အလှည့်ဖြား မခံပါနှင့်
အလှည့်ဖြား မခံပါနှင့်
ကမ္ဘာပေါ် လူတည်ရှိပြီးမကြာမီ လှည့်ဖြားခြင်းရှိခဲ့သည်။ ပထမဦးဆုံးသမိုင်းဝင်အဖြစ်အပျက်တစ်ခုမှာ လှည့်ဖြားမှုဖြစ်သည်။ ဧဒင်ဥယျာဉ်၌ ဧဝကို စာတန်လှည့်ဖြားခဲ့ချိန်ကဖြစ်သည်။—ကမ္ဘာဦး ၃:၁၃; ၁ တိမောသေ ၂:၁၄။
ထိုအချိန်မှစ၍ မြေကြီးပေါ်တွင် ယခုအချိန်လောက် တစ်ခါမျှလှည့်ဖြားခြင်းပျံ့နှံ့ခဲ့သည့်အချိန် မရှိခဲ့ဖူးချေ။ သမ္မာကျမ်းစာက မျက်မှောက်ခေတ်ကို ကြိုမြင်၍ ဤသို့သတိပေးခဲ့သည်– “ဆိုးညစ်သောသူ၊ လှည့်ဖြားသောသူတို့မူကား သူတစ်ပါးကိုလည်းကောင်း၊ ကိုယ်ကိုလည်းကောင်းလှည့်ဖြား၍ ဆိုးညစ်ခြင်း၌ တရွေ့ရွေ့တိုးပွားကြလိမ့်မည်။”—၂ တိမောသေ ၃:၁၃။
နည်းအမျိုးမျိုးဖြင့် ယနေ့ လူတို့ကိုလှည့်ဖြားနေကြသည်။ တစ်ပတ်ရိုက်သူများနှင့် အယုံသွင်းလိမ်လည်သူများသည် အလိမ်ခံရသူများ၏ငွေကို လှည့်ဖြားယူကြသည်။ နိုင်ငံရေးသမားအချို့သည် မည်သည့်နည်းဖြင့်မဆို အာဏာလက်ရှိဖြစ်ဖို့ မဲဆန္ဒရှင်များကို လှည့်ဖြားကြသည်။ မိမိတို့ကိုယ်ကိုပင် လူတို့လှည့်စားတတ်ကြသည်။ အမှန်တရားကို နှစ်သက်လက်ခံမည့်အစား ဆေးလိပ်သောက်ခြင်း၊ မူးယစ်ဆေးအလွဲသုံးခြင်း သို့မဟုတ် လိင်အကျင့်ယိုယွင်းခြင်းစသည့် ဘေးသင့်သောအမူအကျင့်များ၌ အန္တရာယ်မရှိပါဟု သူတို့ဆိုကြသည်။
ထို့ပြင် ဘာသာရေးကိစ္စများတွင်လည်း လှည့်ဖြားခြင်းရှိသည်။ ယေရှုခေတ်မှ ဘာသာရေးခေါင်းဆောင်များသည် လူတို့ကိုလှည့်ဖြားခဲ့ကြသည်။ ထိုလှည့်ဖြားသူများနှင့်စပ်လျဉ်း၍ ယေရှုဤသို့မိန့်တော်မူခဲ့သည်– “လူကန်းတို့အားလမ်းပြသော လူကန်းဖြစ်ကြ၏။ လူကန်းချင်း တစ်ဦးကိုတစ်ဦးလမ်းပြလျှင်၊ နှစ်ဦးတို့သည် တွင်းထဲကျကြလိမ့်မည်။” (မဿဲ ၁၅:၁၄) ထို့ပြင် ဘာသာရေးကိစ္စများတွင် မိမိတို့ကိုယ်ကို လူတို့လှည့်စားကြသည်။ နယပုံပြင် ၁၄:၁၂ ကဤသို့ဆို၏– “လူထင်သည်အတိုင်း မှန်သောလက္ခဏာရှိသော်လည်း အဆုံး၌ သေခြင်းသို့ပို့သော လမ်းတစ်မျိုးရှိ၏။”
ယေရှုခေတ်ကကဲ့သို့ ယနေ့ လူအများသည် ဘာသာရေးကိစ္စ၌ လှည့်ဖြားခံနေရကြသည်၊ ယင်းသည် အံ့အားသင့်စရာမဟုတ်ပေ! အကြောင်းမူကား စာတန်သည် “ဘုရားသခင်၏ပုံသဏ္ဌာန်တော်တည်းဟူသော ခရစ်တော်၏ဘုန်းအသရေနှင့် ပြည့်စုံသော ဧဝံဂေလိတရား၏အရောင် . . . အလင်းကိုမပေးစေခြင်းငှာ . . . သူတို့၏ဉာဏ်မျက်စိကို ကွယ်စေ၏” ဟုတမန်တော်ပေါလုဆိုခဲ့သည်။—၂ ကောရိန္သု ၄:၄။
လူလိမ်တစ်ဦး၏လှည့်ဖြားခြင်းကို ကျွန်ုပ်တို့ခံရလျှင် ငွေဆုံးရှုံးသည်။ နိုင်ငံရေးသမားတစ်ဦး၏ လှည့်ဖြားမှုခံရလျှင် ကျွန်ုပ်တို့၏လွတ်လပ်မှု အချို့ကို ဆုံးရှုံးသွားနိုင်သည်။ သို့သော် ယေရှုခရစ်အကြောင်း အမှန်တရားကိုငြင်းပယ်သည်အထိ စာတန်၏လှည့်ဖြားခြင်းကို ကျွန်ုပ်တို့ခံရပါက ထာဝရအသက် ဆုံးရှုံးပေမည်! ထို့ကြောင့် အလှည့်ဖြားမခံပါနှင့်။ စောဒကမတက်နိုင်သော ဘာသာတရားဆိုင်ရာ အမှန်တရားတစ်ခုတည်းဖြစ်သည့် သမ္မာကျမ်းစာကို သဘောထားကြီးကြီးဖြင့် ဆင်ခြင်သုံးသပ်ကြည့်ပါ။ ထိုသို့မပြုပါက ကြီးမားသောအကျိုးကျေးဇူးကို သင်လက်လွတ်ဆုံးရှုံးသွားရပေလိမ့်မည်။—ယောဟန် ၁၇:၃။