ရောမ​သမိုင်း​မှ သင်ခန်းစာ​တစ်ရပ်

‘ဧဖက်​မြို့၌ လူ့​သဘော​အတိုင်း ငါသည် သားရဲများ​နှင့်​တိုက်​ခဲ့​ရ​လျှင်’ ဟူသော ၁ ကောရိန္သု ၁၅:၃၂ တွင်​မှတ်တမ်း​တင်ထား​သည့် အဆိုပါ​စကား​များ​က တမန်​တော်​ပေါလု​သည် ရောမ​အရီနာကွင်း​တွင် တိုက်ခိုက်​ရန် စီရင်ချက်​ချ​ခံရ​ခြင်း​ကို​ဆိုလို​သည်​ဟု အချို့​က​ယူဆကြ​၏။ ထိုသို့​သူ​ပြု​သည်​ဖြစ်စေ၊ မပြု​သည်​ဖြစ်စေ သူ၏​ခေတ်တွင် အရီနာကွင်း​များ​၌ သေ​သည်​အထိ တိုက်ခိုက်​ပွဲ​များ ပြုလုပ်​ခဲ့​ခြင်း​သည် အဆန်း​မဟုတ်ပေ။ အရီနာကွင်း​နှင့် ၎င်း​တွင် ကျင်းပ​ခဲ့​သော​ပွဲ​စဉ်​တို့​နှင့်​ပတ်သက်​၍ သမိုင်းက အဘယ်အရာ​ဖော်ပြ​သနည်း။

ခရစ်ယာန်​များ​အနေ​နှင့် ကျွန်ုပ်​တို့သည် ယေဟောဝါ​၏​တွေးခေါ်ပုံ​နှင့်​အညီ ကျွန်ုပ်​တို့၏​သိစိတ်ကို ပုံသွင်း​လို​ကြသည်၊ ယင်းက ခေတ်​သစ်​ဖျော်ဖြေမှု​နှင့်​ပတ်သက်​၍ ဆုံးဖြတ်ချက်​များ​ချရန် ထောက်ကူ​ပေး​နိုင်၏။ ဥပမာ၊ “ကြမ်းကြုတ်သူ​ကို​မငြူစူ​ဘဲ သူ့​အကျင့်​တစ်စုံတစ်ရာ​ကိုလည်း မရွေး​မလိုက်​နှင့်” ဟူသော​စကား​တွင် ထင်ဟပ်​နေသော အကြမ်းဖက်မှု​နှင့်​စပ်လျဉ်း၍ ဘုရားသခင်​၏​တွေးခေါ်ပုံ​ကို စဉ်းစား​သုံးသပ်ကြည့်​ပါ။ (သု. ၃:၃၁၊ သ​မ) အစောပိုင်း​ခရစ်ယာန်​များသည် သူတို့​ဝန်းကျင်ရှိ လူအများ​က ရောမ​ဂလက်ဒီယေတာ သတ်ပုတ်​ပြိုင်ပွဲ​များ​အတွက် စိတ်အားတက်​ကြွ​နေကြ​ချိန်​တွင် သူတို့ကို လမ်းညွှန်​ပေး​စ​ရာ ထို​ဆုံးမ​စကား ရရှိ​ထား​ကြ သည်။ ဤ​ပွဲ​စဉ်​များ​တွင် ဖြစ်ပျက်​ခဲ့​ရာ​ကို စဉ်းစား​သုံးသပ်​သောအခါ မျက်မှောက်ခေတ် ခရစ်ယာန်​များ​အတွက် အဘယ်​သင်ခန်းစာ​ရရှိ​သည်ကို ကြည့်​ကြ​စို့။

ရောမ​အရီနာကွင်း​တစ်​ကွင်း​တွင် လက်နက်ကိုင် ဂလက်ဒီယေတာ​သတ်ပုတ်​သူ​နှစ်ဦး​သည် တစ်ဦး​နှင့်​တစ်ဦး​ရင်ဆိုင်​ကြသည်။ ဒိုင်းလွှား​ကို ဓား​ထိ​လိုက်​သည်​နှင့်​တစ်ပြိုင်နက် အုတ်​အုတ်​သောင်း​သောင်း​ဖြစ်နေ​သော လူအုပ်သည် သူတို့​အနှစ်သက်ဆုံး​လူကို အားပေး​ကြ​၏။ အသည်းအသန်​ထိုး​သတ်​ပွဲ​ဖြစ်သည်။ မကြာမီ ဒဏ်ရာ​ရ​၍ ဆက်​မတိုက်နိုင်​သူသည် လက်နက်များ​ကို​ပစ်ချ​ကာ ဒူးထောက်၍ အရှုံးပေး​ကြောင်း​ဖော်ပြ​ပြီး အသက်​ချမ်းသာပေး​ဖို့ အသနားခံ​လေ​၏။ တဖြည်းဖြည်း​နှင့် ကျွက်​ကျွက်​ဆူညံ​လာ​လေ​တော့​သည်။ လူအုပ်​ထဲ​မှ​အချို့​က သနား​ညှာတာ​ရန်၊ အခြားသူများ​က သတ်ပစ်​ရန် အော်ဟစ်​ကြ​၏။ အားလုံး​၏​အကြည့်​သည် ဧကရာဇ်မင်း​ထံ ရောက်ရှိ​သွား​၏။ လူထု​၏​ဆန္ဒ​ကို​လိုက်လျော​၍ ဧကရာဇ်မင်း​သည် ရှုံးနိမ့်​သည့်​စစ်သူရဲ​ကို လွှတ်​ပေး​နိုင်​သည် သို့​မဟုတ် အမူအရာ​ဖြင့် သတ်မိန့်​ပေး​နိုင်​သည်။

ရောမ​သားတို့​သည် သတ်ပုတ်​ဖျော်ဖြေပွဲ​များ​ကို အလွန်​နှစ်သက်​ကြ​၏။ ဤသို့​သော​တိုက်ခိုက်​ပွဲ​များ​ကို အစပိုင်း​၌ အထင်ကရ​ပုဂ္ဂိုလ်​များ​၏ အသုဘ​အခမ်းအနား​များ​တွင် ကျင်းပ​လေ့​ရှိသည်​ဟု သင်​သိရ​လျှင် အံ့သြ​သွား​မည်။ ထို​သတ်​ပွဲ​များသည် ယခု အီတလီ​အလယ်ပိုင်း​မှ အော့​စ​ကဲ​န် သို့​မဟုတ် ဆဲ​မ်​နို​က်​လူတို့၏ လူ​ယဇ်​ပူဇော်​ခြင်း​မှ မြစ်ဖျားခံ​သည်​ဟု ယူဆကြ​သည်။ ထို​ယဇ်များ​သည် သေလွန်သူ​တို့၏​ဝိညာဉ်​ကို စိတ်​ကျေနပ်​စေရန်​ဖြစ်သည်။ ဤ​ပြိုင်ပွဲ​ကို မူ​နပ်စ် သို့​မဟုတ် “လက်ဆောင်” (ဗဟုဝုစ်ကိန်း၊ မူ​နေရာ) ဟု​ခေါ်​ကြသည်။ ရောမမြို့​တွင် ပထမဦးဆုံး​အကြိမ် မှတ်တမ်း​တင်ထားသော အားကစားပွဲ​များ​ကို နွား​ဈေး​ပွဲ​တွင် သတ်ပုတ်​သူ​သုံး​တွဲ ထိုး​သတ်ခဲ့​ချိန် ဘီ.စီ.အီး. ၂၆၄ ခုနှစ်​၌ ကျင်းပ​ခဲ့​၏။ မား​ကပ်​စ် အေမီ​လီယပ်စ် လီပီဒက်စ်​၏ အသုဘ​အခမ်းအနား​တွင် စီး​ချင်း​ထိုး​ပွဲ​ပေါင်း ၂၂ ပွဲ​ရှိခဲ့​သည်။ ပါ​ဘ​လီယက်စ် လီ​စီ​နီ​ယက်စ်​၏ အသုဘ​အခမ်းအနား​တွင် အတွဲ​ပေါင်း ၆၀ တိုက်​ခဲ့​ကြသည်။ ဘီ.စီ.အီး. ၆၅ ခုနှစ်​တွင် ဂျူးလီယက်ဆီဇာ​သည် အရီနာကွင်း​ထဲ​သို့ အတွဲ​ပေါင်း ၃၂၀ စေလွှတ်ခဲ့​၏။

“အထက်တန်းလွှာ အသုဘ​အခမ်းအနား​များသည် နိုင်ငံရေး​ပွဲ​များ​ဖြစ်​ခဲ့​ကြ​ပြီး အသုဘ​အားကစားပွဲ​များသည် နိုင်ငံရေး​နှင့်​ဆက်နွှယ်​၏။ . . . အကြောင်း​မှာ မဲ​ထည့်​သူ​ပြည်သူ​လူထု ကြိုက်​နှစ်သက်သော​ကြောင့်​ဖြစ်၏။ အမှန်​ဆို​ရ​လျှင် ဂလက်ဒီယေတာ​ပွဲ​များ တဖြည်းဖြည်း​ပိုမို​ခမ်းနား​ကြီးကျယ်​လာ​ရခြင်း​မှာ အဓိက​အားဖြင့် ရည်မှန်းချက်​ကြီးသော အထက်တန်း​စား​များ​၏ နိုင်ငံရေး​ပြိုင်ဆိုင်မှု​ကြောင့်​ဖြစ်သည်” ဟု​သမိုင်း​ပညာရှင် ကိသ် ဟော့ပ်​ကင်​စ်​က ဆို​၏။ ဩ​ဂတ်​စ်​တပ်​စ်​အုပ်စိုးချိန် (ဘီ.စီ.အီး. ၂၇ မှ စီ.အီး. ၁၄) တိုင်​လေ​သော် မူ​နေရာ​သည် လူကုံထံ​အစိုးရ​အရာရှိများ​က သူတို့​ရာထူး​သက်တမ်း​တိုး​ဖို့—လူထု​၏​ဖျော်ဖြေမှု—အတွက် အလျှံပယ်​ပေးကမ်း​သော လက်ဆောင်​များ​ဖြစ်လာ​လေ​သည်။

ပါဝင်​ယှဉ်ပြိုင်​သူများ​နှင့် လေ့ကျင့်ရေး​သင်တန်း

‘က​လက်​ဒီ​ယေ​တာ​သတ်ပုတ်​သူများ​ကား မည်သူ​တို့​နည်း’ ဟု​သင်​မေး​ပေမည်။ သူတို့​ကား ကျေးကျွန်​များ၊ သေမိန့်ချ​ခံရ​သော ရာဇဝတ်ကောင်​များ၊ စစ်သုံ့ပန်း​များ သို့​မဟုတ် သည်းထိတ်ရင်ဖို​လို​သော၊ ကျော်ကြား​ပြီး ချမ်းသာ​လို​သော လူလွတ်​များ​ဖြစ်​ကြ​ပေမည်။ သူတို့​အားလုံး​သည် အကျဉ်းထောင်​နှင့်​တူသော ကျောင်း​များ​တွင် လေ့ကျင့်ပေး​ခံရ​ကြ​၏။ ဂလက်ဒီယေတာ​များ​ဖြစ်​ရန် လေ့ကျင့်မှု ခံယူ​နေ​သူများကို “စောင့်ကြပ်​သူများ​က အမြဲ​ပင် စောင့်ကြည့်​နေတတ်​ပြီး တင်းကျပ်သော စည်းကမ်း၊ စည်းမျဉ်း​များ​ထုတ်​၍ အထူးသဖြင့် ရက်စက်​ကြမ်းတမ်း​စွာ အပြစ်ဒဏ်​များ ပေး​ခဲ့​ကြ​၏။ . . . ဤသို့​ဆက်ဆံခံရ​သည့်​အတွက် သေကြောင်းကြံ​ခြင်း၊ တော်လှန်​ပုန်ကန်ခြင်း​တို့ ဖြစ်လေ့​ရှိ၏” ဟု​ဂျို​ခီ အီ စ​ပက်​တေ​ကို​လီ (အားကစားပွဲ​တော်​များ) စာအုပ်​က ဖော်ပြ​သည်။ ရောမ​နိုင်ငံ​၏ အကြီးဆုံး​ဂလက်ဒီယေတာ သင်တန်း​ကျောင်းတွင် အနည်းဆုံး အကျဉ်းသား​တစ်ထောင်​အတွက် အခန်း​များ​ရှိသည်။ သူတို့​အားလုံး​မှာ အထူး​ကျွမ်းကျင်​မှု တစ်မျိုးစီ​ရှိကြ​၏။ အချို့​သည် သံချပ်​ဝတ်စုံ၊ ဒိုင်းလွှား၊ ဓား​တို့​နှင့် တခြား​သူများ​မှာ ပိုက်ကွန်၊ အသွား​သုံးချောင်း​ပါ​မှိန်း​တို့​ဖြင့် ထိုး​သတ်​ကြ​၏။ လူကြိုက်များ​သော တောလိုက်​ပုံစံ​မျိုး​ဖြင့် တောရိုင်း​တိရစ္ဆာန်​များနှင့် ရင်ဆိုင်​ရသော ထိုး​သတ်​ပွဲ​အတွက် အခြားသူများ​ကိုလည်း လေ့ကျင့်ပေး​ကြ​၏။ ဤသို့​သော​ပွဲ​စဉ်​မျိုးကို ပေါလု​ရည်ညွှန်းခဲ့​ခြင်း​ဖြစ်​မည်​လော။

ဤ​ထိုး​သတ်​ပွဲ​များ​ကို စီစဉ်သူ​တို့သည် သတ်ပုတ်​သူများ​ဖြစ်လာ​ရန် ၁၇ နှစ်၊ ၁၈ နှစ်အရွယ် လူငယ်များ​ကို စုဆောင်း​လေ့ကျင့်ပေး​သည့် လုပ်ငန်းရှင်​များ​မှ အကူအညီ​ရယူ​နိုင်​ကြသည်။ ထို​အချိန်​က သက်ရှိ​များ​ကို ကူး​သန်း​ရောင်းဝယ်ခြင်း​သည် ဝင်ငွေ​ကောင်းသော လုပ်ငန်း ကြီး​တစ်ခု​ဖြစ်သည်။ စစ်​အောင်ပွဲခံ​ရန် ထ​ရာ​ဂျင်​စီစဉ်​သည့် အထူး​ပွဲ​စဉ်​တစ်ခု​တွင် သတ်ပုတ်​သူ ၁၀,၀၀၀ နှင့်​တိရစ္ဆာန် ၁၁,၀၀၀ ကို​ကွင်း​ဆင်း​ထိုး​သတ်​စေ​ခဲ့​သည်။

အရီနာကွင်း​၌ တစ်နေ့တာ​အဖြစ်အပျက်

အရီနာကွင်း​နံနက်ခင်း​များ​တွင် တောလိုက်​ကြ​၏။ တောရိုင်း​တိရစ္ဆာန်​အမျိုးမျိုးကို အရီနာကွင်း​ထဲ မောင်း​လွှတ်​ကြသည်။ ပရိသတ်​က နွား​သိုး​နှင့် ဝက်ဝံ​ကို​တွဲ​လွှတ်လျှင် အထူး​သဘောကျ​၏။ တစ်ခါတစ်ရံ ထို​တိရစ္ဆာန်​နှစ်ကောင်ကို ပူး​ချည်​ထား​လေ့​ရှိရာ တစ်ကောင်​မသေ​မချင်း ကိုက်​ကြ​၏၊ ထို့နောက် မသေ​ဘဲ​ကျန်​သည့်​အကောင်​ကို မုဆိုး​က​ပစ်သတ်​လိုက်​၏။ လူကြိုက်များ​သော တခြား​ပွဲ​စဉ်​များ​မှာ ခြင်္သေ့​နှင့်​ကျား၊ ဆင်​နှင့်​ဝက်ဝံ​တို့၏ သတ်​ပွဲ​များ​ဖြစ်သည်။ မည်မျှ​ပင်​ကုန်ကျ​ပါစေ အင်ပါယာ​တစ်လျှောက်​ရှိ နိုင်ငံ​အသီးသီး​မှ တိရစ္ဆာန်​များ​ဖြစ်သည့် ကျားသစ်​များ၊ ကြံ့​များ၊ ရေမြင်း​များ၊ သစ်​ကုလားအုတ်​များ၊ ဟို​င်​အီး​နား​များ၊ ကုလားအုတ်​များ၊ ဝံပုလွေ​များ၊ တော​ဝက်​များနှင့် တော​ဆိတ်​များ​ကို ယူဆောင်​လာပြီး မုဆိုး​များ​က အစွမ်း​ပြ​ထိုး​သတ်​ကြ​ရ၏။

ဤ​တောလိုက်​ပွဲ​စဉ်​များ​၏ သဘာဝ​ရှုခင်း​ပုံစံ ခံစားမှု​ရ​သ​များ​က ၎င်းတို့ကို မေ့​မရနိုင်​အောင်​ဖြစ်စေ​ခဲ့​သည်။ ကျောက်တုံး​ကျောက်ဆောင်​များ၊ ရေကန်​များ၊ သစ်ပင်​များ​အစ​ရှိသည်​တို့​ဖြင့် သစ်တော​ပုံစံ​ဖန်တီး​ထား​၏။ အရီနာကွင်း​အချို့​တွင် တောရိုင်း​တိရစ္ဆာန်​များသည် မြေအောက်​ဓာတ်​လှေကား​မှ​လည်းကောင်း၊ အံ​ဝှက်​တံခါး​မှ​လည်းကောင်း မျက်​လှည့်​ပ​မာ ရုတ်တရက်​ပေါ်ထွက်​လာ​ကြသည်။ ကြိုတင်​ခန့်မှန်း​၍​မရနိုင်​သော တိရစ္ဆာန်​အမူအကျင့်​က​လည်း စိတ်ဝင်စားစရာ​ကောင်း​သည်၊ သို့သော် ဤ​တောလိုက်​ပွဲ​စဉ်​များ​ကို အထူးသဖြင့် စိတ်ဝင်စားစရာ​ဖြစ်စေ​သည်​ကား ရက်စက်​ကြမ်းကြုတ်မှု​ဖြစ်သည်။

၎င်း​ပွဲ​စဉ်​များ​ပြီး​နောက် လူသတ်​ပွဲ​များ​ကို စီစဉ်​ထား​၏။ ယင်း​တို့ကို အသစ်အဆန်း​တီထွင်​ပြီး တင်ဆက်​ပြ​ကြ​၏။ ဒဏ္ဍာရီ​ပုံပြင်​များ​ကို ပြဇာတ်​အနေ​နှင့် တင်ဆက်​ခဲ့​ကြ​ပြီး ဇာတ်​ဆောင်​များသည် တကယ်​ပင်​သေဆုံး​သွား​ကြ​ရ၏။

နေ့လယ်​ပိုင်း​တွင် ထူးခြား​စွာ လက်နက်ကိုင်​ဆောင်ထား​ပြီး နည်း​ပညာ​အမျိုးမျိုး​တတ်ကျွမ်း​သော သတ်ပုတ်​အုပ်စု​အသီးသီး​သည် တစ်စု​ကိုတစ်​စု ထိုး​သတ်​ကြ​၏။ လူသေကောင်​များ​ကို တ​ရွတ်​တိုက်​ဆွဲ​ယူသွား​သူ​အချို့​သည် သေမင်းတမန်​ပ​မာ ဝတ်ဆင်​ထား​ကြ​၏။

ပွဲ​ကြည့်​ပရိသတ်​အပေါ် သက်ရောက်မှု

ထိုး​သတ်​ခြင်း​နှင့်​ပတ်သက်​၍ လူအုပ်​များ​၏​ဆန္ဒ အတော​မ​သတ်​နိုင်သော​ကြောင့် စိတ်​မ​ပါ့​တ​ပါ ထိုး​သတ်​နေ​သူများကို ကြာပွတ်​ဖြင့်​ရိုက်နှက်၍၊ သံပူ​ကပ်​၍ သွေးထိုး​ပေး​ကြသည်။ လူအုပ်​က “ဓားကို​များ ဒီလောက်တောင် ကြောက်​နေရ​သလား။ ရဲ​ရဲ​ထိုး​လိုက်ပါလား။ သေ​လိုက်​စမ်း​ပါ​လား။ ကြာပွတ်​နဲ့​နာနာ ရိုက်​စမ်း​ပါ! ဓား​ထုတ်ပြီး ပြန်​ချပါ​လား!” ဟု​အော်ဟစ်​ကြိမ်းမောင်း​ကြသည်။ အားလပ်ချိန်​တစ်ချိန်​တွင် ဤသို့​ကြေညာ​ခဲ့​ကြောင်း ရောမ​ခေါင်းဆောင် စီ​နီ​ကာ​က ရေးသား​ဖော်ပြ​ခဲ့​သည်– “ဆက်လက်​ရှုစား​စ​ရာ​က​တော့ လည်ပင်း​ဖြတ်​ပါ​တော့​မယ်။”

အိမ်ပြန်ရောက်​ချိန်​တွင် မိမိသည် “ပိုမို​ရက်စက်​ကြမ်းတမ်း” လာ​၏​ဟု စီ​နီ​ကာ​ဝန်ခံခဲ့​ခြင်း​သည် အံ့ဩစရာ​မဟုတ်ပေ။ ထို​ပွဲ​ကြည့်​သူ၏ ရိုးသား​ပွင့်လင်း​သော​ဝန်ခံချက်​ကို ကျွန်ုပ်​တို့​အလေးအနက်​ထား စဉ်းစား​သင့်​သည်။ မျက်မှောက်ခေတ် အားကစားပွဲ​စဉ်​အချို့​ကို ကြည့်ရှု​သူများ​လည်း ထပ်တူ​ပင် “ပိုမို​ရက်စက်​ကြမ်းတမ်း” လာနိုင်​မည်​လော။

အချို့​က အိမ်ပြန်ရောက်​လာနိုင်​သည့်​အတွက် ကျေးဇူး​တင်​ကြ​မည်။ ပွဲ​ကြည့်​ပရိသတ်​တစ်ဦး​သည် ဧကရာဇ်မင်း​ဒိုမီရှန်​ကို ထိပါး​ပြောဆို​မိ​သဖြင့် ထို​ဧကရာဇ်​က သူ့ကို ထိုင်ခုံ​မှ​ဆွဲချ​ပြီး ခွေး​များ​ကို ပစ်​ကျွေး​စေ​ခဲ့​သည်။ ကာလီ​ဂူ​လာ​သည် ကွပ်မျက်​ရန် ရာဇဝတ်ကောင် များ အလုံအလောက်​မရှိ​သဖြင့် လူအုပ်​တစ်ပိုင်း​ကို ဖမ်းဆီး​၍ တောရိုင်း​တိရစ္ဆာန်​များ​ကို ပစ်​ကျွေး​စေ​ခဲ့​သည်။ ဇာတ်​စင်​၏​စက်ကိရိယာ​ကို က​လော​ဒီ​ယပ်စ် စိတ်​တိုင်း​မကျ​သည့်​အတွက် ဇာတ်​တာဝန်ခံ​များ​ကို အရီနာကွင်း​ထဲ​ဆင်း​ပြီး ထိုး​သတ်​စေ​ခဲ့​၏။

အရူးအမူး​ဖြစ်နေ​ကြသော ပွဲ​ကြည့်​ပရိသတ်​ကြောင့်​လည်း အကြီးအကျယ်​ပြဿနာ​တက်ပြီး ဆူပူအုံကြွ​မှုများ ဖြစ်ပေါ်​ခဲ့​သည်။ ရောမမြို့​မြောက်ဘက်​ရှိ အမိုး​ဖွင့်ပွဲ​ကြည့်​စင်​ဝိုင်း​တစ်ခု ပြိုကျ​သွားခဲ့​ရာ ထောင်နှင့်ချီ​၍​သေဆုံး​ခဲ့​သည်​ဟု​ဆို​၏။ စီ.အီး. ၅၉ ခုနှစ်၊ ပွန်ပေ​မြို့၌​ကျင်းပ​သော​ပွဲ​စဉ်​တစ်ခု​တွင် အဓိကရုဏ်း​ဖြစ်ပွား​ခဲ့​သည်။ အိမ်ရှင်​လူအုပ်​နှင့် အနီးအနား​မြို့​တစ်မြို့​မှ ပြိုင်ဘက်​များသည် အပြန်အလှန်​စကား​များ​ကြ​ပြီး ခဲ​များနှင့်​ပေါက်​ကြ​၍ အဆုံး​တွင် ဓား​ချင်း​ခုတ်​ကြသည်​ဟု တက်စီတပ်စ်​က​ဆို​သည်။ အတော်များများ ကိုယ်လက်​အင်္ဂါများ​ပြတ်​၍ ဒဏ်ရာ​ရခဲ့​ကြ​၏၊ သတ်ဖြတ်​ခံ​ခဲ့​ရသူ​များလည်း မနည်း​ချေ။

ရှင်းလင်း​ပြတ်သား​သော သင်ခန်းစာ​တစ်ရပ်

ရောမမြို့​ရှိ ကော်​လော​စီ​ယမ်​ခေါ် အမိုး​ဖွင့်ပွဲ​ကြည့်​စင်​ကြီး​တွင် မကြာသေးမီ​က​ခင်းကျင်း​ခဲ့​သော ပြပွဲ​တစ်ခု (ဆန်​ဂ​ရူး အီ အ​ရီ​နာ၊ “သွေး​မြေ”) သည် မူ​နေရာ​နှင့်​ဆင်​သော မျက်မှောက်ခေတ်​ဆင်တူချက်​များ​ကို အမှတ်ရ​စေ​သည်။ ထူးခြား​သည်​မှာ လူ​နှင့်​နွား​ရိုင်း​သတ်​ပွဲ၊ ကြေးစား​လက်ဝှေ့​ပွဲ၊ ကား၊ မော်တော်​ဆိုင်ကယ် ပြိုင်ပွဲ​များ​တွင် ကြောက်မက်​ဖွယ် ထိခိုက်မှု​များ၊ ပွဲ​စဉ်​များ​အတွင်း အားကစားသမား​များ​၏ ပရမ်းပတာ​တိုက်ခိုက်မှု​များနှင့် ပွဲ​ကြည့်​ပရိသတ်​၏​ဆူပူ​သောင်းကျန်းမှု​များ အစ​ရှိသည်​တို့၏ ဗီဒီယို​ပြကွက်​များ​ကို​ဖော်ပြ​ခဲ့​သည်။ ၎င်း​ပြပွဲ​၏​အဆုံး​တွင် ကောင်းကင်​မှ​ရိုက်​ထားသော ကော်​လော​စီ​ယမ်​၏​ဓာတ်​ပုံ​ကို ဖော်ပြ​ထား​၏။ ပြပွဲ​လာ​သူများ မည်သို့​ကောက်ချက်​ချ​ကြ​မည်​ကို သင်​ထင်​သနည်း။ မည်မျှ​သော​သူတို့ သင်ခန်းစာ​ရ​ကြ​မည်​နည်း။

ယနေ့ နိုင်ငံ​အချို့​တွင် ခွေး​တိုက်ပွဲ၊ ကြက်တိုက်ပွဲ၊ လူ​နှင့်​နွား​ရိုင်း​သတ်​ပွဲ​နှင့် တုန်လှုပ်​ချောက်ချား​ဖွယ် အားကစားပွဲ​များသည် အဆန်း​မဟုတ်​တော့​ချေ။ ကား​ပြိုင်ပွဲ​များ​တွင် လူအုပ်​ကို သည်းထိတ်ရင်ဖို​ဖြစ်စေ​ရန် အသက်စွန့် ပြိုင်ပွဲဝင်​ကြ​၏။ နေ့စဉ် ရုပ်မြင်သံကြား​ဇာတ်လမ်း​များ​ကိုလည်း သုံးသပ်ကြည့်​ပါ။ အနောက်​တိုင်း နိုင်ငံ​တစ်နိုင်ငံ​တွင် သုံးသပ်ချက်​များ​အရ ရုပ်မြင်သံကြား​ကြည့်ရှု​သူ သာမန်​ကလေး​တစ်ဦး​သည် အသက်​ဆယ်နှစ်​ရောက်ချိန်​တွင် လူသတ်မှု ၁၀,၀၀၀ နှင့်​ခိုက်ရန်​ဒေါသ​ဖြစ်မှု ၁၀၀,၀၀၀ ကို​မြင်တွေ့​နှင့်​ခဲ့ပြီ​ဟု ဖော်ပြ​ခဲ့​၏။

၎င်း​မြင်ကွင်း​များ​ကို ကျေနပ်​အားရ​ခြင်း​သည် “စစ်မှန်သော​ဘာသာ၊ စစ်မှန်သော​ဘုရားသခင်​ကို အမှန်တကယ်​နာခံမှု​ရှိ​ခြင်း​တို့​နှင့် မအပ်စပ်” ဟု တတိယ​ရာစု စာရေး​ဆရာ တာတူလျန်​က​ဆို​သည်။ ၎င်းတို့ကို သွားရောက်​ကြည့်ရှု​သူများ​သည် သတ်ဖြတ်​သူများ​နှင့် ကြံရာပါ​ဖြစ်သည်ဟု သူက ဆင်ခြင်​သုံးသပ်​ခဲ့​၏။ ယနေ့​ကော အသို့နည်း။ မိမိကိုယ်ကို​မေးသင့်​သည်​မှာ ‘ရုပ်မြင်သံကြား၊ ဒါမှ​မဟုတ် အင်တာနက်​ပေါ် ငါ​ကြည့်ရှု​နေတဲ့ သွေးထွက်သံယို​မှု၊ သတ်ဖြတ်မှု၊ အကြမ်းဖက်မှု​တို့​နဲ့ ငါ​ဖျော်ဖြေ​နေ​သလား’ ဟု​ဖြစ်သည်။ ဆာလံ ၁၁:၅ [သမ္မာ] က “ထာဝရ​ဘုရား[သခင်]သည် ဖြောင့်မတ်​သော​သူကို စစ်ဆေး​တော်​မူ​၍ ဆိုးသော​သူနှင့် ကြမ်းကြုတ်ခြင်း နှစ်သက်သော​သူကို မုန်းတော်မူ​၏” ဟု​ဖော်ပြ​ထား​ကြောင်း သတိရ​သင့်​သည်။

[စာမျက်နှာ ၂၈ ပါ လေးထောင့်ကွက်]

“သေလွန်သူ​များ ကျေနပ်​စေ” ရန်​ထိုး​သတ်​ပွဲ​များ

ဂလက်ဒီယေတာ​ပြိုင်ပွဲ​၏ မူလအစ​နှင့်​ပတ်သက်​၍ တတိယ​ရာစု စာရေး​ဆရာ တာတူလျန်​က ဤသို့​ဆို​သည်– “ရှေးခေတ်​လူတို့သည် ပိုမို​ယဉ်ကျေး​သည့်​အသွင်ဆောင်​သော ရက်စက်မှု​ဖြင့် အစွန်း​မ​ရောက်​စေပြီး​နောက် ယင်း​သို့​သော​ပွဲသဘင်​မျိုး​ဖြင့် သေလွန်သူ​များ​ကို အမှုဆောင်​သည်​ဟု သူတို့​ယူဆ​ခဲ့​ကြသည်။ ရှေး​အခါ​က သေလွန်သူ​များ​၏​ဝိညာဉ်​တို့ကို လူ့​အသွေး​နှင့် ပူဇော်​ပ​သ​ကြ​ရသည့်​အယူ​ဖြင့် အသုဘ​အခမ်းအနား​များ​တွင် သုံ့ပန်းများ သို့​မဟုတ် သူတို့​ဝယ်ထား​သည့် သိ​မ်ဖျင်း​သော ကျွန်​သ​ပေါက်​များ​ကို ပူဇော်​လေ့​ရှိကြ​၏။ ထို့နောက် သူတို့၏​ဘုရားတရား​ကင်းမဲ့မှု​ကို မထင်ရှား​စေရန် အပျော်အပါး​အဖြစ် ထိုသို့​ပြုလုပ်​ကြ​လေ​သည်။ ထို့​ကြောင့် စုဆောင်း​ထား​သူများ​အား ၎င်း​အချိန်တွင်​ရှိသော လက်နက်များ​ကို ကျွမ်းကျင်​စွာ​အသုံးပြု​တတ်​ရန်၊ အသတ်ခံ​တတ်​ရန် လေ့ကျင့်ပေး​ပြီး​နောက် သတ်မှတ်​ထားသော အသုဘ​အခမ်းအနား​တွင် သင်္ချိုင်း​မြေ​၌ သူတို့ကို အချင်းချင်း​သတ်ဖြတ်​စေ​ခဲ့​သည်။။ ထိုသို့​ဖြင့် လူသတ်မှု​မှ သူတို့​နှစ်သိမ့်မှု​ရရှိကြ​၏။ ယင်းသည် မူ​နပ်စ် ၏​မူလအစ​ဖြစ်သည်။ သို့သော် တဖြည်းဖြည်း​နှင့် သူတို့၏​ရက်စက်​ကြမ်းကြုတ်မှု​သည် ပိုမို​ဆိုးရွား​လာ​ရာ တောရိုင်း​တိရစ္ဆာန်​များ လူ့​ကိုယ်ခန္ဓာ​ကို တစ်စစီ​ဆုတ်​ဖြတ်ပစ်​ခြင်း​မပါ​လျှင် သူတို့​အပြည့်အဝ မပျော်ရွှင်​နိုင်​တော့​ချေ။ သေလွန်သူ​များ ကျေနပ်​စေရန် ပူဇော်​ပ​သ​ခြင်း​သည် အသုဘ​အခမ်းအနား​တစ်ခု​ဖြစ်လာ​လေ​၏။”

[စာမျက်နှာ ၂၇ ပါ ရုပ်ပုံ]

ရှေးခေတ် ဂလက်ဒီယေတာ​ခမောက်​နှင့် ညို့သ​ကျ​ည်း​အကာ

[စာမျက်နှာ ၂၉ ပါ ရုပ်ပုံ]

ရှေးခေတ်​ခရစ်ယာန်​များသည် အကြမ်းဖက်​ဖျော်ဖြေမှု​ကို လက်မခံနိုင်​ကြ​ချေ။ အသင်​ကော

[Credit Lines]

Boxing: Dave Kingdon/Index Stock Photography; car crash: AP Photo/Martin Seppala

[Picture Credit Line on page 26]

Phoenix Art Museum, Arizona/Bridgeman Art Library