မည်​သူ့​အပြစ်​နည်း သင်​လော၊ သင့်​မျိုးရိုး​ဗီဇ​လော

အရက်သောက်​ကြူး​ခြင်း၊ လိင်​တူ​ဆက်ဆံခြင်း၊ တွေ့​က​ရာ​လူ​နှင့်​လိင်ဆက်ဆံခြင်း၊ အကြမ်းဖက်​ခြင်း၊ အခြား​မူမမှန်သော​အပြု​အမူ​များ​အပြင် သေရ​ခြင်း​၏ မျိုးရိုး​ဗီဇ​အကြောင်းရင်း​များ​ကို ရှာတွေ့​ရန် သိပ္ပံ​ပညာရှင်​များ ကြိုးစား​အားထုတ်​နေကြ၏။ ကျွန်ုပ်​တို့၏​အပြု​အမူ​များသည် ကျွန်ုပ်​တို့​ကြောင့်​မဟုတ်ဘဲ ဇီဝ​ဗေဒ​၏​သားကောင်​များ​သာ​ဖြစ်​ကြောင်း သိရှိ​ရခြင်း​သည် စိတ်သက်သာ​စေမည်​မဟုတ်ပေ​လော။ ကျွန်ုပ်​တို့၏​အမှား​ကို​ဝန်မခံ​ဘဲ အခြားသူ​တစ်ဦး သို့​မဟုတ် အခြား​အရာ​တစ်ခုခု​ကို အပြစ်​ပုံချ​ခြင်း​သည် လူ့​ဝသီ​ပင်​ဖြစ်၏။

မျိုးရိုး​ဗီဇ​ကြောင့်​ဖြစ်​မည်​ဆိုလျှင် မျိုးရိုး​ဗီဇ​အင်ဂျင်နီယာ​ပညာ​အားဖြင့် မနှစ်မြို့ဖွယ်​ဝသီ​များ​ကို ပယ်ရှား​၍ ပြောင်းလဲ​နိုင်​မည်​ဟု သိပ္ပံ​ပညာရှင်​များ​က​ဆို​သည်။ မကြာမီ​က လူ့​ဂျီ​နု​မ်း​တစ်ခုလုံး​ကို မြေပုံ​ရေးဆွဲ​နိုင်​ခဲ့​ရာ သူတို့၏​ရည်မှန်းချက်​များ​အတွက် စေ့ဆော်မှု​အသစ်​ရရှိခဲ့သည်။

သို့သော် ဤသို့​ဖြစ်လာ​နိုင်​ခြေ​ရှိ​ခြင်း​သည် ကျွန်ုပ်​တို့​အမွေ​ရထား​သော မျိုးရိုး​ဗီဇ​ကြောင့် အပြစ်​များ၊ အမှား​များ​ပြု​ရခြင်း​ဖြစ်၏​ဟူ​သည့် ယူဆချက်​အပေါ် အခြေခံ​သည်။ သိပ္ပံ​ဆိုင်ရာ​တွေ့ရှိချက်​များ​တွင် ကျွန်ုပ်​တို့၏​မျိုးရိုး​ဗီဇ​ကို အမှု​လုပ်နိုင်​သည့် သက်သေ​အထောက်အထား အလုံအလောက် ရရှိ​ထားပြီ​လော။ ယင်း​၏​အဖြေ​သည် ကျွန်ုပ်​တို့​ကိုယ်ကို​လည်းကောင်း၊ ကျွန်ုပ်​တို့၏​အနာဂတ်​ကိုလည်း​ကောင်း အလွန်​ထိခိုက်​နိုင်​သည်​မှာ ထင်ရှား​ပါ​သည်။ သို့သော် သက်သေ​အထောက်အထား​ကို မဆန်းစစ်​မီ လူ့​ဇာစ်​မြစ်ကို ဆန်းစစ်​ကြည့်​လျှင် ကောင်း​ပေ​လိမ့်​မည်။

ယင်း​တို့အားလုံး မည်သို့​စတင်​ခဲ့

လူအများသည် ဧဒင်ဥယျာဉ်​တွင် ကနဦး​လူသား​မောင်နှံ အာဒံ​နှင့်​ဧဝ​တို့ ကျဆုံး​ခဲ့​ခြင်း​အကြောင်းကို အကျွမ်းတဝင်​ရှိ​မည်၊ အနည်းဆုံး​တော့ ကြားဖူး​နား​ဝ​ရှိကြ​မည်။ သူတို့သည် စကား​နားမထောင် အပြစ်ပြု​စေရန်​ပုံစံ​မျိုး​ဖြင့် အစ​ကတည်းက ရှိရင်းစွဲ​ချွတ်ယွင်းချက်​ပါ မျိုးရိုး​ဗီဇ​များနှင့် ဖန်ဆင်း​ခံ​ခဲ့​ရ​ပါသလော။

အရာခပ်သိမ်း​ကို ပြည့်ဝ​စုံလင်စွာ​ဖန်ဆင်း​ခဲ့​သော သူတို့၏​ဖန်ဆင်း​ရှင် ယေဟောဝါ​ဘုရားသခင်​က ကိုယ်တော်​၏​အပြီးသတ်​မြေကြီးဆိုင်ရာ​ဖန်ဆင်း​ခြင်း​ကား “အလွန်​ကောင်း​သည်” ဟု​ကြေညာ​ခဲ့​၏။ (ကမ္ဘာဦး ၁:၃၁; တရားဟောရာ ၃၂:၄) ကိုယ်တော်​သည် မိမိ၏​ဖန်ဆင်း​ခြင်း​ကို ကျေနပ်​ကြောင်း ထပ်ဆင့်​သက်သေ​အထောက်အထား​အဖြစ် ကနဦး​ဇနီး​မောင်နှံ​ကို ကောင်းချီး​ပေး​၍ များပြား​စွာ​မွေးဖွား​ရန်၊ လူသတ္တဝါ​များ​ဖြင့် မြေကြီးကို​ပြည့်စေ​ရန်​နှင့် ကိုယ်တော်​၏​မြေကြီးဆိုင်ရာ​ဖန်ဆင်း​ခြင်း​ကို တာဝန်​ယူ ထိန်းသိမ်း​စောင့်ရှောက်​ရန် မိန့်မှာ​ခဲ့​၏၊ သို့​ပြုခြင်း​သည် မိမိ၏​လက်ရာ ကောင်း​မကောင်း မသေချာ​သူ​တစ်ဦး၏​လုပ်ရပ် လုံးဝ​မဖြစ်​နိုင်​ချေ။—ကမ္ဘာဦး ၁:၂၈။

ကနဦး​လူသား​မောင်နှံ​၏ ဖန်ဆင်း​ခြင်း​နှင့်​စပ်လျဉ်း၍ သမ္မာကျမ်းစာ​က “ဘုရားသခင်​သည် မိမိ​ပုံသဏ္ဌာန်​နှင့်​အညီ လူကို​ဖန်ဆင်း​တော်​မူ​၏။ ဘုရားသခင်​၏​ပုံသဏ္ဌာန်​တော်​နှင့်​အညီ လူယောက်ျား၊ လူ​မိန်းမကို ဖန်ဆင်း” သည်​ဟု​ဆို​၏။ (ကမ္ဘာဦး ၁:၂၇) “ဘုရားသခင်​သည် . . . ဝိညာဉ်​ဖြစ်” သောကြောင့် လူသားများ​ကို ဘုရားသခင်​နှင့် ရုပ်ခန္ဓာ​တူ​အောင် ဖန်ဆင်း​ထား​သည်​ဟု မဆိုလို​နိုင်​ပေ။ (ယောဟန် ၄:၂၄) ၎င်း​အစား၊ လူသတ္တဝါ​များသည် ဘုရားသခင်​၏​အရည်အချင်းများ​နှင့် ကိုယ်ကျင့်တရား၊ သိစိတ်​တို့​ဖြင့်​ဖန်ဆင်း​ခံရ​သည်​ဟု ဆိုလိုခြင်း​ဖြစ်၏။ (ရောမ ၂:၁၄၊ ၁၅) သူတို့သည် လွတ်လပ်​စွာ​ဆုံးဖြတ်​ပိုင်ခွင့်​ရှိကြ​ပြီး ကိစ္စရပ်​တစ်ခု​ကို ကောင်းစွာ​အကဲဖြတ်​နိုင်​၍ ကိုယ်တိုင်​ဆုံးဖြတ်​ပြုလုပ်​နိုင်​ကြသည်။

သို့သော် ကျွန်ုပ်​တို့၏​ကနဦး​မိဘများ​ကို လမ်းညွှန်ချက်​မပေး​ဘဲ​မနေ​ပါ။ ပြစ်မှားခြင်း​၏ အကျိုးဆက်များ​ကို သူတို့​ကြိုတင်​သတိပေး​ခံ​ခဲ့​ရသည်။ (ကမ္ဘာဦး ၂:၁၇) ထို့​ကြောင့် အာဒံသည် ကိုယ်ကျင့်တရား​နှင့်​ပတ်သက်​၍ ဆုံးဖြတ်ချက်​ချ​ရသောအခါ ထို​အချိန်​က သူ့​အတွက် သင့်လျော်​မည်​ဟု​အထင်​ရှိရာ​ကို လုပ်ဆောင်ရန် ရွေးချယ်​ပြုလုပ်​ခဲ့​ကြောင်း သက်သေ​အထောက်အထား​က ဖော်ပြ​သည်။ သူသည် ဖန်ဆင်း​ရှင်​နှင့် သူ၏​ဆက်ဆံ​ရေး သို့​မဟုတ် သူ့​လုပ်ရပ်​၏​ရေရှည်​အကျိုးဆက်များ​ကို စဉ်းစား​သုံးသပ်​မည့်​အစား သူ့​ဇနီး​၏​အပြစ်ပြု​ခြင်း​တွင် ပါဝင်​ခဲ့​၏။ ထို့နောက် သူက ကိုယ်တော်​အပ်ပေး​သော​ဇနီးသည် မိမိကို​လှည့်ဖြား​ပါ​သည်​ဟု​ဆို​ကာ ယေဟောဝါ​ကို​အပြစ်​ပုံချ​ရန် ကြိုးစား​ခဲ့​သည်။—ကမ္ဘာဦး ၃:၆၊ ၁၂; ၁ တိမောသေ ၂:၁၄။

အာဒံ​နှင့် ဧဝ​တို့၏​အပြစ်ပြု​မှု​ကို ဘုရားသခင်​၏​တုံ့ပြန်​ပုံ​တွင် ထင်ရှား​နေပါ​သည်။ ကိုယ်တော်​သည် သူတို့၏​မျိုးရိုး​ဗီဇ​တွင်ရှိသော ‘ချွတ်ယွင်းချက်’ တစ်ခု​ကို ပြုပြင်ပေး​ရန် မကြိုးစား​ခဲ့​ချေ။ ယင်းအစား၊ သူတို့​လုပ်ရပ်များ​၏​အကျိုးဆက်​သည် အဘယ်အရာ​ဖြစ်​မည်​ဟု ကိုယ်တော်​မိန့်မှာ​ခဲ့​သည့်​အတိုင်း လုပ်ဆောင်​တော်​မူ​ခဲ့​ရာ ထို​အကျိုးဆက်​ကြောင့် နောက်ဆုံး သူတို့​သေပွဲဝင်​ခဲ့​ရလေ​သည်။ (ကမ္ဘာဦး ၃:၁၇-၁၉) ဤ​အစောပိုင်း​သမိုင်း​သည် လူ့​ပင်ကို​အမူအကျင့်​နှင့်​ပတ်သက်​၍ ပိုမို​နားလည်စေ​သည်။ *

ဇီဝ​ဗေဒ​အစွဲအလမ်း​ကို မထောက်ခံ​သော​သာဓက

သိပ္ပံ​ပညာရှင်​များသည် လူ့​ရောဂါဗေဒ​နှင့် အမူအကျင့်​အတွက် မျိုးရိုး​ဗီဇ​အကြောင်းရင်း​များနှင့် ပြုပြင်ပေး​နည်း​များ ရှာဖွေခြင်း​လုပ်ငန်းကြီး​ကို ကြိုးစား​လုပ်ဆောင်ခဲ့​သည်​မှာ ကြာ​ခဲ့ပြီ။ သုတေသီ​အဖွဲ့​ခြောက်​ဖွဲ့​က ဆယ်နှစ်​ကြာ​သုတေသန​ပြုပြီး​နောက် ဟန်​တင်​တန်​ရောဂါ​နှင့် ဆက်နွှယ်​သည့် မျိုးရိုး​ဗီဇ​ကို တွေ့ရှိ​လာ​ခဲ့​ကြသော်လည်း ထို​မျိုးရိုး​ဗီဇ​သည် မည်သို့​ရောဂါ​ဖြစ်စေ​ကြောင်း မသိကြ​သေး​ချေ။ သို့ရာတွင် ဤ​သုတေသန​ပြုချက်​ကို အစီရင်ခံ​ရာ​တွင် ဟား​ဗက်ဒ်​ဇီဝ​ပညာရှင် အီဗန် ဘာ​လာ​ဘာ​န်​က “အပြု​အမူ​ပိုင်း​ဆိုင်ရာ ဝေဒနာ​များနှင့်​ဆိုင်​သည့် မျိုးရိုး​ဗီဇ​ကို​ရှာဖွေ​တွေ့ရှိ​ရန် လွန်​စွာ​ခက်ခဲ​ပေမည်” ဟု​ဆို​ခဲ့​ကြောင်း အမေရိကန်​သိပ္ပံ​ပညာရပ်​က ကိုးကား​ဖော်ပြ​ခဲ့​သည်။

အမှန်​မှာ၊ လူ့​အမူအကျင့်​နှင့် မျိုးရိုး​ဗီဇ ဆက်စပ်မှု​ရှိသည်​ကို ကြိုးစား​သုတေသန​ပြုချက်​သည် မအောင်မြင်​ခဲ့​ချေ။ ယနေ့​ဆိုက်​ကို​လို​ဂျီ​စာစောင်​တွင် စိတ်ဓာတ်ကျ​ခြင်း​၏ မျိုးရိုး​ဗီဇ​အကြောင်းရင်း​များ​ကို ကြိုးစား​ရှာဖွေရေး သတင်း​တစ်ရပ်​က ဤသို့​ဆို​သည်– “အဓိက​စိတ်ဝေဒနာ​များနှင့်​စပ်​လျ​ဉ်း​သော ကူးစက်​ရောဂါဗေဒ​အချက်အလက်​တို့​အရ မျိုးရိုး​ဗီဇ​အကြောင်းရင်း​သက်​သက်​ဖြင့် စိတ်ဝေဒနာ​ဖြစ်​ရ၏​ဟု​မဆို​နိုင်​ကြောင်း ထင်ရှား​သည်။” ထို​မှတ်တမ်းက ဤသို့​ဥပမာ​ပေး​၏– “၁၉၀၅ ခုနှစ်​မတိုင်မီ​က မွေးဖွား​ခဲ့​သည့် အမေရိကန်​များသည် အသက် ၇၅ နှစ်အရွယ်​တွင် စိတ်ဓာတ်ကျ​သူ ၁ ရာခိုင်နှုန်း​ရှိသည်။ ရာစုနှစ်​ဝက်​နောက်ပိုင်း​တွင် မွေးဖွား​လာ​သည့် အမေရိကန်​များ​မူ အသက် ၂၄ နှစ်အရွယ်​တွင် စိတ်ကျ​ဝေဒနာသည် ၆ ရာခိုင်နှုန်း​ရှိလာ​ကြ​၏!” သို့​ဖြစ်၍ ဤ​အချိန်တို​အတွင်း ဤသို့​သော​ထူးခြားသည့်​ပြောင်းလဲမှု​များ ဖြစ်ပေါ်​လာ​ခြင်း​သည် ပြင်ပ သို့​မဟုတ် လူမှုရေး​ပယောဂ​များ​ကြောင့်​သာ​ဖြစ်​ကြောင်း ကောက်ချက်​ချ​ရ၏။

၎င်းနှင့် အခြား​လေ့လာ​သုံးသပ်ချက်​များ​က ကျွန်ုပ်​တို့ကို အဘယ်အရာ​ပြောပြ​သနည်း။ မျိုးရိုး​ဗီဇ​သည် ကျွန်ုပ်​တို့၏​ပင်ကိုစရိုက်​ကို ရုပ်လုံးဖော်​ရာ​တွင် အခန်းကဏ္ဍ​တစ်ခု​မှ ပါဝင်​နိုင်​မည်​ဖြစ်သော်လည်း အခြား​သြဇာလွှမ်း​မိုး​မှုများ ရှိသေး​သည်​မှာ ထင်ရှား​ပါ​သည်။ အဓိက​အချက်​တစ်ချက်​မှာ မျက်မှောက်ခေတ်တွင် အကြီးအကျယ်​ပြောင်းလဲ​လာ​သည့် ကျွန်ုပ်​တို့၏​ပတ်ဝန်းကျင်​ပင်​ဖြစ်သည်။ ဥပမာ၊ ခေတ်​လူငယ်များ ရှုစား​နေကြ​ရသည့် ရေပန်းစား​နေသော ဖျော်ဖြေမှု​နှင့်​ပတ်သက်​၍ ကျား​ဆို​မှ​ကျား​စာအုပ်​က ကလေး​သူငယ်​တို့သည် လူ​တို့ကို “တိုက်ခိုက်​ခြင်း၊ သေနတ်​နှင့်​ပစ်​ခြင်း၊ ဓား​နှင့်​ထိုး​ခြင်း၊ အူ​သိ​မ်​အူမ​များ​ကို​ခွဲထုတ်​ခြင်း၊ နု​ပ်​နု​ပ်​စဉ်း​ခြင်း၊ အရေခွံ​ခွာ​ခြင်း၊ အပိုင်းပိုင်း​ဖြတ်​ခြင်း အစ​ရှိသည့် ရုပ်မြင်သံကြား​ဇာတ်လမ်း​များနှင့် ရုပ်ရှင်​များ​ကို နာရီ​ပေါင်း​ထောင်နှင့်ချီ​၍ ကြည့်​ဖန်​များ​လာသော​အခါ​ဖြစ်စေ၊ မုဒိမ်းကျင့်​ခြင်း၊ ကိုယ့်​ကိုယ်ကို​သတ်​သေခြင်း၊ မူးယစ်​ဆေးဝါး၊ အရက်​သေ​စာ​နှင့် တစ်ယူသန်​ခြင်း​တို့ကို အမွှမ်းတင်​သော တေးဂီတ​ကို နားထောင်​ဖန်​များ​လာသော​အခါ​ဖြစ်စေ” လျော်​ကန်​သော​ကိုယ်ကျင့်တရား​မူများ​ကို ကျင့်သုံး​ကြ​မည်​ဟု မမျှော်လင့်​နိုင်​တော့​ကြောင်း​ဆို​၏။

“ဤ​လောကကို​အစိုး​ရသော​မင်း” စာတန်​သည် ယုတ်ညံ့​သော​လူ့​လိုအင်ဆန္ဒ​များ​ကို ဖြည့်ဆည်း​ပေး​နေသည့် ပတ်ဝန်းကျင်​တစ်ခု​ကို ရုပ်လုံးပေါ်​စေ​ခဲ့ပြီ။ ဤသို့​သော​ဝန်းကျင်​သည် ကျွန်ုပ်​တို့အားလုံး​အပေါ် အကြီးအကျယ်​သြဇာလွှမ်း​မိုး​နေသည်​ကို မည်သူ​ငြင်းဆို​မည်​နည်း။—ယောဟန် ၁၂:၃၁; ဧဖက် ၆:၁၂; ဗျာဒိတ် ၁၂:၉၊ ၁၂။

လူသား​၏​ဆင်းရဲခြင်း ဇာစ်​မြစ်

ကျွန်ုပ်​တို့​သိရှိ​ခဲ့ပြီ​ဖြစ်သည့်​အတိုင်း လူသား​၏​အခက်အခဲ​များသည် ကနဦး​လူသား​မောင်နှံ အပြစ်​ပြုလုပ်​ချိန်​ကတည်းက စတင်​ခဲ့​၏။ ရလဒ်​ကား​အဘယ်နည်း။ အာဒံ​ပြု​ခဲ့​သည့်​အပြစ်​အတွက် သူ၏​သားစဉ်​မျိုးဆက်​က ပေး​ဆပ်ရန်​တာဝန်​မရှိ​သော်လည်း သူတို့​အားလုံး​သည် အပြစ်၊ မစုံလင်မှု​နှင့် သေခြင်း​တို့ကို အမွေခံ​လျက်​မွေးဖွား​လာ​ခဲ့​ကြသည်။ သမ္မာကျမ်းစာ​က ဤသို့​ရှင်းပြသည်– “ဤ​အကြောင်းအရာ​ဟူ​မူ​ကား၊ အပြစ်​တရားသည် တစ်ယောက်​သော​သူအား​ဖြင့် ဤ​လောက​သို့​ဝင်၍ အပြစ်​တရား​အားဖြင့် သေခြင်း​တရားဝင်​သည်​နှင့်​အညီ လူအပေါင်း​တို့သည် အပြစ်ရှိ​သောကြောင့် သေခြင်း​သို့​ရောက်​ရ​ကြ​၏။”—ရောမ ၅:၁၂။

လူ့​မစုံလင်မှု​က သူ့​အား ဆိုးကျိုး​များ​ကို​သာ လုံးလုံး​ခံစား​စေ​သည်။ သို့သော် ယင်းကြောင့် ကိုယ်ကျင့်တရား​တာဝန်​အားလုံး​နှင့် သူ​လွတ်ကင်း​သည်​ဟု​မဆိုလို​ပါ။ အသက်​ရရှိ​ရေး​အတွက် ယေဟောဝါ​၏​ပြင်ဆင်​ပေး​ချက်​ကို ယုံကြည်ပြီး ဘုရားသခင်​၏​စံ​များနှင့်​အညီ အသက်ရှင်နေ​ထိုင်​သူများ​သည် ကိုယ်တော်​၏​မျက်နှာသာ ရရှိကြလိမ့်မည်​ဟု ကျမ်းစာ​က​ဖော်ပြ​သည်။ ယေဟောဝါ​သည် ကိုယ်တော်​၏​ချစ်ခင်​ကြင်နာ​မှု​ကြောင့် အာဒံ​ဆုံးရှုံး​ခဲ့​ရာ​ကို ပြန်​ဝယ်ယူ​သကဲ့သို့ လူသားများ​ကို ရွေးနုတ်​ရန် သနား​ကြင်နာ​စွာ ပြင်ဆင်​ပြုလုပ်​ပေး​ခဲ့​၏။ ထို​ပြင်ဆင်​ပေး​ချက်​မှာ “ဘုရားသခင်​၏​သားတော်ကို ယုံကြည်​သော​သူအပေါင်း​တို့သည် ပျက်စီးခြင်း​သို့​မ​ရောက်၊ ထာဝရ​အသက်ကို​ရစေ​ခြင်း​ငှာ ဘုရားသခင်​သည် မိမိ​၌​တစ်ပါး​တည်း​သော​သားတော်ကို စွန့်​တော်​မူ​သည်​တိုင်အောင် လော[က]သားတို့​ကို ချစ်တော်မူ​၏” ဟု​မိန့်ဆိုခဲ့​သူ ဘုရားသခင်​၏​စုံလင်သော သားတော်​ယေရှု​ခရစ်​၏ ရွေးနုတ်ဖိုး​ပူဇော်ရာ​ယဇ်​ပင်​ဖြစ်သည်။—ယောဟန် ၃:၁၆; ၁ ကောရိန္သု ၁၅:၂၁၊ ၂၂။

တမန်​တော်​ပေါလု​သည် ဤ​ပြင်ဆင်​ပေး​ချက်​အတွက် အလွန်​ကျေးဇူး​တင်​လေးမြတ်​ကြောင်း ဖော်ပြ​ခဲ့​သည်။ သူက “ငါသည် ငြိုငြင်​သော​သူ​ဖြစ်ပါ​သည်​တကား။ ဤ​အသေကောင်​မှ ငါ့ကို အဘယ်သူ​ကယ်လွှတ်​မည်​နည်း။ ငါ​တို့​သခင်​ယေရှု​ခရစ်​အားဖြင့် ကယ်လွှတ်​တော်​မူ​သော ဘုရားသခင်​၏​ကျေးဇူးတော်​ကြီး​လှ​ပေ​၏” ဟူ၍ ပြောဆို​ခဲ့​သည်။ (ရောမ ၇:၂၄၊ ၂၅) ပေါလု​သည် အားနည်းချက်​တစ်ခုခု​ကြောင့် အပြစ်ပြု​မိ​ခဲ့​လျှင် ယေရှု​ခရစ်​၏​ရွေးနုတ်ဖိုး​ပူဇော်ရာ​ယဇ်ကို အခြေပြု​၍ ဘုရားသခင်​၏​ခွင့်လွှတ်​မှု​ကို တောင်းဆို​နိုင်​သည်​ဟု သိရှိ​ခဲ့​၏။ *

ပထမ​ရာစု​က​ကဲ့သို့​ပင် မျက်မှောက်ခေတ်တွင် ယခင်​က အလွန်​ဆိုးရွား​ခဲ့​သူများ သို့​မဟုတ် မျှော်လင့်ချက်မဲ့​ပုံ​ရသည့် အခြေအနေ​မျိုး​တွင်​ရှိခဲ့​သူများ​သည် ကျမ်းစာ​အမှန်တရား​၏ တိကျ​မှန်ကန်သော​အသိပညာကို ရရှိ​လာ​ခဲ့​ကြ​ပြီး လိုအပ်​သလို​ပြုပြင်​ပြောင်းလဲ​လာ​ခဲ့​ရာ ဘုရားသခင်​၏​ကောင်းချီး​ကို ခံစားခွင့်​ရရှိ​နေကြ​သည်။ သူတို့​ပြုလုပ်​ခဲ့​ရသည့် ပြောင်းလဲမှု​များသည် မလွယ်ကူ​ပေ၊ လူအများသည် ဘေးသင့်​စေသော​ဝသီ​များ​ကို တွန်းလှန်​တိုက်ခိုက်​နေကြ​ရ​ဆဲ​ပင်။ သို့သော် ဘုရားသခင်​၏​အကူအညီ​ဖြင့် သူတို့သည် တည်ကြည်​ဖြောင့်မတ်မှု​ကို ထိန်းသိမ်း​ထား​နိုင်​ပြီး ကိုယ်တော်​၏​အမှုတော်ကို ထမ်းဆောင်ခြင်း​၌ ရွှင်လန်း​အားရ​နေကြ​သည်။ (ဖိလိပ္ပိ ၄:၁၃) ဘုရားသခင်​၏​စိတ်တော်နှင့်​တွေ့​ရန် အကြီးအကျယ်​ပြုပြင်​ပြောင်းလဲ​လာ​ခဲ့​သူ​တစ်ဦး၏ ပုံ​နမူနာကို သုံးသပ်ကြည့်​ပါ။

အားရှိစရာ​တွေ့ကြုံမှု​တစ်ခု

“ကျွန်တော် လူငယ်​ဘဝက ဘော်ဒါကျောင်း​တက်​နေတုန်းမှာ ကိုယ့်​ကိုယ်ကို လိင်​တူ​ဆက်ဆံ​သူ​လို့ တစ်ခါ​မှ​မယူမှတ်​ပေမဲ့ လိင်​တူ​ဆက်ဆံ​တဲ့​အကျင့်တွေကျင့်​ခဲ့တယ်။ ကျွန်တော့်​မိဘတွေက ကွာရှင်း​ထား​ကြ တော့ ကျွန်တော်​မရခဲ့​တဲ့ မိဘ​မေတ္တာကို တောင့်တ​ခဲ့တယ်။ ကျောင်း​ပြီးသွား​တော့ စစ်မှု​မ​ထမ်း​မနေ ထမ်း​ခဲ့​ရတယ်။ ကျွန်တော်​နေတဲ့ စစ်​တန်းလျား​ဘေးမှာ လိင်​တူ​ဆက်ဆံ​တဲ့ အုပ်စု​တစ်စု​ရှိတယ်။ သူတို့ရဲ့​ဘဝ​ပုံစံ​ကို ကျွန်တော်​အားကျ​လာတာ​နဲ့ သူတို့နဲ့​ပေါင်းသင်း​တော့​တာ​ပဲ။ တစ်နှစ်​အထိ သူတို့နဲ့​ပေါင်းသင်း​ပြီး​တဲ့​နောက်​မှာ လိင်​တူ​ဆက်ဆံ​သူ​တစ်ယောက်​အနေ​နဲ့ ကိုယ့်​ကိုယ်ကို သတ်မှတ်​ခဲ့တယ်။ ‘ဒါဟာ ငါ့​ဗီဇ​ပဲ၊ ပြောင်းလဲ​နိုင်​မှာ​မဟုတ်ဘူး’ ဆိုပြီး ကျွန်တော်​ဆင်ခြေ​တက်​မိတယ်။

“လိင်​တူ​တွေ​ရဲ့ ဗန်း​စကား​တွေ တတ်လာ​ပြီး လိင်​တူ​ကလပ်​တွေ​ကို​သွားတယ်၊ အဲဒီမှာ မူးယစ်​ဆေးဝါး​နဲ့ အရက် ကြိုက်​သလော​က်​ရနိုင်တယ်။ အပြင်ပန်း​က​ကြည့်​မယ်​ဆိုရင် အရမ်း​ကို​စိတ်​လှုပ်ရှား​စ​ရာ​ဖြစ်​ပြီး သဘောကျ​စ​ရာ​ကောင်း​ပုံ​ပေါက်​ပေမဲ့ အမှန်တကယ်​တော့ ရွံ​စ​ရာ​ကောင်းတယ်။ ဒီလို​ဆက်ဆံမှု​မျိုး​ဟာ သဘာဝ​မကျ​ဘူး၊ အနာဂတ်​အတွက်​လည်း ဘာ​အဓိပ္ပာယ်​မှ​မရှိဘူး​ဆိုပြီး ကျွန်တော်​ခံစား​လာတယ်။

“မြို့လေး​တစ်မြို့​မှာ ယေဟောဝါသက်သေ​တွေ စည်းဝေး​ကျင်းပ​နေတုန်း သူတို့ရဲ့ ဘုရားသခင့်​နိုင်ငံတော်​ခန်းမ​တစ်ခု​ကို အမှတ်မထင် ကျွန်တော်​တွေ့​လိုက်တယ်။ အထဲ​ကို​ဝင်ပြီး အနာဂတ်​ပရဒိသု​အခြေအနေ​နဲ့​ပတ်သက်​တဲ့ ဟောပြောချက်ကို နားထောင်​ခဲ့တယ်။ အဲဒီနောက် သက်သေခံ​အချို့​နဲ့ ကျွန်တော်​တွေ့ဆုံ​ပြီး သူတို့က စည်းဝေးကြီး​တစ်ခု​ကို တက်ရောက်​ဖို့ ကျွန်တော့်​ကို​ဖိတ်ခေါ်​ခဲ့တယ်။ ကျွန်တော် သွား​တက်​ခဲ့တယ်၊ အတူတကွ​ဝတ်ပြု​ကိုးကွယ်​နေကြ​တဲ့ မိသားစု​တွေ ပျော်ပျော်ရွှင်ရွှင်​နဲ့​ရှိနေကြ​တာ​ဟာ ကျွန်တော့်​အတွက် တကယ့်ကို​အံ့သြစရာ​ဖြစ်​ခဲ့တယ်။ သက်သေခံတွေ​နဲ့ ကျွန်တော် ကျမ်းစာ​စလေ့လာ​ခဲ့တယ်။

“ကျွန်တော်​မနည်း​ကြိုးစား​ခဲ့​ရပေမဲ့​လည်း ကျမ်းစာ​ကနေ​သိရှိ​လာတာ​တွေ​ကို စပြီး​လက်တွေ့​ကျင့်သုံး​ခဲ့တယ်။ မစင်ကြယ်​တဲ့​အကျင့်​အားလုံး​ကို ကျွန်တော်​ဖြတ်​နိုင်​ခဲ့တယ်။ ၁၄ လ လေ့လာ​ပြီး​တဲ့​နောက်​မှာ ယေဟောဝါ​ထံ ကျွန်တော့်​ရဲ့​အသက်တာကို​အပ်နှံ​ပြီး နှစ်ခြင်း​ခံ​ခဲ့တယ်။ ကျွန်တော့်​ဘဝမှာ ပထမဦးဆုံး​အကြိမ် မိတ်ဆွေစစ်​တွေ​ရလာတယ်။ တခြား​သူတွေကိုလည်း ကျမ်းစာ​အမှန်တရား​သိရှိ​လာအောင် ကျွန်တော်​ကူညီပေး​နိုင်​ခဲ့ပြီ၊ အခု​ဆိုရင် ခရစ်ယာန်​အသင်းတော်မှာ ဓမ္မ​အမှုထမ်း​အဖြစ် အမှုထမ်းဆောင်​နေပါ​ပြီ။ ကျွန်တော့်​ကို ယေဟောဝါ အမှန်​ပဲ​ကောင်းချီး​ပေး​ခဲ့​ပါ​တယ်။”

ကျွန်ုပ်​တို့ တာဝန်​ရှိ

ကျွန်ုပ်​တို့၏​အကျင့်ပျက်မှု​သည် ကျွန်ုပ်​တို့၏​မျိုးရိုး​ဗီဇ​ကြောင့်​ဟု အပြစ်​ပုံချ​ရန် ကြိုးစား​ခြင်း​သည် ဖြေရှင်း​နည်း​မဟုတ်ပေ။ ကျွန်ုပ်​တို့၏​ပြဿနာ​များ​ကို ဖြေရှင်းရန် သို့​မဟုတ် နိုင်နင်း​ရန် ကူညီပေး​မည့်​အစား ထိုသို့​ပြုလုပ်ခြင်း​သည် “ကျွန်ုပ်​တို့ ပြဿနာ​များစွာ​၏ ရင်းမြစ်​တွင်​တည်ရှိ​နေသည့် ခိုကိုးရာ​မဲ့​မှု​ကို ကျွန်ုပ်​တို့အား သင်​ပြပေး​နေခြင်း​ဖြစ်​ပေမည်။ ဤ​ပြဿနာ​များ ဖြစ်ပေါ်​လာ​ခြင်း​ကို လျော့နည်း​သွား​စေ​မည့်​အစား ပိုမို​ကြီးထွား​လာစေဖို့ ယင်းက မီးထိုး​ပေး​နေ​ပုံ​ရ၏” ဟု ယနေ့​ဆိုက်​ကို​လို​ဂျီ စာစောင်​က ဖော်ပြ​သည်။

ကျွန်ုပ်​တို့၏​အပြစ်ပြု​လို​သော​ဝသီ​များနှင့် ဘုရားသခင်​၏​စကား နားမထောင်​ရန် စာတန်​၏​ကြိုးစား​အားထုတ်မှု​များ​အပါအဝင် ဘေးသင့်​စေ​မည့် အဓိက​တွန်းအား​များ​ကို တွန်းလှန်​ကြ​ရမည်​မှာ​မှန်​၏။ (၁ ပေတရု ၅:၈) ကျွန်ုပ်​တို့၏​မျိုးရိုး​ဗီဇ​က တစ်နည်း​နည်းဖြင့် လွှမ်းမိုး​နိုင်​သည်​မှာလည်း မှန်​ပေ​သည်။ သို့သော် ကျွန်ုပ်​တို့သည် ခိုကိုးရာ​မဲ့​နေသည်​မဟုတ်။ စစ်မှန်သော​ခရစ်ယာန်​များ​မှာ တန်ခိုး​ကြီးမားသော မဟာမိတ်​များ​ဖြစ်​ကြ​သည့် ယေဟောဝါ၊ ယေရှု​ခရစ်၊ ဘုရားသခင်​၏​သန့်ရှင်းသော​ဝိညာဉ်​တော်၊ ကိုယ်တော်​၏​သမ္မာကျမ်းစာ​နှင့် ခရစ်ယာန်​အသင်းတော်​တို့​ရှိကြပါ​သည်။—၁ တိမောသေ ၆:၁၁၊ ၁၂; ၁ ယောဟန် ၂:၁။

ဣသရေလ​လူမျိုး​သည် ကတိထားရာ​ပြည်တော်​ထဲ​မဝင်​မီ မောရှေ​သည် ဘုရားသခင်​ရှေ့ သူတို့၏​တာဝန်​မကင်း​ကြောင်းကို ပြန်​သတိပေး​ရန် ဤသို့​ပြောဆို​ခဲ့​သည်– ‘အသက်ရှင်ခြင်း၊ သေခြင်း၊ ကောင်းချီး​ပေးခြင်း၊ ကျိန်ခြင်း​တို့ကို သင့်​ရှေ့၌​ငါ​ထား​သည်။ သင်​နှင့်​သင့်​အမျိုးအနွယ်​သည် အသက်ရှင်​မည်​အကြောင်း၊ သင်၏​ဘုရားသခင် ထာဝရ​ဘုရား​ကို​ချစ်၍ စကားတော်​ကို​နားထောင်​ကာ ကိုယ်တော်​ကို ဆည်းကပ်​မှီဝဲ​ပြီး အသက်​တရားကို ရွေးယူ​လော့။’ (တရားဟောရာ ၃၀:၁၉၊ ၂၀) ထို​နည်းတူ​စွာ ယနေ့လည်း တာဝန်​ရှိသူ​ယောက်စီ​သည် ဘုရားသခင်​၏​အမှုတော်ကို ထမ်းဆောင်ခြင်း၊ ကိုယ်တော်​၏​ပြဋ္ဌာန်းချက်​များ​ကို လိုက်နာခြင်း​တို့​နှင့်​ပတ်သက်​၍ ကိုယ်ပိုင်​ဆုံးဖြတ်ချက်​ချ​ရမည်​ဖြစ်သည်။ သင်​ကိုယ်တိုင် ရွေးချယ်​ပြုမူ​ရမည်​ဖြစ်၏။—ဂလာတိ ၆:၇၊ ၈။

[အောက်ခြေ​မှတ်ချက်များ]

[စာမျက်နှာ ၉ ပါ ရုပ်ပုံ]

အာဒံ​နှင့်​ဧဝ​သည် သူတို့၏​မျိုးရိုး​ဗီဇ​များ​တွင်​ရှိ ချွတ်ယွင်းချက်​အချို့​ကြောင့် အပြစ်ပြု​ရန် အကျင့်ပါ​ခဲ့​ခြင်း​ဖြစ်သလော

[စာမျက်နှာ ၁၀ ပါ ရုပ်ပုံ]

လူတစ်ဦး​စီ​သည် မိမိ၏​ဆုံးဖြတ်ချက်​များ​အတွက် တာဝန်​ယူ​သင့်​သလော

[Credit Line]

Drug user: Godo-Foto

[စာမျက်နှာ ၁၁ ပါ ရုပ်ပုံ]

လူသား​၏​အပြု​အမူ​အတွက် မျိုးရိုး​ဗီဇ​အကြောင်းရင်း​များ​ကို ရှာဖွေ​ရန် ကြိုးပမ်း​ခြင်း​သည် မအောင်မြင်​ခဲ့​ချေ

[စာမျက်နှာ ၁၂ ပါ ရုပ်ပုံ]

ကျမ်းစာ​ပြော​သည်ကို ကျင့်သုံး​ခြင်း​သည် စိတ်ရင်းမှန်​သူတို့ကို ပြောင်းလဲ​စေနိုင်