ခရစ်ယာန်ကိုယ်ကျင့်တရားကို သင်ယူပြီး သွန်သင်လော့
ခရစ်ယာန်ကိုယ်ကျင့်တရားကို သင်ယူပြီး သွန်သင်လော့
“သူတစ်ပါးကိုဆုံးမလျက်ပင် ကိုယ်ကိုမဆုံးမသလော။”—ရောမ ၂:၂၁။
၁၊ ၂။ သမ္မာကျမ်းစာကို လေ့လာလိုစိတ်ရှိရန် အဘယ်အကြောင်းရင်းများရှိသနည်း။
သင်သည် ဘုရားသခင့်နှုတ်မြွက်စကားတော်ကိုလေ့လာရန် အကြောင်းများစွာရှိ၏။ ၎င်းတွင်ပါသော လူများ၊ အဖြစ်အပျက်များ၊ နေရာဒေသများနှင့် အခြားအရာများအကြောင်း သင်သိလိုပေမည်။ သုံးပါးပေါင်းတစ်ဆူ သို့မဟုတ် မီးငရဲကဲ့သို့သော ဘာသာတရားအမှားများအစား အယူဝါဒအမှန်ကို သင်သိလိုပေမည်။ (ယောဟန် ၈:၃၂) ထို့အပြင် ယေဟောဝါနှင့်ပို၍တူရန်အလို့ငှာနှင့် ကိုယ်တော့်ရှေ့တွင် ဖြောင့်မတ်တည်ကြည်စွာလျှောက်လှမ်းနိုင်ဖို့ ကိုယ်တော့်ကို သင်ပိုမိုသိကျွမ်းလိုစိတ်ရှိသင့်သည်။—၃ ဓမ္မရာဇဝင် ၁၅:၄၊ ၅။
၂ ဘုရားသခင့်နှုတ်မြွက်စကားတော်ကို လေ့လာရသည့် ဆက်နွှယ်အရေးပါသော အကြောင်းရင်းတစ်ခုမှာ အခြားသူများဖြစ်သည့် သင်ချစ်မြတ်နိုးသူများ၊ အသိမိတ်ဆွေများနှင့် သူစိမ်းများကိုပင် သွန်သင်ပေးဖို့ မိမိကိုယ်ကိုအသင့်ပြင်ဆင်ရန်ဖြစ်သည်။ ဤအမှုကို ခရစ်ယာန်စစ်များ မပြုမနေပြုရပေမည်။ ယေရှုက “သင်တို့သွား၍ လူမျိုးတကာတို့ကို ငါ့တပည့်ဖြစ်စေလျက် . . . ငါသည် သင်တို့အား ပေးသမျှသောပညတ်တော်တို့ကို စောင့်ရှောက်စေခြင်းငှာ ဆုံးမ [သွန်သင်] ပေးကြလော့” ဟု မိမိ၏နောက်တော်လိုက်များအား မိန့်ဆိုတော်မူခဲ့၏။—မဿဲ ၂၈:၁၉၊ ၂၀။
၃၊ ၄။ ယေရှုမိန့်မှာခဲ့သည့်အတိုင်း သွန်သင်ပေးခြင်းသည် အဘယ်ကြောင့်ဂုဏ်ရှိသနည်း။
၃ အခြားသူများကို သွန်သင်ပေးလိုသည့်စိတ်ဖြင့် သမ္မာကျမ်းစာလေ့လာခြင်းသည် ဂုဏ်သရေရှိပြီး ကျေနပ်မှုအမြဲရှိစေသည့် အကြောင်းရင်းတစ်ခုဖြစ်သည်။ သွန်သင်ပေးခြင်းသည် ဂုဏ်သရေရှိလုပ်ငန်းတစ်ရပ်ဖြစ်ခဲ့သည်ကား ကြာမြင့်ပေပြီ။ အင်ကာတာစွယ်စုံကျမ်းကဤသို့ဆိုသည်– “ဂျူးအသိုင်းအဝိုင်းတွင် အရွယ်ရောက်သူများစွာတို့သည် သွန်သင်သူများအား ကယ်တင်ခြင်းသို့ လမ်းညွှန်ပေးသူများဟု ယူမှတ်ကြပြီး မိဘများထက်ပင် သွန်သင်သူများကို ပို၍ဂုဏ်တင်ကြဖို့ သားသမီးများကို အားပေးတိုက်တွန်းခဲ့ကြသည်။” သမ္မာကျမ်းစာလေ့လာခြင်းအားဖြင့် မိမိတို့ကိုယ်ကိုသွန်သင်ကြပြီး အခြားသူများကို တစ်ဆင့်သွန်သင်ပေးခြင်းသည် ခရစ်ယာန်များအတွက် အထူးသဖြင့် ဂုဏ်ရှိသည်။
၄ “အခြားမည်သည့်လုပ်ငန်းထက်မဆို သွန်သင်ပေးခြင်းလုပ်ငန်းကို လုပ်ကိုင်သူပိုများသည်။ ကမ္ဘာတစ်ဝန်းရှိ အမျိုးသားအမျိုးသမီး ၄၈ သန်းခန့်မှာ ဆရာများဖြစ်ကြသည်။” (ကမ္ဘာ့စာအုပ်စွယ်စုံကျမ်း) လူငယ်များကို သွန်သင်ပေးရန် ကျောင်းဆရာတစ်ဦးအား တာဝန်အပ်ထားပြီး သူတို့အပေါ် နှစ်ချီ ဩဇာသက်ရောက်နိုင်သည်။ အခြားသူများကို သွန်သင်ပေးပါဟူသော ယေရှု၏အမိန့်ကို သင်လိုက်နာမည်ဆိုလျှင် ထိုထက်မကပင် သက်ရောက်မှုရှိသည်၊ သင်သည် ထာဝရကိုရည်မျှော်လျက် သူတို့အပေါ် ဩဇာသက်ရောက်နိုင်ပေသည်။ တမန်တော်ပေါလုက တိမောသေအား “ကိုယ်ကိုလည်းကောင်း၊ ကိုယ်ဆုံးမ [သွန်သင်ခြင်း] ကိုလည်းကောင်း သတိပြု၍ အမြဲတည်နေလော့။ ထိုသို့ပြုလျှင်၊ ကိုယ်ကိုလည်းကောင်း၊ နားထောင်သောသူတို့ကိုလည်းကောင်း ကယ်တင်လိမ့်မည်” ဟုတိုက်တွန်းနှိုးဆော်ခဲ့သည့်အခါ ယင်းကို ပေါ်လွင်ထင်ရှားစေခဲ့သည်။ (၁ တိမောသေ ၄:၁၆) မှန်ပါသည်၊ သင်၏သွန်သင်မှုသည် ကယ်တင်ခြင်းနှင့်ဆက်နွှယ်နေ၏။
၅။ ခရစ်ယာန်သွန်သင်ခြင်းသည် အဘယ်ကြောင့် အမြင့်ဆုံးဖြစ်သနည်း။
၅ မိမိကိုယ်ကိုရော အခြားသူများကိုပါ သွန်သင်ပေးခြင်းသည် စကြဝဠာအကြွင်းမဲ့ပိုင်သအုပ်စိုးရှင်၊ အမြင့်မြတ်ဆုံးသခင်၏ ညွှန်ကြားချက်ဖြစ်ပြီး ထိုသို့ပြုရန် အခွင့်အာဏာပေးအပ်ထားသည်။ ၎င်းကိုယ်နှိုက်က ဤသွန်သင်ပေးခြင်းကို အခြေခံအကြောင်းအရာများ၊ အလုပ်အကိုင်စွမ်းရည်များ၊ သို့မဟုတ် ဆေးဘက်ဆိုင်ရာအထူးပြုပညာရပ်များကိုပင် သွန်သင်ပေးခြင်းဖြစ်သည့် လောကရေးရာသွန်သင်ခြင်းနယ်ပယ်မှ အဘယ်သွန်သင်မှုထက်မဆို ပို၍အရေးပါစေသည်။ ခရစ်ယာန်သွန်သင်မှုတွင် သင်သားသည် ဘုရားသခင့်သားတော်၊ ခရစ်တော်ယေရှုကို အတုယူရန် ကိုယ်တိုင်သင်ယူပြီး အခြားသူများကိုလည်း အလားတူပြုလုပ်ရန် သွန်သင်ပေးခြင်းပါဝင်သည်။—ယောဟန် ၁၅:၁၀။
သင့်ကိုယ်ကို သွန်သင်ရသည့်အကြောင်း
၆၊ ၇။ (က) အလျင်ဦးဆုံး မိမိတို့ကိုယ်ကို အဘယ်ကြောင့် သွန်သင်ရမည်နည်း။ (ခ) ပထမရာစုဂျူးများသည် အဘယ်သဘောမျိုးဖြင့် သွန်သင်သူများအဖြစ် တာဝန်မကျေကြသနည်း။
၆ ကျွန်ုပ်တို့သည် မိမိတို့ကိုယ်ကို ဦးဆုံး သွန်သင်ရမည်ဟု အဘယ်ကြောင့်ဆိုရသနည်း။ မိမိတို့ကိုယ်ကို အလျင်ဦးဆုံး မသွန်သင်လျှင် အခြားသူများကို ကျွန်ုပ်တို့ကောင်းမွန်စွာ သွန်သင်ပေးနိုင်မည် မဟုတ်ချေ။ ပေါလုသည် ဤအချက်ကို သူ၏ခေတ်ကဂျူးများအတွက် အရေးတကြီး စဉ်းစားစရာဖြစ်စေသည့် ကျမ်းပိုဒ်တစ်ခုတွင် အလေးထားဖော်ပြပြောဆိုခဲ့သည်။ ၎င်းသည် ယခုခေတ် ခရစ်ယာန်များအတွက်လည်း အရေးကြီး၏။ ပေါလု ဤသို့မေးမြန်းခဲ့သည်– “သူတစ်ပါးကိုဆုံးမလျက်ပင် ကိုယ်ကိုမဆုံးမသလော။ ‘သူ့ဥစ္စာကိုမခိုးနှင့်’ ဟု တရားဟောလျက်ပင် ကိုယ်တိုင်ခိုးသလော။ ‘သူ့မယားကိုမပြစ်မှားနှင့်’ ဟုဆိုလျက်ပင် ကိုယ်တိုင်ပြစ်မှားသလော။ ရုပ်[ပုံ]ကိုစက်ဆုပ်ရွံရှာလျက်ပင် [ဝတ်ပြုရာအိမ်]တော်ကို လုယူဖျက်ဆီးသလော။ ပညတ်တရားတော်ကိုအမှီပြု၍ ဝါကြွားလျက်ပင် ထိုတရားကိုလွန်ကျူး၍ ဘုရားသခင်၏ဂုဏ်အသရေတော်ကို ရှုတ်ချသလော။”—ရောမ ၂:၂၁-၂၃။
၇ ပေါလုသည် သူ့ဥစ္စာကိုမခိုးနှင့်၊ သူ့မယားကိုမပြစ်မှားနှင့်ဟူသော ပညတ်တော်ဆယ်ပါးတွင် တိုက်ရိုက်ရည်ညွှန်းဖော်ပြထားသည့် မကောင်းမှုနှစ်ခုကိုကိုးကား၍ အဖြေမတောင်းဘဲ မေးမြန်းခဲ့သည်။ (ထွက်မြောက်ရာ ၂၀:၁၄၊ ၁၅) ပေါလုခေတ်က ဂျူးအချို့သည် ၎င်းတို့တွင် ဘုရားသခင့်ပညတ်တော်ရှိသောကြောင့် ဂုဏ်ယူဝင့်ကြွားခဲ့ကြ၏။ သူတို့သည် “ပညတ်တရားတော်၌ သွန်သင်ခြင်းခံရ[သော်လည်း] . . . လူကန်းတို့အား လမ်းပြသောသူ၊ မှောင်မိုက်၌နေသောသူတို့ကို လင်းစေသောသူ၊ . . . သူငယ်တို့ကို နည်းပေးသောသူ[များ] . . . ဖြစ်သည်။” (ရောမ ၂:၁၇-၂၀၊ သမ္မာ) သို့သော် အချို့မှာ ခိုးမှုနှင့် သူ့သားအိမ်ရာပြစ်မှားခြင်းကို တိတ်တဆိတ် ကျူးလွန်နေကြရာ အရေခြုံများဖြစ်ကြသည်။ ထိုသို့ပြုခြင်းက ကောင်းကင်ဘုံရှိ ပညတ်တော်၏အာဘော်ရှင်နှင့် ပညတ်တော်ကိုပါ ဂုဏ်ပျက်စေပေမည်။ သူတို့သည် အခြားသူများကို သွန်သင်ပေးရန် အရည်အချင်းမပြည့်မီကြကြောင်း ထင်ရှားသည်; သူတို့သည် သူတို့ကိုယ်ကိုပင် မသွန်သင်ကြပေ။
၈။ ပေါလုခေတ်က ဂျူးအချို့သည် ‘ဝတ်ပြုရာအိမ်တော်များကို မည်သို့လုယက်’ ခဲ့ကြမည်နည်း။
၈ ဝတ်ပြုရာအိမ်တော်ကို လုယက်ခြင်းအကြောင်း ပေါလုဖော်ပြခဲ့သည်။ ဂျူးအချို့သည် စာသားအတိုင်း ထိုသို့ပြုခဲ့ကြသလော။ အဘယ်အရာကို ပေါလုဆိုလိုသနည်း။ အမှန်အတိုင်းပြောရလျှင် ဤကျမ်းပိုဒ်တွင် အချက်အလက်အနည်းငယ်သာပါသည့်အတွက် ဂျူးအချို့သည် ‘ဝတ်ပြုရာအိမ်တော်ကို မည်သို့လုယက်ခဲ့’ ကြောင်း ကျွန်ုပ်တို့အသေအချာမပြောနိုင်ပါ။ ဧဖက်မြို့၏မြို့စာရေးက ပေါလု၏အပေါင်းပါများသည် ‘ဝတ်ပြုရာအိမ်တော် လုယက်သူများ’ မဟုတ်ဟု အစောပိုင်းကကြေညာခဲ့သည်၊ ယင်းကြောင့် အနည်းဆုံးလူအချို့က ဂျူးတို့ကို ထိုသို့စွပ်စွဲတတ်ကြကြောင်း ယူမှတ်စေသည်။ (တမန်တော် ၁၉:၂၉-၃၇) ထိုသူတို့သည် အယူမှားသောဝတ်ပြုရာအိမ်များမှ စစ်အောင်နိုင်သူများ သို့မဟုတ် ဘာသာရေးအစွန်းရောက်သူများ တိုက်ခိုက်လုယူလာခဲ့သည့် တန်ဖိုးရှိပစ္စည်းများကို ကိုယ်ကျိုးအတွက် အသုံးပြုနေပါသလော၊ သို့မဟုတ် ၎င်းတို့နှင့် ရောင်းဝယ်ဖောက်ကားနေကြပါသလော။ ဘုရားသခင့်ပညတ်တော်အရ၊ ရုပ်[ပုံ]များ၌ပါသောရွှေငွေကို ကိုယ်ရေးကိုယ်တာအတွက်အသုံးမပြုဘဲ ဖျက်ဆီးပစ်ရမည်ဖြစ်သည်။ (တရားဟောရာ ၇:၂၅) * ထို့ကြောင့်ပေါလုသည် ဘုရားသခင့်မိန့်မှာချက်ကို လျစ်လျူရှု၍ အယူမှားဝတ်ပြုရာအိမ်များမှရလာသည့် ပစ္စည်းများကို အမြတ်ထုတ်အသုံးပြုခဲ့ကြသည့် ဂျူးများကို ရည်စောင်နေခြင်းဖြစ်နိုင်သည်။
၉။ ယေရုရှလင်ဝတ်ပြုရာအိမ်တော်တွင် ပြုလုပ်နေကြသည့် အဘယ်မှားယွင်းသောအပြုအမူများက ထိုဝတ်ပြုရာအိမ်တော်ကို လုယက်ခြင်းနှင့်တူသနည်း။
၉ အခြားတစ်ဖက်တွင်မူ ဂျိုစီဖတ်စ်သည် ခေါင်းဆောင်မှာ ပညတ်တရားသွန်သင်သူဖြစ်သည့် ဂျူးလေးဦးကြောင့် ရောမမြို့တွင် ပျံ့နှံ့ခဲ့သော မကောင်းသတင်းတစ်ခုကို ပြောပြသည်။ ထိုသူလေးဦးသည် ဂျူးဘာသာသို့ပြောင်းဝင်လာသူ ရောမအမျိုးသမီးတစ်ဦးအား ယေရုရှလင်မြို့ရှိ ဝတ်ပြုရာအိမ်တော်ကို ရွှေငွေနှင့်အခြားအဖိုးတန်အရာများ လှူဒါန်းရန် အယုံသွင်းခဲ့ကြသည်။ ၎င်းအလှူကို ရရှိခဲ့ကြသောအခါ သူတို့အတွက် အသုံးပြုခဲ့ကြသည်၊ တစ်နည်းအားဖြင့် ဝတ်ပြုရာအိမ်တော်ကို သူတို့လုယူကြ၏။ * အခြားသူများမူကား အပြစ်အနာအဆာရှိ ယဇ်ကောင်များ ပူဇော်ခြင်း၊ ဝတ်ပြုရာအိမ်တော်ရင်ပြင်တွင် တပ်မက်ခြင်းကြီးစွာ ကုန်သွယ်ခြင်းကို မြှင့်တင်ပေးခြင်းဖြင့် ဝတ်ပြုရာအိမ်တော်ကို “ဓားပြတွင်း” ဖြစ်စေလျက် ၎င်းကို လုယူနေကြသည်။—မဿဲ ၂၁:၁၂၊ ၁၃; မာလခိ ၁:၁၂-၁၄; ၃:၈၊ ၉။
ခရစ်ယာန်ကိုယ်ကျင့်တရားကို သွန်သင်လော့
၁၀။ ရောမ ၂:၂၁-၂၃ တွင် မှတ်တမ်းတင်ထားသည့် ပေါလုစကားများ၏ အဘယ်ဆိုလိုရင်းကို ကျွန်ုပ်တို့ လက်မလွတ်သင့်သနည်း။
၁၀ ပထမရာစုတွင်ပြုနေသော ခိုးမှု၊ သူ့သားအိမ်ရာပြစ်မှားမှု၊ ဝတ်ပြုရာအိမ်တော်လုယူမှု အစရှိသည့် အဘယ်အမှုကိုမဆို ပေါလုရည်ညွှန်းနေပါစေ သူ၏ဆိုလိုရင်းကို ကျွန်ုပ်တို့ လက်မလွတ်သွားစေပါနှင့်။ သူက “သူတစ်ပါးကိုဆုံးမလျက်ပင် ကိုယ်ကိုမဆုံးမသလော” ဟုမေးမြန်းခဲ့သည်။ ပေါလုတင်ပြခဲ့သည့်ပုံနမူနာများသည် ကိုယ်ကျင့်တရားနှင့်ဆက်စပ်နေသည်ကို မှတ်သားထိုက်ပေသည်။ ဤတွင် တမန်တော်သည် သမ္မာကျမ်းစာအယူဝါဒ သို့မဟုတ် သမိုင်းအပေါ်အာရုံမစိုက်ခဲ့ချေ။ ပေါလုရည်ညွှန်းခဲ့သည့် ကိုယ်ကိုလည်းကောင်း၊ အခြားသူများကိုလည်းကောင်း သွန်သင်ခြင်းသည် ခရစ်ယာန်ကိုယ်ကျင့်တရားနှင့်ဆိုင်၏။
၁၁။ ဘုရားသခင့်နှုတ်မြွက်စကားတော်ကို သင်လေ့လာရာတွင် ခရစ်ယာန်ကိုယ်ကျင့်တရားကို အဘယ်ကြောင့် အာရုံစိုက်သင့်သနည်း။
၁၁ ရောမ ၂:၂၁-၂၃ ပါသင်ခန်းစာကို ကျွန်ုပ်တို့ကျင့်သုံးဖို့အတွက် ဘုရားသခင့်နှုတ်မြွက်စကားတော်မှ ခရစ်ယာန်ကိုယ်ကျင့်တရားကို တတ်သိရန်လိုသည်၊ သိရှိလာသည့်အရာနှင့်အညီ လုပ်ဆောင်ရန်လိုသည်၊ ထို့နောက် အခြားသူများကိုလည်း အလားတူလုပ်ဆောင်ရန် သင်ကြားပေးဖို့လိုသည်။ ထို့ကြောင့် သမ္မာကျမ်းစာကိုသင်လေ့လာသည့်အခါ စစ်မှန်သောခရစ်ယာန် ကိုယ်ကျင့်တရား၏ရင်းမြစ်ဖြစ်သည့် ယေဟောဝါစံနှုန်းများ၏ ညွှန်ပြချက်များကိုသတိပြုပါ။ သမ္မာကျမ်းစာတွင် သင်တွေ့ရှိရသည့်သွန်သင်ချက်နှင့် သင်ခန်းစာများကို တွေးတောဆင်ခြင်ပါ။ ထို့နောက် သင်တတ်သိလာသည့်အရာကို ရဲရဲဝံ့ဝံ့လက်တွေ့ကျင့်သုံးပါ။ ထိုသို့ပြုလုပ်ရန် သတ္တိရှိဖို့နှင့်စိတ်ဓာတ်ကြံ့ခိုင်ဖို့လိုသည်။ မစုံလင်သည့်လူသားများအနေနှင့် အခြေအနေကခရစ်ယာန်ကိုယ်ကျင့်တရားကို လျစ်လျူရှုရန်ခွင့်ပြုကြောင်း သို့မဟုတ် လျစ်လျူရှုရန်ပင် အဘယ်ကြောင့်လိုအပ်ကြောင်း ဆင်ခြေဆင်လက်များပေးဖို့၊ အကြောင်းပြဖို့လွယ်ကူပါသည်။ ပေါလုရည်ညွှန်းခဲ့သည့် ဂျူးများသည် ရှာကြံအကြောင်းပြရန်၊ သို့မဟုတ် အခြားသူများကို လှည့်ဖြားရန် ဤသို့ပါးနပ်လိမ္မာစွာ ကျိုးကြောင်းဆင်ခြင်မှုတွင် အတွေ့အကြုံများသူများဖြစ်ပေမည်။ သို့သော် ခရစ်ယာန်ကိုယ်ကျင့်တရားကို အသေးအဖွဲဖြစ်စေရန် လျှော့ပေါ့ပြောခြင်း၊ သို့မဟုတ် ကိုယ့်သဘောနှင့်ကိုယ် လျစ်လျူရှုခြင်းမပြုရကြောင်း ပေါလု၏စကားများက ဖော်ပြသည်။
၁၂။ အမူအကျင့်ကောင်း သို့မဟုတ် အကျင့်ပျက်ပြားမှုက ယေဟောဝါဘုရားသခင်ကို မည်သို့ဖြစ်စေပြီး ဤအချက်ကို စွဲမှတ်ထားခြင်းက အဘယ်ကြောင့် အထောက်အကူပြုသနည်း။
၁၂ တမန်တော်သည် သမ္မာကျမ်းစာတွင်ပါရှိသည့် ကိုယ်ကျင့်တရားကို သင်ယူလေ့လာပြီး လက်တွေ့ကျင့်သုံးခြင်း၏ အဓိကအကြောင်းရင်းကို ပေါ်လွင်ထင်ရှားစေခဲ့သည်။ ဂျူးများ၏ အကျင့်ပျက်ပြားမှုက ယေဟောဝါ၏ဂုဏ်သိက္ခာကို ထိခိုက်သည်– “ပညတ်တရားတော်ကိုအမှီပြု၍ ဝါကြွားလျက်ပင် ထိုတရားကိုလွန်ကျူး၍ ဘုရားသခင်၏ဂုဏ်အသရေတော်ကို ရှုတ်ချသလော။ အကြောင်းမူကား . . . ‘တစ်ပါးအမျိုးသားတို့သည် သင်တို့အကျင့်ကိုထောက်၍ ဘုရားသခင်၏နာမတော်ကို ကဲ့ရဲ့တတ်ကြ၏။’” (ရောမ ၂:၂၃၊ ၂၄) ယနေ့လည်း ကျွန်ုပ်တို့သည် ခရစ်ယာန်ကိုယ်ကျင့်တရားကို လျစ်လျူရှုမည်ဆိုလျှင် ၎င်း၏ရင်းမြစ်ကို အလားတူပင် ဂုဏ်ဖျက်ရာကျသည်။ သို့သော် ဘုရားသခင့်စံနှုန်းများကို ကျွန်ုပ်တို့စွဲစွဲမြဲမြဲ ဆုပ်ကိုင်ထားမည်ဆိုလျှင် ကိုယ်တော့်ကိုဂုဏ်တင်ရာရောက်သည်။ (ဟေရှာယ ၅၂:၅; ယေဇကျေလ ၃၆:၂၀) ယင်းကို သင်သိရှိထားလျှင် ခရစ်ယာန်ကိုယ်ကျင့်တရားကို လျစ်လျူရှုခြင်းသည် အလွယ်ကူဆုံး၊ သို့မဟုတ် အဆင်ပြေဆုံးဖြစ်ပုံရသည့် သွေးဆောင်မှုများ သို့မဟုတ် အခြေအနေများနှင့် သင်ရင်ဆိုင်ရသည့်အခါ သင်၏ဆုံးဖြတ်ချက်ကို ခိုင်ခံ့စေနိုင်ပါလိမ့်မည်။ ထို့ပြင် ပေါလု၏စကားများက အခြားတစ်ခုကိုလည်း သွန်သင်ပေးသည်။ သင့်အပြုအမူသည် ဘုရားသခင်ကိုဂုဏ်တင်နိုင်ကြောင်း ကိုယ်တိုင်သိရုံမက အခြားသူများအား သွန်သင်ပေးရာတွင် သူတို့သိရှိလာသည့် ကိုယ်ကျင့်တရားစံနှုန်းများကို လက်တွေ့ကျင့်သုံးကြခြင်းသည်လည်း ယေဟောဝါကိုဂုဏ်တင်နိုင်ကြောင်း သဘောပေါက်စေပါ။ ခရစ်ယာန်ကိုယ်ကျင့်တရားသည် ကျေနပ်အားရစေ၍ လူတစ်ဦးအား ကျန်းမာစေသည်သာမက ထိုကိုယ်ကျင့်တရားကို စီမံချမှတ်ပေးတော်မူပြီး အကျင့်သိက္ခာရှိရန်အားပေးသည့်အရှင်ကို ဂုဏ်တင်နိုင်သည်။—ဆာလံ ၇၄:၁၀; ယာကုပ် ၃:၁၇။
၁၃။ (က) ကိုယ်ကျင့်တရားနှင့်စပ်လျဉ်း၍ သမ္မာကျမ်းစာက ကျွန်ုပ်တို့ကို မည်သို့ကူညီပေးသနည်း။ (ခ) ၁ သက်သာလောနိတ် ၄:၃-၇ ပါ သွန်သင်ချက်၏လိုရင်းကို ဖော်ပြပါ။
၁၃ ကိုယ်ကျင့်တရားသည် အခြားသူတို့အပေါ်လည်း သက်ရောက်မှုရှိသည်။ ဘုရားသခင်၏ကိုယ်ကျင့်တရားစံနှုန်းများကို လက်တွေ့ကျင့်သုံးခြင်း၏တန်ဖိုးနှင့် ၎င်းတို့ကို လျစ်လျူရှုခြင်း၏ ရလဒ်များကို ဖော်ပြသည့် ဘုရားသခင့်နှုတ်မြွက်စကားတော်မှ ပုံနမူနာများက သင့်အားသဘောပေါက်စေသည်။ (ကမ္ဘာဦး ၃၉:၁-၉၊ ၂၁; ယောရှု ၇:၁-၂၅) ထို့အပြင် ကိုယ်ကျင့်တရားနှင့်စပ်လျဉ်းသည့် ဤကဲ့သို့သောဆုံးမစကားကို ကျမ်းစာတွင်တွေ့ရှိနိုင်၏– “ဘုရားသခင်၏အလိုတော်ဟူမူကား၊ သင်တို့သည် မတရားသောမေထုန်ကိုကြဉ်ရှောင်၍ သန့်ရှင်းစေခြင်းငှာလည်းကောင်း၊ ဘုရားသခင်ကိုမသိသော သာသနာပလူတို့သည် ကိလေသာတပ်မက်ခြင်းရှိသကဲ့သို့မရှိ၊ သင်တို့အပေါင်းသည် သန့်ရှင်းခြင်း၊ အသရေတင့်တယ်ခြင်းနှင့် မိမိကိုယ်ကိုမိမိ ထိန်းတတ်စေခြင်းငှာလည်းကောင်း၊ ဤအမှုအရာ၌လွန်ကျူး၍ ညီအစ်ကိုကို ပရိယာယ်အားဖြင့် မပြစ်မှားစေခြင်းငှာလည်းကောင်း အလိုတော်ရှိ၏။ . . . ဘုရားသခင်သည် ညစ်ညူးစေခြင်းငှာ ငါတို့ကိုခေါ်တော်မူသည်မဟုတ်၊ သန့်ရှင်းစေခြင်းငှာ ခေါ်တော်မူ၏။”—၁ သက်သာလောနိတ် ၄:၃-၇။
၁၄။ ၁ သက်သာလောနိတ် ၄:၃-၇ ပါ သွန်သင်ချက်နှင့်ပတ်သက်၍ မိမိကိုယ်ကို အဘယ်သို့မေးမြန်းနိုင်သနည်း။
၁၄ လိင်ဆိုင်ရာအကျင့်ယိုယွင်းခြင်းသည် ခရစ်ယာန်ကိုယ်ကျင့်တရားကို ချိုးဖောက်ကြောင်း မည်သူမဆို ဤကျမ်းပိုဒ်မှ နားလည်နိုင်သည်။ သို့တိုင် ဤကျမ်းပိုဒ်မှ ထိုထက်မက သိနားလည်နိုင်သည်။ ကျမ်းချက်အချို့ကို အတော်အတန်ဖတ်ရှုလေ့လာ၊ ဆင်ခြင်သုံးသပ်လိုက်လျှင် ထိုးထွင်းသိမြင်မှု ပိုရရှိစေသည်။ ဥပမာ၊ မတရားမေထုန်ကျူးလွန်ခြင်းဖြင့် ‘ညီအစ်ကိုကို ပရိယာယ်အားဖြင့်ပြစ်မှား (“အခွင့်အရေးများကို ကျူးကျော်၊” ကဘ)’ သည်ဟု ပေါလုပြောဆိုရာ၌ သူအဘယ်အရာကိုဆိုလိုကြောင်း အလေးအနက် စဉ်းစားဆင်ခြင်နိုင်ပေသည်။ အဘယ်အခွင့်အရေးများပါဝင်ပြီး ၎င်းကိုကောင်းစွာသိရှိထားခြင်းက ခရစ်ယာန်ကိုယ်ကျင့်တရားကို ထိန်းသိမ်းရန် လှုံ့ဆော်မှုကို မည်သို့ထပ်ရရှိနိုင်မည်နည်း။ ဤသို့စူးစမ်းရှာဖွေလေ့လာခြင်းမှရသော အသိပညာက အခြားသူများကို သွန်သင်ပေးရန်နှင့် ဘုရားသခင်အား သူတို့ဂုဏ်တင်စေရန် သင့်အား မည်သို့အသင့်ရှိစေနိုင်မည်နည်း။
သွန်သင်ရန် လေ့လာလော့
၁၅။ ကိုယ်ပိုင်လေ့လာမှုပြုခြင်းအားဖြင့် သင့်ကိုယ်သင်သွန်သင်ရန် အဘယ်ကိရိယာများ အသုံးပြုနိုင်သနည်း။
၁၅ ယေဟောဝါသက်သေများသည် မိမိတို့ကိုယ်ကို သို့မဟုတ် အခြားသူများကို သွန်သင်စဉ် ပေါ်ပေါက်လာတတ်သည့် မေးခွန်းများ သို့မဟုတ် အရေးကိစ္စများကို စူးစမ်းလေ့လာရန် အသုံးပြုစရာ ကိရိယာများရှိကြသည်။ ဘာသာစကားများစွာဖြင့် ရရှိနိုင်သည့်ကိရိယာတစ်ခုမှာ ကင်းမျှော်စင်စာပေများအညွှန်းဖြစ်၏။ ယင်းကို သင်အသုံးပြုခွင့်ရှိပါက ယေဟောဝါသက်သေများ၏ သမ္မာကျမ်းစာအခြေပြုစာပေများရှိ သတင်းအချက်အလက်ကို ရှာဖွေဆည်းပူးရန် ၎င်းကိုအသုံးပြုနိုင်သည်။ အကြောင်းအရာအစဉ်လိုက် သို့မဟုတ် ကျမ်းပိုဒ်အလိုက် ဖော်ပြထားသောစာရင်းတွင် သင်ရှာဖွေဆည်းပူးနိုင်ပါသည်။ ယေဟောဝါသက်သေများ ရရှိနိုင်သည့် အဓိကဘာသာစကားများစွာဖြင့် အခြားကိရိယာတစ်ခုမှာ ကင်းမျှော်စင်စာကြည့်တိုက်ဖြစ်၏။ ဤစီဒီရွမ် ကွန်ပျူတာပရိုဂရမ်တွင် အီလက်ထရွန်နစ်ပုံစံဖြင့် စုစည်းထားသည့် စာပေအစုအဝေးကြီးတစ်ခုပါရှိသည်။ ဤပရိုဂရမ်ဖြင့် ကျမ်းစာဆိုင်ရာ ဆွေးနွေးချက်များ၊ အကြောင်းအရာများကို ရှာဖွေလေ့လာနိုင်စေသည်။ သင့်မှာ ဤကိရိယာတစ်မျိုးမဟုတ်တစ်မျိုး သို့မဟုတ် နှစ်မျိုးစလုံးရှိလျှင် အခြားသူများကို သွန်သင်ပေးဖို့အတွက် ဘုရားသခင့်နှုတ်မြွက်စကားတော်ကို သင်လေ့လာရာတွင် ယင်းတို့ကို မှန်မှန်အသုံးပြုပါ။
၁၆၊ ၁၇။ (က) ၁ သက်သာလောနိတ် ၄:၆ တွင်ဖော်ပြထားသည့် အခွင့်အရေးများနှင့်ပတ်သက်၍ ဉာဏ်အလင်းပေးသော မှတ်ချက်များကို အဘယ်နေရာတွင် သင်ရှာတွေ့နိုင်သနည်း။ (ခ) မတရားမေထုန်ပြုခြင်းသည် အဘယ်နည်းများဖြင့် အခြားသူတို့၏အခွင့်အရေးများကို ထိပါးသနည်း။
၁၆ အထက်တွင် ကိုးကားဖော်ပြထားသည့် ၁ သက်သာလောနိတ် ၄:၃-၇ ကို နမူနာယူကြစို့။ အခွင့်အရေးများနှင့်ပတ်သက်၍ မေးခွန်းပေါ်ပေါက်လာသည်။ မည်သူ၏ အခွင့်အရေးနည်း။ ထိုအခွင့်အရေးကို မည်သို့လွန်ကျူးပြစ်မှားနိုင်သနည်း။ ဤကျမ်းချက်များမက ပေါလုရည်ညွှန်းထားသည့် အခွင့်အရေးနှင့်ပတ်သက်၍ ဉာဏ်အလင်းပေးသည့် အကြောင်းအရာအတော်များများကို အထက်တွင်ဖော်ပြထားသည့် လေ့လာမှုကိရိယာများမှ သင်ရရှိနိုင်ပေမည်။ သင့်အားဉာဏ်အလင်းပေးမည့် အကြောင်းအရာများကို ကျမ်းစာစောင်များအပေါ်ထိုးထွင်းသိမြင်ခြင်း အတွဲ ၁၊ စာမျက်နှာ ၈၆၃-၄; စစ်မှန်သောငြိမ်းချမ်းမှုနှင့် လုံခြုံရေး—ယင်းကို သင်မည်သို့ရှာဖွေနိုင်သနည်း၊ စာမျက်နှာ ၁၄၅[လိပ်]; ကင်းမျှော်စင်၊ နိုဝင်ဘာ ၁၅၊ ၁၉၈၉၊ စာမျက်နှာ ၃၁[လိပ်]တို့တွင် သင်တွေ့ရှိနိုင်ပေသည်။
၁၇ ဆက်လေ့လာရာတွင် ပေါလု၏စကား မည်မျှမှန်ကန်ကြောင်း ထိုစာပေများက ဖော်ပြသည်ကို သင်တွေ့ရှိပေမည်။ မတရားမေထုန်ပြုသူတစ်ဦးသည် ဘုရားသခင်ကို ပြစ်မှားပြီး မိမိကိုယ်တိုင်ကိုလည်း ရောဂါများရရှိစေသည်။ (၁ ကောရိန္သု ၆:၁၈၊ ၁၉; ဟေဗြဲ ၁၃:၄) မတရားမေထုန်ပြုသူသည် သူပြစ်မှားသည့် အမျိုးသမီး၏အခွင့်အရေးအသီးသီးကို ထိပါးသည်။ သူ၏ ကိုယ်ကျင့်တရားစင်ကြယ်သောအနေအထားနှင့် ကောင်းသောသိစိတ်တို့ကို ဆုံးရှုံးစေသည်။ ထိုအမျိုးသမီးသည် အပျိုဖြစ်ပါက အပျိုစင်တစ်ဦးအဖြစ် သူ၏အိမ်ထောင်ပြုခွင့်နှင့် သူ့အား အပျိုစင်ဖြစ်စေလိုသော ခင်ပွန်းလောင်း၏အခွင့်အရေးကိုလည်း ထိပါးလိုက်သည်။ ထိုအမျိုးသမီး၏မိဘများနှင့် သူသည် အိမ်ထောင်သည်ဖြစ်ပါက သူ၏ခင်ပွန်းတို့ကို စိတ်ထိခိုက်စေသည်။ အကျင့်ယိုယွင်းသော ထိုအမျိုးသားသည် မိမိ,မိသားစု၏ စင်ကြယ်သောကိုယ်ကျင့်တရားမှတ်တမ်းကို ပျက်စီးယိုယွင်းသွားစေသည်။ သူသည် ခရစ်ယာန်အသင်းတော်သားတစ်ဦးဖြစ်ပါက ၎င်းအသင်းတော်၏နာမည်ကောင်းကို ပျက်စီးစေသည်။—၁ ကောရိန္သု ၅:၁။
၁၈။ ခရစ်ယာန်ကိုယ်ကျင့်တရားနှင့်စပ်လျဉ်း၍ သမ္မာကျမ်းစာလေ့လာမှုမှ သင်မည်သို့အကျိုးရရှိသနည်း။
၁၈ အခွင့်အရေးများနှင့်ပတ်သက်သည့် ထိုမှတ်ချက်များက ထိုအခန်းငယ်၏အဓိပ္ပာယ်ကို ပိုသိနားလည်စေသည်မဟုတ်လော။ ထိုသို့လေ့လာခြင်းသည် အမှန်တကယ်ပင် အကျိုးကြီးလှပေ၏။ သင်သည် ဆက်လက်လေ့လာရာတွင် သင့်ကိုယ်သင် သွန်သင်နေလေသည်။ ဘုရားသခင့်သတင်းတရား၏ မှန်ကန်မှုနှင့် အကျိုးသက်ရောက်မှုလည်း တိုးပွားလာသည်။ အဘယ်သွေးဆောင်မှုမျိုးကို သင်ရင်ဆိုင်ရပါစေ ခရစ်ယာန်ကိုယ်ကျင့်တရားကို ဆုပ်ကိုင်ထားရန် သင်၏ဆုံးဖြတ်ချက်ကို ခိုင်ခံ့မြဲမြံစေသည်။ ထို့ပြင် သင်သည် သွန်သင်သူတစ်ဦးအဖြစ် မည်မျှထိထိရောက်ရောက် သွန်သင်နိုင်မည်ကို စဉ်းစားကြည့်ပါ! ဥပမာ၊ အခြားသူများကို သမ္မာကျမ်းစာအမှန်တရား သွန်သင်ပေးစဉ် ၁ သက်သာလောနိတ် ၄:၃-၇ ကို ထိုးထွင်းသိမြင်စေနိုင်သည်၊ သို့ဖြင့် ခရစ်ယာန်ကိုယ်ကျင့်တရားကို ပိုမိုနားလည်စေ၍ တန်ဖိုးထားလေးမြတ်မှုပိုရှိစေမည်။ သို့နည်းဖြင့် သင်၏လေ့လာမှုသည် သင်နှင့်အခြားသူတို့ကို ဘုရားသခင်အားဂုဏ်တင်စေနိုင်သည်။ ဤတွင် သက်သာလောနိတ်မြို့သားများထံ ပေါလုရေးပို့သည့်စာမှ ပုံနမူနာတစ်ခုကိုသာ ကျွန်ုပ်တို့ဖော်ပြပေးရသေးသည်။ ခရစ်ယာန်ကိုယ်ကျင့်တရားနှင့်ပတ်သက်သည့် အခြားအခန်းကဏ္ဍများစွာရှိပါသည်၊ ထို့အတူ သင်လေ့လာနိုင်၊ လက်တွေ့ကျင့်သုံးနိုင်၊ သွန်သင်နိုင်သည့် သမ္မာကျမ်းစာပုံနမူနာမြောက်မြားစွာနှင့် သွန်သင်ချက်များစွာရှိပါသည်။
၁၉။ ခရစ်ယာန်ကိုယ်ကျင့်တရားကို လိုက်နာစောင့်ထိန်းခြင်းက အဘယ်ကြောင့်အရေးကြီးရသနည်း။
၁၉ ထိုသို့ပြုလုပ်ခြင်းသည် ဉာဏ်ပညာရှိကြောင်း ယုံမှားဖွယ်မရှိချေ။ ယေဟောဝါဘုရားသခင်ထံတော်မှဖြစ်သော “အထက်မှသက်ရောက်သော [ဉာဏ်]ပညာ” သည် “ရှေ့ဦးစွာ စင်ကြယ်” သည်ဟု ယာကုပ် ၃:၁၇ ကဆို၏။ ၎င်းက ဘုရားသခင်၏ကိုယ်ကျင့်တရားစံနှုန်းများကို လိုက်နာရမည်ဟု အတိအလင်းဖော်ပြသည်။ အမှန်မှာ၊ သမ္မာကျမ်းစာကို သွန်သင်ပေးခြင်းဖြင့် ယေဟောဝါအား ကိုယ်စားပြုသူတို့ကိုယ်တိုင်သည် “စင်ကြယ်ခြင်းအရာမှာ” ပုံသက်သေကောင်းများဖြစ်ကြရပေမည်။ (၁ တိမောသေ ၄:၁၂) ပေါလုနှင့်တိမောသေတို့ကဲ့သို့သော အစောပိုင်းအချိန်က နောက်တော်လိုက်များ၏ ဘဝပုံစံများသည် စင်ကြယ်ခြင်းကို ထောက်ခံကြသည်; သူတို့သည် အကျင့်ယိုယွင်းခြင်းကို ရှောင်ကြဉ်ခဲ့ကြ၏၊ ပေါလုဤသို့ပင်ရေးသားခဲ့သည်– “မတရားသောမေထုန်၌မှီဝဲခြင်း၊ အမျိုးမျိုးသောကိလေသာညစ်ညူးခြင်း၊ လောဘလွန်ကျူးခြင်းအမှုများကို သန့်ရှင်းသူတို့သည် ရှောင်သင့်သည်အတိုင်း၊ စကားဖြင့်မျှမဆက်ဆံကြနှင့်။ မတော်မလျော်သောစကား၊ ညစ်ညူးပြက်ပြယ် ပြက်ရယ်သောစကားများကိုလည်း ပယ်[ရှားလော့]။”—ဧဖက် ၅:၃၊ ၄။
၂၀၊ ၂၁။ ၁ ယောဟန် ၅:၃ တွင်မှတ်တမ်းတင်ထားသည့် တမန်တော်ယောဟန် ရေးသားထားသည့်စကားကို သင်အဘယ်ကြောင့်သဘောတူရသနည်း။
၂၀ ဘုရားသခင့်နှုတ်မြွက်စကားတော်တွင် ဖော်ပြထားသည့် ကိုယ်ကျင့်တရားစံနှုန်းများသည် ရှင်းလင်းပြတ်သား၊ တိကျသည်မှန်သော်လည်း ၎င်းတို့သည် ဖိနှိပ်သောဝန်ထုပ်ဝန်ပိုးတစ်ခု မဟုတ်ချေ။ ၎င်းကို အသက်အရှည်ဆုံးတမန်တော် ယောဟန်ရှင်းရှင်းသဘောပေါက်ခဲ့သည်။ ဆယ်စုနှစ်ကျော် သူ၏တွေ့ကြုံမှုအရ ခရစ်ယာန်ကိုယ်ကျင့်တရားသည် ဆိုးကျိုးမပေးကြောင်း သူသိရှိခဲ့သည်။ ထိုသို့ဖြစ်မည့်အစား ၎င်းသည် မွန်မြတ်၏၊ အကျိုးဖြစ်ထွန်း၏၊ ကောင်းချီးတစ်ရပ်လည်းဖြစ်၏။ ယင်းကို ယောဟန်က ဤသို့အလေးအနက်ဖော်ပြသည်– “ထာဝရဘုရားကို ချစ်ခြင်းသည် ကိုယ်တော်၏ ပညတ်တော်တို့ကို စောင့်ထိန်းခြင်းပင်ဖြစ်သည်။ ကိုယ်တော်၏ ပညတ်တော်တို့ကို စောင့်ထိန်းရန် ငါတို့အတွက် ဝန်မလေးပေ။”—၁ ယောဟန် ၅:၃၊ သတင်းကောင်း။
၂၁ ခရစ်ယာန်ကိုယ်ကျင့်တရားရှိခြင်းအားဖြင့် ဘုရားသခင်ကိုနာခံခြင်းသည် ပြဿနာနည်းစေသောကြောင့်သာ သို့မဟုတ် မနာခံခြင်း၏ဆိုးကျိုးမှ ကာကွယ်ပေးသောကြောင့်သာ ၎င်းသည် အကောင်းဆုံးလမ်းစဉ်ဖြစ်သည်ဟု ယောဟန်မဆိုကြောင်းသတိပြုပါ။ ထိုသို့ပြုခြင်းသည် ယေဟောဝါကိုကျွန်ုပ်တို့ချစ်ကြောင်း ဖော်ပြချက်တစ်ရပ်၊ ကိုယ်တော်ကိုချစ်ကြောင်းပြသရန် အခွင့်ထူးတစ်ရပ်ဖြစ်ကြောင်း ဦးဆုံးအသိအမှတ်ပြုခြင်းအားဖြင့် မှန်ကန်သည့်ရှုမြင်ပုံကို သူဖော်ပြခဲ့သည်။ မှန်ပါသည်၊ ဘုရားသခင်အားချစ်မြတ်နိုးရန် မိမိကိုယ်ကိုနှင့် အခြားသူများကို သွန်သင်ခြင်းက ကိုယ်တော်၏မြင့်မြတ်သောစံနှုန်းများကို လက်ခံကျင့်သုံးရန်လိုသည်။ မိမိကိုယ်ကိုလည်းကောင်း၊ အခြားသူများကိုလည်းကောင်း ခရစ်ယာန်ကိုယ်ကျင့်တရား သွန်သင်ပေးခြင်းမည်၏။
[အောက်ခြေမှတ်ချက်များ]
^ အပိုဒ်၊ 8 ဂျိုစီဖတ်စ်က ဂျူးများသည် မလေးမခန့်ပြုနေသူများမဟုတ်ဟု ရေးသားဖော်ပြသော်လည်း ဘုရားသခင့်ပညတ်တော်ကို ဤသို့ထပ်ဆင့်ထွက်ဆိုသည်– “အခြားမြို့များ ကြည်ညိုလေးစားသည့် နတ်ဘုရားများကို မည်သူမျှ မရှုတ်ချစေနှင့်၊ တိုင်းတစ်ပါးဗိမာန်များကို မလုယက်ရ၊ နတ်ဘုရားတစ်ပါးပါးအမည်ဖြင့် ဆက်သထားသည့်ဘဏ္ဍာကို မယူရ။” (ကျွန်ုပ်တို့ စာလုံးစောင်းထား။)—ဂျူးတို့၏ ရှေးဟောင်းနှောင်းဖြစ်များ၊ စာအုပ် ၄၊ အခန်းကြီး ၈၊ စာပိုဒ် ၁၀။
^ အပိုဒ်၊ 9 ဂျူးတို့၏ ရှေးဟောင်းနှောင်းဖြစ်များ၊ စာအုပ် ၁၈၊ အခန်း ၃၊ စာပိုဒ် ၅။
[လေ့လာရန်မေးခွန်းများ]
သင်မှတ်မိသလော
• အခြားသူများကို မသွန်သင်မီ မိမိကိုယ်ကို သွန်သင်ရန် အဘယ်ကြောင့်လေ့လာရမည်နည်း။
• ကျွန်ုပ်တို့၏အပြုအမူက ယေဟောဝါကို မည်သို့ရောင်ပြန်ဟပ်နိုင်သနည်း။
• မတရားမေထုန်ပြုသူသည် မည်သူတို့၏အခွင့်အရေးများကို ထိပါးနိုင်သနည်း။
• ခရစ်ယာန်ကိုယ်ကျင့်တရားနှင့်စပ်လျဉ်း၍ သင်၏စိတ်ဆုံးဖြတ်ချက်ကား အဘယ်နည်း။
[စာမျက်နှာ ၂၂ ပါ ရုပ်ပုံ]
“ကိုယ်တော်၏ ပညတ်တော်တို့ကို စောင့်ထိန်းရန် ကျွန်ုပ်တို့အတွက် ဝန်မလေးပေ”