လိုအပ်နေသူများကို ချစ်ခင်ကြင်နာမှုတင်ပြလော့
လိုအပ်နေသူများကို ချစ်ခင်ကြင်နာမှုတင်ပြလော့
“တစ်ယောက်နှင့်တစ်ယောက် ချစ်ခင်ကြင်နာမှု ဆက်၍ပြကြလော့။”—ဇာခရိ ၇:၉၊ ကဘ။
၁၊ ၂။ (က) ချစ်ခင်ကြင်နာမှုကို ကျွန်ုပ်တို့ အဘယ်ကြောင့်ပြသင့်သနည်း။ (ခ) အဘယ်မေးခွန်းများကို ကျွန်ုပ်တို့သုံးသပ်ကြမည်နည်း။
ယေဟောဝါဘုရားသခင်၏နှုတ်မြွက်စကားတော်က “ချစ်ခင်ကြင်နာမှု” ကိုနှစ်သက်ရန်ကျွန်ုပ်တို့ကို တိုက်တွန်းထားသည်။ (မိက္ခာ ၆:၈၊ ကဘ၊ အောက်ခြေမှတ်ချက်။) ထိုသို့အဘယ်ကြောင့်ပြုသင့်ကြောင်းကိုလည်း ဖော်ပြထားသည်။ တစ်ကြောင်းမှာ “ချစ်ခင်ကြင်နာတတ်သောသူသည် မိမိကိုယ်နှိုက်၏စိုးလ်၌ ကျေးဇူးပြု၏။” (သု. ၁၁:၁၇၊ ကဘ) မှန်လိုက်လေခြင်း! ချစ်ခင်ကြင်နာမှု သို့မဟုတ် တည်ကြည်သောမေတ္တာကိုပြခြင်းသည် အခြားသူများနှင့် ရင်းနှီး၍ခိုင်မြဲသောဆက်ဆံရေးကို ဖြစ်ပေါ်စေသည်။ ရလဒ်အနေနှင့် သစ္စာရှိမိတ်ဆွေများကို ကျွန်ုပ်တို့ရရှိမည်ဖြစ်ပြီး ယင်းသည် အမှန်ပင်အဖိုးထိုက်သော ဆုကျေးဇူးတစ်ခုပင်တည်း!—သု. ၁၈:၂၄။
၂ ထို့အပြင် “ဖြောင့်မတ်ခြင်းတရားနှင့် [“ချစ်ခင်ကြင်နာမှု၊” ကဘ] ကိုရှာသောသူသည် အသက်ရှင်ခြင်း . . . ကိုတွေ့တတ်၏” ဟုကျမ်းစာကဆိုသည်။ (သု. ၂၁:၂၁) မှန်ပါသည်၊ ချစ်ခင်ကြင်နာမှုကို ကျွန်ုပ်တို့ရှာခြင်းက ဘုရားသခင်၏ချစ်မြတ်နိုးမှုကို ခံစားရစေမည်ဖြစ်ပြီး ထာဝရအသက်အပါအဝင် အနာဂတ်တွင်ကောင်းချီးများစွာ ခံစားရလိမ့်မည်။ သို့သော် ချစ်ခင်ကြင်နာမှုကို ကျွန်ုပ်တို့မည်သို့ပြနိုင်သနည်း။ မည်သူတို့ကို ပြသင့်သနည်း။ ချစ်ခင်ကြင်နာမှုသည် လူတစ်ဦးပြုသောကျေးဇူး သို့မဟုတ် လူအများအပေါ်ထားသောစေတနာနှင့် ကွာခြားသလော။
လူသားချင်းကြင်နာမှုနှင့် ချစ်ခင်ကြင်နာမှု
၃။ ချစ်ခင်ကြင်နာမှုသည် လူလူချင်းကြင်နာမှုနှင့် မည်သို့ကွာခြားသနည်း။
၃ သာမန်လူသားချင်းကြင်နာမှုနှင့် ချစ်ခင်ကြင်နာမှုသည် နည်းအမျိုးမျိုးဖြင့်ကွာခြားသည်။ ဥပမာ၊ လူသားချင်းကြင်နာမှုပြသူတို့သည် အများအားဖြင့် ကြင်နာမှုအပြခံရသူနှင့် ရင်းနှီးမှုမရှိ၊ နှစ်ကိုယ်ကြားဆက်ဆံရေးမရှိဘဲ ထိုသို့ပြုတတ်ကြ၏။ သို့သော် လူတစ်ဦးအား ကျွန်ုပ်တို့ချစ်ခင်ကြင်နာမှုပြမည်ဆိုလျှင် ထိုသူကိုကျွန်ုပ်တို့ ချစ်ခင်တွယ်တာ၏။ သမ္မာကျမ်းစာပါ အချင်းချင်းချစ်ခင်ကြင်နာမှုပြခဲ့သူများသည် ရှိနှင့်ပြီးသားဆက်ဆံရေးကို အခြေပြု၍ ထိုသို့ပြုခဲ့ခြင်းဖြစ်ပေမည်။ (ကမ္ဘာဦး ၂၀:၁၃; ၂ ဓမ္မရာဇဝင် ၃:၈; ၁၆:၁၇) သို့မဟုတ် ချစ်ခင်ကြင်နာမှုအပြခံခဲ့ရသောကြောင့် ပေါ်လာသည့်ဆက်ဆံရေးအပေါ် အခြေပြုနိုင်သည်။ (ယောရှု ၂:၁၊ ၁၂-၁၄; ၁ ဓမ္မရာဇဝင် ၁၅:၆; ၂ ဓမ္မရာဇဝင် ၁၀:၁၊ ၂) ဤကွာခြားမှုကိုဖော်ပြရန် ကျမ်းစာပုံနမူနာနှစ်ခုကို နှိုင်းယှဉ်ကြည့်ကြစို့၊ တစ်ခုမှာ အချင်းချင်းကျေးဇူးပြုခြင်းနှင့်ဆိုင်ပြီး နောက်တစ်ခုမှာ ချစ်ခင်ကြင်နာမှုပြခြင်းနှင့်ဆိုင်သည်။
၄၊ ၅။ ဤတွင်ကိုးကားဖော်ပြထားသော ကျမ်းစာပုံနမူနာနှစ်ခုက လူလူချင်းကြင်နာမှုနှင့် ချစ်ခင်ကြင်နာမှုသည် ခြားနားကြောင်း မည်သို့ဖော်ပြသနည်း။
၄ ကျေးဇူးပြုခြင်းကိစ္စတစ်ခုမှာ တမန်တော်ပေါလုအပါအဝင် သင်္ဘောပျက်၍ အခက်အခဲကြုံနေသည့်လူစုတစ်စုနှင့် သက်ဆိုင်သည်။ လှိုင်းပုတ်၍ မေလိတေကျွန်းပေါ်သို့ သူတို့ရောက်ခဲ့ကြသည်။ (တမန်တော် ၂၇:၃၇–၂၈:၁) မေလိတေကျွန်းသားများသည် ကမ်းပေါ်ရောက်ရှိလာသော ခရီးသည်များကို တာဝန်ယူစရာအကြောင်းမရှိ၊ သူတို့နှင့်အဆက်အသွယ်မရှိခဲ့ဖူးသော်လည်း ကျွန်းသူကျွန်းသားများသည် ထိုသူစိမ်းများကို “အထူးကြင်နာမှု” ပြကာ ဧည့်ဝတ်ပြုခဲ့ကြသည်။ (တမန်တော် ၂၈:၂၊ ၇၊ သတင်းကောင်း) သူတို့သည် ကြင်နာစွာဧည့်ဝတ်ပြုခဲ့ကြသည်မှန်သော်လည်း ယင်းကို အမှတ်မထင် သူစိမ်းများအားပြုခြင်းဖြစ်သည်။ ထို့ကြောင့် ယင်းသည် လူသားချင်းကြင်နာမှုဖြစ်၏။
၅ နှိုင်းယှဉ်ချက်အနေနှင့် မိတ်ဆွေယောနသန်၏သား မေဖိဗောရှက်ကို ဘုရင်ဒါဝိဒ်ပြသခဲ့သော ဧည့်ဝတ်ပြုမှုကို သုံးသပ်ကြည့်ပါ။ ဒါဝိဒ်က “သင်သည်နေ့တိုင်းအစဉ် ငါ့စားပွဲ၌စားရမည်” ဟုမေဖိဗောရှက်ကိုပြောခဲ့သည်။ ဤသို့အဘယ်ကြောင့်စီစဉ်ကြောင်းကိုရှင်းပြရန် သူ့အား ဒါဝိဒ်ဤသို့မိန့်ဆိုခဲ့သည်– “သင်၏အဘယောနသန်အတွက် ငါသည် သင်၌ဆက်ဆက်ကျေးဇူး [“ချစ်ခင်ကြင်နာမှု၊” ကဘ] ပြုမည်။” (၂ ဓမ္မရာဇဝင် ၉:၆၊ ၇၊ ၁၃) ဒါဝိဒ်သည် ရှိနှင့်ပြီးသားဆက်ဆံရေးကိုအခြေပြု၍ သစ္စာရှိမှုကိုပြခြင်းကြောင့် သူ၏ရေရှည်တည်တံ့သော ဧည့်ဝတ်ပြုခြင်းကို ကျေးဇူးပြုခြင်းမျှမဟုတ်ဘဲ ချစ်ခင်ကြင်နာမှုတင်ပြခြင်းဟု အမှန်ခေါ်ဆိုနိုင်သည်။ (၁ ဓမ္မရာဇဝင် ၁၈:၃; ၂၀:၁၅၊ ၄၂) အလားတူ ယနေ့လည်း ဘုရားသခင့်ကျေးကျွန်များသည် လူအများစုကို ကျေးဇူးပြုကြသည်။ တစ်ကြိမ်တည်းတွင် မိမိတို့နှင့်အတူ ဘုရားသခင့်မျက်နှာသာရ ဆက်ဆံရေးခံစားရသူတို့အား ရေရှည်တည်တံ့သောချစ်ခင်ကြင်နာမှု သို့မဟုတ် တည်ကြည်သောမေတ္တာကို တင်ပြကြသည်။—မဿဲ ၅:၄၅; ဂလာတိ ၆:၁၀။
၆။ ဘုရားသခင့်နှုတ်မြွက်စကားတော်တွင် လူလူချင်းပြသော ချစ်ခင်ကြင်နာမှု၏ အဘယ်ထူးခြားချက်များ ပါရှိသနည်း။
၆ ချစ်ခင်ကြင်နာမှု၏ ထူးခြားသောအရည်အသွေးအချို့ကို ခွဲခြားသိမြင်စေရန် ၎င်းအရည်အသွေးကို အသားပေးဖော်ပြသော ကျမ်းစာမှတ်တမ်းသုံးခုကို အကျဉ်းချုပ်သုံးသပ်ကြည့်ကြမည်။ လူတို့ပြသသော ချစ်ခင်ကြင်နာမှုသည် (၁) တစ်စုံတစ်ရာသောအပြုအမူများအားဖြင့် တင်ပြကြောင်း၊ (၂) တလိုတလားတင်ပြကြောင်းနှင့် (၃) အထူးသဖြင့် လိုအပ်နေသူများအား တင်ပြတတ်ကြောင်း ၎င်းမှတ်တမ်းတို့မှ ကျွန်ုပ်တို့သတိပြုမိလိမ့်မည်။ ထို့အပြင် ချစ်ခင်ကြင်နာမှုကို ယနေ့ ကျွန်ုပ်တို့မည်သို့တင်ပြနိုင်ကြောင်း ဤမှတ်တမ်းများက ဖော်ပြပေးမည်။
ဖခင်တစ်ဦး ချစ်ခင်ကြင်နာမှုပြ
၇။ အာဗြဟံ၏ကျွန်သည် ဗေသွေလနှင့် လာဗန်ကိုအဘယ်စကားပြောသနည်း၊ ကျွန်သည် အဘယ်ကိစ္စကို ဖော်ပြသနည်း။
၇ ရှေ့ဆောင်းပါး၌ဖော်ပြခဲ့သော အာဗြဟံကျွန်၏ ကျန်ဇာတ်လမ်းကို ကမ္ဘာဦး ၂၄:၂၈-၆၇ ကဆက်ဖော်ပြသည်။ ရေဗက္ကနှင့်တွေ့ဆုံပြီးနောက် သူ၏ဖခင် ဗေသွေလအိမ်သို့ ကျွန်သည်ဖိတ်ခေါ်ခံခဲ့ရ၏။ (အခန်းငယ် ၂၈-၃၂) ထိုတွင် ကျွန်သည် အာဗြဟံ၏သားအတွက် ဇနီးတစ်ဦးရှာပုံတော်ဖွင့်နေကြောင်း အသေးစိတ်ပြန်ပြောပြခဲ့သည်။ (အခန်းငယ် ၃၃-၄၇) ထိုအချိန်အထိ သူအောင်မြင်ခဲ့ခြင်းမှာ “ကျွန်ုပ်သခင်ညီအစ်ကို၏သမီးကို သခင်၏သားဖို့ယူစေခြင်းငှာ၊ မှန်သောလမ်းဖြင့်ပို့ဆောင်တော်မူသော” ယေဟောဝါထံတော်မှ နိမိတ်အမှတ်အသားဖြစ်၏ဟု သူယူမှတ်ကြောင်း ပြောပြသည်။ (အခန်းငယ် ၄၈၊ ကဘ) အဖြစ်အပျက်အားလုံးကို ထိုသို့လှိုက်လှိုက်လှဲလှဲ အသေးစိတ်ပြန်ပြောပြခြင်းအားဖြင့် ယေဟောဝါသည် သူ၏ဆောင်ရွက်မှုတွင်ပါဝင်ကြောင်းကို ဗေသွေလနှင့် သူ့သား လာဗန်တို့ ယုံကြည်ကြမည်ဟု ကျွန်ဖြစ်သူအမှန်မျှော်လင့်ခဲ့သည်။ နောက်ဆုံးတွင် ကျွန်ကဤသို့ဆိုသည်– “ယခုတွင် သင်တို့သည်၊ ကျွန်ုပ်သခင်၌သစ္စာ [“ချစ်ခင်ကြင်နာမှု၊” ကဘ] နှင့် ကျေးဇူးပြုမည်၊ မပြုမည်ကိုပြောပါ။ ကျွန်ုပ်သည်လည်း၊ လက်ယာလမ်းဖြစ်စေ၊ လက်ဝဲလမ်းဖြစ်စေ၊ တစ်လမ်းလမ်းသို့လိုက်သွားပါမည်။”—အခန်းငယ် ၄၉။
၈။ ရေဗက္ကနှင့်ပတ်သက်သောကိစ္စများကို ဗေသွေလမည်သို့တုံ့ပြန်ခဲ့သနည်း။
၈ အာဗြဟံကို ယေဟောဝါချစ်ခင်ကြင်နာမှုပြခဲ့ပြီးဖြစ်သည်။ (ကမ္ဘာဦး ၂၄:၁၂၊ ၁၄၊ ၂၇) ဗေသွေလသည်လည်း ရေဗက္ကကို အာဗြဟံ၏ကျွန်နှင့်လိုက်သွားစေခြင်းအားဖြင့် ချစ်ခင်ကြင်နာမှုကို လိုလိုလားလားပြမည်လော။ ရည်ရွယ်ချက်လုံးလုံးပြည့်စုံဖို့ ဘုရားသခင့်ချစ်ခင်ကြင်နာမှုတွင် လူသားတင်ပြသော ချစ်ခင်ကြင်နာမှုကို ထပ်ဖြည့်စွက်ပေးရမည်လော။ သို့မဟုတ် အာဗြဟံကျွန်၏ခရီးရှည်သည် အချည်းနှီးဖြစ်သွားမည်လော။ လာဗန်နှင့် ဗေသွေလတို့က “ဤအမှုသည် ထာဝရဘုရားစီရင်တော်မူသောအမှုဖြစ်၏” ဟုဆိုကြသည်ကို အာဗြဟံ၏ကျွန်ကြားသည့်အခါ အလွန်နှစ်သိမ့်မှုရခဲ့ပေမည်။ (အခန်းငယ် ၅၀) ဤအမှုကိစ္စတွင် ယေဟောဝါ၏လက်တော်ပါကြောင်း သူတို့အသိအမှတ်ပြုခဲ့ရာ သူ၏ဆုံးဖြတ်ချက်ကို ချက်ချင်းလက်ခံကြသည်။ ထို့နောက် ဗေသွေလက “ရေဗက္ကသည် သင့်ရှေ့၌ရှိပါ၏။ ယူသွားပါလော့။ ထာဝရဘုရား[သခင်]မိန့်တော်မူသည်အတိုင်း သင်၏သခင်သား၏မယားဖြစ်စေ” ဟုဆိုခြင်းဖြင့် ချစ်ခင်ကြင်နာမှုပြခဲ့သည်။ (အခန်းငယ် ၅၁) ရေဗက္ကသည် အာဗြဟံ၏ကျွန်နှင့်အတူ တလိုတလားလိုက်သွား၍ မကြာမီ ဣဇာက်၏ချစ်ဇနီး ဖြစ်လာလေသည်။—အခန်းငယ် ၄၉၊ ၅၂-၅၈၊ ၆၇။
သားတစ်ဦး ချစ်ခင်ကြင်နာမှုပြ
၉၊ ၁၀။ (က) မိမိအတွက်အဘယ်အရာပြုလုပ်ပေးရန် သားယောသပ်ကို ယာကုပ်တောင်းဆိုခဲ့သနည်း။ (ခ) ယောသပ်သည် ဖခင်အား ချစ်ခင်ကြင်နာမှု မည်သို့ပြခဲ့သနည်း။
၉ အာဗြဟံ၏မြေး ယာကုပ်လည်း ချစ်ခင်ကြင်နာမှုအပြခံခဲ့ရသည်။ ကမ္ဘာဦးအခန်းကြီး ၄၇ ဖော်ပြသည့်အတိုင်း ယာကုပ်သည် ထိုစဉ်က အီဂျစ်ပြည်တွင်နေထိုင်ပြီး “[သူ]သေရသောအချိန်နီး” လာလေ၏။ (အခန်းငယ် ၂၇-၂၉) အာဗြဟံကို ဘုရားသခင်ကတိထားသောပြည်၏ပြင်ပ၌ မိမိသေဆုံးတော့မည်ကို သူစိုးရိမ်ပူပန်ခဲ့သည်။ (ကမ္ဘာဦး ၁၅:၁၈; ၃၅:၁၀၊ ၁၂; ၄၉:၂၉-၃၂) သို့သော် ယာကုပ်သည် အီဂျစ်ပြည်၌ သင်္ဂြိုဟ်မခံလိုသောကြောင့် မိမိ၏ရုပ်အလောင်းကို ခါနာန်ပြည်သို့ယူဆောင်သွားရန် စီစဉ်လေသည်။ သူ၏ဆန္ဒကို မပျက်မကွက်ဖြစ်မြောက်စေနိုင်မည့်သူသည် ဩဇာအာဏာရှိသောသား ယောသပ်ပင်ဖြစ်၏။
၁၀ မှတ်တမ်းကဤသို့ဆို၏– “[ယာကုပ်] သည် သေရသောအချိန်နီးသော်၊ သားယောသပ်ကိုခေါ်၍၊ ‘ငါ့ကိုသနားလျှင် . . . [“ချစ်ခင်ကြင်နာမှု၊” ကဘ] သစ္စာနှင့်အညီ ငါ၌ပြုပါ။ (အဲဂုတ္တုပြည်၌ ငါ့ကိုမသင်္ဂြိုဟ်ပါနှင့်။) ငါသည် ဘိုးဘေးနှင့်အတူအိပ်ချင်ပါ၏။ အဲဂုတ္တုပြည်မှ ငါ့ကိုဆောင်သွား၍ သူတို့သင်္ချိုင်း၌ သင်္ဂြိုဟ်ရမည်’ ဟုဆို၏။” (ကမ္ဘာဦး ၄၇:၂၉၊ ၃၀) တောင်းဆိုသည်အတိုင်းပြုလုပ်ပါမည်ဟု ယောသပ်ကတိပြုပြီး မကြာမီ ယာကုပ်သေလေ၏။ ယောသပ်နှင့် ယာကုပ်၏အခြားသားများသည် သူ၏ကိုယ်ခန္ဓာကိုယူပြီး “ခါနာန်ပြည်သို့ဆောင်သွား၍ အာဗြဟံ . . . ဝယ်သော . . . မပ္ပေလလယ်ပြင်တွင်ရှိသော မြေတွင်း၌သင်္ဂြိုဟ်ကြ၏။” (ကမ္ဘာဦး ၅၀:၅-၈၊ ၁၂-၁၄) သို့ဖြင့် ယောသပ်သည် ဖခင်အား ချစ်ခင်ကြင်နာမှုပြခဲ့သည်။
ချွေးမတစ်ဦးထံမှ ချစ်ခင်ကြင်နာမှု
၁၁၊ ၁၂။ (က) ရုသသည် နောမိအား ချစ်ခင်ကြင်နာမှု မည်သို့ပြခဲ့သနည်း။ (ခ) ရုသ၏ “နောက်ပြုသော” ချစ်ခင်ကြင်နာမှုသည် “အရင်ပြု” သောအမှုထက် အဘယ်နည်းဖြင့် သာ၍ကောင်းသနည်း။
၁၁ မုဆိုးမနောမိသည် မောဘအမျိုးသမီးဖြစ်သူ မုဆိုးမ ချွေးမရုသထံမှ ချစ်ခင်ကြင်နာမှုရရှိခဲ့ပုံကို ရုသကျမ်းကဖော်ပြသည်။ ယုဒပြည် ဗက်လင်မြို့သို့ပြန်ရန် နောမိဆုံးဖြတ်သောအခါ ရုသသည် ချစ်ခင်ကြင်နာမှုပြပြီး ဤသို့ဆုံးဖြတ်ခဲ့သည်– “ကိုယ်တော်သွားလေရာရာသို့ ကျွန်မလိုက်ပါမည်။ ကိုယ်တော်အိပ်လေရာရာ၌ ကျွန်မအိပ်ပါမည်။ ကိုယ်တော်အမျိုးသည် ကျွန်မအမျိုး၊ ကိုယ်တော်ဘုရား[သခင်]သည် ကျွန်မဘုရား[သခင်]ဖြစ်ပါစေ။” (ရုသ ၁:၁၆) နောက်ပိုင်းတွင် နောမိ၏အသက်ကြီးသောဆွေမျိုး ဗောဇကို ရုသအိမ်ထောင်ပြုရန် အသင့်ရှိကြောင်းဖော်ပြသောအခါ သူ၏ချစ်ခင်ကြင်နာမှုကို တင်ပြခဲ့သည်။ * (တရားဟောရာ ၂၅:၅၊ ၆; ရုသ ၃:၆-၉) ရုသကို သူဤသို့ပြောဆိုခဲ့သည်– “သင်သည် ငွေရတတ်သောလူပျို၊ ဆင်းရဲသောလူပျို တစ်စုံတစ်ယောက်ကို မမှီဝဲဘဲနေ၍ အရင်ပြုသောကျေးဇူး [“ချစ်ခင်ကြင်နာမှု၊” ကဘ] ထက် နောက်ပြုသော ကျေးဇူး [“ချစ်ခင်ကြင်နာမှု၊” ကဘ] သာ၍ကြီး၏။”—ရုသ ၃:၁၀။
၁၂ “အရင်ပြုသော” ရုသ၏ချစ်ခင်ကြင်နာမှုမှာ မိမိလူမျိုးကိုစွန့်ပြီး နောမိ၌စွဲမြဲနေခြင်းကိုဆိုလိုသည်။ (ရုသ ၁:၁၄; ၂:၁၁) ထိုအမှုထက်ပင် ရုသ၏ “နောက်ပြုသော” ချစ်ခင်ကြင်နာမှုက သာလွန်သည်၊ ထိုအမှုမှာ ဗောဇနှင့်ထိမ်းမြားရန် အသင့်ရှိခြင်းဖြစ်သည်။ ယခု ရုသသည် သားသမီးမွေးဖွားသည့် အသက်အရွယ်ကိုလွန်သော နောမိအတွက် အမွေခံတစ်ဦးကိုမွေး ဖွားပေးနိုင်ပေမည်။ သူတို့ထိမ်းမြားပြီး နောက်ပိုင်း ရုသကလေးမွေးသောအခါ ဗက်လင်မြို့အမျိုးသမီးများက “နောမိသည် သားယောက်ျားကိုရပြီ” ဟုကြွေးကြော်ခဲ့ကြသည်။ (ရုသ ၄:၁၄၊ ၁၇) ရုသသည် အမှန်တကယ်ပင် “ကောင်းမြတ်သောမိန်းမ” ဖြစ်ရာ ယေရှုခရစ်၏ဘေးမဖြစ်ရသည့်အခွင့်ထူးဖြင့် သူ့ကိုယေဟောဝါဆုချခဲ့သည်။—ရုသ ၂:၁၂; ၃:၁၁၊ သမ္မာ; ၄:၁၈-၂၂; မဿဲ ၁:၁၊ ၅၊ ၆။
အပြုအမူများအားဖြင့် တင်ပြခြင်း
၁၃။ ဗေသွေလ၊ ယောသပ်နှင့် ရုသတို့သည် သူတို့၏ချစ်ခင်ကြင်နာမှုကို မည်သို့တင်ပြခဲ့ကြသနည်း။
၁၃ ဗေသွေလ၊ ယောသပ်နှင့် ရုသတို့သည် မိမိတို့၏ချစ်ခင်ကြင်နာမှုကို မည်သို့တင်ပြခဲ့ကြောင်း သင်သတိပြုမိသလော။ သူတို့သည် ကြင်နာသည့်စကားများဖြင့်သာမက တစ်စုံတစ်ရာသောအပြုအမူများအားဖြင့် တင်ပြခဲ့ကြသည်။ ဗေသွေလက “ရေဗက္ကသည် သင့်ရှေ့၌ရှိပါ၏” ဟုဆိုရုံမက “ရေဗက္က . . . ကို” အမှန်တကယ် “လွှတ်လိုက်ကြ၏။” (ကမ္ဘာဦး ၂၄:၅၁၊ ၅၉) ယောသပ်က “အဘဆိုသည်အတိုင်း အကျွန်ုပ်ပြုပါမည်” ဟုဆိုရုံမက သူနှင့် သူ့ညီအစ်ကိုများသည် “အဘမှာထားသည်အတိုင်းပြုကြ၏။” (ကမ္ဘာဦး ၄၇:၃၀; ၅၀:၁၂၊ ၁၃) ရုသက “ကိုယ်တော်သွားလေရာရာသို့ ကျွန်မလိုက်ပါမည်” ဟုဆိုရုံမက မိမိလူမျိုးကိုစွန့်ခွာပြီး နောမိနောက်လိုက်သွားရာ “ထိုသူနှစ်ယောက်တို့သည် ခရီးသွား၍ ဗက်လင်မြို့သို့ရောက်” လေ၏။ (ရုသ ၁:၁၆၊ ၁၉) ယုဒပြည်တွင် ရုသသည် “ယောက္ခမမှာထားသမျှအတိုင်း” လုပ်ဆောင်ပြန်သည်။ (ရုသ ၃:၆) မှန်ပါ၏၊ ရုသသည် အခြားသူများကဲ့သို့ မိမိ၏ချစ်ခင်ကြင်နာမှုကို အပြုအမူဖြင့်တင်ပြခဲ့သည်။
၁၄။ (က) ဘုရားသခင့် မျက်မှောက်ခေတ်ကျေးကျွန်များသည် ချစ်ခင်ကြင်နာမှုကို အပြုအမူများဖြင့် မည်သို့တင်ပြကြသနည်း။ (ခ) သင့်ဒေသရှိ ခရစ်ယာန်များ၏ ချစ်ခင်ကြင်နာမှုထင်ရှားသော အပြုအမူအချို့ကား အဘယ်နည်း။
၁၄ ဘုရားသခင်၏ မျက်မှောက်ခေတ်ကျေးကျွန်များသည် သူတို့၏အပြုအမူများအားဖြင့် ချစ်ခင်ကြင်နာမှုတင်ပြနေကြပုံကို တွေ့မြင်ရခြင်းသည် နှလုံးနွေးထွေးစရာပင်။ ဥပမာ၊ ယုံကြည်သူချင်းများဖြစ်သည့် အိုမင်းမစွမ်းသူများ၊ စိတ်ဓာတ်ကျသူများ၊ ဝမ်းနည်းကြေကွဲနေသူများကို ရေရှည်တည်တံ့သော စိတ်ပိုင်းဆိုင်ရာထောက်မမှုပေးသူများကို သတိရပါ။ (သု. ၁၂:၂၅) သို့မဟုတ် ပတ်စဉ်အသင်းတော်အစည်းအဝေးများတက်ရန် ဘုရားသခင့်နိုင်ငံတော်ခန်းမသို့ အသက်ကြီးသူများကို မှန်မှန်ကြိုပို့ပေးသူ ယေဟောဝါသက်သေများစွာတို့ကို သတိရပါ။ ရိုးဆက်ရောင်ရမ်းနာခံစားနေရသော အသက် ၈၂ နှစ်အရွယ်ရှိ အယ်နာက “အစည်းအဝေးအားလုံးကို တက်နိုင်ဖို့ ကားနဲ့ကြိုပို့ခံရတာ ယေဟောဝါကောင်းချီးတစ်ခုပဲ။ ဒီလောက်ချစ်စရာကောင်းတဲ့ ညီအစ်ကို၊ ညီအစ်မတွေပေးထားလို့ ကိုယ်တော်ကို ကျွန်မကျေးဇူးတင်မဆုံးဘူး” ဟုပြောဆိုခြင်းသည် အခြားသူများစွာ၏စိတ်ထားကို ဖော်ထုတ်ခြင်းဖြစ်သည်။ သင့်အသင်းတော်တွင် အလားတူအပြုအမူများကို သင်ပြုလုပ်နေပါသလော။ (၁ ယောဟန် ၃:၁၇၊ ၁၈) ထိုသို့ပြုလုပ်နေမည်ဆိုလျှင် သင်၏ချစ်ခင်ကြင်နာမှုကို အလွန်တန်ဖိုးထားကြကြောင်း စိတ်ချပါ။
တလိုတလားတင်ပြခြင်း
၁၅။ ကျွန်ုပ်တို့သုံးသပ်ခဲ့သော ကျမ်းစာမှတ်တမ်းသုံးခုက ချစ်ခင်ကြင်နာမှု၏ အခြားအဘယ်အရည်အသွေးကို ထပ်ဆင့်ပေါ်လွင်စေသနည်း။
၁၅ ကျွန်ုပ်တို့သုံးသပ်ခဲ့သော ကျမ်းစာအတ္ထုပ္ပတ္တိများက ချစ်ခင်ကြင်နာမှုကို အတင်းအကျပ်ပြုစေ၍မဟုတ်ဘဲ စိတ်အလိုအလျောက် တင်ပြခဲ့ကြကြောင်း ထင်ရှားစေသည်။ ဗေသွေလနှင့် ရေဗက္ကပါ အာဗြဟံ၏ကျွန်နှင့် စိတ်လိုကိုယ်လျောက် ပြုမူဆောင်ရွက်ခဲ့သည်။ (ကမ္ဘာဦး ၂၄:၅၁၊ ၅၈) ယောသပ်သည် တစ်ဦးတစ်ယောက်၏ လှုံ့ဆော်အားပေးမှုမပါဘဲ ချစ်ခင်ကြင်နာမှုတင်ပြခဲ့သည်။ (ကမ္ဘာဦး ၅၀:၄၊ ၅) ရုသသည် “[နောမိနှင့်] လိုက်ခြင်းငှာ ခိုင်ခံ့သောစိတ်ရှိသည်။” (ရုသ ၁:၁၈) ဗောဇကိုချဉ်းကပ်ရန် နောမိအကြံပြုသောအခါ “မိခင်မှာထားသမျှတို့ကို ပြုပါမည်” ဟုဆိုရန် ချစ်ခင်ကြင်နာမှုက မောဘအမျိုးသမီးကို လှုံ့ဆော်ပေးခဲ့သည်။—ရုသ ၃:၁-၅။
၁၆၊ ၁၇။ ဗေသွေလ၊ ယောသပ်နှင့် ရုသတို့၏ချစ်ခင်ကြင်နာမှုကို အဘယ်အရာက အထူးအဓိပ္ပာယ်ရှိစေသနည်း၊ ဤအရည်အသွေးကိုတင်ပြဖို့ သူတို့အား အဘယ်အရာကလှုံ့ဆော်ပေးခဲ့သနည်း။
ကမ္ဘာဦး ၂၄:၁၈-၂၀) ထိုနည်းတူ ယောသပ်သည် ဖခင်တောင်းဆိုခဲ့သည့်အတိုင်း ပြုလုပ်လိုက ပြုလုပ်နိုင်၏၊ မပြုလိုလျှင်လည်းဖြစ်၏၊ အကြောင်းမှာ ယာကုပ်ကွယ်လွန်သွားပြီဖြစ်ရာ မိမိစကားတည်ဖို့ အတင်းအကျပ်မလုပ်ဆောင်စေနိုင်တော့ချေ။ ရုသသည် မောဘပြည်၌ နေရစ်လိုကနေနိုင်ကြောင်း နောမိကိုယ်တိုင်မှာကြား၏။ (ရုသ ၁:၈) အသက်ကြီးသူဗောဇကိုယူမည့်အစား “လူပျို” တစ်ဦးကို ရုသထိမ်းမြားလိုက ထိမ်းမြားနိုင်ခဲ့သည်။
၁၆ အာဗြဟံ၊ ယာကုပ်နှင့် နောမိတို့သည် သူတစ်ပါးကို အတင်းဖိအားပေး တိုက်တွန်းမည့်သူများ မဟုတ်ကြသောကြောင့် ဗေသွေလ၊ ယောသပ်နှင့် ရုသတို့တင်ပြခဲ့သော ချစ်ခင်ကြင်နာမှုသည် အထူးအဓိပ္ပာယ်ရှိသည်။ အမှန်မှာ၊ ဗေသွေလသည် သမီးနှင့် ခွဲခွာရန် တာဝန်ဝတ္တရားမရှိခဲ့ချေ။ ‘အလုပ်ကြိုးစားသောသမီးကို အကျွန်ုပ်အနီးအပါး၌ ရှိစေလိုပါသည်’ ဟုအာဗြဟံ၏ကျွန်အား ဗေသွေလအလွယ်တကူ ပြောနိုင်၏။ (၁၇ ဗေသွေလ၊ ယောသပ်နှင့် ရုသတို့သည် ချစ်ခင်ကြင်နာမှုကိုပြဖို့ အသင့်ရှိခဲ့ကြသည်; သူတို့၏နှလုံးထဲမှ လှုံ့ဆော်ခံခဲ့ရကြသည်။ လူ့ကျင့်ဝတ်အရ သူတို့နှင့်ဆက်ဆံမှုရှိခဲ့သူတို့အား ဤအရည်အသွေးကို တင်ပြရမည့်တာဝန် သူတို့မှာရှိသည်ဟု သူတို့ယူမှတ်ခဲ့ကြသည်၊ နောက်ပိုင်းတွင် မေဖိဗောရှက်ကို စောင့်ရှောက်ရန်တာဝန်ရှိသည်ဟု ဘုရင်ဒါဝိဒ် ယူမှတ်ခဲ့သကဲ့သို့ပင်ဖြစ်သည်။
၁၈။ (က) ခရစ်ယာန်အကြီးအကဲများသည် အဘယ်သဘောထားနှင့် “သိုးတော်စုကိုထိန်းကျောင်း” ကြသနည်း။ (ခ) ယုံကြည်သူချင်းများကို ကူညီပေးခြင်းနှင့်ပတ်သက်၍ မိမိ၏ခံစားချက်ကို အကြီးအကဲတစ်ဦး မည်သို့ဖော်ပြခဲ့သနည်း။
၁၈ ချစ်ခင်ကြင်နာမှုသည် ဘုရားသခင့်သိုးတော်စုကို ထိန်းကျောင်းသူများအပါအဝင် ဘုရားသခင့်လူမျိုးတော်၏ အမှတ်အသားတစ်ခုဖြစ်ဆဲပင်။ (ဆာလံ ၁၁၀:၃; ၁ သက်သာလောနိတ် ၅:၁၂) ထိုသို့သောအကြီးအကဲများ သို့မဟုတ် ကြီးကြပ်မှူးများသည် မိမိတို့အပ်နှင်းခံထားရသော တာဝန်နှင့်အညီ အသက်ရှင်နေထိုင်ဖို့တာဝန်ရှိသည်ဟု ခံယူကြသည်။ (တမန်တော် ၂၀:၂၈) ထို့ကြောင့် အသင်းတော်ကိုထိန်းကျောင်းသည့်အခါ၊ အခြားနည်းဖြင့် ချစ်ခင်ကြင်နာမှုပြသည့်အခါ ‘အနိုင်ထိန်းခံရသောကြောင့်မဟုတ် . . . ဘဲ အလိုလိုစေတနာစိတ်ရှိ’ ၍ ပြုမူကြသည်။ (၁ ပေတရု ၅:၂) အကြီးအကဲများသည် သူတို့၌ တာဝန်ရော စိတ်ဆန္ဒပါရှိကြသောကြောင့် သိုးတော်စုကို ထိန်းကျောင်းကြ၏။ သူတို့သည် ခရစ်တော်၏သိုးများကို ချစ်ခင်ကြင်နာမှုပြသင့်သောကြောင့်သာမက ထိုသို့ပြုလိုကြသောကြောင့် ပြုလုပ်ကြ၏။ (ယောဟန် ၂၁:၁၅-၁၇) ခရစ်ယာန်အကြီးအကဲတစ်ဦးက “ညီအစ်ကိုတွေရဲ့အိမ်ကို ကျွန်တော်လည်ပတ်သွားတာ၊ သူတို့ကိုဖုန်းနဲ့ဆက်သွယ်ရတာ ဘာကြောင့်ပျော်သလဲဆိုရင် သူတို့ကိုသတိရနေတယ်ဆိုတာကို သိစေချင်လို့ပဲ” ဟုဆို၏။ “ညီအစ်ကိုတွေကိုကူညီပေးရတာ ကျွန်တော့်အတွက် တကယ့်ပျော်ရွှင်မှုနဲ့ ကျေနပ်မှုရဲ့အရင်းအမြစ်ပါပဲ!” ဒေသအရပ်ရပ်မှ စာနာထောက်ထားတတ်သော အကြီးအကဲများသည် ထပ်တူပင် သဘောတူကြပေမည်။
လိုအပ်နေသူတို့ကို ချစ်ခင်ကြင်နာမှုတင်ပြလော့
၁၉။ ဤဆောင်းပါးတွင် ဆွေးနွေးတင်ပြခဲ့သော ကျမ်းစာမှတ်တမ်းများတွင် ချစ်ခင်ကြင်နာမှုဆိုင်ရာ အဘယ်အကြောင်းကို အလေးပေးဖော်ပြသနည်း။
၁၉ ကျွန်ုပ်တို့ဆွေးနွေးခဲ့သည့် ကျမ်းစာမှတ်တမ်းများက မိမိတို့ဘာသာ မဖြည့်ဆည်းနိုင်သော လိုအပ်ချက်ရှိသူများကို ချစ်ခင်ကြင်နာမှု တင်ပြဖို့လိုကြောင်းကိုလည်း အလေးပေးဖော်ပြသည်။ အာဗြဟံသည် မိမိ၏မျိုးရိုးကိုဆက်နိုင်ရန် ဗေသွေလ၏အကူအညီလိုခဲ့သည်။ ခါနာန်ပြည်သို့ မိမိ၏ရုပ်အလောင်းကို ယူဆောင်သွားရန် ယောသပ်၏အကူအညီကို ယာကုပ်လိုအပ်ခဲ့သည်။ နောမိသည် အမွေဆက်ခံသူတစ်ဦးရှိဖို့ ရုသ၏အကူအညီကိုလိုခဲ့သည်။ အာဗြဟံ၊ ယာကုပ်နှင့် နောမိတို့သည် အကူအညီမရရှိဘဲ ဤလိုအပ်ချက်များကို မဖြည့်ဆည်းနိုင်ခဲ့ကြချေ။ အလားတူ ယနေ့လည်း အကူအညီအထူးသဖြင့်လိုအပ်သူများကို ချစ်ခင်ကြင်နာမှုပြသင့်သည်။ (သု. ၁၉:၁၇) “ဆင်းရဲသောသူ၊ အဘမရှိသောသူ၊ ခိုကိုးရာမရသောသူ” ကိုသာမက “ပျက်စီးလုသောသူ” ကိုပါ ဂရုစိုက်ကြည့်ရှုစောင်မခဲ့သူ ဘိုးဘေးယောဘကို ကျွန်ုပ်တို့အတုယူသင့်သည်။ ထို့ပြင် ယောဘသည် “မုဆိုးမ၏စိတ်နှလုံးကို ရွှင်လန်းစေ” ခဲ့ပြီး ‘မျက်စိကန်းသောသူတို့အား မျက်စိဖြစ်၍ ခြေဆွံ့သောသူတို့အား ခြေ’ ဖြစ်ခဲ့သည်။—ယောဘ ၂၉:၁၂-၁၅။
၂၀၊ ၂၁။ မည်သူတို့သည် ကျွန်ုပ်တို့ချစ်ခင်ကြင်နာမှုလိုအပ်သနည်း၊ ကျွန်ုပ်တို့တစ်ယောက်စီ အဘယ်အရာကိုပြုလုပ်ဖို့ စိတ်ပိုင်းဖြတ်သင့်သနည်း။
၂၀ အမှန်မှာ ခရစ်ယာန်အသင်းတော်တိုင်းတွင် ‘အကူအညီလို၍ အော်ဟစ်နေကြသော ဆင်းရဲသူများ’ စွာရှိပါသည်။ ယင်းသို့ဖြစ်ရခြင်းမှာ အထီးကျန်ခြင်း၊ စိတ်ဓာတ်ကျဆင်းခြင်း၊ တန်ဖိုးမရှိဟုခံစားရခြင်း၊ အခြားသူများကို စိတ်ပျက်ခြင်း၊ အကြီးအကျယ်ဖျားနာခြင်း သို့မဟုတ် ချစ်ရသူတစ်ဦးသေဆုံးခြင်းတို့ကြောင့် ဖြစ်ကောင်းဖြစ်နိုင်မည်။ မည်သည့်အကြောင်းကြောင့်ဖြစ်ပါစေ ဤချစ်ရသူအားလုံးသည် အကူအညီလိုအပ်နေကြ၍ ၎င်းတို့ကို ရေရှည်အကျိုးရှိမည့် ချစ်ခင်ကြင်နာမှုလုပ်ရပ်များဖြင့် တလိုတလားကူညီပေးသင့်ပါသည်။—၁ သက်သာလောနိတ် ၅:၁၄။
၂၁ သို့ဖြစ်၍ ‘ချစ်ခင်ကြင်နာမှုနှင့် ကြွယ်ဝတော်မူ’ သော ယေဟောဝါဘုရားသခင်ကို ဆက်လက်တုပကြပါစို့။ (ထွက်မြောက်ရာ ၃၄:၆; ဧဖက် ၅:၁) အထူးသဖြင့် လိုအပ်နေသူများအကျိုးအတွက် တစ်စုံတစ်ရာကို တလိုတလားပြုမူလုပ်ဆောင်ပေးနိုင်သည်။ ကျွန်ုပ်တို့သည် “တစ်ယောက်နှင့်တစ်ယောက် ချစ်ခင်ကြင်နာမှု ဆက်၍ပြ” ကြစဉ် ယေဟောဝါအားဂုဏ်တင်ကြပြီး အမှန်တကယ် အကြီးအကျယ်ပျော်ရွှင်ကြလိမ့်မည်။—ဇာခရိ ၇:၉၊ ကဘ။
[အောက်ခြေမှတ်ချက်]
^ အပိုဒ်၊ 11 ဤတွင်ဖော်ပြသော အိမ်ထောင်ပြုခြင်းအကြောင်း အသေးစိတ်သိလိုလျှင် ယေဟောဝါသက်သေများထုတ်ဝေသော ကျမ်းစာစောင်များအပေါ် ထိုးထွင်းသိမြင်ခြင်း [လိပ်] အတွဲ ၁၊ စာမျက်နှာ ၃၇၀၊ ကိုရှု။
သင်မည်သို့ဖြေဆိုမည်နည်း
• ချစ်ခင်ကြင်နာမှုသည် လူသားချင်းကြင်နာမှုနှင့် မည်သို့ကွာခြားသနည်း။
• ဗေသွေလ၊ ယောသပ်နှင့် ရုသတို့သည် အဘယ်နည်းများဖြင့် ချစ်ခင်ကြင်နာမှုပြခဲ့ကြသနည်း။
• အဘယ်သဘောထားမျိုးဖြင့် ချစ်ခင်ကြင်နာမှုကို ကျွန်ုပ်တို့ပြသင့်သနည်း။
• ချစ်ခင်ကြင်နာမှုအပြခံရဖို့လိုသူများကား မည်သူတို့နည်း။
[လေ့လာရန်မေးခွန်းများ]
[စာမျက်နှာ ၁၈ ပါ ရုပ်ပုံ]
ချစ်ခင်ကြင်နာမှုကို ဗေသွေလ မည်သို့တင်ပြခဲ့သနည်း
[စာမျက်နှာ ၂၁ ပါ ရုပ်ပုံ]
ရုသ၏တည်ကြည်သောမေတ္တာသည် နောမိအတွက် ကောင်းချီးမင်္ဂလာဖြစ်
[စာမျက်နှာ ၂၃ ပါ ရုပ်ပုံ]
လူသားချင်း ချစ်ခင်ကြင်နာမှုကို တလိုတလားတင်ပြ၏၊ တစ်စုံတစ်ရာသောအပြုအမူအားဖြင့် တင်ပြ၏၊ လိုအပ်နေသူများအား တင်ပြ၏