“အောက်သို့ဆင်းကြ၏”
“အောက်သို့ဆင်းကြ၏”
“နက်စွာသောအရပ်၌ လွှမ်းမိုးလျက်ရှိကြ၏။ကျောက်ကဲ့သို့အောက်သို့ဆင်းကြ၏။”
ဤသို့သီဆိုကြ၍ မောရှေနှင့် ဣသရေလလူမျိုးသည် ပင်လယ်နီမှလည်းကောင်း၊ သူတို့ကိုလိုက်လံဖမ်းဆီးနေသည့် အီဂျစ်ရန်သူ—ဖာရောနှင့် သူ၏စစ်တပ်၏—ချေမှုန်းခံရခြင်းမှလည်းကောင်း လွတ်မြောက်ခဲ့ခြင်းကို ဂုဏ်ပြုခဲ့ကြသည်။—ထွက်မြောက်ရာ ၁၅:၄၊ ၅။
ထိုအံ့မခန်းဖွယ်အဖြစ်အပျက်ကို တွေ့ မြင်သူတိုင်း မယုံမှားနိုင်အောင်ထင်ရှားသော သင်ခန်းစာရခဲ့သည်။ ယေဟောဝါ၏အခွင့်အာဏာကို မည်သူမျှ အောင်မြင်စွာ အန်တု သို့မဟုတ် ဖီဆန်ပြီး အသက်မရှင်နိုင်ပါ။ သို့ရာတွင် လအနည်းငယ်အကြာတွင် ဣသရေလလူမျိုး၌ ထင်ပေါ်ကျော်စောသူ—ကောရ၊ ဒါသန်၊ အဘိရံနှင့် ထောက်ခံအားပေးသူ ၂၅၀—တို့သည် မောရှေနှင့် အာရုန်တို့အား ဘုရားသခင်ပေးထားသည့်အခွင့်အာဏာကို ထင်ထင်ပေါ်ပေါ် ဆိုင်ပြိုင်အန်တုခဲ့ကြသည်။—တောလည်ရာ ၁၆:၁-၃။
ယေဟောဝါ၏ညွှန်ကြားမှုအတိုင်း မောရှေသည် ပုန်ကန်သူတို့၏တဲများကိုရှောင်၍နေကြဖို့ ဣသရေလလူများကို သတိပေးခဲ့သည်။ အိမ်သူအိမ်သားများခြံရံလျက် ဒါသန်နှင့်အဘိရံတို့သည် အာခံ၍ နောက်မဆုတ်ခဲ့ကြချေ။ ထိုအခါ မောရှေက ယေဟောဝါသည် ကိုယ်တော့်နည်းကိုယ်တော့်ဟန်ဖြင့် ထိုသူတို့သည် “ထာဝရဘုရား၌ပြစ်မှား” ကြပြီဖြစ်ကြောင်း ထင်ရှားစေမည်ဟု ကြေညာခဲ့သည်။ ထိုအချိန်တွင် သူတို့နင်းထားရာမြေကြီးကို ယေဟောဝါကွဲပွင့်စေခဲ့သည်။ “ထိုသူတို့သည် ကိုယ်တိုင်မှစ၍ ဆိုင်သမျှသောသူတို့နှင့်တကွ အသက်ရှင်လျက် သေမင်းနိုင်ငံသို့ဆင်းသက်၍ သူတို့အပေါ်မှာမြေစေ့ပြန်သဖြင့် သူတို့သည် ပရိသတ်မှပယ်ရှင်းခြင်းကိုခံရကြ၏။” ကောရနှင့် အခြားသူပုန်များကော အသို့နည်း။ “နံ့သာပေါင်းကိုမီးရှို့၍ပူဇော်သောသူ နှစ်ရာငါးဆယ်တို့ကိုလည်း ထာဝရဘုရားထံတော်က မီးထွက်၍လောင်လေ၏။”—တောလည်ရာ ၁၆:၂၃-၃၅; ၂၆:၁၀။
ဖာရောနှင့် သူ၏စစ်တပ်အပြင် တောကန္တာရ၌ ပုန်ကန်ခဲ့ကြသူတို့သည် ယေဟောဝါ၏အခွင့်အာဏာနှင့် လူမျိုးတော်၏ကိစ္စရပ်များကို ကိုယ်တော်စိတ်ဝင်စားကြောင်း အသိအမှတ်မပြုကြသောကြောင့် အားလုံးပျက်စီးသွားကြလေသည်။ ထို့ကြောင့် ဤခဲယဉ်းသောနေ့ရက်များအတွင်း ယေဟောဝါ၏ကာကွယ်မှုကို တွေ့ မြင်ရရှိလိုကြသူအားလုံးသည် “အမြင့်ဆုံးသောဘုရား[သခင်]” နှင့် “[အတိုင်းအဆမဲ့] တန်ခိုးရှင်” ဖြစ်တော်မူသော ယေဟောဝါအကြောင်းသင်ယူ၍ ကိုယ်တော်၏စကားကိုနာခံရန် အရေးကြီးပါသည်။ ထိုသို့ပြုခြင်းဖြင့် ယေဟောဝါ၏ ယုံကြည်စိတ်ချရသော ဤစကားများကို သူတို့နှလုံးသွင်းနိုင်ကြသည်– “သင်၏အနားမှာလူတစ်ထောင်၊ သင်၏လက်ယာဘက်မှာလူတစ်သောင်းလဲသော်လည်း သင့်ကိုမထိမခိုက်ရ။ သင်သည် ကိုယ်မျက်စိနှင့်ကြည့်၍ မတရားသောသူတို့ ၌ ရောက်ရသောအပြစ်ကို မြင်ရုံမျှသာရှိလိမ့်မည်။ ‘ထာဝရဘုရား [“ယေဟောဝါ၊” ကဘ] သည် ငါခိုလှုံရာဖြစ်တော်မူ၏’ ဟု သင်သည်ဆို၍ အမြင့်ဆုံးသောဘုရား[သခင်]၌နေရာကျသောကြောင့်” တည်း။—ဆာလံ ၉၁:၁၊ ၇-၉။