်ကြည့်ခြင်းဖြစ်သည်။ အာဗြံဟံ၏တူ လောတသည် ရန်သူစစ်တပ်၏သိမ်းယူခြင်းကိုခံရကြောင်း ကမ္ဘာဦး ၁၄:၁-၁၆ ၌ ကျွန်ုပ်တို့ဖတ်ရသည်။ သို့သော် လောတကို အာဗြံဟံကယ်ဆယ်ခဲ့သည်။ လောတနှင့် သူ့မိသားစုနေထိုင်သော ဆိုးသွမ်းသည့်သောဒုံမြို့ကို ဖျက်ဆီးပစ်ဖို့ ယေဟောဝါဆုံးဖြတ်ချိန်တွင် လောတသည် အသက်အန္တရာယ်တွေ့ကြုံခဲ့ရပြန်သည်။—ကမ္ဘာဦး ၁၈:၂၀-၂၂; ၁၉:၁၂၊ ၁၃။
၇ သောဒုံမြို့ကိုမဖျက်ဆီးမီကလေးတွင် ယေဟောဝါ၏ကောင်းကင်တမန်များသည် လောတနှင့် သူ၏မိသားစုကို မြို့ပြင်သို့ပို့ပေးခဲ့သည်။ ထိုအခိုက် လောတဤသို့ပြောဆိုခဲ့သည်– “ယခုမှာ ကိုယ်တော်ကျွန်သည် ရှေ့တော်၌မျက်နှာရပါပြီ။ အကျွန်ုပ်အသက်ချမ်းသာစေသဖြင့်၊ အကျွန်ုပ်၌ပြုတော်မူသော ချစ်ခင်ကြင်နာမှုများပြားလှပါ၏။” (ကမ္ဘာဦး ၁၉:၁၆၊ ၁၉၊ ကဘ) ယေဟောဝါသည် မိမိကိုလွတ်မြောက်စေခြင်းအားဖြင့် အထူးချစ်ခင်ကြင်နာမှုပြခဲ့ကြောင်း ထိုသို့လောတအသိအမှတ်ပြုခဲ့သည်။ ဤအဖြစ်အပျက်တွင် ဘုရားသခင်သည် ကယ်လွှတ်၍ ကာကွယ်စောင့်ရှောက်ပေးခြင်းအားဖြင့် ချစ်ခင်ကြင်နာမှုပြခဲ့သည်။—၂ ပေတရု ၂:၇။
ယေဟောဝါ၏ချစ်ခင်ကြင်နာမှုနှင့် ကိုယ်တော့်လမ်းညွှန်မှု
၈၊ ၉။ (က) အာဗြံဟံကျွန်၏တာဝန်ကား အဘယ်နည်း။ (ခ) ထိုကျွန်သည် ဘုရားသခင့်ချစ်ခင်ကြင်နာမှုခံစားရဖို့ အဘယ်ကြောင့်တောင်းလျှောက်ခဲ့သနည်း၊ သူဆုတောင်းနေစဉ် အဘယ်သို့ဖြစ်ပျက်ခဲ့သနည်း။
၈ ချစ်ခင်ကြင်နာမှု သို့မဟုတ် သစ္စာစောင့်သိသောမေတ္တာကို နောက်တစ်ကြိမ် ဘုရားသခင်ပြခဲ့ကြောင်း ကမ္ဘာဦးအခန်းကြီး ၂၄ တွင် ကျွန်ုပ်တို့ဖတ်ရသည်။ အာဗြံဟံသည် မိမိဆွေမျိုးများနေထိုင်ရာတိုင်းပြည်သို့သွား၍ သားဣဇာက်အတွက် ဇနီးရှာပေးရန် မိမိကျွန်အား တာဝန်ပေးခဲ့ကြောင်း ထိုမှတ်တမ်းကပြောပြသည်။ (အခန်းငယ် ၂-၄) ထိုတာဝန်သည် ခက်ခဲသော်လည်း မိမိကို ယေဟောဝါ၏ကောင်းကင်တမန် လမ်းညွှန်ပေးမည်ဟု ကျွန်ကစိတ်ချခဲ့သည်။ (အခန်းငယ် ၇) နောက်ဆုံးတွင် ၎င်းကျွန်သည် (ခါရန် သို့မဟုတ် အနီးတစ်ဝိုက်ရှိ) “နာခေါ်မြို့” ပြင်ရှိ ရေတွင်းသို့ အမျိုးသမီးများရေခပ်ဆင်းချိန်တွင် ရောက်သွားခဲ့သည်။ (အခန်းငယ် ၁၀၊ ၁၁) အမျိုးသမီးများနီးလာသည်ကို သူတွေ့သောအခါ အရေးကြီးသောအချိန် ရောက်လာပြီဖြစ်ကြောင်း သူသိရှိခဲ့သည်။ သို့သော် တော်မှန်သည့်အမျိုးသမီးကို သူမည်သို့သိနိုင်မည်နည်း။
၉ ဘုရားသခင့်လမ်းညွှန်မှုကို မိမိလိုအပ်ကြောင်းသိရှိပြီး အာဗြံဟံ၏ကျွန်သည် ဤသို့ဆုတောင်းခဲ့သည်– “အကျွန်ုပ်၏သခင်၊ အာဗြံဟံ၏ဘုရားသခင်ထာဝရဘုရား ယနေ့အကျွန်ုပ်အကြံကို ထမြောက်စေ၍၊ အကျွန်ုပ်၏သခင်အာဗြံဟံ၌ ကျေးဇူးပြု [“ချစ်ခင်ကြင်နာမှုပြ၊” ကဘ] တော်မူပါဟု အကျွန်ုပ်ဆုတောင်းပါ၏။” (အခန်းငယ် ၁၂) ယေဟောဝါသည် မိမိ၏ချစ်ခင်ကြင်နာမှုကို မည်သို့တင်ပြမည်နည်း။ ဘုရားသခင်ရွေးချယ်သော မိန်းမငယ်ကို မိမိသိနိုင်ရန် အမှတ်အသားတစ်ခုခုပေးပါဟု ကျွန်ကတောင်းဆိုခဲ့သည်။ (အခန်းငယ် ၁၃၊ ၁၄) ယေဟောဝါအား သူတောင်းဆိုသည့်အတိုင်း အမျိုးသမီးတစ်ဦး အတိအကျပြုလုပ်ခဲ့သည်။ သူ၏ဆုတောင်းချက်ကို ထိုအမျိုးသမီးကြားသွားသည့်အလားပင်! (အခန်းငယ် ၁၅-၂၀) အာဗြံဟံ၏ကျွန်သည် အလွန်အံ့အားသင့်ပြီး “ထိုမိန်းမကိုအံ့ဩ၍ [“စေ့စေ့ကြည့်လျက်၊” ကဘ] နေလေ၏။” သို့တိုင် အရေးကြီးသောအချက်အချို့ကို သိဖို့လိုနေ၏။ ဤချောမောလှပသောအမျိုးသမီးသည် အာဗြံဟံ၏ဆွေမျိုးတစ်ဦးလော။ အိမ်ထောင်မကျသေးသူလော။ ထို့ကြောင့် ကျွန်ဖြစ်သူသည် “မိမိရောက်လာသောအမှုကို ထာဝရဘုရား[သခင်]ပြုစုတော်မူသည်၊ မမူသည်ကိုသိလို၍၊ တိတ်ဆိတ်စွာနေလေ၏။”—အခန်းငယ် ၁၆၊ ၂၁။
၁၀။ ယေဟောဝါသည် မိမိ၏သခင်ကို ချစ်ခင်ကြင်နာမှုပြခဲ့ပြီဟု အာဗြံဟံ၏ကျွန် အဘယ်ကြောင့်ကောက်ချက်ချခဲ့သနည်း။
၁၀ ထိုသို့ဖြစ်ပြီးမကြာမီ ၎င်းမိန်းမပျိုက မိမိသည် “နာခေါ် [အာဗြံဟံ၏ညီ] ၏မယား မိလခါဖွားမြင်သော၊ ဗေသွေလ၏သမီးဖြစ်” ကြောင်းဖော်ပြခဲ့သည်။ (ကမ္ဘာဦး ၁၁:၂၆; ၂၄:၂၄) ထိုအခိုက် မိမိ၏ဆုတောင်းချက်ကို ယေဟောဝါဖြေဆိုပေးခဲ့ကြောင်း ကျွန်ဖြစ်သူသိရှိခဲ့သည်။ သူသည် အံ့အားသင့်သွားပြီး ဦးညွှတ်လျက်ဤသို့ဆိုခဲ့သည်– “အကျွန်ုပ်သခင်မှ ချစ်ခင်ကြင်နာမှုနှင့် ယုံကြည်စိတ်ချမှုကို ရုပ်သိမ်းတော်မမူသော၊ အကျွန်ုပ်သခင်အာဗြံဟံ၏ဘုရားသခင် ယေဟောဝါသည် မင်္ဂလာရှိတော်မူစေသတည်း။ လမ်းမှာသွားလျက်ရှိသော အကျွန်ုပ်ကို ထာဝရဘုရားသည် အကျွန်ုပ်သခင်၏ညီအစ်ကိုအိမ်သို့ ပို့ဆောင်တော်မူပါသည်တကား။” (အခန်းငယ် ၂၇၊ ကဘ) ဘုရားသခင်သည် လမ်းညွှန်ပေးခြင်းဖြင့် ထိုကျွန်၏သခင် အာဗြံဟံကို ချစ်ခင်ကြင်နာမှုပြခဲ့သည်။
ဘုရားသခင့်ချစ်ခင်ကြင်နာမှုက သက်သာရာရစေပြီး အကာအကွယ်ပေး
၁၁၊ ၁၂။ (က) ယောသပ်သည် အဘယ်စမ်းသပ်မှုများ ခံနေရစဉ် ယေဟောဝါ၏ချစ်ခင်ကြင်နာမှုကို ခံစားခဲ့ရသနည်း။ (ခ) ဘုရားသခင်သည် ယောသပ်၏အဖြစ်အပျက်တွင် ချစ်ခင်ကြင်နာမှုကို မည်သို့ဖော်ပြခဲ့သနည်း။
၁၁ ကမ္ဘာဦးအခန်းကြီး ၃၉ ကိုဆက်၍သုံးသပ်ကြည့်ကြစို့။ ၎င်းသည် အာဗြံဟံ၏မြစ်၊ အီဂျစ်ပြည်သို့ ကျွန်အဖြစ်ရောင်းချခံခဲ့ရသူယောသပ်အကြောင်းကို အဓိကထားသည်။ သို့သော် “ထာဝရဘုရားသည် ယောသပ်ဘက်မှာရှိတော်မူ . . . ၏။” (အခန်းငယ် ၁၊ ၂) အမှန်မှာ၊ ယောသပ်၏အီဂျစ်သခင် ပေါတိဖာပင်လျှင် ယောသပ်ဘက်၌ ယေဟောဝါရှိတော်မူသည်ဟု ကောက်ချက်ချခဲ့သည်။ (အခန်းငယ် ၃) သို့သော် ယောသပ်သည် အလွန်အရေးပါသောစမ်းသပ်မှုတစ်ခုကို ရင်ဆိုင်ခဲ့ရသည်။ သူသည် ပေါတိဖာ၏ဇနီးကို လိင်ဆိုင်ရာကျူးလွန်မှုပြုသည်ဟု မတရားစွပ်စွဲခံရပြီး ထောင်ချခံခဲ့ရသည်။ (အခန်းငယ် ၇-၂၀) “ထောင်ထဲမှာ” “သူ့ကိုခြေချင်းခတ်၍ သံနှင့်ညှဉ်းဆဲကြ၏။”—ကမ္ဘာဦး ၄၀:၁၅; ဆာလံ ၁၀၅:၁၈။
၁၂ အထူးခံရခက်သော ထိုအဖြစ်ဆိုး ကြုံတွေ့နေရစဉ် အဘယ်သို့ဖြစ်ပျက်ခဲ့သနည်း။ “ထာဝရဘုရားသည် သူ့ဘက်၌ရှိ၍ ကယ်မသနား [“ချစ်ခင်ကြင်နာမှုပြ၊” ကဘ] တော်မူ . . . ၏။” (အခန်းငယ် ၂၁က) ချစ်ခင်ကြင်နာမှုလုပ်ရပ်တစ်ခုက ယောသပ်ခံနေရသောအခက်အခဲများကို တဖြည်းဖြည်းရပ်စဲသွားစေသည့် ဆက်တိုက်အဖြစ်အပျက်များကို စတင်စေခဲ့၏။ ယေဟောဝါသည် ယောသပ်အား “ထောင်မှူးထံမျက်နှာရစေ” ခဲ့သည်။ (အခန်းငယ် ၂၁ခ) သို့ဖြစ်၍ ထောင်မှူးသည် ယောသပ်ကို တာဝန်ခံတစ်ဦးအဖြစ်ခန့်အပ်ခဲ့သည်။ (အခန်းငယ် ၂၂) ထို့နောက် အီဂျစ်ရှင်ဘုရင်ဖာရောရှေ့ရောက်စေခဲ့သူနှင့် ယောသပ်တွေ့ဆုံခဲ့သည်။ (ကမ္ဘာဦး ၄၀:၁-၄၊ ၉-၁၅; ၄၁:၉-၁၄) တစ်ဖန် ရှင်ဘုရင်သည် ယောသပ်ကို အီဂျစ်ပြည်၏ဒုတိယအုပ်စိုးရှင်အဖြစ် ခန့်အပ်လိုက်လေသည်၊ ယင်းကြောင့် အီဂျစ်ပြည်၌ အစာခေါင်းပါးသောအခါ အသက်ကယ်ဆယ်ရေးလုပ်ငန်းကို သူထမ်းဆောင်ခဲ့သည်။ (ကမ္ဘာဦး ၄၁:၃၇-၅၅) ယောသပ်သည် အသက် ၁၇ နှစ်အရွယ်မှစ၍ ဆင်းရဲခြင်းများကို ခံစားခဲ့ရာ တစ်ဆယ့်နှစ်နှစ်ကျော် ခံခဲ့ရသည်! (ကမ္ဘာဦး ၃၇:၂၊ ၄; ၄၁:၄၆) သို့သော် ဆင်းရဲခြင်းအမျိုးမျိုးခံနေရသည့် ထိုနှစ်များတစ်လျှောက် ယေဟောဝါဘုရားသခင်သည် ယောသပ်ကို ဘေးအန္တရာယ်အတိမရောက်စေဘဲ ဘုရားသခင့်ရည်ရွယ်ချက်တွင် ထူးခြားသောအခန်းကဏ္ဍမှ အမှုဆောင်ရန်သူ့ကိုကာကွယ်စောင့်ရှောက်ခြင်းအားဖြင့် မိမိ၏ချစ်ခင်ကြင်နာမှုကို ပြခဲ့သည်။
ဘုရားသခင့်ချစ်ခင်ကြင်နာမှု ဘယ်သောအခါမျှ မကုန်ခန်း
၁၃။ (က) ဆာလံ ၁၃၆ တွင် ယေဟောဝါ၏ချစ်ခင်ကြင်နာမှုဆိုင်ရာ အဘယ်ဖော်ပြချက်များကို တွေ့ရှိရသနည်း။ (ခ) ချစ်ခင်ကြင်နာမှု၏ သဘောသဘာဝကား အဘယ်နည်း။
၁၃ ယေဟောဝါသည် ဣသရေလလူမျိုးအပေါ် ချစ်ခင်ကြင်နာမှုကို ကြိမ်ဖန်များစွာတင်ပြခဲ့သည်။ ဘုရားသခင်သည် ကိုယ်တော်၏ချစ်ခင်ကြင်နာမှုကြောင့် သူတို့ကိုကယ်လွှတ်ခဲ့ကြောင်း (အခန်းငယ် ၁၀-၁၅)၊ လမ်းညွှန်ခဲ့ကြောင်း (အခန်းငယ် ၁၆)၊ ကာကွယ်ပေးခဲ့ကြောင်း (အခန်းငယ် ၁၇-၂၀) ဆာလံ ၁၃၆ တွင်ဖော်ပြခဲ့သည်။ ဘုရားသခင်သည် တစ်ဦးချင်းစီကိုလည်း ချစ်ခင်ကြင်နာမှုပြခဲ့ပါသည်။ လူလူချင်းကို ချစ်ခင်ကြင်နာမှုပြသူတစ်ဦးသည် အရေးတကြီးလိုအပ်သည့်အကူအညီကို စိတ်ပါကိုယ်လျောက်ပေးခြင်းအားဖြင့် တင်ပြလေ့ရှိသည်။ ချစ်ခင်ကြင်နာမှုနှင့်ပတ်သက်၍ ကျမ်းစာဆိုင်ရာအကိုးအကားစာအုပ်တစ်အုပ်က ဤသို့ဖော်ပြသည်– “၎င်းသည် ဘဝကိုဆက်စေသည့် သို့မဟုတ် တိုးတက်စေသည့် အပြုအမူဖြစ်သည်။ အကြောင်းမလှသည့် သို့မဟုတ် စိတ်ဆင်းရဲနေသည့် သူတစ်ဦးကို ကြားဝင်အကျိုးဆောင်ရွက်ပေးခြင်းဖြစ်သည်။” ကျမ်းပညာရှင်တစ်ဦးက ၎င်းသည် “လက်တွေ့အကောင်အထည်ဖော်သော ချစ်ခြင်းမေတ္တာ” ဟုရှင်းပြသည်။
၁၄၊ ၁၅။ လောတသည် ဘုရားသခင့်မျက်နှာသာရ ကျေးကျွန်တစ်ဦးဖြစ်ကြောင်း အဘယ်ကြောင့်သေချာနိုင်သနည်း။
၁၄ ယေဟောဝါသည် မိမိအားချစ်မြတ်နိုးသူများကို ဘယ်သောအခါမျှ ချစ်ခင်ကြင်နာမှုမပြဘဲမနေကြောင်း ကျွန်ုပ်တို့စိစစ်ခဲ့သော ကမ္ဘာဦးကျမ်းမှတ်တမ်းများက ဖော်ပြပါသည်။ လောတ၊ အာဗြံဟံနှင့် ယောသပ်တို့သည် အခြေအနေတစ်မျိုးစီ ကြုံတွေ့ခဲ့ကြရပြီး တစ်မျိုးစီစမ်းသပ်ခံခဲ့ကြရသည်။ သူတို့သည် မစုံလင်သူများဖြစ်ကြသော်လည်း ယေဟောဝါ၏ကျေးကျွန်များဖြစ်ပြီး ကိုယ်တော်၏အကူအညီကို လိုအပ်ခဲ့ကြသည်။ ကျွန်ုပ်တို့၏မေတ္တာရှင် ကောင်းကင်ခမည်းတော်သည် ထိုသို့သောသူများအပေါ် ချစ်ခင်ကြင်နာမှုတင်ပြသည့်အတွက်ကြောင့် ကျွန်ုပ်တို့နှစ်သိမ့်မှုရနိုင်ကြပါသည်။
၁၅ လောတသည် ပညာမဲ့သော ဆုံးဖြတ်ချက်ကြောင့် အခက်အခဲများကြုံတွေ့ခဲ့ရသည်။ (ကမ္ဘာဦး ၁၃:၁၂၊ ၁၃; ၁၄:၁၁၊ ၁၂) သို့တိုင် ချီးမွမ်းဖွယ်အရည်အသွေးများကိုလည်း သူတင်ပြခဲ့ပါသည်။ သောဒုံမြို့သို့ ဘုရားသခင့်ကောင်းကင်တမန်နှစ်ပါး ရောက်လာသောအခါ သူတို့ကို လောတဧည့်ဝတ်ပြုခဲ့သည်။ (ကမ္ဘာဦး ၁၉:၁-၃) သောဒုံမြို့ဖျက်ဆီးခံရတော့မည့်အကြောင်း ယုံကြည်သဖြင့် သမက်များကို သူသတိပေးခဲ့သည်။ (ကမ္ဘာဦး ၁၉:၁၄) လောတအား ဘုရားသခင်ရှုမြင်ပုံကို ၂ ပေတရု ၂:၇-၉ တွင်ဤသို့ဖော်ပြထားသည်– “မတရားသောသူတို့၏ ညစ်ညူးသောအကျင့်အားဖြင့် နှောင့်ယှက်ခြင်းကိုခံရသောသူ၊ ဖြောင့်မတ်သောလောတကို [ယေဟောဝါ] ကယ်နုတ်တော်မူ၏။ ထိုဖြောင့်မတ်သောသူသည် မတရားသောသူတို့တွင်နေစဉ်အခါ၊ သူတို့၏မတရားသောအမှုများကို နေ့တိုင်းမပြတ်မျက်စိမြင်လျက်၊ နားကြားလျက်ရှိသဖြင့်၊ မိမိဖြောင့်မတ်သောစိတ်နှလုံးကို ပြင်းစွာညှဉ်းဆဲရ၏။ ဘုရား[သခင်]ဝတ်၌မွေ့လျော်သောသူတို့ကို စုံစမ်းနှောင့်ယှက်ခြင်းအထဲက ကယ်နုတ်ခြင်းငှာ . . . ထာဝရဘုရားသည် တတ်နိုင်တော်မူ၏။” မှန်ပါသည်၊ လောတသည် ဖြောင့်မတ်သောသူတစ်ဦးဖြစ်ပြီး ဤကျမ်းချက်ပါစကားအရ သူသည် ဘုရားသခင်ဝတ်၌ မွေ့လျော်သူတစ်ဦးလည်းဖြစ်၏။ သူ့ကဲ့သို့ပင် ကျွန်ုပ်တို့သည် “သန့်ရှင်းသောအကျင့်ကိုကျင့် [၍] ဘုရား[သခင်]ဝတ်၌မွေ့လျော်” နေကြစဉ် ဘုရားသခင်၏ချစ်ခင်ကြင်နာမှုကို ခံစားရကြသည်။—၂ ပေတရု ၃:၁၁၊ ၁၂။
၁၆။ အာဗြံဟံ၊ ယောသပ်တို့အကြောင်းကို သမ္မာကျမ်းစာက အဘယ်နှစ်လိုဖွယ်အသုံးအနှုန်းများဖြင့် ဖော်ပြပြောဆိုသနည်း။
၁၆ အာဗြံဟံသည် ယေဟောဝါနှင့်ရင်းနှီးသောဆက်ဆံရေးရှိကြောင်း ကမ္ဘာဦး ၂၄ ကအတိအလင်းဖော်ပြသည်။ “ထာဝရဘုရားသည် အရာရာ၌ သူ့ကိုကောင်းချီးပေးတော်မူ” ကြောင်းပထမအခန်းငယ်ကဖော်ပြသည်။ အာဗြံဟံ၏ကျွန်က ယေဟောဝါအား “အကျွန်ုပ်၏သခင် အာဗြံဟံ၏ဘုရားသခင်” ဟုခေါ်ဆိုခဲ့သည်။ (အခန်းငယ် ၁၂၊ ၂၇) အာဗြံဟံသည် ‘ဖြောင့်မတ်သည်ဟုကြေညာခံရ’ ပြီး “‘ဘုရားသခင်၏အဆွေ’ ဟူ၍ ခေါ်ဝေါ်ခြင်းကိုခံရ” သည်ဟု တပည့်တော်ယာကုပ်ကဆို၏။ (ယာကုပ် ၂:၂၁-၂၃) ယောသပ်နှင့်ပတ်သက်၍လည်း ထိုနည်းတူပင်။ ယေဟောဝါနှင့် ယောသပ်၏ရင်းနှီးသောဆက်ဆံရေးကို ကမ္ဘာဦးအခန်းကြီး ၃၉ တစ်လျှောက်လုံးတွင် အလေးပေးဖော်ပြထားသည်။ (အခန်းငယ် ၂၊ ၃၊ ၂၁၊ ၂၃) ထို့အပြင် တပည့်တော်သတေဖန်က “ဘုရားသခင်သည် သူနှင့်အတူရှိတော်မူ” ၏ဟု ယောသပ်နှင့်စပ်လျဉ်း၍ဆို၏။—တမန်တော် ၇:၉၊ သမ္မာ။
၁၇။ လောတ၊ အာဗြံဟံနှင့် ယောသပ်တို့၏ပုံနမူနာမှ ကျွန်ုပ်တို့အဘယ်အရာသင်ယူနိုင်သနည်း။
၁၇ ယခုကျွန်ုပ်တို့သုံးသပ်ခဲ့သော ဘုရားသခင့်ချစ်ခင်ကြင်နာမှုခံစားခဲ့ရသူများသည် ယေဟောဝါဘုရားသခင်နှင့် ကောင်းသောဆက်ဆံရေးရှိပြီး ကိုယ်တော်၏ရည်ရွယ်တော်မူချက်များကို နည်းအမျိုးမျိုးဖြင့် ထမ်းဆောင်ခဲ့ကြ၏။ သူတို့ဘာသာသူတို့ မကျော်လွှားနိုင်ခဲ့သော အကျပ်အတည်းများကို ရင်ဆိုင်ခဲ့ကြရသည်။ လောတအသက်ချမ်းသာရရေး၊ အာဗြံဟံမျိုးရိုး ဆက်တည်တံ့ရေးနှင့် ယောသပ်၏အခန်းကဏ္ဍကို စောင့်ရှောက်ရေးတို့သည် အန္တရာယ်ကြုံခဲ့ရသည်။ ဘုရားသခင်ဝတ်၌မွေ့လျော်သော ဤအမျိုးသားများ လိုအပ်သောအကူအညီကို ယေဟောဝါသာလျှင် ပေးနိုင်ပြီး ကိုယ်တော်သည် ချစ်ခင်ကြင်နာမှုလုပ်ရပ်များဖြင့် ကူညီပေးခဲ့သည်။ ကျွန်ုပ်တို့လည်း ယေဟောဝါဘုရားသခင်၏ချစ်ခင်ကြင်နာမှုကို ထာဝစဉ်ခံစားလိုပါက ကိုယ်တော်နှင့်ရင်းနှီးသော နှစ်ကိုယ်ကြားဆက်ဆံရေးရှိရမည်၊ ကိုယ်တော်၏အလိုတော်ကို ဆက်ဆောင်ရွက်ရမည်။—ဧဇရ ၇:၂၈; ဆာလံ ၁၈:၅၀။
ဘုရားသခင့်ကျေးကျွန်များ မျက်နှာသာရ
၁၈။ ယေဟောဝါ၏ချစ်ခင်ကြင်နာမှုနှင့် စပ်လျဉ်း၍ ကျမ်းချက်အသီးသီးက အဘယ်သို့ဖော်ပြသနည်း။
၁၈ “မြေကြီးသည်” ယေဟောဝါ၏ချစ်ခင်ကြင်နာမှုနှင့် “ပြည့်ဝ” နေသည်ဖြစ်ရာ ဘုရားသခင်၏ ဤအရည်အသွေးကို ကျွန်ုပ်တို့တကယ်ကျေးဇူးတင်စရာပင်! (ဆာလံ ၁၁၉:၆၄) ဆာလံဆရာ၏ ဤထပ်ကျော့စကားများကို ကျွန်ုပ်တို့လှိုက်လှိုက်လှဲလှဲ ရွတ်ဆိုကြပါသည်– “လူသားတို့၌ပြုတော်မူသော ချစ်ခင်ကြင်နာမှုနှင့် အံ့ဖွယ်သောအမှုတော်တို့ကိုထောက်၍ ထာဝရဘုရား၏ဂုဏ်ကျေးဇူးတော်ကို ချီးမွမ်းကြစေ။” (ဆာလံ ၁၀၇:၈၊ ၁၅၊ ၂၁၊ ၃၁၊ ကဘ) ယေဟောဝါသည် ကိုယ်တော်၏ချစ်ခင်ကြင်နာမှုကို တစ်ဦးချင်းစီအပေါ်ဖြစ်စေ၊ အုပ်စုလိုက်အပေါ်ဖြစ်စေ ကိုယ်တော်၏မျက်နှာသာရ ကျေးကျွန်များအား ပေးသနားတော်မူသည့်အတွက် ကျွန်ုပ်တို့ဝမ်းမြောက်ကြပါသည်။ ပရောဖက်ဒံယေလသည် ဆုတောင်းချိန်တွင် ယေဟောဝါကား “ကိုယ်တော်ကိုချစ်၍ ပညတ်တော်တို့ကိုစောင့်သောသူတို့အား သစ္စာတော်မပျက် ချစ်ခင်ကြင်နာမှုကိုစောင့်တော်မူထသော၊ အလွန်ကြီးမြတ်၍ ကြောက်ရွံ့ဖွယ်ဖြစ်တော်မူသော ဘုရားသခင်” ဖြစ်၏ဟု ဆိုခဲ့သည်။ (ဒံယေလ ၉:၄၊ ကဘ) ဘုရင်ဒါဝိဒ်က “ကိုယ်တော်ကိုသိသောသူတို့အား ချစ်ခင်ကြင်နာမှုကို ဆက်၍ပြတော်မူပါ” ဟုဆုတောင်းခဲ့သည်။ (ဆာလံ ၃၆:၁၀၊ ကဘ) ယေဟောဝါသည် မိမိ၏ကျေးကျွန်များအပေါ် ချစ်ခင်ကြင်နာမှုပြသည့်အတွက် အမှန်တကယ်ကျေးဇူးတင်စရာပင်!—၃ ဓမ္မရာဇဝင် ၈:၂၃; ၁ ရာဇဝင်ချုပ် ၁၇:၁၃။
၁၉။ နောက်ဆောင်းပါးတွင် အဘယ်မေးခွန်းများကို ကျွန်ုပ်တို့သုံးသပ်ကြမည်နည်း။
၁၉ ကျွန်ုပ်တို့သည် ယေဟောဝါ၏လူမျိုးတော်ဖြစ်ခွင့်ရသဖြင့် အမှန်တကယ်မျက်နှာသာရထားကြပြီ! လူအများစုကို ဘုရားသခင်ပြတော်မူသော မေတ္တာတော်အကျိုးကို ကျွန်ုပ်တို့ခံစားရသည့်အပြင် ကောင်းကင်ခမည်းတော်၏ ချစ်ခင်ကြင်နာမှု သို့မဟုတ် တည်ကြည်သောမေတ္တာတော်မှ အထူးကောင်းချီးများကိုလည်း ခံစားကြရသည်။ (ယောဟန် ၃:၁၆) အထူးသဖြင့် အကူအညီလိုသည့်အခါ ယေဟောဝါ၏ ဤအဖိုးတန်အရည်အသွေး၏အကျိုးကို ကျွန်ုပ်တို့ခံစားကြရသည်။ (ဆာလံ ၃၆:၇) သို့သော် ယေဟောဝါဘုရားသခင်၏ ချစ်ခင်ကြင်နာမှုကို ကျွန်ုပ်တို့မည်သို့တုပနိုင်ကြသနည်း။ ဤထူးခြားသောအရည်အသွေးကို ကျွန်ုပ်တို့တစ်ဦးချင်းစီ တင်ပြနေကြပါသလော။ ဤမေးခွန်းများနှင့် သက်ဆိုင်ရာ အခြားမေးခွန်းများကို နောက်ဆောင်းပါးတွင် သုံးသပ်ကြပါမည်။
သင်မှတ်မိသလော
• ‘ချစ်ခင်ကြင်နာမှု’ ၏ကျမ်းစာပြန်ဆိုနည်း အခြားတစ်နည်းကားအဘယ်နည်း။
• ချစ်ခင်ကြင်နာမှုသည် ချစ်ခြင်းမေတ္တာနှင့်ဖြစ်စေ၊ တည်ကြည်ခြင်းနှင့်ဖြစ်စေ မည်သို့ကွာခြားသနည်း။
• ယေဟောဝါသည် လောတ၊ အာဗြံဟံနှင့် ယောသပ်တို့ကို အဘယ်နည်းများဖြင့် ချစ်ခင်ကြင်နာမှုပြသခဲ့သနည်း။
• လွန်လေပြီးသောအချိန်က ယေဟောဝါချစ်ခင်ကြင်နာမှုပြသခဲ့ခြင်းမှ ကျွန်ုပ်တို့ အဘယ်အာမခံချက်ရရှိနိုင်သနည်း။
[လေ့လာရန်မေးခွန်းများ]
[စာမျက်နှာ ၁၃ ပါ ရုပ်ပုံ]
ဘုရားသခင်သည် လောတကို ချစ်ခင်ကြင်နာမှု မည်သို့ ပြသခဲ့ကြောင်း သင်သိပါသလော
[စာမျက်နှာ ၁၅ ပါ ရုပ်ပုံ]
ချစ်ခင်ကြင်နာစွာဖြင့် ယေဟောဝါသည် အာဗြံဟံ၏ကျွန်ကို လမ်းညွှန်ခဲ့
[စာမျက်နှာ ၁၆ ပါ ရုပ်ပုံ]
ယေဟောဝါသည် ယောသပ်ကိုကာကွယ်ပေးခြင်းဖြင့် ချစ်ခင်ကြင်နာမှု တင်ပြခဲ့